| Library / Tipiṭaka / д̇ибидага • Tipiṭaka / т̇зраг̇аат̇аа-адтагат̇аа • Theragāthā-aṭṭhakathā |
7. (абара)-г̇од̇амад̇т̇зраг̇аат̇ааван̣н̣анаа
7. (Apara)-gotamattheragāthāvaṇṇanā
виж̇аанзяяа сагам̣ ад̇т̇анд̇иаад̣̇игаа ааяасмад̇о абарасса г̇од̇амад̇т̇зрасса г̇аат̇аа. гаа уббад̇д̇и? аяамби буримаб̣уд̣̇д̇хзсу гад̇аад̇хигааро д̇ад̇т̇а д̇ад̇т̇а бхавз виваддуубаниссаяам̣ гусалам̣ убажинид̇ваа амхаагам̣ бхаг̇авад̇о уббад̇д̇ид̇о бурзд̇арамзва саавад̇т̇ияам̣ уд̣̇ижжаб̣раахман̣агулз ниб̣б̣ад̇д̇ид̇ваа ваяаббад̇д̇о д̇ин̣н̣ам̣ взд̣̇аанам̣ баараг̇уу худ̇ваа, ваад̣̇амаг̇г̇ам̣ уг̇г̇ахзд̇ваа ад̇д̇ано ваад̣̇асса убари уд̇д̇арим̣ вад̣̇анд̇ам̣ алабханд̇о д̇зхи д̇зхи виг̇г̇аахигагат̇ам̣ ануяуд̇д̇о вижарад̇и. ат̇а амхаагам̣ бхаг̇аваа логз уббаж̇ж̇ид̇ваа бавад̇д̇ид̇аварад̇хаммажагго анубуб̣б̣зна яасаад̣̇игз взнзяяз винзд̇ваа анаат̇абин̣д̣игасса абхияаажанааяа саавад̇т̇им̣ убаг̇ажчи. д̇ад̣̇аа сад̇т̇у ж̇зд̇аванабадиг̇г̇ахз бадилад̣̇д̇хасад̣̇д̇хо сад̇т̇аарам̣ убасан̇гамид̇ваа д̇хаммам̣ суд̇ваа баб̣б̣аж̇ж̇ам̣ яаажи. сад̇т̇аа ан̃н̃ад̇арам̣ бин̣д̣ажааригам̣ бхигкум̣ аан̣аабзси – ‘‘бхигку, имам̣ баб̣б̣ааж̇зхий’’д̇и. со д̇зна баб̣б̣ааж̇ияамаано кураг̇г̇зязва арахад̇д̇ам̣ баабун̣ид̇ваа госалаж̇анабад̣̇ам̣ г̇анд̇ваа д̇ад̇т̇а жирам̣ васид̇ваа буна саавад̇т̇им̣ бажжааг̇ами. д̇ам̣ б̣ахуу н̃аад̇агаа б̣раахман̣амахаасаалаа убасан̇гамид̇ваа баяирубаасид̇ваа нисиннаа ‘‘имасмим̣ логз б̣ахуу саман̣аб̣раахман̣аа сам̣саарз суд̣̇д̇хиваад̣̇аа, д̇зсу гад̇амзсам̣ ну ко ваад̣̇о нияяааниго, гат̇ам̣ бадибаж̇ж̇анд̇о сам̣саарад̇о суж̇жхад̇ий’’д̇и бужчим̣су. т̇зро д̇зсам̣ д̇амад̇т̇ам̣ багаасзнд̇о –
Vijāneyya sakaṃ atthantiādikā āyasmato aparassa gotamattherassa gāthā. Kā uppatti? Ayampi purimabuddhesu katādhikāro tattha tattha bhave vivaṭṭūpanissayaṃ kusalaṃ upacinitvā amhākaṃ bhagavato uppattito puretarameva sāvatthiyaṃ udiccabrāhmaṇakule nibbattitvā vayappatto tiṇṇaṃ vedānaṃ pāragū hutvā, vādamaggaṃ uggahetvā attano vādassa upari uttariṃ vadantaṃ alabhanto tehi tehi viggāhikakathaṃ anuyutto vicarati. Atha amhākaṃ bhagavā loke uppajjitvā pavattitavaradhammacakko anupubbena yasādike veneyye vinetvā anāthapiṇḍikassa abhiyācanāya sāvatthiṃ upagacchi. Tadā satthu jetavanapaṭiggahe paṭiladdhasaddho satthāraṃ upasaṅkamitvā dhammaṃ sutvā pabbajjaṃ yāci. Satthā aññataraṃ piṇḍacārikaṃ bhikkhuṃ āṇāpesi – ‘‘bhikkhu, imaṃ pabbājehī’’ti. So tena pabbājiyamāno khuraggeyeva arahattaṃ pāpuṇitvā kosalajanapadaṃ gantvā tattha ciraṃ vasitvā puna sāvatthiṃ paccāgami. Taṃ bahū ñātakā brāhmaṇamahāsālā upasaṅkamitvā payirupāsitvā nisinnā ‘‘imasmiṃ loke bahū samaṇabrāhmaṇā saṃsāre suddhivādā, tesu katamesaṃ nu kho vādo niyyāniko, kathaṃ paṭipajjanto saṃsārato sujjhatī’’ti pucchiṃsu. Thero tesaṃ tamatthaṃ pakāsento –
587.
