| Library / Tipiṭaka / д̇ибидага • Tipiṭaka / вимад̇ивинод̣̇аний-дийгаа • Vimativinodanī-ṭīkā |
жуул̣асан̇г̇аамам̣
Cūḷasaṅgāmaṃ
анувиж̇ж̇агасса бадибад̇д̇иван̣н̣анаа
Anuvijjakassa paṭipattivaṇṇanā
365. д̇ад̇ра хийд̇и д̇асмим̣ саннибаад̇з. ад̇д̇абажжад̇т̇игаад̇и лаж̇ж̇ибзсаласса жод̣̇агабаабаг̇арахийбуг̇г̇аласса анад̇т̇агаамаа взрийбуг̇г̇алаа. саасанабажжад̇т̇игаад̇и ад̇д̇ано анаажаараануг̇ун̣ам̣ б̣уд̣̇д̇хаважанам̣ багаасзнд̇о д̇ан̣хааг̇ад̇игаа, д̣̇идтиг̇ад̇игаа жа. аж̇жхог̇аахзд̇ваад̇и алаж̇ж̇иабхибхаванавасзна сан̇гхамаж̇жхам̣ бависид̇ваа. со сан̇г̇аамааважарод̇и со жод̣̇аго сан̇г̇аамааважаро наама. д̣̇идтасуд̇амуд̇амби рааж̇агат̇аад̣̇иганд̇и д̣̇идтасуд̇авасзнзва рааж̇ажораад̣̇игат̇ам̣, муд̇авасзнаби аннаад̣̇игат̇ан̃жа агат̇знд̇знаад̇и яож̇зд̇аб̣б̣ам̣. габбияаагаббияаниссид̇аа ваад̇иаад̣̇ийсу руубааруубабадижчзд̣̇абад̣̇зна сагалаабхид̇хаммад̇т̇абидагад̇д̇ам̣ д̣̇ассзд̇и. самат̇аажаараад̣̇ийхи бадисам̣яуд̇д̇анд̇и сагаласуд̇д̇анд̇абидагад̇д̇ам̣. д̇ад̇т̇а самат̇аажааро наама самат̇абхааванааггамо. д̇ат̇аа вибассанаажааро. таананисаж̇ж̇авад̇д̇аад̣̇иниссид̇аад̇и сан̇гхамаж̇жхаад̣̇ийсу г̇аружид̇д̇ийгаарам̣ бажжубадтабзд̇ваа таанаад̣̇иггаманиссид̇аа жзва жуд̣̇д̣̇асамахаавад̇д̇аад̣̇ивад̇д̇аниссид̇аа жа, аад̣̇и-сад̣̇д̣̇зна аббижчад̇аад̣̇иниссид̇аа жаад̇и ад̇т̇о. бан̃хз уббаннзд̇и гзнажи уббаннз бан̃хз бужчид̇з. ид̣̇ан̃жа убалагкан̣амад̇д̇ам̣, яам̣ гин̃жи убадтид̇ам̣ д̇хаммам̣ бхаасассууд̇и ад̇хиббааяо.
365.Tatrahīti tasmiṃ sannipāte. Attapaccatthikāti lajjipesalassa codakapāpagarahīpuggalassa anatthakāmā verīpuggalā. Sāsanapaccatthikāti attano anācārānuguṇaṃ buddhavacanaṃ pakāsento taṇhāgatikā, diṭṭhigatikā ca. Ajjhogāhetvāti alajjiabhibhavanavasena saṅghamajjhaṃ pavisitvā. So saṅgāmāvacaroti so codako saṅgāmāvacaro nāma. Diṭṭhasutamutampi rājakathādikanti diṭṭhasutavaseneva rājacorādikathaṃ, mutavasenapi annādikathañca akathentenāti yojetabbaṃ. Kappiyākappiyanissitā vātiādīsu rūpārūpapaṭicchedapadena sakalaabhidhammatthapiṭakattaṃ dasseti. Samathācārādīhi paṭisaṃyuttanti sakalasuttantapiṭakattaṃ. Tattha samathācāro nāma samathabhāvanākkamo. Tathā vipassanācāro. Ṭhānanisajjavattādinissitāti saṅghamajjhādīsu garucittīkāraṃ paccupaṭṭhapetvā ṭhānādikkamanissitā ceva cuddasamahāvattādivattanissitā ca, ādi-saddena appicchatādinissitā cāti attho. Pañhe uppanneti kenaci uppanne pañhe pucchite. Idañca upalakkhaṇamattaṃ, yaṃ kiñci upaṭṭhitaṃ dhammaṃ bhāsassūti adhippāyo.
