| Library / Tipiṭaka / ཏིཔིཊཀ • Tipiṭaka / ཝིམཏིཝིནོདནཱི-ཊཱིཀཱ • Vimativinodanī-ṭīkā |
ཨཔལོཀནཀམྨཀཐཱཝཎྞནཱ
Apalokanakammakathāvaṇṇanā
༤༩༦. ཨེཏརཧི སཙེཔི སཱམཎེརོཏིཨཱདཱིསུ བུདྡྷཱདཱིནཾ ཨཝཎྞབྷཱསནམྤི ཨཀཔྤིཡཱདིཾ ཀཔྤིཡཱདིབྷཱཝེན དཱིཔནམྤི དིཊྛིཝིཔཏྟིཡཉྙེཝ པཝིསཏི། ཏེནེཝ ཝཀྑཏི ‘‘ཏཾ ལདྡྷིཾ ནིསྶཛྫཱཔེཏབྦོ’’ཏི། བྷིཀྑཱུནམྤི ཨེསེཝ ནཡོ། མིཙྪཱདིཊྛིཀོཏི བུདྡྷཝཙནཱདྷིཔྤཱཡཾ ཝིཔརཱིཏཏོ གཎྷནྟོ, སོ ཨེཝ ཨནྟགྒཱཧིཀཱཡ དིཊྛིཡཱ སམནྣཱགཏོཏི ཙ ཝུཏྟོ། ཀེཙི པན ‘‘སསྶཏུཙྪེདཱནཾ ཨཉྙཏརདིཊྛིཡཱ སམནྣཱགཏོ’’ཏི ཝདནྟི, ཏཾ ན ཡུཏྟཾ, སསྶཏུཙྪེདགྒཱཧསྶ སཱམཎེརཱནཾ ལིངྒནཱསནཱཡ ཀཱརཎཏྟེན ཧེཊྛཱ ཨཊྛཀཐཱཡམེཝ (མཧཱཝ॰ ཨཊྛ॰ ༡༠༨) ཝུཏྟཏྟཱ, ཨིདྷ ཙ དཎྜཀམྨནཱསནཱཡ ཨེཝ ཨདྷིཔྤེཏཏྟཱ།
496.Etarahi sacepi sāmaṇerotiādīsu buddhādīnaṃ avaṇṇabhāsanampi akappiyādiṃ kappiyādibhāvena dīpanampi diṭṭhivipattiyaññeva pavisati. Teneva vakkhati ‘‘taṃ laddhiṃ nissajjāpetabbo’’ti. Bhikkhūnampi eseva nayo. Micchādiṭṭhikoti buddhavacanādhippāyaṃ viparītato gaṇhanto, so eva antaggāhikāya diṭṭhiyā samannāgatoti ca vutto. Keci pana ‘‘sassatucchedānaṃ aññataradiṭṭhiyā samannāgato’’ti vadanti, taṃ na yuttaṃ, sassatucchedaggāhassa sāmaṇerānaṃ liṅganāsanāya kāraṇattena heṭṭhā aṭṭhakathāyameva (mahāva. aṭṭha. 108) vuttattā, idha ca daṇḍakammanāsanāya eva adhippetattā.
ཏསྶཱཔི དཱཏབྦོཏི ཝིཛྫམཱནཾ མུཁརཱདིབྷཱཝཾ ནིསྶཱཡ ཨཔྤཊིཔུཙྪིཏྭཱཔི པཊིཉྙཾ ཨགྒཧེཏྭཱཔི ཨཱཔཏྟིཾ ཨནཱརོཔེཏྭཱཔི དེསིཏཱཡཔི ཨཱཔཏྟིཡཱ ཁུཾསནཱདིཏོ ཨནོརམནྟསྶ དཱཏབྦོཝ། ཨོརམནྟསྶ པན ཁམཱཔེནྟསྶ ན དཱཏབྦོ།
Tassāpi dātabboti vijjamānaṃ mukharādibhāvaṃ nissāya appaṭipucchitvāpi paṭiññaṃ aggahetvāpi āpattiṃ anāropetvāpi desitāyapi āpattiyā khuṃsanādito anoramantassa dātabbova. Oramantassa pana khamāpentassa na dātabbo.
