| Library / Tipiṭaka / திபிடக • Tipiṭaka / பரிவாரபாளி • Parivārapāḷi |
சோத³னாகண்ட³ங்
Codanākaṇḍaṃ
1. அனுவிஜ்ஜகஅனுயோகோ³
1. Anuvijjakaanuyogo
360. அனுவிஜ்ஜகே சோத³கோ புச்சி²தப்³போ³ – ‘‘யங் கோ² த்வங், ஆவுஸோ, இமங் பி⁴க்கு²ங் சோதே³ஸி, கிம்ஹி நங் சோதே³ஸி, ஸீலவிபத்தியா வா சோதே³ஸி, ஆசாரவிபத்தியா வா சோதே³ஸி, தி³ட்டி²விபத்தியா வா சோதே³ஸீ’’தி? ஸோ சே ஏவங் வதெ³ய்ய – ‘‘ஸீலவிபத்தியா வா சோதே³மி, ஆசாரவிபத்தியா வா சோதே³மி, தி³ட்டி²விபத்தியா வா சோதே³மீ’’தி, ஸோ ஏவமஸ்ஸ வசனீயோ – ‘‘ஜானாஸி பனாயஸ்மா ஸீலவிபத்திங், ஜானாஸி ஆசாரவிபத்திங், ஜானாஸி தி³ட்டி²விபத்தி’’ந்தி? ஸோ சே ஏவங் வதெ³ய்ய – ‘‘ஜானாமி கோ² அஹங், ஆவுஸோ, ஸீலவிபத்திங், ஜானாமி ஆசாரவிபத்திங், ஜானாமி தி³ட்டி²விபத்தி’’ந்தி, ஸோ ஏவமஸ்ஸ வசனீயோ – ‘‘கதமா பனாவுஸோ, ஸீலவிபத்தி? கதமா ஆசாரவிபத்தி? கதமா தி³ட்டி²விபத்தீ’’தி? ஸோ சே ஏவங் வதெ³ய்ய – ‘‘சத்தாரி ச பாராஜிகானி, தேரஸ ச ஸங்கா⁴தி³ஸேஸா – அயங் ஸீலவிபத்தி. து²ல்லச்சயங், பாசித்தியங், பாடிதே³ஸனீயங், து³க்கடங், து³ப்³பா⁴ஸிதங், அயங் ஆசாரவிபத்தி. மிச்சா²தி³ட்டி², அந்தக்³கா³ஹிகா தி³ட்டி² – அயங் தி³ட்டி²விபத்தீ’’தி, ஸோ ஏவமஸ்ஸ வசனீயோ – ‘‘யங் கோ² த்வங், ஆவுஸோ, இமங் பி⁴க்கு²ங் சோதே³ஸி, தி³ட்டே²ன வா சோதே³ஸி ஸுதேன வா சோதே³ஸி பரிஸங்காய வா சோதே³ஸீ’’தி? ஸோ சே ஏவங் வதெ³ய்ய – ‘‘தி³ட்டே²ன வா சோதே³மி ஸுதேன வா சோதே³மி பரிஸங்காய வா சோதே³மீ’’தி, ஸோ ஏவமஸ்ஸ வசனீயோ – ‘‘யங் கோ² த்வங், ஆவுஸோ, இமங் பி⁴க்கு²ங் தி³ட்டே²ன சோதே³ஸி, கிங் தே தி³ட்ட²ங் கிந்தி தே தி³ட்ட²ங், கதா³ தே தி³ட்ட²ங், கத்த² தே தி³ட்ட²ங் பாராஜிகங் அஜ்ஜா²பஜ்ஜந்தோ தி³ட்டோ², ஸங்கா⁴தி³ஸேஸங் அஜ்ஜா²பஜ்ஜந்தோ தி³ட்டோ², து²ல்லச்சயங்… பாசித்தியங்… பாடிதே³ஸனீயங்… து³க்கடங்… து³ப்³பா⁴ஸிதங் அஜ்ஜா²பஜ்ஜந்தோ தி³ட்டோ², கத்த² ச த்வங் அஹோஸி, கத்த² சாயங் பி⁴க்கு² அஹோஸி, கிஞ்ச த்வங் கரோஸி, கிங் சாயங் பி⁴க்கு² கரோதீ’’தி? ஸோ சே ஏவங் வதெ³ய்ய – ‘‘ந கோ² அஹங், ஆவுஸோ, இமங் பி⁴க்கு²ங் தி³ட்டே²ன சோதே³மி, அபி ச ஸுதேன சோதே³மீ’’தி, ஸோ ஏவமஸ்ஸ வசனீயோ – ‘‘யங் கோ² த்வங், ஆவுஸோ, இமங் பி⁴க்கு²ங் ஸுதேன சோதே³ஸி, கிங் தே ஸுதங், கிந்தி தே ஸுதங், கதா³ தே ஸுதங் , கத்த² தே ஸுதங், பாராஜிகங் அஜ்ஜா²பன்னோதி ஸுதங், ஸங்கா⁴தி³ஸேஸங்… து²ல்லச்சயங்… பாசித்தியங்… பாடிதே³ஸனீயங்… து³க்கடங்… து³ப்³பா⁴ஸிதங் அஜ்ஜா²பன்னோதி ஸுதங், பி⁴க்கு²ஸ்ஸ ஸுதங், பி⁴க்கு²னியா ஸுதங், ஸிக்க²மானாய ஸுதங் , ஸாமணேரஸ்ஸ ஸுதங், ஸாமணேரியா ஸுதங், உபாஸகஸ்ஸ ஸுதங், உபாஸிகாய ஸுதங், ராஜூனங் ஸுதங், ராஜமஹாமத்தானங் ஸுதங், தித்தி²யானங் ஸுதங், தித்தி²யஸாவகானங் ஸுத’’ந்தி? ஸோ சே ஏவங் வதெ³ய்ய – ‘‘ந கோ² அஹங், ஆவுஸோ, இமங் பி⁴க்கு²ங் ஸுதேன சோதே³மி, அபி ச பரிஸங்காய சோதே³மீ’’தி, ஸோ ஏவமஸ்ஸ வசனீயோ – ‘‘யங் கோ² த்வங், ஆவுஸோ, இமங் பி⁴க்கு²ங் பரிஸங்காய சோதே³ஸி, கிங் பரிஸங்கஸி, கிந்தி பரிஸங்கஸி, கதா³ பரிஸங்கஸி, கத்த² பரிஸங்கஸி, பாராஜிகங் அஜ்ஜா²பன்னோதி பரிஸங்கஸி, ஸங்கா⁴தி³ஸேஸங் அஜ்ஜா²பன்னோதி பரிஸங்கஸி, து²ல்லச்சயங்… பாசித்தியங்… பாடிதே³ஸனீயங்… து³க்கடங்… து³ப்³பா⁴ஸிதங் அஜ்ஜா²பன்னோதி பரிஸங்கஸி, பி⁴க்கு²ஸ்ஸ ஸுத்வா பரிஸங்கஸி, பி⁴க்கு²னியா ஸுத்வா பரிஸங்கஸி, ஸிக்க²மானாய ஸுத்வா பரிஸங்கஸி, ஸாமணேரஸ்ஸ ஸுத்வா பரிஸங்கஸி, ஸாமணேரியா ஸுத்வா பரிஸங்கஸி, உபாஸகஸ்ஸ ஸுத்வா பரிஸங்கஸி, உபாஸிகாய ஸுத்வா பரிஸங்கஸி, ராஜூனங் ஸுத்வா பரிஸங்கஸி, ராஜமஹாமத்தானங் ஸுத்வா பரிஸங்கஸி, தித்தி²யானங் ஸுத்வா பரிஸங்கஸி, தித்தி²யஸாவகானங் ஸுத்வா பரிஸங்கஸீ’’தி?
360. Anuvijjake codako pucchitabbo – ‘‘yaṃ kho tvaṃ, āvuso, imaṃ bhikkhuṃ codesi, kimhi naṃ codesi, sīlavipattiyā vā codesi, ācāravipattiyā vā codesi, diṭṭhivipattiyā vā codesī’’ti? So ce evaṃ vadeyya – ‘‘sīlavipattiyā vā codemi, ācāravipattiyā vā codemi, diṭṭhivipattiyā vā codemī’’ti, so evamassa vacanīyo – ‘‘jānāsi panāyasmā sīlavipattiṃ, jānāsi ācāravipattiṃ, jānāsi diṭṭhivipatti’’nti? So ce evaṃ vadeyya – ‘‘jānāmi kho ahaṃ, āvuso, sīlavipattiṃ, jānāmi ācāravipattiṃ, jānāmi diṭṭhivipatti’’nti, so evamassa vacanīyo – ‘‘katamā panāvuso, sīlavipatti? Katamā ācāravipatti? Katamā diṭṭhivipattī’’ti? So ce evaṃ vadeyya – ‘‘cattāri ca pārājikāni, terasa ca saṅghādisesā – ayaṃ sīlavipatti. Thullaccayaṃ, pācittiyaṃ, pāṭidesanīyaṃ, dukkaṭaṃ, dubbhāsitaṃ, ayaṃ ācāravipatti. Micchādiṭṭhi, antaggāhikā diṭṭhi – ayaṃ diṭṭhivipattī’’ti, so evamassa vacanīyo – ‘‘yaṃ kho tvaṃ, āvuso, imaṃ bhikkhuṃ codesi, diṭṭhena vā codesi sutena vā codesi parisaṅkāya vā codesī’’ti? So ce evaṃ vadeyya – ‘‘diṭṭhena vā codemi sutena vā codemi parisaṅkāya vā codemī’’ti, so evamassa vacanīyo – ‘‘yaṃ kho tvaṃ, āvuso, imaṃ bhikkhuṃ diṭṭhena codesi, kiṃ te diṭṭhaṃ kinti te diṭṭhaṃ, kadā te diṭṭhaṃ, kattha te diṭṭhaṃ pārājikaṃ ajjhāpajjanto diṭṭho, saṅghādisesaṃ ajjhāpajjanto diṭṭho, thullaccayaṃ… pācittiyaṃ… pāṭidesanīyaṃ… dukkaṭaṃ… dubbhāsitaṃ ajjhāpajjanto diṭṭho, kattha ca tvaṃ ahosi, kattha cāyaṃ bhikkhu ahosi, kiñca tvaṃ karosi, kiṃ cāyaṃ bhikkhu karotī’’ti? So ce evaṃ vadeyya – ‘‘na kho ahaṃ, āvuso, imaṃ bhikkhuṃ diṭṭhena codemi, api ca sutena codemī’’ti, so evamassa vacanīyo – ‘‘yaṃ kho tvaṃ, āvuso, imaṃ bhikkhuṃ sutena codesi, kiṃ te sutaṃ, kinti te sutaṃ, kadā te sutaṃ , kattha te sutaṃ, pārājikaṃ ajjhāpannoti sutaṃ, saṅghādisesaṃ… thullaccayaṃ… pācittiyaṃ… pāṭidesanīyaṃ… dukkaṭaṃ… dubbhāsitaṃ ajjhāpannoti sutaṃ, bhikkhussa sutaṃ, bhikkhuniyā sutaṃ, sikkhamānāya sutaṃ , sāmaṇerassa sutaṃ, sāmaṇeriyā sutaṃ, upāsakassa sutaṃ, upāsikāya sutaṃ, rājūnaṃ sutaṃ, rājamahāmattānaṃ sutaṃ, titthiyānaṃ sutaṃ, titthiyasāvakānaṃ suta’’nti? So ce evaṃ vadeyya – ‘‘na kho ahaṃ, āvuso, imaṃ bhikkhuṃ sutena codemi, api ca parisaṅkāya codemī’’ti, so evamassa vacanīyo – ‘‘yaṃ kho tvaṃ, āvuso, imaṃ bhikkhuṃ parisaṅkāya codesi, kiṃ parisaṅkasi, kinti parisaṅkasi, kadā parisaṅkasi, kattha parisaṅkasi, pārājikaṃ ajjhāpannoti parisaṅkasi, saṅghādisesaṃ ajjhāpannoti parisaṅkasi, thullaccayaṃ… pācittiyaṃ… pāṭidesanīyaṃ… dukkaṭaṃ… dubbhāsitaṃ ajjhāpannoti parisaṅkasi, bhikkhussa sutvā parisaṅkasi, bhikkhuniyā sutvā parisaṅkasi, sikkhamānāya sutvā parisaṅkasi, sāmaṇerassa sutvā parisaṅkasi, sāmaṇeriyā sutvā parisaṅkasi, upāsakassa sutvā parisaṅkasi, upāsikāya sutvā parisaṅkasi, rājūnaṃ sutvā parisaṅkasi, rājamahāmattānaṃ sutvā parisaṅkasi, titthiyānaṃ sutvā parisaṅkasi, titthiyasāvakānaṃ sutvā parisaṅkasī’’ti?
361.
361.
தி³ட்ட²ங் தி³ட்டே²ன ஸமேதி தி³ட்டே²ன ஸங்ஸந்த³தே தி³ட்ட²ங்;
Diṭṭhaṃ diṭṭhena sameti diṭṭhena saṃsandate diṭṭhaṃ;
தி³ட்ட²ங் படிச்ச ந உபேதி அஸுத்³த⁴பரிஸங்கிதோ;
Diṭṭhaṃ paṭicca na upeti asuddhaparisaṅkito;
ஸோ புக்³க³லோ படிஞ்ஞாய காதப்³போ³ தேனுபோஸதோ².
So puggalo paṭiññāya kātabbo tenuposatho.
