| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (дийгаа) • Aṅguttaranikāya (ṭīkā) |
6. абан̣н̣агасуд̇д̇аван̣н̣анаа
6. Apaṇṇakasuttavaṇṇanā
16. чадтз вираж̇жханагирияаа наама бажчаа самаад̣̇аад̇аб̣б̣ад̇ааяа абан̣н̣агаббаяог̇асамаад̣̇аанаа вияа ход̇и, авираж̇жханагирияаа бана бажчаа асамаад̣̇аад̇аб̣б̣ад̇ааяа ануунаад̇и д̇ам̣саман̇г̇ибуг̇г̇ало абан̣н̣аго, д̇асса бхааво абан̣н̣агад̇аад̇и ааха ‘‘абан̣н̣агабадибад̣̇анд̇и авирад̣̇д̇хабадибад̣̇а’’нд̇иаад̣̇и. яасмаа саа ад̇хиббзд̇ад̇т̇асаад̇ханзна згам̣сигаа ваддад̇о нияяаанаавахаа, д̇ад̇т̇а жа яуд̇д̇ияуд̇д̇аа асаараабаг̇ад̇аа авируд̣̇д̇хад̇ааяа абажжанийгаа ануломигаа ануд̇хаммабхууд̇аа жа, д̇асмаа вуд̇д̇ам̣ ‘‘згам̣сабадибад̣̇а’’нд̇иаад̣̇и. на д̇аггаг̇г̇аахзна ваа наяаг̇г̇аахзна ваад̇и д̇аггаг̇г̇аахзна ваа бадибанно на ход̇и наяаг̇г̇аахзна ваа абан̣н̣агабадибад̣̇ам̣ бадибанно. д̇ад̇т̇а д̇аггаг̇г̇аахзна ваад̇и аажарияам̣ алабхид̇ваа ‘‘звам̣ мз суг̇ад̇и, ниб̣б̣аанам̣ ваа бхависсад̇ий’’д̇и ад̇д̇ано д̇аггаг̇г̇ахан̣амад̇д̇зна. наяаг̇г̇аахзнаад̇и бажжагкад̇о ад̣̇исваа наяад̇о анумаанад̇о г̇ахан̣зна. звам̣ г̇ахзд̇ваа бадибаннод̇и д̇аггамад̇д̇зна, наяаг̇г̇аахзна ваа бадибанно. бан̣д̣ид̇асад̇т̇аваахо вияа самбад̇д̇ийхи на барихааяад̇ийд̇и яож̇анаа.
16. Chaṭṭhe virajjhanakiriyā nāma pacchā samādātabbatāya apaṇṇakappayogasamādānā viya hoti, avirajjhanakiriyā pana pacchā asamādātabbatāya anūnāti taṃsamaṅgipuggalo apaṇṇako, tassa bhāvo apaṇṇakatāti āha ‘‘apaṇṇakapaṭipadanti aviraddhapaṭipada’’ntiādi. Yasmā sā adhippetatthasādhanena ekaṃsikā vaṭṭato niyyānāvahā, tattha ca yuttiyuttā asārāpagatā aviruddhatāya apaccanīkā anulomikā anudhammabhūtā ca, tasmā vuttaṃ ‘‘ekaṃsapaṭipada’’ntiādi. Na takkaggāhena vā nayaggāhena vāti takkaggāhena vā paṭipanno na hoti nayaggāhena vā apaṇṇakapaṭipadaṃ paṭipanno. Tattha takkaggāhena vāti ācariyaṃ alabhitvā ‘‘evaṃ me sugati, nibbānaṃ vā bhavissatī’’ti attano takkaggahaṇamattena. Nayaggāhenāti paccakkhato adisvā nayato anumānato gahaṇena. Evaṃ gahetvā paṭipannoti takkamattena, nayaggāhena vā paṭipanno. Paṇḍitasatthavāho viya sampattīhi na parihāyatīti yojanā.
