| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
அபலோகனகம்மகதா²
Apalokanakammakathā
495-6. தத்தா²தி சதூஸு கம்மேஸு. எத்தா²தி ஓஸாரணாதி³பாடே². பத³ஸிலிட்ட²தாயாதி லோகே பதா³னங் ஸிலிட்ட²பா⁴வதோ. தத்தா²தி ஓஸாரணாதீ³ஸு பஞ்சஸு. கண்டகஸாமணேரஸ்ஸ யா ஸா த³ண்ட³கம்மனாஸனா அத்தி², ஸா நிஸ்ஸாரணாதி யோஜனா. ‘‘மிச்சா²தி³ட்டி²கோ ஹோதீ’’தி வத்வா தமேவத்த²ங் த³ஸ்ஸேதுங் ‘‘அந்தக்³கா³ஹிகாய தி³ட்டி²யா ஸமன்னாக³தோ’’தி வுத்தங். மிச்சா²தி³ட்டி² ஹி லிங்க³னாஸனாய காரணங் ஹோதி. ஸோதி ஸாமணேரோ, ‘‘நிஸ்ஸஜ்ஜாபேதப்³போ³’’தி பதே³ காரிதகம்மங், வுத்தகம்மங் வா. தங் லத்³தி⁴ந்தி தா⁴துகம்மங், அவுத்தகம்மங் வா. கிந்தி காதப்³ப³ந்தி ஆஹ ‘‘ஏவஞ்ச பன கம்மங் காதப்³ப³’’ந்தி.
495-6.Tatthāti catūsu kammesu. Etthāti osāraṇādipāṭhe. Padasiliṭṭhatāyāti loke padānaṃ siliṭṭhabhāvato. Tatthāti osāraṇādīsu pañcasu. Kaṇṭakasāmaṇerassa yā sā daṇḍakammanāsanā atthi, sā nissāraṇāti yojanā. ‘‘Micchādiṭṭhiko hotī’’ti vatvā tamevatthaṃ dassetuṃ ‘‘antaggāhikāya diṭṭhiyā samannāgato’’ti vuttaṃ. Micchādiṭṭhi hi liṅganāsanāya kāraṇaṃ hoti. Soti sāmaṇero, ‘‘nissajjāpetabbo’’ti pade kāritakammaṃ, vuttakammaṃ vā. Taṃ laddhinti dhātukammaṃ, avuttakammaṃ vā. Kinti kātabbanti āha ‘‘evañca pana kammaṃ kātabba’’nti.
காதப்³பா³காரங் த³ஸ்ஸெந்தோ ஆஹ ‘‘ஸங்க⁴ங் ப⁴ந்தே’’திஆதி³. யங் ஸஹஸெய்யங் லப⁴ந்தீதி யோஜனா. தஸ்ஸாதி ஸஹஸெய்யஸ்ஸ. அலாபா⁴யாதி அலாப⁴த்தா²ய. ‘‘சர பிரே வினஸ்ஸா’’தி இமினா நிஸ்ஸாரணாகாரங் த³ஸ்ஸேதி. அத்தோ² பனஸ்ஸ ஹெட்டா² வுத்தோயேவ.
Kātabbākāraṃ dassento āha ‘‘saṅghaṃ bhante’’tiādi. Yaṃ sahaseyyaṃ labhantīti yojanā. Tassāti sahaseyyassa. Alābhāyāti alābhatthāya. ‘‘Cara pire vinassā’’ti iminā nissāraṇākāraṃ dasseti. Attho panassa heṭṭhā vuttoyeva.
ஸோதி ஸமணேரோ, ஓஸாரேதப்³போ³தி ஸம்ப³ந்தோ⁴.
Soti samaṇero, osāretabboti sambandho.
ஸ்வாயந்தி ஸோ அயங் ஸாமணேரோ, அச்சயங் தே³ஸேதீதி ஸம்ப³ந்தோ⁴. ஸோரதோதி ஸுந்த³ரலத்³தி⁴யங் ரதோ, து³லத்³தி⁴தோ வா ஸுட்டு² ஓரதோ. யதா² புரேதி யதா² புப்³பே³ ருச்சதி, ததா²தி யோஜனா. காயஸம்போ⁴க³ஸாமக்³கி³தா³னந்தி காயேன ச ஸம்போ⁴கே³ன ச ஸாமக்³கி³யா தா³னங்.
Svāyanti so ayaṃ sāmaṇero, accayaṃ desetīti sambandho. Soratoti sundaraladdhiyaṃ rato, duladdhito vā suṭṭhu orato. Yathā pureti yathā pubbe ruccati, tathāti yojanā. Kāyasambhogasāmaggidānanti kāyena ca sambhogena ca sāmaggiyā dānaṃ.