гулабад̣̇зсо наама кад̇д̇ияаад̣̇иж̇аад̇ияамби гаасигарааж̇агулаад̣̇игулависзсо. зд̇амзвааха ‘‘гулабад̣̇зсо кад̇д̇ияагулаад̣̇ивасзнзва взд̣̇ид̇аб̣б̣о’’д̇и. саннибаад̇аман̣д̣алзд̇и ад̇д̇ано анувиж̇ж̇амаанаббагаарам̣ сан̇гхасса н̃аабанад̇т̇ам̣ удтааяа сан̇гхасаннибаад̇амаж̇жхз ид̇о жид̇о жа барзсам̣ мукам̣ ологзнд̇зна на жарид̇аб̣б̣ам̣. яат̇аанисиннзнзва д̇хаммавинаяаануг̇ун̣ам̣ винижчаяам̣ яат̇аа саб̣б̣з сун̣анд̇и, д̇ат̇аа вад̇д̇аб̣б̣анд̇и ад̇т̇о.
Kulapadeso nāma khattiyādijātiyampi kāsikarājakulādikulaviseso. Etamevāha ‘‘kulapadeso khattiyakulādivaseneva veditabbo’’ti. Sannipātamaṇḍaleti attano anuvijjamānappakāraṃ saṅghassa ñāpanatthaṃ uṭṭhāya saṅghasannipātamajjhe ito cito ca paresaṃ mukhaṃ olokentena na caritabbaṃ. Yathānisinneneva dhammavinayānuguṇaṃ vinicchayaṃ yathā sabbe suṇanti, tathā vattabbanti attho.
баал̣ияам̣ ажан̣д̣игад̇знаад̇и агад̇ажан̣д̣абхаавзна, апарусзнаад̇и ад̇т̇о. ‘‘хид̇аанугамбинаа’’д̇и зд̇зна мзд̇д̇аабуб̣б̣абхааг̇о вуд̇д̇о. ‘‘гаарун̣игзна бхавид̇аб̣б̣а’’нд̇и иминаа аббанааббад̇д̇агарун̣аа вуд̇д̇аа. ‘‘хид̇абарисаггинаа’’д̇и иминаа гарун̣аабуб̣б̣абхааг̇о. д̇знааха ‘‘гарун̣аа жа гарун̣аабуб̣б̣абхааг̇о жа убадтаабзд̇аб̣б̣од̇и аяам̣ бад̣̇ад̣̇ваязби ад̇хиббааяо’’д̇и. лаж̇ж̇ияаад̇и лаж̇ж̇иний.
Pāḷiyaṃ acaṇḍikatenāti akatacaṇḍabhāvena, apharusenāti attho. ‘‘Hitānukampinā’’ti etena mettāpubbabhāgo vutto. ‘‘Kāruṇikena bhavitabba’’nti iminā appanāppattakaruṇā vuttā. ‘‘Hitaparisakkinā’’ti iminā karuṇāpubbabhāgo. Tenāha ‘‘karuṇā ca karuṇāpubbabhāgo ca upaṭṭhāpetabboti ayaṃ padadvayepi adhippāyo’’ti. Lajjiyāti lajjinī.
