| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
অপলোকনকম্মকথা
Apalokanakammakathā
৪৯৫-৬. তত্থাতি চতূসু কম্মেসু। এত্থাতি ওসারণাদিপাঠে। পদসিলিট্ঠতাযাতি লোকে পদানং সিলিট্ঠভাৰতো। তত্থাতি ওসারণাদীসু পঞ্চসু। কণ্টকসামণেরস্স যা সা দণ্ডকম্মনাসনা অত্থি, সা নিস্সারণাতি যোজনা। ‘‘মিচ্ছাদিট্ঠিকো হোতী’’তি ৰত্ৰা তমেৰত্থং দস্সেতুং ‘‘অন্তগ্গাহিকায দিট্ঠিযা সমন্নাগতো’’তি ৰুত্তং। মিচ্ছাদিট্ঠি হি লিঙ্গনাসনায কারণং হোতি। সোতি সামণেরো, ‘‘নিস্সজ্জাপেতব্বো’’তি পদে কারিতকম্মং, ৰুত্তকম্মং ৰা। তং লদ্ধিন্তি ধাতুকম্মং, অৰুত্তকম্মং ৰা। কিন্তি কাতব্বন্তি আহ ‘‘এৰঞ্চ পন কম্মং কাতব্ব’’ন্তি।
495-6.Tatthāti catūsu kammesu. Etthāti osāraṇādipāṭhe. Padasiliṭṭhatāyāti loke padānaṃ siliṭṭhabhāvato. Tatthāti osāraṇādīsu pañcasu. Kaṇṭakasāmaṇerassa yā sā daṇḍakammanāsanā atthi, sā nissāraṇāti yojanā. ‘‘Micchādiṭṭhiko hotī’’ti vatvā tamevatthaṃ dassetuṃ ‘‘antaggāhikāya diṭṭhiyā samannāgato’’ti vuttaṃ. Micchādiṭṭhi hi liṅganāsanāya kāraṇaṃ hoti. Soti sāmaṇero, ‘‘nissajjāpetabbo’’ti pade kāritakammaṃ, vuttakammaṃ vā. Taṃ laddhinti dhātukammaṃ, avuttakammaṃ vā. Kinti kātabbanti āha ‘‘evañca pana kammaṃ kātabba’’nti.
কাতব্বাকারং দস্সেন্তো আহ ‘‘সঙ্ঘং ভন্তে’’তিআদি। যং সহসেয্যং লভন্তীতি যোজনা। তস্সাতি সহসেয্যস্স। অলাভাযাতি অলাভত্থায। ‘‘চর পিরে ৰিনস্সা’’তি ইমিনা নিস্সারণাকারং দস্সেতি। অত্থো পনস্স হেট্ঠা ৰুত্তোযেৰ।
Kātabbākāraṃ dassento āha ‘‘saṅghaṃ bhante’’tiādi. Yaṃ sahaseyyaṃ labhantīti yojanā. Tassāti sahaseyyassa. Alābhāyāti alābhatthāya. ‘‘Cara pire vinassā’’ti iminā nissāraṇākāraṃ dasseti. Attho panassa heṭṭhā vuttoyeva.
সোতি সমণেরো, ওসারেতব্বোতি সম্বন্ধো।
Soti samaṇero, osāretabboti sambandho.
স্ৰাযন্তি সো অযং সামণেরো, অচ্চযং দেসেতীতি সম্বন্ধো। সোরতোতি সুন্দরলদ্ধিযং রতো, দুলদ্ধিতো ৰা সুট্ঠু ওরতো। যথা পুরেতি যথা পুব্বে রুচ্চতি, তথাতি যোজনা। কাযসম্ভোগসামগ্গিদানন্তি কাযেন চ সম্ভোগেন চ সামগ্গিযা দানং।
Svāyanti so ayaṃ sāmaṇero, accayaṃ desetīti sambandho. Soratoti sundaraladdhiyaṃ rato, duladdhito vā suṭṭhu orato. Yathā pureti yathā pubbe ruccati, tathāti yojanā. Kāyasambhogasāmaggidānanti kāyena ca sambhogena ca sāmaggiyā dānaṃ.
