Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā)

    ১৮. অপরঅচ্ছরাসঙ্ঘাতৰগ্গৰণ্ণনা

    18. Aparaaccharāsaṅghātavaggavaṇṇanā

    ৩৮২. অচ্ছরাসঙ্ঘাতমত্তম্পীতি ইদম্পি সুত্তং অগ্গিক্খন্ধূপমঅট্ঠুপ্পত্তিযংযেৰ (অ॰ নি॰ ৭.৭২) ৰুত্তং। অপ্পনাপ্পত্তায হি মেত্তায ৰিপাকে কথাযেৰ নত্থি। তস্সাযেৰ অট্ঠুপ্পত্তিযা অযং দেসনা আরদ্ধাতি ৰেদিতব্বা। তত্থ পঠমন্তি ‘‘গণনানুপুব্বতা পঠমং, ইদং পঠমং সমাপজ্জতীতি পঠম’’ন্তি ৰিভঙ্গে (ৰিভ॰ ৫৬৮) ৰুত্তত্থমেৰ। ঝানন্তি ঝানং নাম দুৰিধং আরম্মণূপনিজ্ঝানঞ্চ লক্খণূপনিজ্ঝানঞ্চাতি। তত্থ আরম্মণূপনিজ্ঝানং নাম অট্ঠ সমাপত্তিযো। তা হি পথৰীকসিণাদিনো আরম্মণস্স উপনিজ্ঝানতো আরম্মণূপনিজ্ঝানন্তি ৰুচ্চন্তি। লক্খণূপনিজ্ঝানন্তি ৰিপস্সনামগ্গফলানি। ৰিপস্সনা হি অনিচ্চাদিৰসেন সঙ্খারলক্খণস্স উপনিজ্ঝানতো লক্খণূপনিজ্ঝানং নাম, ৰিপস্সনায পন লক্খণূপনিজ্ঝানকিচ্চং মগ্গেন সিজ্ঝতীতি মগ্গো লক্খণূপনিজ্ঝানং, ফলং সুঞ্ঞতঅনিমিত্তঅপ্পণিহিত-লক্খণস্স নিব্বানস্সেৰ উপনিজ্ঝানতো লক্খণূপনিজ্ঝানন্তি ৰুচ্চতি। তত্থ ইমস্মিং পন অত্থে আরম্মণূপনিজ্ঝানং অধিপ্পেতং। কো পন ৰাদো যে নং বহুলীকরোন্তীতি যে নং পঠমজ্ঝানং বহুলী করোন্তি, পুনপ্পুনং করোন্তি, তেসু ৰত্তব্বমেৰ নত্থি। সেসমেত্থ হেট্ঠা ৰুত্তনযেনেৰ ৰেদিতব্বং।

    382.Accharāsaṅghātamattampīti idampi suttaṃ aggikkhandhūpamaaṭṭhuppattiyaṃyeva (a. ni. 7.72) vuttaṃ. Appanāppattāya hi mettāya vipāke kathāyeva natthi. Tassāyeva aṭṭhuppattiyā ayaṃ desanā āraddhāti veditabbā. Tattha paṭhamanti ‘‘gaṇanānupubbatā paṭhamaṃ, idaṃ paṭhamaṃ samāpajjatīti paṭhama’’nti vibhaṅge (vibha. 568) vuttatthameva. Jhānanti jhānaṃ nāma duvidhaṃ ārammaṇūpanijjhānañca lakkhaṇūpanijjhānañcāti. Tattha ārammaṇūpanijjhānaṃ nāma aṭṭha samāpattiyo. Tā hi pathavīkasiṇādino ārammaṇassa upanijjhānato ārammaṇūpanijjhānanti vuccanti. Lakkhaṇūpanijjhānanti vipassanāmaggaphalāni. Vipassanā hi aniccādivasena saṅkhāralakkhaṇassa upanijjhānato lakkhaṇūpanijjhānaṃ nāma, vipassanāya pana lakkhaṇūpanijjhānakiccaṃ maggena sijjhatīti maggo lakkhaṇūpanijjhānaṃ, phalaṃ suññataanimittaappaṇihita-lakkhaṇassa nibbānasseva upanijjhānato lakkhaṇūpanijjhānanti vuccati. Tattha imasmiṃ pana atthe ārammaṇūpanijjhānaṃ adhippetaṃ. Ko pana vādo ye naṃ bahulīkarontīti ye naṃ paṭhamajjhānaṃ bahulī karonti, punappunaṃ karonti, tesu vattabbameva natthi. Sesamettha heṭṭhā vuttanayeneva veditabbaṃ.

    ৩৮৩. দুতিযন্তিআদীসুপি ‘‘গণনানুপুব্বতা দুতিয’’ন্তিআদিনা (ৰিভ॰ ৫৭৯) নযেন অত্থো ৰেদিতব্বো।

    383.Dutiyantiādīsupi ‘‘gaṇanānupubbatā dutiya’’ntiādinā (vibha. 579) nayena attho veditabbo.

    ৩৮৬-৩৮৭. মেত্তন্তি সব্বসত্তেসু হিতফরণং। চেতোৰিমুত্তিন্তি চিত্তৰিমুত্তিং। ইধ অপ্পনাপ্পত্তাৰ মেত্তা অধিপ্পেতা। করুণাদীসুপি এসেৰ নযো। ইমে পন চত্তারো ব্রহ্মৰিহারা ৰট্টং হোন্তি, ৰট্টপাদা হোন্তি, ৰিপস্সনাপাদা হোন্তি, দিট্ঠধম্মসুখৰিহারা হোন্তি, অভিঞ্ঞাপাদা ৰা নিরোধপাদা ৰা হোন্তি। লোকুত্তরা পন ন হোন্তি। কস্মা? সত্তারম্মণত্তাতি।

    386-387.Mettanti sabbasattesu hitapharaṇaṃ. Cetovimuttinti cittavimuttiṃ. Idha appanāppattāva mettā adhippetā. Karuṇādīsupi eseva nayo. Ime pana cattāro brahmavihārā vaṭṭaṃ honti, vaṭṭapādā honti, vipassanāpādā honti, diṭṭhadhammasukhavihārā honti, abhiññāpādā vā nirodhapādā vā honti. Lokuttarā pana na honti. Kasmā? Sattārammaṇattāti.

    ৩৯০. কাযে কাযানুপস্সীতি আনাপানপব্বং, ইরিযাপথপব্বং, চতুসম্পজঞ্ঞপব্বং, পটিকূলমনসিকারপব্বং , ধাতুমনসিকারপব্বং, নৰসিৰথিকাপব্বানি, অজ্ঝত্তপরিকম্মৰসেন চত্তারি নীলাদিকসিণানীতি ইমস্মিং অট্ঠারসৰিধে কাযে তমেৰ কাযং পঞ্ঞায অনুপস্সন্তো। ৰিহরতীতি ইরিযতি ৰত্ততি। ইমিনা ইমস্স অট্ঠারসৰিধেন কাযানুপস্সনাসতিপট্ঠানভাৰকস্স ভিক্খুনো ইরিযাপথো কথিতো হোতি। আতাপীতি তস্সেৰ ৰুত্তপ্পকারস্স সতিপট্ঠানস্স ভাৰনকৰীরিযেন ৰীরিযৰা। সম্পজানোতি অট্ঠারসৰিধেন কাযানুপস্সনাসতিপট্ঠানস্স পরিগ্গাহিকপঞ্ঞায সম্মা পজানন্তো। সতিমাতি অট্ঠারসৰিধেন কাযানুপস্সনাপরিগ্গাহিকায সতিযা সমন্নাগতো। ৰিনেয্য লোকে অভিজ্ঝাদোমনস্সন্তি তস্মিংযেৰ কাযসঙ্খাতে লোকে পঞ্চকামগুণিকতণ্হঞ্চ পটিঘসম্পযুত্তদোমনস্সঞ্চ ৰিনেত্ৰা ৰিক্খম্ভেত্ৰা কাযে কাযানুপস্সী ৰিহরতীতি ৰুত্তং হোতি। এত্তাৰতা কাযানুপস্সনাসতিপট্ঠানৰসেন সুদ্ধরূপসম্মসনমেৰ কথিতন্তি ৰেদিতব্বং।

    390.Kāyekāyānupassīti ānāpānapabbaṃ, iriyāpathapabbaṃ, catusampajaññapabbaṃ, paṭikūlamanasikārapabbaṃ , dhātumanasikārapabbaṃ, navasivathikāpabbāni, ajjhattaparikammavasena cattāri nīlādikasiṇānīti imasmiṃ aṭṭhārasavidhe kāye tameva kāyaṃ paññāya anupassanto. Viharatīti iriyati vattati. Iminā imassa aṭṭhārasavidhena kāyānupassanāsatipaṭṭhānabhāvakassa bhikkhuno iriyāpatho kathito hoti. Ātāpīti tasseva vuttappakārassa satipaṭṭhānassa bhāvanakavīriyena vīriyavā. Sampajānoti aṭṭhārasavidhena kāyānupassanāsatipaṭṭhānassa pariggāhikapaññāya sammā pajānanto. Satimāti aṭṭhārasavidhena kāyānupassanāpariggāhikāya satiyā samannāgato. Vineyya loke abhijjhādomanassanti tasmiṃyeva kāyasaṅkhāte loke pañcakāmaguṇikataṇhañca paṭighasampayuttadomanassañca vinetvā vikkhambhetvā kāye kāyānupassī viharatīti vuttaṃ hoti. Ettāvatā kāyānupassanāsatipaṭṭhānavasena suddharūpasammasanameva kathitanti veditabbaṃ.

    ৰেদনাসু ৰেদনানুপস্সীতি সুখাদিভেদাসু ৰেদনাসু ‘‘সুখং ৰেদনং ৰেদিযমানো সুখং ৰেদনং ৰেদিযামীতি পজানাতি। দুক্খং, অদুক্খমসুখং, সামিসং ৰা সুখং, নিরামিসং ৰা সুখং, সামিসং ৰা দুক্খং, নিরামিসং ৰা দুক্খং, সামিসং ৰা অদুক্খমসুখং, নিরামিসং ৰা অদুক্খমসুখং ৰেদনং ৰেদিযমানো নিরামিসং অদুক্খমসুখং ৰেদনং ৰেদিযামীতি পজানাতী’’তি (দী॰ নি॰ ২.৩৮০; ৰিভ॰ ৩৬৩; ম॰ নি॰ ১.১১৩) এৰং ৰুত্তং নৰৰিধং ৰেদনং অনুপস্সন্তো। আতাপীতিআদিনা পনেত্থ নৰৰিধেন ৰেদনানুপস্সনাসতিপট্ঠানস্স ভাৰনাপরিগ্গাহিকানং ৰীরিযপঞ্ঞাসতীনং ৰসেন অত্থো ৰেদিতব্বো। লোকোতি চেত্থ ৰেদনা ৰেদিতব্বা।

    Vedanāsu vedanānupassīti sukhādibhedāsu vedanāsu ‘‘sukhaṃ vedanaṃ vediyamāno sukhaṃ vedanaṃ vediyāmīti pajānāti. Dukkhaṃ, adukkhamasukhaṃ, sāmisaṃ vā sukhaṃ, nirāmisaṃ vā sukhaṃ, sāmisaṃ vā dukkhaṃ, nirāmisaṃ vā dukkhaṃ, sāmisaṃ vā adukkhamasukhaṃ, nirāmisaṃ vā adukkhamasukhaṃ vedanaṃ vediyamāno nirāmisaṃ adukkhamasukhaṃ vedanaṃ vediyāmīti pajānātī’’ti (dī. ni. 2.380; vibha. 363; ma. ni. 1.113) evaṃ vuttaṃ navavidhaṃ vedanaṃ anupassanto. Ātāpītiādinā panettha navavidhena vedanānupassanāsatipaṭṭhānassa bhāvanāpariggāhikānaṃ vīriyapaññāsatīnaṃ vasena attho veditabbo. Lokoti cettha vedanā veditabbā.

    চিত্তধম্মেসুপি এসেৰ নযো। এত্থ পন চিত্তে চিত্তানুপস্সীতি ‘‘সরাগং ৰা চিত্তং সরাগং চিত্তন্তি পজানাতী’’তি (দী॰ নি॰ ২.৩৮১; ৰিভ॰ ৩৬৫; ম॰ নি॰ ১.১১৪) এৰং ৰিত্থারিতে সোল়সপ্পভেদে চিত্তে তমেৰ চিত্তং পরিগ্গাহিকায অনুপস্সনায অনুপস্সন্তোতি অত্থো। ধম্মেসু ধম্মানুপস্সীতি ‘‘পঞ্চ নীৰরণানি, পঞ্চুপাদানক্খন্ধা, ছ অজ্ঝত্তিকবাহিরাযতনানি, সত্ত বোজ্ঝঙ্গা, চত্তারি অরিযসচ্চানী’’তি (দী॰ নি॰ ২.৩৮২-৪০৩; ৰিভ॰ ৩৬৭-৩৭৩; ম॰ নি॰ ১.১১৫-১৩৬) এৰং কোট্ঠাসৰসেন পঞ্চধা ৰুত্তেসু ধম্মেসু ধম্মপরিগ্গাহিকায অনুপস্সনায তে ধম্মে অনুপস্সন্তোতি অত্থো। এত্থ পন ৰেদনানুপস্সনাসতিপট্ঠানে চ চিত্তানুপস্সনাসতিপট্ঠানে চ সুদ্ধঅরূপসম্মসনমেৰ কথিতং, ধম্মানুপস্সনাসতিপট্ঠানে রূপারূপসম্মসনং। ইতি ইমানি চত্তারিপি সতিপট্ঠানানি লোকিযলোকুত্তরমিস্সকানেৰ কথিতানীতি ৰেদিতব্বানি।

    Cittadhammesupi eseva nayo. Ettha pana citte cittānupassīti ‘‘sarāgaṃ vā cittaṃ sarāgaṃ cittanti pajānātī’’ti (dī. ni. 2.381; vibha. 365; ma. ni. 1.114) evaṃ vitthārite soḷasappabhede citte tameva cittaṃ pariggāhikāya anupassanāya anupassantoti attho. Dhammesu dhammānupassīti ‘‘pañca nīvaraṇāni, pañcupādānakkhandhā, cha ajjhattikabāhirāyatanāni, satta bojjhaṅgā, cattāri ariyasaccānī’’ti (dī. ni. 2.382-403; vibha. 367-373; ma. ni. 1.115-136) evaṃ koṭṭhāsavasena pañcadhā vuttesu dhammesu dhammapariggāhikāya anupassanāya te dhamme anupassantoti attho. Ettha pana vedanānupassanāsatipaṭṭhāne ca cittānupassanāsatipaṭṭhāne ca suddhaarūpasammasanameva kathitaṃ, dhammānupassanāsatipaṭṭhāne rūpārūpasammasanaṃ. Iti imāni cattāripi satipaṭṭhānāni lokiyalokuttaramissakāneva kathitānīti veditabbāni.

