| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
6. அபண்ணகஸுத்தவண்ணனா
6. Apaṇṇakasuttavaṇṇanā
16. ச²ட்டே² விரஜ்ஜ²னகிரியா நாம பச்சா² ஸமாதா³தப்³ப³தாய அபண்ணகப்பயோக³ஸமாதா³னா விய ஹோதி, அவிரஜ்ஜ²னகிரியா பன பச்சா² அஸமாதா³தப்³ப³தாய அனூனாதி தங்ஸமங்கி³புக்³க³லோ அபண்ணகோ, தஸ்ஸ பா⁴வோ அபண்ணகதாதி ஆஹ ‘‘அபண்ணகபடிபத³ந்தி அவிரத்³த⁴படிபத³’’ந்திஆதி³. யஸ்மா ஸா அதி⁴ப்பேதத்த²ஸாத⁴னேன ஏகங்ஸிகா வட்டதோ நிய்யானாவஹா, தத்த² ச யுத்தியுத்தா அஸாராபக³தா அவிருத்³த⁴தாய அபச்சனீகா அனுலோமிகா அனுத⁴ம்மபூ⁴தா ச, தஸ்மா வுத்தங் ‘‘ஏகங்ஸபடிபத³’’ந்திஆதி³. ந தக்கக்³கா³ஹேன வா நயக்³கா³ஹேன வாதி தக்கக்³கா³ஹேன வா படிபன்னோ ந ஹோதி நயக்³கா³ஹேன வா அபண்ணகபடிபத³ங் படிபன்னோ. தத்த² தக்கக்³கா³ஹேன வாதி ஆசரியங் அலபி⁴த்வா ‘‘ஏவங் மே ஸுக³தி, நிப்³பா³னங் வா ப⁴விஸ்ஸதீ’’தி அத்தனோ தக்கக்³க³ஹணமத்தேன. நயக்³கா³ஹேனாதி பச்சக்க²தோ அதி³ஸ்வா நயதோ அனுமானதோ க³ஹணேன. ஏவங் க³ஹெத்வா படிபன்னோதி தக்கமத்தேன, நயக்³கா³ஹேன வா படிபன்னோ. பண்டி³தஸத்த²வாஹோ விய ஸம்பத்தீஹி ந பரிஹாயதீதி யோஜனா.
16. Chaṭṭhe virajjhanakiriyā nāma pacchā samādātabbatāya apaṇṇakappayogasamādānā viya hoti, avirajjhanakiriyā pana pacchā asamādātabbatāya anūnāti taṃsamaṅgipuggalo apaṇṇako, tassa bhāvo apaṇṇakatāti āha ‘‘apaṇṇakapaṭipadanti aviraddhapaṭipada’’ntiādi. Yasmā sā adhippetatthasādhanena ekaṃsikā vaṭṭato niyyānāvahā, tattha ca yuttiyuttā asārāpagatā aviruddhatāya apaccanīkā anulomikā anudhammabhūtā ca, tasmā vuttaṃ ‘‘ekaṃsapaṭipada’’ntiādi. Na takkaggāhena vā nayaggāhena vāti takkaggāhena vā paṭipanno na hoti nayaggāhena vā apaṇṇakapaṭipadaṃ paṭipanno. Tattha takkaggāhena vāti ācariyaṃ alabhitvā ‘‘evaṃ me sugati, nibbānaṃ vā bhavissatī’’ti attano takkaggahaṇamattena. Nayaggāhenāti paccakkhato adisvā nayato anumānato gahaṇena. Evaṃ gahetvā paṭipannoti takkamattena, nayaggāhena vā paṭipanno. Paṇḍitasatthavāho viya sampattīhi na parihāyatīti yojanā.