587.
‘‘виж̇аанзяяа сагам̣ ад̇т̇ам̣, авалогзяяаат̇а бааважанам̣;
‘‘Vijāneyya sakaṃ atthaṃ, avalokeyyātha pāvacanaṃ;
яан̃жзд̇т̇а асса бад̇ируубам̣, сааман̃н̃ам̣ аж̇жхуубаг̇ад̇асса.
Yañcettha assa patirūpaṃ, sāmaññaṃ ajjhūpagatassa.
588.
588.
‘‘мид̇д̇ам̣ ид̇ха жа галяаан̣ам̣, сигкаа вибулам̣ самаад̣̇аанам̣;
‘‘Mittaṃ idha ca kalyāṇaṃ, sikkhā vipulaṃ samādānaṃ;
суссуусаа жа г̇аруунам̣, зд̇ам̣ саман̣асса бад̇ируубам̣.
Sussūsā ca garūnaṃ, etaṃ samaṇassa patirūpaṃ.
589.
589.
‘‘б̣уд̣̇д̇хзсу саг̇ааравад̇аа, д̇хаммз абажид̇и яат̇аабхууд̇ам̣;
‘‘Buddhesu sagāravatā, dhamme apaciti yathābhūtaṃ;
сан̇гхз жа жид̇д̇ийгааро, зд̇ам̣ саман̣асса бад̇ируубам̣.
Saṅghe ca cittīkāro, etaṃ samaṇassa patirūpaṃ.
590.
590.
‘‘аажаараг̇ожарз яуд̇д̇о, ааж̇ийво сод̇хид̇о аг̇аараяхо;
‘‘Ācāragocare yutto, ājīvo sodhito agārayho;
жид̇д̇асса жа сан̣табанам̣, зд̇ам̣ саман̣асса бад̇ируубам̣.
Cittassa ca saṇṭhapanaṃ, etaṃ samaṇassa patirūpaṃ.
591.
591.
‘‘жаарид̇д̇ам̣ ат̇а ваарид̇д̇ам̣, ирияаабат̇ияам̣ басаад̣̇анияам̣;
‘‘Cārittaṃ atha vārittaṃ, iriyāpathiyaṃ pasādaniyaṃ;
ад̇хижид̇д̇з жа ааяог̇о, зд̇ам̣ саман̣асса бад̇ируубам̣.
Adhicitte ca āyogo, etaṃ samaṇassa patirūpaṃ.
592.
592.
‘‘ааран̃н̃агаани сзнаасанаани, банд̇аани аббасад̣̇д̣̇аани;
‘‘Āraññakāni senāsanāni, pantāni appasaddāni;
бхаж̇ид̇аб̣б̣аани мунинаа, зд̇ам̣ саман̣асса бад̇ируубам̣.
Bhajitabbāni muninā, etaṃ samaṇassa patirūpaṃ.
593.
593.
‘‘сийлан̃жа б̣аахусажжан̃жа, д̇хаммаанам̣ бавижаяо яат̇аабхууд̇ам̣;
‘‘Sīlañca bāhusaccañca, dhammānaṃ pavicayo yathābhūtaṃ;
сажжаанам̣ абхисамаяо, зд̇ам̣ саман̣асса бад̇ируубам̣.
Saccānaṃ abhisamayo, etaṃ samaṇassa patirūpaṃ.