এৰন্তিআদি নিগমনং। যস্মা পন ব্রহ্মদণ্ডো পঞ্চসতিকক্খন্ধকে (চূল়ৰ॰ ৪৪৫) ছন্নস্সেৰ পঞ্ঞত্তো, তস্মা তস্সেৰ দাতব্বোতি আহ ‘‘ন কেৰল’’ন্তিআদি। এসাতি ব্রহ্মদণ্ডো, অঞ্ঞোপি যো ভিক্খু ৰিহরতি, তস্সপি দাতব্বোতি সম্বন্ধো। কিন্তি দাতব্বোতি আহ ‘‘এৰঞ্চ পন দাতব্বো’’তি। দাতব্বাকারং দস্সেন্তো আহ ‘‘সঙ্ঘমজ্ঝে’’তিআদি।
Evantiādi nigamanaṃ. Yasmā pana brahmadaṇḍo pañcasatikakkhandhake (cūḷava. 445) channasseva paññatto, tasmā tasseva dātabboti āha ‘‘na kevala’’ntiādi. Esāti brahmadaṇḍo, aññopi yo bhikkhu viharati, tassapi dātabboti sambandho. Kinti dātabboti āha ‘‘evañca pana dātabbo’’ti. Dātabbākāraṃ dassento āha ‘‘saṅghamajjhe’’tiādi.
যং ৰচনং ইচ্ছেয্য, তং ৰচনন্তি যোজনা। খমাপেন্তস্সাতি সঙ্ঘং খমাপেন্তস্স তস্স ভিক্খুস্সাতি যোজনা।
Yaṃ vacanaṃ iccheyya, taṃ vacananti yojanā. Khamāpentassāti saṅghaṃ khamāpentassa tassa bhikkhussāti yojanā.
পটিসঙ্খাতি পটিসঙ্খায, ঞাণেন পচ্চৰেক্খিত্ৰাতি অত্থো।
Paṭisaṅkhāti paṭisaṅkhāya, ñāṇena paccavekkhitvāti attho.
যন্তি অৰন্দিযকম্মং, অনুঞ্ঞাতন্তি সম্বন্ধো। কেন অনুঞ্ঞাতন্তি আহ ‘‘ভগৰতা’’তি। কিস্মিং খন্ধকে অনুঞ্ঞাতন্তি আহ ‘‘ভিক্খুনিক্খন্ধকে’’তি। কেসু ৰত্থূসু অনুঞ্ঞাতন্তি আহ ‘‘তেন খো পন…পে॰… ইমেসু ৰত্থূসূ’’তি (চূল়ৰ॰ ৪১১)। কিং কত্ৰা অনুঞ্ঞাতন্তি আহ ‘‘দুক্কটং পঞ্ঞপেত্ৰা’’তি। কিন্তি অনুঞ্ঞাতন্তি আহ ‘‘অনুজানামি…পে॰… কাতব্বো’’তি। তস্সাতি অৰন্দিযস্স। ‘‘ন ওসারণাদীনী’’তি ইমিনা এৰসদ্দস্স ছড্ডেতব্বত্থং দস্সেতি। তস্সাতি কম্মলক্খণভূতস্স অৰন্দিযস্স। তত্থেৰাতি ভিক্খুনিক্খন্ধকেযেৰ। নন্তি কম্মলক্খণং। ইধাপীতি পরিৰারে কম্মৰগ্গেপি।
Yanti avandiyakammaṃ, anuññātanti sambandho. Kena anuññātanti āha ‘‘bhagavatā’’ti. Kismiṃ khandhake anuññātanti āha ‘‘bhikkhunikkhandhake’’ti. Kesu vatthūsu anuññātanti āha ‘‘tena kho pana…pe… imesu vatthūsū’’ti (cūḷava. 411). Kiṃ katvā anuññātanti āha ‘‘dukkaṭaṃ paññapetvā’’ti. Kinti anuññātanti āha ‘‘anujānāmi…pe… kātabbo’’ti. Tassāti avandiyassa. ‘‘Na osāraṇādīnī’’ti iminā evasaddassa chaḍḍetabbatthaṃ dasseti. Tassāti kammalakkhaṇabhūtassa avandiyassa. Tatthevāti bhikkhunikkhandhakeyeva. Nanti kammalakkhaṇaṃ. Idhāpīti parivāre kammavaggepi.