யங் ஸந்தா⁴ய வுத்தந்தி பரிஹானஞ்ச அபரிஹானஞ்ச ஸந்தா⁴ய ஜாதகே (ஜா॰ 1.1.1) வுத்தங். அயங் பனெத்த² கா³தா²ய அத்த²யோஜனா – அபண்ணகங் டா²னங் அவிரத்³த⁴காரணங் நிய்யானிககாரணங் ஏகே போ³தி⁴ஸத்தப்பமுகா² பண்டி³தமனுஸ்ஸா க³ண்ஹிங்ஸு. யே பன தே பா³லஸத்த²வாஹபுத்தப்பமுகா² தக்கிகா ஆஹு, தே து³தியங் ஸாபராத⁴ங் அனேகங்ஸிகங் டா²னங் அனிய்யானிகங் காரணங் அக்³க³ஹேஸுங், தே கண்ஹபடிபத³ங் படிபன்னா. தத்த² ஸுக்கபடிபதா³ அபரிஹானிபடிபதா³, கண்ஹபடிபதா³ பரிஹானிபடிபதா³, தஸ்மா யே ஸுக்கபடிபத³ங் படிபன்னா, தே அபரிஹீனா ஸொத்தி²பா⁴வங் பத்தா. யே பன கண்ஹபடிபத³ங் படிபன்னா, தே பரிஹீனா அனயப்³யஸனங் ஆபன்னாதி இமமத்த²ங் ப⁴க³வா அனாத²பிண்டி³கஸ்ஸ க³ஹபதினோ வத்வா உத்தரி இத³மாஹ ‘‘ஏதத³ஞ்ஞாய மேதா⁴வீ, தங் க³ண்ஹே யத³பண்ணக’’ந்தி.
Yaṃ sandhāya vuttanti parihānañca aparihānañca sandhāya jātake (jā. 1.1.1) vuttaṃ. Ayaṃ panettha gāthāya atthayojanā – apaṇṇakaṃ ṭhānaṃ aviraddhakāraṇaṃ niyyānikakāraṇaṃ eke bodhisattappamukhā paṇḍitamanussā gaṇhiṃsu. Ye pana te bālasatthavāhaputtappamukhā takkikā āhu, te dutiyaṃ sāparādhaṃ anekaṃsikaṃ ṭhānaṃ aniyyānikaṃ kāraṇaṃ aggahesuṃ, te kaṇhapaṭipadaṃ paṭipannā. Tattha sukkapaṭipadā aparihānipaṭipadā, kaṇhapaṭipadā parihānipaṭipadā, tasmā ye sukkapaṭipadaṃ paṭipannā, te aparihīnā sotthibhāvaṃ pattā. Ye pana kaṇhapaṭipadaṃ paṭipannā, te parihīnā anayabyasanaṃ āpannāti imamatthaṃ bhagavā anāthapiṇḍikassa gahapatino vatvā uttari idamāha ‘‘etadaññāya medhāvī, taṃ gaṇhe yadapaṇṇaka’’nti.
தத்த² ஏதத³ஞ்ஞாய மேதா⁴வீதி மேதா⁴தி லத்³த⁴னாமாய விஸுத்³தா⁴ய உத்தமாய பஞ்ஞாய ஸமன்னாக³தோ குலபுத்தோ ஏதங் அபண்ணகங் டா²னங் து³தியஞ்சாதி த்³வீஸு அதக்கக்³கா³ஹதக்கக்³கா³ஹஸங்கா²தேஸு டா²னேஸு கு³ணதோ³ஸங் வுத்³தி⁴ஹானிங் அத்தா²னத்த²ங் ஞத்வாதி அத்தோ². தங் க³ண்ஹே யத³பண்ணகந்தி யங் அபண்ணகங் ஏகங்ஸிகங் ஸுக்கபடிபதா³அபரிஹானியபடிபதா³ஸங்கா²தங் நிய்யானிககாரணங், ததே³வ க³ண்ஹெய்ய. கஸ்மா? ஏகங்ஸிகாதி³பா⁴வதோயேவ. இதரங் பன ந க³ண்ஹெய்ய. கஸ்மா? அனேகங்ஸிகாதி³பா⁴வதோயேவ.
Tattha etadaññāya medhāvīti medhāti laddhanāmāya visuddhāya uttamāya paññāya samannāgato kulaputto etaṃ apaṇṇakaṃ ṭhānaṃ dutiyañcāti dvīsu atakkaggāhatakkaggāhasaṅkhātesu ṭhānesu guṇadosaṃ vuddhihāniṃ atthānatthaṃ ñatvāti attho. Taṃ gaṇhe yadapaṇṇakanti yaṃ apaṇṇakaṃ ekaṃsikaṃ sukkapaṭipadāaparihāniyapaṭipadāsaṅkhātaṃ niyyānikakāraṇaṃ, tadeva gaṇheyya. Kasmā? Ekaṃsikādibhāvatoyeva. Itaraṃ pana na gaṇheyya. Kasmā? Anekaṃsikādibhāvatoyeva.