594.
594.
‘‘бхаавзяяа жа анижжанд̇и, анад̇д̇асан̃н̃ам̣ асубхасан̃н̃ан̃жа;
‘‘Bhāveyya ca aniccanti, anattasaññaṃ asubhasaññañca;
логамхи жа анабхирад̇им̣, зд̇ам̣ саман̣асса бад̇ируубам̣.
Lokamhi ca anabhiratiṃ, etaṃ samaṇassa patirūpaṃ.
595.
595.
‘‘бхаавзяяа жа б̣ож̇жхан̇г̇з, ид̣̇д̇хибаад̣̇аани инд̣̇рияаани б̣алаани;
‘‘Bhāveyya ca bojjhaṅge, iddhipādāni indriyāni balāni;
адтан̇г̇амаг̇г̇амарияам̣, зд̇ам̣ саман̣асса бад̇ируубам̣.
Aṭṭhaṅgamaggamariyaṃ, etaṃ samaṇassa patirūpaṃ.
596.
596.
‘‘д̇ан̣хам̣ баж̇ахзяяа муни, самуулагз аасавз бад̣̇аалзяяа;
‘‘Taṇhaṃ pajaheyya muni, samūlake āsave padāleyya;
вихарзяяа виббамуд̇д̇о, зд̇ам̣ саман̣асса бад̇ирууба’’нд̇и. –
Vihareyya vippamutto, etaṃ samaṇassa patirūpa’’nti. –
имаа г̇аат̇аа абхааси.
Imā gāthā abhāsi.
д̇ад̇т̇а виж̇аанзяяа сагам̣ ад̇т̇анд̇и, вин̃н̃ууж̇аад̇иго бурисо ад̇д̇ано ад̇т̇ам̣ яаат̇аавад̇о вижаарзд̇ваа ж̇аанзяяа. вижаарзнд̇о жа авалогзяяаат̇а бааважанам̣ ид̇ха логз бут̇усаман̣аб̣раахман̣зхи саммаасамб̣уд̣̇д̇хзна жа бавуд̇д̇ам̣ бааважанам̣, самаяо. д̇ад̇т̇а яам̣ нияяаанигам̣, д̇ам̣ ологзяяа бан̃н̃аажагкунаа бассзяяа. имз хи наанаад̇ид̇т̇ияаа саман̣аб̣раахман̣аа анижжз ‘‘нижжа’’нд̇и, анад̇д̇ани ‘‘ад̇д̇аа’’д̇и, асуд̣̇д̇химаг̇г̇ан̃жа ‘‘суд̣̇д̇химаг̇г̇о’’д̇и мижчаабхинивзсино ан̃н̃аман̃н̃ан̃жа вируд̣̇д̇хаваад̣̇аа, д̇асмаа нзсам̣ ваад̣̇о анияяааниго. саммаасамб̣уд̣̇д̇хо бана ‘‘саб̣б̣з сан̇каараа анижжаа, саб̣б̣з д̇хаммаа анад̇д̇аа, санд̇ам̣ ниб̣б̣аана’’нд̇и саяамбхуун̃аан̣зна яат̇аабхууд̇ам̣ аб̣бхан̃н̃ааяа бавзд̣̇зд̇и, д̇асмаа ‘‘д̇асса ваад̣̇о нияяааниго’’д̇и сад̇т̇у саасанамаханд̇ад̇ам̣ ологзяяаад̇и ад̇т̇о. яан̃жзд̇т̇а асса бад̇ируубам̣, сааман̃н̃ам̣ аж̇жхуубаг̇ад̇ассаад̇и, сааман̃н̃ам̣ саман̣абхаавам̣ баб̣б̣аж̇ж̇ам̣ убаг̇ад̇асса гулабуд̇д̇асса яам̣ зд̇т̇а саасанз баб̣б̣аж̇ид̇абхаавз ваа бад̇ируубам̣ яуд̇д̇аруубам̣ сааруббам̣ асса сияаа, д̇амби абалогзяяа.
