| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
6. அபண்ணகஸுத்தவண்ணனா
6. Apaṇṇakasuttavaṇṇanā
16. ச²ட்டே² அபண்ணகபடிபத³ந்தி அவிரத்³த⁴படிபத³ங் ஏகங்ஸபடிபத³ங் நிய்யானிகபடிபத³ங் காரணபடிபத³ங் ஸாரபடிபத³ங் மண்ட³படிபத³ங் அபச்சனீகபடிபத³ங் அனுலோமபடிபத³ங் த⁴ம்மானுத⁴ம்மபடிபத³ங் படிபன்னோ ஹோதி, ந தக்கக்³கா³ஹேன வா நயக்³கா³ஹேன வா. ஏவங் க³ஹெத்வா படிபன்னோ ஹி பி⁴க்கு² வா பி⁴க்கு²னீ வா உபாஸகோ வா உபாஸிகா வா மனுஸ்ஸதே³வனிப்³பா³னஸம்பத்தீஹி ஹாயதி பரிஹாயதி, அபண்ணகபடிபத³ங் படிபன்னோ பன தாஹி ஸம்பத்தீஹி ந பரிஹாயதி. அதீதே கந்தாரத்³தா⁴னமக்³க³ங் படிபன்னேஸு த்³வீஸு ஸத்த²வாஹேஸு யக்க²ஸ்ஸ வசனங் க³ஹெத்வா பா³லஸத்த²வாஹோ ஸத்³தி⁴ங் ஸத்தே²ன அனயப்³யஸனங் பத்தோ, யக்க²ஸ்ஸ வசனங் அக்³க³ஹெத்வா ‘‘உத³கதி³ட்ட²ட்டா²னே உத³கங் ச²ட்³டெ³ஸ்ஸாமா’’தி ஸத்த²கே ஸஞ்ஞாபெத்வா மக்³க³ங் படிபன்னோ பண்டி³தஸத்த²வாஹோ விய. யங் ஸந்தா⁴ய வுத்தங் –
16. Chaṭṭhe apaṇṇakapaṭipadanti aviraddhapaṭipadaṃ ekaṃsapaṭipadaṃ niyyānikapaṭipadaṃ kāraṇapaṭipadaṃ sārapaṭipadaṃ maṇḍapaṭipadaṃ apaccanīkapaṭipadaṃ anulomapaṭipadaṃ dhammānudhammapaṭipadaṃ paṭipanno hoti, na takkaggāhena vā nayaggāhena vā. Evaṃ gahetvā paṭipanno hi bhikkhu vā bhikkhunī vā upāsako vā upāsikā vā manussadevanibbānasampattīhi hāyati parihāyati, apaṇṇakapaṭipadaṃ paṭipanno pana tāhi sampattīhi na parihāyati. Atīte kantāraddhānamaggaṃ paṭipannesu dvīsu satthavāhesu yakkhassa vacanaṃ gahetvā bālasatthavāho saddhiṃ satthena anayabyasanaṃ patto, yakkhassa vacanaṃ aggahetvā ‘‘udakadiṭṭhaṭṭhāne udakaṃ chaḍḍessāmā’’ti satthake saññāpetvā maggaṃ paṭipanno paṇḍitasatthavāho viya. Yaṃ sandhāya vuttaṃ –
‘‘அபண்ணகங் டா²னமேகே, து³தியங் ஆஹு தக்கிகா;
‘‘Apaṇṇakaṃ ṭhānameke, dutiyaṃ āhu takkikā;
ஏதத³ஞ்ஞாய மேதா⁴வீ, தங் க³ண்ஹே யத³பண்ணக’’ந்தி. (ஜா॰ 1.1.1);
Etadaññāya medhāvī, taṃ gaṇhe yadapaṇṇaka’’nti. (jā. 1.1.1);