অপাসাদিকন্তি অপসাদাৰহং, অপসাদজনকং ৰা।
Apāsādikanti apasādāvahaṃ, apasādajanakaṃ vā.
ততোতি অৰন্দিযকরণতো। ইমন্তি ভিক্খুং। ৰন্দিযন্তি ৰন্দিতব্বং, ৰন্দনং ৰা।
Tatoti avandiyakaraṇato. Imanti bhikkhuṃ. Vandiyanti vanditabbaṃ, vandanaṃ vā.
এত্থাতি অপলোকনকম্মে, ভিক্খুনিসঙ্ঘমূলকং কত্ৰা পঞ্ঞত্তন্তি যোজনা। ভিক্খুসঙ্ঘস্সাপীতি পিসদ্দো ন ভিক্খুনিসঙ্ঘস্সেৰাতি দস্সেতি। পনসদ্দো সম্ভাৰনত্থো, তথা ভিক্খুনিসঙ্ঘমূলকং পঞ্ঞত্তম্পীতি অত্থো, লভিতব্বভাৰং ৰিত্থারেন দস্সেন্তো আহ ‘‘যং হী’’তিআদি। যং অপলোকনকম্মং করোতীতি যোজনা। অপ্পমত্তকৰিস্সজ্জকেন পন দাতব্বানীতি সম্বন্ধো। তেসন্তি সূচিআদীনং। সোযেৰাতি অপ্পমত্তকৰিস্সজ্জকোযেৰ। ততোতি অপ্পমত্তকতো। তত্থাতি সেনাসনক্খন্ধকৰণ্ণনাযং (চূল়ৰ॰ অট্ঠ॰ ৩২১)। ৰুত্তপ্পকারং গিলানভেসজ্জম্পীতি সম্বন্ধো। যোপি চাতি ভিক্খুপি চ হোতীতি সম্বন্ধো। তস্স দাতব্বাতি সম্বন্ধো। তত্রুপ্পাদতোতি তস্মিং মহাৰাসে উপ্পাদপচ্চযতো, গহেত্ৰাতি সম্বন্ধো। ‘‘পেসলস্সা’’তিআদিনা দুস্সীলাদীনং দাতুং ন ৰট্টতীতি দস্সেতি।
Etthāti apalokanakamme, bhikkhunisaṅghamūlakaṃ katvā paññattanti yojanā. Bhikkhusaṅghassāpīti pisaddo na bhikkhunisaṅghassevāti dasseti. Panasaddo sambhāvanattho, tathā bhikkhunisaṅghamūlakaṃ paññattampīti attho, labhitabbabhāvaṃ vitthārena dassento āha ‘‘yaṃ hī’’tiādi. Yaṃ apalokanakammaṃ karotīti yojanā. Appamattakavissajjakena pana dātabbānīti sambandho. Tesanti sūciādīnaṃ. Soyevāti appamattakavissajjakoyeva. Tatoti appamattakato. Tatthāti senāsanakkhandhakavaṇṇanāyaṃ (cūḷava. aṭṭha. 321). Vuttappakāraṃ gilānabhesajjampīti sambandho. Yopi cāti bhikkhupi ca hotīti sambandho. Tassa dātabbāti sambandho. Tatruppādatoti tasmiṃ mahāvāse uppādapaccayato, gahetvāti sambandho. ‘‘Pesalassā’’tiādinā dussīlādīnaṃ dātuṃ na vaṭṭatīti dasseti.
জগ্গাপেতুং ৰট্টতীতি এত্থ অপুচ্ছিত্ৰা জগ্গাপেতুং ৰট্টতীতি আহ ‘‘অযং ভিক্খূ’’তিআদি। ওদিস্সাতি উদ্দিসিত্ৰা।
Jaggāpetuṃ vaṭṭatīti ettha apucchitvā jaggāpetuṃ vaṭṭatīti āha ‘‘ayaṃ bhikkhū’’tiādi. Odissāti uddisitvā.
