| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
சூளஸங்கா³மங்
Cūḷasaṅgāmaṃ
அனுவிஜ்ஜகஸ்ஸ படிபத்திவண்ணனா
Anuvijjakassa paṭipattivaṇṇanā
365. தத்ர ஹீதி தஸ்மிங் ஸன்னிபாதே. அத்தபச்சத்தி²காதி லஜ்ஜிபேஸலஸ்ஸ சோத³கபாபக³ரஹீபுக்³க³லஸ்ஸ அனத்த²காமா வேரீபுக்³க³லா. ஸாஸனபச்சத்தி²காதி அத்தனோ அனாசாரானுகு³ணங் பு³த்³த⁴வசனங் பகாஸெந்தோ தண்ஹாக³திகா, தி³ட்டி²க³திகா ச. அஜ்ஜோ²கா³ஹெத்வாதி அலஜ்ஜிஅபி⁴ப⁴வனவஸேன ஸங்க⁴மஜ்ஜ²ங் பவிஸித்வா. ஸோ ஸங்கா³மாவசரோதி ஸோ சோத³கோ ஸங்கா³மாவசரோ நாம. தி³ட்ட²ஸுதமுதம்பி ராஜகதா²தி³கந்தி தி³ட்ட²ஸுதவஸேனேவ ராஜசோராதி³கத²ங், முதவஸேனபி அன்னாதி³கத²ஞ்ச அகதெ²ந்தேனாதி யோஜேதப்³ப³ங். கப்பியாகப்பியனிஸ்ஸிதா வாதிஆதீ³ஸு ரூபாரூபபடிச்சே²த³பதே³ன ஸகலஅபி⁴த⁴ம்மத்த²பிடகத்தங் த³ஸ்ஸேதி. ஸமதா²சாராதீ³ஹி படிஸங்யுத்தந்தி ஸகலஸுத்தந்தபிடகத்தங். தத்த² ஸமதா²சாரோ நாம ஸமத²பா⁴வனாக்கமோ. ததா² விபஸ்ஸனாசாரோ. டா²னநிஸஜ்ஜவத்தாதி³னிஸ்ஸிதாதி ஸங்க⁴மஜ்ஜா²தீ³ஸு க³ருசித்தீகாரங் பச்சுபட்ட²பெத்வா டா²னாதி³க்கமனிஸ்ஸிதா சேவ சுத்³த³ஸமஹாவத்தாதி³வத்தனிஸ்ஸிதா ச, ஆதி³-ஸத்³தே³ன அப்பிச்ச²தாதி³னிஸ்ஸிதா சாதி அத்தோ². பஞ்ஹே உப்பன்னேதி கேனசி உப்பன்னே பஞ்ஹே புச்சி²தே. இத³ஞ்ச உபலக்க²ணமத்தங், யங் கிஞ்சி உபட்டி²தங் த⁴ம்மங் பா⁴ஸஸ்ஸூதி அதி⁴ப்பாயோ.
365.Tatrahīti tasmiṃ sannipāte. Attapaccatthikāti lajjipesalassa codakapāpagarahīpuggalassa anatthakāmā verīpuggalā. Sāsanapaccatthikāti attano anācārānuguṇaṃ buddhavacanaṃ pakāsento taṇhāgatikā, diṭṭhigatikā ca. Ajjhogāhetvāti alajjiabhibhavanavasena saṅghamajjhaṃ pavisitvā. So saṅgāmāvacaroti so codako saṅgāmāvacaro nāma. Diṭṭhasutamutampi rājakathādikanti diṭṭhasutavaseneva rājacorādikathaṃ, mutavasenapi annādikathañca akathentenāti yojetabbaṃ. Kappiyākappiyanissitā vātiādīsu rūpārūpapaṭicchedapadena sakalaabhidhammatthapiṭakattaṃ dasseti. Samathācārādīhi paṭisaṃyuttanti sakalasuttantapiṭakattaṃ. Tattha samathācāro nāma samathabhāvanākkamo. Tathā vipassanācāro. Ṭhānanisajjavattādinissitāti saṅghamajjhādīsu garucittīkāraṃ paccupaṭṭhapetvā ṭhānādikkamanissitā ceva cuddasamahāvattādivattanissitā ca, ādi-saddena appicchatādinissitā cāti attho. Pañhe uppanneti kenaci uppanne pañhe pucchite. Idañca upalakkhaṇamattaṃ, yaṃ kiñci upaṭṭhitaṃ dhammaṃ bhāsassūti adhippāyo.
