| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) |
೧೦. ಅನುತ್ತರಿಯಸುತ್ತವಣ್ಣನಾ
10. Anuttariyasuttavaṇṇanā
೩೦. ದಸಮೇ ಉಚ್ಚಾವಚನ್ತಿ ಯಂ ಕಿಞ್ಚಿ ಮಹನ್ತಖುದ್ದಕಂ, ಉಚ್ಚನೀಚಂ ವಾ। ಹೀನನ್ತಿ ನಿಹೀನಂ। ಗಮ್ಮನ್ತಿ ಗಾಮವಾಸಿಕಾನಂ ದಸ್ಸನಂ। ಪೋಥುಜ್ಜನಿಕನ್ತಿ ಪುಥುಜ್ಜನಾನಂ ಸನ್ತಕಂ। ಅನರಿಯನ್ತಿ ನ ಅರಿಯಂ ನ ಉತ್ತಮಂ ನ ಪರಿಸುದ್ಧಂ। ಅನತ್ಥಸಂಹಿತನ್ತಿ ನ ಅತ್ಥಸನ್ನಿಸ್ಸಿತಂ। ನ ನಿಬ್ಬಿದಾಯಾತಿ ನ ವಟ್ಟೇ ನಿಬ್ಬಿನ್ದನತ್ಥಾಯ। ನ ವಿರಾಗಾಯಾತಿ ನ ರಾಗಾದೀನಂ ವಿರಜ್ಜನತ್ಥಾಯ। ನ ನಿರೋಧಾಯಾತಿ ನ ರಾಗಾದೀನಂ ಅಪ್ಪವತ್ತಿನಿರೋಧಾಯ। ನ ಉಪಸಮಾಯಾತಿ ನ ರಾಗಾದೀನಂ ವೂಪಸಮನತ್ಥಾಯ। ನ ಅಭಿಞ್ಞಾಯಾತಿ ನ ಅಭಿಜಾನನತ್ಥಾಯ। ನ ಸಮ್ಬೋಧಾಯಾತಿ ನ ಸಮ್ಬೋಧಿಸಙ್ಖಾತಸ್ಸ ಚತುಮಗ್ಗಞಾಣಸ್ಸ ಪಟಿವಿಜ್ಝನತ್ಥಾಯ। ನ ನಿಬ್ಬಾನಾಯಾತಿ ನ ನಿಬ್ಬಾನಸ್ಸ ಸಚ್ಛಿಕಿರಿಯಾಯ।
30. Dasame uccāvacanti yaṃ kiñci mahantakhuddakaṃ, uccanīcaṃ vā. Hīnanti nihīnaṃ. Gammanti gāmavāsikānaṃ dassanaṃ. Pothujjanikanti puthujjanānaṃ santakaṃ. Anariyanti na ariyaṃ na uttamaṃ na parisuddhaṃ. Anatthasaṃhitanti na atthasannissitaṃ. Na nibbidāyāti na vaṭṭe nibbindanatthāya. Na virāgāyāti na rāgādīnaṃ virajjanatthāya. Na nirodhāyāti na rāgādīnaṃ appavattinirodhāya. Na upasamāyāti na rāgādīnaṃ vūpasamanatthāya. Na abhiññāyāti na abhijānanatthāya. Na sambodhāyāti na sambodhisaṅkhātassa catumaggañāṇassa paṭivijjhanatthāya. Na nibbānāyāti na nibbānassa sacchikiriyāya.
ನಿವಿಟ್ಠಸದ್ಧೋತಿ ಪತಿಟ್ಠಿತಸದ್ಧೋ। ನಿವಿಟ್ಠಪೇಮೋತಿ ಪತಿಟ್ಠಿತಪೇಮೋ। ಏಕನ್ತಗತೋತಿ ಏಕನ್ತಂ ಗತೋ, ಅಚಲಪ್ಪತ್ತೋತಿ ಅತ್ಥೋ। ಅಭಿಪ್ಪಸನ್ನೋತಿ ಅತಿವಿಯ ಪಸನ್ನೋ। ಏತದಾನುತ್ತರಿಯನ್ತಿ ಏತಂ ಅನುತ್ತರಂ। ಹತ್ಥಿಸ್ಮಿಮ್ಪಿ ಸಿಕ್ಖತೀತಿ ಹತ್ಥಿನಿಮಿತ್ತಂ ಸಿಕ್ಖಿತಬ್ಬಂ ಹತ್ಥಿಸಿಪ್ಪಂ ಸಿಕ್ಖತಿ। ಸೇಸಪದೇಸುಪಿ ಏಸೇವ ನಯೋ। ಉಚ್ಚಾವಚನ್ತಿ ಮಹನ್ತಖುದ್ದಕಂ ಸಿಪ್ಪಂ ಸಿಕ್ಖತಿ।
Niviṭṭhasaddhoti patiṭṭhitasaddho. Niviṭṭhapemoti patiṭṭhitapemo. Ekantagatoti ekantaṃ gato, acalappattoti attho. Abhippasannoti ativiya pasanno. Etadānuttariyanti etaṃ anuttaraṃ. Hatthismimpi sikkhatīti hatthinimittaṃ sikkhitabbaṃ hatthisippaṃ sikkhati. Sesapadesupi eseva nayo. Uccāvacanti mahantakhuddakaṃ sippaṃ sikkhati.