ஏவந்திஆதி³ நிக³மனங். யஸ்மா பன ப்³ரஹ்மத³ண்டோ³ பஞ்சஸதிகக்க²ந்த⁴கே (சூளவ॰ 445) ச²ன்னஸ்ஸேவ பஞ்ஞத்தோ, தஸ்மா தஸ்ஸேவ தா³தப்³போ³தி ஆஹ ‘‘ந கேவல’’ந்திஆதி³. ஏஸாதி ப்³ரஹ்மத³ண்டோ³, அஞ்ஞோபி யோ பி⁴க்கு² விஹரதி, தஸ்ஸபி தா³தப்³போ³தி ஸம்ப³ந்தோ⁴. கிந்தி தா³தப்³போ³தி ஆஹ ‘‘ஏவஞ்ச பன தா³தப்³போ³’’தி. தா³தப்³பா³காரங் த³ஸ்ஸெந்தோ ஆஹ ‘‘ஸங்க⁴மஜ்ஜே²’’திஆதி³.
Evantiādi nigamanaṃ. Yasmā pana brahmadaṇḍo pañcasatikakkhandhake (cūḷava. 445) channasseva paññatto, tasmā tasseva dātabboti āha ‘‘na kevala’’ntiādi. Esāti brahmadaṇḍo, aññopi yo bhikkhu viharati, tassapi dātabboti sambandho. Kinti dātabboti āha ‘‘evañca pana dātabbo’’ti. Dātabbākāraṃ dassento āha ‘‘saṅghamajjhe’’tiādi.
யங் வசனங் இச்செ²ய்ய, தங் வசனந்தி யோஜனா. க²மாபெந்தஸ்ஸாதி ஸங்க⁴ங் க²மாபெந்தஸ்ஸ தஸ்ஸ பி⁴க்கு²ஸ்ஸாதி யோஜனா.
Yaṃ vacanaṃ iccheyya, taṃ vacananti yojanā. Khamāpentassāti saṅghaṃ khamāpentassa tassa bhikkhussāti yojanā.
படிஸங்கா²தி படிஸங்கா²ய, ஞாணேன பச்சவெக்கி²த்வாதி அத்தோ².
Paṭisaṅkhāti paṭisaṅkhāya, ñāṇena paccavekkhitvāti attho.
யந்தி அவந்தி³யகம்மங், அனுஞ்ஞாதந்தி ஸம்ப³ந்தோ⁴. கேன அனுஞ்ஞாதந்தி ஆஹ ‘‘ப⁴க³வதா’’தி. கிஸ்மிங் க²ந்த⁴கே அனுஞ்ஞாதந்தி ஆஹ ‘‘பி⁴க்கு²னிக்க²ந்த⁴கே’’தி. கேஸு வத்தூ²ஸு அனுஞ்ஞாதந்தி ஆஹ ‘‘தேன கோ² பன…பே॰… இமேஸு வத்தூ²ஸூ’’தி (சூளவ॰ 411). கிங் கத்வா அனுஞ்ஞாதந்தி ஆஹ ‘‘து³க்கடங் பஞ்ஞபெத்வா’’தி. கிந்தி அனுஞ்ஞாதந்தி ஆஹ ‘‘அனுஜானாமி…பே॰… காதப்³போ³’’தி. தஸ்ஸாதி அவந்தி³யஸ்ஸ. ‘‘ந ஓஸாரணாதீ³னீ’’தி இமினா ஏவஸத்³த³ஸ்ஸ ச²ட்³டே³தப்³ப³த்த²ங் த³ஸ்ஸேதி. தஸ்ஸாதி கம்மலக்க²ணபூ⁴தஸ்ஸ அவந்தி³யஸ்ஸ. தத்தே²வாதி பி⁴க்கு²னிக்க²ந்த⁴கேயேவ. நந்தி கம்மலக்க²ணங். இதா⁴பீதி பரிவாரே கம்மவக்³கே³பி.
Yanti avandiyakammaṃ, anuññātanti sambandho. Kena anuññātanti āha ‘‘bhagavatā’’ti. Kismiṃ khandhake anuññātanti āha ‘‘bhikkhunikkhandhake’’ti. Kesu vatthūsu anuññātanti āha ‘‘tena kho pana…pe… imesu vatthūsū’’ti (cūḷava. 411). Kiṃ katvā anuññātanti āha ‘‘dukkaṭaṃ paññapetvā’’ti. Kinti anuññātanti āha ‘‘anujānāmi…pe… kātabbo’’ti. Tassāti avandiyassa. ‘‘Na osāraṇādīnī’’ti iminā evasaddassa chaḍḍetabbatthaṃ dasseti. Tassāti kammalakkhaṇabhūtassa avandiyassa. Tatthevāti bhikkhunikkhandhakeyeva. Nanti kammalakkhaṇaṃ. Idhāpīti parivāre kammavaggepi.