யவந்தி தாய ஸத்தா அமிஸ்ஸிதாபி ஸமானஜாதிதாய மிஸ்ஸிதா விய ஹொந்தீதி யோனி. ஸா பன அத்த²தோ அண்டா³தி³உப்பத்திட்டா²னவிஸிட்டோ² க²ந்தா⁴னங் பா⁴க³ஸோ பவத்திவிஸேஸோதி ஆஹ ‘‘க²ந்த⁴கொட்டா²ஸோ யோனி நாமா’’தி. காரணங் யோனி நாம, யோனீதி தங் தங் ப²லங் அனுபசிதஞாணஸம்பா⁴ரேஹி து³ரவகா³த⁴பே⁴த³தாய மிஸ்ஸிதங் விய ஹோதீதி. யதோ ஏகத்தனயேன ஸோ ஏவாயந்தி பா³லானங் மிச்சா²கா³ஹோ. பஸ்ஸாவமக்³கோ³ யோனி நாம யவந்தி தாய ஸத்தா யோனிஸம்ப³ந்தே⁴ன மிஸ்ஸிதா ஹொந்தீதி. பக்³க³ஹிதா அனுட்டா²னேன, புனப்புனங் ஆஸேவனாய பரிபுண்ணா.
Yavanti tāya sattā amissitāpi samānajātitāya missitā viya hontīti yoni. Sā pana atthato aṇḍādiuppattiṭṭhānavisiṭṭho khandhānaṃ bhāgaso pavattivisesoti āha ‘‘khandhakoṭṭhāso yoni nāmā’’ti. Kāraṇaṃ yoni nāma, yonīti taṃ taṃ phalaṃ anupacitañāṇasambhārehi duravagādhabhedatāya missitaṃ viya hotīti. Yato ekattanayena so evāyanti bālānaṃ micchāgāho. Passāvamaggo yoni nāma yavanti tāya sattā yonisambandhena missitā hontīti. Paggahitā anuṭṭhānena, punappunaṃ āsevanāya paripuṇṇā.
‘‘சக்கு²தோபீ’’திஆதி³ம்ஹி பன சக்கு²விஞ்ஞாணாதி³வீதீ²ஸு தத³னுக³தமனோவிஞ்ஞாணவீதீ²ஸு ச கிஞ்சாபி குஸலாதீ³னங் பவத்தி அத்தி², காமாஸவாத³யோ ஏவ பன வணதோ யூஸங் விய பக்³க⁴ரனகஅஸுசிபா⁴வேன ஸந்த³ந்தி, தஸ்மா தே ஏவ ‘‘ஆஸவா’’தி வுச்சந்தி. தத்த² ஹி பக்³க⁴ரனகஅஸுசிம்ஹி ஆஸவஸத்³தோ³ நிருள்ஹோதி. த⁴ம்மதோ யாவ கொ³த்ரபூ⁴தி ததோ பரங் மக்³க³ப²லேஸு அப்பவத்தனதோ வுத்தங். ஏதே ஹி ஆரம்மணகரணவஸேன த⁴ம்மே க³ச்ச²ந்தா ததோ பரங் ந க³ச்ச²ந்தி. நனு ததோ பரங் ப⁴வங்கா³தீ³னிபி க³ச்ச²ந்தீதி சே? ந, தேஸம்பி புப்³பே³ ஆலம்பி³தேஸு லோகியத⁴ம்மேஸு ஸாஸவபா⁴வேன அந்தோக³த⁴த்தா ததோ பரதாபா⁴வதோ. எத்த² ச கொ³த்ரபு⁴வசனேன கொ³த்ரபு⁴வோதா³னப²லஸமாபத்திபுரேசாரிகபரிகம்மானி வுத்தானீதி வேதி³தப்³பா³னி. பட²மமக்³க³புரேசாரிகமேவ வா கொ³த்ரபு⁴ அவதி⁴னித³ஸ்ஸனபா⁴வேன க³ஹிதங், ததோ பரங் பன மக்³க³ப²லஸமானதாய அஞ்ஞேஸு மக்³கே³ஸு மக்³க³வீதி²யங் ஸமாபத்திவீதீ²யங் நிரோதா⁴னந்தரஞ்ச பவத்தமானேஸு ப²லேஸு நிப்³பா³னே ச ஆஸவானங் பவத்தி நிவாரிதாதி வேதி³தப்³ப³ங். ஸவந்தீதி க³ச்ச²ந்தி, ஆரம்மணகரணவஸேன பவத்தந்தீதி அத்தோ². அவதி⁴அத்தோ² ஆ-காரோ, அவதி⁴ ச மரியாதா³பி⁴விதி⁴பே⁴த³தோ து³விதோ⁴. தத்த² மரியாத³ங் கிரியங் ப³ஹி கத்வா பவத்ததி யதா² ‘‘ஆபாடலீபுத்தங் வுட்டோ² தே³வோ’’தி. அபி⁴விதி⁴ பன கிரியங் ப்³யாபெத்வா பவத்ததி யதா² ‘‘ஆப⁴வக்³க³ங் ப⁴க³வதோ யஸோ பவத்ததீ’’தி. அபி⁴விதி⁴அத்தோ² சாயமா-காரோ இத⁴ க³ஹிதோதி வுத்தங் ‘‘அந்தோகரணத்தோ²’’தி.
