| Library / Tipiṭaka / ತಿಪಿಟಕ • Tipiṭaka / ಪರಿವಾರ-ಅಟ್ಠಕಥಾ • Parivāra-aṭṭhakathā |
ಚೋದನಾಕಣ್ಡಂ
Codanākaṇḍaṃ
ಅನುವಿಜ್ಜಕಕಿಚ್ಚವಣ್ಣನಾ
Anuvijjakakiccavaṇṇanā
೩೬೦-೩೬೧. ಇದಾನಿ ಏವಂ ಉಪ್ಪನ್ನಾಯ ಚೋದನಾಯ ವಿನಯಧರೇನ ಕತ್ತಬ್ಬಕಿಚ್ಚಂ ದಸ್ಸೇತುಂ ಅನುವಿಜ್ಜಕೇನಾತಿಆದಿ ಆರದ್ಧಂ। ತತ್ಥ ದಿಟ್ಠಂ ದಿಟ್ಠೇನಾತಿ ಗಾಥಾಯ ಅಯಮತ್ಥೋ – ಏಕೇನೇಕೋ ಮಾತುಗಾಮೇನ ಸದ್ಧಿಂ ಏಕಟ್ಠಾನತೋ ನಿಕ್ಖಮನ್ತೋ ವಾ ಪವಿಸನ್ತೋ ವಾ ದಿಟ್ಠೋ, ಸೋ ತಂ ಪಾರಾಜಿಕೇನ ಚೋದೇತಿ, ಇತರೋ ತಸ್ಸ ದಸ್ಸನಂ ಅನುಜಾನಾತಿ। ತಂ ಪನ ದಸ್ಸನಂ ಪಟಿಚ್ಚ ಪಾರಾಜಿಕಂ ನ ಉಪೇತಿ, ನ ಪಟಿಜಾನಾತಿ। ಏವಮೇತ್ಥ ಯಂ ತೇನ ದಿಟ್ಠಂ, ತಂ ತಸ್ಸ ‘‘ದಿಟ್ಠೋ ಮಯಾ’’ತಿ ಇಮಿನಾ ದಿಟ್ಠವಚನೇನ ಸಮೇತಿ। ಯಸ್ಮಾ ಪನ ಇತರೋ ತಂ ದಸ್ಸನಂ ಪಟಿಚ್ಚ ದೋಸಂ ನ ಪಟಿಜಾನಾತಿ, ತಸ್ಮಾ ಅಸುದ್ಧಪರಿಸಙ್ಕಿತೋ ಹೋತಿ; ಅಮೂಲಕಪರಿಸಙ್ಕಿತೋತಿ ಅತ್ಥೋ। ತಸ್ಸ ಪುಗ್ಗಲಸ್ಸ ‘‘ಸುದ್ಧೋ ಅಹ’’ನ್ತಿ ಪಟಿಞ್ಞಾಯ ತೇನ ಸದ್ಧಿಂ ಉಪೋಸಥೋ ಕಾತಬ್ಬೋ। ಸೇಸಗಾಥಾದ್ವಯೇಪಿ ಏಸೇವ ನಯೋ। ಸೇಸಂ ಸಬ್ಬತ್ಥ ಉತ್ತಾನಮೇವಾತಿ।
360-361. Idāni evaṃ uppannāya codanāya vinayadharena kattabbakiccaṃ dassetuṃ anuvijjakenātiādi āraddhaṃ. Tattha diṭṭhaṃ diṭṭhenāti gāthāya ayamattho – ekeneko mātugāmena saddhiṃ ekaṭṭhānato nikkhamanto vā pavisanto vā diṭṭho, so taṃ pārājikena codeti, itaro tassa dassanaṃ anujānāti. Taṃ pana dassanaṃ paṭicca pārājikaṃ na upeti, na paṭijānāti. Evamettha yaṃ tena diṭṭhaṃ, taṃ tassa ‘‘diṭṭho mayā’’ti iminā diṭṭhavacanena sameti. Yasmā pana itaro taṃ dassanaṃ paṭicca dosaṃ na paṭijānāti, tasmā asuddhaparisaṅkito hoti; amūlakaparisaṅkitoti attho. Tassa puggalassa ‘‘suddho aha’’nti paṭiññāya tena saddhiṃ uposatho kātabbo. Sesagāthādvayepi eseva nayo. Sesaṃ sabbattha uttānamevāti.
ಅನುವಿಜ್ಜಕಕಿಚ್ಚವಣ್ಣನಾ ನಿಟ್ಠಿತಾ।
Anuvijjakakiccavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಪರಿವಾರಪಾಳಿ • Parivārapāḷi / ೧. ಅನುವಿಜ್ಜಕಅನುಯೋಗೋ • 1. Anuvijjakaanuyogo
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಅನುವಿಜ್ಜಕಕಿಚ್ಚವಣ್ಣನಾ • Anuvijjakakiccavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಅನುವಿಜ್ಜಕಕಿಚ್ಚವಣ್ಣನಾ • Anuvijjakakiccavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ಅನುವಿಜ್ಜಕಕಿಚ್ಚವಣ್ಣನಾ • Anuvijjakakiccavaṇṇanā