அபாஸாதி³கந்தி அபஸாதா³வஹங், அபஸாத³ஜனகங் வா.
Apāsādikanti apasādāvahaṃ, apasādajanakaṃ vā.
ததோதி அவந்தி³யகரணதோ. இமந்தி பி⁴க்கு²ங். வந்தி³யந்தி வந்தி³தப்³ப³ங், வந்த³னங் வா.
Tatoti avandiyakaraṇato. Imanti bhikkhuṃ. Vandiyanti vanditabbaṃ, vandanaṃ vā.
எத்தா²தி அபலோகனகம்மே, பி⁴க்கு²னிஸங்க⁴மூலகங் கத்வா பஞ்ஞத்தந்தி யோஜனா. பி⁴க்கு²ஸங்க⁴ஸ்ஸாபீதி பிஸத்³தோ³ ந பி⁴க்கு²னிஸங்க⁴ஸ்ஸேவாதி த³ஸ்ஸேதி. பனஸத்³தோ³ ஸம்பா⁴வனத்தோ², ததா² பி⁴க்கு²னிஸங்க⁴மூலகங் பஞ்ஞத்தம்பீதி அத்தோ², லபி⁴தப்³ப³பா⁴வங் வித்தா²ரேன த³ஸ்ஸெந்தோ ஆஹ ‘‘யங் ஹீ’’திஆதி³. யங் அபலோகனகம்மங் கரோதீதி யோஜனா. அப்பமத்தகவிஸ்ஸஜ்ஜகேன பன தா³தப்³பா³னீதி ஸம்ப³ந்தோ⁴. தேஸந்தி ஸூசிஆதீ³னங். ஸோயேவாதி அப்பமத்தகவிஸ்ஸஜ்ஜகோயேவ. ததோதி அப்பமத்தகதோ. தத்தா²தி ஸேனாஸனக்க²ந்த⁴கவண்ணனாயங் (சூளவ॰ அட்ட²॰ 321). வுத்தப்பகாரங் கி³லானபே⁴ஸஜ்ஜம்பீதி ஸம்ப³ந்தோ⁴. யோபி சாதி பி⁴க்கு²பி ச ஹோதீதி ஸம்ப³ந்தோ⁴. தஸ்ஸ தா³தப்³பா³தி ஸம்ப³ந்தோ⁴. தத்ருப்பாத³தோதி தஸ்மிங் மஹாவாஸே உப்பாத³பச்சயதோ, க³ஹெத்வாதி ஸம்ப³ந்தோ⁴. ‘‘பேஸலஸ்ஸா’’திஆதி³னா து³ஸ்ஸீலாதீ³னங் தா³துங் ந வட்டதீதி த³ஸ்ஸேதி.
Etthāti apalokanakamme, bhikkhunisaṅghamūlakaṃ katvā paññattanti yojanā. Bhikkhusaṅghassāpīti pisaddo na bhikkhunisaṅghassevāti dasseti. Panasaddo sambhāvanattho, tathā bhikkhunisaṅghamūlakaṃ paññattampīti attho, labhitabbabhāvaṃ vitthārena dassento āha ‘‘yaṃ hī’’tiādi. Yaṃ apalokanakammaṃ karotīti yojanā. Appamattakavissajjakena pana dātabbānīti sambandho. Tesanti sūciādīnaṃ. Soyevāti appamattakavissajjakoyeva. Tatoti appamattakato. Tatthāti senāsanakkhandhakavaṇṇanāyaṃ (cūḷava. aṭṭha. 321). Vuttappakāraṃ gilānabhesajjampīti sambandho. Yopi cāti bhikkhupi ca hotīti sambandho. Tassa dātabbāti sambandho. Tatruppādatoti tasmiṃ mahāvāse uppādapaccayato, gahetvāti sambandho. ‘‘Pesalassā’’tiādinā dussīlādīnaṃ dātuṃ na vaṭṭatīti dasseti.
ஜக்³கா³பேதுங் வட்டதீதி எத்த² அபுச்சி²த்வா ஜக்³கா³பேதுங் வட்டதீதி ஆஹ ‘‘அயங் பி⁴க்கூ²’’திஆதி³. ஓதி³ஸ்ஸாதி உத்³தி³ஸித்வா.
Jaggāpetuṃ vaṭṭatīti ettha apucchitvā jaggāpetuṃ vaṭṭatīti āha ‘‘ayaṃ bhikkhū’’tiādi. Odissāti uddisitvā.
ஆஸனக⁴ரங் வாதி படிமாக⁴ரங் வா, காரகோ மனுஸ்ஸோதி ஸம்ப³ந்தோ⁴. உபனிக்கே²பதோ க³ஹெத்வாதி ஸம்ப³ந்தோ⁴. ஸங்கி⁴கேனபீதி பிஸத்³தோ³ ந கேவலங் சேதியஸ்ஸ உபனிக்கே²பேனேவ, அத² கோ² ஸங்கி⁴கேனபீதி த³ஸ்ஸேதி.
Āsanagharaṃ vāti paṭimāgharaṃ vā, kārako manussoti sambandho. Upanikkhepato gahetvāti sambandho. Saṅghikenapīti pisaddo na kevalaṃ cetiyassa upanikkhepeneva, atha kho saṅghikenapīti dasseti.
யாபனமத்தங் அலப⁴ந்தேஹி கரொந்தேஹீதி யோஜனா, பரிபு⁴ஞ்ஜந்தேஹி ஹுத்வாதி ஸம்ப³ந்தோ⁴. ‘‘வத்தங் கரோமா’’திஆதி³னா ‘‘யாபனமத்த’’ந்தி பத³ஸ்ஸ அத்த²ங் த³ஸ்ஸேதி. விஹாரே ரோபிதா யே ப²லருக்கா²தி யோஜனா. யேஸந்தி ருக்கா²னங். தேஸூதி ருக்கே²ஸு. யே பனாதி ருக்கா² பன, அபரிக்³க³ஹிதா ஹொந்தீதி ஸம்ப³ந்தோ⁴. தங் பனாதி அபலோகனகம்மங் பன. ஸலாகங் க³ண்ஹந்தி எத்தா²தி ஸலாகக்³க³ங், டா²னங். ‘‘யாக³க்³க³ப⁴த்தக்³க³’’இதி எத்தா²பி ஏஸேவ நயோ. உபோஸத²க்³கே³தி உபோஸத²ஸ்ஸ க³ஹணட்டா²னே, உபோஸத²கே³ஹேதி அத்தோ². தத்தா²தி உபோஸத²க்³கே³. தந்தி அபலோகனகம்மங்.
Yāpanamattaṃ alabhantehi karontehīti yojanā, paribhuñjantehi hutvāti sambandho. ‘‘Vattaṃ karomā’’tiādinā ‘‘yāpanamatta’’nti padassa atthaṃ dasseti. Vihāre ropitā ye phalarukkhāti yojanā. Yesanti rukkhānaṃ. Tesūti rukkhesu. Ye panāti rukkhā pana, apariggahitā hontīti sambandho. Taṃ panāti apalokanakammaṃ pana. Salākaṃ gaṇhanti etthāti salākaggaṃ, ṭhānaṃ. ‘‘Yāgaggabhattagga’’iti etthāpi eseva nayo. Uposathaggeti uposathassa gahaṇaṭṭhāne, uposathageheti attho. Tatthāti uposathagge. Tanti apalokanakammaṃ.
யங் மூலதசபத்தஅங்குரபுப்ப²ப²லகா²த³னீயாதீ³தி யோஜனா. அந்தோஸீமாயாதி அந்தோ உபசாரஸீமாய.
Yaṃ mūlatacapattaaṅkurapupphaphalakhādanīyādīti yojanā. Antosīmāyāti anto upacārasīmāya.
ஸுகதமேவாதி ஸங்கே⁴ன கதமேவ. உபோஸத²தி³வஸேதி நித³ஸ்ஸனமத்தங் யஸ்மிங் கஸ்மிங்சி தி³வஸேபி கதத்தா.
Sukatamevāti saṅghena katameva. Uposathadivaseti nidassanamattaṃ yasmiṃ kasmiṃci divasepi katattā.
ப²லவாரேனாதி ருக்கா²னங் ப²லக³ஹணவாரேன. ருக்கா² த⁴ரந்தீதி ருக்கா² திட்ட²ந்தி, ஸங்விஜ்ஜந்தி வா . யேஹீதி பி⁴க்கூ²ஹி ரோபிதா, ஹொந்தீதி ஸம்ப³ந்தோ⁴. ஸா ஏவ கதிகாதி புப்³பே³ கதா ஸா ஏவ கதிகா, அஞ்ஞா கதிகா ந காதப்³பா³தி அதி⁴ப்பாயோ.
Phalavārenāti rukkhānaṃ phalagahaṇavārena. Rukkhā dharantīti rukkhā tiṭṭhanti, saṃvijjanti vā . Yehīti bhikkhūhi ropitā, hontīti sambandho. Sā eva katikāti pubbe katā sā eva katikā, aññā katikā na kātabbāti adhippāyo.
