| Library / Tipiṭaka / ਤਿਪਿਟਕ • Tipiṭaka / ਪਰਿવਾਰ-ਅਟ੍ਠਕਥਾ • Parivāra-aṭṭhakathā |
ਚੂਲ਼ਸਙ੍ਗਾਮੋ
Cūḷasaṅgāmo
ਅਨੁવਿਜ੍ਜਕਸ੍ਸ ਪਟਿਪਤ੍ਤਿવਣ੍ਣਨਾ
Anuvijjakassa paṭipattivaṇṇanā
੩੬੫. ਚੂਲ਼ਸਙ੍ਗਾਮੇ ਸਙ੍ਗਾਮਾવਚਰੇਨ ਭਿਕ੍ਖੁਨਾਤਿ ਸਙ੍ਗਾਮੋ વੁਚ੍ਚਤਿ ਅਧਿਕਰਣવਿਨਿਚ੍ਛਯਤ੍ਥਾਯ ਸਙ੍ਘਸਨ੍ਨਿਪਾਤੋ। ਤਤ੍ਰ ਹਿ ਅਤ੍ਤਪਚ੍ਚਤ੍ਥਿਕਾ ਚੇવ ਸਾਸਨਪਚ੍ਚਤ੍ਥਿਕਾ ਚ ਉਦ੍ਧਮ੍ਮਂ ਉਬ੍ਬਿਨਯਂ ਸਤ੍ਥੁ ਸਾਸਨਂ ਦੀਪੇਨ੍ਤਾ ਸਮੋਸਰਨ੍ਤਿ વੇਸਾਲਿਕਾ વਜ੍ਜਿਪੁਤ੍ਤਕਾ વਿਯ। ਯੋ ਭਿਕ੍ਖੁ ਤੇਸਂ ਪਚ੍ਚਤ੍ਥਿਕਾਨਂ ਲਦ੍ਧਿਂ ਮਦ੍ਦਿਤ੍વਾ ਸਕવਾਦਦੀਪਨਤ੍ਥਾਯ ਤਤ੍ਥ ਅવਚਰਤਿ, ਅਜ੍ਝੋਗਾਹੇਤ੍વਾ વਿਨਿਚ੍ਛਯਂ ਪવਤ੍ਤੇਤਿ, ਸੋ ਸਙ੍ਗਾਮਾવਚਰੋ ਨਾਮ ਯਸਤ੍ਥੇਰੋ વਿਯ। ਤੇਨ ਸਙ੍ਗਾਮਾવਚਰੇਨ ਭਿਕ੍ਖੁਨਾ ਸਙ੍ਘਂ ਉਪਸਙ੍ਕਮਨ੍ਤੇਨ ਨੀਚਚਿਤ੍ਤੇਨ ਸਙ੍ਘੋ ਉਪਸਙ੍ਕਮਿਤਬ੍ਬੋ। ਨੀਚਚਿਤ੍ਤੇਨਾਤਿ ਮਾਨਦ੍ਧਜਂ ਨਿਪਾਤੇਤ੍વਾ ਨਿਹਤਮਾਨਚਿਤ੍ਤੇਨ। ਰਜੋਹਰਣਸਮੇਨਾਤਿ ਪਾਦਪੁਞ੍ਛਨਸਮੇਨ; ਯਥਾ ਰਜੋਹਰਣਸ੍ਸ ਸਂਕਿਲਿਟ੍ਠੇ વਾ ਅਸਂਕਿਲਿਟ੍ਠੇ વਾ ਪਾਦੇ ਪੁਞ੍ਛਿਯਮਾਨੇ ਨੇવ ਰਾਗੋ ਨ ਦੋਸੋ; ਏવਂ ਇਟ੍ਠਾਨਿਟ੍ਠੇਸੁ ਅਰਜ੍ਜਨ੍ਤੇਨ ਅਦੁਸ੍ਸਨ੍ਤੇਨਾਤਿ ਅਤ੍ਥੋ। ਯਥਾਪਤਿਰੂਪੇ ਆਸਨੇਤਿ ਯਥਾਪਤਿਰੂਪਂ ਆਸਨਂ ਞਤ੍વਾ ਅਤ੍ਤਨੋ ਪਾਪੁਣਨਟ੍ਠਾਨੇ ਥੇਰਾਨਂ ਭਿਕ੍ਖੂਨਂ ਪਿਟ੍ਠਿਂ ਅਦਸ੍ਸੇਤ੍વਾ ਨਿਸੀਦਿਤਬ੍ਬਂ। ਅਨਾਨਾਕਥਿਕੇਨਾਤਿ ਨਾਨਾવਿਧਂ ਤਂ ਤਂ ਅਨਤ੍ਥਕਥਂ ਅਕਥੇਨ੍ਤੇਨ। ਅਤਿਰਚ੍ਛਾਨਕਥਿਕੇਨਾਤਿ ਦਿਟ੍ਠਸੁਤਮੁਤਮ੍ਪਿ ਰਾਜਕਥਾਦਿਕਂ ਤਿਰਚ੍ਛਾਨਕਥਂ ਅਕਥੇਨ੍ਤੇਨ। ਸਾਮਂ વਾ ਧਮ੍ਮੋ ਭਾਸਿਤਬ੍ਬੋਤਿ ਸਙ੍ਘਸਨ੍ਨਿਪਾਤਟ੍ਠਾਨੇ ਕਪ੍ਪਿਯਾਕਪ੍ਪਿਯਨਿਸ੍ਸਿਤਾ વਾ ਰੂਪਾਰੂਪਪਰਿਚ੍ਛੇਦਸਮਥਾਚਾਰવਿਪਸ੍ਸਨਾਚਾਰਟ੍ਠਾਨਨਿਸਜ੍ਜવਤ੍ਤਾਦਿਨਿਸ੍ਸਿਤਾ વਾ ਕਥਾ ਧਮ੍ਮੋ ਨਾਮ। ਏવਰੂਪੋ ਧਮ੍ਮੋ ਸਯਂ વਾ ਭਾਸਿਤਬ੍ਬੋ, ਪਰੋ વਾ ਅਜ੍ਝੇਸਿਤਬ੍ਬੋ। ਯੋ ਭਿਕ੍ਖੁ ਤਥਾਰੂਪਿਂ ਕਥਂ ਕਥੇਤੁਂ ਪਹੋਤਿ, ਸੋ વਤ੍ਤਬ੍ਬੋ – ‘‘ਆવੁਸੋ ਸਙ੍ਘਮਜ੍ਝਮ੍ਹਿ ਪਞ੍ਹੇ ਉਪ੍ਪਨ੍ਨੇ ਤ੍વਂ ਕਥੇਯ੍ਯਾਸੀ’’ਤਿ। ਅਰਿਯੋ વਾ ਤੁਣ੍ਹੀਭਾવੋ ਨਾਤਿਮਞ੍ਞਿਤਬ੍ਬੋਤਿ ਅਰਿਯਾ ਤੁਣ੍ਹੀ ਨਿਸੀਦਨ੍ਤਾ ਨ ਬਾਲਪੁਥੁਜ੍ਜਨਾ વਿਯ ਨਿਸੀਦਨ੍ਤਿ। ਅਞ੍ਞਤਰਂ ਕਮ੍ਮਟ੍ਠਾਨਂ ਗਹੇਤ੍વਾવ ਨਿਸੀਦਨ੍ਤਿ। ਇਤਿ ਕਮ੍ਮਟ੍ਠਾਨਮਨਸਿਕਾਰવਸੇਨ ਤੁਣ੍ਹੀਭਾવੋ ਅਰਿਯੋ ਤੁਣ੍ਹੀਭਾવੋ ਨਾਮ, ਸੋ ਨਾਤਿਮਞ੍ਞਿਤਬ੍ਬੋ, ਕਿਂ ਕਮ੍ਮਟ੍ਠਾਨਾਨੁਯੋਗੇਨਾਤਿ ਨਾવਜਾਨਿਤਬ੍ਬੋ; ਅਤ੍ਤਨੋ ਪਤਿਰੂਪਂ ਕਮ੍ਮਟ੍ਠਾਨਂ ਗਹੇਤ੍વਾવ ਨਿਸੀਦਿਤਬ੍ਬਨ੍ਤਿ ਅਤ੍ਥੋ।
365. Cūḷasaṅgāme saṅgāmāvacarena bhikkhunāti saṅgāmo vuccati adhikaraṇavinicchayatthāya saṅghasannipāto. Tatra hi attapaccatthikā ceva sāsanapaccatthikā ca uddhammaṃ ubbinayaṃ satthu sāsanaṃ dīpentā samosaranti vesālikā vajjiputtakā viya. Yo bhikkhu tesaṃ paccatthikānaṃ laddhiṃ madditvā sakavādadīpanatthāya tattha avacarati, ajjhogāhetvā vinicchayaṃ pavatteti, so saṅgāmāvacaro nāma yasatthero