| Library / Tipiṭaka / तिपिटक • Tipiṭaka / अङ्गुत्तरनिकाय (अट्ठकथा) • Aṅguttaranikāya (aṭṭhakathā) |
१०. अनुत्तरियसुत्तवण्णना
10. Anuttariyasuttavaṇṇanā
३०. दसमे उच्चावचन्ति यं किञ्चि महन्तखुद्दकं, उच्चनीचं वा। हीनन्ति निहीनं। गम्मन्ति गामवासिकानं दस्सनं। पोथुज्जनिकन्ति पुथुज्जनानं सन्तकं। अनरियन्ति न अरियं न उत्तमं न परिसुद्धं। अनत्थसंहितन्ति न अत्थसन्निस्सितं। न निब्बिदायाति न वट्टे निब्बिन्दनत्थाय। न विरागायाति न रागादीनं विरज्जनत्थाय। न निरोधायाति न रागादीनं अप्पवत्तिनिरोधाय। न उपसमायाति न रागादीनं वूपसमनत्थाय। न अभिञ्ञायाति न अभिजाननत्थाय। न सम्बोधायाति न सम्बोधिसङ्खातस्स चतुमग्गञाणस्स पटिविज्झनत्थाय। न निब्बानायाति न निब्बानस्स सच्छिकिरियाय।
30. Dasame uccāvacanti yaṃ kiñci mahantakhuddakaṃ, uccanīcaṃ vā. Hīnanti nihīnaṃ. Gammanti gāmavāsikānaṃ dassanaṃ. Pothujjanikanti puthujjanānaṃ santakaṃ. Anariyanti na ariyaṃ na uttamaṃ na parisuddhaṃ. Anatthasaṃhitanti na atthasannissitaṃ. Na nibbidāyāti na vaṭṭe nibbindanatthāya. Na virāgāyāti na rāgādīnaṃ virajjanatthāya. Na nirodhāyāti na rāgādīnaṃ appavattinirodhāya. Na upasamāyāti na rāgādīnaṃ vūpasamanatthāya. Na abhiññāyāti na abhijānanatthāya. Na sambodhāyāti na sambodhisaṅkhātassa catumaggañāṇassa paṭivijjhanatthāya. Na nibbānāyāti na nibbānassa sacchikiriyāya.
निविट्ठसद्धोति पतिट्ठितसद्धो। निविट्ठपेमोति पतिट्ठितपेमो। एकन्तगतोति एकन्तं गतो, अचलप्पत्तोति अत्थो। अभिप्पसन्नोति अतिविय पसन्नो। एतदानुत्तरियन्ति एतं अनुत्तरं। हत्थिस्मिम्पि सिक्खतीति हत्थिनिमित्तं सिक्खितब्बं हत्थिसिप्पं सिक्खति। सेसपदेसुपि एसेव नयो। उच्चावचन्ति महन्तखुद्दकं सिप्पं सिक्खति।
Niviṭṭhasaddhoti patiṭṭhitasaddho. Niviṭṭhapemoti patiṭṭhitapemo. Ekantagatoti ekantaṃ gato, acalappattoti attho. Abhippasannoti ativiya pasanno. Etadānuttariyanti etaṃ anuttaraṃ. Hatthismimpi sikkhatīti hatthinimittaṃ sikkhitabbaṃ hatthisippaṃ sikkhati. Sesapadesupi eseva nayo. Uccāvacanti mahantakhuddakaṃ sippaṃ sikkhati.
उपट्ठिता पारिचरियेति पारिचरियाय पच्चुपट्ठिता। भावयन्ति अनुस्सतिन्ति अनुत्तरं अनुस्सतिं भावेन्ति। विवेकप्पटिसंयुत्तन्ति निब्बाननिस्सितं कत्वा। खेमन्ति निरुपद्दवं। अमतगामिनन्ति निब्बानगामिनं, अरियमग्गं भावेन्तीति अत्थो। अप्पमादे पमोदिताति सतिया अविप्पवाससङ्खाते अप्पमादे आमोदिता पमोदिता। निपकाति नेपक्केन समन्नागता। सीलसंवुताति सीलेन संवुता पिहिता। ते वे कालेन पच्चेन्तीति ते वे युत्तप्पयुत्तकाले जानन्ति। यत्थ दुक्खं निरुज्झतीति यस्मिं ठाने सकलं वट्टदुक्खं निरुज्झति, तं अमतं महानिब्बानं ते भिक्खू जानन्तीति। इमस्मिं सुत्ते छ अनुत्तरियानि मिस्सकानि कथितानीति।
Upaṭṭhitā pāricariyeti pāricariyāya paccupaṭṭhitā. Bhāvayanti anussatinti anuttaraṃ anussatiṃ bhāventi. Vivekappaṭisaṃyuttanti nibbānanissitaṃ katvā. Khemanti nirupaddavaṃ. Amatagāminanti nibbānagāminaṃ, ariyamaggaṃ bhāventīti attho. Appamāde pamoditāti satiyā avippavāsasaṅkhāte appamāde āmoditā pamoditā. Nipakāti nepakkena samannāgatā. Sīlasaṃvutāti sīlena saṃvutā pihitā. Te ve kālena paccentīti te ve yuttappayuttakāle jānanti. Yattha dukkhaṃ nirujjhatīti yasmiṃ ṭhāne sakalaṃ vaṭṭadukkhaṃ nirujjhati, taṃ amataṃ mahānibbānaṃ te bhikkhū jānantīti. Imasmiṃ sutte cha anuttariyāni missakāni kathitānīti.
अनुत्तरियवग्गो ततियो।
Anuttariyavaggo tatiyo.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / अङ्गुत्तरनिकाय • Aṅguttaranikāya / १०. अनुत्तरियसुत्तं • 10. Anuttariyasuttaṃ
टीका • Tīkā / सुत्तपिटक (टीका) • Suttapiṭaka (ṭīkā) / अङ्गुत्तरनिकाय (टीका) • Aṅguttaranikāya (ṭīkā) / १०. अनुत्तरियसुत्तवण्णना • 10. Anuttariyasuttavaṇṇanā
