| Library / Tipiṭaka / ติปิฎก • Tipiṭaka / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) |
๑๐. อนุตฺตริยสุตฺตวณฺณนา
10. Anuttariyasuttavaṇṇanā
๓๐. ทสเม อุจฺจาวจนฺติ ยํ กิญฺจิ มหนฺตขุทฺทกํ, อุจฺจนีจํ วาฯ หีนนฺติ นิหีนํฯ คมฺมนฺติ คามวาสิกานํ ทสฺสนํฯ โปถุชฺชนิกนฺติ ปุถุชฺชนานํ สนฺตกํฯ อนริยนฺติ น อริยํ น อุตฺตมํ น ปริสุทฺธํฯ อนตฺถสํหิตนฺติ น อตฺถสนฺนิสฺสิตํฯ น นิพฺพิทายาติ น วเฎฺฎ นิพฺพินฺทนตฺถายฯ น วิราคายาติ น ราคาทีนํ วิรชฺชนตฺถายฯ น นิโรธายาติ น ราคาทีนํ อปฺปวตฺตินิโรธายฯ น อุปสมายาติ น ราคาทีนํ วูปสมนตฺถายฯ น อภิญฺญายาติ น อภิชานนตฺถายฯ น สโมฺพธายาติ น สโมฺพธิสงฺขาตสฺส จตุมคฺคญาณสฺส ปฎิวิชฺฌนตฺถายฯ น นิพฺพานายาติ น นิพฺพานสฺส สจฺฉิกิริยายฯ
30. Dasame uccāvacanti yaṃ kiñci mahantakhuddakaṃ, uccanīcaṃ vā. Hīnanti nihīnaṃ. Gammanti gāmavāsikānaṃ dassanaṃ. Pothujjanikanti puthujjanānaṃ santakaṃ. Anariyanti na ariyaṃ na uttamaṃ na parisuddhaṃ. Anatthasaṃhitanti na atthasannissitaṃ. Na nibbidāyāti na vaṭṭe nibbindanatthāya. Na virāgāyāti na rāgādīnaṃ virajjanatthāya. Na nirodhāyāti na rāgādīnaṃ appavattinirodhāya. Na upasamāyāti na rāgādīnaṃ vūpasamanatthāya. Na abhiññāyāti na abhijānanatthāya. Na sambodhāyāti na sambodhisaṅkhātassa catumaggañāṇassa paṭivijjhanatthāya. Na nibbānāyāti na nibbānassa sacchikiriyāya.
นิวิฎฺฐสโทฺธติ ปติฎฺฐิตสโทฺธฯ นิวิฎฺฐเปโมติ ปติฎฺฐิตเปโมฯ เอกนฺตคโตติ เอกนฺตํ คโต, อจลปฺปโตฺตติ อโตฺถฯ อภิปฺปสโนฺนติ อติวิย ปสโนฺนฯ เอตทานุตฺตริยนฺติ เอตํ อนุตฺตรํฯ หตฺถิสฺมิมฺปิ สิกฺขตีติ หตฺถินิมิตฺตํ สิกฺขิตพฺพํ หตฺถิสิปฺปํ สิกฺขติฯ เสสปเทสุปิ เอเสว นโยฯ อุจฺจาวจนฺติ มหนฺตขุทฺทกํ สิปฺปํ สิกฺขติฯ
Niviṭṭhasaddhoti patiṭṭhitasaddho. Niviṭṭhapemoti patiṭṭhitapemo. Ekantagatoti ekantaṃ gato, acalappattoti attho. Abhippasannoti ativiya pasanno. Etadānuttariyanti etaṃ anuttaraṃ. Hatthismimpi sikkhatīti hatthinimittaṃ sikkhitabbaṃ hatthisippaṃ sikkhati. Sesapadesupi eseva nayo. Uccāvacanti mahantakhuddakaṃ sippaṃ sikkhati.
อุปฎฺฐิตา ปาริจริเยติ ปาริจริยาย ปจฺจุปฎฺฐิตาฯ ภาวยนฺติ อนุสฺสตินฺติ อนุตฺตรํ อนุสฺสติํ ภาเวนฺติฯ วิเวกปฺปฎิสํยุตฺตนฺติ นิพฺพานนิสฺสิตํ กตฺวาฯ เขมนฺติ นิรุปทฺทวํฯ อมตคามินนฺติ นิพฺพานคามินํ, อริยมคฺคํ ภาเวนฺตีติ อโตฺถฯ อปฺปมาเท ปโมทิตาติ สติยา อวิปฺปวาสสงฺขาเต อปฺปมาเท อาโมทิตา ปโมทิตาฯ นิปกาติ เนปเกฺกน สมนฺนาคตาฯ สีลสํวุตาติ สีเลน สํวุตา ปิหิตาฯ เต เว กาเลน ปเจฺจนฺตีติ เต เว ยุตฺตปฺปยุตฺตกาเล ชานนฺติฯ ยตฺถ ทุกฺขํ นิรุชฺฌตีติ ยสฺมิํ ฐาเน สกลํ วฎฺฎทุกฺขํ นิรุชฺฌติ, ตํ อมตํ มหานิพฺพานํ เต ภิกฺขู ชานนฺตีติฯ อิมสฺมิํ สุเตฺต ฉ อนุตฺตริยานิ มิสฺสกานิ กถิตานีติฯ
Upaṭṭhitā pāricariyeti pāricariyāya paccupaṭṭhitā. Bhāvayanti anussatinti anuttaraṃ anussatiṃ bhāventi. Vivekappaṭisaṃyuttanti nibbānanissitaṃ katvā. Khemanti nirupaddavaṃ. Amatagāminanti nibbānagāminaṃ, ariyamaggaṃ bhāventīti attho. Appamāde pamoditāti satiyā avippavāsasaṅkhāte appamāde āmoditā pamoditā. Nipakāti nepakkena samannāgatā. Sīlasaṃvutāti sīlena saṃvutā pihitā. Te ve kālena paccentīti te ve yuttappayuttakāle jānanti. Yattha dukkhaṃ nirujjhatīti yasmiṃ ṭhāne sakalaṃ vaṭṭadukkhaṃ nirujjhati, taṃ amataṃ mahānibbānaṃ te bhikkhū jānantīti. Imasmiṃ sutte cha anuttariyāni missakāni kathitānīti.
อนุตฺตริยวโคฺค ตติโยฯ
Anuttariyavaggo tatiyo.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / องฺคุตฺตรนิกาย • Aṅguttaranikāya / ๑๐. อนุตฺตริยสุตฺตํ • 10. Anuttariyasuttaṃ
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๑๐. อนุตฺตริยสุตฺตวณฺณนา • 10. Anuttariyasuttavaṇṇanā
