| Library / Tipiṭaka / திபிடக • Tipiṭaka / பரிவாரபாளி • Parivārapāḷi |
சூளஸங்கா³மோ
Cūḷasaṅgāmo
1. அனுவிஜ்ஜகஸ்ஸபடிபத்தி
1. Anuvijjakassapaṭipatti
365. 1 ஸங்கா³மாவசரே பி⁴க்கு²னா ஸங்க⁴ங் உபஸங்கமந்தேன நீசசித்தேன ஸங்கோ⁴ உபஸங்கமிதப்³போ³ ரஜோஹரணஸமேன சித்தேன; ஆஸனகுஸலேன ப⁴விதப்³ப³ங் நிஸஜ்ஜகுஸலேன; தே²ரே பி⁴க்கூ² அனுபக²ஜ்ஜந்தேன, நவே பி⁴க்கூ² ஆஸனேன அப்படிபா³ஹந்தேன, யதா²பதிரூபே ஆஸனே நிஸீதி³தப்³ப³ங்; அனானாகதி²கேன ப⁴விதப்³ப³ங் அதிரச்சா²னகதி²கேன; ஸாமங் வா த⁴ம்மோ பா⁴ஸிதப்³போ³ பரோ வா அஜ்ஜே²ஸிதப்³போ³ அரியோ வா துண்ஹீபா⁴வோ நாதிமஞ்ஞிதப்³போ³.
365.2 Saṅgāmāvacare bhikkhunā saṅghaṃ upasaṅkamantena nīcacittena saṅgho upasaṅkamitabbo rajoharaṇasamena cittena; āsanakusalena bhavitabbaṃ nisajjakusalena; there bhikkhū anupakhajjantena, nave bhikkhū āsanena appaṭibāhantena, yathāpatirūpe āsane nisīditabbaṃ; anānākathikena bhavitabbaṃ atiracchānakathikena; sāmaṃ vā dhammo bhāsitabbo paro vā ajjhesitabbo ariyo vā tuṇhībhāvo nātimaññitabbo.
ஸங்கே⁴ன அனுமதேன புக்³க³லேன அனுவிஜ்ஜகேன அனுவிஜ்ஜிதுகாமேன ந உபஜ்ஜா²யோ புச்சி²தப்³போ³, ந ஆசரியோ புச்சி²தப்³போ³, ந ஸத்³தி⁴விஹாரிகோ புச்சி²தப்³போ³, ந அந்தேவாஸிகோ புச்சி²தப்³போ³, ந ஸமானுபஜ்ஜா²யகோ புச்சி²தப்³போ³, ந ஸமானாசரியகோ புச்சி²தப்³போ³, ந ஜாதி புச்சி²தப்³பா³, ந நாமங் புச்சி²தப்³ப³ங், ந கொ³த்தங் புச்சி²தப்³ப³ங், ந ஆக³மோ புச்சி²தப்³போ³, ந குலபதே³ஸோ புச்சி²தப்³போ³, ந ஜாதிபூ⁴மி புச்சி²தப்³பா³. தங் கிங் காரணா? அத்ரஸ்ஸ பேமங் வா தோ³ஸோ வா. பேமே வா ஸதி தோ³ஸே வா, ச²ந்தா³பி க³ச்செ²ய்ய தோ³ஸாபி க³ச்செ²ய்ய மோஹாபி க³ச்செ²ய்ய ப⁴யாபி க³ச்செ²ய்ய.
Saṅghena anumatena puggalena anuvijjakena anuvijjitukāmena na upajjhāyo pucchitabbo, na ācariyo pucchitabbo, na saddhivihāriko pucchitabbo, na antevāsiko pucchitabbo, na samānupajjhāyako pucchitabbo, na samānācariyako pucchitabbo, na jāti pucchitabbā, na nāmaṃ pucchitabbaṃ, na gottaṃ pucchitabbaṃ, na āgamo pucchitabbo, na kulapadeso pucchitabbo, na jātibhūmi pucchitabbā. Taṃ kiṃ kāraṇā? Atrassa pemaṃ vā doso vā. Peme vā sati dose vā, chandāpi gaccheyya dosāpi gaccheyya mohāpi gaccheyya bhayāpi gaccheyya.