ஸுதங் ஸுதேன ஸமேதி ஸுதேன ஸங்ஸந்த³தே ஸுதங்;
Sutaṃ sutena sameti sutena saṃsandate sutaṃ;
ஸுதங் படிச்ச ந உபேதி அஸுத்³த⁴பரிஸங்கிதோ;
Sutaṃ paṭicca na upeti asuddhaparisaṅkito;
ஸோ புக்³க³லோ படிஞ்ஞாய காதப்³போ³ தேனுபோஸதோ².
So puggalo paṭiññāya kātabbo tenuposatho.
முதங் முதேன ஸமேதி முதேன ஸங்ஸந்த³தே முதங்;
Mutaṃ mutena sameti mutena saṃsandate mutaṃ;
முதங் படிச்ச ந உபேதி அஸுத்³த⁴பரிஸங்கிதோ;
Mutaṃ paṭicca na upeti asuddhaparisaṅkito;
ஸோ புக்³க³லோ படிஞ்ஞாய காதப்³போ³ தேனுபோஸதோ².
So puggalo paṭiññāya kātabbo tenuposatho.
362. சோத³னாய கோ ஆதி³, கிங் மஜ்ஜே², கிங் பரியோஸானங்? சோத³னாய ஓகாஸகம்மங் ஆதி³, கிரியா மஜ்ஜே², ஸமதோ² பரியோஸானங். சோத³னாய கதி மூலானி, கதி வத்தூ²னி, கதி பூ⁴மியோ, கதிஹாகாரேஹி சோதே³தி? சோத³னாய த்³வே மூலானி, தீணி வத்தூ²னி, பஞ்ச பூ⁴மியோ, த்³வீஹாகாரேஹி சோதே³தி. சோத³னாய கதமானி த்³வே மூலானி? ஸமூலிகா வா அமூலிகா வா – சோத³னாய இமானி த்³வே மூலானி. சோத³னாய கதமானி தீணி வத்தூ²னி? தி³ட்டே²ன ஸுதேன பரிஸங்காய – சோத³னாய இமானி தீணி வத்தூ²னி. சோத³னா கதமா பஞ்ச பூ⁴மியோ? காலேன வக்கா²மி நோ அகாலேன, பூ⁴தேன வக்கா²மி நோ அபூ⁴தேன, ஸண்ஹேன வக்கா²மி நோ ப²ருஸேன, அத்த²ஸங்ஹிதேன வக்கா²மி நோ அனத்த²ஸங்ஹிதேன, மெத்தாசித்தோ வக்கா²மி நோ தோ³ஸந்தரோதி – சோத³னாய இமா பஞ்ச பூ⁴மியோ.
362. Codanāya ko ādi, kiṃ majjhe, kiṃ pariyosānaṃ? Codanāya okāsakammaṃ ādi, kiriyā majjhe, samatho pariyosānaṃ. Codanāya kati mūlāni, kati vatthūni, kati bhūmiyo, katihākārehi codeti? Codanāya dve mūlāni, tīṇi vatthūni, pañca bhūmiyo, dvīhākārehi codeti. Codanāya katamāni dve mūlāni? Samūlikā vā amūlikā vā – codanāya imāni dve mūlāni. Codanāya katamāni tīṇi vatthūni? Diṭṭhena sutena parisaṅkāya – codanāya imāni tīṇi vatthūni. Codanā katamā pañca bhūmiyo? Kālena vakkhāmi no akālena, bhūtena vakkhāmi no abhūtena, saṇhena vakkhāmi no pharusena, atthasaṃhitena vakkhāmi no anatthasaṃhitena, mettācitto vakkhāmi no dosantaroti – codanāya imā pañca bhūmiyo.
கதமேஹி த்³வீஹாகாரேஹி சோதே³தி? காயேன வா சோதே³தி வாசாய வா சோதே³தி – இமேஹி த்³வீஹாகாரேஹி சோதே³தி.
Katamehi dvīhākārehi codeti? Kāyena vā codeti vācāya vā codeti – imehi dvīhākārehi codeti.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பரிவார-அட்ட²கதா² • Parivāra-aṭṭhakathā
அனுவிஜ்ஜககிச்சவண்ணனா • Anuvijjakakiccavaṇṇanā
சோத³கபுச்சா²விஸ்ஸஜ்ஜனாவண்ணனா • Codakapucchāvissajjanāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / அனுவிஜ்ஜககிச்சவண்ணனா • Anuvijjakakiccavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / அனுவிஜ்ஜககிச்சவண்ணனா • Anuvijjakakiccavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi
அனுவிஜ்ஜககிச்சவண்ணனா • Anuvijjakakiccavaṇṇanā
சோத³கபுச்சா²விஸ்ஸஜ்ஜனா • Codakapucchāvissajjanā