குலபதே³ஸோ நாம க²த்தியாதி³ஜாதியம்பி காஸிகராஜகுலாதி³குலவிஸேஸோ. ஏதமேவாஹ ‘‘குலபதே³ஸோ க²த்தியகுலாதி³வஸேனேவ வேதி³தப்³போ³’’தி. ஸன்னிபாதமண்ட³லேதி அத்தனோ அனுவிஜ்ஜமானப்பகாரங் ஸங்க⁴ஸ்ஸ ஞாபனத்த²ங் உட்டா²ய ஸங்க⁴ஸன்னிபாதமஜ்ஜே² இதோ சிதோ ச பரேஸங் முக²ங் ஓலோகெந்தேன ந சரிதப்³ப³ங். யதா²னிஸின்னேனேவ த⁴ம்மவினயானுகு³ணங் வினிச்ச²யங் யதா² ஸப்³பே³ ஸுணந்தி, ததா² வத்தப்³ப³ந்தி அத்தோ².
Kulapadeso nāma khattiyādijātiyampi kāsikarājakulādikulaviseso. Etamevāha ‘‘kulapadeso khattiyakulādivaseneva veditabbo’’ti. Sannipātamaṇḍaleti attano anuvijjamānappakāraṃ saṅghassa ñāpanatthaṃ uṭṭhāya saṅghasannipātamajjhe ito cito ca paresaṃ mukhaṃ olokentena na caritabbaṃ. Yathānisinneneva dhammavinayānuguṇaṃ vinicchayaṃ yathā sabbe suṇanti, tathā vattabbanti attho.
பாளியங் அசண்டி³கதேனாதி அகதசண்ட³பா⁴வேன, அப²ருஸேனாதி அத்தோ². ‘‘ஹிதானுகம்பினா’’தி ஏதேன மெத்தாபுப்³ப³பா⁴கோ³ வுத்தோ. ‘‘காருணிகேன ப⁴விதப்³ப³’’ந்தி இமினா அப்பனாப்பத்தகருணா வுத்தா. ‘‘ஹிதபரிஸக்கினா’’தி இமினா கருணாபுப்³ப³பா⁴கோ³. தேனாஹ ‘‘கருணா ச கருணாபுப்³ப³பா⁴கோ³ ச உபட்டா²பேதப்³போ³தி அயங் பத³த்³வயேபி அதி⁴ப்பாயோ’’தி. லஜ்ஜியாதி லஜ்ஜினீ.
Pāḷiyaṃ acaṇḍikatenāti akatacaṇḍabhāvena, apharusenāti attho. ‘‘Hitānukampinā’’ti etena mettāpubbabhāgo vutto. ‘‘Kāruṇikena bhavitabba’’nti iminā appanāppattakaruṇā vuttā. ‘‘Hitaparisakkinā’’ti iminā karuṇāpubbabhāgo. Tenāha ‘‘karuṇā ca karuṇāpubbabhāgo ca upaṭṭhāpetabboti ayaṃ padadvayepi adhippāyo’’ti. Lajjiyāti lajjinī.
அனுயோக³வத்தங் கதா²பெத்வாதி ‘‘காலேன வக்கா²மீ’’திஆதி³னா (பரி॰ 362) வுத்தவத்தங். அனுயுஞ்ஜனாசாரக்கமேனேவ அனுயுஞ்ஜனங் அனுயோக³வத்தங் நாம, தங் கதா²பெத்வா தேனேவ கமேன அனுயுஞ்ஜாபெத்வாதி அத்தோ². உஜுமத்³த³வேனாதி எத்த² அஜ்ஜா²ஹரிதப்³ப³பத³ங் த³ஸ்ஸேதி ‘‘உபசரிதப்³போ³’’தி. ‘‘த⁴ம்மேஸு ச புக்³க³லேஸு சா’’தி இத³ங் ‘‘மஜ்ஜ²த்தேன ப⁴விதப்³ப³’’ந்தி பகதேன ஸம்ப³ந்தி⁴தப்³ப³ந்தி ஆஹ ‘‘த⁴ம்மேஸு ச புக்³க³லேஸு ச…பே॰… மஜ்ஜ²த்தோதி வேதி³தப்³போ³’’தி. யஞ்ஹி யத்த² கத்த²சி கத்தப்³ப³ங், தங் தத்த² அதிக்கமந்தோ மஜ்ஜ²த்தோ நாம ந ஹோதி, த⁴ம்மேஸு ச கா³ரவோ கத்தப்³போ³. புக்³க³லேஸு பன மெத்தாபா⁴வேன பக்க²பாதகா³ரவோ. தஸ்மா இமங் விதி⁴ங் அனதிக்கந்தோவ தேஸு மஜ்ஜ²த்தோதி வேதி³தப்³போ³.