བྲཧྨདཎྜསྶ དཱནནྟི ཁརདཎྜསྶ ཨུཀྐཊྛདཎྜསྶ དཱནཾ། ཏཛྫནཱིཡཱདིཀམྨེ ཧི ཀཏེ ཨོཝཱདཱནུསཱསནིཔྤདཱནཔཊིཀྑེཔོ ནཏྠི། དིནྣབྲཧྨདཎྜེ པན ཏསྨིཾ སདྡྷིཾ ཏཛྫནཱིཡཱདིཀམྨཀཏེཧི པཊིཀྑིཏྟམྤི ཀཱཏུཾ ན ཝཊྚཏི, ‘‘ནེཝ ཝཏྟབྦོ’’ཏིཨཱདིནཱ ཨཱལཱཔསལླཱཔཱདིམཏྟསྶཱཔི ནཀཱརེན པཊིཀྑིཏྟཏྟཱ། ཏཉྷི དིསྭཱ བྷིཀྑཱུ གཱིཝཾ པརིཝཏྟེཏྭཱ ཨོལོཀནམཏྟམྤི ན ཀརོནྟི, ཨེཝཾ ཝིཝཛྫེཏབྦཾ ནིམྨདནཀརཎཏྠམེཝ ཏསྶ དཎྜསྶ ཨནུཉྙཱཏཏྟཱ། ཏེནེཝ ཚནྣཏྠེརོཔི ཨུཀྑེཔནཱིཡཱདིཀམྨཀཏོཔི ཨབྷཱཡིཏྭཱ བྲཧྨདཎྜེ དིནྣེ ‘‘སངྒྷེནཱཧཾ སབྦཐཱ ཝིཝཛྫིཏོ’’ཏི མུཙྪིཏོ པཔཏི། ཡོ པན བྲཧྨདཎྜཀཏེན སདྡྷིཾ ཉཏྭཱ སཾསཊྛོ ཨཝིཝཛྫེཏྭཱ ཝིཧརཏི, ཏསྶ དུཀྐཊམེཝཱཏི གཧེཏབྦཾ ཨཉྙཐཱ བྲཧྨདཎྜཝིདྷཱནསྶ ནིརཏྠཀཏཱཔསངྒཏོ། ཏེནཱཏི བྲཧྨདཎྜཀཏེན། ཡཐཱ ཏཛྫནཱིཡཱདིཀམྨཀཏེཧི, ཨེཝམེཝ ཏཏོ ཨདྷིཀམྤི སངྒྷཾཨཱརཱདྷེནྟེན སམྨཱཝཏྟིཏབྦཾ། ཏཉྩ ‘‘སོརཏོ ནིཝཱཏཝུཏྟཱི’’ཏིཨཱདིནཱ སརཱུཔཏོ དསྶིཏམེཝ། ཏེནཱཧ ‘‘སམྨཱཝཏྟིཏྭཱ ཁམཱཔེནྟསྶ བྲཧྨདཎྜོ པཊིཔྤསྶམྦྷེཏབྦོ’’ཏི།
Brahmadaṇḍassa dānanti kharadaṇḍassa ukkaṭṭhadaṇḍassa dānaṃ. Tajjanīyādikamme hi kate ovādānusāsanippadānapaṭikkhepo natthi. Dinnabrahmadaṇḍe pana tasmiṃ saddhiṃ tajjanīyādikammakatehi paṭikkhittampi kātuṃ na vaṭṭati, ‘‘neva vattabbo’’tiādinā ālāpasallāpādimattassāpi nakārena paṭikkhittattā. Tañhi disvā bhikkhū gīvaṃ parivattetvā olokanamattampi na karonti, evaṃ vivajjetabbaṃ nimmadanakaraṇatthameva tassa daṇḍassa anuññātattā. Teneva channattheropi ukkhepanīyādikammakatopi abhāyitvā brahmadaṇḍe dinne ‘‘saṅghenāhaṃ sabbathā vivajjito’’ti mucchito papati. Yo pana brahmadaṇḍakatena saddhiṃ ñatvā saṃsaṭṭho avivajjetvā viharati, tassa dukkaṭamevāti gahetabbaṃ aññathā brahmadaṇḍavidhānassa niratthakatāpasaṅgato. Tenāti brahmadaṇḍakatena. Yathā tajjanīyādikammakatehi, evameva tato adhikampi saṅghaṃārādhentena sammāvattitabbaṃ. Tañca ‘‘sorato nivātavuttī’’tiādinā sarūpato dassitameva. Tenāha ‘‘sammāvattitvā khamāpentassa brahmadaṇḍo paṭippassambhetabbo’’ti.