আসনঘরং ৰাতি পটিমাঘরং ৰা, কারকো মনুস্সোতি সম্বন্ধো। উপনিক্খেপতো গহেত্ৰাতি সম্বন্ধো। সঙ্ঘিকেনপীতি পিসদ্দো ন কেৰলং চেতিযস্স উপনিক্খেপেনেৰ, অথ খো সঙ্ঘিকেনপীতি দস্সেতি।
Āsanagharaṃ vāti paṭimāgharaṃ vā, kārako manussoti sambandho. Upanikkhepato gahetvāti sambandho. Saṅghikenapīti pisaddo na kevalaṃ cetiyassa upanikkhepeneva, atha kho saṅghikenapīti dasseti.
যাপনমত্তং অলভন্তেহি করোন্তেহীতি যোজনা, পরিভুঞ্জন্তেহি হুত্ৰাতি সম্বন্ধো। ‘‘ৰত্তং করোমা’’তিআদিনা ‘‘যাপনমত্ত’’ন্তি পদস্স অত্থং দস্সেতি। ৰিহারে রোপিতা যে ফলরুক্খাতি যোজনা। যেসন্তি রুক্খানং। তেসূতি রুক্খেসু। যে পনাতি রুক্খা পন, অপরিগ্গহিতা হোন্তীতি সম্বন্ধো। তং পনাতি অপলোকনকম্মং পন। সলাকং গণ্হন্তি এত্থাতি সলাকগ্গং, ঠানং। ‘‘যাগগ্গভত্তগ্গ’’ইতি এত্থাপি এসেৰ নযো। উপোসথগ্গেতি উপোসথস্স গহণট্ঠানে, উপোসথগেহেতি অত্থো। তত্থাতি উপোসথগ্গে। তন্তি অপলোকনকম্মং।
Yāpanamattaṃ alabhantehi karontehīti yojanā, paribhuñjantehi hutvāti sambandho. ‘‘Vattaṃ karomā’’tiādinā ‘‘yāpanamatta’’nti padassa atthaṃ dasseti. Vihāre ropitā ye phalarukkhāti yojanā. Yesanti rukkhānaṃ. Tesūti rukkhesu. Ye panāti rukkhā pana, apariggahitā hontīti sambandho. Taṃ panāti apalokanakammaṃ pana. Salākaṃ gaṇhanti etthāti salākaggaṃ, ṭhānaṃ. ‘‘Yāgaggabhattagga’’iti etthāpi eseva nayo. Uposathaggeti uposathassa gahaṇaṭṭhāne, uposathageheti attho. Tatthāti uposathagge. Tanti apalokanakammaṃ.
যং মূলতচপত্তঅঙ্কুরপুপ্ফফলখাদনীযাদীতি যোজনা। অন্তোসীমাযাতি অন্তো উপচারসীমায।
Yaṃ mūlatacapattaaṅkurapupphaphalakhādanīyādīti yojanā. Antosīmāyāti anto upacārasīmāya.
সুকতমেৰাতি সঙ্ঘেন কতমেৰ। উপোসথদিৰসেতি নিদস্সনমত্তং যস্মিং কস্মিংচি দিৰসেপি কতত্তা।
Sukatamevāti saṅghena katameva. Uposathadivaseti nidassanamattaṃ yasmiṃ kasmiṃci divasepi katattā.
ফলৰারেনাতি রুক্খানং ফলগহণৰারেন। রুক্খা ধরন্তীতি রুক্খা তিট্ঠন্তি, সংৰিজ্জন্তি ৰা । যেহীতি ভিক্খূহি রোপিতা, হোন্তীতি সম্বন্ধো। সা এৰ কতিকাতি পুব্বে কতা সা এৰ কতিকা, অঞ্ঞা কতিকা ন কাতব্বাতি অধিপ্পাযো।
Phalavārenāti rukkhānaṃ phalagahaṇavārena. Rukkhā dharantīti rukkhā tiṭṭhanti, saṃvijjanti vā . Yehīti bhikkhūhi ropitā, hontīti sambandho. Sā eva katikāti pubbe katā sā eva katikā, aññā katikā na kātabbāti adhippāyo.
