| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
৮-৯. অনুত্তরিযসুত্তাদিৰণ্ণনা
8-9. Anuttariyasuttādivaṇṇanā
৮-৯. অট্ঠমে অনুত্তরিযানীতি অঞ্ঞেন উত্তরিতরেন রহিতানি নিরুত্তরানি। দস্সনানুত্তরিযন্তি রূপদস্সনেসু অনুত্তরং। এস নযো সব্বপদেসু । হত্থিরতনাদীনঞ্হি দস্সনং ন দস্সনানুত্তরিযং, নিৰিট্ঠসদ্ধস্স পন নিৰিট্ঠপেমৰসেন দসবলস্স ৰা ভিক্খুসঙ্ঘস্স ৰা কসিণঅসুভনিমিত্তাদীনং ৰা অঞ্ঞতরস্স দস্সনং দস্সনানুত্তরিযং নাম। খত্তিযাদীনং গুণকথাসৰনং ন সৰনানুত্তরিযং, নিৰিট্ঠসদ্ধস্স পন নিৰিট্ঠপেমৰসেন তিণ্ণং ৰা রতনানং গুণকথাসৰনং তেপিটকবুদ্ধৰচনসৰনং ৰা সৰনানুত্তরিযং নাম। মণিরতনাদীনং লাভো ন লাভানুত্তরিযং, সত্তৰিধঅরিযধনলাভো পন লাভানুত্তরিযং নাম। হত্থিসিপ্পাদিসিক্খনং ন সিক্খানুত্তরিযং, সিক্খাত্তযস্স পূরণং পন সিক্খানুত্তরিযং নাম। খত্তিযাদীনং পারিচরিযা ন পারিচরিযানুত্তরিযং, তিণ্ণং পন রতনানং পারিচরিযা পারিচরিযানুত্তরিযং নাম। খত্তিযাদীনং গুণানুস্সরণং ন অনুস্সতানুত্তরিযং, তিণ্ণং পন রতনানং গুণানুস্সরণং অনুস্সতানুত্তরিযং নাম। ইতি ইমানি ছ অনুত্তরিযানি লোকিযলোকুত্তরানি কথিতানি। নৰমে বুদ্ধানুস্সতীতি বুদ্ধগুণারম্মণা সতি। সেসপদেসুপি এসেৰ নযো।
8-9. Aṭṭhame anuttariyānīti aññena uttaritarena rahitāni niruttarāni. Dassanānuttariyanti rūpadassanesu anuttaraṃ. Esa nayo sabbapadesu . Hatthiratanādīnañhi dassanaṃ na dassanānuttariyaṃ, niviṭṭhasaddhassa pana niviṭṭhapemavasena dasabalassa vā bhikkhusaṅghassa vā kasiṇaasubhanimittādīnaṃ vā aññatarassa dassanaṃ dassanānuttariyaṃ nāma. Khattiyādīnaṃ guṇakathāsavanaṃ na savanānuttariyaṃ, niviṭṭhasaddhassa pana niviṭṭhapemavasena tiṇṇaṃ vā ratanānaṃ guṇakathāsavanaṃ tepiṭakabuddhavacanasavanaṃ vā savanānuttariyaṃ nāma. Maṇiratanādīnaṃ lābho na lābhānuttariyaṃ, sattavidhaariyadhanalābho pana lābhānuttariyaṃ nāma. Hatthisippādisikkhanaṃ na sikkhānuttariyaṃ, sikkhāttayassa pūraṇaṃ pana sikkhānuttariyaṃ nāma. Khattiyādīnaṃ pāricariyā na pāricariyānuttariyaṃ, tiṇṇaṃ pana ratanānaṃ pāricariyā pāricariyānuttariyaṃ nāma. Khattiyādīnaṃ guṇānussaraṇaṃ na anussatānuttariyaṃ, tiṇṇaṃ pana ratanānaṃ guṇānussaraṇaṃ anussatānuttariyaṃ nāma. Iti imāni cha anuttariyāni lokiyalokuttarāni kathitāni. Navame buddhānussatīti buddhaguṇārammaṇā sati. Sesapadesupi eseva nayo.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya
৮. অনুত্তরিযসুত্তং • 8. Anuttariyasuttaṃ
৯. অনুস্সতিট্ঠানসুত্তং • 9. Anussatiṭṭhānasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā)
৮. অনুত্তরিযসুত্তৰণ্ণনা • 8. Anuttariyasuttavaṇṇanā
৯. অনুস্সতিট্ঠানসুত্তৰণ্ণনা • 9. Anussatiṭṭhānasuttavaṇṇanā