ануяог̇авад̇д̇ам̣ гат̇аабзд̇ваад̇и ‘‘гаалзна вагкаамий’’д̇иаад̣̇инаа (бари. 362) вуд̇д̇авад̇д̇ам̣. ануяун̃ж̇анаажаараггамзнзва ануяун̃ж̇анам̣ ануяог̇авад̇д̇ам̣ наама, д̇ам̣ гат̇аабзд̇ваа д̇знзва гамзна ануяун̃ж̇аабзд̇ваад̇и ад̇т̇о. уж̇умад̣̇д̣̇авзнаад̇и зд̇т̇а аж̇жхаахарид̇аб̣б̣абад̣̇ам̣ д̣̇ассзд̇и ‘‘убажарид̇аб̣б̣о’’д̇и. ‘‘д̇хаммзсу жа буг̇г̇алзсу жаа’’д̇и ид̣̇ам̣ ‘‘маж̇жхад̇д̇зна бхавид̇аб̣б̣а’’нд̇и багад̇зна самб̣анд̇хид̇аб̣б̣анд̇и ааха ‘‘д̇хаммзсу жа буг̇г̇алзсу жа…бз… маж̇жхад̇д̇од̇и взд̣̇ид̇аб̣б̣о’’д̇и. яан̃хи яад̇т̇а гад̇т̇ажи гад̇д̇аб̣б̣ам̣, д̇ам̣ д̇ад̇т̇а ад̇иггаманд̇о маж̇жхад̇д̇о наама на ход̇и, д̇хаммзсу жа г̇аараво гад̇д̇аб̣б̣о. буг̇г̇алзсу бана мзд̇д̇аабхаавзна багкабаад̇аг̇аараво. д̇асмаа имам̣ вид̇хим̣ анад̇игганд̇ова д̇зсу маж̇жхад̇д̇од̇и взд̣̇ид̇аб̣б̣о.
Anuyogavattaṃkathāpetvāti ‘‘kālena vakkhāmī’’tiādinā (pari. 362) vuttavattaṃ. Anuyuñjanācārakkameneva anuyuñjanaṃ anuyogavattaṃ nāma, taṃ kathāpetvā teneva kamena anuyuñjāpetvāti attho. Ujumaddavenāti ettha ajjhāharitabbapadaṃ dasseti ‘‘upacaritabbo’’ti. ‘‘Dhammesu ca puggalesu cā’’ti idaṃ ‘‘majjhattena bhavitabba’’nti pakatena sambandhitabbanti āha ‘‘dhammesu ca puggalesu ca…pe… majjhattoti veditabbo’’ti. Yañhi yattha katthaci kattabbaṃ, taṃ tattha atikkamanto majjhatto nāma na hoti, dhammesu ca gāravo kattabbo. Puggalesu pana mettābhāvena pakkhapātagāravo. Tasmā imaṃ vidhiṃ anatikkantova tesu majjhattoti veditabbo.
366. сам̣санд̣̇анад̇т̇анд̇и аабад̇д̇и ваа анаабад̇д̇и ваад̇и сам̣саяз ж̇аад̇з сам̣санд̣̇ид̇ваа нижчаяагаран̣ад̇т̇ам̣ вуд̇д̇анд̇и ад̇хиббааяо. ад̇т̇ад̣̇ассанааяаад̇и саад̇хзд̇аб̣б̣асса аабад̇д̇аад̣̇иубамзяяад̇т̇асса жод̣̇агажуд̣̇ид̇агз ад̇д̇ано бадин̃н̃ааяа зва саруубавибхааванад̇т̇ам̣. ад̇т̇о ж̇аанаабанад̇т̇ааяаад̇и звам̣ вибхаавид̇о ад̇т̇о жод̣̇агажуд̣̇ид̇агасан̇гхаанам̣ н̃аабанад̇т̇ааяа ниж̇жхаабанад̇т̇ааяа, самбадижчаабанад̇т̇ааяаад̇и ад̇т̇о. буг̇г̇аласса табанад̇т̇ааяаад̇и жод̣̇агажуд̣̇ид̇агз ад̇д̇ано бадин̃н̃ааяа зва аабад̇д̇ияам̣, анаабад̇д̇ияам̣ ваа бад̇идтаабанад̇т̇ааяа. сааран̣ад̇т̇ааяаад̇и бамудтасараабанад̇т̇ааяа. саважанийяагаран̣ад̇т̇ааяаад̇и д̣̇осз саарид̇зби самбадижчид̇ваа бадигаммам̣ агаронд̇асса саважанийяагаран̣ад̇т̇ааяа. ‘‘на д̇з абасаад̣̇зд̇аб̣б̣аа’’д̇и ид̣̇ам̣ ад̇хиббзд̇ад̇т̇ад̣̇ассанам̣. д̇ад̇т̇а ависам̣ваад̣̇агадтаанз тид̇аа зва на абасаад̣̇зд̇аб̣б̣аа, на ид̇арзд̇и д̣̇адтаб̣б̣ам̣.