ஸங்கே⁴ன அனுமதேன புக்³க³லேன அனுவிஜ்ஜகேன அனுவிஜ்ஜிதுகாமேன ஸங்க⁴க³ருகேன ப⁴விதப்³ப³ங் நோ புக்³க³லக³ருகேன, ஸத்³த⁴ம்மக³ருகேன ப⁴விதப்³ப³ங் நோ ஆமிஸக³ருகேன, அத்த²வஸிகேன ப⁴விதப்³ப³ங் நோ பரிஸகப்பிகேன, காலேன அனுவிஜ்ஜிதப்³ப³ங் நோ அகாலேன, பூ⁴தேன அனுவிஜ்ஜிதப்³ப³ங் நோ அபூ⁴தேன, ஸண்ஹேன அனுவிஜ்ஜிதப்³ப³ங் நோ ப²ருஸேன, அத்த²ஸங்ஹிதேன அனுவிஜ்ஜிதப்³ப³ங் நோ அனத்த²ஸங்ஹிதேன, மெத்தாசித்தேன அனுவிஜ்ஜிதப்³ப³ங் நோ தோ³ஸந்தரேன, ந உபகண்ணகஜப்பினா ப⁴விதப்³ப³ங், ந ஜிம்ஹங் பெக்கி²தப்³ப³ங், ந அக்கி² நிக²ணிதப்³ப³ங், ந ப⁴முகங் உக்கி²பிதப்³ப³ங், ந ஸீஸங் உக்கி²பிதப்³ப³ங், ந ஹத்த²விகாரோ காதப்³போ³, ந ஹத்த²முத்³தா³ த³ஸ்ஸேதப்³பா³.
Saṅghena anumatena puggalena anuvijjakena anuvijjitukāmena saṅghagarukena bhavitabbaṃ no puggalagarukena, saddhammagarukena bhavitabbaṃ no āmisagarukena, atthavasikena bhavitabbaṃ no parisakappikena, kālena anuvijjitabbaṃ no akālena, bhūtena anuvijjitabbaṃ no abhūtena, saṇhena anuvijjitabbaṃ no pharusena, atthasaṃhitena anuvijjitabbaṃ no anatthasaṃhitena, mettācittena anuvijjitabbaṃ no dosantarena, na upakaṇṇakajappinā bhavitabbaṃ, na jimhaṃ pekkhitabbaṃ, na akkhi nikhaṇitabbaṃ, na bhamukaṃ ukkhipitabbaṃ, na sīsaṃ ukkhipitabbaṃ, na hatthavikāro kātabbo, na hatthamuddā dassetabbā.
ஆஸனகுஸலேன ப⁴விதப்³ப³ங் நிஸஜ்ஜகுஸலேன, யுக³மத்தங் பெக்க²ந்தேன அத்த²ங் அனுவிதி⁴யந்தேன ஸகே ஆஸனே நிஸீதி³தப்³ப³ங், ந ச ஆஸனா வுட்டா²தப்³ப³ங் , ந வீதிஹாதப்³ப³ங், ந கும்மக்³கோ³ ஸேவிதப்³போ³, ந பா³ஹாவிக்கே²பகங் 3 ப⁴ணிதப்³ப³ங், அதுரிதேன ப⁴விதப்³ப³ங் அஸாஹஸிகேன, அசண்டி³கதேன ப⁴விதப்³ப³ங் வசனக்க²மே , மெத்தாசித்தேன ப⁴விதப்³ப³ங் ஹிதானுகம்பினா, காருணிகேன ப⁴விதப்³ப³ங் ஹிதபரிஸக்கினா, அஸம்ப²ப்பலாபினா ப⁴விதப்³ப³ங் பரியந்தபா⁴ணினா, அவேரவஸிகேன ப⁴விதப்³ப³ங் அனஸுருத்தேன, அத்தா பரிக்³க³ஹேதப்³போ³, பரோ பரிக்³க³ஹேதப்³போ³, சோத³கோ பரிக்³க³ஹேதப்³போ³, சுதி³தகோ பரிக்³க³ஹேதப்³போ³, அத⁴ம்மசோத³கோ பரிக்³க³ஹேதப்³போ³, அத⁴ம்மசுதி³தகோ பரிக்³க³ஹேதப்³போ³, த⁴ம்மசோத³கோ பரிக்³க³ஹேதப்³போ³, த⁴ம்மசுதி³தகோ பரிக்³க³ஹேதப்³போ³, வுத்தங் அஹாபெந்தேன அவுத்தங் அபகாஸெந்தேன ஓதிண்ணானி பத³ப்³யஞ்ஜனானி ஸாது⁴கங் பரிக்³க³ஹெத்வா பரோ படிபுச்சி²த்வா யதா² படிஞ்ஞாய காரேதப்³போ³, மந்தோ³ ஹாஸேதப்³போ³ 4, பீ⁴ரூ அஸ்ஸாஸேதப்³போ³, சண்டோ³ நிஸேதே⁴தப்³போ³, அஸுசி விபா⁴வேதப்³போ³, உஜுமத்³த³வேன ந ச²ந்தா³க³திங் க³ந்தப்³ப³ங், ந தோ³ஸாக³திங் க³ந்தப்³ப³ங், ந மோஹாக³திங் க³ந்தப்³ப³ங், ந ப⁴யாக³திங் க³ந்தப்³ப³ங், மஜ்ஜ²த்தேன ப⁴விதப்³ப³ங் த⁴ம்மேஸு ச புக்³க³லேஸு ச. ஏவஞ்ச பன அனுவிஜ்ஜகோ அனுவிஜ்ஜமானோ ஸத்து² சேவ ஸாஸனகரோ ஹோதி, விஞ்ஞூனஞ்ச ஸப்³ரஹ்மசாரீனங் பியோ ச ஹோதி மனாபோ ச க³ரு ச பா⁴வனீயோ ச.
Āsanakusalena bhavitabbaṃ nisajjakusalena, yugamattaṃ pekkhantena atthaṃ anuvidhiyantena sake āsane nisīditabbaṃ, na ca āsanā vuṭṭhātabbaṃ , na vītihātabbaṃ, na kummaggo sevitabbo, na bāhāvikkhepakaṃ 5 bhaṇitabbaṃ, aturitena bhavitabbaṃ asāhasikena, acaṇḍikatena bhavitabbaṃ vacanakkhame , mettācittena bhavitabbaṃ hitānukampinā, kāruṇikena bhavitabbaṃ hitaparisakkinā, asamphappalāpinā bhavitabbaṃ pariyantabhāṇinā, averavasikena bhavitabbaṃ anasuruttena, attā pariggahetabbo, paro pariggahetabbo, codako pariggahetabbo, cuditako pariggahetabbo, adhammacodako pariggahetabbo, adhammacuditako pariggahetabbo, dhammacodako pariggahetabbo, dhammacuditako pariggahetabbo, vuttaṃ ahāpentena avuttaṃ apakāsentena otiṇṇāni padabyañjanāni sādhukaṃ pariggahetvā paro paṭipucchitvā yathā paṭiññāya kāretabbo, mando hāsetabbo 6, bhīrū assāsetabbo, caṇḍo nisedhetabbo, asuci vibhāvetabbo, ujumaddavena na chandāgatiṃ gantabbaṃ, na dosāgatiṃ gantabbaṃ, na mohāgatiṃ gantabbaṃ, na bhayāgatiṃ gantabbaṃ, majjhattena bhavitabbaṃ dhammesu ca puggalesu ca. Evañca pana anuvijjako anuvijjamāno satthu ceva sāsanakaro hoti, viññūnañca sabrahmacārīnaṃ piyo ca hoti manāpo ca garu ca bhāvanīyo ca.