அஞ்ஞஸ்மிங் விஹாரேதி ருக்கா²னங் டி²தவிஹாரதோ அஞ்ஞஸ்மிங் விஹாரே. தேஸந்தி ருக்கா²னங், ஸாமீதி ஸம்ப³ந்தோ⁴. யேபீதி ருக்கா²பி, ரோபிதாதி ஸம்ப³ந்தோ⁴. அஞ்ஞதோ டா²னதோதி யோஜனா. தேஸூதி ருக்கே²ஸு. எத்தா²தி விஹாரே. தேஹி பனாதி பரிவேணஸாமிகேஹி பி⁴க்கூ²ஹி பன. த³ஸபா⁴க³ந்தி த³ஸமபா⁴க³ங். ‘‘ஏஸேவ நயோ’’தி இமினா த³ஸபா⁴க³ங் த³த்வாதி அத்த²ங் அதிதி³ஸதி.
Aññasmiṃ vihāreti rukkhānaṃ ṭhitavihārato aññasmiṃ vihāre. Tesanti rukkhānaṃ, sāmīti sambandho. Yepīti rukkhāpi, ropitāti sambandho. Aññato ṭhānatoti yojanā. Tesūti rukkhesu. Etthāti vihāre. Tehi panāti pariveṇasāmikehi bhikkhūhi pana. Dasabhāganti dasamabhāgaṃ. ‘‘Eseva nayo’’ti iminā dasabhāgaṃ datvāti atthaṃ atidisati.
ஸம்பா⁴வனீயபி⁴க்கு²னோதி ஸீலஸுதாதீ³ஹி ஸம்பா⁴வனீயஸ்ஸ பி⁴க்கு²னோ. தத்தா²தி போராணவிஹாரே. மூலேதி புப்³பே³, ஆதி³காலேதி அத்தோ². நிக்குக்குச்சேனாதி ‘‘அபா⁴ஜிதமித³’’ந்தி குக்குச்சவிரஹேன. கி²ய்யனமத்தமேவ தந்தி தங் கி²ய்யனங் கி²ய்யனமத்தமேவ, ந ஸாமணேரானங் கி²ய்யனங் ருஹதீதி அத்தோ².
Sambhāvanīyabhikkhunoti sīlasutādīhi sambhāvanīyassa bhikkhuno. Tatthāti porāṇavihāre. Mūleti pubbe, ādikāleti attho. Nikkukkuccenāti ‘‘abhājitamida’’nti kukkuccavirahena. Khiyyanamattameva tanti taṃ khiyyanaṃ khiyyanamattameva, na sāmaṇerānaṃ khiyyanaṃ ruhatīti attho.
பனஸருக்க²ந்தி கண்டகீப²லருக்க²ங். அயங் ஸாமீசீதி அயங் பா⁴ஜெத்வா கா²த³னங் அனுத⁴ம்மதா. கா²யிதந்தி கா²தி³தங். த்³வின்னங் திண்ணங் கதிகபடிப்பஸ்ஸம்ப⁴னங் நயேன ஞாதுங் ஸக்குணெய்யத்தா தங் அத³ஸ்ஸெத்வா ஏகஸ்ஸேவ கதிகபடிப்பஸ்ஸம்ப⁴னங் த³ஸ்ஸெந்தோ ஆஹ ‘‘ஏகபி⁴க்கு²கே பனா’’திஆதி³. புரிமகதிகாதி ‘‘யதா²ஸுக²ங் பரிபு⁴ஞ்ஜிதுங் ருச்சதீ’’தி (பரி॰ அட்ட²॰ 495-496) புரே கதா கதிகா. தேஸந்தி ஸாமணேரானங், பா²திகம்மந்தி ஸம்ப³ந்தோ⁴. பா⁴ஜெத்வாதி ஸாமணேரானங் பா⁴ஜெத்வா. இமினா ஸாமணேரானங் பா²திகம்மங் ந தா³தப்³ப³ம்பி பா⁴க³ங் பா⁴ஜேதப்³ப³ந்தி த³ஸ்ஸேதி.
Panasarukkhanti kaṇṭakīphalarukkhaṃ. Ayaṃ sāmīcīti ayaṃ bhājetvā khādanaṃ anudhammatā. Khāyitanti khāditaṃ. Dvinnaṃ tiṇṇaṃ katikapaṭippassambhanaṃ nayena ñātuṃ sakkuṇeyyattā taṃ adassetvā ekasseva katikapaṭippassambhanaṃ dassento āha ‘‘ekabhikkhuke panā’’tiādi. Purimakatikāti ‘‘yathāsukhaṃ paribhuñjituṃ ruccatī’’ti (pari. aṭṭha. 495-496) pure katā katikā. Tesanti sāmaṇerānaṃ, phātikammanti sambandho. Bhājetvāti sāmaṇerānaṃ bhājetvā. Iminā sāmaṇerānaṃ phātikammaṃ na dātabbampi bhāgaṃ bhājetabbanti dasseti.