‘‘Cakkhutopī’’tiādimhi pana cakkhuviññāṇādivīthīsu tadanugatamanoviññāṇavīthīsu ca kiñcāpi kusalādīnaṃ pavatti atthi, kāmāsavādayo eva pana vaṇato yūsaṃ viya paggharanakaasucibhāvena sandanti, tasmā te eva ‘‘āsavā’’ti vuccanti. Tattha hi paggharanakaasucimhi āsavasaddo niruḷhoti. Dhammato yāva gotrabhūti tato paraṃ maggaphalesu appavattanato vuttaṃ. Ete hi ārammaṇakaraṇavasena dhamme gacchantā tato paraṃ na gacchanti. Nanu tato paraṃ bhavaṅgādīnipi gacchantīti ce? Na, tesampi pubbe ālambitesu lokiyadhammesu sāsavabhāvena antogadhattā tato paratābhāvato. Ettha ca gotrabhuvacanena gotrabhuvodānaphalasamāpattipurecārikaparikammāni vuttānīti veditabbāni. Paṭhamamaggapurecārikameva vā gotrabhu avadhinidassanabhāvena gahitaṃ, tato paraṃ pana maggaphalasamānatāya aññesu maggesu maggavīthiyaṃ samāpattivīthīyaṃ nirodhānantarañca pavattamānesu phalesu nibbāne ca āsavānaṃ pavatti nivāritāti veditabbaṃ. Savantīti gacchanti, ārammaṇakaraṇavasena pavattantīti attho. Avadhiattho ā-kāro, avadhi ca mariyādābhividhibhedato duvidho. Tattha mariyādaṃ kiriyaṃ bahi katvā pavattati yathā ‘‘āpāṭalīputtaṃ vuṭṭho devo’’ti. Abhividhi pana kiriyaṃ byāpetvā pavattati yathā ‘‘ābhavaggaṃ bhagavato yaso pavattatī’’ti. Abhividhiattho cāyamā-kāro idha gahitoti vuttaṃ ‘‘antokaraṇattho’’ti.
மதி³ராத³யோதி ஆதி³-ஸத்³தே³ன ஸிந்த⁴வகாத³ம்ப³ரிகாபோதிகாதீ³னங் ஸங்க³ஹோ த³ட்ட²ப்³போ³. சிரபாரிவாஸியட்டோ² சிரபரிவுட்ட²தா புராணபா⁴வோ. அவிஜ்ஜா நாஹோஸீதிஆதீ³தி எத்த² ஆதி³-ஸத்³தே³ன ‘‘புரிமா, பி⁴க்க²வே, கோடி ந பஞ்ஞாயதி ப⁴வதண்ஹாயா’’தி (அ॰ நி॰ 10.62) இத³ங் ஸுத்தங் ஸங்க³ஹிதங். அவிஜ்ஜாஸவப⁴வாஸவானங் சிரபரிவுட்ட²தாய த³ஸ்ஸிதாய தப்³பா⁴வபா⁴வினோ காமாஸவஸ்ஸ சிரபரிவுட்ட²தா த³ஸ்ஸிதாவ ஹோதி. அஞ்ஞேஸு ச யதா²வுத்தே த⁴ம்மே ஓகாஸஞ்ச ஆரம்மணங் கத்வா பவத்தமானேஸு மானாதீ³ஸு விஜ்ஜமானேஸு அத்தத்தனியாதி³க்³கா³ஹவஸேன அபி⁴ப்³யாபனங் மத³கரணவஸேன ஆஸவஸதி³ஸதா ச ஏதேஸங்யேவ, ந அஞ்ஞேஸந்தி ஏதெஸ்வேவ ஆஸவஸத்³தோ³ நிருள்ஹோதி த³ட்ட²ப்³போ³. ஆயதங் அனாதி³காலிகத்தா. பஸவந்தீதி ப²லந்தி. ந ஹி கிஞ்சி ஸங்ஸாரது³க்க²ங் அத்தி², யங் ஆஸவேஹி வினா