366. ஸுத்தங் ஸங்ஸந்த³னத்தா²ய, ஓபம்மங் நித³ஸ்ஸனத்தா²ய, அத்தோ² விஞ்ஞாபனத்தா²ய, படிபுச்சா² ட²பனத்தா²ய, ஓகாஸகம்மங் சோத³னத்தா²ய, சோத³னா ஸாரணத்தா²ய, ஸாரணா ஸவசனீயத்தா²ய, ஸவசனீயங் பலிபோ³த⁴த்தா²ய, பலிபோ³தோ⁴ வினிச்ச²யத்தா²ய, வினிச்ச²யோ ஸந்தீரணத்தா²ய, ஸந்தீரணங் டா²னாடா²னக³மனத்தா²ய, டா²னாடா²னக³மனங் து³ம்மங்கூனங் புக்³க³லானங் நிக்³க³ஹத்தா²ய, பேஸலானங் பி⁴க்கூ²னங் ஸம்பக்³க³ஹத்தா²ய, ஸங்கோ⁴ ஸம்பரிக்³க³ஹஸம்படிச்ச²னத்தா²ய, ஸங்கே⁴ன அனுமதா புக்³க³லா பச்சேகட்டா²யினோ அவிஸங்வாத³கட்டா²யினோ.
366. Suttaṃ saṃsandanatthāya, opammaṃ nidassanatthāya, attho viññāpanatthāya, paṭipucchā ṭhapanatthāya, okāsakammaṃ codanatthāya, codanā sāraṇatthāya, sāraṇā savacanīyatthāya, savacanīyaṃ palibodhatthāya, palibodho vinicchayatthāya, vinicchayo santīraṇatthāya, santīraṇaṃ ṭhānāṭhānagamanatthāya, ṭhānāṭhānagamanaṃ dummaṅkūnaṃ puggalānaṃ niggahatthāya, pesalānaṃ bhikkhūnaṃ sampaggahatthāya, saṅgho sampariggahasampaṭicchanatthāya, saṅghena anumatā puggalā paccekaṭṭhāyino avisaṃvādakaṭṭhāyino.
வினயோ ஸங்வரத்தா²ய, ஸங்வரோ அவிப்படிஸாரத்தா²ய, அவிப்படிஸாரோ பாமுஜ்ஜத்தா²ய, பாமுஜ்ஜங் பீதத்தா²ய, பீதி பஸ்ஸத்³த⁴த்தா²ய, பஸ்ஸத்³தி⁴ ஸுக²த்தா²ய, ஸுக²ங் ஸமாத⁴த்தா²ய, ஸமாதி⁴ யதா²பூ⁴தஞாணத³ஸ்ஸனத்தா²ய, யதா²பூ⁴தஞாணத³ஸ்ஸனங் நிப்³பி³த³த்தா²ய, நிப்³பி³தா³ விராக³த்தா²ய, விராகோ³ விமுத்தத்தா²ய, விமுத்தி விமுத்திஞாணத³ஸ்ஸனத்தா²ய, விமுத்திஞாணத³ஸ்ஸனங் அனுபாதா³பரினிப்³பா³னத்தா²ய. ஏதத³த்தா² கதா², ஏதத³த்தா² மந்தனா, ஏதத³த்தா² உபனிஸா, ஏதத³த்த²ங் ஸோதாவதா⁴னங் – யதி³த³ங் அனுபாதா³சித்தஸ்ஸ விமொக்கோ²தி.
Vinayo saṃvaratthāya, saṃvaro avippaṭisāratthāya, avippaṭisāro pāmujjatthāya, pāmujjaṃ pītatthāya, pīti passaddhatthāya, passaddhi sukhatthāya, sukhaṃ samādhatthāya, samādhi yathābhūtañāṇadassanatthāya, yathābhūtañāṇadassanaṃ nibbidatthāya, nibbidā virāgatthāya, virāgo vimuttatthāya, vimutti vimuttiñāṇadassanatthāya, vimuttiñāṇadassanaṃ anupādāparinibbānatthāya. Etadatthā kathā, etadatthā mantanā, etadatthā upanisā, etadatthaṃ sotāvadhānaṃ – yadidaṃ anupādācittassa vimokkhoti.
367.
367.
அனுயோக³வத்தங் நிஸாமய, குஸலேன பு³த்³தி⁴மதா கதங்;
Anuyogavattaṃ nisāmaya, kusalena buddhimatā kataṃ;
ஸுவுத்தங் ஸிக்கா²பதா³னுலோமிகங், க³திங் ந நாஸெந்தோ ஸம்பராயிகங்.