অঞ্ঞস্মিং ৰিহারেতি রুক্খানং ঠিতৰিহারতো অঞ্ঞস্মিং ৰিহারে। তেসন্তি রুক্খানং, সামীতি সম্বন্ধো। যেপীতি রুক্খাপি, রোপিতাতি সম্বন্ধো। অঞ্ঞতো ঠানতোতি যোজনা। তেসূতি রুক্খেসু। এত্থাতি ৰিহারে। তেহি পনাতি পরিৰেণসামিকেহি ভিক্খূহি পন। দসভাগন্তি দসমভাগং। ‘‘এসেৰ নযো’’তি ইমিনা দসভাগং দত্ৰাতি অত্থং অতিদিসতি।
Aññasmiṃ vihāreti rukkhānaṃ ṭhitavihārato aññasmiṃ vihāre. Tesanti rukkhānaṃ, sāmīti sambandho. Yepīti rukkhāpi, ropitāti sambandho. Aññato ṭhānatoti yojanā. Tesūti rukkhesu. Etthāti vihāre. Tehi panāti pariveṇasāmikehi bhikkhūhi pana. Dasabhāganti dasamabhāgaṃ. ‘‘Eseva nayo’’ti iminā dasabhāgaṃ datvāti atthaṃ atidisati.
সম্ভাৰনীযভিক্খুনোতি সীলসুতাদীহি সম্ভাৰনীযস্স ভিক্খুনো। তত্থাতি পোরাণৰিহারে। মূলেতি পুব্বে, আদিকালেতি অত্থো। নিক্কুক্কুচ্চেনাতি ‘‘অভাজিতমিদ’’ন্তি কুক্কুচ্চৰিরহেন। খিয্যনমত্তমেৰ তন্তি তং খিয্যনং খিয্যনমত্তমেৰ, ন সামণেরানং খিয্যনং রুহতীতি অত্থো।
Sambhāvanīyabhikkhunoti sīlasutādīhi sambhāvanīyassa bhikkhuno. Tatthāti porāṇavihāre. Mūleti pubbe, ādikāleti attho. Nikkukkuccenāti ‘‘abhājitamida’’nti kukkuccavirahena. Khiyyanamattameva tanti taṃ khiyyanaṃ khiyyanamattameva, na sāmaṇerānaṃ khiyyanaṃ ruhatīti attho.
পনসরুক্খন্তি কণ্টকীফলরুক্খং। অযং সামীচীতি অযং ভাজেত্ৰা খাদনং অনুধম্মতা। খাযিতন্তি খাদিতং। দ্ৰিন্নং তিণ্ণং কতিকপটিপ্পস্সম্ভনং নযেন ঞাতুং সক্কুণেয্যত্তা তং অদস্সেত্ৰা একস্সেৰ কতিকপটিপ্পস্সম্ভনং দস্সেন্তো আহ ‘‘একভিক্খুকে পনা’’তিআদি। পুরিমকতিকাতি ‘‘যথাসুখং পরিভুঞ্জিতুং রুচ্চতী’’তি (পরি॰ অট্ঠ॰ ৪৯৫-৪৯৬) পুরে কতা কতিকা। তেসন্তি সামণেরানং, ফাতিকম্মন্তি সম্বন্ধো। ভাজেত্ৰাতি সামণেরানং ভাজেত্ৰা। ইমিনা সামণেরানং ফাতিকম্মং ন দাতব্বম্পি ভাগং ভাজেতব্বন্তি দস্সেতি।
Panasarukkhanti kaṇṭakīphalarukkhaṃ. Ayaṃ sāmīcīti ayaṃ bhājetvā khādanaṃ anudhammatā. Khāyitanti khāditaṃ. Dvinnaṃ tiṇṇaṃ katikapaṭippassambhanaṃ nayena ñātuṃ sakkuṇeyyattā taṃ adassetvā ekasseva katikapaṭippassambhanaṃ dassento āha ‘‘ekabhikkhuke panā’’tiādi. Purimakatikāti ‘‘yathāsukhaṃ paribhuñjituṃ ruccatī’’ti (pari. aṭṭha. 495-496) pure katā katikā. Tesanti sāmaṇerānaṃ, phātikammanti sambandho. Bhājetvāti sāmaṇerānaṃ bhājetvā. Iminā sāmaṇerānaṃ phātikammaṃ na dātabbampi bhāgaṃ bhājetabbanti dasseti.