viya. Tena saṅgāmāvacarena bhikkhunā saṅghaṃ upasaṅkamantena nīcacittena saṅgho upasaṅkamitabbo. Nīcacittenāti mānaddhajaṃ nipātetvā nihatamānacittena. Rajoharaṇasamenāti pādapuñchanasamena; yathā rajoharaṇassa saṃkiliṭṭhe vā asaṃkiliṭṭhe vā pāde puñchiyamāne neva rāgo na doso; evaṃ iṭṭhāniṭṭhesu arajjantena adussantenāti attho. Yathāpatirūpe āsaneti yathāpatirūpaṃ āsanaṃ ñatvā attano pāpuṇanaṭṭhāne therānaṃ bhikkhūnaṃ piṭṭhiṃ adassetvā nisīditabbaṃ. Anānākathikenāti nānāvidhaṃ taṃ taṃ anatthakathaṃ akathentena. Atiracchānakathikenāti diṭṭhasutamutampi rājakathādikaṃ tiracchānakathaṃ akathentena. Sāmaṃ vā dhammo bhāsitabboti saṅghasannipātaṭṭhāne kappiyākappiyanissitā vā rūpārūpaparicchedasamathācāravipassanācāraṭṭhānanisajjavattādinissitā vā kathā dhammo nāma. Evarūpo dhammo sayaṃ vā bhāsitabbo, paro vā ajjhesitabbo. Yo bhikkhu tathārūpiṃ kathaṃ kathetuṃ pahoti, so vattabbo – ‘‘āvuso saṅghamajjhamhi pañhe uppanne tvaṃ katheyyāsī’’ti. Ariyo vā tuṇhībhāvo nātimaññitabboti ariyā tuṇhī nisīdantā na bālaputhujjanā viya nisīdanti. Aññataraṃ kammaṭṭhānaṃ gahetvāva nisīdanti. Iti kammaṭṭhānamanasikāravasena tuṇhībhāvo ariyo tuṇhībhāvo nāma, so nātimaññitabbo, kiṃ kammaṭṭhānānuyogenāti nāvajānitabbo; attano patirūpaṃ kammaṭṭhānaṃ gahetvāva nisīditabbanti attho.
ਨ ਉਪਜ੍ਝਾਯੋ ਪੁਚ੍ਛਿਤਬ੍ਬੋਤਿ ‘‘ਕੋ ਨਾਮੋ ਤੁਯ੍ਹਂ ਉਪਜ੍ਝਾਯੋ’’ਤਿ ਨ ਪੁਚ੍ਛਿਤਬ੍ਬੋ। ਏਸ ਨਯੋ ਸਬ੍ਬਤ੍ਥ। ਨ ਜਾਤੀਤਿ ‘‘ਖਤ੍ਤਿਯਜਾਤਿਯੋ ਤ੍વਂ ਬ੍ਰਾਹ੍ਮਣਜਾਤਿਯੋ’’ਤਿ ਏવਂ ਜਾਤਿ ਨ ਪੁਚ੍ਛਿਤਬ੍ਬਾ। ਨ ਆਗਮੋਤਿ ‘‘ਦੀਘਭਾਣਕੋਸਿ ਤ੍વਂ ਮਜ੍ਝਿਮਭਾਣਕੋ’’ਤਿ ਏવਂ ਆਗਮੋ ਨ ਪੁਚ੍ਛਿਤਬ੍ਬੋ। ਕੁਲਪਦੇਸੋਤਿ ਖਤ੍ਤਿਯਕੁਲਾਦਿવਸੇਨੇવ વੇਦਿਤਬ੍ਬੋ। ਅਤ੍ਰਸ੍ਸ ਪੇਮਂ વਾ ਦੋਸੋ વਾਤਿ ਅਤ੍ਰ ਪੁਗ੍ਗਲੇ ਏਤੇਸਂ ਕਾਰਣਾਨਂ ਅਞ੍ਞਤਰવਸੇਨ ਪੇਮਂ વਾ ਭવੇਯ੍ਯ ਦੋਸੋ વਾ।
Na upajjhāyo pucchitabboti ‘‘ko nāmo tuyhaṃ upajjhāyo’’ti na pucchitabbo. Esa nayo sabbattha. Na jātīti ‘‘khattiyajātiyo tvaṃ brāhmaṇajātiyo’’ti evaṃ jāti na pucchitabbā. Na āgamoti ‘‘dīghabhāṇakosi tvaṃ majjhimabhāṇako’’ti evaṃ āgamo na pucchitabbo. Kulapadesoti khattiyakulādivaseneva veditabbo. Atrassa pemaṃ vā doso vāti atra puggale etesaṃ kāraṇānaṃ aññataravasena pemaṃ vā bhaveyya doso vā.