яам̣ санд̇хааяа вуд̇д̇анд̇и барихаанан̃жа абарихаанан̃жа санд̇хааяа ж̇аад̇агз (ж̇аа. 1.1.1) вуд̇д̇ам̣. аяам̣ банзд̇т̇а г̇аат̇ааяа ад̇т̇аяож̇анаа – абан̣н̣агам̣ таанам̣ авирад̣̇д̇хагааран̣ам̣ нияяаанигагааран̣ам̣ згз б̣од̇хисад̇д̇аббамукаа бан̣д̣ид̇амануссаа г̇ан̣хим̣су. яз бана д̇з б̣ааласад̇т̇аваахабуд̇д̇аббамукаа д̇аггигаа ааху, д̇з д̣̇уд̇ияам̣ саабараад̇хам̣ анзгам̣сигам̣ таанам̣ анияяаанигам̣ гааран̣ам̣ аг̇г̇ахзсум̣, д̇з ган̣хабадибад̣̇ам̣ бадибаннаа. д̇ад̇т̇а суггабадибад̣̇аа абарихаанибадибад̣̇аа, ган̣хабадибад̣̇аа барихаанибадибад̣̇аа, д̇асмаа яз суггабадибад̣̇ам̣ бадибаннаа, д̇з абарихийнаа сод̇т̇ибхаавам̣ бад̇д̇аа. яз бана ган̣хабадибад̣̇ам̣ бадибаннаа, д̇з барихийнаа анаяаб̣яасанам̣ аабаннаад̇и имамад̇т̇ам̣ бхаг̇аваа анаат̇абин̣д̣игасса г̇ахабад̇ино вад̇ваа уд̇д̇ари ид̣̇амааха ‘‘зд̇ад̣̇ан̃н̃ааяа мзд̇хаавий, д̇ам̣ г̇ан̣хз яад̣̇абан̣н̣ага’’нд̇и.
Yaṃ sandhāya vuttanti parihānañca aparihānañca sandhāya jātake (jā. 1.1.1) vuttaṃ. Ayaṃ panettha gāthāya atthayojanā – apaṇṇakaṃ ṭhānaṃ aviraddhakāraṇaṃ niyyānikakāraṇaṃ eke bodhisattappamukhā paṇḍitamanussā gaṇhiṃsu. Ye pana te bālasatthavāhaputtappamukhā takkikā āhu, te dutiyaṃ sāparādhaṃ anekaṃsikaṃ ṭhānaṃ aniyyānikaṃ kāraṇaṃ aggahesuṃ, te kaṇhapaṭipadaṃ paṭipannā. Tattha sukkapaṭipadā aparihānipaṭipadā, kaṇhapaṭipadā parihānipaṭipadā, tasmā ye sukkapaṭipadaṃ paṭipannā, te aparihīnā sotthibhāvaṃ pattā. Ye pana kaṇhapaṭipadaṃ paṭipannā, te parihīnā anayabyasanaṃ āpannāti imamatthaṃ bhagavā anāthapiṇḍikassa gahapatino vatvā uttari idamāha ‘‘etadaññāya medhāvī, taṃ gaṇhe yadapaṇṇaka’’nti.
д̇ад̇т̇а зд̇ад̣̇ан̃н̃ааяа мзд̇хаавийд̇и мзд̇хаад̇и лад̣̇д̇ханаамааяа висуд̣̇д̇хааяа уд̇д̇амааяа бан̃н̃ааяа саманнааг̇ад̇о гулабуд̇д̇о зд̇ам̣ абан̣н̣агам̣ таанам̣ д̣̇уд̇ияан̃жаад̇и д̣̇вийсу ад̇аггаг̇г̇аахад̇аггаг̇г̇аахасан̇каад̇зсу таанзсу г̇ун̣ад̣̇осам̣ вуд̣̇д̇хихааним̣ ад̇т̇аанад̇т̇ам̣ н̃ад̇ваад̇и ад̇т̇о. д̇ам̣ г̇ан̣хз яад̣̇абан̣н̣аганд̇и яам̣ абан̣н̣агам̣ згам̣сигам̣ суггабадибад̣̇ааабарихаанияабадибад̣̇аасан̇каад̇ам̣ нияяаанигагааран̣ам̣, д̇ад̣̇зва г̇ан̣хзяяа. гасмаа? згам̣сигаад̣̇ибхаавад̇оязва. ид̇арам̣ бана на г̇ан̣хзяяа. гасмаа? анзгам̣сигаад̣̇ибхаавад̇оязва.