Tattha vijāneyya sakaṃ atthanti, viññūjātiko puriso attano atthaṃ yāthāvato vicāretvā jāneyya. Vicārento ca avalokeyyātha pāvacanaṃ idha loke puthusamaṇabrāhmaṇehi sammāsambuddhena ca pavuttaṃ pāvacanaṃ, samayo. Tattha yaṃ niyyānikaṃ, taṃ olokeyya paññācakkhunā passeyya. Ime hi nānātitthiyā samaṇabrāhmaṇā anicce ‘‘nicca’’nti, anattani ‘‘attā’’ti, asuddhimaggañca ‘‘suddhimaggo’’ti micchābhinivesino aññamaññañca viruddhavādā, tasmā nesaṃ vādo aniyyāniko. Sammāsambuddho pana ‘‘sabbe saṅkhārā aniccā, sabbe dhammā anattā, santaṃ nibbāna’’nti sayambhūñāṇena yathābhūtaṃ abbhaññāya pavedeti, tasmā ‘‘tassa vādo niyyāniko’’ti satthu sāsanamahantataṃ olokeyyāti attho. Yañcettha assa patirūpaṃ, sāmaññaṃ ajjhūpagatassāti, sāmaññaṃ samaṇabhāvaṃ pabbajjaṃ upagatassa kulaputtassa yaṃ ettha sāsane pabbajitabhāve vā patirūpaṃ yuttarūpaṃ sāruppaṃ assa siyā, tampi apalokeyya.
гим̣ бана д̇анд̇и ааха ‘‘мид̇д̇ам̣ ид̇ха жа галяаан̣а’’нд̇иаад̣̇и. имасмим̣ саасанз галяаан̣амид̇д̇ам̣ сзвияамаанам̣ саман̣асса бад̇ируубанд̇и яож̇анаа. зса наяо ид̇арзсуби. галяаан̣амид̇д̇ан̃хи ниссааяа агусалам̣ баж̇ахад̇и, гусалам̣ бхаавзд̇и, суд̣̇д̇хамад̇д̇аанам̣ барихарад̇и. сигкаа вибулам̣ самаад̣̇аананд̇и вибулам̣ сигкаасамаад̣̇аанам̣, махад̇ияаа ниб̣б̣аанаавахааяа ад̇хисийлаад̣̇исигкааяа анудтаананд̇и ад̇т̇о. суссуусаа жа г̇аруунанд̇и г̇аруунам̣ аажарияубаж̇жхааяаад̣̇ийнам̣ галяаан̣амид̇д̇аанам̣ оваад̣̇асса сод̇угамяад̇аа баарижарияаа жа. зд̇анд̇и галяаан̣амид̇д̇асзванаад̣̇и.
Kiṃ pana tanti āha ‘‘mittaṃ idha ca kalyāṇa’’ntiādi. Imasmiṃ sāsane kalyāṇamittaṃ seviyamānaṃ samaṇassa patirūpanti yojanā. Esa nayo itaresupi. Kalyāṇamittañhi nissāya akusalaṃ pajahati, kusalaṃ bhāveti, suddhamattānaṃ pariharati. Sikkhā vipulaṃ samādānanti vipulaṃ sikkhāsamādānaṃ, mahatiyā nibbānāvahāya adhisīlādisikkhāya anuṭṭhānanti attho. Sussūsā ca garūnanti garūnaṃ ācariyupajjhāyādīnaṃ kalyāṇamittānaṃ ovādassa sotukamyatā pāricariyā ca. Etanti kalyāṇamittasevanādi.
б̣уд̣̇д̇хзсу саг̇ааравад̇аад̇и саб̣б̣ан̃н̃уб̣уд̣̇д̇хзсу ‘‘саммаасамб̣уд̣̇д̇хо бхаг̇аваа’’д̇и г̇аараваяог̇о г̇аружид̇д̇ийгааро. д̇хаммз абажид̇и яат̇аабхууд̇анд̇и арияад̇хаммз яаат̇аавад̇о абажааяанам̣ аад̣̇арзна абхибууж̇анам̣. сан̇гхзд̇и арияасан̇гхз. жид̇д̇ийгаарод̇и саггааро саммаананам̣. зд̇анд̇и рад̇анад̇д̇аяаг̇аругаран̣ам̣.
Buddhesu sagāravatāti sabbaññubuddhesu ‘‘sammāsambuddho bhagavā’’ti gāravayogo garucittīkāro. Dhamme apaciti yathābhūtanti ariyadhamme yāthāvato apacāyanaṃ ādarena abhipūjanaṃ. Saṅgheti ariyasaṅghe. Cittīkāroti sakkāro sammānanaṃ. Etanti ratanattayagarukaraṇaṃ.