ஸாமந்தகா³மேஹீதி ஆஸன்னகா³மேஹி, ஆக³ந்த்வாதி ஸம்ப³ந்தோ⁴. ஏகங் அம்ப³ங் ஏகங் லபு³ஜந்தி யோஜனா. அதி³ய்யமானே தோ³ஸே த³ஸ்ஸிதே தி³ய்யமானே ஆனிஸங்ஸம்பி அத்த²தோ ஞாதப்³ப³ந்தி த³ஸ்ஸெந்தோ ஆஹ ‘‘அதி³ய்யமானே ஹீ’’திஆதி³.
Sāmantagāmehīti āsannagāmehi, āgantvāti sambandho. Ekaṃ ambaṃ ekaṃ labujanti yojanā. Adiyyamāne dose dassite diyyamāne ānisaṃsampi atthato ñātabbanti dassento āha ‘‘adiyyamāne hī’’tiādi.
க³ண்ஹந்தானங் மனுஸ்ஸானந்தி ஸம்ப³ந்தோ⁴. ததோதி கதிகவத்தட்ட²பனதோ. ந வத்தப்³பா³தி ப²லதா³னகுலதூ³ஸகத்தா ந வத்தப்³பா³. கிந்தி ஆசிக்கி²தப்³ப³ந்தி ஆஹ ‘‘நாளிகேராதீ³னீ’’திஆதி³. அனுவிசரித்வாதி பதா³னமனுக்கமேன விசரித்வா. உபட்³ட⁴பா⁴கோ³தி பி⁴க்கூ²னங் லத்³த⁴பா⁴க³தோ உபட்³டோ⁴ பா⁴கோ³. அபலோகெத்வாதி ஸங்க⁴ங் ஆபுச்சி²த்வா.
Gaṇhantānaṃ manussānanti sambandho. Tatoti katikavattaṭṭhapanato. Na vattabbāti phaladānakuladūsakattā na vattabbā. Kinti ācikkhitabbanti āha ‘‘nāḷikerādīnī’’tiādi. Anuvicaritvāti padānamanukkamena vicaritvā. Upaḍḍhabhāgoti bhikkhūnaṃ laddhabhāgato upaḍḍho bhāgo. Apaloketvāti saṅghaṃ āpucchitvā.
மக்³க³க³மியஸத்த²வாஹோதி மக்³க³ங் க³மிகோ ஸத்த²வாஹோ. ஸோதி ப³லக்காரேன க³ஹெத்வா கா²த³ந்தோ. சா²யாதீ³னந்திஆதி³ஸத்³தே³ன ஆராமவனானி ஸங்க³ஹேதப்³பா³னி. ஸசே அத்தீ²தி ஸசே அத்தோ² அத்தி². ப²லப⁴ரிதாதி ப²லேன பரிபுண்ணா. ‘‘ப²லபா⁴ரிதா’’திபி பாடோ². ப²லஸங்கா²தேன பா⁴ரேன ஸமன்னாக³தாதி அத்தோ². அபச்சாஸீஸந்தேனாதி தேஸங் ஸந்திகா தா³னபடிதா³னங் அபச்சாஸீஸந்தேன. புப்³பே³ வுத்தமேவாதி புப்³பே³ ஸங்கி⁴கட்டா²னே ‘‘குத்³தோ⁴ ஹி ஸோ’’திஆதி³னா வுத்தமேவ. எத்தா²தி புக்³க³லிகட்டா²னே.
Maggagamiyasatthavāhoti maggaṃ gamiko satthavāho. Soti balakkārena gahetvā khādanto. Chāyādīnantiādisaddena ārāmavanāni saṅgahetabbāni. Sace atthīti sace attho atthi. Phalabharitāti phalena paripuṇṇā. ‘‘Phalabhāritā’’tipi pāṭho. Phalasaṅkhātena bhārena samannāgatāti attho. Apaccāsīsantenāti tesaṃ santikā dānapaṭidānaṃ apaccāsīsantena. Pubbe vuttamevāti pubbe saṅghikaṭṭhāne ‘‘kuddho hi so’’tiādinā vuttameva. Etthāti puggalikaṭṭhāne.