ಉಪಟ್ಠಿತಾ ಪಾರಿಚರಿಯೇತಿ ಪಾರಿಚರಿಯಾಯ ಪಚ್ಚುಪಟ್ಠಿತಾ। ಭಾವಯನ್ತಿ ಅನುಸ್ಸತಿನ್ತಿ ಅನುತ್ತರಂ ಅನುಸ್ಸತಿಂ ಭಾವೇನ್ತಿ। ವಿವೇಕಪ್ಪಟಿಸಂಯುತ್ತನ್ತಿ ನಿಬ್ಬಾನನಿಸ್ಸಿತಂ ಕತ್ವಾ। ಖೇಮನ್ತಿ ನಿರುಪದ್ದವಂ। ಅಮತಗಾಮಿನನ್ತಿ ನಿಬ್ಬಾನಗಾಮಿನಂ, ಅರಿಯಮಗ್ಗಂ ಭಾವೇನ್ತೀತಿ ಅತ್ಥೋ। ಅಪ್ಪಮಾದೇ ಪಮೋದಿತಾತಿ ಸತಿಯಾ ಅವಿಪ್ಪವಾಸಸಙ್ಖಾತೇ ಅಪ್ಪಮಾದೇ ಆಮೋದಿತಾ ಪಮೋದಿತಾ। ನಿಪಕಾತಿ ನೇಪಕ್ಕೇನ ಸಮನ್ನಾಗತಾ। ಸೀಲಸಂವುತಾತಿ ಸೀಲೇನ ಸಂವುತಾ ಪಿಹಿತಾ। ತೇ ವೇ ಕಾಲೇನ ಪಚ್ಚೇನ್ತೀತಿ ತೇ ವೇ ಯುತ್ತಪ್ಪಯುತ್ತಕಾಲೇ ಜಾನನ್ತಿ। ಯತ್ಥ ದುಕ್ಖಂ ನಿರುಜ್ಝತೀತಿ ಯಸ್ಮಿಂ ಠಾನೇ ಸಕಲಂ ವಟ್ಟದುಕ್ಖಂ ನಿರುಜ್ಝತಿ, ತಂ ಅಮತಂ ಮಹಾನಿಬ್ಬಾನಂ ತೇ ಭಿಕ್ಖೂ ಜಾನನ್ತೀತಿ। ಇಮಸ್ಮಿಂ ಸುತ್ತೇ ಛ ಅನುತ್ತರಿಯಾನಿ ಮಿಸ್ಸಕಾನಿ ಕಥಿತಾನೀತಿ।
Upaṭṭhitā pāricariyeti pāricariyāya paccupaṭṭhitā. Bhāvayanti anussatinti anuttaraṃ anussatiṃ bhāventi. Vivekappaṭisaṃyuttanti nibbānanissitaṃ katvā. Khemanti nirupaddavaṃ. Amatagāminanti nibbānagāminaṃ, ariyamaggaṃ bhāventīti attho. Appamāde pamoditāti satiyā avippavāsasaṅkhāte appamāde āmoditā pamoditā. Nipakāti nepakkena samannāgatā. Sīlasaṃvutāti sīlena saṃvutā pihitā. Te ve kālena paccentīti te ve yuttappayuttakāle jānanti. Yattha dukkhaṃ nirujjhatīti yasmiṃ ṭhāne sakalaṃ vaṭṭadukkhaṃ nirujjhati, taṃ amataṃ mahānibbānaṃ te bhikkhū jānantīti. Imasmiṃ sutte cha anuttariyāni missakāni kathitānīti.
ಅನುತ್ತರಿಯವಗ್ಗೋ ತತಿಯೋ।
Anuttariyavaggo tatiyo.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / ೧೦. ಅನುತ್ತರಿಯಸುತ್ತಂ • 10. Anuttariyasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೧೦. ಅನುತ್ತರಿಯಸುತ್ತವಣ್ಣನಾ • 10. Anuttariyasuttavaṇṇanā