ཡཾ ཏཾ བྷགཝཏཱ ཨཝནྡིཡཀམྨཾ ཨནུཉྙཱཏནྟི སམྦནྡྷོ། ‘‘ཏསྶ བྷིཀྑུནོ དཎྜཀམྨཾ ཀཱཏུ’’ནྟི སཱམཉྙཏོ ཨནུཉྙཱཏཔྤཀཱརཾ དསྶེཏྭཱ པུན ཝིསེསཏོ ཨནུཉྙཱཏཔྤཀཱརཾ དསྶེཏུཾ ‘‘ཨཐ ཁོ’’ཏིཨཱདིཔཱལི༹ ཨུདྡྷཊཱཏི ཝེདིཏབྦཾ། ཨིམསྶ ཨཔལོཀནཀམྨསྶ ཋཱནཾ ཧོཏཱིཏི ཨཔལོཀནཀམྨསྶ སཱམཉྙསྶ པཝཏྟིཊྛཱནཾ ཧོཏཱིཏི། ཝིསེསབྱཏིརེཀེན ཨཝིཛྫམཱནམྤི ཏདཉྙཏྠ ཨཔྤཝཏྟིཾ དསྶེཏུཾ ཝིསེསནིསྶིཏཾ ཝིཡ ཝོཧརཱིཡཏི། ‘‘ཀམྨཉྙེཝ ལཀྑཎ’’ནྟི ཨིམིནཱ ཨོསཱརཎཱདིཝསེན གཧིཏཱཝསེསཱནཾ སབྦེསཾ ཨཔལོཀནཀམྨསྶ སཱམཉྙལཀྑཎཝསེན གཧིཏཏྟཱ ཀམྨཉྙེཝ ལཀྑཎམསྶཱཏི ཀམྨལཀྑཎནྟི ནིབྦཙནཾ དསྶེཏི། ཨིདཉྩ ཝུཏྟཱཝསེསཱནཾ ཀམྨཱནཾ ནིཊྛཱནཊྛཱནཾ, སངྑཱརཀྑནྡྷདྷམྨཱཡཏནཱནི ཝིཡ ཝུཏྟཱཝསེསཁནྡྷཱཡཏནཱནནྟི དཊྛབྦཾ། ཏེནེཝ ཝཀྑཏི ‘‘ཨཡཾ པནེཏྠ པཱལི༹མུཏྟཀོཔི ཀམྨལཀྑཎཝིནིཙྪཡོ’’ཏིཨཱདི (པརི॰ ཨཊྛ॰ ༤༩༥-༤༩༦)། ཡཐཱ ཙེཏྠ, ཨེཝཾ ཨུཔརི ཉཏྟིཀམྨཱདཱིསུཔི ཀམྨལཀྑཎཾ ཝུཏྟནྟི ཝེདིཏབྦཾ། ཏསྶ ཀརཎནྟི ཨཝནྡིཡཀམྨསྶ ཀརཎཝིདྷཱནཾ།
Yaṃ taṃ bhagavatā avandiyakammaṃ anuññātanti sambandho. ‘‘Tassa bhikkhuno daṇḍakammaṃ kātu’’nti sāmaññato anuññātappakāraṃ dassetvā puna visesato anuññātappakāraṃ dassetuṃ ‘‘atha kho’’tiādipāḷi uddhaṭāti veditabbaṃ. Imassa apalokanakammassa ṭhānaṃ hotīti apalokanakammassa sāmaññassa pavattiṭṭhānaṃ hotīti. Visesabyatirekena avijjamānampi tadaññattha appavattiṃ dassetuṃ visesanissitaṃ viya voharīyati. ‘‘Kammaññeva lakkhaṇa’’nti iminā osāraṇādivasena gahitāvasesānaṃ sabbesaṃ apalokanakammassa sāmaññalakkhaṇavasena gahitattā kammaññeva lakkhaṇamassāti kammalakkhaṇanti nibbacanaṃ dasseti. Idañca vuttāvasesānaṃ kammānaṃ niṭṭhānaṭṭhānaṃ, saṅkhārakkhandhadhammāyatanāni viya vuttāvasesakhandhāyatanānanti daṭṭhabbaṃ. Teneva vakkhati ‘‘ayaṃ panettha pāḷimuttakopi kammalakkhaṇavinicchayo’’tiādi (pari. aṭṭha. 495-496). Yathā cettha, evaṃ upari ñattikammādīsupi kammalakkhaṇaṃ vuttanti veditabbaṃ. Tassa karaṇanti avandiyakammassa karaṇavidhānaṃ.
