| Library / Tipiṭaka / திபிடக • Tipiṭaka / பரிவார-அட்ட²கதா² • Parivāra-aṭṭhakathā |
சூளஸங்கா³மோ
Cūḷasaṅgāmo
அனுவிஜ்ஜகஸ்ஸ படிபத்திவண்ணனா
Anuvijjakassa paṭipattivaṇṇanā
365. சூளஸங்கா³மே ஸங்கா³மாவசரேன பி⁴க்கு²னாதி ஸங்கா³மோ வுச்சதி அதி⁴கரணவினிச்ச²யத்தா²ய ஸங்க⁴ஸன்னிபாதோ. தத்ர ஹி அத்தபச்சத்தி²கா சேவ ஸாஸனபச்சத்தி²கா ச உத்³த⁴ம்மங் உப்³பி³னயங் ஸத்து² ஸாஸனங் தீ³பெந்தா ஸமோஸரந்தி வேஸாலிகா வஜ்ஜிபுத்தகா விய. யோ பி⁴க்கு² தேஸங் பச்சத்தி²கானங் லத்³தி⁴ங் மத்³தி³த்வா ஸகவாத³தீ³பனத்தா²ய தத்த² அவசரதி, அஜ்ஜோ²கா³ஹெத்வா வினிச்ச²யங் பவத்தேதி, ஸோ ஸங்கா³மாவசரோ நாம யஸத்தே²ரோ விய. தேன ஸங்கா³மாவசரேன பி⁴க்கு²னா ஸங்க⁴ங் உபஸங்கமந்தேன நீசசித்தேன ஸங்கோ⁴ உபஸங்கமிதப்³போ³. நீசசித்தேனாதி மானத்³த⁴ஜங் நிபாதெத்வா நிஹதமானசித்தேன. ரஜோஹரணஸமேனாதி பாத³புஞ்ச²னஸமேன; யதா² ரஜோஹரணஸ்ஸ ஸங்கிலிட்டே² வா அஸங்கிலிட்டே² வா பாதே³ புஞ்சி²யமானே நேவ ராகோ³ ந தோ³ஸோ; ஏவங் இட்டா²னிட்டே²ஸு அரஜ்ஜந்தேன அது³ஸ்ஸந்தேனாதி அத்தோ². யதா²பதிரூபே ஆஸனேதி யதா²பதிரூபங் ஆஸனங் ஞத்வா அத்தனோ பாபுணனட்டா²னே தே²ரானங் பி⁴க்கூ²னங் பிட்டி²ங் அத³ஸ்ஸெத்வா நிஸீதி³தப்³ப³ங். அனானாகதி²கேனாதி நானாவித⁴ங் தங் தங் அனத்த²கத²ங் அகதெ²ந்தேன. அதிரச்சா²னகதி²கேனாதி தி³ட்ட²ஸுதமுதம்பி ராஜகதா²தி³கங் திரச்சா²னகத²ங் அகதெ²ந்தேன. ஸாமங் வா த⁴ம்மோ பா⁴ஸிதப்³போ³தி ஸங்க⁴ஸன்னிபாதட்டா²னே கப்பியாகப்பியனிஸ்ஸிதா வா ரூபாரூபபரிச்சே²த³ஸமதா²சாரவிபஸ்ஸனாசாரட்டா²னநிஸஜ்ஜவத்தாதி³னிஸ்ஸிதா வா கதா² த⁴ம்மோ நாம. ஏவரூபோ த⁴ம்மோ ஸயங் வா பா⁴ஸிதப்³போ³, பரோ வா அஜ்ஜே²ஸிதப்³போ³. யோ பி⁴க்கு² ததா²ரூபிங் கத²ங் கதே²துங் பஹோதி, ஸோ வத்தப்³போ³ – ‘‘ஆவுஸோ ஸங்க⁴மஜ்ஜ²ம்ஹி பஞ்ஹே உப்பன்னே த்வங் கதெ²ய்யாஸீ’’தி. அரியோ வா துண்ஹீபா⁴வோ நாதிமஞ்ஞிதப்³போ³தி அரியா துண்ஹீ நிஸீத³ந்தா ந பா³லபுது²ஜ்ஜனா விய நிஸீத³ந்தி. அஞ்ஞதரங் கம்மட்டா²னங் க³ஹெத்வாவ நிஸீத³ந்தி. இதி கம்மட்டா²னமனஸிகாரவஸேன துண்ஹீபா⁴வோ அரியோ துண்ஹீபா⁴வோ நாம, ஸோ நாதிமஞ்ஞிதப்³போ³, கிங் கம்மட்டா²னானுயோகே³னாதி நாவஜானிதப்³போ³; அத்தனோ பதிரூபங் கம்மட்டா²னங் க³ஹெத்வாவ நிஸீதி³தப்³ப³ந்தி அத்தோ².