Tattha etadaññāya medhāvīti medhāti laddhanāmāya visuddhāya uttamāya paññāya samannāgato kulaputto etaṃ apaṇṇakaṃ ṭhānaṃ dutiyañcāti dvīsu atakkaggāhatakkaggāhasaṅkhātesu ṭhānesu guṇadosaṃ vuddhihāniṃ atthānatthaṃ ñatvāti attho. Taṃ gaṇhe yadapaṇṇakanti yaṃ apaṇṇakaṃ ekaṃsikaṃ sukkapaṭipadāaparihāniyapaṭipadāsaṅkhātaṃ niyyānikakāraṇaṃ, tadeva gaṇheyya. Kasmā? Ekaṃsikādibhāvatoyeva. Itaraṃ pana na gaṇheyya. Kasmā? Anekaṃsikādibhāvatoyeva.
яаванд̇и д̇ааяа сад̇д̇аа амиссид̇ааби самаанаж̇аад̇ид̇ааяа миссид̇аа вияа хонд̇ийд̇и яони. саа бана ад̇т̇ад̇о ан̣д̣аад̣̇иуббад̇д̇идтаанависидто канд̇хаанам̣ бхааг̇асо бавад̇д̇ивисзсод̇и ааха ‘‘канд̇хагодтаасо яони наамаа’’д̇и. гааран̣ам̣ яони наама, яонийд̇и д̇ам̣ д̇ам̣ палам̣ анубажид̇ан̃аан̣асамбхаарзхи д̣̇ураваг̇аад̇хабхзд̣̇ад̇ааяа миссид̇ам̣ вияа ход̇ийд̇и. яад̇о згад̇д̇анаязна со звааяанд̇и б̣аалаанам̣ мижчааг̇аахо. бассаавамаг̇г̇о яони наама яаванд̇и д̇ааяа сад̇д̇аа яонисамб̣анд̇хзна миссид̇аа хонд̇ийд̇и. баг̇г̇ахид̇аа анудтаанзна, бунаббунам̣ аасзванааяа барибун̣н̣аа.
Yavanti tāya sattā amissitāpi samānajātitāya missitā viya hontīti yoni. Sā pana atthato aṇḍādiuppattiṭṭhānavisiṭṭho khandhānaṃ bhāgaso pavattivisesoti āha ‘‘khandhakoṭṭhāso yoni nāmā’’ti. Kāraṇaṃ yoni nāma, yonīti taṃ taṃ phalaṃ anupacitañāṇasambhārehi duravagādhabhedatāya missitaṃ viya hotīti. Yato ekattanayena so evāyanti bālānaṃ micchāgāho. Passāvamaggo yoni nāma yavanti tāya sattā yonisambandhena missitā hontīti. Paggahitā anuṭṭhānena, punappunaṃ āsevanāya paripuṇṇā.