‘‘ན ཝནྡིཏབྦོ’’ཏི ཨིམིནཱ ཝནྡནྟིཡཱ དུཀྐཊནྟི དསྶེཏཱིཏི དཊྛབྦཾ། སངྒྷེན ཀཏཾ ཀཏིཀཾ ཉཏྭཱ མདྡནཾ ཝིཡ ཧི སངྒྷསམྨུཏིཾ ཨནཱདརེན ཨཏིཀྐམནྟསྶ ཨཱཔཏྟི ཨེཝ ཧོཏི།
‘‘Na vanditabbo’’ti iminā vandantiyā dukkaṭanti dassetīti daṭṭhabbaṃ. Saṅghena kataṃ katikaṃ ñatvā maddanaṃ viya hi saṅghasammutiṃ anādarena atikkamantassa āpatti eva hoti.
བྷིཀྑུསངྒྷསྶཱཔི པནེཏཾ ལབྦྷཏིཡེཝཱཏི ཨཝནྡིཡཀམྨསྶ ཨུཔལཀྑཎམཏྟེན གཧིཏཏྟཱ བྷིཀྑུསངྒྷསྶཱཔི ཀམྨལཀྑཎཾ ལབྦྷཏི ཨེཝ།
Bhikkhusaṅghassāpi panetaṃ labbhatiyevāti avandiyakammassa upalakkhaṇamattena gahitattā bhikkhusaṅghassāpi kammalakkhaṇaṃ labbhati eva.
སལཱཀདཱནཊྛཱནཾ སལཱཀགྒཾ ནཱམ། ཡཱགུབྷཏྟཱནཾ བྷཱཛནཊྛཱནཱནི ཡཱགགྒབྷཏྟགྒཱནི ནཱམ། ཨེཏེསུཔི ཧི ཋཱནེསུ སབྦོ སངྒྷོ ཨུཔོསཐེ ཝིཡ སནྣིཔཏིཏོ, ཀམྨཉྩ ཝགྒཀམྨཾ ན ཧོཏི, ‘‘མཡམེཏཾ ན ཛཱནིམྷཱ’’ཏི པཙྪཱ ཁིཡྻནྟཱཔི ན ཧོནྟི། ཁཎྜསཱིམཱཡ པན ཀཏེ ཁིཡྻནྟི། སངྒྷིཀཔཙྩཡཉྷི ཨཙྪིནྣཙཱིཝརཱདཱིནཾ དཱཏུཾ ཨཔལོཀེནྟེཧི ཨུཔཙཱརསཱིམཊྛཱནཾ སབྦེསཾ ཨནུམཏིཾ གཧེཏྭཱཝ ཀཱཏབྦཾ། ཡོ པན ཝིསབྷཱགཔུགྒལོ དྷམྨིཀཾ ཨཔལོཀནཾ པཊིབཱཧཏི, ཏཾ ཨུཔཱཡེན བཧིཨུཔཙཱརསཱིམཱགཏཾ ཝཱ ཀཏྭཱ ཁཎྜསཱིམཾ ཝཱ པཝིསིཏྭཱ ཀཱཏུཾ ཝཊྚཏི།
Salākadānaṭṭhānaṃ salākaggaṃ nāma. Yāgubhattānaṃ bhājanaṭṭhānāni yāgaggabhattaggāni nāma. Etesupi hi ṭhānesu sabbo saṅgho uposathe viya sannipatito, kammañca vaggakammaṃ na hoti, ‘‘mayametaṃ na jānimhā’’ti pacchā khiyyantāpi na honti. Khaṇḍasīmāya pana kate khiyyanti. Saṅghikapaccayañhi acchinnacīvarādīnaṃ dātuṃ apalokentehi upacārasīmaṭṭhānaṃ sabbesaṃ anumatiṃ gahetvāva kātabbaṃ. Yo pana visabhāgapuggalo dhammikaṃ apalokanaṃ paṭibāhati, taṃ upāyena bahiupacārasīmāgataṃ vā katvā khaṇḍasīmaṃ vā pavisitvā kātuṃ vaṭṭati.
