| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৫. অনুস্সতিট্ঠানসুত্তং
5. Anussatiṭṭhānasuttaṃ
২৫. ‘‘ছযিমানি , ভিক্খৰে, অনুস্সতিট্ঠানানি। কতমানি ছ? ইধ, ভিক্খৰে, অরিযসাৰকো তথাগতং অনুস্সরতি – ‘ইতিপি সো ভগৰা…পে॰… সত্থা দেৰমনুস্সানং বুদ্ধো ভগৰা’তি। যস্মিং, ভিক্খৰে, সমযে অরিযসাৰকো তথাগতং অনুস্সরতি, নেৰস্স তস্মিং সমযে রাগপরিযুট্ঠিতং চিত্তং হোতি, ন দোসপরিযুট্ঠিতং চিত্তং হোতি, ন মোহপরিযুট্ঠিতং চিত্তং হোতি; উজুগতমেৰস্স তস্মিং সমযে চিত্তং হোতি, নিক্খন্তং মুত্তং ৰুট্ঠিতং গেধম্হা। ‘গেধো’তি খো, ভিক্খৰে, পঞ্চন্নেতং কামগুণানং অধিৰচনং। ইদম্পি খো, ভিক্খৰে, আরম্মণং করিত্ৰা এৰমিধেকচ্চে সত্তা ৰিসুজ্ঝন্তি।
25. ‘‘Chayimāni , bhikkhave, anussatiṭṭhānāni. Katamāni cha? Idha, bhikkhave, ariyasāvako tathāgataṃ anussarati – ‘itipi so bhagavā…pe… satthā devamanussānaṃ buddho bhagavā’ti. Yasmiṃ, bhikkhave, samaye ariyasāvako tathāgataṃ anussarati, nevassa tasmiṃ samaye rāgapariyuṭṭhitaṃ cittaṃ hoti, na dosapariyuṭṭhitaṃ cittaṃ hoti, na mohapariyuṭṭhitaṃ cittaṃ hoti; ujugatamevassa tasmiṃ samaye cittaṃ hoti, nikkhantaṃ muttaṃ vuṭṭhitaṃ gedhamhā. ‘Gedho’ti kho, bhikkhave, pañcannetaṃ kāmaguṇānaṃ adhivacanaṃ. Idampi kho, bhikkhave, ārammaṇaṃ karitvā evamidhekacce sattā visujjhanti.
‘‘পুন চপরং, ভিক্খৰে, অরিযসাৰকো ধম্মং অনুস্সরতি – ‘স্ৰাক্খাতো ভগৰতা ধম্মো…পে॰… পচ্চত্তং ৰেদিতব্বো ৰিঞ্ঞূহী’তি। যস্মিং, ভিক্খৰে, সমযে অরিযসাৰকো ধম্মং অনুস্সরতি, নেৰস্স তস্মিং সমযে রাগপরিযুট্ঠিতং চিত্তং হোতি, ন দোসপরিযুট্ঠিতং চিত্তং হোতি, ন মোহপরিযুট্ঠিতং চিত্তং হোতি ; উজুগতমেৰস্স তস্মিং সমযে চিত্তং হোতি, নিক্খন্তং মুত্তং ৰুট্ঠিতং গেধম্হা। ‘গেধো’তি খো, ভিক্খৰে, পঞ্চন্নেতং কামগুণানং অধিৰচনং। ইদম্পি খো, ভিক্খৰে, আরম্মণং করিত্ৰা এৰমিধেকচ্চে সত্তা ৰিসুজ্ঝন্তি।
‘‘Puna caparaṃ, bhikkhave, ariyasāvako dhammaṃ anussarati – ‘svākkhāto bhagavatā dhammo…pe… paccattaṃ veditabbo viññūhī’ti. Yasmiṃ, bhikkhave, samaye ariyasāvako dhammaṃ anussarati, nevassa tasmiṃ samaye rāgapariyuṭṭhitaṃ cittaṃ hoti, na dosapariyuṭṭhitaṃ cittaṃ hoti, na mohapariyuṭṭhitaṃ cittaṃ hoti ; ujugatamevassa tasmiṃ samaye cittaṃ hoti, nikkhantaṃ muttaṃ vuṭṭhitaṃ gedhamhā. ‘Gedho’ti kho, bhikkhave, pañcannetaṃ kāmaguṇānaṃ adhivacanaṃ. Idampi kho, bhikkhave, ārammaṇaṃ karitvā evamidhekacce sattā visujjhanti.