யோனி சஸ்ஸ ஆரத்³தா⁴ ஹோதீதி எத்த² யோனீதி க²ந்த⁴கொட்டா²ஸஸ்ஸபி காரணஸ்ஸபி பஸ்ஸாவமக்³க³ஸ்ஸபி நாமங். ‘‘சதஸ்ஸோ கோ² இமா, ஸாரிபுத்த, யோனியோ’’திஆதீ³ஸு (ம॰ நி॰ 1.152) ஹி க²ந்த⁴கொட்டா²ஸோ யோனி நாம. ‘‘யோனி ஹேஸா பூ⁴மிஜ ப²லஸ்ஸ அதி⁴க³மாயா’’திஆதீ³ஸு (ம॰ நி॰ 3.226) காரணங். ‘‘ந சாஹங் ப்³ராஹ்மணங் ப்³ரூமி, யோனிஜங் மத்திஸம்ப⁴வ’’ந்தி (ம॰ நி॰ 2.457; த⁴॰ ப॰ 396) ச ‘‘தமேனங் கம்மஜவாதா நிவத்தித்வா உத்³த⁴ங்பாத³ங் அதோ⁴ஸிரங் ஸம்பரிவத்தெத்வா மாது யோனிமுகே² ஸம்படிபாதெ³ந்தீ’’தி ச ஆதீ³ஸு பஸ்ஸாவமக்³கோ³. இத⁴ பன காரணங் அதி⁴ப்பேதங். ஆரத்³தா⁴தி பக்³க³ஹிதா பரிபுண்ணா.
Yoni cassa āraddhā hotīti ettha yonīti khandhakoṭṭhāsassapi kāraṇassapi passāvamaggassapi nāmaṃ. ‘‘Catasso kho imā, sāriputta, yoniyo’’tiādīsu (ma. ni. 1.152) hi khandhakoṭṭhāso yoni nāma. ‘‘Yoni hesā bhūmija phalassa adhigamāyā’’tiādīsu (ma. ni. 3.226) kāraṇaṃ. ‘‘Na cāhaṃ brāhmaṇaṃ brūmi, yonijaṃ mattisambhava’’nti (ma. ni. 2.457; dha. pa. 396) ca ‘‘tamenaṃ kammajavātā nivattitvā uddhaṃpādaṃ adhosiraṃ samparivattetvā mātu yonimukhe sampaṭipādentī’’ti ca ādīsu passāvamaggo. Idha pana kāraṇaṃ adhippetaṃ. Āraddhāti paggahitā paripuṇṇā.
ஆஸவானங் க²யாயாதி எத்த² ஆஸவந்தீதி ஆஸவா, சக்கு²தோபி…பே॰… மனதோபி ஸந்த³ந்தி பவத்தந்தீதி வுத்தங் ஹோதி. த⁴ம்மதோ யாவ கொ³த்ரபு⁴, ஓகாஸதோ யாவ ப⁴வக்³கா³ ஸவந்தீதி வா ஆஸவா, ஏதே த⁴ம்மே ஏதஞ்ச ஓகாஸங் அந்தோகரித்வா பவத்தந்தீதி அத்தோ². அந்தோகரணத்தோ² ஹி அயங் ஆகாரோ. சிரபாரிவாஸியட்டே²ன மதி³ராத³யோ ஆஸவா, ஆஸவா வியாதிபி ஆஸவா. லோகஸ்மிம்பி ஹி சிரபாரிவாஸிகா மதி³ராத³யோ ஆஸவாதி வுச்சந்தி, யதி³ ச சிரபாரிவாஸியட்டே²ன ஆஸவா, ஏதேயேவ ப⁴விதுமரஹந்தி. வுத்தஞ்ஹேதங் – ‘‘புரிமா, பி⁴க்க²வே, கோடி ந பஞ்ஞாயதி அவிஜ்ஜாய, இதோ புப்³பே³ அவிஜ்ஜா நாஹோஸீ’’திஆதி³ (அ॰ நி॰ 10.61). ஆயதங் வா ஸங்ஸாரது³க்க²ங் ஸவந்தி பஸவந்தீதிபி ஆஸவா. புரிமானி செத்த² நிப்³ப³சனானி யத்த² கிலேஸா ஆஸவாதி ஆக³ச்ச²ந்தி, தத்த² யுஜ்ஜந்தி, பச்சி²மங் கம்மேபி. ந கேவலஞ்ச கம்மகிலேஸாயேவ ஆஸவா, அபிச கோ² நானப்பகாரா உபத்³த³வாபி. ஸுத்தேஸு ஹி ‘‘நாஹங், சுந்த³, தி³ட்ட²த⁴ம்மிகானங்யேவ ஆஸவானங் ஸங்வராய த⁴ம்மங் தே³ஸேமீ’’தி (தீ³॰ நி॰ 3.182) எத்த² விவாத³மூலபூ⁴தா கிலேஸா ஆஸவாதி ஆக³தா.