Anuyogavattaṃkathāpetvāti ‘‘kālena vakkhāmī’’tiādinā (pari. 362) vuttavattaṃ. Anuyuñjanācārakkameneva anuyuñjanaṃ anuyogavattaṃ nāma, taṃ kathāpetvā teneva kamena anuyuñjāpetvāti attho. Ujumaddavenāti ettha ajjhāharitabbapadaṃ dasseti ‘‘upacaritabbo’’ti. ‘‘Dhammesu ca puggalesu cā’’ti idaṃ ‘‘majjhattena bhavitabba’’nti pakatena sambandhitabbanti āha ‘‘dhammesu ca puggalesu ca…pe… majjhattoti veditabbo’’ti. Yañhi yattha katthaci kattabbaṃ, taṃ tattha atikkamanto majjhatto nāma na hoti, dhammesu ca gāravo kattabbo. Puggalesu pana mettābhāvena pakkhapātagāravo. Tasmā imaṃ vidhiṃ anatikkantova tesu majjhattoti veditabbo.
366. ஸங்ஸந்த³னத்த²ந்தி ஆபத்தி வா அனாபத்தி வாதி ஸங்ஸயே ஜாதே ஸங்ஸந்தி³த்வா நிச்ச²யகரணத்த²ங் வுத்தந்தி அதி⁴ப்பாயோ. அத்த²த³ஸ்ஸனாயாதி ஸாதே⁴தப்³ப³ஸ்ஸ ஆபத்தாதி³உபமெய்யத்த²ஸ்ஸ சோத³கசுதி³தகே அத்தனோ படிஞ்ஞாய ஏவ ஸரூபவிபா⁴வனத்த²ங். அத்தோ² ஜானாபனத்தா²யாதி ஏவங் விபா⁴விதோ அத்தோ² சோத³கசுதி³தகஸங்கா⁴னங் ஞாபனத்தா²ய நிஜ்ஜா²பனத்தா²ய, ஸம்படிச்சா²பனத்தா²யாதி அத்தோ². புக்³க³லஸ்ஸ ட²பனத்தா²யாதி சோத³கசுதி³தகே அத்தனோ படிஞ்ஞாய ஏவ ஆபத்தியங், அனாபத்தியங் வா பதிட்டா²பனத்தா²ய. ஸாரணத்தா²யாதி பமுட்ட²ஸராபனத்தா²ய. ஸவசனீயகரணத்தா²யாதி தோ³ஸே ஸாரிதேபி ஸம்படிச்சி²த்வா படிகம்மங் அகரொந்தஸ்ஸ ஸவசனீயகரணத்தா²ய. ‘‘ந தே அபஸாதே³தப்³பா³’’தி இத³ங் அதி⁴ப்பேதத்த²த³ஸ்ஸனங். தத்த² அவிஸங்வாத³கட்டா²னே டி²தா ஏவ ந அபஸாதே³தப்³பா³, ந இதரேதி த³ட்ட²ப்³ப³ங்.
366.Saṃsandanatthanti āpatti vā anāpatti vāti saṃsaye jāte saṃsanditvā nicchayakaraṇatthaṃ vuttanti adhippāyo. Atthadassanāyāti sādhetabbassa āpattādiupameyyatthassa codakacuditake attano paṭiññāya eva sarūpavibhāvanatthaṃ. Attho jānāpanatthāyāti evaṃ vibhāvito attho codakacuditakasaṅghānaṃ ñāpanatthāya nijjhāpanatthāya, sampaṭicchāpanatthāyāti attho. Puggalassa ṭhapanatthāyāti codakacuditake attano paṭiññāya eva āpattiyaṃ, anāpattiyaṃ vā patiṭṭhāpanatthāya. Sāraṇatthāyāti pamuṭṭhasarāpanatthāya. Savacanīyakaraṇatthāyāti dose sāritepi sampaṭicchitvā paṭikammaṃ akarontassa savacanīyakaraṇatthāya. ‘‘Na te apasādetabbā’’ti idaṃ adhippetatthadassanaṃ. Tattha avisaṃvādakaṭṭhāne ṭhitā eva na apasādetabbā, na itareti daṭṭhabbaṃ.