    ৩৯৪. অনুপ্পন্নানন্তি অনিব্বত্তানং। পাপকানন্তি লামকানং। অকুসলানং ধম্মানন্তি অকোসল্লসম্ভূতানং লোভাদিধম্মানং। অনুপ্পাদাযাতি অনিব্বত্তনত্থায। ছন্দং জনেতীতি কত্তুকম্যতাকুসলচ্ছন্দং উপ্পাদেতি। ৰাযমতীতি পযোগং পরক্কমং করোতি। ৰীরিযং আরভতীতি কাযিকচেতসিকৰীরিযং করোতি। চিত্তং পগ্গণ্হাতীতি তেনেৰ সহজাতৰীরিযেন চিত্তং উক্খিপতি। পদহতীতি পধানৰীরিযং করোতি।

    394.Anuppannānanti anibbattānaṃ. Pāpakānanti lāmakānaṃ. Akusalānaṃ dhammānanti akosallasambhūtānaṃ lobhādidhammānaṃ. Anuppādāyāti anibbattanatthāya. Chandaṃ janetīti kattukamyatākusalacchandaṃ uppādeti. Vāyamatīti payogaṃ parakkamaṃ karoti. Vīriyaṃ ārabhatīti kāyikacetasikavīriyaṃ karoti. Cittaṃpaggaṇhātīti teneva sahajātavīriyena cittaṃ ukkhipati. Padahatīti padhānavīriyaṃ karoti.

    উপ্পন্নানন্তি জাতানং নিব্বত্তানং। কুসলানং ধম্মানন্তি কোসল্লসম্ভূতানং অলোভাদিধম্মানং। ঠিতিযাতি ঠিতত্থং। অসম্মোসাযাতি অনস্সনত্থং। ভিয্যোভাৰাযাতি পুনপ্পুনভাৰায। ৰেপুল্লাযাতি ৰিপুলভাৰায। ভাৰনাযাতি ৰড্ঢিযা। পরিপূরিযাতি পরিপূরণত্থায। অযং তাৰ চতুন্নং সম্মপ্পধানানং একপদিকো অত্থুদ্ধারো।

    Uppannānanti jātānaṃ nibbattānaṃ. Kusalānaṃ dhammānanti kosallasambhūtānaṃ alobhādidhammānaṃ. Ṭhitiyāti ṭhitatthaṃ. Asammosāyāti anassanatthaṃ. Bhiyyobhāvāyāti punappunabhāvāya. Vepullāyāti vipulabhāvāya. Bhāvanāyāti vaḍḍhiyā. Paripūriyāti paripūraṇatthāya. Ayaṃ tāva catunnaṃ sammappadhānānaṃ ekapadiko atthuddhāro.

    অযং পন সম্মপ্পধানকথা নাম দুৰিধা লোকিযা লোকুত্তরা চ। তত্থ লোকিযা সব্বপুব্বভাগে হোতি, সা কস্সপসংযুত্তপরিযাযেন লোকিযমগ্গক্খণেযেৰ ৰেদিতব্বা। ৰুত্তঞ্হি তত্থ –

    Ayaṃ pana sammappadhānakathā nāma duvidhā lokiyā lokuttarā ca. Tattha lokiyā sabbapubbabhāge hoti, sā kassapasaṃyuttapariyāyena lokiyamaggakkhaṇeyeva veditabbā. Vuttañhi tattha –

    ‘‘চত্তারোমে, আৰুসো, সম্মপ্পধানা। কতমে চত্তারো? ইধাৰুসো, ভিক্খু ‘অনুপ্পন্না মে পাপকা অকুসলা ধম্মা উপ্পজ্জমানা অনত্থায সংৰত্তেয্যু’ন্তি আতপ্পং করোতি, ‘উপ্পন্না মে পাপকা অকুসলা ধম্মা অপ্পহীযমানা অনত্থায সংৰত্তেয্যু’ন্তি আতপ্পং করোতি, ‘অনুপ্পন্না মে কুসলা ধম্মা অনুপ্পজ্জমানা অনত্থায সংৰত্তেয্যু’ন্তি আতপ্পং করোতি, ‘উপ্পন্না মে কুসলা ধম্মা নিরুজ্ঝমানা অনত্থায সংৰত্তেয্যু’ন্তি আতপ্পং করোতী’’তি (সং॰ নি॰ ২.১৪৫)।

    ‘‘Cattārome, āvuso, sammappadhānā. Katame cattāro? Idhāvuso, bhikkhu ‘anuppannā me pāpakā akusalā dhammā uppajjamānā anatthāya saṃvatteyyu’nti ātappaṃ karoti, ‘uppannā me pāpakā akusalā dhammā appahīyamānā anatthāya saṃvatteyyu’nti ātappaṃ karoti, ‘anuppannā me kusalā dhammā anuppajjamānā anatthāya saṃvatteyyu’nti ātappaṃ karoti, ‘uppannā me kusalā dhammā nirujjhamānā anatthāya saṃvatteyyu’nti ātappaṃ karotī’’ti (saṃ. ni. 2.145).

    এত্থ চ পাপকা অকুসলাতি লোভাদযো ৰেদিতব্বা। অনুপ্পন্না কুসলা ধম্মাতি সমথৰিপস্সনা চেৰ মগ্গো চ। উপ্পন্না কুসলা নাম সমথৰিপস্সনাৰ। মগ্গো পন সকিং উপ্পজ্জিত্ৰা নিরুজ্ঝমানো অনত্থায সংৰত্তনকো নাম নত্থি। সো হি ফলস্স পচ্চযং দত্ৰাৰ নিরুজ্ঝতি । পুরিমস্মিম্পি ৰা সমথৰিপস্সনাৰ গহেতব্বাতি ৰুত্তং, তং পন ন যুত্তং। এৰং লোকিযা সম্মপ্পধানকথা সব্বপুব্বভাগে কস্সপসংযুত্তপরিযাযেন ৰেদিতব্বা। লোকুত্তরমগ্গক্খণে পনেতং একমেৰ ৰীরিযং চতুকিচ্চসাধনৰসেন চত্তারি নামানি লভতি।

    Ettha ca pāpakā akusalāti lobhādayo veditabbā. Anuppannākusalā dhammāti samathavipassanā ceva maggo ca. Uppannā kusalā nāma samathavipassanāva. Maggo pana sakiṃ uppajjitvā nirujjhamāno anatthāya saṃvattanako nāma natthi. So hi phalassa paccayaṃ datvāva nirujjhati . Purimasmimpi vā samathavipassanāva gahetabbāti vuttaṃ, taṃ pana na yuttaṃ. Evaṃ lokiyā sammappadhānakathā sabbapubbabhāge kassapasaṃyuttapariyāyena veditabbā. Lokuttaramaggakkhaṇe panetaṃ ekameva vīriyaṃ catukiccasādhanavasena cattāri nāmāni labhati.

    তত্থ অনুপ্পন্নানং পাপকানন্তি এত্থ ‘‘অনুপ্পন্নো চেৰ কামচ্ছন্দো’’তিআদীসু ৰুত্তনযেন অত্থো ৰেদিতব্বো। উপ্পন্নানং পাপকানন্তি এত্থ চতুব্বিধং উপ্পন্নং ৰত্তমানুপ্পন্নং, ভুত্ৰাৰিগতুপ্পন্নং, ওকাসকতুপ্পন্নং, ভূমিলদ্ধুপ্পন্নন্তি। তত্থ যে কিলেসা ৰিজ্জমানা উপ্পাদাদিসমঙ্গিনো, ইদং ৰত্তমানুপ্পন্নং নাম। কম্মে পন জৰিতে আরম্মণরসং অনুভৰিত্ৰা নিরুদ্ধৰিপাকো ভুত্ৰা ৰিগতং নাম, কম্মং উপ্পজ্জিত্ৰা নিরুদ্ধং ভুত্ৰা ৰিগতং নাম। তদুভযম্পি ভুত্ৰাৰিগতুপ্পন্নন্তি সঙ্খং গচ্ছতি। কুসলাকুসলকম্মং অঞ্ঞকম্মস্স ৰিপাকং পটিবাহিত্ৰা অত্তনো ৰিপাকস্স ওকাসং করোতি, এৰং কতে ওকাসে ৰিপাকো উপ্পজ্জমানো ওকাসকরণতো পট্ঠায উপ্পন্নোতি ৰুচ্চতি, ইদং ওকাসকতুপ্পন্নং নাম। পঞ্চক্খন্ধা পন ৰিপস্সনায ভূমি নাম, তে অতীতাদিভেদা হোন্তি। তেসু অনুসযিতকিলেসা পন অতীতা ৰা অনাগতা ৰা পচ্চুপ্পন্না ৰাতি ন ৰত্তব্বা। অতীতক্খন্ধেসু অনুসযিতাপি হি অপ্পহীনাৰ হোন্তি, অনাগতক্খন্ধেসু অনুসযিতাপি অপ্পহীনাৰ হোন্তি, পচ্চুপ্পন্নক্খন্ধেসু অনুসযিতাপি অপ্পহীনাৰ হোন্তি, ইদং ভূমিলদ্ধুপ্পন্নং নাম। তেনাহু পোরাণা – ‘‘তাসু তাসু ভূমিসু অসমুগ্ঘাতগতা কিলেসা ভূমিলদ্ধুপ্পন্নাতি সঙ্খং গচ্ছন্তী’’তি।

    Tattha anuppannānaṃ pāpakānanti ettha ‘‘anuppanno ceva kāmacchando’’tiādīsu vuttanayena attho veditabbo. Uppannānaṃ pāpakānanti ettha catubbidhaṃ uppannaṃ vattamānuppannaṃ, bhutvāvigatuppannaṃ, okāsakatuppannaṃ, bhūmiladdhuppannanti. Tattha ye kilesā vijjamānā uppādādisamaṅgino, idaṃ vattamānuppannaṃ nāma. Kamme pana javite ārammaṇarasaṃ anubhavitvā niruddhavipāko bhutvā vigataṃ nāma, kammaṃ uppajjitvā niruddhaṃ bhutvā vigataṃ nāma. Tadubhayampi bhutvāvigatuppannanti saṅkhaṃ gacchati. Kusalākusalakammaṃ aññakammassa vipākaṃ paṭibāhitvā attano vipākassa okāsaṃ karoti, evaṃ kate okāse vipāko uppajjamāno okāsakaraṇato paṭṭhāya uppannoti vuccati, idaṃ okāsakatuppannaṃ nāma. Pañcakkhandhā pana vipassanāya bhūmi nāma, te atītādibhedā honti. Tesu anusayitakilesā pana atītā vā anāgatā vā paccuppannā vāti na vattabbā. Atītakkhandhesu anusayitāpi hi appahīnāva honti, anāgatakkhandhesu anusayitāpi appahīnāva honti, paccuppannakkhandhesu anusayitāpi appahīnāva honti, idaṃ bhūmiladdhuppannaṃ nāma. Tenāhu porāṇā – ‘‘tāsu tāsu bhūmisu asamugghātagatā kilesā bhūmiladdhuppannāti saṅkhaṃ gacchantī’’ti.

    অপরম্পি চতুব্বিধং উপ্পন্নং সমুদাচারুপ্পন্নং, আরম্মণাধিগ্গহিতুপ্পন্নং, অৰিক্খম্ভিতুপ্পন্নং, অসমুগ্ঘাতিতুপ্পন্নন্তি। তত্থ সম্পতি ৰত্তমানংযেৰ সমুদাচারুপ্পন্নং নাম। সকিং চক্খূনি উম্মীলেত্ৰা আরম্মণে নিমিত্তে গহিতে অনুস্সরিতানুস্সরিতক্খণে কিলেসা নুপ্পজ্জিস্সন্তীতি ন ৰত্তব্বা। কস্মা? আরম্মণস্স অধিগ্গহিতত্তা। যথা কিং? যথা খীরুক্খস্স কুঠারিযা আহতাহতট্ঠানে খীরং ন নিক্খমিস্সতীতি ন ৰত্তব্বা, এৰং। ইদং আরম্মণাধিগ্গহিতুপ্পন্নং নাম। সমাপত্তিযা অৰিক্খম্ভিতকিলেসা পন ইমস্মিং নাম ঠানেন উপ্পজ্জিস্সন্তীতি ন ৰত্তব্বা। কস্মা? অৰিক্খম্ভিতত্তা। যথা কিং? যথা খীররুক্খং কুঠারিযা আহনেয্যুং, ইমস্মিং নাম ঠানে খীরং ন নিক্খমেয্যাতি ন ৰত্তব্বং, এৰং। ইদং অৰিক্খম্ভিতুপ্পন্নং নাম। মগ্গেন অসমুগ্ঘাতিতকিলেসা পন ভৰগ্গে নিব্বত্তস্সাপি উপ্পজ্জন্তীতি পুরিমনযেনেৰ ৰিত্থারেতব্বং। ইদং অসমুগ্ঘাতিতুপ্পন্নং নাম।

    Aparampi catubbidhaṃ uppannaṃ samudācāruppannaṃ, ārammaṇādhiggahituppannaṃ, avikkhambhituppannaṃ, asamugghātituppannanti. Tattha sampati vattamānaṃyeva samudācāruppannaṃ nāma. Sakiṃ cakkhūni ummīletvā ārammaṇe nimitte gahite anussaritānussaritakkhaṇe kilesā nuppajjissantīti na vattabbā. Kasmā? Ārammaṇassa adhiggahitattā. Yathā kiṃ? Yathā khīrukkhassa kuṭhāriyā āhatāhataṭṭhāne khīraṃ na nikkhamissatīti na vattabbā, evaṃ. Idaṃ ārammaṇādhiggahituppannaṃ nāma. Samāpattiyā avikkhambhitakilesā pana imasmiṃ nāma ṭhānena uppajjissantīti na vattabbā. Kasmā? Avikkhambhitattā. Yathā kiṃ? Yathā khīrarukkhaṃ kuṭhāriyā āhaneyyuṃ, imasmiṃ nāma ṭhāne khīraṃ na nikkhameyyāti na vattabbaṃ, evaṃ. Idaṃ avikkhambhituppannaṃ nāma. Maggena asamugghātitakilesā pana bhavagge nibbattassāpi uppajjantīti purimanayeneva vitthāretabbaṃ. Idaṃ asamugghātituppannaṃ nāma.