உப்பஜ்ஜெய்ய. புரிமானி செத்தா²தி ஏதேஸு சதூஸு அத்த²விகப்பேஸு புரிமானி தீணி. யத்தா²தி யேஸு ஸுத்தாபி⁴த⁴ம்மப்பதே³ஸேஸு. தத்த² யுஜ்ஜந்தி கிலேஸேஸுயேவ யதா²வுத்தஸ்ஸ அத்த²த்தயஸ்ஸ ஸம்ப⁴வதோ. பச்சி²மங் கம்மேபீதி பச்சி²மங் ‘‘ஆயதங் வா ஸங்ஸாரது³க்க²ங் ஸவந்தி பஸவந்தீ’’தி வுத்தனிப்³ப³சனங் கம்மேபி யுஜ்ஜதி து³க்க²ப்பஸவனஸ்ஸ கிலேஸகம்மஸாதா⁴ரணத்தா.
Madirādayoti ādi-saddena sindhavakādambarikāpotikādīnaṃ saṅgaho daṭṭhabbo. Cirapārivāsiyaṭṭho ciraparivuṭṭhatā purāṇabhāvo. Avijjā nāhosītiādīti ettha ādi-saddena ‘‘purimā, bhikkhave, koṭi na paññāyati bhavataṇhāyā’’ti (a. ni. 10.62) idaṃ suttaṃ saṅgahitaṃ. Avijjāsavabhavāsavānaṃ ciraparivuṭṭhatāya dassitāya tabbhāvabhāvino kāmāsavassa ciraparivuṭṭhatā dassitāva hoti. Aññesu ca yathāvutte dhamme okāsañca ārammaṇaṃ katvā pavattamānesu mānādīsu vijjamānesu attattaniyādiggāhavasena abhibyāpanaṃ madakaraṇavasena āsavasadisatā ca etesaṃyeva, na aññesanti etesveva āsavasaddo niruḷhoti daṭṭhabbo. Āyataṃ anādikālikattā. Pasavantīti phalanti. Na hi kiñci saṃsāradukkhaṃ atthi, yaṃ āsavehi vinā uppajjeyya. Purimāni cetthāti etesu catūsu atthavikappesu purimāni tīṇi. Yatthāti yesu suttābhidhammappadesesu. Tattha yujjanti kilesesuyeva yathāvuttassa atthattayassa sambhavato. Pacchimaṃ kammepīti pacchimaṃ ‘‘āyataṃ vā saṃsāradukkhaṃ savanti pasavantī’’ti vuttanibbacanaṃ kammepi yujjati dukkhappasavanassa kilesakammasādhāraṇattā.
தி³ட்ட²த⁴ம்மா வுச்சந்தி பச்சக்க²பூ⁴தா க²ந்தா⁴, தி³ட்ட²த⁴ம்மே ப⁴வா தி³ட்ட²த⁴ம்மிகா. விவாத³மூலபூ⁴தாதி விவாத³ஸ்ஸ மூலகாரணபூ⁴தா கோதூ⁴பனாஹமக்க²பலாஸஇஸ்ஸாமச்ச²ரியமாயாஸாடெ²ய்யத²ம்ப⁴ஸாரம்ப⁴மானாதிமானா. யேன தே³வூபபத்யஸ்ஸாதி யேன கம்மகிலேஸப்பகாரேன ஆஸவேன தே³வேஸு உபபத்தி நிப்³ப³த்தி அஸ்ஸ மய்ஹந்தி ஸம்ப³ந்தோ⁴. க³ந்த⁴ப்³போ³ வா விஹங்க³மோ ஆகாஸசாரீ அஸ்ஸந்தி விப⁴த்திங் விபரிணாமெத்வா யோஜேதப்³ப³ங். எத்த² ச யக்க²க³ந்த⁴ப்³ப³வினிமுத்தா ஸப்³பா³ தே³வதா தே³வக்³க³ஹணேன க³ஹிதா. நளோ வுச்சதி மூலங், தஸ்மா வினளீகதாதி விக³தனளா விக³தமூலா கதாதி அத்தோ². அவஸேஸா ச அகுஸலா த⁴ம்மாதி அகுஸலகம்மதோ அவஸேஸா அகுஸலா த⁴ம்மா ஆஸவாதி ஆக³தாதி ஸம்ப³ந்தோ⁴.