‘‘পুন চপরং, ভিক্খৰে, অরিযসাৰকো সঙ্ঘং অনুস্সরতি – ‘সুপ্পটিপন্নো ভগৰতো সাৰকসঙ্ঘো…পে॰… অনুত্তরং পুঞ্ঞক্খেত্তং লোকস্সা’তি। যস্মিং, ভিক্খৰে, সমযে অরিযসাৰকো সঙ্ঘং অনুস্সরতি, নেৰস্স তস্মিং সমযে রাগপরিযুট্ঠিতং চিত্তং হোতি, ন দোসপরিযুট্ঠিতং চিত্তং হোতি, ন মোহপরিযুট্ঠিতং চিত্তং হোতি; উজুগতমেৰস্স তস্মিং সমযে চিত্তং হোতি, নিক্খন্তং মুত্তং ৰুট্ঠিতং গেধম্হা। ‘গেধো’তি খো, ভিক্খৰে, পঞ্চন্নেতং কামগুণানং অধিৰচনং। ইদম্পি খো, ভিক্খৰে, আরম্মণং করিত্ৰা এৰমিধেকচ্চে সত্তা ৰিসুজ্ঝন্তি।
‘‘Puna caparaṃ, bhikkhave, ariyasāvako saṅghaṃ anussarati – ‘suppaṭipanno bhagavato sāvakasaṅgho…pe… anuttaraṃ puññakkhettaṃ lokassā’ti. Yasmiṃ, bhikkhave, samaye ariyasāvako saṅghaṃ anussarati, nevassa tasmiṃ samaye rāgapariyuṭṭhitaṃ cittaṃ hoti, na dosapariyuṭṭhitaṃ cittaṃ hoti, na mohapariyuṭṭhitaṃ cittaṃ hoti; ujugatamevassa tasmiṃ samaye cittaṃ hoti, nikkhantaṃ muttaṃ vuṭṭhitaṃ gedhamhā. ‘Gedho’ti kho, bhikkhave, pañcannetaṃ kāmaguṇānaṃ adhivacanaṃ. Idampi kho, bhikkhave, ārammaṇaṃ karitvā evamidhekacce sattā visujjhanti.
‘‘পুন চপরং, ভিক্খৰে, অরিযসাৰকো অত্তনো সীলানি অনুস্সরতি অখণ্ডানি…পে॰… সমাধিসংৰত্তনিকানি। যস্মিং, ভিক্খৰে, সমযে অরিযসাৰকো সীলং অনুস্সরতি, নেৰস্স তস্মিং সমযে রাগপরিযুট্ঠিতং চিত্তং হোতি, ন দোসপরিযুট্ঠিতং চিত্তং হোতি, ন মোহপরিযুট্ঠিতং চিত্তং হোতি; উজুগতমেৰস্স তস্মিং সমযে চিত্তং হোতি, নিক্খন্তং মুত্তং ৰুট্ঠিতং গেধম্হা। ‘গেধো’তি খো, ভিক্খৰে, পঞ্চন্নেতং কামগুণানং অধিৰচনং। ইদম্পি খো, ভিক্খৰে, আরম্মণং করিত্ৰা এৰমিধেকচ্চে সত্তা ৰিসুজ্ঝন্তি।
‘‘Puna caparaṃ, bhikkhave, ariyasāvako attano sīlāni anussarati akhaṇḍāni…pe… samādhisaṃvattanikāni. Yasmiṃ, bhikkhave, samaye ariyasāvako sīlaṃ anussarati, nevassa tasmiṃ samaye rāgapariyuṭṭhitaṃ cittaṃ hoti, na dosapariyuṭṭhitaṃ cittaṃ hoti, na mohapariyuṭṭhitaṃ cittaṃ hoti; ujugatamevassa tasmiṃ samaye cittaṃ hoti, nikkhantaṃ muttaṃ vuṭṭhitaṃ gedhamhā. ‘Gedho’ti kho, bhikkhave, pañcannetaṃ kāmaguṇānaṃ adhivacanaṃ. Idampi kho, bhikkhave, ārammaṇaṃ karitvā evamidhekacce sattā visujjhanti.