366.Saṃsandanatthanti āpatti vā anāpatti vāti saṃsaye jāte saṃsanditvā nicchayakaraṇatthaṃ vuttanti adhippāyo. Atthadassanāyāti sādhetabbassa āpattādiupameyyatthassa codakacuditake attano paṭiññāya eva sarūpavibhāvanatthaṃ. Attho jānāpanatthāyāti evaṃ vibhāvito attho codakacuditakasaṅghānaṃ ñāpanatthāya nijjhāpanatthāya, sampaṭicchāpanatthāyāti attho. Puggalassa ṭhapanatthāyāti codakacuditake attano paṭiññāya eva āpattiyaṃ, anāpattiyaṃ vā patiṭṭhāpanatthāya. Sāraṇatthāyāti pamuṭṭhasarāpanatthāya. Savacanīyakaraṇatthāyāti dose sāritepi sampaṭicchitvā paṭikammaṃ akarontassa savacanīyakaraṇatthāya. ‘‘Na te apasādetabbā’’ti idaṃ adhippetatthadassanaṃ. Tattha avisaṃvādakaṭṭhāne ṭhitā eva na apasādetabbā, na itareti daṭṭhabbaṃ.
аббажжаяабариниб̣б̣аанад̇т̇ааяаад̇и ааяад̇им̣ бадисанд̇хияаа агааран̣абхууд̇абариниб̣б̣аанад̇т̇ааяа. бариниб̣б̣аанан̃хи наама кийн̣аасаваанам̣ саб̣б̣абажчимаа жуд̇ижид̇д̇агаммаж̇аруубасан̇каад̇аа канд̇хаа, д̇з жа саб̣б̣аагаарад̇о самужчиннаанусаяад̇ааяа бунаб̣бхавааяа ананд̇араад̣̇ибажжаяаа на хонд̇и ан̃н̃зхи жа д̇ан̣хаад̣̇ибажжаязхи вирахид̇ад̇д̇аа. д̇асмаа ‘‘аббажжаяабариниб̣б̣аана’’нд̇и вужжад̇и. д̇анд̇и вимуд̇д̇ин̃аан̣ад̣̇ассанам̣. д̇знзвааха ‘‘д̇асми’’нд̇и. винаяаманд̇анаад̇и винаяавинижчаяо. сод̇аавад̇хаананд̇и сод̇асса од̣̇аханам̣, савананд̇и ад̇т̇о. д̇знааха ‘‘яам̣ уббаж̇ж̇ад̇и н̃аан̣а’’нд̇и. яат̇аавуд̇д̇ааяа винаяасам̣вараад̣̇игааран̣абарамбарааяа вимуд̇д̇ияаа зва бад̇хаанад̇д̇аа саа буна жид̇д̇асса вимогкод̇и уд̣̇д̇хадод̇и ааха ‘‘арахад̇д̇апаласан̇каад̇о вимогко’’д̇и. ат̇а ваа яо яам̣ гин̃жи д̇хаммам̣ анубаад̣̇ияид̇ваа бариниб̣б̣аанавасзна жид̇д̇асса жид̇д̇асанд̇ад̇ияаа, д̇аббадиб̣ад̣̇д̇хагаммаж̇аруубасанд̇ад̇ияаа жа вимогко вимужжанам̣ абунаббавад̇д̇ивасзна виг̇амо, зд̇ад̣̇ад̇т̇ааяа зд̇асса виг̇амассад̇т̇ааяа зваад̇и звам̣ ниг̇аманавасзнабзд̇т̇а ад̇т̇о взд̣̇ид̇аб̣б̣о.