Diṭṭhadhammā vuccanti paccakkhabhūtā khandhā, diṭṭhadhamme bhavā diṭṭhadhammikā. Vivādamūlabhūtāti vivādassa mūlakāraṇabhūtā kodhūpanāhamakkhapalāsaissāmacchariyamāyāsāṭheyyathambhasārambhamānātimānā. Yena devūpapatyassāti yena kammakilesappakārena āsavena devesu upapatti nibbatti assa mayhanti sambandho. Gandhabbo vā vihaṅgamo ākāsacārī assanti vibhattiṃ vipariṇāmetvā yojetabbaṃ. Ettha ca yakkhagandhabbavinimuttā sabbā devatā devaggahaṇena gahitā. Naḷo vuccati mūlaṃ, tasmā vinaḷīkatāti vigatanaḷā vigatamūlā katāti attho. Avasesā ca akusalā dhammāti akusalakammato avasesā akusalā dhammā āsavāti āgatāti sambandho.
படிகா⁴தாயாதி படிஸேத⁴னாய. பரூபவாத³…பே॰… உபத்³த³வாதி இத³ங் யதி³ ப⁴க³வா ஸிக்கா²பத³ங் ந பஞ்ஞாபெய்ய, ததோ அஸத்³த⁴ம்மப்படிஸேவனஅதி³ன்னாதா³னபாணாதிபாதாதி³ஹேது யே உப்பஜ்ஜெய்யுங் பரூபவாதா³த³யோ தி³ட்ட²த⁴ம்மிகா நானப்பகாரா அனத்தா², யே ச தன்னிமித்தமேவ நிரயாதீ³ஸு நிப்³ப³த்தஸ்ஸ பஞ்சவித⁴ப³ந்த⁴னகம்மகாரணாதி³வஸேன மஹாது³க்கா²னுப⁴வாதி³ப்பகாரா அனத்தா², தே ஸந்தா⁴ய வுத்தங்.
Paṭighātāyāti paṭisedhanāya. Parūpavāda…pe… upaddavāti idaṃ yadi bhagavā sikkhāpadaṃ na paññāpeyya, tato asaddhammappaṭisevanaadinnādānapāṇātipātādihetu ye uppajjeyyuṃ parūpavādādayo diṭṭhadhammikā nānappakārā anatthā, ye ca tannimittameva nirayādīsu nibbattassa pañcavidhabandhanakammakāraṇādivasena mahādukkhānubhavādippakārā anatthā, te sandhāya vuttaṃ.
தே பனேதேதி ஏதே காமராகா³தி³கிலேஸதேபூ⁴மககம்மபரூபவாதா³தி³உப்பத்³த³வப்பகாரா ஆஸவா. யத்தா²தி யஸ்மிங் வினயாதி³பாளிப்பதே³ஸே. யதா²தி யேன து³விதா⁴தி³ப்பகாரேன அவஸேஸேஸு ச ஸுத்தந்தேஸு திதா⁴ ஆக³தாதி ஸம்ப³ந்தோ⁴. நிரயங் க³மெந்தீதி நிரயகா³மினியா. ச²க்கனிபாதேதி ச²க்கனிபாதே ஆஹுனெய்யஸுத்தே (அ॰ நி॰ 6.58). தத்த² ஹி ஆஸவா ச²தா⁴ ஆக³தா.
Tepaneteti ete kāmarāgādikilesatebhūmakakammaparūpavādādiuppaddavappakārā āsavā. Yatthāti yasmiṃ vinayādipāḷippadese. Yathāti yena duvidhādippakārena avasesesu ca suttantesu tidhā āgatāti sambandho. Nirayaṃ gamentīti nirayagāminiyā. Chakkanipāteti chakkanipāte āhuneyyasutte (a. ni. 6.58). Tattha hi āsavā chadhā āgatā.