ਨੋ ਪਰਿਸਕਪ੍ਪਿਕੇਨਾਤਿ ਪਰਿਸਕਪ੍ਪਕੇਨ ਪਰਿਸਾਨੁવਿਧਾਯਕੇਨ ਨ ਭવਿਤਬ੍ਬਂ; ਯਂ ਪਰਿਸਾਯ ਰੁਚ੍ਚਤਿ, ਤਦੇવ ਚੇਤੇਤ੍વਾ ਕਪ੍ਪੇਤ੍વਾ ਨ ਕਥੇਤਬ੍ਬਨ੍ਤਿ ਅਤ੍ਥੋ। ਨ ਹਤ੍ਥਮੁਦ੍ਦਾ ਦਸ੍ਸੇਤਬ੍ਬਾਤਿ ਕਥੇਤਬ੍ਬੇ ਚ ਅਕਥੇਤਬ੍ਬੇ ਚ ਸਞ੍ਞਾਜਨਨਤ੍ਥਂ ਹਤ੍ਥવਿਕਾਰੋ ਨ ਕਾਤਬ੍ਬੋ।
No parisakappikenāti parisakappakena parisānuvidhāyakena na bhavitabbaṃ; yaṃ parisāya ruccati, tadeva cetetvā kappetvā na kathetabbanti attho. Na hatthamuddā dassetabbāti kathetabbe ca akathetabbe ca saññājananatthaṃ hatthavikāro na kātabbo.
ਅਤ੍ਥਂ ਅਨੁવਿਧਿਯਨ੍ਤੇਨਾਤਿ વਿਨਿਚ੍ਛਯਪਟਿવੇਧਮੇવ ਸਲ੍ਲਕ੍ਖੇਨ੍ਤੇਨ ‘‘ਇਦਂ ਸੁਤ੍ਤਂ ਉਪਲਬ੍ਭਤਿ, ਇਮਸ੍ਮਿਂ વਿਨਿਚ੍ਛਯੇ ਇਦਂ વਕ੍ਖਾਮੀ’’ਤਿ ਏવਂ ਪਰਿਤੁਲਯਨ੍ਤੇਨ ਨਿਸੀਦਿਤਬ੍ਬਨ੍ਤਿ ਅਤ੍ਥੋ। ਨ ਚ ਆਸਨਾ વੁਟ੍ਠਾਤਬ੍ਬਨ੍ਤਿ ਨ ਆਸਨਾ વੁਟ੍ਠਾਯ ਸਨ੍ਨਿਪਾਤਮਣ੍ਡਲੇ વਿਚਰਿਤਬ੍ਬਂ, વਿਨਯਧਰੇ ਉਟ੍ਠਿਤੇ ਸਬ੍ਬਾ ਪਰਿਸਾ ਉਟ੍ਠਹਤਿ। ਨ વੀਤਿਹਾਤਬ੍ਬਨ੍ਤਿ ਨ વਿਨਿਚ੍ਛਯੋ ਹਾਪੇਤਬ੍ਬੋ। ਨ ਕੁਮ੍ਮਗ੍ਗੋ ਸੇવਿਤਬ੍ਬੋਤਿ ਨ ਆਪਤ੍ਤਿ ਦੀਪੇਤਬ੍ਬਾ। ਅਸਾਹਸਿਕੇਨ ਭવਿਤਬ੍ਬਨ੍ਤਿ ਨ ਸਹਸਾਕਾਰਿਨਾ ਭવਿਤਬ੍ਬਂ; ਸਹਸਾ ਦੁਰੁਤ੍ਤવਚਨਂ ਨ ਕਥੇਤਬ੍ਬਨ੍ਤਿ ਅਤ੍ਥੋ। વਚਨਕ੍ਖਮੇਨਾਤਿ ਦੁਰੁਤ੍ਤવਾਚਂ ਖਮਨਸੀਲੇਨ। ਹਿਤਪਰਿਸਕ੍ਕਿਨਾਤਿ ਹਿਤੇਸਿਨਾ ਹਿਤਗવੇਸਿਨਾ ਕਰੁਣਾ ਚ ਕਰੁਣਾਪੁਬ੍ਬਭਾਗੋ ਚ ਉਪਟ੍ਠਾਪੇਤਬ੍ਬੋਤਿ ਅਯਂ ਪਦਦ੍વਯੇਪਿ ਅਧਿਪ੍ਪਾਯੋ। ਅਨਸੁਰੁਤ੍ਤੇਨਾਤਿ ਨ ਅਸੁਰੁਤ੍ਤੇਨ। ਅਸੁਰੁਤ੍ਤਂ વੁਚ੍ਚਤਿ વਿਗ੍ਗਾਹਿਕਕਥਾਸਙ੍ਖਾਤਂ ਅਸੁਨ੍ਦਰવਚਨਂ; ਤਂ ਨ ਕਥੇਤਬ੍ਬਨ੍ਤਿ ਅਤ੍ਥੋ। ਅਤ੍ਤਾ ਪਰਿਗ੍ਗਹੇਤਬ੍ਬੋਤਿ ‘‘વਿਨਿਚ੍ਛਿਨਿਤੁਂ વੂਪਸਮੇਤੁਂ ਸਕ੍ਖਿਸ੍ਸਾਮਿ ਨੁ ਖੋ ਨੋ’’ਤਿ ਏવਂ ਅਤ੍ਤਾ ਪਰਿਗ੍ਗਹੇਤਬ੍ਬੋ; ਅਤ੍ਤਨੋ ਪਮਾਣਂ ਜਾਨਿਤਬ੍ਬਨ੍ਤਿ ਅਤ੍ਥੋ। ਪਰੋ ਪਰਿਗ੍ਗਹੇਤਬ੍ਬੋਤਿ ‘‘ਲਜ੍ਜਿਯਾ ਨੁ ਖੋ ਅਯਂ ਪਰਿਸਾ, ਸਕ੍ਕਾ ਸਞ੍ਞਾਪੇਤੁਂ ਉਦਾਹੁ ਨੋ’’ਤਿ ਏવਂ ਪਰੋ ਪਰਿਗ੍ਗਹੇਤਬ੍ਬੋ।
Atthaṃ anuvidhiyantenāti vinicchayapaṭivedhameva sallakkhentena ‘‘idaṃ suttaṃ upalabbhati, imasmiṃ vinicchaye idaṃ vakkhāmī’’ti evaṃ paritulayantena nisīditabbanti attho. Na ca āsanā vuṭṭhātabbanti na āsanā vuṭṭhāya sannipātamaṇḍale vicaritabbaṃ, vinayadhare uṭṭhite sabbā parisā uṭṭhahati. Na vītihātabbanti na vinicchayo hāpetabbo. Na kummaggo sevitabboti na āpatti dīpetabbā. Asāhasikena bhavitabbanti na sahasākārinā bhavitabbaṃ; sahasā duruttavacanaṃ na kathetabbanti attho. Vacanakkhamenāti duruttavācaṃ khamanasīlena. Hitaparisakkināti hitesinā hitagavesinā karuṇā ca karuṇāpubbabhāgo ca upaṭṭhāpetabboti ayaṃ padadvayepi adhippāyo. Anasuruttenāti na asuruttena. Asuruttaṃ vuccati viggāhikakathāsaṅkhātaṃ asundaravacanaṃ; taṃ na kathetabbanti attho. Attā pariggahetabboti ‘‘vinicchinituṃ vūpasametuṃ sakkhissāmi nu kho no’’ti evaṃ attā pariggahetabbo; attano pamāṇaṃ jānitabbanti attho. Paro pariggahetabboti ‘‘lajjiyā nu kho ayaṃ parisā, sakkā saññāpetuṃ udāhu no’’ti evaṃ paro pariggahetabbo.
