| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
১০. অনুত্তরিযসুত্তৰণ্ণনা
10. Anuttariyasuttavaṇṇanā
৩০. দসমে নিহীনন্তি লামকং, কিলিট্ঠং ৰা। গামৰাসিকানন্তি বালানং। পুথুজ্জনানং ইদন্তি পোথুজ্জনিকং। তেনাহ ‘‘পুথুজ্জনানং সন্তক’’ন্তি, পুথুজ্জনেহি সেৰিতব্বত্তা তেসং সন্তকন্তি ৰুত্তং হোতি। অনরিযন্তি ন নিদ্দোসং। নিদ্দোসট্ঠো হি অরিযট্ঠো। তেনাহ ‘‘ন উত্তমং ন পরিসুদ্ধ’’ন্তি। অরিযেহি ৰা ন সেৰিতব্বন্তি অনরিযং। অনত্থসংহিতন্তি দিট্ঠধম্মিকসম্পরাযিকাদিৰিৰিধৰিপুলানত্থসহিতং। তাদিসঞ্চ অত্থসন্নিস্সিতং ন হোতীতি আহ ‘‘ন অত্থসন্নিস্সিত’’ন্তি। ন ৰট্টে নিব্বিন্দনত্থাযাতি চতুসচ্চকম্মট্ঠানাভাৰতো। অসতি পন ৰট্টে নিব্বিদায ৰিরাগাদীনং অসম্ভৰোযেৰাতি আহ ‘‘ন ৰিরাগাযা’’তিআদি।
30. Dasame nihīnanti lāmakaṃ, kiliṭṭhaṃ vā. Gāmavāsikānanti bālānaṃ. Puthujjanānaṃ idanti pothujjanikaṃ. Tenāha ‘‘puthujjanānaṃ santaka’’nti, puthujjanehi sevitabbattā tesaṃ santakanti vuttaṃ hoti. Anariyanti na niddosaṃ. Niddosaṭṭho hi ariyaṭṭho. Tenāha ‘‘na uttamaṃ na parisuddha’’nti. Ariyehi vā na sevitabbanti anariyaṃ. Anatthasaṃhitanti diṭṭhadhammikasamparāyikādivividhavipulānatthasahitaṃ. Tādisañca atthasannissitaṃ na hotīti āha ‘‘na atthasannissita’’nti. Na vaṭṭe nibbindanatthāyāti catusaccakammaṭṭhānābhāvato. Asati pana vaṭṭe nibbidāya virāgādīnaṃ asambhavoyevāti āha ‘‘na virāgāyā’’tiādi.
অনুত্তমং অনুত্তরিযন্তি আহ ‘‘এতং অনুত্তর’’ন্তি। হত্থিস্মিন্তি নিমিত্তত্থে ভুম্মন্তি আহ ‘‘হত্থিনিমিত্তং সিক্খিতব্ব’’ন্তি। হত্থিৰিসযত্তা হত্থিসন্নিস্সিতত্তা চ হত্থিসিপ্পং ‘‘হত্থী’’তি গহেত্ৰা ‘‘হত্থিস্মিম্পি সিক্খতী’’তি ৰুত্তং। তস্মা হত্থিসিপ্পে সিক্খতীতি এৰমেত্থ অত্থো দট্ঠব্বো। সেসপদেসুপি এসেৰ নযো।
Anuttamaṃ anuttariyanti āha ‘‘etaṃ anuttara’’nti. Hatthisminti nimittatthe bhummanti āha ‘‘hatthinimittaṃ sikkhitabba’’nti. Hatthivisayattā hatthisannissitattā ca hatthisippaṃ ‘‘hatthī’’ti gahetvā ‘‘hatthismimpi sikkhatī’’ti vuttaṃ. Tasmā hatthisippe sikkhatīti evamettha attho daṭṭhabbo. Sesapadesupi eseva nayo.
লিঙ্গব্যত্তযেন ৰিভত্তিব্যত্তযেন পারিচরিযেতি ৰুত্তন্তি আহ ‘‘পারিচরিযায পচ্চুপট্ঠিতা’’তি। সেসমেত্থ সুৰিঞ্ঞেয্যমেৰ।
Liṅgabyattayena vibhattibyattayena pāricariyeti vuttanti āha ‘‘pāricariyāya paccupaṭṭhitā’’ti. Sesamettha suviññeyyameva.
অনুত্তরিযসুত্তৰণ্ণনা নিট্ঠিতা।
Anuttariyasuttavaṇṇanā niṭṭhitā.
অনুত্তরিযৰগ্গৰণ্ণনা নিট্ঠিতা।
Anuttariyavaggavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ১০. অনুত্তরিযসুত্তং • 10. Anuttariyasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ১০. অনুত্তরিযসুত্তৰণ্ণনা • 10. Anuttariyasuttavaṇṇanā