    ইমেসু উপ্পন্নেসু ৰত্তমানুপ্পন্নং, ভুত্ৰাৰিগতুপ্পন্নং, ওকাসকতুপ্পন্নং, সমুদাচারুপ্পন্নন্তি চতুব্বিধং উপ্পন্নং ন মগ্গৰজ্ঝং, ভূমিলদ্ধুপ্পন্নং, আরম্মণাধিগ্গহিতুপ্পন্নং, অৰিক্খম্ভিতুপ্পন্নং, অসমুগ্ঘাতিতুপ্পন্নন্তি চতুব্বিধং মগ্গৰজ্ঝং। মগ্গো হি উপ্পজ্জমানো এতে কিলেসে পজহতি। সো যে কিলেসে পজহতি, তে অতীতা ৰা অনাগতা ৰা পচ্চুপ্পন্না ৰাতি ন ৰত্তব্বা। ৰুত্তম্পি চেতং –

    Imesu uppannesu vattamānuppannaṃ, bhutvāvigatuppannaṃ, okāsakatuppannaṃ, samudācāruppannanti catubbidhaṃ uppannaṃ na maggavajjhaṃ, bhūmiladdhuppannaṃ, ārammaṇādhiggahituppannaṃ, avikkhambhituppannaṃ, asamugghātituppannanti catubbidhaṃ maggavajjhaṃ. Maggo hi uppajjamāno ete kilese pajahati. So ye kilese pajahati, te atītā vā anāgatā vā paccuppannā vāti na vattabbā. Vuttampi cetaṃ –

    ‘‘হঞ্চি অতীতে কিলেসে পজহতি? তেন হি খীণংযেৰ খেপেতি, নিরুদ্ধং নিরোধেতি, অত্থঙ্গতং অত্থঙ্গমেতি, অতীতং যং নত্থি, তং পজহতি। হঞ্চি অনাগতে কিলেসে পজহতি? তেন হি অজাতং পজহতি, অনিব্বত্তং অনুপ্পন্নং অপাতুভূতং পজহতি, অনাগতং যং নত্থি, তং পজহতি। হঞ্চি পচ্চুপ্পন্নে কিলেসে পজহতি? তেন হি রত্তো রাগং পজহতি, দুট্ঠো দোসং, মূল়্হো মোহং, ৰিনিবদ্ধো মানং, পরামট্ঠো দিট্ঠিং, অনিট্ঠঙ্গতো ৰিচিকিচ্ছং, থামগতো অনুসযং পজহতি, কণ্হসুক্কা ধম্মা যুগনদ্ধা ৰত্তন্তি, সংকিলেসিযা মগ্গভাৰনা হোতীতি…পে॰… তেন হি নত্থি মগ্গভাৰনা, নত্থি ফলসচ্ছিকিরিযা, নত্থি কিলেসপ্পহানং, নত্থি ধম্মাভিসমযোতি। অত্থি মগ্গভাৰনা…পে॰… অত্থি ধম্মাভিসমযোতি। যথা কথং ৰিয? সেয্যথাপি তরুণো রুক্খো…পে॰… অপাতুভূতাযেৰ ন পাতুভৰন্তী’’তি (পটি॰ ম॰ ৩.২১)।

    ‘‘Hañci atīte kilese pajahati? Tena hi khīṇaṃyeva khepeti, niruddhaṃ nirodheti, atthaṅgataṃ atthaṅgameti, atītaṃ yaṃ natthi, taṃ pajahati. Hañci anāgate kilese pajahati? Tena hi ajātaṃ pajahati, anibbattaṃ anuppannaṃ apātubhūtaṃ pajahati, anāgataṃ yaṃ natthi, taṃ pajahati. Hañci paccuppanne kilese pajahati? Tena hi ratto rāgaṃ pajahati, duṭṭho dosaṃ, mūḷho mohaṃ, vinibaddho mānaṃ, parāmaṭṭho diṭṭhiṃ, aniṭṭhaṅgato vicikicchaṃ, thāmagato anusayaṃ pajahati, kaṇhasukkā dhammā yuganaddhā vattanti, saṃkilesiyā maggabhāvanā hotīti…pe… tena hi natthi maggabhāvanā, natthi phalasacchikiriyā, natthi kilesappahānaṃ, natthi dhammābhisamayoti. Atthi maggabhāvanā…pe… atthi dhammābhisamayoti. Yathā kathaṃ viya? Seyyathāpi taruṇo rukkho…pe… apātubhūtāyeva na pātubhavantī’’ti (paṭi. ma. 3.21).

    ইতি পাল়িযং অজাতফলরুক্খো আগতো, জাতফলরুক্খো পন দীপেতব্বো। যথা হি সফলো তরুণম্বরুক্খো, তস্স ফলানি মনুস্সা পরিভুঞ্জেয্যুং, সেসানি পাতেত্ৰা পচ্ছিযো পূরেয্যুং, অথঞ্ঞো পুরিসো তং ফরসুনা ছিন্দেয্য। তেনস্স নেৰ অতীতানি ফলানি নাসিতানি হোন্তি, ন অনাগতপচ্চুপ্পন্নানি চ নাসিতানি। অতীতানি হি মনুস্সেহি পরিভুত্তানি, অনাগতানি অনিব্বত্তানি, ন সক্কা নাসেতুং। যস্মিং পন সমযে সো ছিন্নো, তদা ফলানিযেৰ নত্থীতি পচ্চুপ্পন্নানিপি অনাসিতানি। সচে পন রুক্খো অচ্ছিন্নো অস্স, অথস্স পথৰীরসঞ্চ আপোরসঞ্চ আগম্ম যানি ফলানি নিব্বত্তেয্যুং, তানি নাসিতানি হোন্তি। তানি হি অজাতানেৰ ন জাযন্তি, অনিব্বত্তানেৰ ন নিব্বত্তন্তি, অপাতুভূতানেৰ ন পাতুভৰন্তি। এৰমেৰ মগ্গো নাপি অতীতাদিভেদে কিলেসে পজহতি, নাপি ন পজহতি। যেসঞ্হি কিলেসানং মগ্গেন খন্ধেসু অপরিঞ্ঞাতেসু উপ্পত্তি সিযা, মগ্গেন উপ্পজ্জিত্ৰা খন্ধানং পরিঞ্ঞাতত্তা তে কিলেসা অজাতাৰ ন জাযন্তি, অনিব্বত্তাৰ ন নিব্বত্তন্তি, অপাতুভূতাৰ ন পাতুভৰন্তি। তরুণপুত্তায ইত্থিযা পুন অৰিজাযনত্থং ব্যাধিতানং রোগৰূপসমনত্থং পীতভেসজ্জেহি ৰাপি অযমত্থো ৰিভাৰেতব্বো। এৰং মগ্গো যে কিলেসে পজহতি, তে অতীতা ৰা অনাগতা ৰা পচ্চুপ্পন্না ৰাতি ন ৰত্তব্বা। ন চ মগ্গো কিলেসে ন পজহতি। যে পন মগ্গো কিলেসে পজহতি, তে সন্ধায ‘‘উপ্পন্নানং পাপকান’’ন্তিআদি ৰুত্তং।

    Iti pāḷiyaṃ ajātaphalarukkho āgato, jātaphalarukkho pana dīpetabbo. Yathā hi saphalo taruṇambarukkho, tassa phalāni manussā paribhuñjeyyuṃ, sesāni pātetvā pacchiyo pūreyyuṃ, athañño puriso taṃ pharasunā chindeyya. Tenassa neva atītāni phalāni nāsitāni honti, na anāgatapaccuppannāni ca nāsitāni. Atītāni hi manussehi paribhuttāni, anāgatāni anibbattāni, na sakkā nāsetuṃ. Yasmiṃ pana samaye so chinno, tadā phalāniyeva natthīti paccuppannānipi anāsitāni. Sace pana rukkho acchinno assa, athassa pathavīrasañca āporasañca āgamma yāni phalāni nibbatteyyuṃ, tāni nāsitāni honti. Tāni hi ajātāneva na jāyanti, anibbattāneva na nibbattanti, apātubhūtāneva na pātubhavanti. Evameva maggo nāpi atītādibhede kilese pajahati, nāpi na pajahati. Yesañhi kilesānaṃ maggena khandhesu apariññātesu uppatti siyā, maggena uppajjitvā khandhānaṃ pariññātattā te kilesā ajātāva na jāyanti, anibbattāva na nibbattanti, apātubhūtāva na pātubhavanti. Taruṇaputtāya itthiyā puna avijāyanatthaṃ byādhitānaṃ rogavūpasamanatthaṃ pītabhesajjehi vāpi ayamattho vibhāvetabbo. Evaṃ maggo ye kilese pajahati, te atītā vā anāgatā vā paccuppannā vāti na vattabbā. Na ca maggo kilese na pajahati. Ye pana maggo kilese pajahati, te sandhāya ‘‘uppannānaṃ pāpakāna’’ntiādi vuttaṃ.

    ন কেৰলঞ্চ মগ্গো কিলেসেযেৰ পজহতি, কিলেসানং পন অপ্পহীনত্তা যে উপ্পজ্জেয্যুং উপাদিন্নক্খন্ধা, তেপি পজহতিযেৰ। ৰুত্তম্পি চেতং – ‘‘সোতাপত্তিমগ্গঞাণেন অভিসঙ্খারৰিঞ্ঞাণস্স নিরোধেন সত্ত ভৰে ঠপেত্ৰা অনমতগ্গে সংসারে যে উপ্পজ্জেয্যুং নামঞ্চ রূপঞ্চ, এত্থেতে নিরুজ্ঝন্তী’’তি (চূল়ৰ॰ অজিতমাণৰপুচ্ছানিদ্দেসো ৬) ৰিত্থারো। ইতি মগ্গো উপাদিন্নতো অনুপাদিন্নতো চ ৰুট্ঠাতি। ভৰৰসেন পন সোতাপত্তিমগ্গো অপাযভৰতো ৰুট্ঠাতি, সকদাগামিমগ্গো সুগতিভৰেকদেসতো, অনাগামিমগ্গো সুগতিকামভৰতো, অরহত্তমগ্গো রূপারূপভৰতো ৰুট্ঠাতি। সব্বভৰেহি ৰুট্ঠাতিযেৰাতিপি ৰদন্তি।

    Na kevalañca maggo kileseyeva pajahati, kilesānaṃ pana appahīnattā ye uppajjeyyuṃ upādinnakkhandhā, tepi pajahatiyeva. Vuttampi cetaṃ – ‘‘sotāpattimaggañāṇena abhisaṅkhāraviññāṇassa nirodhena satta bhave ṭhapetvā anamatagge saṃsāre ye uppajjeyyuṃ nāmañca rūpañca, etthete nirujjhantī’’ti (cūḷava. ajitamāṇavapucchāniddeso 6) vitthāro. Iti maggo upādinnato anupādinnato ca vuṭṭhāti. Bhavavasena pana sotāpattimaggo apāyabhavato vuṭṭhāti, sakadāgāmimaggo sugatibhavekadesato, anāgāmimaggo sugatikāmabhavato, arahattamaggo rūpārūpabhavato vuṭṭhāti. Sabbabhavehi vuṭṭhātiyevātipi vadanti.

    অথ মগ্গক্খণে কথং অনুপ্পন্নানং উপ্পাদায ভাৰনা হোতি, কথং ৰা উপ্পন্নানং ঠিতিযাতি? মগ্গপ্পৰত্তিযা এৰ। মগ্গো হি পৰত্তমানো পুব্বে অনুপ্পন্নপুব্বত্তা অনুপ্পন্নো নাম ৰুচ্চতি। অনাগতপুব্বঞ্হি ঠানং গন্ত্ৰা অননুভূতপুব্বং ৰা আরম্মণং অনুভৰিত্ৰা ৰত্তারো ভৰন্তি; ‘‘অনাগতট্ঠানং আগতম্হ, অননুভূতং আরম্মণং অনুভৰামা’’তি। যা চস্স পৰত্তি, অযমেৰ ঠিতি নামাতি ‘‘ঠিতিযা ভাৰেতী’’তি ৰত্তুং ৰট্টতি। এৰমেতস্স ভিক্খুনো ইদং লোকুত্তরমগ্গক্খণে ৰীরিযং ‘‘অনুপ্পন্নানং পাপকানং অকুসলানং ধম্মানং অনুপ্পাদাযা’’তিআদীনি চত্তারি নামানি লভতি। অযং লোকুত্তরমগ্গক্খণে সম্মপ্পধানকথা। ইমস্মিং পন সুত্তে লোকিযলোকুত্তরমিস্সকানেৰ সম্মপ্পধানানি কথিতানি।

    Atha maggakkhaṇe kathaṃ anuppannānaṃ uppādāya bhāvanā hoti, kathaṃ vā uppannānaṃ ṭhitiyāti? Maggappavattiyā eva. Maggo hi pavattamāno pubbe anuppannapubbattā anuppanno nāma vuccati. Anāgatapubbañhi ṭhānaṃ gantvā ananubhūtapubbaṃ vā ārammaṇaṃ anubhavitvā vattāro bhavanti; ‘‘anāgataṭṭhānaṃ āgatamha, ananubhūtaṃ ārammaṇaṃ anubhavāmā’’ti. Yā cassa pavatti, ayameva ṭhiti nāmāti ‘‘ṭhitiyā bhāvetī’’ti vattuṃ vaṭṭati. Evametassa bhikkhuno idaṃ lokuttaramaggakkhaṇe vīriyaṃ ‘‘anuppannānaṃ pāpakānaṃ akusalānaṃ dhammānaṃ anuppādāyā’’tiādīni cattāri nāmāni labhati. Ayaṃ lokuttaramaggakkhaṇe sammappadhānakathā. Imasmiṃ pana sutte lokiyalokuttaramissakāneva sammappadhānāni kathitāni.

    ৩৯৮-৪০১. ইদ্ধিপাদেসু ছন্দং নিস্সায পৰত্তো সমাধি ছন্দসমাধি, পধানভূতা সঙ্খারা পধানসঙ্খারা। সমন্নাগতন্তি তেহি ধম্মেহি উপেতং। ইদ্ধিযা পাদং, ইদ্ধিভূতং ৰা পাদন্তি ইদ্ধিপাদং। সেসেসুপি এসেৰ নযো। অযমেত্থ সঙ্খেপো, ৰিত্থারো পন ইদ্ধিপাদৰিভঙ্গে (ৰিভ॰ ৪৩১ আদযো) আগতো এৰ। ৰিসুদ্ধিমগ্গে (ৰিসুদ্ধি॰ ২.৩৮২) পনস্স অত্থো দীপিতো। তত্রাযং ভিক্খু যদা ছন্দাদীসু একং ধুরং নিস্সায ৰিপস্সনং ৰড্ঢেত্ৰা অরহত্তং পাপুণাতি , তদাস্স পঠমিদ্ধিপাদো পুব্বভাগে লোকিযো, অপরভাগে লোকুত্তরো। এৰং সেসাপীতি। ইমস্মিম্পি সুত্তে লোকিযলোকুত্তরাৰ ইদ্ধিপাদা কথিতা।

    398-401. Iddhipādesu chandaṃ nissāya pavatto samādhi chandasamādhi, padhānabhūtā saṅkhārā padhānasaṅkhārā. Samannāgatanti tehi dhammehi upetaṃ. Iddhiyā pādaṃ, iddhibhūtaṃ vā pādanti iddhipādaṃ. Sesesupi eseva nayo. Ayamettha saṅkhepo, vitthāro pana iddhipādavibhaṅge (vibha. 431 ādayo) āgato eva. Visuddhimagge (visuddhi. 2.382) panassa attho dīpito. Tatrāyaṃ bhikkhu yadā chandādīsu ekaṃ dhuraṃ nissāya vipassanaṃ vaḍḍhetvā arahattaṃ pāpuṇāti , tadāssa paṭhamiddhipādo pubbabhāge lokiyo, aparabhāge lokuttaro. Evaṃ sesāpīti. Imasmimpi sutte lokiyalokuttarāva iddhipādā kathitā.

    ৪০২-৪০৬. সদ্ধিন্দ্রিযং ভাৰেতীতিআদীসু সদ্ধাৰ অত্তনো সদ্ধাধুরে ইন্দট্ঠং করোতীতি সদ্ধিন্দ্রিযং। ৰীরিযিন্দ্রিযাদীসুপি এসেৰ নযো। ভাৰেতীতি এত্থ পন আদিকম্মিকো যোগাৰচরো তীহি কারণেহি সদ্ধিন্দ্রিযং ৰিসোধেন্তো সদ্ধিন্দ্রিযং ভাৰেতি নাম। ৰীরিযিন্দ্রিযাদীসুপি এসেৰ নযো। ৰুত্তঞ্হেতং –

    402-406.Saddhindriyaṃ bhāvetītiādīsu saddhāva attano saddhādhure indaṭṭhaṃ karotīti saddhindriyaṃ. Vīriyindriyādīsupi eseva nayo. Bhāvetīti ettha pana ādikammiko yogāvacaro tīhi kāraṇehi saddhindriyaṃ visodhento saddhindriyaṃ bhāveti nāma. Vīriyindriyādīsupi eseva nayo. Vuttañhetaṃ –

    ‘‘অস্সদ্ধে পুগ্গলে পরিৰজ্জযতো, সদ্ধে পুগ্গলে সেৰতো ভজতো পযিরুপাসতো, পসাদনীযে সুত্তন্তে পচ্চৰেক্খতো ইমেহি তীহাকারেহি সদ্ধিন্দ্রিযং ৰিসুজ্ঝতি।

    ‘‘Assaddhe puggale parivajjayato, saddhe puggale sevato bhajato payirupāsato, pasādanīye suttante paccavekkhato imehi tīhākārehi saddhindriyaṃ visujjhati.