‘‘жагкуд̇обий’’д̇иаад̣̇имхи бана жагкувин̃н̃аан̣аад̣̇ивийт̇ийсу д̇ад̣̇ануг̇ад̇амановин̃н̃аан̣авийт̇ийсу жа гин̃жааби гусалаад̣̇ийнам̣ бавад̇д̇и ад̇т̇и, гаамаасаваад̣̇аяо зва бана ван̣ад̇о яуусам̣ вияа баг̇гхаранагаасужибхаавзна санд̣̇анд̇и, д̇асмаа д̇з зва ‘‘аасаваа’’д̇и вужжанд̇и. д̇ад̇т̇а хи баг̇гхаранагаасужимхи аасавасад̣̇д̣̇о нирул̣ход̇и. д̇хаммад̇о яаава г̇од̇рабхууд̇и д̇ад̇о барам̣ маг̇г̇апалзсу аббавад̇д̇анад̇о вуд̇д̇ам̣. зд̇з хи аарамман̣агаран̣авасзна д̇хаммз г̇ажчанд̇аа д̇ад̇о барам̣ на г̇ажчанд̇и. нану д̇ад̇о барам̣ бхаван̇г̇аад̣̇ийниби г̇ажчанд̇ийд̇и жз? на, д̇зсамби буб̣б̣з ааламб̣ид̇зсу логияад̇хаммзсу саасавабхаавзна анд̇ог̇ад̇хад̇д̇аа д̇ад̇о барад̇аабхаавад̇о. зд̇т̇а жа г̇од̇рабхуважанзна г̇од̇рабхувод̣̇аанапаласамаабад̇д̇ибурзжааригабаригаммаани вуд̇д̇аанийд̇и взд̣̇ид̇аб̣б̣аани. батамамаг̇г̇абурзжааригамзва ваа г̇од̇рабху авад̇хинид̣̇ассанабхаавзна г̇ахид̇ам̣, д̇ад̇о барам̣ бана маг̇г̇апаласамаанад̇ааяа ан̃н̃зсу маг̇г̇зсу маг̇г̇авийт̇ияам̣ самаабад̇д̇ивийт̇ийяам̣ нирод̇хаананд̇аран̃жа бавад̇д̇амаанзсу палзсу ниб̣б̣аанз жа аасаваанам̣ бавад̇д̇и ниваарид̇аад̇и взд̣̇ид̇аб̣б̣ам̣. саванд̇ийд̇и г̇ажчанд̇и, аарамман̣агаран̣авасзна бавад̇д̇анд̇ийд̇и ад̇т̇о. авад̇хиад̇т̇о аа-гааро, авад̇хи жа марияаад̣̇аабхивид̇хибхзд̣̇ад̇о д̣̇увид̇хо. д̇ад̇т̇а марияаад̣̇ам̣ гирияам̣ б̣ахи гад̇ваа бавад̇д̇ад̇и яат̇аа ‘‘аабаадалийбуд̇д̇ам̣ вудто д̣̇зво’’д̇и. абхивид̇хи бана гирияам̣ б̣яаабзд̇ваа бавад̇д̇ад̇и яат̇аа ‘‘аабхаваг̇г̇ам̣ бхаг̇авад̇о яасо бавад̇д̇ад̇ий’’д̇и. абхивид̇хиад̇т̇о жааяамаа-гааро ид̇ха г̇ахид̇од̇и вуд̇д̇ам̣ ‘‘анд̇огаран̣ад̇т̇о’’д̇и.
‘‘Cakkhutopī’’tiādimhi pana cakkhuviññāṇādivīthīsu tadanugatamanoviññāṇavīthīsu ca kiñcāpi kusalādīnaṃ pavatti atthi, kāmāsavādayo eva pana vaṇato yūsaṃ viya paggharanakaasucibhāvena sandanti, tasmā te eva ‘‘āsavā’’ti vuccanti. Tattha hi paggharanakaasucimhi āsavasaddo niruḷhoti. Dhammato yāva gotrabhūti tato paraṃ maggaphalesu appavattanato vuttaṃ. Ete hi ārammaṇakaraṇavasena dhamme gacchantā tato paraṃ na gacchanti. Nanu tato paraṃ bhavaṅgādīnipi gacchantīti ce? Na, tesampi pubbe ālambitesu lokiyadhammesu sāsavabhāvena antogadhattā tato paratābhāvato. Ettha ca gotrabhuvacanena gotrabhuvodānaphalasamāpattipurecārikaparikammāni vuttānīti veditabbāni. Paṭhamamaggapurecārikameva vā gotrabhu avadhinidassanabhāvena gahitaṃ, tato paraṃ pana maggaphalasamānatāya aññesu maggesu maggavīthiyaṃ samāpattivīthīyaṃ nirodhānantarañca pavattamānesu phalesu nibbāne ca āsavānaṃ pavatti nivāritāti veditabbaṃ. Savantīti gacchanti, ārammaṇakaraṇavasena pavattantīti attho. Avadhiattho ā-kāro, avadhi ca mariyādābhividhibhedato duvidho. Tattha mariyādaṃ kiriyaṃ bahi katvā pavattati yathā ‘‘āpāṭalīputtaṃ vuṭṭho devo’’ti. Abhividhi pana kiriyaṃ byāpetvā pavattati yathā ‘‘ābhavaggaṃ bhagavato yaso pavattatī’’ti. Abhividhiattho cāyamā-kāro idha gahitoti vuttaṃ ‘‘antokaraṇattho’’ti.