Āsavānaṃ khayāyāti ettha āsavantīti āsavā, cakkhutopi…pe… manatopi sandanti pavattantīti vuttaṃ hoti. Dhammato yāva gotrabhu, okāsato yāva bhavaggā savantīti vā āsavā, ete dhamme etañca okāsaṃ antokaritvā pavattantīti attho. Antokaraṇattho hi ayaṃ ākāro. Cirapārivāsiyaṭṭhena madirādayo āsavā, āsavā viyātipi āsavā. Lokasmimpi hi cirapārivāsikā madirādayo āsavāti vuccanti, yadi ca cirapārivāsiyaṭṭhena āsavā, eteyeva bhavitumarahanti. Vuttañhetaṃ – ‘‘purimā, bhikkhave, koṭi na paññāyati avijjāya, ito pubbe avijjā nāhosī’’tiādi (a. ni. 10.61). Āyataṃ vā saṃsāradukkhaṃ savanti pasavantītipi āsavā. Purimāni cettha nibbacanāni yattha kilesā āsavāti āgacchanti, tattha yujjanti, pacchimaṃ kammepi. Na kevalañca kammakilesāyeva āsavā, apica kho nānappakārā upaddavāpi. Suttesu hi ‘‘nāhaṃ, cunda, diṭṭhadhammikānaṃyeva āsavānaṃ saṃvarāya dhammaṃ desemī’’ti (dī. ni. 3.182) ettha vivādamūlabhūtā kilesā āsavāti āgatā.
‘‘யேன தே³வூபபத்யஸ்ஸ, க³ந்த⁴ப்³போ³ வா விஹங்க³மோ;
‘‘Yena devūpapatyassa, gandhabbo vā vihaṅgamo;
யக்க²த்தங் யேன க³ச்செ²ய்யங், மனுஸ்ஸத்தஞ்ச அப்³ப³ஜே;
Yakkhattaṃ yena gaccheyyaṃ, manussattañca abbaje;
தே மய்ஹங் ஆஸவா கீ²ணா, வித்³த⁴ஸ்தா வினளீகதா’’தி. (அ॰ நி॰ 4.36) –
Te mayhaṃ āsavā khīṇā, viddhastā vinaḷīkatā’’ti. (a. ni. 4.36) –
எத்த² தேபூ⁴மகங் ச கம்மங் அவஸேஸா ச அகுஸலா த⁴ம்மா. ‘‘தி³ட்ட²த⁴ம்மிகானங் ஆஸவானங் ஸங்வராய ஸம்பராயிகானங் ஆஸவானங் படிகா⁴தாயா’’தி (பாரா॰ 39; அ॰ நி॰ 2.202-230) எத்த² பரூபவாத³விப்படிஸாரவத⁴ப³ந்தா⁴த³யோ சேவ அபாயது³க்க²பூ⁴தா ச நானப்பகாரா உபத்³த³வா.