সামন্তগামেহীতি আসন্নগামেহি, আগন্ত্ৰাতি সম্বন্ধো। একং অম্বং একং লবুজন্তি যোজনা। অদিয্যমানে দোসে দস্সিতে দিয্যমানে আনিসংসম্পি অত্থতো ঞাতব্বন্তি দস্সেন্তো আহ ‘‘অদিয্যমানে হী’’তিআদি।
Sāmantagāmehīti āsannagāmehi, āgantvāti sambandho. Ekaṃ ambaṃ ekaṃ labujanti yojanā. Adiyyamāne dose dassite diyyamāne ānisaṃsampi atthato ñātabbanti dassento āha ‘‘adiyyamāne hī’’tiādi.
গণ্হন্তানং মনুস্সানন্তি সম্বন্ধো। ততোতি কতিকৰত্তট্ঠপনতো। ন ৰত্তব্বাতি ফলদানকুলদূসকত্তা ন ৰত্তব্বা। কিন্তি আচিক্খিতব্বন্তি আহ ‘‘নাল়িকেরাদীনী’’তিআদি। অনুৰিচরিত্ৰাতি পদানমনুক্কমেন ৰিচরিত্ৰা। উপড্ঢভাগোতি ভিক্খূনং লদ্ধভাগতো উপড্ঢো ভাগো। অপলোকেত্ৰাতি সঙ্ঘং আপুচ্ছিত্ৰা।
Gaṇhantānaṃ manussānanti sambandho. Tatoti katikavattaṭṭhapanato. Na vattabbāti phaladānakuladūsakattā na vattabbā. Kinti ācikkhitabbanti āha ‘‘nāḷikerādīnī’’tiādi. Anuvicaritvāti padānamanukkamena vicaritvā. Upaḍḍhabhāgoti bhikkhūnaṃ laddhabhāgato upaḍḍho bhāgo. Apaloketvāti saṅghaṃ āpucchitvā.
মগ্গগমিযসত্থৰাহোতি মগ্গং গমিকো সত্থৰাহো। সোতি বলক্কারেন গহেত্ৰা খাদন্তো। ছাযাদীনন্তিআদিসদ্দেন আরামৰনানি সঙ্গহেতব্বানি। সচে অত্থীতি সচে অত্থো অত্থি। ফলভরিতাতি ফলেন পরিপুণ্ণা। ‘‘ফলভারিতা’’তিপি পাঠো। ফলসঙ্খাতেন ভারেন সমন্নাগতাতি অত্থো। অপচ্চাসীসন্তেনাতি তেসং সন্তিকা দানপটিদানং অপচ্চাসীসন্তেন। পুব্বে ৰুত্তমেৰাতি পুব্বে সঙ্ঘিকট্ঠানে ‘‘কুদ্ধো হি সো’’তিআদিনা ৰুত্তমেৰ। এত্থাতি পুগ্গলিকট্ঠানে।
Maggagamiyasatthavāhoti maggaṃ gamiko satthavāho. Soti balakkārena gahetvā khādanto. Chāyādīnantiādisaddena ārāmavanāni saṅgahetabbāni. Sace atthīti sace attho atthi. Phalabharitāti phalena paripuṇṇā. ‘‘Phalabhāritā’’tipi pāṭho. Phalasaṅkhātena bhārena samannāgatāti attho. Apaccāsīsantenāti tesaṃ santikā dānapaṭidānaṃ apaccāsīsantena. Pubbe vuttamevāti pubbe saṅghikaṭṭhāne ‘‘kuddho hi so’’tiādinā vuttameva. Etthāti puggalikaṭṭhāne.
