| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
அபலோகனகம்மகதா²வண்ணனா
Apalokanakammakathāvaṇṇanā
495-6. காயஸம்போ⁴க³ஸாமக்³கி³தா³னஸஹஸெய்யபடிக்³க³ஹணாதி³ இமஸ்ஸ அபலோகனகம்மஸ்ஸ டா²னங் ஹோதீதி ஏவம்பி அபலோகனகம்மங் பவத்ததீதி அத்தோ². கம்மஞ்ஞேவ லக்க²ணந்தி கம்மலக்க²ணங். ஓஸாரணனிஸ்ஸாரணப⁴ண்டு³கம்மாத³யோ விய கம்மஞ்ச ஹுத்வா அஞ்ஞஞ்ச நாமங் ந லப⁴தி , கம்மமேவ ஹுத்வா உபலக்கீ²யதீதி கம்மலக்க²ணங் உபனிஸ்ஸயோ விய. ஹேதுபச்சயாதி³லக்க²ணவிமுத்தோ ஹி ஸப்³போ³ பச்சயவிஸேஸோ தத்த² ஸங்க³ய்ஹதி, ஏவம்பி ‘‘கம்மலக்க²ணமேவா’’தி வுத்தங். கம்மலக்க²ணங் த³ஸ்ஸேதுங் ‘‘அச்சி²ன்னசீவரஜிண்ணசீவரனட்ட²சீவரான’’ந்திஆதி³ வுத்தங். ‘‘ததோ அதிரேகங் தெ³ந்தேன அபலோகெத்வா தா³தப்³ப³’’ந்தி வுத்தங் அபலோகனங் கம்மலக்க²ணமேவ. ஏவங் ஸப்³ப³த்த² லக்க²ணங் வேதி³தப்³ப³ங். இணபலிபோ³த⁴ம்பீதி ஸசே தாதி³ஸங் பி⁴க்கு²ங் இணாயிகா பலிபு³ஜ்ஜ²ந்தி. தத்ருப்பாத³தோ தா³துங் வட்டதி. அந்தரஸன்னிபாதோதி உபோஸத²ப்பவாரணாதி³மஹாஸன்னிபாதே ட²பெத்வா அந்தரா மங்க³லுச்சாரணாதி³. உபனிக்கே²பதோதி சேதியஸ்ஸ ஆபத³த்தா²ய நிக்கி²த்ததோ. ‘‘அஞ்ஞா கதிகா காதப்³பா³’’தி யே ருக்கே² உத்³தி³ஸ்ஸ புப்³பே³ கதிகா கதா, தேஹி இமேஸங் அஞ்ஞத்தாதி வுத்தங். ‘‘ஸசே தத்த² மூலே’’தி புப்³பே³ ‘‘இதோ பட்டா²ய பா⁴ஜெத்வா கா²த³ந்தூ’’தி வசனேன புக்³க³லிகபரிபோ⁴கோ³ படிக்கி²த்தோ ஹோதி. அனுவிசரித்வாதி பச்ச²தோ பச்ச²தோ க³ந்த்வா. தேஸங் ஸந்திகா பச்சயங் பச்சாஸீஸந்தேனாதி அத்தோ². மூலபா⁴க³ந்தி த³ஸமபா⁴க³ங் கத்வா. புப்³ப³காலே த³ஸமபா⁴க³ங் கத்வா அத³ங்ஸு, தஸ்மா ‘‘மூலபா⁴கோ³’’தி வுத்தங். அகதாவாஸங் வா கத்வாதி உப்பன்னஆயேன. ஜக்³கி³தகாலேயேவ ந வாரேதப்³பா³தி ஜக்³கி³தா ஹுத்வா புப்ப²ப²லப⁴ரிதகாலேதி அத்தோ². ஜக்³க³னகாலேதி ஜக்³கி³துங் ஆரத்³த⁴காலே. ஞத்திகம்மட்டா²னபே⁴தே³ பனாதி ஞத்திகம்மஸ்ஸ டா²னபே⁴தே³.
495-6. Kāyasambhogasāmaggidānasahaseyyapaṭiggahaṇādi imassa apalokanakammassa ṭhānaṃ hotīti evampi apalokanakammaṃ pavattatīti attho. Kammaññeva lakkhaṇanti kammalakkhaṇaṃ. Osāraṇanissāraṇabhaṇḍukammādayo viya kammañca hutvā aññañca nāmaṃ na labhati , kammameva hutvā upalakkhīyatīti kammalakkhaṇaṃ upanissayo viya. Hetupaccayādilakkhaṇavimutto hi sabbo paccayaviseso tattha saṅgayhati, evampi ‘‘kammalakkhaṇamevā’’ti vuttaṃ. Kammalakkhaṇaṃ dassetuṃ ‘‘acchinnacīvarajiṇṇacīvaranaṭṭhacīvarāna’’ntiādi vuttaṃ. ‘‘Tato atirekaṃ dentena apaloketvā dātabba’’nti vuttaṃ apalokanaṃ kammalakkhaṇameva. Evaṃ sabbattha lakkhaṇaṃ veditabbaṃ. Iṇapalibodhampīti sace tādisaṃ bhikkhuṃ iṇāyikā palibujjhanti. Tatruppādato dātuṃ vaṭṭati. Antarasannipātoti uposathappavāraṇādimahāsannipāte ṭhapetvā antarā maṅgaluccāraṇādi. Upanikkhepatoti cetiyassa āpadatthāya nikkhittato. ‘‘Aññā katikā kātabbā’’ti ye rukkhe uddissa pubbe katikā katā, tehi imesaṃ aññattāti vuttaṃ. ‘‘Sace tattha mūle’’ti pubbe ‘‘ito paṭṭhāya bhājetvā khādantū’’ti vacanena puggalikaparibhogo paṭikkhitto hoti. Anuvicaritvāti pacchato pacchato gantvā. Tesaṃ santikā paccayaṃ paccāsīsantenāti attho. Mūlabhāganti dasamabhāgaṃ katvā. Pubbakāle dasamabhāgaṃ katvā adaṃsu, tasmā ‘‘mūlabhāgo’’ti vuttaṃ. Akatāvāsaṃ vā katvāti uppannaāyena. Jaggitakāleyeva na vāretabbāti jaggitā hutvā pupphaphalabharitakāleti attho. Jagganakāleti jaggituṃ āraddhakāle. Ñattikammaṭṭhānabhede panāti ñattikammassa ṭhānabhede.