Ettha tebhūmakaṃ ca kammaṃ avasesā ca akusalā dhammā. ‘‘Diṭṭhadhammikānaṃ āsavānaṃ saṃvarāya samparāyikānaṃ āsavānaṃ paṭighātāyā’’ti (pārā. 39; a. ni. 2.202-230) ettha parūpavādavippaṭisāravadhabandhādayo ceva apāyadukkhabhūtā ca nānappakārā upaddavā.
தே பனேதே ஆஸவா யத்த² யதா² ஆக³தா, தத்த² ததா² வேதி³தப்³பா³. ஏதே ஹி வினயே தாவ ‘‘தி³ட்ட²த⁴ம்மிகானங் ஆஸவானங் ஸங்வராய, ஸம்பராயிகானங் ஆஸவானங் படிகா⁴தாயா’’தி (பாரா॰ 39; அ॰ நி॰ 2.202-230) த்³வேதா⁴ ஆக³தா. ஸளாயதனே ‘‘தயோ மே, ஆவுஸோ, ஆஸவா காமாஸவோ ப⁴வாஸவோ அவிஜ்ஜாஸவோ’’தி (ஸங்॰ நி॰ 4.321) திதா⁴ ஆக³தா. அஞ்ஞேஸு ச ஸுத்தந்தேஸு (சூளனி॰ ஜதுகண்ணிமாணவபுச்சா²னித்³தே³ஸோ 69; படி॰ ம॰ 1.107) அபி⁴த⁴ம்மே (த⁴॰ ஸ॰ 1102-1106; விப⁴॰ 937) ச தேயேவ தி³ட்டா²ஸவேன ஸஹ சதுதா⁴ ஆக³தா. நிப்³பே³தி⁴கபரியாயேன ‘‘அத்தி², பி⁴க்க²வே, ஆஸவா நிரயகா³மினியா , அத்தி² ஆஸவா திரச்சா²னயோனிகா³மினியா, அத்தி² ஆஸவா பெத்திவிஸயகா³மினியா, அத்தி² ஆஸவா மனுஸ்ஸலோககா³மினியா, அத்தி² ஆஸவா தே³வலோககா³மினியா’’தி (அ॰ நி॰ 6.63) பஞ்சதா⁴ ஆக³தா. கம்மமேவ செத்த² ஆஸவாதி வுத்தங். ச²க்கனிபாதே ‘‘அத்தி², பி⁴க்க²வே, ஆஸவா ஸங்வராபஹாதப்³பா³’’திஆதி³னா (அ॰ நி॰ 6.58) நயேன ச²தா⁴ ஆக³தா. ஸப்³பா³ஸவபரியாயே (ம॰ நி॰ 1.14 ஆத³யோ) தேயேவ த³ஸ்ஸனேன பஹாதப்³பே³ஹி ஸத்³தி⁴ங் ஸத்ததா⁴ ஆக³தா. இத⁴ பன அபி⁴த⁴ம்மனயேன சத்தாரோ ஆஸவா அதி⁴ப்பேதாதி வேதி³தப்³பா³.
Te panete āsavā yattha yathā āgatā, tattha tathā veditabbā. Ete hi vinaye tāva ‘‘diṭṭhadhammikānaṃ āsavānaṃ saṃvarāya, samparāyikānaṃ āsavānaṃ paṭighātāyā’’ti (pārā. 39; a. ni. 2.202-230) dvedhā āgatā. Saḷāyatane ‘‘tayo me, āvuso, āsavā kāmāsavo bhavāsavo avijjāsavo’’ti (saṃ. ni. 4.321) tidhā āgatā. Aññesu ca suttantesu (cūḷani. jatukaṇṇimāṇavapucchāniddeso 69; paṭi. ma. 1.107) abhidhamme (dha. sa. 1102-1106; vibha. 937) ca teyeva diṭṭhāsavena saha catudhā āgatā. Nibbedhikapariyāyena ‘‘atthi, bhikkhave, āsavā nirayagāminiyā , atthi āsavā tiracchānayonigāminiyā, atthi āsavā pettivisayagāminiyā, atthi āsavā manussalokagāminiyā, atthi āsavā devalokagāminiyā’’ti (a. ni. 6.63) pañcadhā āgatā. Kammameva cettha āsavāti vuttaṃ. Chakkanipāte ‘‘atthi, bhikkhave, āsavā saṃvarāpahātabbā’’tiādinā (a. ni. 6.58) nayena chadhā āgatā. Sabbāsavapariyāye (ma. ni. 1.14 ādayo) teyeva dassanena pahātabbehi saddhiṃ sattadhā āgatā. Idha pana abhidhammanayena cattāro āsavā adhippetāti veditabbā.