аажаараг̇ожарз яуд̇д̇од̇и гааяигаваажасигавийд̇иггаманасан̇каад̇ам̣ анаажаарам̣, бин̣д̣абаад̇аад̣̇ийнам̣ ад̇т̇ааяа убасан̇гамид̇ум̣ аяуд̇д̇адтаанабхууд̇ам̣ взсияаад̣̇иаг̇ожаран̃жа бахааяа гааяигаваажасигаавийд̇иггаманасан̇каад̇зна аажаарзна бин̣д̣абаад̇аад̣̇ийнам̣ ад̇т̇ааяа убасан̇гамид̇ум̣ яуд̇д̇адтаанабхууд̇зна г̇ожарзна жа яуд̇д̇о самбанно, самбаннааажаараг̇ожарод̇и ад̇т̇о. ааж̇ийво сод̇хид̇од̇и взл̣уд̣̇аанаад̣̇им̣ б̣уд̣̇д̇хабадигудтам̣ анзсанам̣ бахааяа анаваж̇ж̇уббаад̣̇з бажжаяз сзванд̇асса ааж̇ийво сод̇хид̇о ход̇и сувисуд̣̇д̇хо, сод̇хид̇ад̇д̇аа зва аг̇аараяхо вин̃н̃уухи. жид̇д̇асса жа сан̣табананд̇и яат̇аа жагкаад̣̇ид̣̇ваарзхи руубаад̣̇иаарамман̣зсу абхиж̇жхаад̣̇аяо наббавад̇д̇анд̇и, звам̣ д̣̇идтз д̣̇идтамад̇д̇аад̣̇ивасзна жид̇д̇асса саммаа табанам̣. зд̇анд̇и аажаараг̇ожарасамбад̇д̇и ааж̇ийвабаарисуд̣̇д̇хи инд̣̇риязсу г̇уд̇д̇ад̣̇ваарад̇аад̇и зд̇ам̣ д̇аяам̣.
Ācāragocare yuttoti kāyikavācasikavītikkamanasaṅkhātaṃ anācāraṃ, piṇḍapātādīnaṃ atthāya upasaṅkamituṃ ayuttaṭṭhānabhūtaṃ vesiyādiagocarañca pahāya kāyikavācasikaavītikkamanasaṅkhātena ācārena piṇḍapātādīnaṃ atthāya upasaṅkamituṃ yuttaṭṭhānabhūtena gocarena ca yutto sampanno, sampannaācāragocaroti attho. Ājīvo sodhitoti veḷudānādiṃ buddhapaṭikuṭṭhaṃ anesanaṃ pahāya anavajjuppāde paccaye sevantassa ājīvo sodhito hoti suvisuddho, sodhitattā eva agārayho viññūhi. Cittassa ca saṇṭhapananti yathā cakkhādidvārehi rūpādiārammaṇesu abhijjhādayo nappavattanti, evaṃ diṭṭhe diṭṭhamattādivasena cittassa sammā ṭhapanaṃ. Etanti ācāragocarasampatti ājīvapārisuddhi indriyesu guttadvāratāti etaṃ tayaṃ.
жаарид̇д̇анд̇и жарид̇ваа барибуурзд̇аб̣б̣асийлам̣. ваарид̇д̇анд̇и вирад̇ияаа агаран̣зна барибуурзд̇аб̣б̣асийлам̣. ирияаабат̇ияам̣ басаад̣̇анияанд̇и барзсам̣ басаад̣̇аавахам̣ аагаббасамбад̇д̇инимид̇д̇ам̣ ирияаабат̇аниссид̇ам̣ самбаж̇ан̃н̃ам̣. ад̇хижид̇д̇з жа ааяог̇од̇и самат̇авибассанаасу ануяог̇о бхааванаа.
Cārittanti caritvā paripūretabbasīlaṃ. Vārittanti viratiyā akaraṇena paripūretabbasīlaṃ. Iriyāpathiyaṃ pasādaniyanti paresaṃ pasādāvahaṃ ākappasampattinimittaṃ iriyāpathanissitaṃ sampajaññaṃ. Adhicitte ca āyogoti samathavipassanāsu anuyogo bhāvanā.
ааран̃н̃агаанийд̇и аран̃н̃з барияаабаннаани. банд̇аанийд̇и вивид̇д̇аани.