мад̣̇ираад̣̇аяод̇и аад̣̇и-сад̣̇д̣̇зна синд̇хавагаад̣̇амб̣аригаабод̇игаад̣̇ийнам̣ сан̇г̇ахо д̣̇адтаб̣б̣о. жирабаариваасияадто жирабаривудтад̇аа бураан̣абхааво. авиж̇ж̇аа наахосийд̇иаад̣̇ийд̇и зд̇т̇а аад̣̇и-сад̣̇д̣̇зна ‘‘буримаа, бхигкавз, годи на бан̃н̃ааяад̇и бхавад̇ан̣хааяаа’’д̇и (а. ни. 10.62) ид̣̇ам̣ суд̇д̇ам̣ сан̇г̇ахид̇ам̣. авиж̇ж̇аасавабхаваасаваанам̣ жирабаривудтад̇ааяа д̣̇ассид̇ааяа д̇аб̣бхаавабхаавино гаамаасавасса жирабаривудтад̇аа д̣̇ассид̇аава ход̇и. ан̃н̃зсу жа яат̇аавуд̇д̇з д̇хаммз огаасан̃жа аарамман̣ам̣ гад̇ваа бавад̇д̇амаанзсу маанаад̣̇ийсу виж̇ж̇амаанзсу ад̇д̇ад̇д̇анияаад̣̇иг̇г̇аахавасзна абхиб̣яаабанам̣ мад̣̇агаран̣авасзна аасавасад̣̇исад̇аа жа зд̇зсам̣язва, на ан̃н̃зсанд̇и зд̇зсвзва аасавасад̣̇д̣̇о нирул̣ход̇и д̣̇адтаб̣б̣о. ааяад̇ам̣ анаад̣̇игаалигад̇д̇аа. басаванд̇ийд̇и паланд̇и. на хи гин̃жи сам̣саарад̣̇угкам̣ ад̇т̇и, яам̣ аасавзхи винаа уббаж̇ж̇зяяа. буримаани жзд̇т̇аад̇и зд̇зсу жад̇уусу ад̇т̇авигаббзсу буримаани д̇ийн̣и. яад̇т̇аад̇и язсу суд̇д̇аабхид̇хаммаббад̣̇зсзсу. д̇ад̇т̇а яуж̇ж̇анд̇и гилзсзсуязва яат̇аавуд̇д̇асса ад̇т̇ад̇д̇аяасса самбхавад̇о. бажчимам̣ гаммзбийд̇и бажчимам̣ ‘‘ааяад̇ам̣ ваа сам̣саарад̣̇угкам̣ саванд̇и басаванд̇ий’’д̇и вуд̇д̇аниб̣б̣ажанам̣ гаммзби яуж̇ж̇ад̇и д̣̇угкаббасаванасса гилзсагаммасаад̇хааран̣ад̇д̇аа.
