| Library / Tipiṭaka / តិបិដក • Tipiṭaka / បរិវារបាឡិ • Parivārapāḷi |
ចូឡសង្គាមោ
Cūḷasaṅgāmo
១. អនុវិជ្ជកស្សបដិបត្តិ
1. Anuvijjakassapaṭipatti
៣៦៥. 1 សង្គាមាវចរេ ភិក្ខុនា សង្ឃំ ឧបសង្កមន្តេន នីចចិត្តេន សង្ឃោ ឧបសង្កមិតព្ពោ រជោហរណសមេន ចិត្តេន; អាសនកុសលេន ភវិតព្ពំ និសជ្ជកុសលេន; ថេរេ ភិក្ខូ អនុបខជ្ជន្តេន, នវេ ភិក្ខូ អាសនេន អប្បដិពាហន្តេន, យថាបតិរូបេ អាសនេ និសីទិតព្ពំ; អនានាកថិកេន ភវិតព្ពំ អតិរច្ឆានកថិកេន; សាមំ វា ធម្មោ ភាសិតព្ពោ បរោ វា អជ្ឈេសិតព្ពោ អរិយោ វា តុណ្ហីភាវោ នាតិមញ្ញិតព្ពោ។
365.2 Saṅgāmāvacare bhikkhunā saṅghaṃ upasaṅkamantena nīcacittena saṅgho upasaṅkamitabbo rajoharaṇasamena cittena; āsanakusalena bhavitabbaṃ nisajjakusalena; there bhikkhū anupakhajjantena, nave bhikkhū āsanena appaṭibāhantena, yathāpatirūpe āsane nisīditabbaṃ; anānākathikena bhavitabbaṃ atiracchānakathikena; sāmaṃ vā dhammo bhāsitabbo paro vā ajjhesitabbo ariyo vā tuṇhībhāvo nātimaññitabbo.
សង្ឃេន អនុមតេន បុគ្គលេន អនុវិជ្ជកេន អនុវិជ្ជិតុកាមេន ន ឧបជ្ឈាយោ បុច្ឆិតព្ពោ, ន អាចរិយោ បុច្ឆិតព្ពោ, ន សទ្ធិវិហារិកោ បុច្ឆិតព្ពោ, ន អន្តេវាសិកោ បុច្ឆិតព្ពោ, ន សមានុបជ្ឈាយកោ បុច្ឆិតព្ពោ, ន សមានាចរិយកោ បុច្ឆិតព្ពោ, ន ជាតិ បុច្ឆិតព្ពា, ន នាមំ បុច្ឆិតព្ពំ, ន គោត្តំ បុច្ឆិតព្ពំ, ន អាគមោ បុច្ឆិតព្ពោ, ន កុលបទេសោ បុច្ឆិតព្ពោ, ន ជាតិភូមិ បុច្ឆិតព្ពា។ តំ កិំ ការណា? អត្រស្ស បេមំ វា ទោសោ វា។ បេមេ វា សតិ ទោសេ វា, ឆន្ទាបិ គច្ឆេយ្យ ទោសាបិ គច្ឆេយ្យ មោហាបិ គច្ឆេយ្យ ភយាបិ គច្ឆេយ្យ។
Saṅghena anumatena puggalena anuvijjakena anuvijjitukāmena na upajjhāyo pucchitabbo, na ācariyo pucchitabbo, na saddhivihāriko pucchitabbo, na antevāsiko pucchitabbo, na samānupajjhāyako pucchitabbo, na samānācariyako pucchitabbo, na jāti pucchitabbā, na nāmaṃ pucchitabbaṃ, na gottaṃ pucchitabbaṃ, na āgamo pucchitabbo, na kulapadeso pucchitabbo, na jātibhūmi pucchitabbā. Taṃ kiṃ kāraṇā? Atrassa pemaṃ vā doso vā. Peme vā sati dose vā, chandāpi gaccheyya dosāpi gaccheyya mohāpi gaccheyya bhayāpi gaccheyya.