அப்பச்சயபரினிப்³பா³னத்தா²யாதி ஆயதிங் படிஸந்தி⁴யா அகாரணபூ⁴தபரினிப்³பா³னத்தா²ய. பரினிப்³பா³னஞ்ஹி நாம கீ²ணாஸவானங் ஸப்³ப³பச்சி²மா சுதிசித்தகம்மஜரூபஸங்கா²தா க²ந்தா⁴, தே ச ஸப்³பா³காரதோ ஸமுச்சி²ன்னானுஸயதாய புனப்³ப⁴வாய அனந்தராதி³பச்சயா ந ஹொந்தி அஞ்ஞேஹி ச தண்ஹாதி³பச்சயேஹி விரஹிதத்தா. தஸ்மா ‘‘அப்பச்சயபரினிப்³பா³ன’’ந்தி வுச்சதி. தந்தி விமுத்திஞாணத³ஸ்ஸனங். தேனேவாஹ ‘‘தஸ்மி’’ந்தி. வினயமந்தனாதி வினயவினிச்ச²யோ. ஸோதாவதா⁴னந்தி ஸோதஸ்ஸ ஓத³ஹனங், ஸவனந்தி அத்தோ². தேனாஹ ‘‘யங் உப்பஜ்ஜதி ஞாண’’ந்தி. யதா²வுத்தாய வினயஸங்வராதி³காரணபரம்பராய விமுத்தியா ஏவ பதா⁴னத்தா ஸா புன சித்தஸ்ஸ விமொக்கோ²தி உத்³த⁴டோதி ஆஹ ‘‘அரஹத்தப²லஸங்கா²தோ விமொக்கோ²’’தி. அத² வா யோ யங் கிஞ்சி த⁴ம்மங் அனுபாதி³யித்வா பரினிப்³பா³னவஸேன சித்தஸ்ஸ சித்தஸந்ததியா, தப்படிப³த்³த⁴கம்மஜரூபஸந்ததியா ச விமொக்கோ² விமுச்சனங் அபுனப்பவத்திவஸேன விக³மோ, ஏதத³த்தா²ய ஏதஸ்ஸ விக³மஸ்ஸத்தா²ய ஏவாதி ஏவங் நிக³மனவஸேனபெத்த² அத்தோ² வேதி³தப்³போ³.
Appaccayaparinibbānatthāyāti āyatiṃ paṭisandhiyā akāraṇabhūtaparinibbānatthāya. Parinibbānañhi nāma khīṇāsavānaṃ sabbapacchimā cuticittakammajarūpasaṅkhātā khandhā, te ca sabbākārato samucchinnānusayatāya punabbhavāya anantarādipaccayā na honti aññehi ca taṇhādipaccayehi virahitattā. Tasmā ‘‘appaccayaparinibbāna’’nti vuccati. Tanti vimuttiñāṇadassanaṃ. Tenevāha ‘‘tasmi’’nti. Vinayamantanāti vinayavinicchayo. Sotāvadhānanti sotassa odahanaṃ, savananti attho. Tenāha ‘‘yaṃ uppajjati ñāṇa’’nti. Yathāvuttāya vinayasaṃvarādikāraṇaparamparāya vimuttiyā eva padhānattā sā puna cittassa vimokkhoti uddhaṭoti āha ‘‘arahattaphalasaṅkhāto vimokkho’’ti. Atha vā yo yaṃ kiñci dhammaṃ anupādiyitvā parinibbānavasena cittassa cittasantatiyā, tappaṭibaddhakammajarūpasantatiyā ca vimokkho vimuccanaṃ apunappavattivasena vigamo, etadatthāya etassa vigamassatthāya evāti evaṃ nigamanavasenapettha attho veditabbo.
367. அனுயோக³வத்தகா³தா²ஸு குஸலேன பு³த்³தி⁴மதாதி ஸம்மாஸம்பு³த்³தே⁴ன. கதந்தி நிப்³ப³த்திதங், பகாஸிதந்தி அத்தோ². தேனேவாதிஆதீ³ஸு தேனேவ கதாகதஸ்ஸ அஜானநேவ புப்³பா³பரங் அஜானநஸ்ஸ, அஞ்ஞஸ்ஸபி பி⁴க்கு²னோ யங் கதாகதங் ஹோதி, தம்பி ந ஜானாதீதி அத்தோ². அத்தனோ ஸதி³ஸாயாதி யதா²வுத்தேஹி தோ³ஸேஹி யுத்ததாய அத்தனா ஸதி³ஸாய.
367. Anuyogavattagāthāsu kusalena buddhimatāti sammāsambuddhena. Katanti nibbattitaṃ, pakāsitanti attho. Tenevātiādīsu teneva katākatassa ajānaneva pubbāparaṃ ajānanassa, aññassapi bhikkhuno yaṃ katākataṃ hoti, tampi na jānātīti attho. Attano sadisāyāti yathāvuttehi dosehi yuttatāya attanā sadisāya.
அனுவிஜ்ஜகஸ்ஸ படிபத்திவண்ணனா நிட்டி²தா.
Anuvijjakassa paṭipattivaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi / 1. அனுவிஜ்ஜகஸ்ஸபடிபத்தி • 1. Anuvijjakassapaṭipatti
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பரிவார-அட்ட²கதா² • Parivāra-aṭṭhakathā / அனுவிஜ்ஜகஸ்ஸ படிபத்திவண்ணனா • Anuvijjakassa paṭipattivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஸங்கா³மத்³வயவண்ணனா • Saṅgāmadvayavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / அனுவிஜ்ஜகஸ்ஸபடிபத்திவண்ணனா • Anuvijjakassapaṭipattivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / அனுவிஜ்ஜகஸ்ஸ படிபத்திவண்ணனா • Anuvijjakassa paṭipattivaṇṇanā