ཡཾ སནྡྷཱཡ ‘‘ཨཔལོཀནཀམྨཾ ཀརོཏཱི’’ཏི སཱམཉྙཏོ དསྶེཏི, ཏཾ ཨཔལོཀནཀམྨཾ སརཱུཔཏོ དསྶེཏུམཱཧ ‘‘ཨཙྪིནྣཙཱིཝརཾ’’ཨིཙྩཱདི། ཡདི ཨཔལོཀེཏྭཱཝ ཙཱིཝརཾ དཱཏབྦཾ, ཀིཾ པན ཨཔྤམཏྟཀཝིསྶཛྫཀསམྨུཏིཡཱཏི ཨཱཧ ‘‘ཨཔྤམཏྟཀཝིསྶཛྫནཀེན པནཱ’’ཏིཨཱདི། ནཱལི༹ ཝཱ ཨུཔཌྜྷནཱལི༹ ཝཱཏི དིཝསེ དིཝསེ ཨཔལོཀེཏྭཱ དཱཏབྦསྶ པམཱཎདསྶནཾ། ཏེན ཡཱཔནམཏྟམེཝ ཨཔལོཀེཏབྦཾ, ན ཨདྷིཀནྟི དསྶེཏི། ཨེཀདིཝསཾཡེཝ ཝཱཏིཨཱདི དསཝཱིསཏིདིཝསཱནཾ ཨེཀསྨིཾ དིཝསེཡེཝ དཱཏབྦཔརིཙྪེདདསྶནཾ, ཏེན ཡཱཝ ཛཱིཝནྟི ཝཱ ཡཱཝ རོགཱ ཝུཊྛཧཏཱིཏི ཝཱ ཨེཝཾ ཨཔལོཀེཏུཾ ན ཝཊྚཏཱིཏི དསྶེཏི། ཨིཎཔལིབོདྷནྟི ཨིཎཝཏྠུཾ དཱཏུཾ ཝཊྚཏཱིཏི སམྦནྡྷོ། ཏཉྩ ཨིཎཱཡིཀེཧི པལིབུདྡྷསྶ ལཛྫིཔེསལསྶ སཱསནུཔཀཱརཀསྶ པམཱཎཡུཏྟམེཝ ཀཔྤིཡབྷཎྜཾ ནིཡམེཏྭཱ ཨཔལོཀེཏྭཱ དཱཏབྦཾ, ན པན སཧསྶཾ ཝཱ སཏསཧསྶཾ ཝཱ མཧཱཨིཎཾ། ཏཱདིསཉྷི བྷིཀྑཱཙརིཡཝཏྟེན སབྦེཧི བྷིཀྑཱུཧི ཏཱདིསསྶ བྷིཀྑུནོ པརིཡེསིཏྭཱ དཱཏབྦཾ།
Yaṃ sandhāya ‘‘apalokanakammaṃ karotī’’ti sāmaññato dasseti, taṃ apalokanakammaṃ sarūpato dassetumāha ‘‘acchinnacīvaraṃ’’iccādi. Yadi apaloketvāva cīvaraṃ dātabbaṃ, kiṃ pana appamattakavissajjakasammutiyāti āha ‘‘appamattakavissajjanakena panā’’tiādi. Nāḷi vā upaḍḍhanāḷi vāti divase divase apaloketvā dātabbassa pamāṇadassanaṃ. Tena yāpanamattameva apaloketabbaṃ, na adhikanti dasseti. Ekadivasaṃyeva vātiādi dasavīsatidivasānaṃ ekasmiṃ divaseyeva dātabbaparicchedadassanaṃ, tena yāva jīvanti vā yāva rogā vuṭṭhahatīti vā evaṃ apaloketuṃ na vaṭṭatīti dasseti. Iṇapalibodhanti iṇavatthuṃ dātuṃ vaṭṭatīti sambandho. Tañca iṇāyikehi palibuddhassa lajjipesalassa sāsanupakārakassa pamāṇayuttameva kappiyabhaṇḍaṃ niyametvā apaloketvā dātabbaṃ, na pana sahassaṃ vā satasahassaṃ vā mahāiṇaṃ. Tādisañhi bhikkhācariyavattena sabbehi bhikkhūhi tādisassa bhikkhuno pariyesitvā dātabbaṃ.
ཨུཔནིཀྑེཔཏོཏི ཙེཏིཡཔཊིཛགྒནཏྠཱཡ ཝཌྜྷིཡཱ པཡོཛེཏྭཱ ཀཔྤིཡཀཱརཀེཧི ཋཔིཏཝཏྠུཏོ། སངྒྷིཀེནཔཱིཏི ན ཀེཝལཉྩ ཏཏྲུཔྤཱདཏོ པཙྩཡདཱཡཀེཧི ཙཏུཔཙྩཡཏྠཱཡ སངྒྷསྶ དིནྣཝཏྠུནཱཔཱིཏི ཨཏྠོ།
Upanikkhepatoti cetiyapaṭijagganatthāya vaḍḍhiyā payojetvā kappiyakārakehi ṭhapitavatthuto. Saṅghikenapīti na kevalañca tatruppādato paccayadāyakehi catupaccayatthāya saṅghassa dinnavatthunāpīti attho.