សង្ឃេន អនុមតេន បុគ្គលេន អនុវិជ្ជកេន អនុវិជ្ជិតុកាមេន សង្ឃគរុកេន ភវិតព្ពំ នោ បុគ្គលគរុកេន, សទ្ធម្មគរុកេន ភវិតព្ពំ នោ អាមិសគរុកេន, អត្ថវសិកេន ភវិតព្ពំ នោ បរិសកប្បិកេន, កាលេន អនុវិជ្ជិតព្ពំ នោ អកាលេន, ភូតេន អនុវិជ្ជិតព្ពំ នោ អភូតេន, សណ្ហេន អនុវិជ្ជិតព្ពំ នោ ផរុសេន, អត្ថសំហិតេន អនុវិជ្ជិតព្ពំ នោ អនត្ថសំហិតេន, មេត្តាចិត្តេន អនុវិជ្ជិតព្ពំ នោ ទោសន្តរេន, ន ឧបកណ្ណកជប្បិនា ភវិតព្ពំ, ន ជិម្ហំ បេក្ខិតព្ពំ, ន អក្ខិ និខណិតព្ពំ, ន ភមុកំ ឧក្ខិបិតព្ពំ, ន សីសំ ឧក្ខិបិតព្ពំ, ន ហត្ថវិការោ កាតព្ពោ, ន ហត្ថមុទ្ទា ទស្សេតព្ពា។
Saṅghena anumatena puggalena anuvijjakena anuvijjitukāmena saṅghagarukena bhavitabbaṃ no puggalagarukena, saddhammagarukena bhavitabbaṃ no āmisagarukena, atthavasikena bhavitabbaṃ no parisakappikena, kālena anuvijjitabbaṃ no akālena, bhūtena anuvijjitabbaṃ no abhūtena, saṇhena anuvijjitabbaṃ no pharusena, atthasaṃhitena anuvijjitabbaṃ no anatthasaṃhitena, mettācittena anuvijjitabbaṃ no dosantarena, na upakaṇṇakajappinā bhavitabbaṃ, na jimhaṃ pekkhitabbaṃ, na akkhi nikhaṇitabbaṃ, na bhamukaṃ ukkhipitabbaṃ, na sīsaṃ ukkhipitabbaṃ, na hatthavikāro kātabbo, na hatthamuddā dassetabbā.
អាសនកុសលេន ភវិតព្ពំ និសជ្ជកុសលេន, យុគមត្តំ បេក្ខន្តេន អត្ថំ អនុវិធិយន្តេន សកេ អាសនេ និសីទិតព្ពំ, ន ច អាសនា វុដ្ឋាតព្ពំ , ន វីតិហាតព្ពំ, ន កុម្មគ្គោ សេវិតព្ពោ, ន ពាហាវិក្ខេបកំ 3 ភណិតព្ពំ, អតុរិតេន ភវិតព្ពំ អសាហសិកេន, អចណ្ឌិកតេន ភវិតព្ពំ វចនក្ខមេ , មេត្តាចិត្តេន ភវិតព្ពំ ហិតានុកម្បិនា, ការុណិកេន ភវិតព្ពំ ហិតបរិសក្កិនា, អសម្ផប្បលាបិនា ភវិតព្ពំ បរិយន្តភាណិនា, អវេរវសិកេន ភវិតព្ពំ អនសុរុត្តេន, អត្តា បរិគ្គហេតព្ពោ, បរោ បរិគ្គហេតព្ពោ, ចោទកោ បរិគ្គហេតព្ពោ, ចុទិតកោ បរិគ្គហេតព្ពោ, អធម្មចោទកោ បរិគ្គហេតព្ពោ, អធម្មចុទិតកោ បរិគ្គហេតព្ពោ, ធម្មចោទកោ បរិគ្គហេតព្ពោ, ធម្មចុទិតកោ បរិគ្គហេតព្ពោ, វុត្តំ អហាបេន្តេន អវុត្តំ អបកាសេន្តេន ឱតិណ្ណានិ បទព្យញ្ជនានិ សាធុកំ បរិគ្គហេត្វា បរោ បដិបុច្ឆិត្វា យថា បដិញ្ញាយ ការេតព្ពោ, មន្ទោ ហាសេតព្ពោ 4, ភីរូ អស្សាសេតព្ពោ, ចណ្ឌោ និសេធេតព្ពោ, អសុចិ វិភាវេតព្ពោ, ឧជុមទ្ទវេន ន ឆន្ទាគតិំ គន្តព្ពំ, ន ទោសាគតិំ គន្តព្ពំ, ន មោហាគតិំ គន្តព្ពំ, ន ភយាគតិំ គន្តព្ពំ, មជ្ឈត្តេន ភវិតព្ពំ ធម្មេសុ ច បុគ្គលេសុ ច។ ឯវញ្ច បន អនុវិជ្ជកោ អនុវិជ្ជមានោ សត្ថុ ចេវ សាសនករោ ហោតិ, វិញ្ញូនញ្ច សព្រហ្មចារីនំ បិយោ ច ហោតិ មនាបោ ច គរុ ច ភាវនីយោ ច។
Āsanakusalena bhavitabbaṃ nisajjakusalena, yugamattaṃ pekkhantena atthaṃ anuvidhiyantena sake āsane nisīditabbaṃ, na ca āsanā vuṭṭhātabbaṃ , na vītihātabbaṃ, na kummaggo sevitabbo, na bāhāvikkhepakaṃ 5 bhaṇitabbaṃ, aturitena bhavitabbaṃ asāhasikena, acaṇḍikatena bhavitabbaṃ vacanakkhame , mettācittena bhavitabbaṃ hitānukampinā, kāruṇikena bhavitabbaṃ hitaparisakkinā, asamphappalāpinā bhavitabbaṃ pariyantabhāṇinā, averavasikena