| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
10. அனுத்தரியஸுத்தவண்ணனா
10. Anuttariyasuttavaṇṇanā
30. த³ஸமே உச்சாவசந்தி யங் கிஞ்சி மஹந்தகு²த்³த³கங், உச்சனீசங் வா. ஹீனந்தி நிஹீனங். க³ம்மந்தி கா³மவாஸிகானங் த³ஸ்ஸனங். போது²ஜ்ஜனிகந்தி புது²ஜ்ஜனானங் ஸந்தகங். அனரியந்தி ந அரியங் ந உத்தமங் ந பரிஸுத்³த⁴ங். அனத்த²ஸங்ஹிதந்தி ந அத்த²ஸன்னிஸ்ஸிதங். ந நிப்³பி³தா³யாதி ந வட்டே நிப்³பி³ந்த³னத்தா²ய. ந விராகா³யாதி ந ராகா³தீ³னங் விரஜ்ஜனத்தா²ய. ந நிரோதா⁴யாதி ந ராகா³தீ³னங் அப்பவத்தினிரோதா⁴ய. ந உபஸமாயாதி ந ராகா³தீ³னங் வூபஸமனத்தா²ய. ந அபி⁴ஞ்ஞாயாதி ந அபி⁴ஜானநத்தா²ய. ந ஸம்போ³தா⁴யாதி ந ஸம்போ³தி⁴ஸங்கா²தஸ்ஸ சதுமக்³க³ஞாணஸ்ஸ படிவிஜ்ஜ²னத்தா²ய. ந நிப்³பா³னாயாதி ந நிப்³பா³னஸ்ஸ ஸச்சி²கிரியாய.
30. Dasame uccāvacanti yaṃ kiñci mahantakhuddakaṃ, uccanīcaṃ vā. Hīnanti nihīnaṃ. Gammanti gāmavāsikānaṃ dassanaṃ. Pothujjanikanti puthujjanānaṃ santakaṃ. Anariyanti na ariyaṃ na uttamaṃ na parisuddhaṃ. Anatthasaṃhitanti na atthasannissitaṃ. Na nibbidāyāti na vaṭṭe nibbindanatthāya. Na virāgāyāti na rāgādīnaṃ virajjanatthāya. Na nirodhāyāti na rāgādīnaṃ appavattinirodhāya. Na upasamāyāti na rāgādīnaṃ vūpasamanatthāya. Na abhiññāyāti na abhijānanatthāya. Na sambodhāyāti na sambodhisaṅkhātassa catumaggañāṇassa paṭivijjhanatthāya. Na nibbānāyāti na nibbānassa sacchikiriyāya.
நிவிட்ட²ஸத்³தோ⁴தி பதிட்டி²தஸத்³தோ⁴. நிவிட்ட²பேமோதி பதிட்டி²தபேமோ. ஏகந்தக³தோதி ஏகந்தங் க³தோ, அசலப்பத்தோதி அத்தோ². அபி⁴ப்பஸன்னோதி அதிவிய பஸன்னோ. ஏததா³னுத்தரியந்தி ஏதங் அனுத்தரங். ஹத்தி²ஸ்மிம்பி ஸிக்க²தீதி ஹத்தி²னிமித்தங் ஸிக்கி²தப்³ப³ங் ஹத்தி²ஸிப்பங் ஸிக்க²தி. ஸேஸபதே³ஸுபி ஏஸேவ நயோ. உச்சாவசந்தி மஹந்தகு²த்³த³கங் ஸிப்பங் ஸிக்க²தி.
Niviṭṭhasaddhoti patiṭṭhitasaddho. Niviṭṭhapemoti patiṭṭhitapemo. Ekantagatoti ekantaṃ gato, acalappattoti attho. Abhippasannoti ativiya pasanno. Etadānuttariyanti etaṃ anuttaraṃ. Hatthismimpi sikkhatīti hatthinimittaṃ sikkhitabbaṃ hatthisippaṃ sikkhati. Sesapadesupi eseva nayo. Uccāvacanti mahantakhuddakaṃ sippaṃ sikkhati.
உபட்டி²தா பாரிசரியேதி பாரிசரியாய பச்சுபட்டி²தா. பா⁴வயந்தி அனுஸ்ஸதிந்தி அனுத்தரங் அனுஸ்ஸதிங் பா⁴வெந்தி. விவேகப்படிஸங்யுத்தந்தி நிப்³பா³னநிஸ்ஸிதங் கத்வா. கே²மந்தி நிருபத்³த³வங். அமதகா³மினந்தி நிப்³பா³னகா³மினங், அரியமக்³க³ங் பா⁴வெந்தீதி அத்தோ². அப்பமாதே³ பமோதி³தாதி ஸதியா அவிப்பவாஸஸங்கா²தே அப்பமாதே³ ஆமோதி³தா பமோதி³தா. நிபகாதி நேபக்கேன ஸமன்னாக³தா. ஸீலஸங்வுதாதி ஸீலேன ஸங்வுதா பிஹிதா. தே வே காலேன பச்செந்தீதி தே வே யுத்தப்பயுத்தகாலே ஜானந்தி. யத்த² து³க்க²ங் நிருஜ்ஜ²தீதி யஸ்மிங் டா²னே ஸகலங் வட்டது³க்க²ங் நிருஜ்ஜ²தி, தங் அமதங் மஹானிப்³பா³னங் தே பி⁴க்கூ² ஜானந்தீதி. இமஸ்மிங் ஸுத்தே ச² அனுத்தரியானி மிஸ்ஸகானி கதி²தானீதி.
Upaṭṭhitā pāricariyeti pāricariyāya paccupaṭṭhitā. Bhāvayanti anussatinti anuttaraṃ anussatiṃ bhāventi. Vivekappaṭisaṃyuttanti nibbānanissitaṃ katvā. Khemanti nirupaddavaṃ. Amatagāminanti nibbānagāminaṃ, ariyamaggaṃ bhāventīti attho. Appamāde pamoditāti satiyā avippavāsasaṅkhāte appamāde āmoditā pamoditā. Nipakāti nepakkena samannāgatā. Sīlasaṃvutāti sīlena saṃvutā pihitā. Te ve kālena paccentīti te ve yuttappayuttakāle jānanti. Yattha dukkhaṃ nirujjhatīti yasmiṃ ṭhāne sakalaṃ vaṭṭadukkhaṃ nirujjhati, taṃ amataṃ mahānibbānaṃ te bhikkhū jānantīti. Imasmiṃ sutte cha anuttariyāni missakāni kathitānīti.
அனுத்தரியவக்³கோ³ ததியோ.
Anuttariyavaggo tatiyo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. அனுத்தரியஸுத்தங் • 10. Anuttariyasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 10. அனுத்தரியஸுத்தவண்ணனா • 10. Anuttariyasuttavaṇṇanā
