| Library / Tipiṭaka / តិបិដក • Tipiṭaka / អង្គុត្តរនិកាយ (ដីកា) • Aṅguttaranikāya (ṭīkā) |
១០. អនុត្តរិយសុត្តវណ្ណនា
10. Anuttariyasuttavaṇṇanā
៣០. ទសមេ និហីនន្តិ លាមកំ, កិលិដ្ឋំ វា។ គាមវាសិកានន្តិ ពាលានំ។ បុថុជ្ជនានំ ឥទន្តិ បោថុជ្ជនិកំ។ តេនាហ ‘‘បុថុជ្ជនានំ សន្តក’’ន្តិ, បុថុជ្ជនេហិ សេវិតព្ពត្តា តេសំ សន្តកន្តិ វុត្តំ ហោតិ។ អនរិយន្តិ ន និទ្ទោសំ។ និទ្ទោសដ្ឋោ ហិ អរិយដ្ឋោ។ តេនាហ ‘‘ន ឧត្តមំ ន បរិសុទ្ធ’’ន្តិ។ អរិយេហិ វា ន សេវិតព្ពន្តិ អនរិយំ។ អនត្ថសំហិតន្តិ ទិដ្ឋធម្មិកសម្បរាយិកាទិវិវិធវិបុលានត្ថសហិតំ។ តាទិសញ្ច អត្ថសន្និស្សិតំ ន ហោតីតិ អាហ ‘‘ន អត្ថសន្និស្សិត’’ន្តិ។ ន វដ្ដេ និព្ពិន្ទនត្ថាយាតិ ចតុសច្ចកម្មដ្ឋានាភាវតោ។ អសតិ បន វដ្ដេ និព្ពិទាយ វិរាគាទីនំ អសម្ភវោយេវាតិ អាហ ‘‘ន វិរាគាយា’’តិអាទិ។
30. Dasame nihīnanti lāmakaṃ, kiliṭṭhaṃ vā. Gāmavāsikānanti bālānaṃ. Puthujjanānaṃ idanti pothujjanikaṃ. Tenāha ‘‘puthujjanānaṃ santaka’’nti, puthujjanehi sevitabbattā tesaṃ santakanti vuttaṃ hoti. Anariyanti na niddosaṃ. Niddosaṭṭho hi ariyaṭṭho. Tenāha ‘‘na uttamaṃ na parisuddha’’nti. Ariyehi vā na sevitabbanti anariyaṃ. Anatthasaṃhitanti diṭṭhadhammikasamparāyikādivividhavipulānatthasahitaṃ. Tādisañca atthasannissitaṃ na hotīti āha ‘‘na atthasannissita’’nti. Na vaṭṭe nibbindanatthāyāti catusaccakammaṭṭhānābhāvato. Asati pana vaṭṭe nibbidāya virāgādīnaṃ asambhavoyevāti āha ‘‘na virāgāyā’’tiādi.
អនុត្តមំ អនុត្តរិយន្តិ អាហ ‘‘ឯតំ អនុត្តរ’’ន្តិ។ ហត្ថិស្មិន្តិ និមិត្តត្ថេ ភុម្មន្តិ អាហ ‘‘ហត្ថិនិមិត្តំ សិក្ខិតព្ព’’ន្តិ។ ហត្ថិវិសយត្តា ហត្ថិសន្និស្សិតត្តា ច ហត្ថិសិប្បំ ‘‘ហត្ថី’’តិ គហេត្វា ‘‘ហត្ថិស្មិម្បិ សិក្ខតី’’តិ វុត្តំ។ តស្មា ហត្ថិសិប្បេ សិក្ខតីតិ ឯវមេត្ថ អត្ថោ ទដ្ឋព្ពោ។ សេសបទេសុបិ ឯសេវ នយោ។
Anuttamaṃ anuttariyanti āha ‘‘etaṃ anuttara’’nti. Hatthisminti nimittatthe bhummanti āha ‘‘hatthinimittaṃ sikkhitabba’’nti. Hatthivisayattā hatthisannissitattā ca hatthisippaṃ ‘‘hatthī’’ti gahetvā ‘‘hatthismimpi sikkhatī’’ti vuttaṃ. Tasmā hatthisippe sikkhatīti evamettha attho daṭṭhabbo. Sesapadesupi eseva nayo.
លិង្គព្យត្តយេន វិភត្តិព្យត្តយេន បារិចរិយេតិ វុត្តន្តិ អាហ ‘‘បារិចរិយាយ បច្ចុបដ្ឋិតា’’តិ។ សេសមេត្ថ សុវិញ្ញេយ្យមេវ។
Liṅgabyattayena vibhattibyattayena pāricariyeti vuttanti āha ‘‘pāricariyāya paccupaṭṭhitā’’ti. Sesamettha suviññeyyameva.
អនុត្តរិយសុត្តវណ្ណនា និដ្ឋិតា។
Anuttariyasuttavaṇṇanā niṭṭhitā.
អនុត្តរិយវគ្គវណ្ណនា និដ្ឋិតា។
Anuttariyavaggavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ១០. អនុត្តរិយសុត្តំ • 10. Anuttariyasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ១០. អនុត្តរិយសុត្តវណ្ណនា • 10. Anuttariyasuttavaṇṇanā