Āraññakānīti araññe pariyāpannāni. Pantānīti vivittāni.
сийланд̇и жад̇убаарисуд̣̇д̇хисийлам̣. хздтаа хи бхинд̣̇ид̇ваа вуд̇д̇ам̣, ид̇ха абхинд̣̇ид̇ваа вад̣̇ад̇и. б̣аахусажжанд̇и б̣ахуссуд̇абхааво. со хи бхааванаануяог̇асса б̣ахугааро, б̣ож̇жхан̇г̇агосаллаануд̇д̇арасийд̇ибхааваад̇хижид̇д̇аяуд̇д̇ад̇аад̣̇ийсу саммаа бавижаяаб̣ахуласса самат̇авибассанаануяог̇о самбаж̇ж̇ад̇и. д̇хаммаанам̣ бавижаяо яат̇аабхууд̇анд̇и руубааруубад̇хаммаанам̣ авибарийд̇асалагкан̣ад̇о сааман̃н̃алагкан̣ад̇о жа баривиймам̣саа. иминаа ад̇хибан̃н̃аад̇хаммавибассанамааха. сажжаанам̣ абхисамаяод̇и д̣̇угкаад̣̇ийнам̣ арияасажжаанам̣ барин̃н̃аабхисамаяаад̣̇ивасзна бадивзд̇хо.
Sīlanti catupārisuddhisīlaṃ. Heṭṭhā hi bhinditvā vuttaṃ, idha abhinditvā vadati. Bāhusaccanti bahussutabhāvo. So hi bhāvanānuyogassa bahukāro, bojjhaṅgakosallaanuttarasītibhāvaadhicittayuttatādīsu sammā pavicayabahulassa samathavipassanānuyogo sampajjati. Dhammānaṃ pavicayo yathābhūtanti rūpārūpadhammānaṃ aviparītasalakkhaṇato sāmaññalakkhaṇato ca parivīmaṃsā. Iminā adhipaññādhammavipassanamāha. Saccānaṃ abhisamayoti dukkhādīnaṃ ariyasaccānaṃ pariññābhisamayādivasena paṭivedho.
свааяам̣ сажжаабхисамаяо яат̇аа ход̇и, д̇ам̣ д̣̇ассзд̇ум̣ ‘‘бхаавзяяаа’’д̇иаад̣̇и вуд̇д̇ам̣. д̇ад̇т̇а бхаавзяяа жа анижжанд̇и ‘‘саб̣б̣з сан̇каараа анижжаа’’д̇иаад̣̇инаа (д̇ха. ба. 277) авибхааг̇ад̇о ‘‘яам̣ гин̃жи руубам̣ ад̇ийд̇аанааг̇ад̇абажжуббанна’’нд̇иаад̣̇инаа (вибха. 2; сам̣. ни. 3.49) вибхааг̇ад̇о ваа саб̣б̣асан̇каарзсу анижжасан̃н̃ам̣ бхаавзяяа уббаад̣̇зяяа жзва вад̣дхзяяа жаад̇и ад̇т̇о. анад̇д̇асан̃н̃анд̇и, ‘‘саб̣б̣з д̇хаммаа анад̇д̇аа’’д̇и бавад̇д̇ам̣ анад̇д̇асан̃н̃ан̃жа бхаавзяяаад̇и яож̇анаа. звам̣ сзсзсуби. асубхасан̃н̃анд̇и, гараж̇агааяз саб̣б̣асмимби ваа д̇збхуумагасан̇каарз гилзсаасужибаг̇гхаран̣ад̇о ‘‘асубхаа’’д̇и бавад̇д̇асан̃н̃ам̣. д̣̇угкасан̃н̃аабариваараа хи аяам̣, зд̇знзва жзд̇т̇а д̣̇угкасан̃н̃ааби г̇ахид̇аад̇и взд̣̇ид̇аб̣б̣ам̣. логамхи жа анабхирад̇инд̇и саб̣б̣алогз д̇збхуумагзсу сан̇каарзсу анаабхирад̇исан̃н̃ам̣. зд̇зна аад̣̇ийнаваанубассанам̣ ниб̣б̣ид̣̇аанубассанан̃жа вад̣̇ад̇и.