    ‘‘কুসীতে পুগ্গলে পরিৰজ্জযতো, আরদ্ধৰীরিযে পুগ্গলে সেৰতো ভজতো পযিরুপাসতো, সম্মপ্পধানে পচ্চৰেক্খতো ইমেহি তীহাকারেহি ৰীরিযিন্দ্রিযং ৰিসুজ্ঝতি।

    ‘‘Kusīte puggale parivajjayato, āraddhavīriye puggale sevato bhajato payirupāsato, sammappadhāne paccavekkhato imehi tīhākārehi vīriyindriyaṃ visujjhati.

    ‘‘মুট্ঠস্সতী পুগ্গলে পরিৰজ্জযতো, উপট্ঠিতস্সতী পুগ্গলে সেৰতো ভজতো পযিরুপাসতো, সতিপট্ঠানে পচ্চৰেক্খতো ইমেহি তীহাকারেহি সতিন্দ্রিযং ৰিসুজ্ঝতি।

    ‘‘Muṭṭhassatī puggale parivajjayato, upaṭṭhitassatī puggale sevato bhajato payirupāsato, satipaṭṭhāne paccavekkhato imehi tīhākārehi satindriyaṃ visujjhati.

    ‘‘অসমাহিতে পুগ্গলে পরিৰজ্জযতো, সমাহিতে পুগ্গলে সেৰতো ভজতো পযিরুপাসতো, ঝানৰিমোক্খে পচ্চৰেক্খতো ইমেহি তীহাকারেহি সমাধিন্দ্রিযং ৰিসুজ্ঝতি।

    ‘‘Asamāhite puggale parivajjayato, samāhite puggale sevato bhajato payirupāsato, jhānavimokkhe paccavekkhato imehi tīhākārehi samādhindriyaṃ visujjhati.

    ‘‘দুপ্পঞ্ঞে পুগ্গলে পরিৰজ্জযতো, পঞ্ঞৰন্তে পুগ্গলে সেৰতো ভজতো পযিরুপাসতো, গম্ভীরঞাণচরিযং পচ্চৰেক্খতো ইমেহি তীহাকারেহি পঞ্ঞিন্দ্রিযং ৰিসুজ্ঝতী’’তি (পটি॰ ম॰ ১.১৮৪-১৮৫)।

    ‘‘Duppaññe puggale parivajjayato, paññavante puggale sevato bhajato payirupāsato, gambhīrañāṇacariyaṃ paccavekkhato imehi tīhākārehi paññindriyaṃ visujjhatī’’ti (paṭi. ma. 1.184-185).

    এত্থ চ গম্ভীরঞাণচরিযং পচ্চৰেক্খতোতি সণ্হসুখুমং খন্ধন্তরং, আযতনন্তরং, ধাতন্তরং, ইন্দ্রিযবলবোজ্ঝঙ্গন্তরং, মগ্গন্তরং, ফলন্তরঞ্চ পচ্চৰেক্খন্তস্সাতি অত্থো। ইমেসঞ্হি তিণ্ণং তিণ্ণং কারণানং ৰসেন অকতাভিনিৰেসো আদিকম্মিকো যোগাৰচরো সদ্ধাধুরাদীসু অভিনিৰেসং পট্ঠপেত্ৰা ভাৰেন্তো অৰসানে ৰিৰট্টেত্ৰা অরহত্তং গণ্হতি। সো যাৰ অরহত্তমগ্গা ইমানি ইন্দ্রিযানি ভাৰেতি নাম, অরহত্তফলে পত্তে ভাৰিতিন্দ্রিযো নাম হোতীতি। এৰং ইমানিপি পঞ্চিন্দ্রিযানি লোকিযলোকুত্তরানেৰ কথিতানীতি।

    Ettha ca gambhīrañāṇacariyaṃ paccavekkhatoti saṇhasukhumaṃ khandhantaraṃ, āyatanantaraṃ, dhātantaraṃ, indriyabalabojjhaṅgantaraṃ, maggantaraṃ, phalantarañca paccavekkhantassāti attho. Imesañhi tiṇṇaṃ tiṇṇaṃ kāraṇānaṃ vasena akatābhiniveso ādikammiko yogāvacaro saddhādhurādīsu abhinivesaṃ paṭṭhapetvā bhāvento avasāne vivaṭṭetvā arahattaṃ gaṇhati. So yāva arahattamaggā imāni indriyāni bhāveti nāma, arahattaphale patte bhāvitindriyo nāma hotīti. Evaṃ imānipi pañcindriyāni lokiyalokuttarāneva kathitānīti.

    সদ্ধাবলাদীসু সদ্ধাযেৰ অকম্পিযট্ঠেন বলন্তি সদ্ধাবলং। ৰীরিযবলাদীসুপি এসেৰ নযো। এত্থ হি সদ্ধা অস্সদ্ধিযে ন কম্পতি, ৰীরিযং কোসজ্জেন ন কম্পতি, সতি মুট্ঠস্সচ্চেন ন কম্পতি, সমাধি উদ্ধচ্চে ন কম্পতি, পঞ্ঞা অৰিজ্জায ন কম্পতীতি সব্বানিপি অকম্পিযট্ঠেন বলানীতি ৰুচ্চন্তি। ভাৰনানযো পনেত্থ ইন্দ্রিযভাৰনাযং ৰুত্তনযেনেৰ ৰেদিতব্বোতি। ইমানি লোকিযলোকুত্তরানেৰ কথিতানীতি।

    Saddhābalādīsu saddhāyeva akampiyaṭṭhena balanti saddhābalaṃ. Vīriyabalādīsupi eseva nayo. Ettha hi saddhā assaddhiye na kampati, vīriyaṃ kosajjena na kampati, sati muṭṭhassaccena na kampati, samādhi uddhacce na kampati, paññā avijjāya na kampatīti sabbānipi akampiyaṭṭhena balānīti vuccanti. Bhāvanānayo panettha indriyabhāvanāyaṃ vuttanayeneva veditabboti. Imāni lokiyalokuttarāneva kathitānīti.

    ৪১৮. সতিসম্বোজ্ঝঙ্গং ভাৰেতীতি এত্থ অযং আদিকম্মিকানং কুলপুত্তানং ৰসেন সদ্ধিং অত্থৰণ্ণনায ভাৰনানযো। তত্থ সতিসম্বোজ্ঝঙ্গন্তিআদিনা নযেন ৰুত্তানং সত্তন্নং আদিপদানং তাৰ অযমত্থৰণ্ণনা – সতিসম্বোজ্ঝঙ্গে তাৰ সরণট্ঠেন সতি, সা পনেসা উপট্ঠানলক্খণা, অপিলাপনলক্খণা ৰা। ৰুত্তম্পি চেতং – ‘‘যথা, মহারাজ , রঞ্ঞো ভণ্ডাগারিকো রঞ্ঞো সাপতেয্যং অপিলাপেতি ‘এত্তকং, মহারাজ, হিরঞ্ঞং, এত্তকং সুৰণ্ণং, এত্তকং সাপতেয্য’ন্তি। এৰমেৰ খো, মহারাজ, সতি উপ্পজ্জমানা কুসলাকুসলসাৰজ্জানৰজ্জহীনপ্পণীতকণ্হসুক্কসপ্পটিভাগে ধম্মে অপিলাপেতি ইমে চত্তারো সতিপট্ঠানা’’তি (মি॰ প॰ ২.১.১৩) ৰিত্থারো। অপিলাপনরসা, কিচ্চৰসেনেৰ হিস্সা এতং লক্খণং থেরেন ৰুত্তং। অসম্মোসরসা ৰা, গোচরাভিমুখীভাৰপচ্চুপট্ঠানা। সতি এৰ সম্বোজ্ঝঙ্গোতি সতিসম্বোজ্ঝঙ্গো।

    418.Satisambojjhaṅgaṃ bhāvetīti ettha ayaṃ ādikammikānaṃ kulaputtānaṃ vasena saddhiṃ atthavaṇṇanāya bhāvanānayo. Tattha satisambojjhaṅgantiādinā nayena vuttānaṃ sattannaṃ ādipadānaṃ tāva ayamatthavaṇṇanā – satisambojjhaṅge tāva saraṇaṭṭhena sati, sā panesā upaṭṭhānalakkhaṇā, apilāpanalakkhaṇā vā. Vuttampi cetaṃ – ‘‘yathā, mahārāja , rañño bhaṇḍāgāriko rañño sāpateyyaṃ apilāpeti ‘ettakaṃ, mahārāja, hiraññaṃ, ettakaṃ suvaṇṇaṃ, ettakaṃ sāpateyya’nti. Evameva kho, mahārāja, sati uppajjamānā kusalākusalasāvajjānavajjahīnappaṇītakaṇhasukkasappaṭibhāge dhamme apilāpeti ime cattāro satipaṭṭhānā’’ti (mi. pa. 2.1.13) vitthāro. Apilāpanarasā, kiccavaseneva hissā etaṃ lakkhaṇaṃ therena vuttaṃ. Asammosarasā vā, gocarābhimukhībhāvapaccupaṭṭhānā. Sati eva sambojjhaṅgoti satisambojjhaṅgo.

    তত্থ বোধিযা, বোধিস্স ৰা অঙ্গোতি বোজ্ঝঙ্গো। কিং ৰুত্তং হোতি? যা হি অযং ধম্মসামগ্গীযায লোকিযলোকুত্তরমগ্গক্খণে উপ্পজ্জমানায লীনুদ্ধচ্চপতিট্ঠানাযূহনকামসুখঅত্তকিলমথানুযোগউচ্ছেদসস্সতাভিনিৰেসাদীনং অনেকেসং উপদ্দৰানং পটিপক্খভূতায সতিধম্মৰিচযৰীরিযপীতিপস্সদ্ধিসমাধিউপেক্খাসঙ্খাতায ধম্মসামগ্গিযা অরিযসাৰকো বুজ্ঝতীতি কত্ৰা বোধীতি ৰুচ্চতি, বুজ্ঝতীতি কিলেসসন্তাননিদ্দায উট্ঠহতি, চত্তারি ৰা অরিযসচ্চানি পটিৰিজ্ঝতি, নিব্বানমেৰ ৰা সচ্ছিকরোতীতি ৰুত্তং হোতি। যথাহ – ‘‘সত্ত বোজ্ঝঙ্গে ভাৰেত্ৰা অনুত্তরং সম্মাসম্বোধিং অভিসম্বুদ্ধো’’তি (সং॰ নি॰ ৫.৩৭৮; দী॰ নি॰ ৩.১৪৩)। তস্সা ধম্মসামগ্গিসঙ্খাতায বোধিযা অঙ্গোতিপি বোজ্ঝঙ্গো ঝানঙ্গমগ্গঙ্গাদযো ৰিয । যোপেস যথাৰুত্তপ্পকারায এতায ধম্মসামগ্গিযা বুজ্ঝতীতি কত্ৰা অরিযসাৰকো বোধীতি ৰুচ্চতি, তস্স অঙ্গোতিপি বোজ্ঝঙ্গো সেনঙ্গরথঙ্গাদযো ৰিয। তেনাহু অট্ঠকথাচরিযা – ‘‘বুজ্ঝনকস্স পুগ্গলস্স অঙ্গাতি ৰা বোজ্ঝঙ্গা’’তি।

    Tattha bodhiyā, bodhissa vā aṅgoti bojjhaṅgo. Kiṃ vuttaṃ hoti? Yā hi ayaṃ dhammasāmaggīyāya lokiyalokuttaramaggakkhaṇe uppajjamānāya līnuddhaccapatiṭṭhānāyūhanakāmasukhaattakilamathānuyogaucchedasassatābhinivesādīnaṃ anekesaṃ upaddavānaṃ paṭipakkhabhūtāya satidhammavicayavīriyapītipassaddhisamādhiupekkhāsaṅkhātāya dhammasāmaggiyā ariyasāvako bujjhatīti katvā bodhīti vuccati, bujjhatīti kilesasantānaniddāya uṭṭhahati, cattāri vā ariyasaccāni paṭivijjhati, nibbānameva vā sacchikarotīti vuttaṃ hoti. Yathāha – ‘‘satta bojjhaṅge bhāvetvā anuttaraṃ sammāsambodhiṃ abhisambuddho’’ti (saṃ. ni. 5.378; dī. ni. 3.143). Tassā dhammasāmaggisaṅkhātāya bodhiyā aṅgotipi bojjhaṅgo jhānaṅgamaggaṅgādayo viya . Yopesa yathāvuttappakārāya etāya dhammasāmaggiyā bujjhatīti katvā ariyasāvako bodhīti vuccati, tassa aṅgotipi bojjhaṅgo senaṅgarathaṅgādayo viya. Tenāhu aṭṭhakathācariyā – ‘‘bujjhanakassa puggalassa aṅgāti vā bojjhaṅgā’’ti.

    অপিচ ‘‘বোজ্ঝঙ্গাতি কেনট্ঠেন বোজ্ঝঙ্গা? বোধায সংৰত্তন্তীতি বোজ্ঝঙ্গা, বুজ্ঝন্তীতি বোজ্ঝঙ্গা, অনুবুজ্ঝন্তীতি বোজ্ঝঙ্গা, পটিবুজ্ঝন্তীতি বোজ্ঝঙ্গা, সম্বুজ্ঝন্তীতি বোজ্ঝঙ্গা’’তি ইমিনা পটিসম্ভিদানযেনাপি (পটি॰ ম॰ ২.১৭) বোজ্ঝঙ্গত্থো ৰেদিতব্বো। পসত্থো সুন্দরো চ বোজ্ঝঙ্গো সম্বোজ্ঝঙ্গো, সতি এৰ সম্বোজ্ঝঙ্গো সতিসম্বোজ্ঝঙ্গো, তং সতিসম্বোজ্ঝঙ্গং।

    Apica ‘‘bojjhaṅgāti kenaṭṭhena bojjhaṅgā? Bodhāya saṃvattantīti bojjhaṅgā, bujjhantīti bojjhaṅgā, anubujjhantīti bojjhaṅgā, paṭibujjhantīti bojjhaṅgā, sambujjhantīti bojjhaṅgā’’ti iminā paṭisambhidānayenāpi (paṭi. ma. 2.17) bojjhaṅgattho veditabbo. Pasattho sundaro ca bojjhaṅgo sambojjhaṅgo, sati eva sambojjhaṅgo satisambojjhaṅgo, taṃ satisambojjhaṅgaṃ.