365. Cūḷasaṅgāme saṅgāmāvacarena bhikkhunāti saṅgāmo vuccati adhikaraṇavinicchayatthāya saṅghasannipāto. Tatra hi attapaccatthikā ceva sāsanapaccatthikā ca uddhammaṃ ubbinayaṃ satthu sāsanaṃ dīpentā samosaranti vesālikā vajjiputtakā viya. Yo bhikkhu tesaṃ paccatthikānaṃ laddhiṃ madditvā sakavādadīpanatthāya tattha avacarati, ajjhogāhetvā vinicchayaṃ pavatteti, so saṅgāmāvacaro nāma yasatthero viya. Tena saṅgāmāvacarena bhikkhunā saṅghaṃ upasaṅkamantena nīcacittena saṅgho upasaṅkamitabbo. Nīcacittenāti mānaddhajaṃ nipātetvā nihatamānacittena. Rajoharaṇasamenāti pādapuñchanasamena; yathā rajoharaṇassa saṃkiliṭṭhe vā asaṃkiliṭṭhe vā pāde puñchiyamāne neva rāgo na doso; evaṃ iṭṭhāniṭṭhesu arajjantena adussantenāti attho. Yathāpatirūpe āsaneti yathāpatirūpaṃ āsanaṃ ñatvā attano pāpuṇanaṭṭhāne therānaṃ bhikkhūnaṃ piṭṭhiṃ adassetvā nisīditabbaṃ. Anānākathikenāti nānāvidhaṃ taṃ taṃ anatthakathaṃ akathentena. Atiracchānakathikenāti diṭṭhasutamutampi rājakathādikaṃ tiracchānakathaṃ akathentena. Sāmaṃ vā dhammo bhāsitabboti saṅghasannipātaṭṭhāne kappiyākappiyanissitā vā rūpārūpaparicchedasamathācāravipassanācāraṭṭhānanisajjavattādinissitā vā kathā dhammo nāma. Evarūpo dhammo sayaṃ vā bhāsitabbo, paro vā ajjhesitabbo. Yo bhikkhu tathārūpiṃ kathaṃ kathetuṃ pahoti, so vattabbo – ‘‘āvuso saṅghamajjhamhi pañhe uppanne tvaṃ katheyyāsī’’ti. Ariyo vā tuṇhībhāvo nātimaññitabboti ariyā tuṇhī nisīdantā na bālaputhujjanā viya nisīdanti. Aññataraṃ kammaṭṭhānaṃ gahetvāva nisīdanti. Iti kammaṭṭhānamanasikāravasena tuṇhībhāvo ariyo tuṇhībhāvo nāma, so nātimaññitabbo, kiṃ kammaṭṭhānānuyogenāti nāvajānitabbo; attano patirūpaṃ kammaṭṭhānaṃ gahetvāva nisīditabbanti attho.
ந உபஜ்ஜா²யோ புச்சி²தப்³போ³தி ‘‘கோ நாமோ துய்ஹங் உபஜ்ஜா²யோ’’தி ந புச்சி²தப்³போ³. ஏஸ நயோ ஸப்³ப³த்த². ந ஜாதீதி ‘‘க²த்தியஜாதியோ த்வங் ப்³ராஹ்மணஜாதியோ’’தி ஏவங் ஜாதி ந புச்சி²தப்³பா³. ந ஆக³மோதி ‘‘தீ³க⁴பா⁴ணகோஸி த்வங் மஜ்ஜி²மபா⁴ணகோ’’தி ஏவங் ஆக³மோ ந புச்சி²தப்³போ³. குலபதே³ஸோதி க²த்தியகுலாதி³வஸேனேவ வேதி³தப்³போ³. அத்ரஸ்ஸ பேமங் வா தோ³ஸோ வாதி அத்ர புக்³க³லே ஏதேஸங் காரணானங் அஞ்ஞதரவஸேன பேமங் வா ப⁴வெய்ய தோ³ஸோ வா.
Na upajjhāyo pucchitabboti ‘‘ko nāmo tuyhaṃ upajjhāyo’’ti na pucchitabbo. Esa nayo sabbattha. Na jātīti ‘‘khattiyajātiyo tvaṃ brāhmaṇajātiyo’’ti evaṃ jāti na pucchitabbā. Na āgamoti ‘‘dīghabhāṇakosi tvaṃ majjhimabhāṇako’’ti evaṃ āgamo na pucchitabbo. Kulapadesoti khattiyakulādivaseneva veditabbo. Atrassa pemaṃ vā doso vāti atra puggale etesaṃ kāraṇānaṃ aññataravasena pemaṃ vā bhaveyya doso vā.