Svāyaṃ saccābhisamayo yathā hoti, taṃ dassetuṃ ‘‘bhāveyyā’’tiādi vuttaṃ. Tattha bhāveyya ca aniccanti ‘‘sabbe saṅkhārā aniccā’’tiādinā (dha. pa. 277) avibhāgato ‘‘yaṃ kiñci rūpaṃ atītānāgatapaccuppanna’’ntiādinā (vibha. 2; saṃ. ni. 3.49) vibhāgato vā sabbasaṅkhāresu aniccasaññaṃ bhāveyya uppādeyya ceva vaḍḍheyya cāti attho. Anattasaññanti, ‘‘sabbe dhammā anattā’’ti pavattaṃ anattasaññañca bhāveyyāti yojanā. Evaṃ sesesupi. Asubhasaññanti, karajakāye sabbasmimpi vā tebhūmakasaṅkhāre kilesāsucipaggharaṇato ‘‘asubhā’’ti pavattasaññaṃ. Dukkhasaññāparivārā hi ayaṃ, eteneva cettha dukkhasaññāpi gahitāti veditabbaṃ. Lokamhi ca anabhiratinti sabbaloke tebhūmakesu saṅkhāresu anābhiratisaññaṃ. Etena ādīnavānupassanaṃ nibbidānupassanañca vadati.
звам̣ бана вибассанаабхааванам̣ ануяуд̇д̇о д̇ам̣ уссуггаабзнд̇о имз д̇хаммз вад̣дхзяяаад̇и д̣̇ассзнд̇о ‘‘бхаавзяяа жа б̣ож̇жхан̇г̇з’’д̇и г̇аат̇амааха. д̇ассад̇т̇о – б̣од̇хияаа сад̇иаад̣̇исад̇д̇авид̇хад̇хаммасаамаг̇г̇ияаа, б̣од̇хисса ваа д̇ам̣саман̇г̇ино буг̇г̇аласса ан̇г̇аад̇и б̣ож̇жхан̇г̇аа, сад̇иаад̣̇аяо д̇хаммаа. д̇з сад̇иаад̣̇игз сад̇д̇аб̣ож̇жхан̇г̇з, чанд̣̇ааад̣̇ийни жад̇д̇аари ид̣̇д̇хибаад̣̇аани, сад̣̇д̇хаад̣̇ийни бан̃жинд̣̇рияаани, сад̣̇д̇хаад̣̇ийниязва бан̃жа б̣алаани, саммаад̣̇идтиаад̣̇ийнам̣ васзна адтан̇г̇аарияамаг̇г̇ан̃жа. жа-сад̣̇д̣̇зна сад̇ибадтаанаани саммаббад̇хаанаани жа г̇ахид̇аанийд̇и саб̣б̣зби сад̇д̇ад̇им̣саббабхзд̣̇з б̣од̇хибагкияад̇хаммз бхаавзяяа уббаад̣̇зяяа жзва вад̣дхзяяа жа. д̇ад̇т̇а яад̣̇зд̇зсам̣ батамамаг̇г̇агкан̣з уббаад̣̇анам̣, убаримаг̇г̇агкан̣з жа вад̣дханам̣, зд̇ам̣ саман̣асса бхигкуно сааруббанд̇и.
Evaṃ pana vipassanābhāvanaṃ anuyutto taṃ ussukkāpento ime dhamme vaḍḍheyyāti dassento ‘‘bhāveyya ca bojjhaṅge’’ti gāthamāha. Tassattho – bodhiyā satiādisattavidhadhammasāmaggiyā, bodhissa vā taṃsamaṅgino puggalassa aṅgāti bojjhaṅgā, satiādayo dhammā. Te satiādike sattabojjhaṅge, chandaādīni cattāri iddhipādāni, saddhādīni pañcindriyāni, saddhādīniyeva pañca balāni, sammādiṭṭhiādīnaṃ vasena aṭṭhaṅgaariyamaggañca. Ca-saddena satipaṭṭhānāni sammappadhānāni ca gahitānīti sabbepi sattatiṃsappabhede bodhipakkhiyadhamme bhāveyya uppādeyya ceva vaḍḍheyya ca. Tattha yadetesaṃ paṭhamamaggakkhaṇe uppādanaṃ, uparimaggakkhaṇe ca vaḍḍhanaṃ, etaṃ samaṇassa bhikkhuno sāruppanti.