‘‘পুন চপরং, ভিক্খৰে, অরিযসাৰকো অত্তনো চাগং অনুস্সরতি – ‘লাভা ৰত মে! সুলদ্ধং ৰত মে…পে॰… যাচযোগো দানসংৰিভাগরতো’তি। যস্মিং…পে॰… এৰমিধেকচ্চে সত্তা ৰিসুজ্ঝন্তি।
‘‘Puna caparaṃ, bhikkhave, ariyasāvako attano cāgaṃ anussarati – ‘lābhā vata me! Suladdhaṃ vata me…pe… yācayogo dānasaṃvibhāgarato’ti. Yasmiṃ…pe… evamidhekacce sattā visujjhanti.
‘‘পুন চপরং, ভিক্খৰে, অরিযসাৰকো দেৰতা অনুস্সরতি – ‘সন্তি দেৰা চাতুমহারাজিকা , সন্তি দেৰা তাৰতিংসা, সন্তি দেৰা যামা, সন্তি দেৰা তুসিতা, সন্তি দেৰা নিম্মানরতিনো, সন্তি দেৰা পরনিম্মিতৰসৰত্তিনো, সন্তি দেৰা ব্রহ্মকাযিকা , সন্তি দেৰা ততুত্তরি। যথারূপায সদ্ধায সমন্নাগতা তা দেৰতা ইতো চুতা তত্থ উপপন্না; ময্হম্পি তথারূপা সদ্ধা সংৰিজ্জতি। যথারূপেন সীলেন… সুতেন… চাগেন… পঞ্ঞায সমন্নাগতা তা দেৰতা ইতো চুতা তত্থ উপপন্না; ময্হম্পি তথারূপা পঞ্ঞা সংৰিজ্জতী’’’ তি।
‘‘Puna caparaṃ, bhikkhave, ariyasāvako devatā anussarati – ‘santi devā cātumahārājikā , santi devā tāvatiṃsā, santi devā yāmā, santi devā tusitā, santi devā nimmānaratino, santi devā paranimmitavasavattino, santi devā brahmakāyikā , santi devā tatuttari. Yathārūpāya saddhāya samannāgatā tā devatā ito cutā tattha upapannā; mayhampi tathārūpā saddhā saṃvijjati. Yathārūpena sīlena… sutena… cāgena… paññāya samannāgatā tā devatā ito cutā tattha upapannā; mayhampi tathārūpā paññā saṃvijjatī’’’ ti.
‘‘যস্মিং , ভিক্খৰে, সমযে অরিযসাৰকো অত্তনো চ তাসঞ্চ দেৰতানং সদ্ধঞ্চ সীলঞ্চ সুতঞ্চ চাগঞ্চ পঞ্ঞঞ্চ অনুস্সরতি নেৰস্স তস্মিং সমযে রাগপরিযুট্ঠিতং চিত্তং হোতি, ন দোসপরিযুট্ঠিতং চিত্তং হোতি, ন মোহপরিযুট্ঠিতং চিত্তং হোতি; উজুগতমেৰস্স তস্মিং সমযে চিত্তং হোতি, নিক্খন্তং মুত্তং ৰুট্ঠিতং গেধম্হা। ‘গেধো’তি খো, ভিক্খৰে, পঞ্চন্নেতং কামগুণানং অধিৰচনং। ইদম্পি খো, ভিক্খৰে, আরম্মণং করিত্ৰা এৰমিধেকচ্চে সত্তা ৰিসুজ্ঝন্তি। ইমানি খো, ভিক্খৰে, ছ অনুস্সতিট্ঠানানী’’তি। পঞ্চমং।
‘‘Yasmiṃ , bhikkhave, samaye ariyasāvako attano ca tāsañca devatānaṃ saddhañca sīlañca sutañca cāgañca paññañca anussarati nevassa tasmiṃ samaye rāgapariyuṭṭhitaṃ cittaṃ hoti, na dosapariyuṭṭhitaṃ cittaṃ hoti, na mohapariyuṭṭhitaṃ cittaṃ hoti; ujugatamevassa tasmiṃ samaye cittaṃ hoti, nikkhantaṃ muttaṃ vuṭṭhitaṃ gedhamhā. ‘Gedho’ti kho, bhikkhave, pañcannetaṃ kāmaguṇānaṃ adhivacanaṃ. Idampi kho, bhikkhave, ārammaṇaṃ karitvā evamidhekacce sattā visujjhanti. Imāni kho, bhikkhave, cha anussatiṭṭhānānī’’ti. Pañcamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৫. অনুস্সতিট্ঠানসুত্তৰণ্ণনা • 5. Anussatiṭṭhānasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৫. অনুস্সতিট্ঠানসুত্তৰণ্ণনা • 5. Anussatiṭṭhānasuttavaṇṇanā