སངྒྷབྷཏྟཾ ཀཱཏུཾ ན ཝཊྚཏཱིཏི མཧཱདཱནཾ དེནྟེཧིཔི ཀརིཡམཱནཾ སངྒྷབྷཏྟཾ ཝིཡ ཀཱརེཏུཾ ན ཝཊྚཏཱིཏི ཨདྷིཔྤཱཡོ།
Saṅghabhattaṃ kātuṃ na vaṭṭatīti mahādānaṃ dentehipi kariyamānaṃ saṅghabhattaṃ viya kāretuṃ na vaṭṭatīti adhippāyo.
‘‘ཡཐཱསུཁཾ པརིབྷུཉྫིཏུཾ རུཙྩཏཱི’’ཏི ཝུཏྟཏྟཱ ཨཏྟནོ པརིབྷོགཔྤཧོནཀཾ ཨཔྤཾ ཝཱ བཧུཾ ཝཱ གཧེཏབྦཾ, ཨདྷིཀཾ པན གཧེཏུཾ ན ལབྷཏི། ཨུཔོསཐདིཝསེཏི ནིདསྶནམཏྟཾ, ཡསྨིཾ ཀིསྨིཉྩི དིཝསེཔི ཀཏཾ སུཀཏམེཝ ཧོཏི། ཀརོནྟེན ‘‘ཡཾ ཨིམསྨིཾ ཝིཧཱརེ ཨནྟོསཱིམཱཡ སངྒྷསནྟཀཾ…པེ॰… ཡཐཱསུཁཾ པརིབྷུཉྫིཏུཾ མཡ྄ཧཾ རུཙྩཏཱི’’ཏི ཨེཝཾ ཀཏིཀཱ ཀཱཏབྦཱ, ཏཐཱ དྭཱིཧི ཏཱིཧིཔི ‘‘ཨཱཡསྨནྟཱནཾ རུཙྩཏཱི’’ཏི ཝཙནམེཝ ཧེཏྠ ཝིསེསོ། ཏེསམྤཱིཏི རུཀྑཱནཾ། སཱ ཨེཝ ཀཏིཀཱཏི ཝིསུཾ ཀཏིཀཱ ན ཀཱཏབྦཱཏི ཨཏྠོ།
‘‘Yathāsukhaṃ paribhuñjituṃ ruccatī’’ti vuttattā attano paribhogappahonakaṃ appaṃ vā bahuṃ vā gahetabbaṃ, adhikaṃ pana gahetuṃ na labhati. Uposathadivaseti nidassanamattaṃ, yasmiṃ kismiñci divasepi kataṃ sukatameva hoti. Karontena ‘‘yaṃ imasmiṃ vihāre antosīmāya saṅghasantakaṃ…pe… yathāsukhaṃ paribhuñjituṃ mayhaṃ ruccatī’’ti evaṃ katikā kātabbā, tathā dvīhi tīhipi ‘‘āyasmantānaṃ ruccatī’’ti vacanameva hettha viseso. Tesampīti rukkhānaṃ. Sā eva katikāti visuṃ katikā na kātabbāti attho.
ཏེསནྟི རུཀྑཱནཾ། སངྒྷོ སཱམཱིཏི སམྦནྡྷོ། པུརིམཝིཧཱརེཏི པུརིམེ ཡཐཱསུཁཾ པརིབྷོགཏྠཱཡ ཀཏཀཏིཀེ ཝིཧཱརེ། པརིཝེཎཱནི ཀཏྭཱ ཛགྒནྟཱིཏི ཡཏྠ ཨརཀྑིཡམཱནེ ཕལཱཕལཱནི, རུཀྑཱ ཙ ཝིནསྶནྟི, ཏཱདིསཾ ཋཱནཾ སནྡྷཱཡ ཝུཏྟཾ, ཏཏྠ སངྒྷསྶ ཀཏིཀཱ ན པཝཏྟཱིཏི ཨདྷིཔྤཱཡོ། ཡེ པན རུཀྑཱ བཱིཛཱནི རོཔེཏྭཱ ཨཱདིཏོ པཊྛཱཡ པཊིཛགྒིཏཱ, ཏེཔི དསམབྷཱགཾ དཏྭཱ རོཔཀེཧེཝ པརིབྷུཉྫིཏབྦཱ། ཏེཧཱིཏི ཛགྒཀེཧི།
Tesanti rukkhānaṃ. Saṅgho sāmīti sambandho. Purimavihāreti purime yathāsukhaṃ paribhogatthāya katakatike vihāre. Pariveṇāni katvā jaggantīti yattha arakkhiyamāne phalāphalāni, rukkhā ca vinassanti, tādisaṃ ṭhānaṃ sandhāya vuttaṃ, tattha saṅghassa katikā na pavattīti adhippāyo. Ye pana rukkhā bījāni ropetvā ādito paṭṭhāya paṭijaggitā, tepi dasamabhāgaṃ datvā ropakeheva paribhuñjitabbā. Tehīti jaggakehi.