நோ பரிஸகப்பிகேனாதி பரிஸகப்பகேன பரிஸானுவிதா⁴யகேன ந ப⁴விதப்³ப³ங்; யங் பரிஸாய ருச்சதி, ததே³வ சேதெத்வா கப்பெத்வா ந கதே²தப்³ப³ந்தி அத்தோ². ந ஹத்த²முத்³தா³ த³ஸ்ஸேதப்³பா³தி கதே²தப்³பே³ ச அகதே²தப்³பே³ ச ஸஞ்ஞாஜனநத்த²ங் ஹத்த²விகாரோ ந காதப்³போ³.
No parisakappikenāti parisakappakena parisānuvidhāyakena na bhavitabbaṃ; yaṃ parisāya ruccati, tadeva cetetvā kappetvā na kathetabbanti attho. Na hatthamuddā dassetabbāti kathetabbe ca akathetabbe ca saññājananatthaṃ hatthavikāro na kātabbo.
அத்த²ங் அனுவிதி⁴யந்தேனாதி வினிச்ச²யபடிவேத⁴மேவ ஸல்லக்கெ²ந்தேன ‘‘இத³ங் ஸுத்தங் உபலப்³ப⁴தி, இமஸ்மிங் வினிச்ச²யே இத³ங் வக்கா²மீ’’தி ஏவங் பரிதுலயந்தேன நிஸீதி³தப்³ப³ந்தி அத்தோ². ந ச ஆஸனா வுட்டா²தப்³ப³ந்தி ந ஆஸனா வுட்டா²ய ஸன்னிபாதமண்ட³லே விசரிதப்³ப³ங், வினயத⁴ரே உட்டி²தே ஸப்³பா³ பரிஸா உட்ட²ஹதி. ந வீதிஹாதப்³ப³ந்தி ந வினிச்ச²யோ ஹாபேதப்³போ³. ந கும்மக்³கோ³ ஸேவிதப்³போ³தி ந ஆபத்தி தீ³பேதப்³பா³. அஸாஹஸிகேன ப⁴விதப்³ப³ந்தி ந ஸஹஸாகாரினா ப⁴விதப்³ப³ங்; ஸஹஸா து³ருத்தவசனங் ந கதே²தப்³ப³ந்தி அத்தோ². வசனக்க²மேனாதி து³ருத்தவாசங் க²மனஸீலேன. ஹிதபரிஸக்கினாதி ஹிதேஸினா ஹிதக³வேஸினா கருணா ச கருணாபுப்³ப³பா⁴கோ³ ச உபட்டா²பேதப்³போ³தி அயங் பத³த்³வயேபி அதி⁴ப்பாயோ. அனஸுருத்தேனாதி ந அஸுருத்தேன. அஸுருத்தங் வுச்சதி விக்³கா³ஹிககதா²ஸங்கா²தங் அஸுந்த³ரவசனங்; தங் ந கதே²தப்³ப³ந்தி அத்தோ². அத்தா பரிக்³க³ஹேதப்³போ³தி ‘‘வினிச்சி²னிதுங் வூபஸமேதுங் ஸக்கி²ஸ்ஸாமி நு கோ² நோ’’தி ஏவங் அத்தா பரிக்³க³ஹேதப்³போ³; அத்தனோ பமாணங் ஜானிதப்³ப³ந்தி அத்தோ². பரோ பரிக்³க³ஹேதப்³போ³தி ‘‘லஜ்ஜியா நு கோ² அயங் பரிஸா, ஸக்கா ஸஞ்ஞாபேதுங் உதா³ஹு நோ’’தி ஏவங் பரோ பரிக்³க³ஹேதப்³போ³.
Atthaṃ anuvidhiyantenāti vinicchayapaṭivedhameva sallakkhentena ‘‘idaṃ suttaṃ upalabbhati, imasmiṃ vinicchaye idaṃ vakkhāmī’’ti evaṃ paritulayantena nisīditabbanti attho. Na ca āsanā vuṭṭhātabbanti na āsanā vuṭṭhāya sannipātamaṇḍale vicaritabbaṃ, vinayadhare uṭṭhite sabbā parisā uṭṭhahati. Na vītihātabbanti na vinicchayo hāpetabbo. Na kummaggo sevitabboti na āpatti dīpetabbā. Asāhasikena bhavitabbanti na sahasākārinā bhavitabbaṃ; sahasā duruttavacanaṃ na kathetabbanti attho. Vacanakkhamenāti duruttavācaṃ khamanasīlena. Hitaparisakkināti hitesinā hitagavesinā karuṇā ca karuṇāpubbabhāgo ca upaṭṭhāpetabboti ayaṃ padadvayepi adhippāyo. Anasuruttenāti na asuruttena. Asuruttaṃ vuccati viggāhikakathāsaṅkhātaṃ asundaravacanaṃ; taṃ na kathetabbanti attho. Attā pariggahetabboti ‘‘vinicchinituṃ vūpasametuṃ sakkhissāmi nu kho no’’ti evaṃ attā pariggahetabbo; attano pamāṇaṃ jānitabbanti attho. Paro pariggahetabboti ‘‘lajjiyā nu kho ayaṃ parisā, sakkā saññāpetuṃ udāhu no’’ti evaṃ paro pariggahetabbo.
சோத³கோ பரிக்³க³ஹேதப்³போ³தி ‘‘த⁴ம்மசோத³கோ நு கோ² நோ’’தி ஏவங் பரிக்³க³ஹேதப்³போ³. சுதி³தகோ பரிக்³க³ஹேதப்³போ³தி ‘‘த⁴ம்மசுதி³தகோ நு கோ² நோ’’தி ஏவங் பரிக்³க³ஹேதப்³போ³. அத⁴ம்மசோத³கோ பரிக்³க³ஹேதப்³போ³தி தஸ்ஸ பமாணங் ஜானிதப்³ப³ங். ஸேஸேஸுபி ஏஸேவ நயோ. வுத்தங் அஹாபெந்தேனாதி சோத³கசுதி³தகேஹி வுத்தவசனங் அஹாபெந்தேன. அவுத்தங் அபகாஸெந்தேனாதி அனோஸடங் வத்து²ங் அப்பகாஸெந்தேன. மந்தோ³ ஹாஸேதப்³போ³தி மந்தோ³ மோமூஹோ பக்³க³ண்ஹிதப்³போ³, ‘‘நனு த்வங் குலபுத்தோ’’தி உத்தேஜெத்வா அனுயோக³வத்தங் கதா²பெத்வா தஸ்ஸ அனுயோகோ³ க³ண்ஹிதப்³போ³. பீ⁴ரூ அஸ்ஸாஸேதப்³போ³தி யஸ்ஸ ஸங்க⁴மஜ்ஜ²ங் வா க³ணமஜ்ஜ²ங் வா அனோஸடபுப்³ப³த்தா ஸாரஜ்ஜங் உப்பஜ்ஜதி, தாதி³ஸோ ‘‘மா பா⁴யி, விஸ்ஸட்டோ² கதே²ஹி, மயங் தே உபத்த²ம்பா⁴ ப⁴விஸ்ஸாமா’’தி வத்வாபி அனுயோக³வத்தங் கதா²பேதப்³போ³. சண்டோ³ நிஸேதே⁴தப்³போ³தி அபஸாதே³தப்³போ³ தஜ்ஜேதப்³போ³. அஸுசி விபா⁴வேதப்³போ³தி அலஜ்ஜிங் பகாஸெத்வா ஆபத்திங் தே³ஸாபேதப்³போ³. உஜுமத்³த³வேனாதி யோ பி⁴க்கு² உஜு ஸீலவா காயவங்காதி³ரஹிதோ, ஸோ மத்³த³வேனேவ உபசரிதப்³போ³. த⁴ம்மேஸு ச புக்³க³லேஸு சாதி எத்த² யோ த⁴ம்மக³ருகோ ஹோதி ந புக்³க³லக³ருகோ, அயமேவ த⁴ம்மேஸு ச புக்³க³லேஸு ச மஜ்ஜ²த்தோதி வேதி³தப்³போ³.
Codako pariggahetabboti ‘‘dhammacodako nu kho no’’ti evaṃ pariggahetabbo. Cuditako pariggahetabboti ‘‘dhammacuditako nu kho no’’ti evaṃ pariggahetabbo. Adhammacodako pariggahetabboti tassa pamāṇaṃ jānitabbaṃ. Sesesupi eseva nayo. Vuttaṃahāpentenāti codakacuditakehi vuttavacanaṃ ahāpentena. Avuttaṃ apakāsentenāti anosaṭaṃ vatthuṃ appakāsentena. Mando hāsetabboti mando momūho paggaṇhitabbo, ‘‘nanu tvaṃ kulaputto’’ti uttejetvā anuyogavattaṃ kathāpetvā tassa anuyogo gaṇhitabbo. Bhīrū assāsetabboti yassa saṅghamajjhaṃ vā gaṇamajjhaṃ vā anosaṭapubbattā sārajjaṃ uppajjati, tādiso ‘‘mā bhāyi, vissaṭṭho kathehi, mayaṃ te upatthambhā bhavissāmā’’ti vatvāpi anuyogavattaṃ kathāpetabbo. Caṇḍo nisedhetabboti apasādetabbo tajjetabbo. Asuci vibhāvetabboti alajjiṃ pakāsetvā āpattiṃ desāpetabbo. Ujumaddavenāti yo bhikkhu uju sīlavā kāyavaṅkādirahito, so maddaveneva upacaritabbo. Dhammesu ca puggalesu cāti ettha yo dhammagaruko hoti na puggalagaruko, ayameva dhammesu ca puggalesu ca majjhattoti veditabbo.