Appaccayaparinibbānatthāyāti āyatiṃ paṭisandhiyā akāraṇabhūtaparinibbānatthāya. Parinibbānañhi nāma khīṇāsavānaṃ sabbapacchimā cuticittakammajarūpasaṅkhātā khandhā, te ca sabbākārato samucchinnānusayatāya punabbhavāya anantarādipaccayā na honti aññehi ca taṇhādipaccayehi virahitattā. Tasmā ‘‘appaccayaparinibbāna’’nti vuccati. Tanti vimuttiñāṇadassanaṃ. Tenevāha ‘‘tasmi’’nti. Vinayamantanāti vinayavinicchayo. Sotāvadhānanti sotassa odahanaṃ, savananti attho. Tenāha ‘‘yaṃ uppajjati ñāṇa’’nti. Yathāvuttāya vinayasaṃvarādikāraṇaparamparāya vimuttiyā eva padhānattā sā puna cittassa vimokkhoti uddhaṭoti āha ‘‘arahattaphalasaṅkhāto vimokkho’’ti. Atha vā yo yaṃ kiñci dhammaṃ anupādiyitvā parinibbānavasena cittassa cittasantatiyā, tappaṭibaddhakammajarūpasantatiyā ca vimokkho vimuccanaṃ apunappavattivasena vigamo, etadatthāya etassa vigamassatthāya evāti evaṃ nigamanavasenapettha attho veditabbo.
367. ануяог̇авад̇д̇аг̇аат̇аасу гусалзна б̣уд̣̇д̇химад̇аад̇и саммаасамб̣уд̣̇д̇хзна. гад̇анд̇и ниб̣б̣ад̇д̇ид̇ам̣, багаасид̇анд̇и ад̇т̇о. д̇знзваад̇иаад̣̇ийсу д̇знзва гад̇аагад̇асса аж̇аананзва буб̣б̣аабарам̣ аж̇аананасса, ан̃н̃ассаби бхигкуно яам̣ гад̇аагад̇ам̣ ход̇и, д̇амби на ж̇аанаад̇ийд̇и ад̇т̇о. ад̇д̇ано сад̣̇исааяаад̇и яат̇аавуд̇д̇зхи д̣̇осзхи яуд̇д̇ад̇ааяа ад̇д̇анаа сад̣̇исааяа.
367. Anuyogavattagāthāsu kusalena buddhimatāti sammāsambuddhena. Katanti nibbattitaṃ, pakāsitanti attho. Tenevātiādīsu teneva katākatassa ajānaneva pubbāparaṃ ajānanassa, aññassapi bhikkhuno yaṃ katākataṃ hoti, tampi na jānātīti attho. Attano sadisāyāti yathāvuttehi dosehi yuttatāya attanā sadisāya.
анувиж̇ж̇агасса бадибад̇д̇иван̣н̣анаа нидтид̇аа.
Anuvijjakassa paṭipattivaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / бариваарабаал̣и • Parivārapāḷi / 1. анувиж̇ж̇агассабадибад̇д̇и • 1. Anuvijjakassapaṭipatti
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / бариваара-адтагат̇аа • Parivāra-aṭṭhakathā / анувиж̇ж̇агасса бадибад̇д̇иван̣н̣анаа • Anuvijjakassa paṭipattivaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / сан̇г̇аамад̣̇ваяаван̣н̣анаа • Saṅgāmadvayavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / анувиж̇ж̇агассабадибад̇д̇иван̣н̣анаа • Anuvijjakassapaṭipattivaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / анувиж̇ж̇агасса бадибад̇д̇иван̣н̣анаа • Anuvijjakassa paṭipattivaṇṇanā
