| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
2. ආපඞ්‌ගපඤ්‌හො
2. Āpaṅgapañho
2. ‘‘භන්‌තෙ නාගසෙන, ‘ආපස්‌ස පඤ්‌ච අඞ්‌ගානි ගහෙතබ්‌බානී’ති යං වදෙසි, කතමානි තානි පඤ්‌ච අඞ්‌ගානි ගහෙතබ්‌බානී’’ති? ‘‘යථා, මහාරාජ, ආපො සුසණ්‌ඨිතමකම්‌පිතමලුළිතසභාවපරිසුද්‌ධො, එවමෙව ඛො, මහාරාජ, යොගිනා යොගාවචරෙන කුහනලපනනෙමිත්‌තකනිප්‌පෙසිකතං අපනෙත්‌වා සුසණ්‌ඨිතමකම්‌පිතමලුළිතසභාවපරිසුද්‌ධාචාරෙන භවිතබ්‌බං. ඉදං, මහාරාජ, ආපස්‌ස පඨමං අඞ්‌ගං ගහෙතබ්‌බං.
2. ‘‘Bhante nāgasena, ‘āpassa pañca aṅgāni gahetabbānī’ti yaṃ vadesi, katamāni tāni pañca aṅgāni gahetabbānī’’ti? ‘‘Yathā, mahārāja, āpo susaṇṭhitamakampitamaluḷitasabhāvaparisuddho, evameva kho, mahārāja, yoginā yogāvacarena kuhanalapananemittakanippesikataṃ apanetvā susaṇṭhitamakampitamaluḷitasabhāvaparisuddhācārena bhavitabbaṃ. Idaṃ, mahārāja, āpassa paṭhamaṃ aṅgaṃ gahetabbaṃ.
‘‘පුන චපරං, මහාරාජ, ආපො සීතලසභාවසණ්‌ඨිතො, එවමෙව ඛො, මහාරාජ, යොගිනා යොගාවචරෙන සබ්‌බසත්‌තෙසු ඛන්‌තිමෙත්‌තානුද්‌දයසම්‌පන්‌නෙන හිතෙසිනා අනුකම්‌පකෙන භවිතබ්‌බං. ඉදං, මහාරාජ, ආපස්‌ස දුතියං අඞ්‌ගං ගහෙතබ්‌බං.
‘‘Puna caparaṃ, mahārāja, āpo sītalasabhāvasaṇṭhito, evameva kho, mahārāja, yoginā yogāvacarena sabbasattesu khantimettānuddayasampannena hitesinā anukampakena bhavitabbaṃ. Idaṃ, mahārāja, āpassa dutiyaṃ aṅgaṃ gahetabbaṃ.
‘‘පුන චපරං, මහාරාජ, ආපො අසුචිං සුචිං කරොති, එවමෙව ඛො, මහාරාජ, යොගිනා යොගාවචරෙන ගාමෙ වා අරඤ්‌ඤෙ වා උපජ්‌ඣායෙ උපජ්‌ඣායමත්‌තෙසු ආචරියෙ ආචරියමත්‌තෙසු සබ්‌බත්‌ථ අනධිකරණෙන භවිතබ්‌බං අනවසෙසකාරිනා. ඉදං, මහාරාජ, ආපස්‌ස තතියං අඞ්‌ගං ගහෙතබ්‌බං.
‘‘Puna caparaṃ, mahārāja, āpo asuciṃ suciṃ karoti, evameva kho, mahārāja, yoginā yogāvacarena gāme vā araññe vā upajjhāye upajjhāyamattesu ācariye ācariyamattesu sabbattha anadhikaraṇena bhavitabbaṃ anavasesakārinā. Idaṃ, mahārāja, āpassa tatiyaṃ aṅgaṃ gahetabbaṃ.
‘‘පුන චපරං, මහාරාජ, ආපො බහුජනපත්‌ථිතො, එවමෙව ඛො, මහාරාජ, යොගිනා යොගාවචරෙන අප්‌පිච්‌ඡසන්‌තුට්‌ඨපවිවිත්‌තපටිසල්‌ලානෙන සතතං සබ්‌බලොකමභිපත්‌ථිතෙන භවිතබ්‌බං. ඉදං, මහාරාජ, ආපස්‌ස චතුත්‌ථං අඞ්‌ගං ගහෙතබ්‌බං.
‘‘Puna caparaṃ, mahārāja, āpo bahujanapatthito, evameva kho, mahārāja, yoginā yogāvacarena appicchasantuṭṭhapavivittapaṭisallānena satataṃ sabbalokamabhipatthitena bhavitabbaṃ. Idaṃ, mahārāja, āpassa catutthaṃ aṅgaṃ gahetabbaṃ.
‘‘පුන චපරං, මහාරාජ, ආපො න කස්‌සචි අහිතමුපදහති, එවමෙව ඛො, මහාරාජ, යොගිනා යොගාවචරෙන පරභණ්‌ඩනකලහවිග්‌ගහවිවාදරිත්‌තජ්‌ඣානඅරතිජනනං කායවචීචිත්‌තෙහි පාපකං න කරණීයං. ඉදං, මහාරාජ, ආපස්‌ස පඤ්‌චමං අඞ්‌ගං ගහෙතබ්‌බං. භාසිතම්‌පෙතං මහාරාජ, භගවතා, දෙවාතිදෙවෙන කණ්‌හජාතකෙ –
‘‘Puna caparaṃ, mahārāja, āpo na kassaci ahitamupadahati, evameva kho, mahārāja, yoginā yogāvacarena parabhaṇḍanakalahaviggahavivādarittajjhānaaratijananaṃ kāyavacīcittehi pāpakaṃ na karaṇīyaṃ. Idaṃ, mahārāja, āpassa pañcamaṃ aṅgaṃ gahetabbaṃ. Bhāsitampetaṃ mahārāja, bhagavatā, devātidevena kaṇhajātake –
‘‘‘වරඤ්‌චෙ මෙ අදො සක්‌ක, සබ්‌බභූතානමිස්‌සර;
‘‘‘Varañce me ado sakka, sabbabhūtānamissara;
න මනො වා සරීරං වා, මං-කතෙ සක්‌ක කස්‌සචි;
Na mano vā sarīraṃ vā, maṃ-kate sakka kassaci;
කදාචි උපහඤ්‌ඤෙථ, එතං සක්‌ක වරං වරෙ’’’ති.
Kadāci upahaññetha, etaṃ sakka varaṃ vare’’’ti.
ආපඞ්‌ගපඤ්‌හො දුතියො.
Āpaṅgapañho dutiyo.