366. ஸுத்தங் ஸங்ஸந்த³னத்தா²யாதிஆதீ³ஸு தேன ச பன ஏவங் ஸப்³ரஹ்மசாரீனங் பியமனாபக³ருபா⁴வனீயேன அனுவிஜ்ஜகேன ஸமுதா³ஹடேஸு ஸுத்தாதீ³ஸு ஸுத்தங் ஸங்ஸந்த³னத்தா²ய; ஆபத்தானாபத்தீனங் ஸங்ஸந்த³னத்த²ந்தி வேதி³தப்³ப³ங். ஓபம்மங் நித³ஸ்ஸனத்தா²யாதி ஓபம்மங் அத்த²த³ஸ்ஸனத்தா²ய. அத்தோ² விஞ்ஞாபனத்தா²யாதி அத்தோ² ஜானாபனத்தா²ய. படிபுச்சா² ட²பனத்தா²யாதி புச்சா² புக்³க³லஸ்ஸ ட²பனத்தா²ய. ஓகாஸகம்மங் சோத³னத்தா²யாதி வத்து²னா வா ஆபத்தியா வா சோத³னத்தா²ய. சோத³னா ஸாரணத்தா²யாதி தோ³ஸாதோ³ஸங் ஸராபனத்தா²ய. ஸாரணா ஸவசனீயத்தா²யாதி தோ³ஸாதோ³ஸஸாரணா ஸவசனீயகரணத்தா²ய. ஸவசனீயங் பலிபோ³த⁴த்தா²யாதி ஸவசனீயங் ‘‘இமம்ஹா ஆவாஸா பரங் மா பக்கமீ’’தி ஏவங் பலிபோ³த⁴த்தா²ய. பலிபோ³தோ⁴ வினிச்ச²யத்தா²யாதி வினிச்ச²யங் பாபனத்தா²ய. வினிச்ச²யோ ஸந்தீரணத்தா²யாதி தோ³ஸாதோ³ஸங் ஸந்தீரணத்தா²ய துலனத்தா²ய. ஸந்தீரணங் டா²னாட்டா²னக³மனத்தா²யாதி ஆபத்திஅனாபத்திக³ருகலஹுகாபத்திஜானநத்தா²ய . ஸங்கோ⁴ ஸம்பரிக்³க³ஹஸம்படிச்ச²னத்தா²யாதி வினிச்ச²யஸம்படிக்³க³ஹணத்தா²ய ச; ஸுவினிச்சி²தது³ப்³பி³னிச்சி²தபா⁴வஜானநத்தா²ய சாதி அத்தோ². பச்சேகட்டா²யினோ அவிஸங்வாத³கட்டா²யினோதி இஸ்ஸரியாதி⁴பச்சஜெட்ட²கட்டா²னே ச அவிஸங்வாத³கட்டா²னே ச டி²தா; ந தே அபஸாதே³தப்³பா³தி அத்தோ².
366.Suttaṃ saṃsandanatthāyātiādīsu tena ca pana evaṃ sabrahmacārīnaṃ piyamanāpagarubhāvanīyena anuvijjakena samudāhaṭesu suttādīsu suttaṃ saṃsandanatthāya; āpattānāpattīnaṃ saṃsandanatthanti veditabbaṃ. Opammaṃ nidassanatthāyāti opammaṃ atthadassanatthāya. Attho viññāpanatthāyāti attho jānāpanatthāya. Paṭipucchā ṭhapanatthāyāti pucchā puggalassa ṭhapanatthāya. Okāsakammaṃ codanatthāyāti vatthunā vā āpattiyā vā codanatthāya. Codanā sāraṇatthāyāti dosādosaṃ sarāpanatthāya. Sāraṇā savacanīyatthāyāti dosādosasāraṇā savacanīyakaraṇatthāya. Savacanīyaṃ palibodhatthāyāti savacanīyaṃ ‘‘imamhā āvāsā paraṃ mā pakkamī’’ti evaṃ palibodhatthāya. Palibodho vinicchayatthāyāti vinicchayaṃ pāpanatthāya. Vinicchayo santīraṇatthāyāti dosādosaṃ santīraṇatthāya tulanatthāya. Santīraṇaṃ ṭhānāṭṭhānagamanatthāyāti āpattianāpattigarukalahukāpattijānanatthāya . Saṅgho sampariggahasampaṭicchanatthāyāti vinicchayasampaṭiggahaṇatthāya ca; suvinicchitadubbinicchitabhāvajānanatthāya cāti attho. Paccekaṭṭhāyino avisaṃvādakaṭṭhāyinoti issariyādhipaccajeṭṭhakaṭṭhāne ca avisaṃvādakaṭṭhāne ca ṭhitā; na te apasādetabbāti attho.