bhavitabbaṃ anasuruttena, attā pariggahetabbo, paro pariggahetabbo, codako pariggahetabbo, cuditako pariggahetabbo, adhammacodako pariggahetabbo, adhammacuditako pariggahetabbo, dhammacodako pariggahetabbo, dhammacuditako pariggahetabbo, vuttaṃ ahāpentena avuttaṃ apakāsentena otiṇṇāni padabyañjanāni sādhukaṃ pariggahetvā paro paṭipucchitvā yathā paṭiññāya kāretabbo, mando hāsetabbo 6, bhīrū assāsetabbo, caṇḍo nisedhetabbo, asuci vibhāvetabbo, ujumaddavena na chandāgatiṃ gantabbaṃ, na dosāgatiṃ gantabbaṃ, na mohāgatiṃ gantabbaṃ, na bhayāgatiṃ gantabbaṃ, majjhattena bhavitabbaṃ dhammesu ca puggalesu ca. Evañca pana anuvijjako anuvijjamāno satthu ceva sāsanakaro hoti, viññūnañca sabrahmacārīnaṃ piyo ca hoti manāpo ca garu ca bhāvanīyo ca.
៣៦៦. សុត្តំ សំសន្ទនត្ថាយ, ឱបម្មំ និទស្សនត្ថាយ, អត្ថោ វិញ្ញាបនត្ថាយ, បដិបុច្ឆា ឋបនត្ថាយ, ឱកាសកម្មំ ចោទនត្ថាយ, ចោទនា សារណត្ថាយ, សារណា សវចនីយត្ថាយ, សវចនីយំ បលិពោធត្ថាយ, បលិពោធោ វិនិច្ឆយត្ថាយ, វិនិច្ឆយោ សន្តីរណត្ថាយ, សន្តីរណំ ឋានាឋានគមនត្ថាយ, ឋានាឋានគមនំ ទុម្មង្កូនំ បុគ្គលានំ និគ្គហត្ថាយ, បេសលានំ ភិក្ខូនំ សម្បគ្គហត្ថាយ, សង្ឃោ សម្បរិគ្គហសម្បដិច្ឆនត្ថាយ, សង្ឃេន អនុមតា បុគ្គលា បច្ចេកដ្ឋាយិនោ អវិសំវាទកដ្ឋាយិនោ។
366. Suttaṃ saṃsandanatthāya, opammaṃ nidassanatthāya, attho viññāpanatthāya, paṭipucchā ṭhapanatthāya, okāsakammaṃ codanatthāya, codanā sāraṇatthāya, sāraṇā savacanīyatthāya, savacanīyaṃ palibodhatthāya, palibodho vinicchayatthāya, vinicchayo santīraṇatthāya, santīraṇaṃ ṭhānāṭhānagamanatthāya, ṭhānāṭhānagamanaṃ dummaṅkūnaṃ puggalānaṃ niggahatthāya, pesalānaṃ bhikkhūnaṃ sampaggahatthāya, saṅgho sampariggahasampaṭicchanatthāya, saṅghena anumatā puggalā paccekaṭṭhāyino avisaṃvādakaṭṭhāyino.
វិនយោ សំវរត្ថាយ, សំវរោ អវិប្បដិសារត្ថាយ, អវិប្បដិសារោ បាមុជ្ជត្ថាយ, បាមុជ្ជំ បីតត្ថាយ, បីតិ បស្សទ្ធត្ថាយ, បស្សទ្ធិ សុខត្ថាយ, សុខំ សមាធត្ថាយ, សមាធិ យថាភូតញាណទស្សនត្ថាយ, យថាភូតញាណទស្សនំ និព្ពិទត្ថាយ, និព្ពិទា វិរាគត្ថាយ, វិរាគោ វិមុត្តត្ថាយ, វិមុត្តិ វិមុត្តិញាណទស្សនត្ថាយ, វិមុត្តិញាណទស្សនំ អនុបាទាបរិនិព្ពានត្ថាយ។ ឯតទត្ថា កថា, ឯតទត្ថា មន្តនា, ឯតទត្ថា ឧបនិសា, ឯតទត្ថំ សោតាវធានំ – យទិទំ អនុបាទាចិត្តស្ស វិមោក្ខោតិ។
Vinayo saṃvaratthāya, saṃvaro avippaṭisāratthāya, avippaṭisāro pāmujjatthāya, pāmujjaṃ pītatthāya, pīti passaddhatthāya, passaddhi sukhatthāya, sukhaṃ samādhatthāya, samādhi yathābhūtañāṇadassanatthāya, yathābhūtañāṇadassanaṃ nibbidatthāya, nibbidā virāgatthāya, virāgo vimuttatthāya, vimutti vimuttiñāṇadassanatthāya, vimuttiñāṇadassanaṃ anupādāparinibbānatthāya. Etadatthā kathā, etadatthā mantanā, etadatthā upanisā, etadatthaṃ sotāvadhānaṃ – yadidaṃ anupādācittassa vimokkhoti.