    ধম্মৰিচযসম্বোজ্ঝঙ্গন্তিআদীসুপি চতুসচ্চধম্মে ৰিচিনতীতি ধম্মৰিচযো। সো পৰিচযলক্খণো, ওভাসনরসো, অসম্মোহপচ্চুপট্ঠানো। ৰীরভাৰতো, ৰিধিনা ঈরযিতব্বতো চ ৰীরিযং। তং পগ্গহলক্খণং, উপথম্ভনরসং , অনোসীদনপচ্চুপট্ঠানং। পীণযতীতি পীতি। সা ফরণলক্খণা, তুট্ঠিলক্খণা ৰা, কাযচিত্তানং পীণনরসা, নেসংযেৰ ওদগ্যপচ্চুপট্ঠানা। কাযচিত্তদরথপ্পস্সম্ভনতো পস্সদ্ধি। সা উপসমলক্খণা, কাযচিত্তদরথমদ্দনরসা, কাযচিত্তানং অপরিপ্ফন্দসীতিভাৰপচ্চুপট্ঠানা। সমাধানতো সমাধি। সো অৰিক্খেপলক্খণো, অৰিসারলক্খণো ৰা, চিত্তচেতসিকানং সম্পিণ্ডনরসো, চিত্তট্ঠিতিপচ্চুপট্ঠানো। অজ্ঝুপেক্খনতো উপেক্খা। সা পটিসঙ্খানলক্খণা, সমৰাহিতলক্খণা ৰা, ঊনাধিকনিৰারণরসা, পক্খপাতুপচ্ছেদনরসা ৰা, মজ্ঝত্তভাৰপচ্চুপট্ঠানা। সেসং ৰুত্তনযমেৰ। ভাৰেতীতি ব্রূহেতি ৰড্ঢেতি, উপ্পাদেতীতি অত্থো।

    Dhammavicayasambojjhaṅgantiādīsupi catusaccadhamme vicinatīti dhammavicayo. So pavicayalakkhaṇo, obhāsanaraso, asammohapaccupaṭṭhāno. Vīrabhāvato, vidhinā īrayitabbato ca vīriyaṃ. Taṃ paggahalakkhaṇaṃ, upathambhanarasaṃ , anosīdanapaccupaṭṭhānaṃ. Pīṇayatīti pīti. Sā pharaṇalakkhaṇā, tuṭṭhilakkhaṇā vā, kāyacittānaṃ pīṇanarasā, nesaṃyeva odagyapaccupaṭṭhānā. Kāyacittadarathappassambhanato passaddhi. Sā upasamalakkhaṇā, kāyacittadarathamaddanarasā, kāyacittānaṃ aparipphandasītibhāvapaccupaṭṭhānā. Samādhānato samādhi. So avikkhepalakkhaṇo, avisāralakkhaṇo vā, cittacetasikānaṃ sampiṇḍanaraso, cittaṭṭhitipaccupaṭṭhāno. Ajjhupekkhanato upekkhā. Sā paṭisaṅkhānalakkhaṇā, samavāhitalakkhaṇā vā, ūnādhikanivāraṇarasā, pakkhapātupacchedanarasā vā, majjhattabhāvapaccupaṭṭhānā. Sesaṃ vuttanayameva. Bhāvetīti brūheti vaḍḍheti, uppādetīti attho.

    তত্থ চত্তারো ধম্মা সতিসম্বোজ্ঝঙ্গস্স উপ্পাদায সংৰত্তন্তীতি ৰেদিতব্বা সতিসম্পজঞ্ঞং মুট্ঠস্সতিপুগ্গলপরিৰজ্জনতা উপট্ঠিতস্সতিপুগ্গলসেৰনতা তদধিমুত্ততাতি। অভিক্কন্তাদীসু হি সত্তসু ঠানেসু সতিসম্পজঞ্ঞেন, ভত্তনিক্খিত্তকাকসদিসে মুট্ঠস্সতিপুগ্গলে পরিৰজ্জনেন, তিস্সদত্তত্থেরঅভযত্থেরাদিসদিসে উপট্ঠিতস্সতিপুগ্গলে সেৰনেন, ঠাননিসজ্জাদীসু সতিসমুট্ঠাপনত্থং নিন্নপোণপব্ভারচিত্ততায চ সতিসম্বোজ্ঝঙ্গো উপ্পজ্জতি। তস্মা আদিকম্মিকো কুলপুত্তো ইমেহি চতূহি কারণেহি সতিসম্বোজ্ঝঙ্গং সমুট্ঠাপেত্ৰা তদেৰ ধুরং কত্ৰা অভিনিৰেসং পট্ঠপেত্ৰা অনুক্কমেন অরহত্তং গণ্হাতি। সো যাৰ অরহত্তমগ্গা সতিসম্বোজ্ঝঙ্গং ভাৰেতি নাম, ফলে পত্তে ভাৰিতো নাম হোতি।

    Tattha cattāro dhammā satisambojjhaṅgassa uppādāya saṃvattantīti veditabbā satisampajaññaṃ muṭṭhassatipuggalaparivajjanatā upaṭṭhitassatipuggalasevanatā tadadhimuttatāti. Abhikkantādīsu hi sattasu ṭhānesu satisampajaññena, bhattanikkhittakākasadise muṭṭhassatipuggale parivajjanena, tissadattattheraabhayattherādisadise upaṭṭhitassatipuggale sevanena, ṭhānanisajjādīsu satisamuṭṭhāpanatthaṃ ninnapoṇapabbhāracittatāya ca satisambojjhaṅgo uppajjati. Tasmā ādikammiko kulaputto imehi catūhi kāraṇehi satisambojjhaṅgaṃ samuṭṭhāpetvā tadeva dhuraṃ katvā abhinivesaṃ paṭṭhapetvā anukkamena arahattaṃ gaṇhāti. So yāva arahattamaggā satisambojjhaṅgaṃ bhāveti nāma, phale patte bhāvito nāma hoti.

    সত্ত ধম্মা ধম্মৰিচযসম্বোজ্ঝঙ্গস্স উপ্পাদায সংৰত্তন্তি পরিপুচ্ছকতা, ৰত্থুৰিসদকিরিযা, ইন্দ্রিযসমত্তপটিপাদনা, দুপ্পঞ্ঞপুগ্গলপরিৰজ্জনা, পঞ্ঞৰন্তপুগ্গলসেৰনা, গম্ভীরঞাণচরিযপচ্চৰেক্খণা, তদধিমুত্ততাতি। তত্থ পরিপুচ্ছকতাতি খন্ধধাতুআযতনইন্দ্রিযবলবোজ্ঝঙ্গমগ্গঙ্গঝানসমথৰিপস্সনানং অত্থসন্নিস্সিতপরিপুচ্ছাবহুলতা।

    Satta dhammā dhammavicayasambojjhaṅgassa uppādāya saṃvattanti paripucchakatā, vatthuvisadakiriyā, indriyasamattapaṭipādanā, duppaññapuggalaparivajjanā, paññavantapuggalasevanā, gambhīrañāṇacariyapaccavekkhaṇā, tadadhimuttatāti. Tattha paripucchakatāti khandhadhātuāyatanaindriyabalabojjhaṅgamaggaṅgajhānasamathavipassanānaṃ atthasannissitaparipucchābahulatā.

    ৰত্থুৰিসদকিরিযাতি অজ্ঝত্তিকবাহিরানং ৰত্থূনং ৰিসদভাৰকরণং। যদা হিস্স কেসনখলোমা দীঘা হোন্তি, সরীরং ৰা উপ্পন্নদোসঞ্চেৰ সেদমলমক্খিতঞ্চ , তদা অজ্ঝত্তিকং ৰত্থু অৰিসদং হোতি অপরিসুদ্ধং। যদা পন চীৰরং জিণ্ণং কিলিট্ঠং দুগ্গন্ধং ৰা হোতি, সেনাসনং ৰা উক্লাপং, তদা বাহিরং ৰত্থু অৰিসদং হোতি অপরিসুদ্ধং। তস্মা কেসাদিচ্ছেদনেন উদ্ধংৰিরেচনঅধোৰিরেচনাদীহি সরীরসল্লহুকভাৰকরণেন উচ্ছাদননহাপনেন চ অজ্ঝত্তিকৰত্থু ৰিসদং কাতব্বং। সূচিকম্মধোৰনরজনপরিভণ্ডকরণাদীহি বাহিরৰত্থু ৰিসদং কাতব্বং। এতস্মিঞ্হি অজ্ঝত্তিকবাহিরে ৰত্থুম্হি অৰিসদে উপ্পন্নেসু চিত্তচেতসিকেসু ঞাণম্পি অৰিসদং হোতি অপরিসুদ্ধং অপরিসুদ্ধানি দীপকপল্লৰট্টিতেলাদীনি নিস্সায উপ্পন্নদীপসিখায ওভাসো ৰিয। ৰিসদে পন অজ্ঝত্তিকবাহিরে ৰত্থুম্হি উপ্পন্নেসু চিত্তচেতসিকেসু ঞাণম্পি ৰিসদং হোতি পরিসুদ্ধানি দীপকপল্লৰট্টিতেলাদীনি নিস্সায উপ্পন্নদীপসিখায ওভাসো ৰিয। তেন ৰুত্তং – ‘‘ৰত্থুৰিসদকিরিযা ধম্মৰিচযসম্বোজ্ঝঙ্গস্স উপ্পাদায সংৰত্ততী’’তি।

    Vatthuvisadakiriyāti ajjhattikabāhirānaṃ vatthūnaṃ visadabhāvakaraṇaṃ. Yadā hissa kesanakhalomā dīghā honti, sarīraṃ vā uppannadosañceva sedamalamakkhitañca , tadā ajjhattikaṃ vatthu avisadaṃ hoti aparisuddhaṃ. Yadā pana cīvaraṃ jiṇṇaṃ kiliṭṭhaṃ duggandhaṃ vā hoti, senāsanaṃ vā uklāpaṃ, tadā bāhiraṃ vatthu avisadaṃ hoti aparisuddhaṃ. Tasmā kesādicchedanena uddhaṃvirecanaadhovirecanādīhi sarīrasallahukabhāvakaraṇena ucchādananahāpanena ca ajjhattikavatthu visadaṃ kātabbaṃ. Sūcikammadhovanarajanaparibhaṇḍakaraṇādīhi bāhiravatthu visadaṃ kātabbaṃ. Etasmiñhi ajjhattikabāhire vatthumhi avisade uppannesu cittacetasikesu ñāṇampi avisadaṃ hoti aparisuddhaṃ aparisuddhāni dīpakapallavaṭṭitelādīni nissāya uppannadīpasikhāya obhāso viya. Visade pana ajjhattikabāhire vatthumhi uppannesu cittacetasikesu ñāṇampi visadaṃ hoti parisuddhāni dīpakapallavaṭṭitelādīni nissāya uppannadīpasikhāya obhāso viya. Tena vuttaṃ – ‘‘vatthuvisadakiriyā dhammavicayasambojjhaṅgassa uppādāya saṃvattatī’’ti.

    ইন্দ্রিযসমত্তপটিপাদনা নাম সদ্ধাদীনং ইন্দ্রিযানং সমভাৰকরণং। সচে হিস্স সদ্ধিন্দ্রিযং বলৰং হোতি, ইতরানি মন্দানি, ততো ৰীরিযিন্দ্রিযং পগ্গহকিচ্চং, সতিন্দ্রিযং উপট্ঠানকিচ্চং, সমাধিন্দ্রিযং অৰিক্খেপকিচ্চং, পঞ্ঞিন্দ্রিযং দস্সনকিচ্চং কাতুং ন সক্কোতি। তস্মা তং ধম্মসভাৰপচ্চৰেক্খণেন ৰা, যথা ৰা মনসিকরোতো বলৰং জাতং, তথা অমনসিকারেন হাপেতব্বং। ৰক্কলিত্থেরৰত্থু চেত্থ নিদস্সনং। সচে পন ৰীরিযিন্দ্রিযং বলৰং হোতি, অথ নেৰ সদ্ধিন্দ্রিযং অধিমোক্খকিচ্চং কাতুং সক্কোতি, ন ইতরানি ইতরকিচ্চভেদং। তস্মা তং পস্সদ্ধাদিভাৰনায হাপেতব্বং। তত্রাপি সোণত্থেরস্স ৰত্থু দস্সেতব্বং। এৰং সেসেসুপি একস্স বলৰভাৰে সতি ইতরেসং অত্তনো কিচ্চেসু অসমত্থতা ৰেদিতব্বা।

    Indriyasamattapaṭipādanā nāma saddhādīnaṃ indriyānaṃ samabhāvakaraṇaṃ. Sace hissa saddhindriyaṃ balavaṃ hoti, itarāni mandāni, tato vīriyindriyaṃ paggahakiccaṃ, satindriyaṃ upaṭṭhānakiccaṃ, samādhindriyaṃ avikkhepakiccaṃ, paññindriyaṃ dassanakiccaṃ kātuṃ na sakkoti. Tasmā taṃ dhammasabhāvapaccavekkhaṇena vā, yathā vā manasikaroto balavaṃ jātaṃ, tathā amanasikārena hāpetabbaṃ. Vakkalittheravatthu cettha nidassanaṃ. Sace pana vīriyindriyaṃ balavaṃ hoti, atha neva saddhindriyaṃ adhimokkhakiccaṃ kātuṃ sakkoti, na itarāni itarakiccabhedaṃ. Tasmā taṃ passaddhādibhāvanāya hāpetabbaṃ. Tatrāpi soṇattherassa vatthu dassetabbaṃ. Evaṃ sesesupi ekassa balavabhāve sati itaresaṃ attano kiccesu asamatthatā veditabbā.

    ৰিসেসতো পনেত্থ সদ্ধাপঞ্ঞানং সমাধিৰীরিযানঞ্চ সমতং পসংসন্তি। বলৰসদ্ধো হি মন্দপঞ্ঞো মুধপ্পসন্নো হোতি, অৰত্থুম্হি পসীদতি। বলৰপঞ্ঞো মন্দসদ্ধো কেরাটিকপক্খং ভজতি , ভেসজ্জসমুট্ঠিতো ৰিয রোগো অতেকিচ্ছো হোতি। চিত্তুপ্পাদমত্তেনেৰ কুসলং হোতীতি অতিধাৰিত্ৰা দানাদীনি অকরোন্তো নিরযে উপ্পজ্জতি। উভিন্নং সমতায ৰত্থুস্মিংযেৰ পসীদতি। বলৰসমাধিং পন মন্দৰীরিযং সমাধিস্স কোসজ্জপক্খত্তা কোসজ্জং অভিভৰতি। বলৰৰীরিযং মন্দসমাধিং ৰীরিযস্স উদ্ধচ্চপক্খত্তা উদ্ধচ্চং অভিভৰতি। সমাধি পন ৰীরিযেন সংযোজিতো কোসজ্জে পতিতুং ন লভতি, ৰীরিযং সমাধিনা সংযোজিতং উদ্ধচ্চে পতিতুং ন লভতি। তস্মা তং উভযং সমং কত্তব্বং। উভযসমতায হি অপ্পনা হোতি।

    Visesato panettha saddhāpaññānaṃ samādhivīriyānañca samataṃ pasaṃsanti. Balavasaddho hi mandapañño mudhappasanno hoti, avatthumhi pasīdati. Balavapañño mandasaddho kerāṭikapakkhaṃ bhajati , bhesajjasamuṭṭhito viya rogo atekiccho hoti. Cittuppādamatteneva kusalaṃ hotīti atidhāvitvā dānādīni akaronto niraye uppajjati. Ubhinnaṃ samatāya vatthusmiṃyeva pasīdati. Balavasamādhiṃ pana mandavīriyaṃ samādhissa kosajjapakkhattā kosajjaṃ abhibhavati. Balavavīriyaṃ mandasamādhiṃ vīriyassa uddhaccapakkhattā uddhaccaṃ abhibhavati. Samādhi pana vīriyena saṃyojito kosajje patituṃ na labhati, vīriyaṃ samādhinā saṃyojitaṃ uddhacce patituṃ na labhati. Tasmā taṃ ubhayaṃ samaṃ kattabbaṃ. Ubhayasamatāya hi appanā hoti.