இதா³னி யே மந்தா³ மந்த³பு³த்³தி⁴னோ ஏவங் வதெ³ய்யுங் ‘‘வினயோ நாம கிமத்தா²யா’’தி தேஸங் வசனோகாஸபித³ஹனத்த²மத்தங் த³ஸ்ஸேதுங் வினயோ ஸங்வரத்தா²யாதிஆதி³மாஹ. தத்த² வினயோ ஸங்வரத்தா²யாதி ஸகலாபி வினயபஞ்ஞத்தி காயவசீத்³வாரஸங்வரத்தா²ய. ஆஜீவவிஸுத்³தி⁴பரியோஸானஸ்ஸ ஸீலஸ்ஸ உபனிஸ்ஸயோ ஹோதி; பச்சயோ ஹோதீதி அத்தோ². ஏஸ நயோ ஸப்³ப³த்த². அபிசெத்த² அவிப்படிஸாரோதி பாபபுஞ்ஞானங் கதாகதவஸேன சித்தவிப்படிஸாராபா⁴வோ. பாமுஜ்ஜந்தி து³ப்³ப³லா தருணபீதி. பீதீதி ப³லவா ப³ஹலபீதி. பஸ்ஸத்³தீ⁴தி காயசித்தத³ரத²படிப்பஸ்ஸத்³தி⁴. ஸுக²ந்தி காயிகசேதஸிகஸுக²ங். தஞ்ஹி து³வித⁴ம்பி ஸமாதி⁴ஸ்ஸ உபனிஸ்ஸயபச்சயோ ஹோதி. ஸமாதீ⁴தி சித்தேகக்³க³தா. யதா²பூ⁴தஞாணத³ஸ்ஸனந்தி தருணவிபஸ்ஸனா; உத³யப்³ப³யஞாணஸ்ஸேதங் அதி⁴வசனங். சித்தேகக்³க³தா ஹி தருணவிபஸ்ஸனாய உபனிஸ்ஸயபச்சயோ ஹோதி. நிப்³பி³தா³தி ஸிகா²பத்தா வுட்டா²னகா³மினிப³லவவிபஸ்ஸனா. விராகோ³தி அரியமக்³கோ³. விமுத்தீதி அரஹத்தப²லங். சதுப்³பி³தோ⁴பி ஹி அரியமக்³கோ³ அரஹத்தப²லஸ்ஸ உபனிஸ்ஸயபச்சயோ ஹோதி. விமுத்திஞாணத³ஸ்ஸனந்தி பச்சவெக்க²ணாஞாணங். விமுத்திஞாணத³ஸ்ஸனங் அனுபாதா³பரினிப்³பா³னத்தா²யாதி அபச்சயபரினிப்³பா³னத்தா²ய. அபச்சயபரினிப்³பா³னஸ்ஸ ஹி தங் பச்சயோ ஹோதி, தஸ்மிங் அனுப்பத்தே அவஸ்ஸங் பரினிப்³பா³யிதப்³ப³தோதி. ஏதத³த்தா² கதா²தி அயங் வினயகதா² நாம ஏதத³த்தா². மந்தனாதி வினயமந்தனா ஏவ. உபனிஸாதி அயங் ‘‘வினயோ ஸங்வரத்தா²யா’’திஆதி³கா பரம்பரபச்சயதாபி ஏதத³த்தா²ய. ஸோதாவதா⁴னந்தி இமிஸ்ஸா பரம்பரபச்சயகதா²ய ஸோதாவதா⁴னங். இமங் கத²ங் ஸுத்வா யங் உப்பஜ்ஜதி ஞாணங், தம்பி ஏதத³த்தா²ய. யதி³த³ங் அனுபாதா³ சித்தஸ்ஸ விமொக்கோ²தி யோ அயங் சதூஹி உபாதா³னேஹி அனுபாதி³யித்வா சித்தஸ்ஸ அரஹத்தப²லஸங்கா²தோ விமொக்கோ², ஸோபி ஏதத³த்தா²ய; அபச்சயபரினிப்³பா³னத்தா²ய ஏவாதி அத்தோ².