៣៦៧.
367.
អនុយោគវត្តំ និសាមយ, កុសលេន ពុទ្ធិមតា កតំ;
Anuyogavattaṃ nisāmaya, kusalena buddhimatā kataṃ;
សុវុត្តំ សិក្ខាបទានុលោមិកំ, គតិំ ន នាសេន្តោ សម្បរាយិកំ។
Suvuttaṃ sikkhāpadānulomikaṃ, gatiṃ na nāsento samparāyikaṃ.
វត្ថុំ វិបត្តិំ អាបត្តិំ, និទានំ អាការអកោវិទោ;
Vatthuṃ vipattiṃ āpattiṃ, nidānaṃ ākāraakovido;
បុព្ពាបរំ ន ជានាតិ, កតាកតំ សមេន ច។
Pubbāparaṃ na jānāti, katākataṃ samena ca.
កម្មញ្ច អធិករណញ្ច, សមថេ ចាបិ អកោវិទោ;
Kammañca adhikaraṇañca, samathe cāpi akovido;
រត្តោ ទុដ្ឋោ ច មូឡ្ហោ ច, ភយា មោហា ច គច្ឆតិ។
Ratto duṭṭho ca mūḷho ca, bhayā mohā ca gacchati.
ន ច សញ្ញត្តិកុសលោ, និជ្ឈត្តិយា ច អកោវិទោ;
Na ca saññattikusalo, nijjhattiyā ca akovido;
លទ្ធបក្ខោ អហិរិកោ, កណ្ហកម្មោ អនាទរោ;
Laddhapakkho ahiriko, kaṇhakammo anādaro;
វត្ថុំ វិបត្តិំ អាបត្តិំ, និទានំ អាការកោវិទោ;
Vatthuṃ vipattiṃ āpattiṃ, nidānaṃ ākārakovido;
បុព្ពាបរញ្ច ជានាតិ, កតាកតំ សមេន ច។
Pubbāparañca jānāti, katākataṃ samena ca.
កម្មញ្ច អធិករណញ្ច, សមថេ ចាបិ កោវិទោ;
Kammañca adhikaraṇañca, samathe cāpi kovido;
អរត្តោ អទុដ្ឋោ អមូឡ្ហោ, ភយា មោហា ន គច្ឆតិ។
Aratto aduṭṭho amūḷho, bhayā mohā na gacchati.
សញ្ញត្តិយា ច កុសលោ, និជ្ឈត្តិយា ច កោវិទោ;
Saññattiyā ca kusalo, nijjhattiyā ca kovido;
លទ្ធបក្ខោ ហិរិមនោ, សុក្កកម្មោ សគារវោ;
Laddhapakkho hirimano, sukkakammo sagāravo;
ស វេ តាទិសកោ ភិក្ខុ, សប្បដិក្ខោតិ វុច្ចតីតិ។
Sa ve tādisako bhikkhu, sappaṭikkhoti vuccatīti.
ចូឡសង្គាមោ និដ្ឋិតោ។
Cūḷasaṅgāmo niṭṭhito.
តស្សុទ្ទានំ –
Tassuddānaṃ –
នីចចិត្តេន បុច្ឆេយ្យ, គរុ សង្ឃេ ន បុគ្គលេ;
Nīcacittena puccheyya, garu saṅghe na puggale;
សុត្តំ សំសន្ទនត្ថាយ, វិនយានុគ្គហេន ច;
Suttaṃ saṃsandanatthāya, vinayānuggahena ca;
Footnotes:
Related texts:
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / បរិវារ-អដ្ឋកថា • Parivāra-aṭṭhakathā / អនុវិជ្ជកស្ស បដិបត្តិវណ្ណនា • Anuvijjakassa paṭipattivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / សង្គាមទ្វយវណ្ណនា • Saṅgāmadvayavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / អនុវិជ្ជកស្សបដិបត្តិវណ្ណនា • Anuvijjakassapaṭipattivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / អនុវិជ្ជកស្ស បដិបត្តិវណ្ណនា • Anuvijjakassa paṭipattivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / អនុវិជ្ជកស្ស បដិបត្តិវណ្ណនា • Anuvijjakassa paṭipattivaṇṇanā