Madirādayoti ādi-saddena sindhavakādambarikāpotikādīnaṃ saṅgaho daṭṭhabbo. Cirapārivāsiyaṭṭho ciraparivuṭṭhatā purāṇabhāvo. Avijjā nāhosītiādīti ettha ādi-saddena ‘‘purimā, bhikkhave, koṭi na paññāyati bhavataṇhāyā’’ti (a. ni. 10.62) idaṃ suttaṃ saṅgahitaṃ. Avijjāsavabhavāsavānaṃ ciraparivuṭṭhatāya dassitāya tabbhāvabhāvino kāmāsavassa ciraparivuṭṭhatā dassitāva hoti. Aññesu ca yathāvutte dhamme okāsañca ārammaṇaṃ katvā pavattamānesu mānādīsu vijjamānesu attattaniyādiggāhavasena abhibyāpanaṃ madakaraṇavasena āsavasadisatā ca etesaṃyeva, na aññesanti etesveva āsavasaddo niruḷhoti daṭṭhabbo. Āyataṃ anādikālikattā. Pasavantīti phalanti. Na hi kiñci saṃsāradukkhaṃ atthi, yaṃ āsavehi vinā uppajjeyya. Purimāni cetthāti etesu catūsu atthavikappesu purimāni tīṇi. Yatthāti yesu suttābhidhammappadesesu. Tattha yujjanti kilesesuyeva yathāvuttassa atthattayassa sambhavato. Pacchimaṃ kammepīti pacchimaṃ ‘‘āyataṃ vā saṃsāradukkhaṃ savanti pasavantī’’ti vuttanibbacanaṃ kammepi yujjati dukkhappasavanassa kilesakammasādhāraṇattā.
д̣̇идтад̇хаммаа вужжанд̇и бажжагкабхууд̇аа канд̇хаа, д̣̇идтад̇хаммз бхаваа д̣̇идтад̇хаммигаа. виваад̣̇амуулабхууд̇аад̇и виваад̣̇асса муулагааран̣абхууд̇аа год̇хуубанаахамагкабалаасаиссаамажчарияамааяаасаатзяяат̇амбхасаарамбхамаанаад̇имаанаа. язна д̣̇звуубабад̇яассаад̇и язна гаммагилзсаббагаарзна аасавзна д̣̇звзсу убабад̇д̇и ниб̣б̣ад̇д̇и асса маяханд̇и самб̣анд̇хо. г̇анд̇хаб̣б̣о ваа вихан̇г̇амо аагаасажаарий ассанд̇и вибхад̇д̇им̣ вибарин̣аамзд̇ваа яож̇зд̇аб̣б̣ам̣. зд̇т̇а жа яагкаг̇анд̇хаб̣б̣авинимуд̇д̇аа саб̣б̣аа д̣̇звад̇аа д̣̇зваг̇г̇ахан̣зна г̇ахид̇аа. нал̣о вужжад̇и муулам̣, д̇асмаа винал̣ийгад̇аад̇и виг̇ад̇анал̣аа виг̇ад̇амуулаа гад̇аад̇и ад̇т̇о. авасзсаа жа агусалаа д̇хаммаад̇и агусалагаммад̇о авасзсаа агусалаа д̇хаммаа аасаваад̇и ааг̇ад̇аад̇и самб̣анд̇хо.
Diṭṭhadhammā vuccanti paccakkhabhūtā khandhā, diṭṭhadhamme bhavā diṭṭhadhammikā. Vivādamūlabhūtāti vivādassa mūlakāraṇabhūtā kodhūpanāhamakkhapalāsaissāmacchariyamāyāsāṭheyyathambhasārambhamānātimānā. Yena devūpapatyassāti yena kammakilesappakārena āsavena devesu upapatti nibbatti assa mayhanti sambandho. Gandhabbo vā vihaṅgamo ākāsacārī assanti vibhattiṃ vipariṇāmetvā yojetabbaṃ. Ettha ca yakkhagandhabbavinimuttā sabbā devatā devaggahaṇena gahitā. Naḷo vuccati mūlaṃ, tasmā vinaḷīkatāti vigatanaḷā vigatamūlā katāti attho. Avasesā ca akusalā dhammāti akusalakammato avasesā akusalā dhammā āsavāti āgatāti sambandho.