Idāni ye mandā mandabuddhino evaṃ vadeyyuṃ ‘‘vinayo nāma kimatthāyā’’ti tesaṃ vacanokāsapidahanatthamattaṃ dassetuṃ vinayo saṃvaratthāyātiādimāha. Tattha vinayo saṃvaratthāyāti sakalāpi vinayapaññatti kāyavacīdvārasaṃvaratthāya. Ājīvavisuddhipariyosānassa sīlassa upanissayo hoti; paccayo hotīti attho. Esa nayo sabbattha. Apicettha avippaṭisāroti pāpapuññānaṃ katākatavasena cittavippaṭisārābhāvo. Pāmujjanti dubbalā taruṇapīti. Pītīti balavā bahalapīti. Passaddhīti kāyacittadarathapaṭippassaddhi. Sukhanti kāyikacetasikasukhaṃ. Tañhi duvidhampi samādhissa upanissayapaccayo hoti. Samādhīti cittekaggatā. Yathābhūtañāṇadassananti taruṇavipassanā; udayabbayañāṇassetaṃ adhivacanaṃ. Cittekaggatā hi taruṇavipassanāya upanissayapaccayo hoti. Nibbidāti sikhāpattā vuṭṭhānagāminibalavavipassanā. Virāgoti ariyamaggo. Vimuttīti arahattaphalaṃ. Catubbidhopi hi ariyamaggo arahattaphalassa upanissayapaccayo hoti. Vimuttiñāṇadassananti paccavekkhaṇāñāṇaṃ. Vimuttiñāṇadassanaṃ anupādāparinibbānatthāyāti apaccayaparinibbānatthāya. Apaccayaparinibbānassa hi taṃ paccayo hoti, tasmiṃ anuppatte avassaṃ parinibbāyitabbatoti. Etadatthā kathāti ayaṃ vinayakathā nāma etadatthā. Mantanāti vinayamantanā eva. Upanisāti ayaṃ ‘‘vinayo saṃvaratthāyā’’tiādikā paramparapaccayatāpi etadatthāya. Sotāvadhānanti imissā paramparapaccayakathāya sotāvadhānaṃ. Imaṃ kathaṃ sutvā yaṃ uppajjati ñāṇaṃ, tampi etadatthāya. Yadidaṃ anupādā cittassa vimokkhoti yo ayaṃ catūhi upādānehi anupādiyitvā cittassa arahattaphalasaṅkhāto vimokkho, sopi etadatthāya; apaccayaparinibbānatthāya evāti attho.
367. அனுயோக³வத்தகா³தா²ஸு பட²மகா³தா² வுத்தத்தா² ஏவ.
367. Anuyogavattagāthāsu paṭhamagāthā vuttatthā eva.
வத்து²ங் விபத்திங் ஆபத்திங், நிதா³னங் ஆகாரஅகோவிதோ³ புப்³பா³பரங் ந ஜானாதீதி ‘‘வத்து²’’ந்திஆதீ³னி ‘‘ந ஜானாதீ’’தி பதே³ன ஸம்ப³ந்தோ⁴. ‘‘அகோவிதோ³’’தி பத³ஸ்ஸ ‘‘ஸ வே தாதி³ஸகோ’’தி இமினா ஸம்ப³ந்தோ⁴. தஸ்மா அயமெத்த² யோஜனா – யோ பி⁴க்கு² பாராஜிகாதீ³னங் வத்து²ங் ந ஜானாதி, சதுப்³பி³த⁴ங் விபத்திங் ந ஜானாதி, ஸத்தவித⁴ங் ஆபத்திங் ந ஜானாதி, ‘‘இத³ங் ஸிக்கா²பத³ங் அஸுகஸ்மிங் நாம நக³ரே பஞ்ஞத்த’’ந்தி ஏவங் நிதா³னங் ந ஜானாதி, ‘‘இத³ங் புரிமவசனங் இத³ங் பச்சி²மவசன’’ந்தி புப்³பா³பரங் ந ஜானாதி, ‘‘இத³ங் கதங் இத³ங் அகத’’ந்தி கதாகதங் ந ஜானாதி. ஸமேன சாதி தேனேவ புப்³பா³பரங் அஜானநஸ்ஸ ஸமேன அஞ்ஞாணேன, ‘‘கதாகதங் ந ஜானாதீ’’தி வுத்தங் ஹோதி; ஏவங் தாவ நஜானாதி-பதே³ன ஸத்³தி⁴ங் ஸம்ப³ந்தோ⁴ வேதி³தப்³போ³. யங் பனேதங் ‘‘ஆகாரஅகோவிதோ³’’தி வுத்தங், தத்த² ஆகாரஅகோவிதோ³தி காரணாகாரணே அகோவிதோ³. இதி ய்வாயங் வத்து²ஆதீ³னிபி ந ஜானாதி, ஆகாரஸ்ஸ ச அகோவிதோ³, ஸ வே தாதி³ஸகோ பி⁴க்கு² அபடிக்கோ²தி வுச்சதி.
Vatthuṃ vipattiṃ āpattiṃ, nidānaṃ ākāraakovido pubbāparaṃ na jānātīti ‘‘vatthu’’ntiādīni ‘‘na jānātī’’ti padena sambandho. ‘‘Akovido’’ti padassa ‘‘sa ve tādisako’’ti iminā sambandho. Tasmā ayamettha yojanā – yo bhikkhu pārājikādīnaṃ vatthuṃ na jānāti, catubbidhaṃ vipattiṃ na jānāti, sattavidhaṃ āpattiṃ na jānāti, ‘‘idaṃ sikkhāpadaṃ asukasmiṃ nāma nagare paññatta’’nti evaṃ nidānaṃ na jānāti, ‘‘idaṃ purimavacanaṃ idaṃ pacchimavacana’’nti pubbāparaṃ na jānāti, ‘‘idaṃ kataṃ idaṃ akata’’nti katākataṃ na jānāti. Samena cāti teneva pubbāparaṃ ajānanassa samena aññāṇena, ‘‘katākataṃ na jānātī’’ti vuttaṃ hoti; evaṃ tāva najānāti-padena saddhiṃ sambandho veditabbo. Yaṃ panetaṃ ‘‘ākāraakovido’’ti vuttaṃ, tattha ākāraakovidoti kāraṇākāraṇe akovido. Iti yvāyaṃ vatthuādīnipi na jānāti, ākārassa ca akovido, sa ve tādisako bhikkhu apaṭikkhoti vuccati.