ਚੋਦਕੋ ਪਰਿਗ੍ਗਹੇਤਬ੍ਬੋਤਿ ‘‘ਧਮ੍ਮਚੋਦਕੋ ਨੁ ਖੋ ਨੋ’’ਤਿ ਏવਂ ਪਰਿਗ੍ਗਹੇਤਬ੍ਬੋ। ਚੁਦਿਤਕੋ ਪਰਿਗ੍ਗਹੇਤਬ੍ਬੋਤਿ ‘‘ਧਮ੍ਮਚੁਦਿਤਕੋ ਨੁ ਖੋ ਨੋ’’ਤਿ ਏવਂ ਪਰਿਗ੍ਗਹੇਤਬ੍ਬੋ। ਅਧਮ੍ਮਚੋਦਕੋ ਪਰਿਗ੍ਗਹੇਤਬ੍ਬੋਤਿ ਤਸ੍ਸ ਪਮਾਣਂ ਜਾਨਿਤਬ੍ਬਂ। ਸੇਸੇਸੁਪਿ ਏਸੇવ ਨਯੋ। વੁਤ੍ਤਂ ਅਹਾਪੇਨ੍ਤੇਨਾਤਿ ਚੋਦਕਚੁਦਿਤਕੇਹਿ વੁਤ੍ਤવਚਨਂ ਅਹਾਪੇਨ੍ਤੇਨ। ਅવੁਤ੍ਤਂ ਅਪਕਾਸੇਨ੍ਤੇਨਾਤਿ ਅਨੋਸਟਂ વਤ੍ਥੁਂ ਅਪ੍ਪਕਾਸੇਨ੍ਤੇਨ। ਮਨ੍ਦੋ ਹਾਸੇਤਬ੍ਬੋਤਿ ਮਨ੍ਦੋ ਮੋਮੂਹੋ ਪਗ੍ਗਣ੍ਹਿਤਬ੍ਬੋ, ‘‘ਨਨੁ ਤ੍વਂ ਕੁਲਪੁਤ੍ਤੋ’’ਤਿ ਉਤ੍ਤੇਜੇਤ੍વਾ ਅਨੁਯੋਗવਤ੍ਤਂ ਕਥਾਪੇਤ੍વਾ ਤਸ੍ਸ ਅਨੁਯੋਗੋ ਗਣ੍ਹਿਤਬ੍ਬੋ। ਭੀਰੂ ਅਸ੍ਸਾਸੇਤਬ੍ਬੋਤਿ ਯਸ੍ਸ ਸਙ੍ਘਮਜ੍ਝਂ વਾ ਗਣਮਜ੍ਝਂ વਾ ਅਨੋਸਟਪੁਬ੍ਬਤ੍ਤਾ ਸਾਰਜ੍ਜਂ ਉਪ੍ਪਜ੍ਜਤਿ, ਤਾਦਿਸੋ ‘‘ਮਾ ਭਾਯਿ, વਿਸ੍ਸਟ੍ਠੋ ਕਥੇਹਿ, ਮਯਂ ਤੇ ਉਪਤ੍ਥਮ੍ਭਾ ਭવਿਸ੍ਸਾਮਾ’’ਤਿ વਤ੍વਾਪਿ ਅਨੁਯੋਗવਤ੍ਤਂ ਕਥਾਪੇਤਬ੍ਬੋ। ਚਣ੍ਡੋ ਨਿਸੇਧੇਤਬ੍ਬੋਤਿ ਅਪਸਾਦੇਤਬ੍ਬੋ ਤਜ੍ਜੇਤਬ੍ਬੋ। ਅਸੁਚਿ વਿਭਾવੇਤਬ੍ਬੋਤਿ ਅਲਜ੍ਜਿਂ ਪਕਾਸੇਤ੍વਾ ਆਪਤ੍ਤਿਂ ਦੇਸਾਪੇਤਬ੍ਬੋ। ਉਜੁਮਦ੍ਦવੇਨਾਤਿ ਯੋ ਭਿਕ੍ਖੁ ਉਜੁ ਸੀਲવਾ ਕਾਯવਙ੍ਕਾਦਿਰਹਿਤੋ, ਸੋ ਮਦ੍ਦવੇਨੇવ ਉਪਚਰਿਤਬ੍ਬੋ। ਧਮ੍ਮੇਸੁ ਚ ਪੁਗ੍ਗਲੇਸੁ ਚਾਤਿ ਏਤ੍ਥ ਯੋ ਧਮ੍ਮਗਰੁਕੋ ਹੋਤਿ ਨ ਪੁਗ੍ਗਲਗਰੁਕੋ, ਅਯਮੇવ ਧਮ੍ਮੇਸੁ ਚ ਪੁਗ੍ਗਲੇਸੁ ਚ ਮਜ੍ਝਤ੍ਤੋਤਿ વੇਦਿਤਬ੍ਬੋ।
Codako pariggahetabboti ‘‘dhammacodako nu kho no’’ti evaṃ pariggahetabbo. Cuditako pariggahetabboti ‘‘dhammacuditako nu kho no’’ti evaṃ pariggahetabbo. Adhammacodako pariggahetabboti tassa pamāṇaṃ jānitabbaṃ. Sesesupi eseva nayo. Vuttaṃahāpentenāti codakacuditakehi vuttavacanaṃ ahāpentena. Avuttaṃ apakāsentenāti anosaṭaṃ vatthuṃ appakāsentena. Mando hāsetabboti mando momūho paggaṇhitabbo, ‘‘nanu tvaṃ kulaputto’’ti uttejetvā anuyogavattaṃ kathāpetvā tassa anuyogo gaṇhitabbo. Bhīrū assāsetabboti yassa saṅghamajjhaṃ vā gaṇamajjhaṃ vā anosaṭapubbattā sārajjaṃ uppajjati, tādiso ‘‘mā bhāyi, vissaṭṭho kathehi, mayaṃ te upatthambhā bhavissāmā’’ti vatvāpi anuyogavattaṃ kathāpetabbo. Caṇḍo nisedhetabboti apasādetabbo tajjetabbo. Asuci vibhāvetabboti alajjiṃ pakāsetvā āpattiṃ desāpetabbo. Ujumaddavenāti yo bhikkhu uju sīlavā kāyavaṅkādirahito, so maddaveneva upacaritabbo. Dhammesu ca puggalesu cāti ettha yo dhammagaruko hoti na puggalagaruko, ayameva dhammesu ca puggalesu ca majjhattoti veditabbo.