তন্তি ফলারামং। সোতি পটিবলো ভিক্খু। ভারিযং কম্মন্তি জগ্গনকম্মং ভারিযং। এত্তকেনাতি ততিযভাগউপড্ঢভাগমত্তেন। সব্বং ফলারামন্তি সম্বন্ধো। মূলভাগন্তি পঠমভাগং। ‘‘দসভাগমত্ত’’ন্তি ইমিনা তদত্থং দস্সেতি। দত্ৰাতি সঙ্ঘস্স দত্ৰা। সোতি ভিক্খু। অকতাৰাসন্তি পুব্বে অকতং নৰং সেনাসনং। আরামন্তি সঙ্ঘস্স আরামং। তেহিপীতি নিস্সিতকেহিপি। পিসদ্দো আচরিযং অপেক্খতি। তেসন্তি নিস্সিতকানং। জগ্গিতকালেতি জগ্গিতানং রুক্খানং পুপ্ফফলভরিতকালে। জগ্গনকালেতি জগ্গনমত্তকালে, জগ্গনমত্তমেৰ, ন জগ্গনকারণা কিঞ্চি পুপ্ফং ৰা ফলং ৰা হোতি, তস্মিং কালেতি অত্থো। ‘‘বহু’’ন্তিআদিনা ৰারেতব্বাকারং দস্সেতি।
Tanti phalārāmaṃ. Soti paṭibalo bhikkhu. Bhāriyaṃ kammanti jagganakammaṃ bhāriyaṃ. Ettakenāti tatiyabhāgaupaḍḍhabhāgamattena. Sabbaṃ phalārāmanti sambandho. Mūlabhāganti paṭhamabhāgaṃ. ‘‘Dasabhāgamatta’’nti iminā tadatthaṃ dasseti. Datvāti saṅghassa datvā. Soti bhikkhu. Akatāvāsanti pubbe akataṃ navaṃ senāsanaṃ. Ārāmanti saṅghassa ārāmaṃ. Tehipīti nissitakehipi. Pisaddo ācariyaṃ apekkhati. Tesanti nissitakānaṃ. Jaggitakāleti jaggitānaṃ rukkhānaṃ pupphaphalabharitakāle. Jagganakāleti jagganamattakāle, jagganamattameva, na jagganakāraṇā kiñci pupphaṃ vā phalaṃ vā hoti, tasmiṃ kāleti attho. ‘‘Bahu’’ntiādinā vāretabbākāraṃ dasseti.
ফাতিকম্মেন জগ্গন্তো ন অত্থীতি যোজনা। অনাপুচ্ছিত্ৰাৰাতি সঙ্ঘং অনপলোকেত্ৰাৰ। ইতীতি এৰং।
Phātikammena jagganto na atthīti yojanā. Anāpucchitvāvāti saṅghaṃ anapaloketvāva. Itīti evaṃ.
ঞত্তিকম্মট্ঠানভেদে পন এৰং ৰিনিচ্ছযো ৰেদিতব্বোতি যোজনা। ওসারেতি সঙ্ঘমজ্ঝং পৰেসেতি ইমায ঞত্তিযাতি ওসারণা।
Ñattikammaṭṭhānabhede pana evaṃ vinicchayo veditabboti yojanā. Osāreti saṅghamajjhaṃ paveseti imāya ñattiyāti osāraṇā.
নিস্সারিযতি সঙ্ঘতো বহি করিযতি ইমাযাতি নিস্সারণা। ঞত্তি উপোসথো নামাতি ইদং কারণূপচারৰসেন ৰুত্তং। তেনাহ ‘‘উপোসথকম্মৰসেন ঠপিতা’’তি। এসেৰ নযো ঞত্তিপৰারণা নামাতি এত্থাপি।
Nissāriyati saṅghato bahi kariyati imāyāti nissāraṇā. Ñatti uposatho nāmāti idaṃ kāraṇūpacāravasena vuttaṃ. Tenāha ‘‘uposathakammavasena ṭhapitā’’ti. Eseva nayo ñattipavāraṇā nāmāti etthāpi.
অনুসাসেয্যাতিআদিনা পঠমপুরিসএয্যৰিভত্তিৰসেন ঠপিতা ঞত্তি অত্তনা পরং সম্মনিতুং ঠপিতা ঞত্তি নাম। অনুসাসেয্যন্তিআদিনা উত্তমপুরিসএয্যংৰিভত্তিৰসেন ঠপিতা ঞত্তি অত্তনাৰ অত্তানং সম্মনিতুং ঠপিতা ঞত্তি নাম। অত্তনাৰ অত্তা ৰা পরো ৰা সম্মনিযতি ইমায ঞত্তিযাতি সম্মুতি। নিস্সট্ঠপত্তচীৰরাদীনি দীযন্তি অনেনাতি দানং, ঞত্তি। ৰচ্চং অনপেক্খিত্ৰা ৰাচকস্স নিযতনপুংসকলিঙ্গত্তা নপুংসকলিঙ্গৰসেন ৰুত্তং।
Anusāseyyātiādinā paṭhamapurisaeyyavibhattivasena ṭhapitā ñatti attanā paraṃ sammanituṃ ṭhapitā ñatti nāma. Anusāseyyantiādinā uttamapurisaeyyaṃvibhattivasena ṭhapitā ñatti attanāva attānaṃ sammanituṃ ṭhapitā ñatti nāma. Attanāva attā vā paro vā sammaniyati imāya ñattiyāti sammuti. Nissaṭṭhapattacīvarādīni dīyanti anenāti dānaṃ, ñatti. Vaccaṃ anapekkhitvā vācakassa niyatanapuṃsakaliṅgattā napuṃsakaliṅgavasena vuttaṃ.