ཏཏྠཱཏི ཏསྨིཾ ཝིཧཱརེ། མཱུལེཏི ཨཱདིཀཱལེ, པུབྦེཏི ཨཏྠོ། དཱིགྷཱ ཀཏིཀཱཏི ཨཔརིཙྪིནྣཀཱལཱ ཡཐཱསུཁཾ པརིབྷོགཏྠཱཡ ཀཏིཀཱ། ནིཀྐུཀྐུཙྩེནཱཏི ‘‘ཨབྷཱཛིཏམིད’’ནྟི ཀུཀྐུཙྩཾ ཨཀཏྭཱཏི ཨཏྠོ། ཁིཡྻནམཏྟམེཝེཏནྟི ཏེན ཁིཡྻནེན བཧུཾ ཁཱདནྟཱནཾ དོསོ ནཏྠི ཨཏྟནོ པརིབྷོགཔྤམཱཎསྶེཝ གཧིཏཏྟཱ, ཁིཡྻནྟེཔི ཨཏྟནོ པཧོནཀཾ གཧེཏྭཱ ཁཱདིཏབྦནྟི ཨདྷིཔྤཱཡོ།
Tatthāti tasmiṃ vihāre. Mūleti ādikāle, pubbeti attho. Dīghā katikāti aparicchinnakālā yathāsukhaṃ paribhogatthāya katikā. Nikkukkuccenāti ‘‘abhājitamida’’nti kukkuccaṃ akatvāti attho. Khiyyanamattamevetanti tena khiyyanena bahuṃ khādantānaṃ doso natthi attano paribhogappamāṇasseva gahitattā, khiyyantepi attano pahonakaṃ gahetvā khāditabbanti adhippāyo.
གཎྷཐཱཏི ན ཝཏྟབྦཱཏི ཏཐཱཝུཏྟེ ཏེནེཝ བྷིཀྑུནཱ དིནྣཾ ཝིཡ མཉྙེཡྻུཾ, ཏཾ ནིསྶཱཡ མིཙྪཱཛཱིཝསམྦྷཝོ ཧོཏཱིཏི ཝུཏྟཾ། ཏེནཱཧ ‘‘ཨནུཝིཙརིཏྭཱ’’ཏིཨཱདི། ཨུཔཌྜྷབྷཱགོཏི ཨེཀབྷིཀྑུནོ པཊིཝཱིསཏོ ཨུཔཌྜྷབྷཱགོ། དེནྟེན ཙ ‘‘ཨེཏྟཀཾ དཱཏུཾ སངྒྷོ ཨནུཉྙཱསཱི’’ཏི ཨེཝཾ ཨཏྟཱནཾ པརིམོཙེཏྭཱ ཡཐཱ ཏེ སངྒྷེ ཨེཝ པསཱིདནྟི, ཨེཝཾ ཝཏྭཱ དཱཏབྦཾ།
Gaṇhathāti na vattabbāti tathāvutte teneva bhikkhunā dinnaṃ viya maññeyyuṃ, taṃ nissāya micchājīvasambhavo hotīti vuttaṃ. Tenāha ‘‘anuvicaritvā’’tiādi. Upaḍḍhabhāgoti ekabhikkhuno paṭivīsato upaḍḍhabhāgo. Dentena ca ‘‘ettakaṃ dātuṃ saṅgho anuññāsī’’ti evaṃ attānaṃ parimocetvā yathā te saṅghe eva pasīdanti, evaṃ vatvā dātabbaṃ.