੩੬੬. ਸੁਤ੍ਤਂ ਸਂਸਨ੍ਦਨਤ੍ਥਾਯਾਤਿਆਦੀਸੁ ਤੇਨ ਚ ਪਨ ਏવਂ ਸਬ੍ਰਹ੍ਮਚਾਰੀਨਂ ਪਿਯਮਨਾਪਗਰੁਭਾવਨੀਯੇਨ ਅਨੁવਿਜ੍ਜਕੇਨ ਸਮੁਦਾਹਟੇਸੁ ਸੁਤ੍ਤਾਦੀਸੁ ਸੁਤ੍ਤਂ ਸਂਸਨ੍ਦਨਤ੍ਥਾਯ; ਆਪਤ੍ਤਾਨਾਪਤ੍ਤੀਨਂ ਸਂਸਨ੍ਦਨਤ੍ਥਨ੍ਤਿ વੇਦਿਤਬ੍ਬਂ। ਓਪਮ੍ਮਂ ਨਿਦਸ੍ਸਨਤ੍ਥਾਯਾਤਿ ਓਪਮ੍ਮਂ ਅਤ੍ਥਦਸ੍ਸਨਤ੍ਥਾਯ। ਅਤ੍ਥੋ વਿਞ੍ਞਾਪਨਤ੍ਥਾਯਾਤਿ ਅਤ੍ਥੋ ਜਾਨਾਪਨਤ੍ਥਾਯ। ਪਟਿਪੁਚ੍ਛਾ ਠਪਨਤ੍ਥਾਯਾਤਿ ਪੁਚ੍ਛਾ ਪੁਗ੍ਗਲਸ੍ਸ ਠਪਨਤ੍ਥਾਯ। ਓਕਾਸਕਮ੍ਮਂ ਚੋਦਨਤ੍ਥਾਯਾਤਿ વਤ੍ਥੁਨਾ વਾ ਆਪਤ੍ਤਿਯਾ વਾ ਚੋਦਨਤ੍ਥਾਯ। ਚੋਦਨਾ ਸਾਰਣਤ੍ਥਾਯਾਤਿ ਦੋਸਾਦੋਸਂ ਸਰਾਪਨਤ੍ਥਾਯ। ਸਾਰਣਾ ਸવਚਨੀਯਤ੍ਥਾਯਾਤਿ ਦੋਸਾਦੋਸਸਾਰਣਾ ਸવਚਨੀਯਕਰਣਤ੍ਥਾਯ। ਸવਚਨੀਯਂ ਪਲਿਬੋਧਤ੍ਥਾਯਾਤਿ ਸવਚਨੀਯਂ ‘‘ਇਮਮ੍ਹਾ ਆવਾਸਾ ਪਰਂ ਮਾ ਪਕ੍ਕਮੀ’’ਤਿ ਏવਂ ਪਲਿਬੋਧਤ੍ਥਾਯ। ਪਲਿਬੋਧੋ વਿਨਿਚ੍ਛਯਤ੍ਥਾਯਾਤਿ વਿਨਿਚ੍ਛਯਂ ਪਾਪਨਤ੍ਥਾਯ। વਿਨਿਚ੍ਛਯੋ ਸਨ੍ਤੀਰਣਤ੍ਥਾਯਾਤਿ ਦੋਸਾਦੋਸਂ ਸਨ੍ਤੀਰਣਤ੍ਥਾਯ ਤੁਲਨਤ੍ਥਾਯ। ਸਨ੍ਤੀਰਣਂ ਠਾਨਾਟ੍ਠਾਨਗਮਨਤ੍ਥਾਯਾਤਿ ਆਪਤ੍ਤਿਅਨਾਪਤ੍ਤਿਗਰੁਕਲਹੁਕਾਪਤ੍ਤਿਜਾਨਨਤ੍ਥਾਯ । ਸਙ੍ਘੋ ਸਮ੍ਪਰਿਗ੍ਗਹਸਮ੍ਪਟਿਚ੍ਛਨਤ੍ਥਾਯਾਤਿ વਿਨਿਚ੍ਛਯਸਮ੍ਪਟਿਗ੍ਗਹਣਤ੍ਥਾਯ ਚ; ਸੁવਿਨਿਚ੍ਛਿਤਦੁਬ੍ਬਿਨਿਚ੍ਛਿਤਭਾવਜਾਨਨਤ੍ਥਾਯ ਚਾਤਿ ਅਤ੍ਥੋ। ਪਚ੍ਚੇਕਟ੍ਠਾਯਿਨੋ ਅવਿਸਂવਾਦਕਟ੍ਠਾਯਿਨੋਤਿ ਇਸ੍ਸਰਿਯਾਧਿਪਚ੍ਚਜੇਟ੍ਠਕਟ੍ਠਾਨੇ ਚ ਅવਿਸਂવਾਦਕਟ੍ਠਾਨੇ ਚ ਠਿਤਾ; ਨ ਤੇ ਅਪਸਾਦੇਤਬ੍ਬਾਤਿ ਅਤ੍ਥੋ।
366.Suttaṃ saṃsandanatthāyātiādīsu tena ca pana evaṃ sabrahmacārīnaṃ piyamanāpagarubhāvanīyena anuvijjakena samudāhaṭesu suttādīsu suttaṃ saṃsandanatthāya; āpattānāpattīnaṃ saṃsandanatthanti veditabbaṃ. Opammaṃ nidassanatthāyāti opammaṃ atthadassanatthāya. Attho viññāpanatthāyāti attho jānāpanatthāya. Paṭipucchā ṭhapanatthāyāti pucchā puggalassa ṭhapanatthāya. Okāsakammaṃ codanatthāyāti vatthunā vā āpattiyā vā codanatthāya. Codanā sāraṇatthāyāti dosādosaṃ sarāpanatthāya. Sāraṇā savacanīyatthāyāti dosādosasāraṇā savacanīyakaraṇatthāya. Savacanīyaṃ palibodhatthāyāti savacanīyaṃ ‘‘imamhā āvāsā paraṃ mā pakkamī’’ti evaṃ palibodhatthāya. Palibodho vinicchayatthāyāti vinicchayaṃ pāpanatthāya. Vinicchayo santīraṇatthāyāti dosādosaṃ santīraṇatthāya tulanatthāya. Santīraṇaṃ ṭhānāṭṭhānagamanatthāyāti āpattianāpattigarukalahukāpattijānanatthāya . Saṅgho sampariggahasampaṭicchanatthāyāti vinicchayasampaṭiggahaṇatthāya ca; suvinicchitadubbinicchitabhāvajānanatthāya cāti attho. Paccekaṭṭhāyino avisaṃvādakaṭṭhāyinoti issariyādhipaccajeṭṭhakaṭṭhāne ca avisaṃvādakaṭṭhāne ca ṭhitā; na te apasādetabbāti attho.