    অপিচ সমাধিকম্মিকস্স বলৰতীপি সদ্ধা ৰট্টতি। এৰঞ্হি সদ্দহন্তো ওকপ্পেন্তো অপ্পনং পাপুণিস্সতি। সমাধিপঞ্ঞাসু পন সমাধিকম্মিকস্স একগ্গতা বলৰতী ৰট্টতি। এৰঞ্হি সো অপ্পনং পাপুণাতি। ৰিপস্সনাকম্মিকস্স পঞ্ঞা বলৰতী ৰট্টতি। এৰঞ্হি সো লক্খণপটিৰেধং পাপুণাতি। উভিন্নং পন সমতাযপি অপ্পনা হোতিযেৰ। সতি পন সব্বত্থ বলৰতী ৰট্টতি। সতি হি চিত্তং উদ্ধচ্চপক্খিকানং সদ্ধাৰীরিযপঞ্ঞানং ৰসেন উদ্ধচ্চপাততো কোসজ্জপক্খিকেন চ সমাধিনা কোসজ্জপাততো রক্খতি। তস্মা সা লোণধূপনং ৰিয সব্বব্যঞ্জনেসু, সব্বকম্মিকো অমচ্চো ৰিয চ সব্বরাজকিচ্চেসু, সব্বত্থ ইচ্ছিতব্বা। তেনাহ – ‘‘সতি চ পন সব্বত্থিকা ৰুত্তা (সং॰ নি॰ ৫.২৩৪) ভগৰতা। কিং কারণা? চিত্তঞ্হি সতিপটিসরণং, আরক্খপচ্চুপট্ঠানা চ সতি, ন ৰিনা সতিযা চিত্তস্স পগ্গহনিগ্গহো হোতী’’তি।

    Apica samādhikammikassa balavatīpi saddhā vaṭṭati. Evañhi saddahanto okappento appanaṃ pāpuṇissati. Samādhipaññāsu pana samādhikammikassa ekaggatā balavatī vaṭṭati. Evañhi so appanaṃ pāpuṇāti. Vipassanākammikassa paññā balavatī vaṭṭati. Evañhi so lakkhaṇapaṭivedhaṃ pāpuṇāti. Ubhinnaṃ pana samatāyapi appanā hotiyeva. Sati pana sabbattha balavatī vaṭṭati. Sati hi cittaṃ uddhaccapakkhikānaṃ saddhāvīriyapaññānaṃ vasena uddhaccapātato kosajjapakkhikena ca samādhinā kosajjapātato rakkhati. Tasmā sā loṇadhūpanaṃ viya sabbabyañjanesu, sabbakammiko amacco viya ca sabbarājakiccesu, sabbattha icchitabbā. Tenāha – ‘‘sati ca pana sabbatthikā vuttā (saṃ. ni. 5.234) bhagavatā. Kiṃ kāraṇā? Cittañhi satipaṭisaraṇaṃ, ārakkhapaccupaṭṭhānā ca sati, na vinā satiyā cittassa paggahaniggaho hotī’’ti.

    দুপ্পঞ্ঞপুগ্গলপরিৰজ্জনা নাম খন্ধাদিভেদেসু অনোগাল়্হপঞ্ঞানং দুম্মেধপুগ্গলানং আরকা পরিৰজ্জনং। পঞ্ঞৰন্তপুগ্গলসেৰনা নাম সমপঞ্ঞাসলক্খণপরিগ্গাহিকায উদযব্বযপঞ্ঞায সমন্নাগতপুগ্গলসেৰনা। গম্ভীরঞাণচরিযপচ্চৰেক্খণা নাম গম্ভীরেসু খন্ধাদীসু পৰত্তায গম্ভীরপঞ্ঞায পভেদপচ্চৰেক্খণা। তদধিমুত্ততা নাম ঠাননিসজ্জাদীসু ধম্মৰিচযসম্বোজ্ঝঙ্গসমুট্ঠাপনত্থং নিন্নপোণপব্ভারচিত্ততা। তস্মা আদিকম্মিকো কুলপুত্তো ইমেহি সত্তহি কারণেহি ধম্মৰিচযসম্বোজ্ঝঙ্গং সমুট্ঠাপেত্ৰা তদেৰ ধুরং কত্ৰা অভিনিৰেসং পট্ঠপেত্ৰা অনুক্কমেন অরহত্তং গণ্হাতি। সো যাৰ অরহত্তমগ্গা ধম্মৰিচযসম্বোজ্ঝঙ্গং ভাৰেতি নাম, ফলে পত্তে ভাৰিতো নাম হোতি।

    Duppaññapuggalaparivajjanā nāma khandhādibhedesu anogāḷhapaññānaṃ dummedhapuggalānaṃ ārakā parivajjanaṃ. Paññavantapuggalasevanā nāma samapaññāsalakkhaṇapariggāhikāya udayabbayapaññāya samannāgatapuggalasevanā. Gambhīrañāṇacariyapaccavekkhaṇā nāma gambhīresu khandhādīsu pavattāya gambhīrapaññāya pabhedapaccavekkhaṇā. Tadadhimuttatā nāma ṭhānanisajjādīsu dhammavicayasambojjhaṅgasamuṭṭhāpanatthaṃ ninnapoṇapabbhāracittatā. Tasmā ādikammiko kulaputto imehi sattahi kāraṇehi dhammavicayasambojjhaṅgaṃ samuṭṭhāpetvā tadeva dhuraṃ katvā abhinivesaṃ paṭṭhapetvā anukkamena arahattaṃ gaṇhāti. So yāva arahattamaggā dhammavicayasambojjhaṅgaṃ bhāveti nāma, phale patte bhāvito nāma hoti.

    একাদস ধম্মা ৰীরিযসম্বোজ্ঝঙ্গস্স উপ্পাদায সংৰত্তন্তি – অপাযভযপচ্চৰেক্খণতা, আনিসংসদস্সাৰিতা , গমনৰীথিপচ্চৰেক্খণতা, পিণ্ডপাতাপচাযনতা, দাযজ্জমহত্তপচ্চৰেক্খণতা, সত্থুমহত্তপচ্চৰেক্খণতা, জাতিমহত্তপচ্চৰেক্খণতা , সব্রহ্মচারিমহত্তপচ্চৰেক্খণতা, কুসীতপুগ্গলপরিৰজ্জনতা, আরদ্ধৰীরিযপুগ্গলসেৰনতা, তদধিমুত্ততাতি।

    Ekādasa dhammā vīriyasambojjhaṅgassa uppādāya saṃvattanti – apāyabhayapaccavekkhaṇatā, ānisaṃsadassāvitā , gamanavīthipaccavekkhaṇatā, piṇḍapātāpacāyanatā, dāyajjamahattapaccavekkhaṇatā, satthumahattapaccavekkhaṇatā, jātimahattapaccavekkhaṇatā , sabrahmacārimahattapaccavekkhaṇatā, kusītapuggalaparivajjanatā, āraddhavīriyapuggalasevanatā, tadadhimuttatāti.

    তত্থ ‘‘নিরযেসু পঞ্চৰিধবন্ধনকম্মকরণতো পট্ঠায মহাদুক্খং অনুভৰনকালেপি, তিরচ্ছানযোনিযং জালক্খিপকুমিনাদীহি গহিতকালেপি, পাজনকণ্টকাদিপ্পহারতুন্নস্স পন সকটৰহনাদিকালেপি, পেত্তিৰিসযে অনেকানিপি ৰস্সসহস্সানি একং বুদ্ধন্তরম্পি খুপ্পিপাসাহি আতুরীভূতকালেপি, কালকঞ্জিকঅসুরেসু সট্ঠিহত্থঅসীতিহত্থপ্পমাণেন অট্ঠিচম্মমত্তেনেৰ অত্তভাৰেন ৰাতাতপাদিদুক্খানুভৰনকালেপি ন সক্কা ৰীরিযসম্বোজ্ঝঙ্গং উপ্পাদেতুং। অযমেৰ তে ভিক্খু কালো’’তি এৰং অপাযভযং পচ্চৰেক্খন্তস্সাপি ৰীরিযসম্বোজ্ঝঙ্গো উপ্পজ্জতি।

    Tattha ‘‘nirayesu pañcavidhabandhanakammakaraṇato paṭṭhāya mahādukkhaṃ anubhavanakālepi, tiracchānayoniyaṃ jālakkhipakuminādīhi gahitakālepi, pājanakaṇṭakādippahāratunnassa pana sakaṭavahanādikālepi, pettivisaye anekānipi vassasahassāni ekaṃ buddhantarampi khuppipāsāhi āturībhūtakālepi, kālakañjikaasuresu saṭṭhihatthaasītihatthappamāṇena aṭṭhicammamatteneva attabhāvena vātātapādidukkhānubhavanakālepi na sakkā vīriyasambojjhaṅgaṃ uppādetuṃ. Ayameva te bhikkhu kālo’’ti evaṃ apāyabhayaṃ paccavekkhantassāpi vīriyasambojjhaṅgo uppajjati.

    ‘‘ন সক্কা কুসীতেন নৰ লোকুত্তরধম্মা লদ্ধুং, আরদ্ধৰীরিযেনেৰ সক্কা, অযমানিসংসো ৰীরিযস্সা’’তি এৰং আনিসংসদস্সাৰিনোপি উপ্পজ্জতি। ‘‘সব্ববুদ্ধপচ্চেকবুদ্ধমহাসাৰকেহি গতমগ্গোৰ গন্তব্বো, সো চ ন সক্কা কুসীতেন গন্তু’’ন্তি এৰং গমনৰীথিং পচ্চৰেক্খন্তস্সাপি উপ্পজ্জতি।

    ‘‘Na sakkā kusītena nava lokuttaradhammā laddhuṃ, āraddhavīriyeneva sakkā, ayamānisaṃso vīriyassā’’ti evaṃ ānisaṃsadassāvinopi uppajjati. ‘‘Sabbabuddhapaccekabuddhamahāsāvakehi gatamaggova gantabbo, so ca na sakkā kusītena gantu’’nti evaṃ gamanavīthiṃ paccavekkhantassāpi uppajjati.

    ‘‘যে তং পিণ্ডপাতাদীহি উপট্ঠহন্তি, ইমে তে মনুস্সা নেৰ ঞাতকা, ন দাসকম্মকরা, নাপি তং নিস্সায জীৰিস্সামাতি তে পণীতানি পিণ্ডপাতাদীনি দেন্তি। অথ খো অত্তনো কারানং মহপ্ফলতং পচ্চাসীসমানা দেন্তি। সত্থারাপি ‘অযং ইমে পচ্চযে পরিভুঞ্জিত্ৰা কাযদল়্হীবহুলো সুখং ৰিহরিস্সতী’তি ন এৰং সম্পস্সতা তুয্হং পচ্চযা অনুঞ্ঞাতা, অথ খো ‘অযং ইমে পরিভুঞ্জমানো সমণধম্মং কত্ৰা ৰট্টদুক্খতো মুচ্চিস্সতী’তি তে পচ্চযা অনুঞ্ঞাতা। সো দানি ত্ৰং কুসীতো ৰিহরন্তো ন তং পিণ্ডপাতং অপচাযিস্সসি। আরদ্ধৰীরিযস্সেৰ হি পিণ্ডাপচাযনং নাম হোতী’’তি এৰং পিণ্ডপাতাপচাযনং পচ্চৰেক্খন্তস্সাপি উপ্পজ্জতি মহামিত্তত্থেরস্স ৰিয পিণ্ডপাতিযতিস্সত্থেরস্স ৰিয চ।

    ‘‘Ye taṃ piṇḍapātādīhi upaṭṭhahanti, ime te manussā neva ñātakā, na dāsakammakarā, nāpi taṃ nissāya jīvissāmāti te paṇītāni piṇḍapātādīni denti. Atha kho attano kārānaṃ mahapphalataṃ paccāsīsamānā denti. Satthārāpi ‘ayaṃ ime paccaye paribhuñjitvā kāyadaḷhībahulo sukhaṃ viharissatī’ti na evaṃ sampassatā tuyhaṃ paccayā anuññātā, atha kho ‘ayaṃ ime paribhuñjamāno samaṇadhammaṃ katvā vaṭṭadukkhato muccissatī’ti te paccayā anuññātā. So dāni tvaṃ kusīto viharanto na taṃ piṇḍapātaṃ apacāyissasi. Āraddhavīriyasseva hi piṇḍāpacāyanaṃ nāma hotī’’ti evaṃ piṇḍapātāpacāyanaṃ paccavekkhantassāpi uppajjati mahāmittattherassa viya piṇḍapātiyatissattherassa viya ca.

    মহামিত্তত্থেরো কির কস্সকলেণে নাম পটিৰসতি। তস্স চ গোচরগামে একা মহাউপাসিকা থেরং পুত্তং কত্ৰা পটিজগ্গতি। সা একদিৰসং অরঞ্ঞং গচ্ছন্তী ধীতরং আহ – ‘‘অম্ম , অসুকস্মিং ঠানে পুরাণতণ্ডুলা, অসুকস্মিং খীরং, অসুকস্মিং সপ্পি, অসুকস্মিং ফাণিতং, তৰ ভাতিকস্স অয্যমিত্তস্স আগতকালে ভত্তং পচিত্ৰা খীরসপ্পিফাণিতেহি সদ্ধিং দেহি, দত্ৰা ত্ৰঞ্চ ভুঞ্জেয্যাসি। অহং পন হিয্যো পক্কং পারিৰাসিকভত্তং কঞ্জিযেন ভুত্তম্হী’’তি। দিৰা কিং ভুঞ্জিস্সসি, অম্মাতি? সাকপণ্ণং পক্খিপিত্ৰা কণতণ্ডুলেহি অম্বিলযাগুং পচিত্ৰা ঠপেহি, অম্মাতি।

    Mahāmittatthero kira kassakaleṇe nāma paṭivasati. Tassa ca gocaragāme ekā mahāupāsikā theraṃ puttaṃ katvā paṭijaggati. Sā ekadivasaṃ araññaṃ gacchantī dhītaraṃ āha – ‘‘amma , asukasmiṃ ṭhāne purāṇataṇḍulā, asukasmiṃ khīraṃ, asukasmiṃ sappi, asukasmiṃ phāṇitaṃ, tava bhātikassa ayyamittassa āgatakāle bhattaṃ pacitvā khīrasappiphāṇitehi saddhiṃ dehi, datvā tvañca bhuñjeyyāsi. Ahaṃ pana hiyyo pakkaṃ pārivāsikabhattaṃ kañjiyena bhuttamhī’’ti. Divā kiṃ bhuñjissasi, ammāti? Sākapaṇṇaṃ pakkhipitvā kaṇataṇḍulehi ambilayāguṃ pacitvā ṭhapehi, ammāti.