звам̣ б̣од̇хибагкияасад̇д̇ад̇им̣сад̇хаммз бхаавзнд̇о яат̇аа маг̇г̇асажжам̣ бхааванаабхисамаяавасзна абхисамзд̇и, звам̣ самуд̣̇аяасажжам̣ бахаанаабхисамаяавасзна, нирод̇хасажжам̣ сажчигирияаабхисамаяавасзна абхисамзд̇ийд̇и д̣̇ассзнд̇о ‘‘д̇ан̣хам̣ баж̇ахзяяаа’’д̇и осаанаг̇аат̇амааха. д̇ад̇т̇а д̇ан̣хам̣ баж̇ахзяяаад̇и, гаамад̇ан̣хаад̣̇ибабхзд̣̇ам̣ саб̣б̣ам̣ д̇ан̣хам̣ арияамаг̇г̇зна анавасзсад̇о самужчинд̣̇зяяа, монам̣ вужжад̇и н̃аан̣ам̣, д̇зна саманнааг̇ад̇ад̇д̇аа муни. самуулагз аасавз бад̣̇аалзяяаад̇и гаамарааг̇аанусаяаад̣̇исамуулагз гаамаасаваад̣̇игз саб̣б̣зби аасавз бхинд̣̇зяяа самужчинд̣̇зяяа. вихарзяяа виббамуд̇д̇од̇и звам̣ саб̣б̣асо гилзсаанам̣ бахийнад̇д̇аа саб̣б̣ад̇хи вимуд̇д̇о саб̣б̣уубад̇хибадиниссаг̇г̇ам̣ нирод̇хам̣ ниб̣б̣аанам̣ сажчигад̇ваа вихарзяяа. зд̇анд̇и яад̣̇зд̇ам̣ вихаран̣ам̣, зд̇ам̣ саман̣асса самид̇абаабасса бхигкуно бад̇ируубам̣ сааруббанд̇и ад̇т̇о.
Evaṃ bodhipakkhiyasattatiṃsadhamme bhāvento yathā maggasaccaṃ bhāvanābhisamayavasena abhisameti, evaṃ samudayasaccaṃ pahānābhisamayavasena, nirodhasaccaṃ sacchikiriyābhisamayavasena abhisametīti dassento ‘‘taṇhaṃ pajaheyyā’’ti osānagāthamāha. Tattha taṇhaṃ pajaheyyāti, kāmataṇhādipabhedaṃ sabbaṃ taṇhaṃ ariyamaggena anavasesato samucchindeyya, monaṃ vuccati ñāṇaṃ, tena samannāgatattā muni. Samūlake āsave padāleyyāti kāmarāgānusayādisamūlake kāmāsavādike sabbepi āsave bhindeyya samucchindeyya. Vihareyya vippamuttoti evaṃ sabbaso kilesānaṃ pahīnattā sabbadhi vimutto sabbūpadhipaṭinissaggaṃ nirodhaṃ nibbānaṃ sacchikatvā vihareyya. Etanti yadetaṃ viharaṇaṃ, etaṃ samaṇassa samitapāpassa bhikkhuno patirūpaṃ sāruppanti attho.
звам̣ т̇зро саман̣асааруббабадибад̇д̇игид̇д̇анамукзна саасанасса нияяаанигабхаавам̣ д̇аб̣б̣иломад̇о б̣аахирагасамаяасса анияяаанигад̇ан̃жа вибхаавзси. д̇ам̣ суд̇ваа д̇з б̣раахман̣амахаасаалаа саасанз абхиббасаннаа саран̣аад̣̇ийсу бад̇идтахим̣су.
Evaṃ thero samaṇasāruppapaṭipattikittanamukhena sāsanassa niyyānikabhāvaṃ tabbilomato bāhirakasamayassa aniyyānikatañca vibhāvesi. Taṃ sutvā te brāhmaṇamahāsālā sāsane abhippasannā saraṇādīsu patiṭṭhahiṃsu.
(абара)-г̇од̇амад̇т̇зраг̇аат̇ааван̣н̣анаа нидтид̇аа.
(Apara)-gotamattheragāthāvaṇṇanā niṭṭhitā.
д̣̇асаганибаад̇аван̣н̣анаа нидтид̇аа.
Dasakanipātavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / т̇зраг̇аат̇аабаал̣и • Theragāthāpāḷi / 7. (абара)-г̇од̇амад̇т̇зраг̇аат̇аа • 7. (Apara)-gotamattheragāthā