ਇਦਾਨਿ ਯੇ ਮਨ੍ਦਾ ਮਨ੍ਦਬੁਦ੍ਧਿਨੋ ਏવਂ વਦੇਯ੍ਯੁਂ ‘‘વਿਨਯੋ ਨਾਮ ਕਿਮਤ੍ਥਾਯਾ’’ਤਿ ਤੇਸਂ વਚਨੋਕਾਸਪਿਦਹਨਤ੍ਥਮਤ੍ਤਂ ਦਸ੍ਸੇਤੁਂ વਿਨਯੋ ਸਂવਰਤ੍ਥਾਯਾਤਿਆਦਿਮਾਹ। ਤਤ੍ਥ વਿਨਯੋ ਸਂવਰਤ੍ਥਾਯਾਤਿ ਸਕਲਾਪਿ વਿਨਯਪਞ੍ਞਤ੍ਤਿ ਕਾਯવਚੀਦ੍વਾਰਸਂવਰਤ੍ਥਾਯ। ਆਜੀવવਿਸੁਦ੍ਧਿਪਰਿਯੋਸਾਨਸ੍ਸ ਸੀਲਸ੍ਸ ਉਪਨਿਸ੍ਸਯੋ ਹੋਤਿ; ਪਚ੍ਚਯੋ ਹੋਤੀਤਿ ਅਤ੍ਥੋ। ਏਸ ਨਯੋ ਸਬ੍ਬਤ੍ਥ। ਅਪਿਚੇਤ੍ਥ ਅવਿਪ੍ਪਟਿਸਾਰੋਤਿ ਪਾਪਪੁਞ੍ਞਾਨਂ ਕਤਾਕਤવਸੇਨ ਚਿਤ੍ਤવਿਪ੍ਪਟਿਸਾਰਾਭਾવੋ। ਪਾਮੁਜ੍ਜਨ੍ਤਿ ਦੁਬ੍ਬਲਾ ਤਰੁਣਪੀਤਿ। ਪੀਤੀਤਿ ਬਲવਾ ਬਹਲਪੀਤਿ। ਪਸ੍ਸਦ੍ਧੀਤਿ ਕਾਯਚਿਤ੍ਤਦਰਥਪਟਿਪ੍ਪਸ੍ਸਦ੍ਧਿ। ਸੁਖਨ੍ਤਿ ਕਾਯਿਕਚੇਤਸਿਕਸੁਖਂ। ਤਞ੍ਹਿ ਦੁવਿਧਮ੍ਪਿ ਸਮਾਧਿਸ੍ਸ ਉਪਨਿਸ੍ਸਯਪਚ੍ਚਯੋ ਹੋਤਿ। ਸਮਾਧੀਤਿ ਚਿਤ੍ਤੇਕਗ੍ਗਤਾ। ਯਥਾਭੂਤਞਾਣਦਸ੍ਸਨਨ੍ਤਿ ਤਰੁਣવਿਪਸ੍ਸਨਾ; ਉਦਯਬ੍ਬਯਞਾਣਸ੍ਸੇਤਂ ਅਧਿવਚਨਂ। ਚਿਤ੍ਤੇਕਗ੍ਗਤਾ ਹਿ ਤਰੁਣવਿਪਸ੍ਸਨਾਯ ਉਪਨਿਸ੍ਸਯਪਚ੍ਚਯੋ ਹੋਤਿ। ਨਿਬ੍ਬਿਦਾਤਿ ਸਿਖਾਪਤ੍ਤਾ વੁਟ੍ਠਾਨਗਾਮਿਨਿਬਲવવਿਪਸ੍ਸਨਾ। વਿਰਾਗੋਤਿ ਅਰਿਯਮਗ੍ਗੋ। વਿਮੁਤ੍ਤੀਤਿ ਅਰਹਤ੍ਤਫਲਂ। ਚਤੁਬ੍ਬਿਧੋਪਿ ਹਿ ਅਰਿਯਮਗ੍ਗੋ ਅਰਹਤ੍ਤਫਲਸ੍ਸ ਉਪਨਿਸ੍ਸਯਪਚ੍ਚਯੋ ਹੋਤਿ। વਿਮੁਤ੍ਤਿਞਾਣਦਸ੍ਸਨਨ੍ਤਿ ਪਚ੍ਚવੇਕ੍ਖਣਾਞਾਣਂ। વਿਮੁਤ੍ਤਿਞਾਣਦਸ੍ਸਨਂ ਅਨੁਪਾਦਾਪਰਿਨਿਬ੍ਬਾਨਤ੍ਥਾਯਾਤਿ ਅਪਚ੍ਚਯਪਰਿਨਿਬ੍ਬਾਨਤ੍ਥਾਯ। ਅਪਚ੍ਚਯਪਰਿਨਿਬ੍ਬਾਨਸ੍ਸ ਹਿ ਤਂ ਪਚ੍ਚਯੋ ਹੋਤਿ, ਤਸ੍ਮਿਂ ਅਨੁਪ੍ਪਤ੍ਤੇ ਅવਸ੍ਸਂ ਪਰਿਨਿਬ੍ਬਾਯਿਤਬ੍ਬਤੋਤਿ। ਏਤਦਤ੍ਥਾ ਕਥਾਤਿ ਅਯਂ વਿਨਯਕਥਾ ਨਾਮ ਏਤਦਤ੍ਥਾ। ਮਨ੍ਤਨਾਤਿ વਿਨਯਮਨ੍ਤਨਾ ਏવ। ਉਪਨਿਸਾਤਿ ਅਯਂ ‘‘વਿਨਯੋ ਸਂવਰਤ੍ਥਾਯਾ’’ਤਿਆਦਿਕਾ ਪਰਮ੍ਪਰਪਚ੍ਚਯਤਾਪਿ ਏਤਦਤ੍ਥਾਯ। ਸੋਤਾવਧਾਨਨ੍ਤਿ ਇਮਿਸ੍ਸਾ ਪਰਮ੍ਪਰਪਚ੍ਚਯਕਥਾਯ ਸੋਤਾવਧਾਨਂ। ਇਮਂ ਕਥਂ ਸੁਤ੍વਾ ਯਂ ਉਪ੍ਪਜ੍ਜਤਿ ਞਾਣਂ, ਤਮ੍ਪਿ ਏਤਦਤ੍ਥਾਯ। ਯਦਿਦਂ ਅਨੁਪਾਦਾ ਚਿਤ੍ਤਸ੍ਸ વਿਮੋਕ੍ਖੋਤਿ ਯੋ ਅਯਂ ਚਤੂਹਿ ਉਪਾਦਾਨੇਹਿ ਅਨੁਪਾਦਿਯਿਤ੍વਾ ਚਿਤ੍ਤਸ੍ਸ ਅਰਹਤ੍ਤਫਲਸਙ੍ਖਾਤੋ વਿਮੋਕ੍ਖੋ, ਸੋਪਿ ਏਤਦਤ੍ਥਾਯ; ਅਪਚ੍ਚਯਪਰਿਨਿਬ੍ਬਾਨਤ੍ਥਾਯ ਏવਾਤਿ ਅਤ੍ਥੋ।
Idāni ye mandā mandabuddhino evaṃ vadeyyuṃ ‘‘vinayo nāma kimatthāyā’’ti tesaṃ vacanokāsapidahanatthamattaṃ dassetuṃ vinayo saṃvaratthāyātiādimāha. Tattha vinayo saṃvaratthāyāti sakalāpi vinayapaññatti kāyavacīdvārasaṃvaratthāya. Ājīvavisuddhipariyosānassa sīlassa upanissayo hoti; paccayo hotīti attho. Esa nayo sabbattha. Apicettha avippaṭisāroti pāpapuññānaṃ katākatavasena cittavippaṭisārābhāvo. Pāmujjanti dubbalā taruṇapīti. Pītīti balavā bahalapīti. Passaddhīti kāyacittadarathapaṭippassaddhi. Sukhanti kāyikacetasikasukhaṃ. Tañhi duvidhampi samādhissa upanissayapaccayo hoti. Samādhīti cittekaggatā. Yathābhūtañāṇadassananti taruṇavipassanā; udayabbayañāṇassetaṃ adhivacanaṃ. Cittekaggatā hi taruṇavipassanāya upanissayapaccayo hoti. Nibbidāti sikhāpattā vuṭṭhānagāminibalavavipassanā. Virāgoti ariyamaggo. Vimuttīti arahattaphalaṃ. Catubbidhopi hi ariyamaggo arahattaphalassa upanissayapaccayo hoti. Vimuttiñāṇadassananti paccavekkhaṇāñāṇaṃ. Vimuttiñāṇadassanaṃ anupādāparinibbānatthāyāti apaccayaparinibbānatthāya. Apaccayaparinibbānassa hi taṃ paccayo hoti, tasmiṃ anuppatte avassaṃ parinibbāyitabbatoti. Etadatthā kathāti ayaṃ vinayakathā nāma etadatthā. Mantanāti vinayamantanā eva. Upanisāti ayaṃ ‘‘vinayo saṃvaratthāyā’’tiādikā paramparapaccayatāpi etadatthāya. Sotāvadhānanti imissā paramparapaccayakathāya sotāvadhānaṃ. Imaṃ kathaṃ sutvā yaṃ uppajjati ñāṇaṃ, tampi etadatthāya. Yadidaṃ anupādā cittassa vimokkhoti yo ayaṃ catūhi upādānehi anupādiyitvā cittassa arahattaphalasaṅkhāto vimokkho, sopi etadatthāya; apaccayaparinibbānatthāya evāti attho.