தந்தி ப²லாராமங். ஸோதி படிப³லோ பி⁴க்கு². பா⁴ரியங் கம்மந்தி ஜக்³க³னகம்மங் பா⁴ரியங். எத்தகேனாதி ததியபா⁴க³உபட்³ட⁴பா⁴க³மத்தேன. ஸப்³ப³ங் ப²லாராமந்தி ஸம்ப³ந்தோ⁴. மூலபா⁴க³ந்தி பட²மபா⁴க³ங். ‘‘த³ஸபா⁴க³மத்த’’ந்தி இமினா தத³த்த²ங் த³ஸ்ஸேதி. த³த்வாதி ஸங்க⁴ஸ்ஸ த³த்வா. ஸோதி பி⁴க்கு². அகதாவாஸந்தி புப்³பே³ அகதங் நவங் ஸேனாஸனங். ஆராமந்தி ஸங்க⁴ஸ்ஸ ஆராமங். தேஹிபீதி நிஸ்ஸிதகேஹிபி. பிஸத்³தோ³ ஆசரியங் அபெக்க²தி. தேஸந்தி நிஸ்ஸிதகானங். ஜக்³கி³தகாலேதி ஜக்³கி³தானங் ருக்கா²னங் புப்ப²ப²லப⁴ரிதகாலே. ஜக்³க³னகாலேதி ஜக்³க³னமத்தகாலே, ஜக்³க³னமத்தமேவ, ந ஜக்³க³னகாரணா கிஞ்சி புப்ப²ங் வா ப²லங் வா ஹோதி, தஸ்மிங் காலேதி அத்தோ². ‘‘ப³ஹு’’ந்திஆதி³னா வாரேதப்³பா³காரங் த³ஸ்ஸேதி.
Tanti phalārāmaṃ. Soti paṭibalo bhikkhu. Bhāriyaṃ kammanti jagganakammaṃ bhāriyaṃ. Ettakenāti tatiyabhāgaupaḍḍhabhāgamattena. Sabbaṃ phalārāmanti sambandho. Mūlabhāganti paṭhamabhāgaṃ. ‘‘Dasabhāgamatta’’nti iminā tadatthaṃ dasseti. Datvāti saṅghassa datvā. Soti bhikkhu. Akatāvāsanti pubbe akataṃ navaṃ senāsanaṃ. Ārāmanti saṅghassa ārāmaṃ. Tehipīti nissitakehipi. Pisaddo ācariyaṃ apekkhati. Tesanti nissitakānaṃ. Jaggitakāleti jaggitānaṃ rukkhānaṃ pupphaphalabharitakāle. Jagganakāleti jagganamattakāle, jagganamattameva, na jagganakāraṇā kiñci pupphaṃ vā phalaṃ vā hoti, tasmiṃ kāleti attho. ‘‘Bahu’’ntiādinā vāretabbākāraṃ dasseti.
பா²திகம்மேன ஜக்³க³ந்தோ ந அத்தீ²தி யோஜனா. அனாபுச்சி²த்வாவாதி ஸங்க⁴ங் அனபலோகெத்வாவ. இதீதி ஏவங்.
Phātikammena jagganto na atthīti yojanā. Anāpucchitvāvāti saṅghaṃ anapaloketvāva. Itīti evaṃ.
ஞத்திகம்மட்டா²னபே⁴தே³ பன ஏவங் வினிச்ச²யோ வேதி³தப்³போ³தி யோஜனா. ஓஸாரேதி ஸங்க⁴மஜ்ஜ²ங் பவேஸேதி இமாய ஞத்தியாதி ஓஸாரணா.
Ñattikammaṭṭhānabhede pana evaṃ vinicchayo veditabboti yojanā. Osāreti saṅghamajjhaṃ paveseti imāya ñattiyāti osāraṇā.
நிஸ்ஸாரியதி ஸங்க⁴தோ ப³ஹி கரியதி இமாயாதி நிஸ்ஸாரணா. ஞத்தி உபோஸதோ² நாமாதி இத³ங் காரணூபசாரவஸேன வுத்தங். தேனாஹ ‘‘உபோஸத²கம்மவஸேன ட²பிதா’’தி. ஏஸேவ நயோ ஞத்திபவாரணா நாமாதி எத்தா²பி.
Nissāriyati saṅghato bahi kariyati imāyāti nissāraṇā. Ñatti uposatho nāmāti idaṃ kāraṇūpacāravasena vuttaṃ. Tenāha ‘‘uposathakammavasena ṭhapitā’’ti. Eseva nayo ñattipavāraṇā nāmāti etthāpi.
அனுஸாஸெய்யாதிஆதி³னா பட²மபுரிஸஎய்யவிப⁴த்திவஸேன ட²பிதா ஞத்தி அத்தனா பரங் ஸம்மனிதுங் ட²பிதா ஞத்தி நாம. அனுஸாஸெய்யந்திஆதி³னா உத்தமபுரிஸஎய்யங்விப⁴த்திவஸேன ட²பிதா ஞத்தி அத்தனாவ அத்தானங் ஸம்மனிதுங் ட²பிதா ஞத்தி நாம. அத்தனாவ அத்தா வா பரோ வா ஸம்மனியதி இமாய ஞத்தியாதி ஸம்முதி. நிஸ்ஸட்ட²பத்தசீவராதீ³னி தீ³யந்தி அனேனாதி தா³னங், ஞத்தி. வச்சங் அனபெக்கி²த்வா வாசகஸ்ஸ நியதனபுங்ஸகலிங்க³த்தா நபுங்ஸகலிங்க³வஸேன வுத்தங்.