আপত্তি পটিগ্গণ্হিযতি অনেনাতি পটিগ্গহো।
Āpatti paṭiggaṇhiyati anenāti paṭiggaho.
পটিমুখং উপরি কড্ঢিযতি ইমাযাতি পচ্চুক্কড্ঢনা।
Paṭimukhaṃ upari kaḍḍhiyati imāyāti paccukkaḍḍhanā.
কম্মমেৰাতি লক্খিযতি অনেনাতি কম্মলক্খণং।
Kammamevāti lakkhiyati anenāti kammalakkhaṇaṃ.
‘‘তথা’’তি পদেন ‘‘কম্মলক্খণং নামা’’তি পদং অতিদিসতি। ততোতি সব্বসঙ্গাহিকঞত্তিতো। পরা দ্ৰে ঞত্তিযো কম্মলক্খণং নামাতি যোজনা। ইতীতিআদি নিগমনং।
‘‘Tathā’’ti padena ‘‘kammalakkhaṇaṃ nāmā’’ti padaṃ atidisati. Tatoti sabbasaṅgāhikañattito. Parā dve ñattiyo kammalakkhaṇaṃ nāmāti yojanā. Itītiādi nigamanaṃ.
ঞত্তিদুতিযকম্মট্ঠানভেদে ওসারণাদীনং ৰিসেসং দস্সেন্তো আহ ‘‘ৰড্ঢস্স লিচ্ছৰিনো’’তিআদি। সীমাসম্মুতি চাতিআদিনা যোজনা কাতব্বা।
Ñattidutiyakammaṭṭhānabhede osāraṇādīnaṃ visesaṃ dassento āha ‘‘vaḍḍhassa licchavino’’tiādi. Sīmāsammuti cātiādinā yojanā kātabbā.
যা পন দ্ৰে ঞত্তিদুতিযকম্মৰাচা ৰুত্তাতি যোজনা। ইতীতিআদি নিগমনং।
Yā pana dve ñattidutiyakammavācā vuttāti yojanā. Itītiādi nigamanaṃ.
ঞত্তিচতুত্থকম্মট্ঠানভেদে যোজনানযো পাকটোযেৰ।
Ñatticatutthakammaṭṭhānabhede yojanānayo pākaṭoyeva.
৪৯৭. চতুৰগ্গকরণে কম্মেতিআদিকায দেসনায সম্বন্ধং দস্সেন্তো আহ ‘‘ইতি কম্মানি চা’’তিআদি। তত্থ ইতীতি এৰং দস্সেত্ৰাতি সম্বন্ধো। তস্সত্থোতি তস্স ‘‘চতুৰগ্গকরণে কম্মে’’তিআদিৰচনস্স অত্থো ৰেদিতব্বোতি সম্বন্ধো।
497.Catuvaggakaraṇe kammetiādikāya desanāya sambandhaṃ dassento āha ‘‘iti kammāni cā’’tiādi. Tattha itīti evaṃ dassetvāti sambandho. Tassatthoti tassa ‘‘catuvaggakaraṇe kamme’’tiādivacanassa attho veditabboti sambandho.
ইতি কম্মৰগ্গৰণ্ণনায যোজনা সমত্তা।
Iti kammavaggavaṇṇanāya yojanā samattā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / ১. কম্মৰগ্গো • 1. Kammavaggo
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / অপলোকনকম্মকথা • Apalokanakammakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / অপলোকনকম্মকথাৰণ্ণনা • Apalokanakammakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / অপলোকনকম্মকথাৰণ্ণনা • Apalokanakammakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / অপলোকনকম্মকথাৰণ্ণনা • Apalokanakammakathāvaṇṇanā