੩੬੭. ਅਨੁਯੋਗવਤ੍ਤਗਾਥਾਸੁ ਪਠਮਗਾਥਾ વੁਤ੍ਤਤ੍ਥਾ ਏવ।
367. Anuyogavattagāthāsu paṭhamagāthā vuttatthā eva.
વਤ੍ਥੁਂ વਿਪਤ੍ਤਿਂ ਆਪਤ੍ਤਿਂ, ਨਿਦਾਨਂ ਆਕਾਰਅਕੋવਿਦੋ ਪੁਬ੍ਬਾਪਰਂ ਨ ਜਾਨਾਤੀਤਿ ‘‘વਤ੍ਥੁ’’ਨ੍ਤਿਆਦੀਨਿ ‘‘ਨ ਜਾਨਾਤੀ’’ਤਿ ਪਦੇਨ ਸਮ੍ਬਨ੍ਧੋ। ‘‘ਅਕੋવਿਦੋ’’ਤਿ ਪਦਸ੍ਸ ‘‘ਸ વੇ ਤਾਦਿਸਕੋ’’ਤਿ ਇਮਿਨਾ ਸਮ੍ਬਨ੍ਧੋ। ਤਸ੍ਮਾ ਅਯਮੇਤ੍ਥ ਯੋਜਨਾ – ਯੋ ਭਿਕ੍ਖੁ ਪਾਰਾਜਿਕਾਦੀਨਂ વਤ੍ਥੁਂ ਨ ਜਾਨਾਤਿ, ਚਤੁਬ੍ਬਿਧਂ વਿਪਤ੍ਤਿਂ ਨ ਜਾਨਾਤਿ, ਸਤ੍ਤવਿਧਂ ਆਪਤ੍ਤਿਂ ਨ ਜਾਨਾਤਿ, ‘‘ਇਦਂ ਸਿਕ੍ਖਾਪਦਂ ਅਸੁਕਸ੍ਮਿਂ ਨਾਮ ਨਗਰੇ ਪਞ੍ਞਤ੍ਤ’’ਨ੍ਤਿ ਏવਂ ਨਿਦਾਨਂ ਨ ਜਾਨਾਤਿ, ‘‘ਇਦਂ ਪੁਰਿਮવਚਨਂ ਇਦਂ ਪਚ੍ਛਿਮવਚਨ’’ਨ੍ਤਿ ਪੁਬ੍ਬਾਪਰਂ ਨ ਜਾਨਾਤਿ, ‘‘ਇਦਂ ਕਤਂ ਇਦਂ ਅਕਤ’’ਨ੍ਤਿ ਕਤਾਕਤਂ ਨ ਜਾਨਾਤਿ। ਸਮੇਨ ਚਾਤਿ ਤੇਨੇવ ਪੁਬ੍ਬਾਪਰਂ ਅਜਾਨਨਸ੍ਸ ਸਮੇਨ ਅਞ੍ਞਾਣੇਨ, ‘‘ਕਤਾਕਤਂ ਨ ਜਾਨਾਤੀ’’ਤਿ વੁਤ੍ਤਂ ਹੋਤਿ; ਏવਂ ਤਾવ ਨਜਾਨਾਤਿ-ਪਦੇਨ ਸਦ੍ਧਿਂ ਸਮ੍ਬਨ੍ਧੋ વੇਦਿਤਬ੍ਬੋ। ਯਂ ਪਨੇਤਂ ‘‘ਆਕਾਰਅਕੋવਿਦੋ’’ਤਿ વੁਤ੍ਤਂ, ਤਤ੍ਥ ਆਕਾਰਅਕੋવਿਦੋਤਿ ਕਾਰਣਾਕਾਰਣੇ ਅਕੋવਿਦੋ। ਇਤਿ ਯ੍વਾਯਂ વਤ੍ਥੁਆਦੀਨਿਪਿ ਨ ਜਾਨਾਤਿ, ਆਕਾਰਸ੍ਸ ਚ ਅਕੋવਿਦੋ, ਸ વੇ ਤਾਦਿਸਕੋ ਭਿਕ੍ਖੁ ਅਪਟਿਕ੍ਖੋਤਿ વੁਚ੍ਚਤਿ।
Vatthuṃ vipattiṃ āpattiṃ, nidānaṃ ākāraakovido pubbāparaṃ na jānātīti ‘‘vatthu’’ntiādīni ‘‘na jānātī’’ti padena sambandho. ‘‘Akovido’’ti padassa ‘‘sa ve tādisako’’ti iminā sambandho. Tasmā ayamettha yojanā – yo bhikkhu pārājikādīnaṃ vatthuṃ na jānāti, catubbidhaṃ vipattiṃ na jānāti, sattavidhaṃ āpattiṃ na jānāti, ‘‘idaṃ sikkhāpadaṃ asukasmiṃ nāma nagare paññatta’’nti evaṃ nidānaṃ na jānāti, ‘‘idaṃ purimavacanaṃ idaṃ pacchimavacana’’nti pubbāparaṃ na jānāti, ‘‘idaṃ kataṃ idaṃ akata’’nti katākataṃ na jānāti. Samena cāti teneva pubbāparaṃ ajānanassa samena aññāṇena, ‘‘katākataṃ na jānātī’’ti vuttaṃ hoti; evaṃ tāva najānāti-padena saddhiṃ sambandho veditabbo. Yaṃ panetaṃ ‘‘ākāraakovido’’ti vuttaṃ, tattha ākāraakovidoti kāraṇākāraṇe akovido. Iti yvāyaṃ vatthuādīnipi na jānāti, ākārassa ca akovido, sa ve tādisako bhikkhu apaṭikkhoti vuccati.