க²யாயாதி எத்த² பன ஆஸவானங் ஸரஸபே⁴தோ³பி கீ²ணாகாரோபி மக்³க³ப²லனிப்³பா³னானிபி ‘‘ஆஸவக்க²யோ’’தி வுச்சதி. ‘‘யோ ஆஸவானங் க²யோ வயோ பே⁴தோ³ பரிபே⁴தோ³ அனிச்சதா அந்தரதா⁴ன’’ந்தி எத்த² ஹி ஆஸவானங் ஸரஸபே⁴தோ³ ‘‘ஆஸவக்க²யோ’’தி வுத்தோ. ‘‘ஜானதோ அஹங், பி⁴க்க²வே, பஸ்ஸதோ ஆஸவானங் க²யங் வதா³மீ’’தி (ம॰ நி॰ 1.15; ஸங்॰ நி॰ 2.23; இதிவு॰ 102) எத்த² ஆஸவப்பஹானங் ஆஸவானங் அச்சந்தக்க²யோ அஸமுப்பாதோ³ கீ²ணாகாரோ நத்தி²பா⁴வோ ‘‘ஆஸவக்க²யோ’’தி வுத்தோ.
Khayāyāti ettha pana āsavānaṃ sarasabhedopi khīṇākāropi maggaphalanibbānānipi ‘‘āsavakkhayo’’ti vuccati. ‘‘Yo āsavānaṃ khayo vayo bhedo paribhedo aniccatā antaradhāna’’nti ettha hi āsavānaṃ sarasabhedo ‘‘āsavakkhayo’’ti vutto. ‘‘Jānato ahaṃ, bhikkhave, passato āsavānaṃ khayaṃ vadāmī’’ti (ma. ni. 1.15; saṃ. ni. 2.23; itivu. 102) ettha āsavappahānaṃ āsavānaṃ accantakkhayo asamuppādo khīṇākāro natthibhāvo ‘‘āsavakkhayo’’ti vutto.
‘‘ஸேக²ஸ்ஸ ஸிக்க²மானஸ்ஸ, உஜுமக்³கா³னுஸாரினோ;
‘‘Sekhassa sikkhamānassa, ujumaggānusārino;
க²யஸ்மிங் பட²மங் ஞாணங், ததோ அஞ்ஞா அனந்தரா’’தி. (இதிவு॰ 62) –
Khayasmiṃ paṭhamaṃ ñāṇaṃ, tato aññā anantarā’’ti. (itivu. 62) –
எத்த² மக்³கோ³ ‘‘ஆஸவக்க²யோ’’தி வுத்தோ. ‘‘ஆஸவானங் க²யா ஸமணோ ஹோதீ’’தி (ம॰ நி॰ 1.438) எத்த² ப²லங்.
Ettha maggo ‘‘āsavakkhayo’’ti vutto. ‘‘Āsavānaṃ khayā samaṇo hotī’’ti (ma. ni. 1.438) ettha phalaṃ.