இத³ங் பனெத்த² பகிண்ணகங் – அத்தி² ஸங்க⁴கம்மங் ஸங்கோ⁴ ஏவ கரோதி, ந க³ணோ, ந புக்³க³லோ, தங் அபலோகனகம்மஸ்ஸ கம்மலக்க²ணேகதே³ஸங் ட²பெத்வா இதரங் சதுப்³பி³த⁴ம்பி கம்மங் வேதி³தப்³ப³ங். அத்தி² ஸங்க⁴கம்மங் ஸங்கோ⁴ ச கரோதி, க³ணோ ச கரோதி, புக்³க³லோ ச கரோதி, தங் புப்³பே³ ட²பிதங். வுத்தஞ்ஹேதங் ‘‘யஸ்மிங் விஹாரே த்³வே தயோ ஜனா வஸந்தி, தேஹி நிஸீதி³த்வா கதம்பி ஸங்கே⁴ன கதஸதி³ஸமேவ. யஸ்மிங் பன விஹாரே ஏகோ பி⁴க்கு² ஹோதி, தேன பி⁴க்கு²னா’’திஆதி³ (பரி॰ அட்ட²॰ 495-496). அத்தி² க³ணகம்மங் ஸங்கோ⁴ ச கரோதி, க³ணோ ச கரோதி, புக்³க³லோ ச கரோதி, தங் யோ பாரிஸுத்³தி⁴உபோஸதோ² அஞ்ஞேஸங் ஸந்திகே கரீயதி, தஸ்ஸ வஸேன வேதி³தப்³ப³ங். அத்தி² க³ணகம்மங் க³ணோவ கரோதி, ந ஸங்கோ⁴, ந புக்³க³லோ, தங் யோ பாரிஸுத்³தி⁴உபோஸதோ² அஞ்ஞமஞ்ஞங் ஆரோசனவஸேன கரீயதி, தஸ்ஸ வஸேன வேதி³தப்³ப³ங். அத்தி² புக்³க³லகம்மங் புக்³க³லோவ கரோதி, ந ஸங்கோ⁴, ந க³ணோ, தங் அதி⁴ட்டா²னுபோஸத²வஸேன வேதி³தப்³ப³ங். அத்தி² க³ணகம்மங் ஏகச்சோவ க³ணோ கரோதி, ஏகச்சோ ந கரோதி, தத்த² அஞத்திகங் த்³வேயேவ கரொந்தி, ந தயோ. ஸஞத்திகங் தயோவ கரொந்தி, ந ததோ ஊனா வா அதி⁴கா வாதி.
Idaṃ panettha pakiṇṇakaṃ – atthi saṅghakammaṃ saṅgho eva karoti, na gaṇo, na puggalo, taṃ apalokanakammassa kammalakkhaṇekadesaṃ ṭhapetvā itaraṃ catubbidhampi kammaṃ veditabbaṃ. Atthi saṅghakammaṃ saṅgho ca karoti, gaṇo ca karoti, puggalo ca karoti, taṃ pubbe ṭhapitaṃ. Vuttañhetaṃ ‘‘yasmiṃ vihāre dve tayo janā vasanti, tehi nisīditvā katampi saṅghena katasadisameva. Yasmiṃ pana vihāre eko bhikkhu hoti, tena bhikkhunā’’tiādi (pari. aṭṭha. 495-496). Atthi gaṇakammaṃ saṅgho ca karoti, gaṇo ca karoti, puggalo ca karoti, taṃ yo pārisuddhiuposatho aññesaṃ santike karīyati, tassa vasena veditabbaṃ. Atthi gaṇakammaṃ gaṇova karoti, na saṅgho, na puggalo, taṃ yo pārisuddhiuposatho aññamaññaṃ ārocanavasena karīyati, tassa vasena veditabbaṃ. Atthi puggalakammaṃ puggalova karoti, na saṅgho, na gaṇo, taṃ adhiṭṭhānuposathavasena veditabbaṃ. Atthi gaṇakammaṃ ekaccova gaṇo karoti, ekacco na karoti, tattha añattikaṃ dveyeva karonti, na tayo. Sañattikaṃ tayova karonti, na tato ūnā vā adhikā vāti.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi / 1. கம்மவக்³கோ³ • 1. Kammavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பரிவார-அட்ட²கதா² • Parivāra-aṭṭhakathā / அபலோகனகம்மகதா² • Apalokanakammakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / அபலோகனகம்மகதா²வண்ணனா • Apalokanakammakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / அபலோகனகம்மகதா²வண்ணனா • Apalokanakammakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / அபலோகனகம்மகதா² • Apalokanakammakathā