ஸரஸபே⁴தோ³தி க²ணிகனிரோதோ⁴. கீ²ணாகாரோதி அச்சந்தாய கீ²ணதா. ஆஸவா கீ²யந்தி பஹீயந்தி ஏதேனாதி ஆஸவக்க²யோ, மக்³கோ³. ஆஸவானங் க²யந்தே உப்பஜ்ஜனதோ ஆஸவக்க²யோ, ப²லங். ஆஸவக்க²யேன பத்தப்³ப³தோ ஆஸவா கீ²யந்தி எத்தா²தி ஆஸவக்க²யோ, நிப்³பா³னங். விஸுத்³தி⁴மக்³கே³ (விஸுத்³தி⁴॰ 2.557-560) வித்தா²ரிதோ, தஸ்மா தத்த², தங் ஸங்வண்ணனாய ச வுத்தனயேன வேதி³தப்³போ³.
Sarasabhedoti khaṇikanirodho. Khīṇākāroti accantāya khīṇatā. Āsavā khīyanti pahīyanti etenāti āsavakkhayo, maggo. Āsavānaṃ khayante uppajjanato āsavakkhayo, phalaṃ. Āsavakkhayena pattabbato āsavā khīyanti etthāti āsavakkhayo, nibbānaṃ. Visuddhimagge (visuddhi. 2.557-560) vitthārito, tasmā tattha, taṃ saṃvaṇṇanāya ca vuttanayena veditabbo.
ததா²தி இமினா விஸுத்³தி⁴மக்³கே³ வித்தா²ரிததங் உபஸங்ஹரதி. குஸலப்பவத்திங் ஆவரந்தி நிவாரெந்தீதி ஆவரணீயா. புரிமப்பவத்திவஸேனாதி நித்³தோ³க்கமனதோ புப்³பே³ கம்மட்டா²னஸ்ஸ பவத்திவஸேன. ட²பெத்வாதி ஹத்த²க³தங் கிஞ்சி ட²பெந்தோ விய கம்மட்டா²னங் ஸதிஸம்பஜஞ்ஞவஸேன ட²பெத்வா கம்மட்டா²னமேவ மனஸிகரொந்தோ நித்³த³ங் ஓக்கமதி, ஜா²னஸமாபன்னோ விய யதா²பரிச்சி²ன்னேனேவ காலேன பபு³ஜ்ஜ²மானோ கம்மட்டா²னங் ட²பிதட்டா²னே க³ண்ஹந்தோயேவ பபு³ஜ்ஜ²தி நாம. தேன வுத்தங் ‘‘தஸ்மா…பே॰… நாம ஹோதீ’’தி. மூலகம்மட்டா²னேதி ஆதி³தோ பட்டா²ய பரிஹரியமானகம்மட்டா²னே. பரிக்³க³ஹகம்மட்டா²னவஸேனாதி ஸயனங் உபக³ச்ச²ந்தேன பரிக்³க³ஹமானகம்மட்டா²னமனஸிகாரவஸேன. ஸோ பன தா⁴துமனஸிகாரவஸேன இச்சி²தப்³போ³தி த³ஸ்ஸேதுங் ‘‘அயங் ஹீ’’திஆதி³ வுத்தங்.
Tathāti iminā visuddhimagge vitthāritataṃ upasaṃharati. Kusalappavattiṃ āvaranti nivārentīti āvaraṇīyā. Purimappavattivasenāti niddokkamanato pubbe kammaṭṭhānassa pavattivasena. Ṭhapetvāti hatthagataṃ kiñci ṭhapento viya kammaṭṭhānaṃ satisampajaññavasena ṭhapetvā kammaṭṭhānameva manasikaronto niddaṃ okkamati, jhānasamāpanno viya yathāparicchinneneva kālena pabujjhamāno kammaṭṭhānaṃ ṭhapitaṭṭhāne gaṇhantoyeva pabujjhati nāma. Tena vuttaṃ ‘‘tasmā…pe… nāma hotī’’ti. Mūlakammaṭṭhāneti ādito paṭṭhāya parihariyamānakammaṭṭhāne. Pariggahakammaṭṭhānavasenāti sayanaṃ upagacchantena pariggahamānakammaṭṭhānamanasikāravasena. So pana dhātumanasikāravasena icchitabboti dassetuṃ ‘‘ayaṃ hī’’tiādi vuttaṃ.
அபண்ணகஸுத்தவண்ணனா நிட்டி²தா.
Apaṇṇakasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 6. அபண்ணகஸுத்தங் • 6. Apaṇṇakasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 6. அபண்ணகஸுத்தவண்ணனா • 6. Apaṇṇakasuttavaṇṇanā