கம்மஞ்ச அதி⁴கரணஞ்சாதி இமேஸம்பி பதா³னங் ‘‘ந ஜானாதீ’’தி பதே³னேவ ஸம்ப³ந்தோ⁴. அயங் பனெத்த² யோஜனா – ததே²வ இதி ய்வாயங் கம்மஞ்ச ந ஜானாதி, அதி⁴கரணஞ்ச ந ஜானாதி, ஸத்தப்பகாரே ஸமதே² சாபி அகோவிதோ³, ராகா³தீ³ஹி பன ரத்தோ து³ட்டோ² ச மூள்ஹோ ச, ப⁴யேன ப⁴யா க³ச்ச²தி, ஸம்மோஹேன மோஹா க³ச்ச²தி, ரத்தத்தா பன து³ட்ட²த்தா ச ச²ந்தா³ தோ³ஸா ச க³ச்ச²தி, பரங் ஸஞ்ஞாபேதுங் அஸமத்த²தாய ந ச ஸஞ்ஞத்திகுஸலோ, காரணாகாரணத³ஸ்ஸனே அஸமத்த²தாய நிஜ்ஜ²த்தியா ச அகோவிதோ³ அத்தனோ ஸதி³ஸாய பரிஸாய லத்³த⁴த்தா லத்³த⁴பக்கோ², ஹிரியா பரிபா³ஹிரத்தா அஹிரிகோ, காளகேஹி கம்மேஹி ஸமன்னாக³தத்தா கண்ஹகம்மோ, த⁴ம்மாத³ரியபுக்³க³லாத³ரியானங் அபா⁴வதோ அனாத³ரோ, ஸ வே தாதி³ஸகோ பி⁴க்கு² அபடிக்கோ²தி வுச்சதி, ந படிக்கி²தப்³போ³ ந ஓலோகேதப்³போ³, ந ஸம்மன்னித்வா இஸ்ஸரியாதி⁴பச்சஜெட்ட²கட்டா²னே ட²பேதப்³போ³தி அத்தோ². ஸுக்கபக்க²கா³தா²னம்பி யோஜனானயோ வுத்தனயேனேவ வேதி³தப்³போ³தி.
Kammañca adhikaraṇañcāti imesampi padānaṃ ‘‘na jānātī’’ti padeneva sambandho. Ayaṃ panettha yojanā – tatheva iti yvāyaṃ kammañca na jānāti, adhikaraṇañca na jānāti, sattappakāre samathe cāpi akovido, rāgādīhi pana ratto duṭṭho ca mūḷho ca, bhayena bhayā gacchati, sammohena mohā gacchati, rattattā pana duṭṭhattā ca chandā dosā ca gacchati, paraṃ saññāpetuṃ asamatthatāya na ca saññattikusalo, kāraṇākāraṇadassane asamatthatāya nijjhattiyā ca akovido attano sadisāya parisāya laddhattā laddhapakkho, hiriyā paribāhirattā ahiriko, kāḷakehi kammehi samannāgatattā kaṇhakammo, dhammādariyapuggalādariyānaṃ abhāvato anādaro, sa ve tādisako bhikkhu apaṭikkhoti vuccati, na paṭikkhitabbo na oloketabbo, na sammannitvā issariyādhipaccajeṭṭhakaṭṭhāne ṭhapetabboti attho. Sukkapakkhagāthānampi yojanānayo vuttanayeneva veditabboti.
சூளஸங்கா³மவண்ணனா நிட்டி²தா.
Cūḷasaṅgāmavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi / 1. அனுவிஜ்ஜகஸ்ஸபடிபத்தி • 1. Anuvijjakassapaṭipatti
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஸங்கா³மத்³வயவண்ணனா • Saṅgāmadvayavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / அனுவிஜ்ஜகஸ்ஸபடிபத்திவண்ணனா • Anuvijjakassapaṭipattivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / அனுவிஜ்ஜகஸ்ஸ படிபத்திவண்ணனா • Anuvijjakassa paṭipattivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / அனுவிஜ்ஜகஸ்ஸ படிபத்திவண்ணனா • Anuvijjakassa paṭipattivaṇṇanā