    থেরো চীৰরং পারুপিত্ৰা পত্তং নীহরন্তোৰ তং সদ্দং সুত্ৰা অত্তানং ওৰদি – ‘‘মহাউপাসিকা কির কঞ্জিযেন পারিৰাসিকভত্তং ভুঞ্জি, দিৰাপি কণপণ্ণম্বিলযাগুং ভুঞ্জিস্সতি, তুয্হং অত্থায পন পুরাণতণ্ডুলাদীনি আচিক্খতি। তং নিস্সায খো পনেসা নেৰ খেত্তং ন ৰত্থুং ন ভত্তং ন ৰত্থং পচ্চাসীসতি, তিস্সো পন সম্পত্তিযো পত্থযমানা দেতি। ত্ৰং এতিস্সা তা সম্পত্তিযো দাতুং সক্খিস্সসি, ন সক্খিস্সসীতি, অযং খো পন পিণ্ডপাতো তযা সরাগেন সদোসেন সমোহেন ন সক্কা গণ্হিতু’’ন্তি পত্তং থৰিকায পক্খিপিত্ৰা গণ্ঠিকং মুঞ্চিত্ৰা নিৰত্তিত্ৰা কস্সকলেণমেৰ গন্ত্ৰা পত্তং হেট্ঠামঞ্চে, চীৰরঞ্চ চীৰরৰংসে ঠপেত্ৰা, ‘‘অরহত্তং অপাপুণিত্ৰা ন নিক্খমিস্সামী’’তি ৰীরিযং অধিট্ঠহিত্ৰা নিসীদি। দীঘরত্তং অপ্পমত্তো হুত্ৰা নিৰুত্থভিক্খু ৰিপস্সনং ৰড্ঢেত্ৰা পুরেভত্তমেৰ অরহত্তং পত্ৰা ৰিকসমানমিৰ পদুমং মহাখীণাসৰো সিতং করোন্তোৰ নিক্খমি। লেণদ্ৰারে রুক্খম্হি অধিৰত্থা দেৰতা –

    Thero cīvaraṃ pārupitvā pattaṃ nīharantova taṃ saddaṃ sutvā attānaṃ ovadi – ‘‘mahāupāsikā kira kañjiyena pārivāsikabhattaṃ bhuñji, divāpi kaṇapaṇṇambilayāguṃ bhuñjissati, tuyhaṃ atthāya pana purāṇataṇḍulādīni ācikkhati. Taṃ nissāya kho panesā neva khettaṃ na vatthuṃ na bhattaṃ na vatthaṃ paccāsīsati, tisso pana sampattiyo patthayamānā deti. Tvaṃ etissā tā sampattiyo dātuṃ sakkhissasi, na sakkhissasīti, ayaṃ kho pana piṇḍapāto tayā sarāgena sadosena samohena na sakkā gaṇhitu’’nti pattaṃ thavikāya pakkhipitvā gaṇṭhikaṃ muñcitvā nivattitvā kassakaleṇameva gantvā pattaṃ heṭṭhāmañce, cīvarañca cīvaravaṃse ṭhapetvā, ‘‘arahattaṃ apāpuṇitvā na nikkhamissāmī’’ti vīriyaṃ adhiṭṭhahitvā nisīdi. Dīgharattaṃ appamatto hutvā nivutthabhikkhu vipassanaṃ vaḍḍhetvā purebhattameva arahattaṃ patvā vikasamānamiva padumaṃ mahākhīṇāsavo sitaṃ karontova nikkhami. Leṇadvāre rukkhamhi adhivatthā devatā –

    ‘‘নমো তে পুরিসাজঞ্ঞ, নমো তে পুরিসুত্তম।

    ‘‘Namo te purisājañña, namo te purisuttama;

    যস্স তে আসৰা খীণা, দক্খিণেয্যোসি মারিসা’’তি॥ –

    Yassa te āsavā khīṇā, dakkhiṇeyyosi mārisā’’ti. –

    উদানং উদানেত্ৰা, ‘‘ভন্তে, পিণ্ডায পৰিট্ঠানং তুম্হাদিসানং অরহন্তানং ভিক্খং দত্ৰা মহল্লকিত্থিযো দুক্খা মুচ্চিস্সন্তী’’তি আহ। থেরো উট্ঠহিত্ৰা দ্ৰারং ৰিৰরিত্ৰা কালং ওলোকেন্তো ‘‘পাতোযেৰা’’তি ঞত্ৰা পত্তচীৰরং আদায গামং পাৰিসি।

    Udānaṃ udānetvā, ‘‘bhante, piṇḍāya paviṭṭhānaṃ tumhādisānaṃ arahantānaṃ bhikkhaṃ datvā mahallakitthiyo dukkhā muccissantī’’ti āha. Thero uṭṭhahitvā dvāraṃ vivaritvā kālaṃ olokento ‘‘pātoyevā’’ti ñatvā pattacīvaraṃ ādāya gāmaṃ pāvisi.

    দারিকাপি ভত্তং সম্পাদেত্ৰা ‘‘ইদানি মে ভাতা আগমিস্সতি, ইদানি মে ভাতা আগমিস্সতী’’তি দ্ৰারং ওলোকযমানা নিসীদি। সা থেরে ঘরদ্ৰারং সম্পত্তে পত্তং গহেত্ৰা সপ্পিফাণিতযোজিতস্স খীরপিণ্ডপাতস্স পূরেত্ৰা হত্থে ঠপেসি। থেরো ‘‘সুখং হোতূ’’তি অনুমোদনং কত্ৰা পক্কামি। সাপি তং ওলোকযমানাৰ অট্ঠাসি। থেরস্স হি তদা অতিৰিয পরিসুদ্ধো ছৰিৰণ্ণো অহোসি, ৰিপ্পসন্নানি ইন্দ্রিযানি, মুখং বন্ধনা পৰুত্ততালপক্কং ৰিয অতিৰিয ৰিরোচিত্থ।

    Dārikāpi bhattaṃ sampādetvā ‘‘idāni me bhātā āgamissati, idāni me bhātā āgamissatī’’ti dvāraṃ olokayamānā nisīdi. Sā there gharadvāraṃ sampatte pattaṃ gahetvā sappiphāṇitayojitassa khīrapiṇḍapātassa pūretvā hatthe ṭhapesi. Thero ‘‘sukhaṃ hotū’’ti anumodanaṃ katvā pakkāmi. Sāpi taṃ olokayamānāva aṭṭhāsi. Therassa hi tadā ativiya parisuddho chavivaṇṇo ahosi, vippasannāni indriyāni, mukhaṃ bandhanā pavuttatālapakkaṃ viya ativiya virocittha.

    মহাউপাসিকা অরঞ্ঞতো আগন্ত্ৰা ‘‘কিং, অম্ম, ভাতিকো তে আগতো’’তি পুচ্ছি। সা সব্বং তং পৰত্তিং আরোচেসি। উপাসিকা ‘‘অজ্জ মে পুত্তস্স পব্বজিতকিচ্চং মত্থকং পত্ত’’ন্তি ঞত্ৰা ‘‘অভিরমতি তে, অম্ম, ভাতা বুদ্ধসাসনে, ন উক্কণ্ঠতী’’তি আহ।

    Mahāupāsikā araññato āgantvā ‘‘kiṃ, amma, bhātiko te āgato’’ti pucchi. Sā sabbaṃ taṃ pavattiṃ ārocesi. Upāsikā ‘‘ajja me puttassa pabbajitakiccaṃ matthakaṃ patta’’nti ñatvā ‘‘abhiramati te, amma, bhātā buddhasāsane, na ukkaṇṭhatī’’ti āha.

    পিণ্ডপাতিকতিস্সত্থেরৰত্থু পন এৰং ৰেদিতব্বং – মহাগামে কির একো দলিদ্দপুরিসো দারুৰিক্কযেন জীৰিকং কপ্পেতি। সো তেনেৰ কারণেন নামং লভিত্ৰা দারুভণ্ডকমহাতিস্সো নাম জাতো। সো একদিৰসং অত্তনো ভরিযং আহ – ‘‘কিং অম্হাকং জীৰিতং নাম, সত্থারা দল়িদ্দদানস্স মহপ্ফলভাৰো কথিতো, মযঞ্চ নিবদ্ধং দাতুং ন সক্কোম, পক্খিকভত্তমত্তং দত্ৰা পুন উপ্পন্নং সলাকভত্তম্পি দস্সামা’’তি। সা ‘‘সাধু সামী’’তি সম্পটিচ্ছিত্ৰা পুনদিৰসে যথালাভেন পক্খিকভত্তং অদাসি। ভিক্খুসঙ্ঘস্স চ পচ্চযেহি নিপ্পরিস্সযকালো হোতি, দহরসামণেরা পণীতভোজনানি ভুঞ্জিত্ৰা ‘‘অযং লূখাহারো’’তি তেসং পক্খিকভত্তং গহিতমত্তকমেৰ কত্ৰা তেসং পস্সন্তানংযেৰ ছড্ডেত্ৰা গচ্ছন্তি।

    Piṇḍapātikatissattheravatthu pana evaṃ veditabbaṃ – mahāgāme kira eko daliddapuriso dāruvikkayena jīvikaṃ kappeti. So teneva kāraṇena nāmaṃ labhitvā dārubhaṇḍakamahātisso nāma jāto. So ekadivasaṃ attano bhariyaṃ āha – ‘‘kiṃ amhākaṃ jīvitaṃ nāma, satthārā daḷiddadānassa mahapphalabhāvo kathito, mayañca nibaddhaṃ dātuṃ na sakkoma, pakkhikabhattamattaṃ datvā puna uppannaṃ salākabhattampi dassāmā’’ti. Sā ‘‘sādhu sāmī’’ti sampaṭicchitvā punadivase yathālābhena pakkhikabhattaṃ adāsi. Bhikkhusaṅghassa ca paccayehi nipparissayakālo hoti, daharasāmaṇerā paṇītabhojanāni bhuñjitvā ‘‘ayaṃ lūkhāhāro’’ti tesaṃ pakkhikabhattaṃ gahitamattakameva katvā tesaṃ passantānaṃyeva chaḍḍetvā gacchanti.

    সা ইত্থী তং দিস্ৰা সামিকস্স কথেসি, ‘‘মযা দিন্নং ছড্ডেন্তী’’তি ন পন ৰিপ্পটিসারিনী অহোসি। তস্সা সামিকো আহ – ‘‘মযং দুগ্গতভাৰেন অয্যানং সুখেন পরিভুঞ্জাপেতুং নাসক্খিম্হ। কিং নু খো কত্ৰা অয্যানং মনং গহেতুং সক্খিস্সামা’’তি? অথস্স ভরিযা আহ – ‘‘কিং ৰদেসি, সামি, সপুত্তকা দুগ্গতা নাম নত্থীতি অযং তে ধীতা, ইমং একস্মিং কুলে ঠপেত্ৰা দ্ৰাদস কহাপণে গণ্হিত্ৰা একং খীরধেনুং আহর, অয্যানং খীরসলাকভত্তং দস্সাম, এৰং তেসং চিত্তং গণ্হিতুং সক্খিস্সামা’’তি। সো সাধূতি সম্পটিচ্ছিত্ৰা তথা অকাসি। তেসং পুঞ্ঞেন সা ধেনু সাযং তীণি মাণিকানি, পাতো তীণি মাণিকানি খীরং দেতি। সাযং লদ্ধং দধিং কত্ৰা পুনদিৰসে ততো গহিতনৰনীতেন সপ্পিং কত্ৰা সসপ্পিপরিসেকং খীরসলাকভত্তং দেন্তি। ততো পট্ঠায তস্স গেহে সলাকভত্তং পুঞ্ঞৰন্তাৰ লভন্তি।

    Sā itthī taṃ disvā sāmikassa kathesi, ‘‘mayā dinnaṃ chaḍḍentī’’ti na pana vippaṭisārinī ahosi. Tassā sāmiko āha – ‘‘mayaṃ duggatabhāvena ayyānaṃ sukhena paribhuñjāpetuṃ nāsakkhimha. Kiṃ nu kho katvā ayyānaṃ manaṃ gahetuṃ sakkhissāmā’’ti? Athassa bhariyā āha – ‘‘kiṃ vadesi, sāmi, saputtakā duggatā nāma natthīti ayaṃ te dhītā, imaṃ ekasmiṃ kule ṭhapetvā dvādasa kahāpaṇe gaṇhitvā ekaṃ khīradhenuṃ āhara, ayyānaṃ khīrasalākabhattaṃ dassāma, evaṃ tesaṃ cittaṃ gaṇhituṃ sakkhissāmā’’ti. So sādhūti sampaṭicchitvā tathā akāsi. Tesaṃ puññena sā dhenu sāyaṃ tīṇi māṇikāni, pāto tīṇi māṇikāni khīraṃ deti. Sāyaṃ laddhaṃ dadhiṃ katvā punadivase tato gahitanavanītena sappiṃ katvā sasappiparisekaṃ khīrasalākabhattaṃ denti. Tato paṭṭhāya tassa gehe salākabhattaṃ puññavantāva labhanti.

    সো একদিৰসং ভরিযং আহ – ‘‘মযং ধীতু অত্থিতায লজ্জিতব্বতো চ মুত্তা, গেহে চ নো ভত্তং অয্যানং পরিভোগারহং জাতং। ত্ৰং যাৰ অহং আগচ্ছামি, তাৰ ইমস্মিং কল্যাণৰত্তে মা পমজ্জি। অহং কিঞ্চিদেৰ কত্ৰা ধীতরং মোচেস্সামী’’তি। সো একং পদেসং গন্ত্ৰা উচ্ছুযন্তকম্মং কত্ৰা ছহি মাসেহি দ্ৰাদস কহাপণে লভিত্ৰা ‘‘অলং এত্তকং মম ধীতু মোচনত্থাযা’’তি তে কহাপণে দুস্সন্তে বন্ধিত্ৰা ‘‘গেহং গমিস্সামী’’তি মগ্গং পটিপজ্জি।

    So ekadivasaṃ bhariyaṃ āha – ‘‘mayaṃ dhītu atthitāya lajjitabbato ca muttā, gehe ca no bhattaṃ ayyānaṃ paribhogārahaṃ jātaṃ. Tvaṃ yāva ahaṃ āgacchāmi, tāva imasmiṃ kalyāṇavatte mā pamajji. Ahaṃ kiñcideva katvā dhītaraṃ mocessāmī’’ti. So ekaṃ padesaṃ gantvā ucchuyantakammaṃ katvā chahi māsehi dvādasa kahāpaṇe labhitvā ‘‘alaṃ ettakaṃ mama dhītu mocanatthāyā’’ti te kahāpaṇe dussante bandhitvā ‘‘gehaṃ gamissāmī’’ti maggaṃ paṭipajji.

    তস্মিং সমযে অম্বরিযমহাৰিহারৰাসী পিণ্ডপাতিযতিস্সত্থেরো ‘‘তিস্সমহাৰিহারং গন্ত্ৰা চেতিযং ৰন্দিস্সামী’’তি অত্তনো ৰসনট্ঠানতো মহাগামং গচ্ছন্তো তমেৰ মগ্গং পটিপজ্জি। সো উপাসকো থেরং দূরতোৰ দিস্ৰা ‘‘এককোৰ অগন্ত্ৰা ইমিনা অয্যেন সদ্ধিং একং ধম্মকথং সুণন্তো গমিস্সামি। সীলৰন্তো হি সব্বকালং দুল্লভা’’তি ৰেগেন থেরং সম্পাপুণিত্ৰা অভিৰাদেত্ৰা সদ্ধিং গচ্ছন্তো ৰেলায উপকট্ঠায চিন্তেসি – ‘‘ময্হং হত্থে পুটকভত্তং নত্থি, অয্যস্স চ ভিক্খাকালো সম্পত্তো, অযঞ্চ মে পরিব্বযো হত্থে অত্থি, একং গামদ্ৰারং পত্তকালে অয্যস্স পিণ্ডপাতং দস্সামী’’তি।

    Tasmiṃ samaye ambariyamahāvihāravāsī piṇḍapātiyatissatthero ‘‘tissamahāvihāraṃ gantvā cetiyaṃ vandissāmī’’ti attano vasanaṭṭhānato mahāgāmaṃ gacchanto tameva maggaṃ paṭipajji. So upāsako theraṃ dūratova disvā ‘‘ekakova agantvā iminā ayyena saddhiṃ ekaṃ dhammakathaṃ suṇanto gamissāmi. Sīlavanto hi sabbakālaṃ dullabhā’’ti vegena theraṃ sampāpuṇitvā abhivādetvā saddhiṃ gacchanto velāya upakaṭṭhāya cintesi – ‘‘mayhaṃ hatthe puṭakabhattaṃ natthi, ayyassa ca bhikkhākālo sampatto, ayañca me paribbayo hatthe atthi, ekaṃ gāmadvāraṃ pattakāle ayyassa piṇḍapātaṃ dassāmī’’ti.