‘‘பரவஜ்ஜானுபஸ்ஸிஸ்ஸ, நிச்சங் உஜ்ஜா²னஸஞ்ஞினோ;
‘‘Paravajjānupassissa, niccaṃ ujjhānasaññino;
ஆஸவா தஸ்ஸ வட்³ட⁴ந்தி, ஆரா ஸோ ஆஸவக்க²யா’’தி. (த⁴॰ ப॰ 253) –
Āsavā tassa vaḍḍhanti, ārā so āsavakkhayā’’ti. (dha. pa. 253) –
எத்த² நிப்³பா³னங். இமஸ்மிங் பன ஸுத்தே ப²லங் ஸந்தா⁴ய ‘‘ஆஸவானங் க²யாயா’’தி ஆஹ, அரஹத்தப²லத்தா²யாதி அத்தோ².
Ettha nibbānaṃ. Imasmiṃ pana sutte phalaṃ sandhāya ‘‘āsavānaṃ khayāyā’’ti āha, arahattaphalatthāyāti attho.
இந்த்³ரியேஸு கு³த்தத்³வாரோதி மனச்ச²ட்டே²ஸு இந்த்³ரியேஸு பிஹிதத்³வாரோ. போ⁴ஜனே மத்தஞ்ஞூதி போ⁴ஜனஸ்மிங் பமாணஞ்ஞூ, படிக்³க³ஹணபரிபோ⁴க³பச்சவெக்க²ணமத்தங் ஜானாதி பஜானாதீதி அத்தோ². ஜாக³ரியங் அனுயுத்தோதி ரத்திந்தி³வங் ச² கொட்டா²ஸே கத்வா பஞ்சஸு கொட்டா²ஸேஸு ஜாக³ரணபா⁴வங் அனுயுத்தோ, ஜாக³ரணேயேவ யுத்தப்பயுத்தோதி அத்தோ².
Indriyesu guttadvāroti manacchaṭṭhesu indriyesu pihitadvāro. Bhojane mattaññūti bhojanasmiṃ pamāṇaññū, paṭiggahaṇaparibhogapaccavekkhaṇamattaṃ jānāti pajānātīti attho. Jāgariyaṃanuyuttoti rattindivaṃ cha koṭṭhāse katvā pañcasu koṭṭhāsesu jāgaraṇabhāvaṃ anuyutto, jāgaraṇeyeva yuttappayuttoti attho.
ஏவங் மாதிகங் ட²பெத்வா இதா³னி தமேவ ட²பிதபடிபாடியா விப⁴ஜந்தோ கத²ஞ்ச, பி⁴க்க²வே, பி⁴க்கூ²திஆதி³மாஹ. தத்த² சக்கு²னா ரூபங் தி³ஸ்வாதிஆதீ³னங் அத்தோ² விஸுத்³தி⁴மக்³கே³ (விஸுத்³தி⁴॰ 1.15) வித்தா²ரிதோ, ததா² படிஸங்கா² யோனிஸோ ஆஹாரங் ஆஹாரேதி நேவ த³வாயாதிஆதீ³னங் (விஸுத்³தி⁴॰ 1.18). ஆவரணீயேஹி த⁴ம்மேஹீதி பஞ்சஹி நீவரணேஹி த⁴ம்மேஹி. நீவரணானி ஹி சித்தங் ஆவரித்வா திட்ட²ந்தி, தஸ்மா ஆவரணீயா த⁴ம்மாதி வுச்சந்தி. ஸீஹஸெய்யங் கப்பேதீதி ஸீஹோ விய ஸெய்யங் கப்பேதி. பாதே³ பாத³ங் அச்சாதா⁴யாதி வாமபாத³ங் த³க்கி²ணபாதே³ அதிஆதா⁴ய. ஸமங் ட²பிதே ஹி பாதே³ ஜாணுகேன ஜாணுகங் கொ³ப்ப²கேன ச கொ³ப்ப²கங் க⁴டீயதி, ததோ வேத³னா உட்ட²ஹந்தி. தஸ்மா தஸ்ஸ தோ³ஸஸ்ஸ பரிவஜ்ஜனத்த²ங் தோ²கங் அதிக்கமித்வா ஏஸ பாத³ங் ட²பேதி. தேன வுத்தங் – ‘‘பாதே³ பாத³ங் அச்சாதா⁴யா’’தி.
