| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
12. අපගතසුත්‌තං
12. Apagatasuttaṃ
201. සාවත්‌ථිනිදානං . අථ ඛො ආයස්‌මා රාහුලො යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදි. එකමන්‌තං නිසින්‌නො ඛො ආයස්‌මා රාහුලො භගවන්‌තං එතදවොච – ‘‘කථං නු ඛො, භන්‌තෙ, ජානතො කථං පස්‌සතො ඉමස්‌මිං ච සවිඤ්‌ඤාණකෙ කායෙ බහිද්‌ධා ච සබ්‌බනිමිත්‌තෙසු අහඞ්‌කාරමමඞ්‌කාරමානාපගතං මානසං හොති විධා සමතික්‌කන්‌තං සන්‌තං සුවිමුත්‌ත’’න්‌ති? ‘‘යං කිඤ්‌චි, රාහුල, රූපං අතීතානාගතපච්‌චුප්‌පන්‌නං අජ්‌ඣත්‌තං වා බහිද්‌ධා වා ඔළාරිකං වා සුඛුමං වා හීනං වා පණීතං වා යං දූරෙ සන්‌තිකෙ වා සබ්‌බං රූපං ‘නෙතං මම, නෙසොහමස්‌මි, න මෙසො අත්‌තා’ති එවමෙතං යථාභූතං සම්‌මප්‌පඤ්‌ඤාය දිස්‌වා අනුපාදා විමුත්‌තො හොති’’.
201. Sāvatthinidānaṃ . Atha kho āyasmā rāhulo yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā rāhulo bhagavantaṃ etadavoca – ‘‘kathaṃ nu kho, bhante, jānato kathaṃ passato imasmiṃ ca saviññāṇake kāye bahiddhā ca sabbanimittesu ahaṅkāramamaṅkāramānāpagataṃ mānasaṃ hoti vidhā samatikkantaṃ santaṃ suvimutta’’nti? ‘‘Yaṃ kiñci, rāhula, rūpaṃ atītānāgatapaccuppannaṃ ajjhattaṃ vā bahiddhā vā oḷārikaṃ vā sukhumaṃ vā hīnaṃ vā paṇītaṃ vā yaṃ dūre santike vā sabbaṃ rūpaṃ ‘netaṃ mama, nesohamasmi, na meso attā’ti evametaṃ yathābhūtaṃ sammappaññāya disvā anupādā vimutto hoti’’.
‘‘යා කාචි වෙදනා…පෙ.… යා කාචි සඤ්‌ඤා… යෙ කෙචි සඞ්‌ඛාරා… යං කිඤ්‌චි විඤ්‌ඤාණං අතීතානාගතපච්‌චුප්‌පන්‌නං අජ්‌ඣත්‌තං වා බහිද්‌ධා වා ඔළාරිකං වා සුඛුමං වා හීනං වා පණීතං වා යං දූරෙ සන්‌තිකෙ වා, සබ්‌බං විඤ්‌ඤාණං ‘නෙතං මම, නෙසොහමස්‌මි, න මෙසො අත්‌තා’ති එවමෙතං යථාභූතං සම්‌මප්‌පඤ්‌ඤාය දිස්‌වා අනුපාදා විමුත්‌තො හොති. එවං ඛො, රාහුල, ජානතො එවං පස්‌සතො ඉමස්‌මිඤ්‌ච සවිඤ්‌ඤාණකෙ කායෙ බහිද්‌ධා ච සබ්‌බනිමිත්‌තෙසු අහඞ්‌කාරමමඞ්‌කාරමානාපගතං මානසං හොති විධා සමතික්‌කන්‌තං සන්‌තං සුවිමුත්‌ත’’න්‌ති. ද්‌වාදසමං.
‘‘Yā kāci vedanā…pe… yā kāci saññā… ye keci saṅkhārā… yaṃ kiñci viññāṇaṃ atītānāgatapaccuppannaṃ ajjhattaṃ vā bahiddhā vā oḷārikaṃ vā sukhumaṃ vā hīnaṃ vā paṇītaṃ vā yaṃ dūre santike vā, sabbaṃ viññāṇaṃ ‘netaṃ mama, nesohamasmi, na meso attā’ti evametaṃ yathābhūtaṃ sammappaññāya disvā anupādā vimutto hoti. Evaṃ kho, rāhula, jānato evaṃ passato imasmiñca saviññāṇake kāye bahiddhā ca sabbanimittesu ahaṅkāramamaṅkāramānāpagataṃ mānasaṃ hoti vidhā samatikkantaṃ santaṃ suvimutta’’nti. Dvādasamaṃ.
දුතියො වග්‌ගො.
Dutiyo vaggo.
තස්‌සුද්‌දානං –
Tassuddānaṃ –
චක්‌ඛු රූපඤ්‌ච විඤ්‌ඤාණං, සම්‌ඵස්‌සො වෙදනාය ච;
Cakkhu rūpañca viññāṇaṃ, samphasso vedanāya ca;
සඤ්‌ඤා සඤ්‌චෙතනා තණ්‌හා, ධාතු ඛන්‌ධෙන තෙ දස;
Saññā sañcetanā taṇhā, dhātu khandhena te dasa;
අනුසයං අපගතඤ්‌චෙව, වග්‌ගො තෙන පවුච්‌චතීති.
Anusayaṃ apagatañceva, vaggo tena pavuccatīti.
රාහුලසංයුත්‌තං සමත්‌තං.
Rāhulasaṃyuttaṃ samattaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 12. අපගතසුත්‌තවණ්‌ණනා • 12. Apagatasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 12. අපගතසුත්‌තවණ්‌ණනා • 12. Apagatasuttavaṇṇanā