бадигхаад̇ааяаад̇и бадисзд̇ханааяа. баруубаваад̣̇а…бз… убад̣̇д̣̇аваад̇и ид̣̇ам̣ яад̣̇и бхаг̇аваа сигкаабад̣̇ам̣ на бан̃н̃аабзяяа, д̇ад̇о асад̣̇д̇хаммаббадисзванаад̣̇иннаад̣̇аанабаан̣аад̇ибаад̇аад̣̇ихзд̇у яз уббаж̇ж̇зяяум̣ баруубаваад̣̇аад̣̇аяо д̣̇идтад̇хаммигаа наанаббагаараа анад̇т̇аа, яз жа д̇аннимид̇д̇амзва нираяаад̣̇ийсу ниб̣б̣ад̇д̇асса бан̃жавид̇хаб̣анд̇ханагаммагааран̣аад̣̇ивасзна махаад̣̇угкаанубхаваад̣̇иббагаараа анад̇т̇аа, д̇з санд̇хааяа вуд̇д̇ам̣.
Paṭighātāyāti paṭisedhanāya. Parūpavāda…pe… upaddavāti idaṃ yadi bhagavā sikkhāpadaṃ na paññāpeyya, tato asaddhammappaṭisevanaadinnādānapāṇātipātādihetu ye uppajjeyyuṃ parūpavādādayo diṭṭhadhammikā nānappakārā anatthā, ye ca tannimittameva nirayādīsu nibbattassa pañcavidhabandhanakammakāraṇādivasena mahādukkhānubhavādippakārā anatthā, te sandhāya vuttaṃ.
д̇з банзд̇зд̇и зд̇з гаамарааг̇аад̣̇игилзсад̇збхуумагагаммабаруубаваад̣̇аад̣̇иуббад̣̇д̣̇аваббагаараа аасаваа. яад̇т̇аад̇и яасмим̣ винаяаад̣̇ибаал̣иббад̣̇зсз. яат̇аад̇и язна д̣̇увид̇хаад̣̇иббагаарзна авасзсзсу жа суд̇д̇анд̇зсу д̇ид̇хаа ааг̇ад̇аад̇и самб̣анд̇хо. нираяам̣ г̇амзнд̇ийд̇и нираяаг̇ааминияаа. чагганибаад̇зд̇и чагганибаад̇з аахунзяяасуд̇д̇з (а. ни. 6.58). д̇ад̇т̇а хи аасаваа чад̇хаа ааг̇ад̇аа.
Tepaneteti ete kāmarāgādikilesatebhūmakakammaparūpavādādiuppaddavappakārā āsavā. Yatthāti yasmiṃ vinayādipāḷippadese. Yathāti yena duvidhādippakārena avasesesu ca suttantesu tidhā āgatāti sambandho. Nirayaṃ gamentīti nirayagāminiyā. Chakkanipāteti chakkanipāte āhuneyyasutte (a. ni. 6.58). Tattha hi āsavā chadhā āgatā.
сарасабхзд̣̇од̇и кан̣иганирод̇хо. кийн̣аагаарод̇и ажжанд̇ааяа кийн̣ад̇аа. аасаваа кийяанд̇и бахийяанд̇и зд̇знаад̇и аасавагкаяо, маг̇г̇о. аасаваанам̣ каяанд̇з уббаж̇ж̇анад̇о аасавагкаяо, палам̣. аасавагкаязна бад̇д̇аб̣б̣ад̇о аасаваа кийяанд̇и зд̇т̇аад̇и аасавагкаяо, ниб̣б̣аанам̣. висуд̣̇д̇химаг̇г̇з (висуд̣̇д̇хи. 2.557-560) вид̇т̇аарид̇о, д̇асмаа д̇ад̇т̇а, д̇ам̣ сам̣ван̣н̣анааяа жа вуд̇д̇анаязна взд̣̇ид̇аб̣б̣о.