Evaṃ mātikaṃ ṭhapetvā idāni tameva ṭhapitapaṭipāṭiyā vibhajanto kathañca, bhikkhave, bhikkhūtiādimāha. Tattha cakkhunā rūpaṃ disvātiādīnaṃ attho visuddhimagge (visuddhi. 1.15) vitthārito, tathā paṭisaṅkhā yoniso āhāraṃ āhāreti neva davāyātiādīnaṃ (visuddhi. 1.18). Āvaraṇīyehi dhammehīti pañcahi nīvaraṇehi dhammehi. Nīvaraṇāni hi cittaṃ āvaritvā tiṭṭhanti, tasmā āvaraṇīyā dhammāti vuccanti. Sīhaseyyaṃ kappetīti sīho viya seyyaṃ kappeti. Pāde pādaṃ accādhāyāti vāmapādaṃ dakkhiṇapāde atiādhāya. Samaṃ ṭhapite hi pāde jāṇukena jāṇukaṃ gopphakena ca gopphakaṃ ghaṭīyati, tato vedanā uṭṭhahanti. Tasmā tassa dosassa parivajjanatthaṃ thokaṃ atikkamitvā esa pādaṃ ṭhapeti. Tena vuttaṃ – ‘‘pāde pādaṃ accādhāyā’’ti.
ஸதோ ஸம்பஜானோதி ஸதியா சேவ ஸம்பஜஞ்ஞேன ச ஸமன்னாக³தோ. கத²ங் பனேஸ நித்³தா³யந்தோ ஸதோ ஸம்பஜானோ நாம ஹோதீதி? புரிமப்பவத்திவஸேன. அயங் ஹி சங்கமே சங்கமந்தோ நித்³தா³ய ஓக்கமனபா⁴வங் ஞத்வா பவத்தமானங் கம்மட்டா²னங் ட²பெத்வா மஞ்சே வா ப²லகே வா நிபன்னோ நித்³த³ங் உபக³ந்த்வா புன பபு³ஜ்ஜ²மானோ கம்மட்டா²னங் டி²தட்டா²னே க³ண்ஹந்தோயேவ பபு³ஜ்ஜ²தி. தஸ்மா நித்³தா³யந்தோபி ஸதோ ஸம்பஜானோ நாம ஹோதி. அயங் தாவ மூலகம்மட்டா²னே நயோவ. பரிக்³க³ஹகம்மட்டா²னவஸேனாபி பனேஸ ஸதோ ஸம்பஜானோ நாம ஹோதி. கத²ங்? அயங் ஹி சங்கமந்தோ நித்³தா³ய ஓக்கமனபா⁴வங் ஞத்வா பாஸாணப²லகே வா மஞ்சே வா த³க்கி²ணேன பஸ்ஸேன நிபஜ்ஜித்வா பச்சவெக்க²தி – ‘‘அசேதனோ காயோ அசேதனே மஞ்சே பதிட்டி²தோ, அசேதனோ மஞ்சோ அசேதனாய பத²வியா, அசேதனா பத²வீ அசேதனே உத³கே, அசேதனங் உத³கங் அசேதனே வாதே, அசேதனோ வாதோ அசேதனே ஆகாஸே பதிட்டி²தோ. தத்த² ஆகாஸம்பி ‘அஹங் வாதங் உக்கி²பித்வா டி²த’ந்தி ந ஜானாதி, வாதோபி ‘அஹங் ஆகாஸே பதிட்டி²தோ’தி ந ஜானாதி. ததா² வாதோ ந ஜானாதி. ‘அஹங் உத³கங் உக்கி²பித்வா டி²தோ’தி…பே॰… மஞ்சோ ந ஜானாதி, ‘அஹங் காயங் உக்கி²பித்வா டி²தோ’தி, காயோ ந ஜானாதி ‘அஹங் மஞ்சே பதிட்டி²தோ’தி. ந ஹி தேஸங் அஞ்ஞமஞ்ஞங் ஆபோ⁴கோ³ வா ஸமன்னாஹாரோ வா மனஸிகாரோ வா சேதனா வா பத்த²னா வா அத்தீ²’’தி. தஸ்ஸ ஏவங் பச்சவெக்க²தோ தங் பச்சவெக்க²ணசித்தங் ப⁴வங்கே³ ஓதரதி. ஏவங் நித்³தா³யந்தோபி ஸதோ ஸம்பஜானோ நாம ஹோதீதி.