Anusāseyyātiādinā paṭhamapurisaeyyavibhattivasena ṭhapitā ñatti attanā paraṃ sammanituṃ ṭhapitā ñatti nāma. Anusāseyyantiādinā uttamapurisaeyyaṃvibhattivasena ṭhapitā ñatti attanāva attānaṃ sammanituṃ ṭhapitā ñatti nāma. Attanāva attā vā paro vā sammaniyati imāya ñattiyāti sammuti. Nissaṭṭhapattacīvarādīni dīyanti anenāti dānaṃ, ñatti. Vaccaṃ anapekkhitvā vācakassa niyatanapuṃsakaliṅgattā napuṃsakaliṅgavasena vuttaṃ.
ஆபத்தி படிக்³க³ண்ஹியதி அனேனாதி படிக்³க³ஹோ.
Āpatti paṭiggaṇhiyati anenāti paṭiggaho.
படிமுக²ங் உபரி கட்³டி⁴யதி இமாயாதி பச்சுக்கட்³ட⁴னா.
Paṭimukhaṃ upari kaḍḍhiyati imāyāti paccukkaḍḍhanā.
கம்மமேவாதி லக்கி²யதி அனேனாதி கம்மலக்க²ணங்.
Kammamevāti lakkhiyati anenāti kammalakkhaṇaṃ.
‘‘ததா²’’தி பதே³ன ‘‘கம்மலக்க²ணங் நாமா’’தி பத³ங் அதிதி³ஸதி. ததோதி ஸப்³ப³ஸங்கா³ஹிகஞத்திதோ. பரா த்³வே ஞத்தியோ கம்மலக்க²ணங் நாமாதி யோஜனா. இதீதிஆதி³ நிக³மனங்.
‘‘Tathā’’ti padena ‘‘kammalakkhaṇaṃ nāmā’’ti padaṃ atidisati. Tatoti sabbasaṅgāhikañattito. Parā dve ñattiyo kammalakkhaṇaṃ nāmāti yojanā. Itītiādi nigamanaṃ.
ஞத்திது³தியகம்மட்டா²னபே⁴தே³ ஓஸாரணாதீ³னங் விஸேஸங் த³ஸ்ஸெந்தோ ஆஹ ‘‘வட்³ட⁴ஸ்ஸ லிச்ச²வினோ’’திஆதி³. ஸீமாஸம்முதி சாதிஆதி³னா யோஜனா காதப்³பா³.
Ñattidutiyakammaṭṭhānabhede osāraṇādīnaṃ visesaṃ dassento āha ‘‘vaḍḍhassa licchavino’’tiādi. Sīmāsammuti cātiādinā yojanā kātabbā.
யா பன த்³வே ஞத்திது³தியகம்மவாசா வுத்தாதி யோஜனா. இதீதிஆதி³ நிக³மனங்.
Yā pana dve ñattidutiyakammavācā vuttāti yojanā. Itītiādi nigamanaṃ.
ஞத்திசதுத்த²கம்மட்டா²னபே⁴தே³ யோஜனானயோ பாகடோயேவ.
Ñatticatutthakammaṭṭhānabhede yojanānayo pākaṭoyeva.
497. சதுவக்³க³கரணே கம்மேதிஆதி³காய தே³ஸனாய ஸம்ப³ந்த⁴ங் த³ஸ்ஸெந்தோ ஆஹ ‘‘இதி கம்மானி சா’’திஆதி³. தத்த² இதீதி ஏவங் த³ஸ்ஸெத்வாதி ஸம்ப³ந்தோ⁴. தஸ்ஸத்தோ²தி தஸ்ஸ ‘‘சதுவக்³க³கரணே கம்மே’’திஆதி³வசனஸ்ஸ அத்தோ² வேதி³தப்³போ³தி ஸம்ப³ந்தோ⁴.
497.Catuvaggakaraṇe kammetiādikāya desanāya sambandhaṃ dassento āha ‘‘iti kammāni cā’’tiādi. Tattha itīti evaṃ dassetvāti sambandho. Tassatthoti tassa ‘‘catuvaggakaraṇe kamme’’tiādivacanassa attho veditabboti sambandho.
இதி கம்மவக்³க³வண்ணனாய யோஜனா ஸமத்தா.
Iti kammavaggavaṇṇanāya yojanā samattā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi / 1. கம்மவக்³கோ³ • 1. Kammavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பரிவார-அட்ட²கதா² • Parivāra-aṭṭhakathā / அபலோகனகம்மகதா² • Apalokanakammakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / அபலோகனகம்மகதா²வண்ணனா • Apalokanakammakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / அபலோகனகம்மகதா²வண்ணனா • Apalokanakammakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / அபலோகனகம்மகதா²வண்ணனா • Apalokanakammakathāvaṇṇanā