Suvuttaṃ sikkhāpadānulomikaṃ, gatiṃ na nāsento samparāyikaṃ.
வத்து²ங் விபத்திங் ஆபத்திங், நிதா³னங் ஆகாரஅகோவிதோ³;
Vatthuṃ vipattiṃ āpattiṃ, nidānaṃ ākāraakovido;
புப்³பா³பரங் ந ஜானாதி, கதாகதங் ஸமேன ச.
Pubbāparaṃ na jānāti, katākataṃ samena ca.
கம்மஞ்ச அதி⁴கரணஞ்ச, ஸமதே² சாபி அகோவிதோ³;
Kammañca adhikaraṇañca, samathe cāpi akovido;
ரத்தோ து³ட்டோ² ச மூள்ஹோ ச, ப⁴யா மோஹா ச க³ச்ச²தி.
Ratto duṭṭho ca mūḷho ca, bhayā mohā ca gacchati.
ந ச ஸஞ்ஞத்திகுஸலோ, நிஜ்ஜ²த்தியா ச அகோவிதோ³;
Na ca saññattikusalo, nijjhattiyā ca akovido;
லத்³த⁴பக்கோ² அஹிரிகோ, கண்ஹகம்மோ அனாத³ரோ;
Laddhapakkho ahiriko, kaṇhakammo anādaro;
வத்து²ங் விபத்திங் ஆபத்திங், நிதா³னங் ஆகாரகோவிதோ³;
Vatthuṃ vipattiṃ āpattiṃ, nidānaṃ ākārakovido;
புப்³பா³பரஞ்ச ஜானாதி, கதாகதங் ஸமேன ச.
Pubbāparañca jānāti, katākataṃ samena ca.
கம்மஞ்ச அதி⁴கரணஞ்ச, ஸமதே² சாபி கோவிதோ³;
Kammañca adhikaraṇañca, samathe cāpi kovido;
அரத்தோ அது³ட்டோ² அமூள்ஹோ, ப⁴யா மோஹா ந க³ச்ச²தி.
Aratto aduṭṭho amūḷho, bhayā mohā na gacchati.
ஸஞ்ஞத்தியா ச குஸலோ, நிஜ்ஜ²த்தியா ச கோவிதோ³;
Saññattiyā ca kusalo, nijjhattiyā ca kovido;
லத்³த⁴பக்கோ² ஹிரிமனோ, ஸுக்ககம்மோ ஸகா³ரவோ;
Laddhapakkho hirimano, sukkakammo sagāravo;
ஸ வே தாதி³ஸகோ பி⁴க்கு², ஸப்படிக்கோ²தி வுச்சதீதி.
Sa ve tādisako bhikkhu, sappaṭikkhoti vuccatīti.
சூளஸங்கா³மோ நிட்டி²தோ.
Cūḷasaṅgāmo niṭṭhito.
தஸ்ஸுத்³தா³னங் –
Tassuddānaṃ –
நீசசித்தேன புச்செ²ய்ய, க³ரு ஸங்கே⁴ ந புக்³க³லே;
Nīcacittena puccheyya, garu saṅghe na puggale;
ஸுத்தங் ஸங்ஸந்த³னத்தா²ய, வினயானுக்³க³ஹேன ச;
Suttaṃ saṃsandanatthāya, vinayānuggahena ca;
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பரிவார-அட்ட²கதா² • Parivāra-aṭṭhakathā / அனுவிஜ்ஜகஸ்ஸ படிபத்திவண்ணனா • Anuvijjakassa paṭipattivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஸங்கா³மத்³வயவண்ணனா • Saṅgāmadvayavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / அனுவிஜ்ஜகஸ்ஸபடிபத்திவண்ணனா • Anuvijjakassapaṭipattivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / அனுவிஜ்ஜகஸ்ஸ படிபத்திவண்ணனா • Anuvijjakassa paṭipattivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / அனுவிஜ்ஜகஸ்ஸ படிபத்திவண்ணனா • Anuvijjakassa paṭipattivaṇṇanā