ਕਮ੍ਮਞ੍ਚ ਅਧਿਕਰਣਞ੍ਚਾਤਿ ਇਮੇਸਮ੍ਪਿ ਪਦਾਨਂ ‘‘ਨ ਜਾਨਾਤੀ’’ਤਿ ਪਦੇਨੇવ ਸਮ੍ਬਨ੍ਧੋ। ਅਯਂ ਪਨੇਤ੍ਥ ਯੋਜਨਾ – ਤਥੇવ ਇਤਿ ਯ੍વਾਯਂ ਕਮ੍ਮਞ੍ਚ ਨ ਜਾਨਾਤਿ, ਅਧਿਕਰਣਞ੍ਚ ਨ ਜਾਨਾਤਿ, ਸਤ੍ਤਪ੍ਪਕਾਰੇ ਸਮਥੇ ਚਾਪਿ ਅਕੋવਿਦੋ, ਰਾਗਾਦੀਹਿ ਪਨ ਰਤ੍ਤੋ ਦੁਟ੍ਠੋ ਚ ਮੂਲ਼੍ਹੋ ਚ, ਭਯੇਨ ਭਯਾ ਗਚ੍ਛਤਿ, ਸਮ੍ਮੋਹੇਨ ਮੋਹਾ ਗਚ੍ਛਤਿ, ਰਤ੍ਤਤ੍ਤਾ ਪਨ ਦੁਟ੍ਠਤ੍ਤਾ ਚ ਛਨ੍ਦਾ ਦੋਸਾ ਚ ਗਚ੍ਛਤਿ, ਪਰਂ ਸਞ੍ਞਾਪੇਤੁਂ ਅਸਮਤ੍ਥਤਾਯ ਨ ਚ ਸਞ੍ਞਤ੍ਤਿਕੁਸਲੋ, ਕਾਰਣਾਕਾਰਣਦਸ੍ਸਨੇ ਅਸਮਤ੍ਥਤਾਯ ਨਿਜ੍ਝਤ੍ਤਿਯਾ ਚ ਅਕੋવਿਦੋ ਅਤ੍ਤਨੋ ਸਦਿਸਾਯ ਪਰਿਸਾਯ ਲਦ੍ਧਤ੍ਤਾ ਲਦ੍ਧਪਕ੍ਖੋ, ਹਿਰਿਯਾ ਪਰਿਬਾਹਿਰਤ੍ਤਾ ਅਹਿਰਿਕੋ, ਕਾਲ਼ਕੇਹਿ ਕਮ੍ਮੇਹਿ ਸਮਨ੍ਨਾਗਤਤ੍ਤਾ ਕਣ੍ਹਕਮ੍ਮੋ, ਧਮ੍ਮਾਦਰਿਯਪੁਗ੍ਗਲਾਦਰਿਯਾਨਂ ਅਭਾવਤੋ ਅਨਾਦਰੋ, ਸ વੇ ਤਾਦਿਸਕੋ ਭਿਕ੍ਖੁ ਅਪਟਿਕ੍ਖੋਤਿ વੁਚ੍ਚਤਿ, ਨ ਪਟਿਕ੍ਖਿਤਬ੍ਬੋ ਨ ਓਲੋਕੇਤਬ੍ਬੋ, ਨ ਸਮ੍ਮਨ੍ਨਿਤ੍વਾ ਇਸ੍ਸਰਿਯਾਧਿਪਚ੍ਚਜੇਟ੍ਠਕਟ੍ਠਾਨੇ ਠਪੇਤਬ੍ਬੋਤਿ ਅਤ੍ਥੋ। ਸੁਕ੍ਕਪਕ੍ਖਗਾਥਾਨਮ੍ਪਿ ਯੋਜਨਾਨਯੋ વੁਤ੍ਤਨਯੇਨੇવ વੇਦਿਤਬ੍ਬੋਤਿ।
Kammañca adhikaraṇañcāti imesampi padānaṃ ‘‘na jānātī’’ti padeneva sambandho. Ayaṃ panettha yojanā – tatheva iti yvāyaṃ kammañca na jānāti, adhikaraṇañca na jānāti, sattappakāre samathe cāpi akovido, rāgādīhi pana ratto duṭṭho ca mūḷho ca, bhayena bhayā gacchati, sammohena mohā gacchati, rattattā pana duṭṭhattā ca chandā dosā ca gacchati, paraṃ saññāpetuṃ asamatthatāya na ca saññattikusalo, kāraṇākāraṇadassane asamatthatāya nijjhattiyā ca akovido attano sadisāya parisāya laddhattā laddhapakkho, hiriyā paribāhirattā ahiriko, kāḷakehi kammehi samannāgatattā kaṇhakammo, dhammādariyapuggalādariyānaṃ abhāvato anādaro, sa ve tādisako bhikkhu apaṭikkhoti vuccati, na paṭikkhitabbo na oloketabbo, na sammannitvā issariyādhipaccajeṭṭhakaṭṭhāne ṭhapetabboti attho. Sukkapakkhagāthānampi yojanānayo vuttanayeneva veditabboti.
ਚੂਲ਼ਸਙ੍ਗਾਮવਣ੍ਣਨਾ ਨਿਟ੍ਠਿਤਾ।
Cūḷasaṅgāmavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / વਿਨਯਪਿਟਕ • Vinayapiṭaka / ਪਰਿવਾਰਪਾਲ਼ਿ • Parivārapāḷi / ੧. ਅਨੁવਿਜ੍ਜਕਸ੍ਸਪਟਿਪਤ੍ਤਿ • 1. Anuvijjakassapaṭipatti
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਸਾਰਤ੍ਥਦੀਪਨੀ-ਟੀਕਾ • Sāratthadīpanī-ṭīkā / ਸਙ੍ਗਾਮਦ੍વਯવਣ੍ਣਨਾ • Saṅgāmadvayavaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਜਿਰਬੁਦ੍ਧਿ-ਟੀਕਾ • Vajirabuddhi-ṭīkā / ਅਨੁવਿਜ੍ਜਕਸ੍ਸਪਟਿਪਤ੍ਤਿવਣ੍ਣਨਾ • Anuvijjakassapaṭipattivaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਿਮਤਿવਿਨੋਦਨੀ-ਟੀਕਾ • Vimativinodanī-ṭīkā / ਅਨੁવਿਜ੍ਜਕਸ੍ਸ ਪਟਿਪਤ੍ਤਿવਣ੍ਣਨਾ • Anuvijjakassa paṭipattivaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਪਾਚਿਤ੍ਯਾਦਿਯੋਜਨਾਪਾਲ਼ਿ • Pācityādiyojanāpāḷi / ਅਨੁવਿਜ੍ਜਕਸ੍ਸ ਪਟਿਪਤ੍ਤਿવਣ੍ਣਨਾ • Anuvijjakassa paṭipattivaṇṇanā