ཨཔཙྩཱསཱིསནྟེནཱཏི གིལཱནགམིཀིསྶརཱདཱིནཾ ཨནུཉྙཱཏཔུགྒལཱནམྤི ཨཏྟནོ སནྟཀཾ དེནྟེན ཨཔཙྩཱསཱིསནྟེནེཝ དཱཏབྦཾ, ཨནནུཉྙཱཏཔུགྒལཱནཾ པན ཨཔཙྩཱསཱིསནྟེནཱཔི དཱཏུཾ ན ཝཊྚཏཱིཏི། སངྒྷིཀམེཝ ཡཐཱཀཏིཏཱཡ དཱཔེཏབྦཾ། ཨཏྟནོ སནྟཀམྤི པཙྩཡདཱཡཀཱདཱི སཡམེཝ ཝིསྶཱསེན གཎྷནྟི, ན ཝཱརེཏབྦཱ, ལདྡྷཀཔྤིཡནྟི ཏུཎྷཱི བྷཝིཏབྦཾ། པུབྦེ ཝུཏྟམེཝཱཏི ‘‘ཀུདྡྷོ ཧི སོ རུཀྑེཔི ཚིནྡེཡྻཱ’’ཏིཨཱདིནཱ ཏུཎྷཱིབྷཱཝེ ཀཱརཎཾ པུབྦེ ཝུཏྟམེཝ། ཏེཧི ཀཏཨནཏྠཱབྷཱཝེཔི ཀཱརུཉྙེན ཏུཎྷཱི བྷཝིཏུཾ ཝཊྚཏི, ‘‘གཎྷཐཱ’’ཏིཨཱདི པན ཝཏྟུཾ ན ཝཊྚཏི།
Apaccāsīsantenāti gilānagamikissarādīnaṃ anuññātapuggalānampi attano santakaṃ dentena apaccāsīsanteneva dātabbaṃ, ananuññātapuggalānaṃ pana apaccāsīsantenāpi dātuṃ na vaṭṭatīti. Saṅghikameva yathākatitāya dāpetabbaṃ. Attano santakampi paccayadāyakādī sayameva vissāsena gaṇhanti, na vāretabbā, laddhakappiyanti tuṇhī bhavitabbaṃ. Pubbe vuttamevāti ‘‘kuddho hi so rukkhepi chindeyyā’’tiādinā tuṇhībhāve kāraṇaṃ pubbe vuttameva. Tehi kataanatthābhāvepi kāruññena tuṇhī bhavituṃ vaṭṭati, ‘‘gaṇhathā’’tiādi pana vattuṃ na vaṭṭati.
གརུབྷཎྜཏྟཱ…པེ॰… ན དཱཏབྦནྟི ཛཱིཝརུཀྑཱནཾ ཨཱརཱམཊྛཱནཱིཡཏྟཱ, དཱརཱུནཉྩ གེཧསམྦྷཱརཱནུཔགཏཏྟཱ ‘‘སབྦཾ ཏྭམེཝ གཎྷཱ’’ཏི དཱཏུཾ ན ཝཊྚཏཱིཏི ཝུཏྟཾ། ཨཀཏཱཝཱསཾ ཝཱ ཀཏྭཱཏི པུབྦེ ཨཝིཛྫམཱནཾ སེནཱསནཾ ཀཏྭཱ ཛགྒིཏཀཱལེ ཕལཝཱརེ སམྤཏྟེ།
Garubhaṇḍattā…pe… na dātabbanti jīvarukkhānaṃ ārāmaṭṭhānīyattā, dārūnañca gehasambhārānupagatattā ‘‘sabbaṃ tvameva gaṇhā’’ti dātuṃ na vaṭṭatīti vuttaṃ. Akatāvāsaṃ vā katvāti pubbe avijjamānaṃ senāsanaṃ katvā jaggitakāle phalavāre sampatte.
ཨཔལོཀནཀམྨཀཐཱཝཎྞནཱ ནིཊྛིཏཱ།
Apalokanakammakathāvaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / པརིཝཱརཔཱལི༹ • Parivārapāḷi / ༡. ཀམྨཝགྒོ • 1. Kammavaggo
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / པརིཝཱར-ཨཊྛཀཐཱ • Parivāra-aṭṭhakathā / ཨཔལོཀནཀམྨཀཐཱ • Apalokanakammakathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ཨཔལོཀནཀམྨཀཐཱཝཎྞནཱ • Apalokanakammakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ཨཔལོཀནཀམྨཀཐཱཝཎྞནཱ • Apalokanakammakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ཨཔལོཀནཀམྨཀཐཱ • Apalokanakammakathā