Satosampajānoti satiyā ceva sampajaññena ca samannāgato. Kathaṃ panesa niddāyanto sato sampajāno nāma hotīti? Purimappavattivasena. Ayaṃ hi caṅkame caṅkamanto niddāya okkamanabhāvaṃ ñatvā pavattamānaṃ kammaṭṭhānaṃ ṭhapetvā mañce vā phalake vā nipanno niddaṃ upagantvā puna pabujjhamāno kammaṭṭhānaṃ ṭhitaṭṭhāne gaṇhantoyeva pabujjhati. Tasmā niddāyantopi sato sampajāno nāma hoti. Ayaṃ tāva mūlakammaṭṭhāne nayova. Pariggahakammaṭṭhānavasenāpi panesa sato sampajāno nāma hoti. Kathaṃ? Ayaṃ hi caṅkamanto niddāya okkamanabhāvaṃ ñatvā pāsāṇaphalake vā mañce vā dakkhiṇena passena nipajjitvā paccavekkhati – ‘‘acetano kāyo acetane mañce patiṭṭhito, acetano mañco acetanāya pathaviyā, acetanā pathavī acetane udake, acetanaṃ udakaṃ acetane vāte, acetano vāto acetane ākāse patiṭṭhito. Tattha ākāsampi ‘ahaṃ vātaṃ ukkhipitvā ṭhita’nti na jānāti, vātopi ‘ahaṃ ākāse patiṭṭhito’ti na jānāti. Tathā vāto na jānāti. ‘Ahaṃ udakaṃ ukkhipitvā ṭhito’ti…pe… mañco na jānāti, ‘ahaṃ kāyaṃ ukkhipitvā ṭhito’ti, kāyo na jānāti ‘ahaṃ mañce patiṭṭhito’ti. Na hi tesaṃ aññamaññaṃ ābhogo vā samannāhāro vā manasikāro vā cetanā vā patthanā vā atthī’’ti. Tassa evaṃ paccavekkhato taṃ paccavekkhaṇacittaṃ bhavaṅge otarati. Evaṃ niddāyantopi sato sampajāno nāma hotīti.
உட்டா²னஸஞ்ஞங் மனஸிகரித்வாதி ‘‘எத்தகங் டா²னங் க³தே சந்தே³ வா தாரகாய வா உட்ட²ஹிஸ்ஸாமீ’’தி உட்டா²னகாலபரிச்சே²தி³கங் ஸஞ்ஞங் மனஸிகரித்வா, சித்தே ட²பெத்வாதி அத்தோ². ஏவங் கரித்வா ஸயிதோ ஹி யதா²பரிச்சி²ன்னேயேவ காலே உட்ட²ஹதி.
Uṭṭhānasaññaṃ manasikaritvāti ‘‘ettakaṃ ṭhānaṃ gate cande vā tārakāya vā uṭṭhahissāmī’’ti uṭṭhānakālaparicchedikaṃ saññaṃ manasikaritvā, citte ṭhapetvāti attho. Evaṃ karitvā sayito hi yathāparicchinneyeva kāle uṭṭhahati.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 6. அபண்ணகஸுத்தங் • 6. Apaṇṇakasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 6. அபண்ணகஸுத்தவண்ணனா • 6. Apaṇṇakasuttavaṇṇanā