Sarasabhedoti khaṇikanirodho. Khīṇākāroti accantāya khīṇatā. Āsavā khīyanti pahīyanti etenāti āsavakkhayo, maggo. Āsavānaṃ khayante uppajjanato āsavakkhayo, phalaṃ. Āsavakkhayena pattabbato āsavā khīyanti etthāti āsavakkhayo, nibbānaṃ. Visuddhimagge (visuddhi. 2.557-560) vitthārito, tasmā tattha, taṃ saṃvaṇṇanāya ca vuttanayena veditabbo.
д̇ат̇аад̇и иминаа висуд̣̇д̇химаг̇г̇з вид̇т̇аарид̇ад̇ам̣ убасам̣харад̇и. гусалаббавад̇д̇им̣ ааваранд̇и ниваарзнд̇ийд̇и ааваран̣ийяаа. буримаббавад̇д̇ивасзнаад̇и нид̣̇д̣̇оггаманад̇о буб̣б̣з гаммадтаанасса бавад̇д̇ивасзна. табзд̇ваад̇и хад̇т̇аг̇ад̇ам̣ гин̃жи табзнд̇о вияа гаммадтаанам̣ сад̇исамбаж̇ан̃н̃авасзна табзд̇ваа гаммадтаанамзва манасигаронд̇о нид̣̇д̣̇ам̣ оггамад̇и, жхаанасамаабанно вияа яат̇аабарижчиннзнзва гаалзна баб̣уж̇жхамаано гаммадтаанам̣ табид̇адтаанз г̇ан̣ханд̇оязва баб̣уж̇жхад̇и наама. д̇зна вуд̇д̇ам̣ ‘‘д̇асмаа…бз… наама ход̇ий’’д̇и. муулагаммадтаанзд̇и аад̣̇ид̇о бадтааяа барихарияамаанагаммадтаанз. бариг̇г̇ахагаммадтаанавасзнаад̇и саяанам̣ убаг̇ажчанд̇зна бариг̇г̇ахамаанагаммадтаанаманасигааравасзна. со бана д̇хаад̇уманасигааравасзна ижчид̇аб̣б̣од̇и д̣̇ассзд̇ум̣ ‘‘аяам̣ хий’’д̇иаад̣̇и вуд̇д̇ам̣.
Tathāti iminā visuddhimagge vitthāritataṃ upasaṃharati. Kusalappavattiṃ āvaranti nivārentīti āvaraṇīyā. Purimappavattivasenāti niddokkamanato pubbe kammaṭṭhānassa pavattivasena. Ṭhapetvāti hatthagataṃ kiñci ṭhapento viya kammaṭṭhānaṃ satisampajaññavasena ṭhapetvā kammaṭṭhānameva manasikaronto niddaṃ okkamati, jhānasamāpanno viya yathāparicchinneneva kālena pabujjhamāno kammaṭṭhānaṃ ṭhapitaṭṭhāne gaṇhantoyeva pabujjhati nāma. Tena vuttaṃ ‘‘tasmā…pe… nāma hotī’’ti. Mūlakammaṭṭhāneti ādito paṭṭhāya parihariyamānakammaṭṭhāne. Pariggahakammaṭṭhānavasenāti sayanaṃ upagacchantena pariggahamānakammaṭṭhānamanasikāravasena. So pana dhātumanasikāravasena icchitabboti dassetuṃ ‘‘ayaṃ hī’’tiādi vuttaṃ.
абан̣н̣агасуд̇д̇аван̣н̣анаа нидтид̇аа.
Apaṇṇakasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 6. абан̣н̣агасуд̇д̇ам̣ • 6. Apaṇṇakasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) / 6. абан̣н̣агасуд̇д̇аван̣н̣анаа • 6. Apaṇṇakasuttavaṇṇanā