    তস্সেৰং চিত্তে উপ্পন্নমত্তেযেৰ একো পুটকভত্তং গহেত্ৰা তং ঠানং সম্পত্তো। উপাসকো তং দিস্ৰা, ‘‘ভন্তে, থোকং আগমেথা’’তি ৰত্ৰা তং উপসঙ্কমিত্ৰা আহ – ‘‘কহাপণং তে, ভো পুরিস, দম্মি, তং মে পুটকভত্তং দেহী’’তি। সো চিন্তেসি – ‘‘ইমং ভত্তং ইমস্মিং কালে মাসকম্পি ন অগ্ঘতি, অযঞ্চ ময্হং একৰারেনেৰ কহাপণং দেতি, ভৰিস্সতেত্থ কারণ’’ন্তি চিন্তেত্ৰা ‘‘নাহং কহাপণেন দেমী’’তি আহ। এৰং সন্তে দ্ৰে গণ্হ, তীণি গণ্হাতি ইমিনা নিযামেন সব্বেপি তে কহাপণে দাতুকামো জাতো। ইতরো ‘‘অঞ্ঞেপিস্স অত্থী’’তি সঞ্ঞায ‘‘ন দেমি’’চ্চেৰ আহ। অথ নং সো আহ – ‘‘সচে মে, ভো, অঞ্ঞেপি অস্সু, তেপি দদেয্যং। ন খো পনাহং অত্তনো অত্থায গণ্হামি, এতস্মিং মে রুক্খমূলে একো অয্যো নিসীদাপিতো, তুয্হম্পি কুসলং ভৰিস্সতি, দেহি মে ভত্ত’’ন্তি। তেন হি, ভো, গণ্হ, আহর তে কহাপণেতি কহাপণে গহেত্ৰা পুটকভত্তং অদাসি। উপাসকো ভত্তং গহেত্ৰা হত্থে ধোৰিত্ৰা থেরং উপসঙ্কমিত্ৰা ‘‘পত্তং নীহরথ, ভন্তে’’তি আহ। থেরো পত্তং নীহরিত্ৰা উপড্ঢভত্তে দিন্নে পত্তং পিদহি। উপাসকো আহ – ‘‘অযং, ভন্তে, একস্সেৰ পটিৰিসো, ন সক্কা মযা ইতো ভুঞ্জিতুং। তুম্হাকংযেৰ মে অত্থায ইমং পরিযেসিত্ৰা লদ্ধং, গণ্হথ নং মং অনুকম্পং উপাদাযা’’তি। থেরো ‘‘অত্থি এত্থ কারণ’’ন্তি গহেত্ৰা সব্বং পরিভুঞ্জি। উপাসকো ধমকরণেন পানীযং পরিস্সাৰেত্ৰা অদাসি। ততো নিট্ঠিতভত্তকিচ্চে থেরে উভোপি মগ্গং পটিপজ্জিংসু।

    Tassevaṃ citte uppannamatteyeva eko puṭakabhattaṃ gahetvā taṃ ṭhānaṃ sampatto. Upāsako taṃ disvā, ‘‘bhante, thokaṃ āgamethā’’ti vatvā taṃ upasaṅkamitvā āha – ‘‘kahāpaṇaṃ te, bho purisa, dammi, taṃ me puṭakabhattaṃ dehī’’ti. So cintesi – ‘‘imaṃ bhattaṃ imasmiṃ kāle māsakampi na agghati, ayañca mayhaṃ ekavāreneva kahāpaṇaṃ deti, bhavissatettha kāraṇa’’nti cintetvā ‘‘nāhaṃ kahāpaṇena demī’’ti āha. Evaṃ sante dve gaṇha, tīṇi gaṇhāti iminā niyāmena sabbepi te kahāpaṇe dātukāmo jāto. Itaro ‘‘aññepissa atthī’’ti saññāya ‘‘na demi’’cceva āha. Atha naṃ so āha – ‘‘sace me, bho, aññepi assu, tepi dadeyyaṃ. Na kho panāhaṃ attano atthāya gaṇhāmi, etasmiṃ me rukkhamūle eko ayyo nisīdāpito, tuyhampi kusalaṃ bhavissati, dehi me bhatta’’nti. Tena hi, bho, gaṇha, āhara te kahāpaṇeti kahāpaṇe gahetvā puṭakabhattaṃ adāsi. Upāsako bhattaṃ gahetvā hatthe dhovitvā theraṃ upasaṅkamitvā ‘‘pattaṃ nīharatha, bhante’’ti āha. Thero pattaṃ nīharitvā upaḍḍhabhatte dinne pattaṃ pidahi. Upāsako āha – ‘‘ayaṃ, bhante, ekasseva paṭiviso, na sakkā mayā ito bhuñjituṃ. Tumhākaṃyeva me atthāya imaṃ pariyesitvā laddhaṃ, gaṇhatha naṃ maṃ anukampaṃ upādāyā’’ti. Thero ‘‘atthi ettha kāraṇa’’nti gahetvā sabbaṃ paribhuñji. Upāsako dhamakaraṇena pānīyaṃ parissāvetvā adāsi. Tato niṭṭhitabhattakicce there ubhopi maggaṃ paṭipajjiṃsu.

    থেরো উপাসকং পুচ্ছি – ‘‘কেন কারণেন ত্ৰং ন ভুঞ্জসী’’তি। সো অত্তনো গমনাগমনৰিধানং সব্বং কথেসি। থেরো তং সুত্ৰা সংৰেগপ্পত্তো চিন্তেসি – ‘‘দুক্করং উপাসকেন কতং, মযা পন এৰরূপং পিণ্ডপাতং পরিভুঞ্জিত্ৰা এতস্স কতঞ্ঞুনা ভৰিতব্বং। সপ্পাযসেনাসনং লভিত্ৰা তত্থেৰ ছৰিমংসলোহিতেসু সুক্খন্তেসুপি নিসিন্নপল্লঙ্কেনেৰ অরহত্তং অপ্পত্ৰা ন উট্ঠহিস্সামী’’তি। সো তিস্সমহাৰিহারং গন্ত্ৰা আগন্তুকৰত্তং কত্ৰা অত্তনো পত্তসেনাসনং পৰিসিত্ৰা পচ্চত্থরণং অত্থরিত্ৰা তত্থ নিসিন্নো অত্তনো মূলকম্মট্ঠানমেৰ গণ্হি। সো তায রত্তিযা ওভাসমত্তম্পি নিব্বত্তেতুং নাসক্খি। পুনদিৰসতো পট্ঠায ভিক্খাচারপলিবোধং ছিন্দিত্ৰা তদেৰ কম্মট্ঠানং অনুলোমপটিলোমং ৰিপস্সি। এতেনুপাযেন ৰিপস্সন্তো সত্তমে অরুণে সহ পটিসম্ভিদাহি অরহত্তং পত্ৰা চিন্তেসি – ‘‘অতিৰিয মে কিলন্তং সরীরং, কিং নু খো মে জীৰিতং চিরং পৰত্তিস্সতি, ন পৰত্তিস্সতী’’তি। অথস্স অপ্পৰত্তনভাৰং দিস্ৰা সেনাসনং পটিসামেত্ৰা পত্তচীৰরমাদায ৰিহারমজ্ঝং গন্ত্ৰা ভেরিং পহরাপেত্ৰা ভিক্খুসঙ্ঘং সন্নিপাতেসি।

    Thero upāsakaṃ pucchi – ‘‘kena kāraṇena tvaṃ na bhuñjasī’’ti. So attano gamanāgamanavidhānaṃ sabbaṃ kathesi. Thero taṃ sutvā saṃvegappatto cintesi – ‘‘dukkaraṃ upāsakena kataṃ, mayā pana evarūpaṃ piṇḍapātaṃ paribhuñjitvā etassa kataññunā bhavitabbaṃ. Sappāyasenāsanaṃ labhitvā tattheva chavimaṃsalohitesu sukkhantesupi nisinnapallaṅkeneva arahattaṃ appatvā na uṭṭhahissāmī’’ti. So tissamahāvihāraṃ gantvā āgantukavattaṃ katvā attano pattasenāsanaṃ pavisitvā paccattharaṇaṃ attharitvā tattha nisinno attano mūlakammaṭṭhānameva gaṇhi. So tāya rattiyā obhāsamattampi nibbattetuṃ nāsakkhi. Punadivasato paṭṭhāya bhikkhācārapalibodhaṃ chinditvā tadeva kammaṭṭhānaṃ anulomapaṭilomaṃ vipassi. Etenupāyena vipassanto sattame aruṇe saha paṭisambhidāhi arahattaṃ patvā cintesi – ‘‘ativiya me kilantaṃ sarīraṃ, kiṃ nu kho me jīvitaṃ ciraṃ pavattissati, na pavattissatī’’ti. Athassa appavattanabhāvaṃ disvā senāsanaṃ paṭisāmetvā pattacīvaramādāya vihāramajjhaṃ gantvā bheriṃ paharāpetvā bhikkhusaṅghaṃ sannipātesi.

    সঙ্ঘত্থেরো ‘‘কেন ভিক্খুনাসঙ্ঘো সন্নিপাতিতো’’তি পুচ্ছি। মযা, ভন্তেতি। কিমত্থং সপ্পুরিসাতি। ভন্তে, অঞ্ঞং কম্মং নত্থি, যেসং পন মগ্গে ৰা ফলে ৰা কঙ্খা অত্থি, তে মং পুচ্ছন্তূতি। সপ্পুরিস তাদিসা নাম ভিক্খূ অসন্তং গুণং ন কথেন্তি, অম্হাকং এত্থ কঙ্খা নত্থি। কিং পন তে সংৰেগকারণং অহোসি, কিং পচ্চযং কত্ৰা অরহত্তং নিব্বত্তন্তি। ভন্তে, ইমস্মিং মহাগামে ৰল্লিযৰীথিযং দারুভণ্ডকমহাতিস্সো নাম উপাসকো অত্তনো ধীতরং বহি ঠপেত্ৰা দ্ৰাদস কহাপণে গণ্হিত্ৰা তেহি একং খীরধেনুং গহেত্ৰা সঙ্ঘস্স খীরভত্তসলাকং পট্ঠপেসি, সো ‘‘ধীতরং মোচেস্সামী’’তি ছ মাসে যন্তসালায ভতিং কত্ৰা দ্ৰাদস কহাপণে লভিত্ৰা ‘‘ধীতরং মোচেস্সামী’’তি অত্তনো গেহং গচ্ছন্তো অন্তরামগ্গে মং দিস্ৰা ভিক্খাচারৰেলায সব্বেপি তে কহাপণে দত্ৰা পুটকভত্তং গণ্হিত্ৰা সব্বং ময্হং অদাসি। অহং তং পিণ্ডপাতং পরিভুঞ্জিত্ৰা ইধাগন্ত্ৰা সপ্পাযসেনাসনং লভিত্ৰা ‘‘পিণ্ডাপচাযনকম্মং করিস্সামী’’তি ৰিসেসং নিব্বত্তেসিং, ভন্তেতি। তং ঠানং সম্পত্তা চতস্সোপি পরিসা থেরস্স সাধুকারং অদংসু। সকভাৰেন সণ্ঠাতুং সমত্থো নাম নাহোসি। থেরো সঙ্ঘমজ্ঝে নিসীদিত্ৰা কথেন্তো কথেন্তোৰ ‘‘ময্হং কূটাগারং দারুভণ্ডকমহাতিস্সস্স হত্থেন ফুট্ঠকালেযেৰ চলতূ’’তি অধিট্ঠায অনুপাদিসেসায নিব্বানধাতুযা পরিনিব্বাযি।

    Saṅghatthero ‘‘kena bhikkhunāsaṅgho sannipātito’’ti pucchi. Mayā, bhanteti. Kimatthaṃ sappurisāti. Bhante, aññaṃ kammaṃ natthi, yesaṃ pana magge vā phale vā kaṅkhā atthi, te maṃ pucchantūti. Sappurisa tādisā nāma bhikkhū asantaṃ guṇaṃ na kathenti, amhākaṃ ettha kaṅkhā natthi. Kiṃ pana te saṃvegakāraṇaṃ ahosi, kiṃ paccayaṃ katvā arahattaṃ nibbattanti. Bhante, imasmiṃ mahāgāme valliyavīthiyaṃ dārubhaṇḍakamahātisso nāma upāsako attano dhītaraṃ bahi ṭhapetvā dvādasa kahāpaṇe gaṇhitvā tehi ekaṃ khīradhenuṃ gahetvā saṅghassa khīrabhattasalākaṃ paṭṭhapesi, so ‘‘dhītaraṃ mocessāmī’’ti cha māse yantasālāya bhatiṃ katvā dvādasa kahāpaṇe labhitvā ‘‘dhītaraṃ mocessāmī’’ti attano gehaṃ gacchanto antarāmagge maṃ disvā bhikkhācāravelāya sabbepi te kahāpaṇe datvā puṭakabhattaṃ gaṇhitvā sabbaṃ mayhaṃ adāsi. Ahaṃ taṃ piṇḍapātaṃ paribhuñjitvā idhāgantvā sappāyasenāsanaṃ labhitvā ‘‘piṇḍāpacāyanakammaṃ karissāmī’’ti visesaṃ nibbattesiṃ, bhanteti. Taṃ ṭhānaṃ sampattā catassopi parisā therassa sādhukāraṃ adaṃsu. Sakabhāvena saṇṭhātuṃ samattho nāma nāhosi. Thero saṅghamajjhe nisīditvā kathento kathentova ‘‘mayhaṃ kūṭāgāraṃ dārubhaṇḍakamahātissassa hatthena phuṭṭhakāleyeva calatū’’ti adhiṭṭhāya anupādisesāya nibbānadhātuyā parinibbāyi.

    কাকৰণ্ণতিস্সমহারাজা ‘‘একো কির থেরো পরিনিব্বুতো’’তি সুত্ৰা ৰিহারং গন্ত্ৰা সক্কারসম্মানং কত্ৰা কূটাগারং সজ্জেত্ৰা থেরং তত্থ আরোপেত্ৰা ‘‘ইদানি চিতকট্ঠানং গমিস্সামা’’তি উক্খিপন্তো চালেতুং নাসক্খি। রাজা ভিক্খুসঙ্ঘং পুচ্ছি – ‘‘অত্থি, ভন্তে, থেরেন কিঞ্চি কথিত’’ন্তি। ভিক্খূ থেরেন কথিতৰিধানং আচিক্খিংসু। রাজা তং উপাসকং পক্কোসাপেত্ৰা ‘‘তযা ইতো সত্তদিৰসমত্থকে কস্সচি মগ্গপটিপন্নস্স ভিক্খুনো পুটকভত্তং দিন্ন’’ন্তি পুচ্ছি। আম, দেৰাতি। কেন তে নিযামেন দিন্নন্তি? সো তং কারণং সব্বং আরোচেসি। অথ নং রাজা থেরস্স কূটাগারট্ঠানং পেসেসি – ‘‘গচ্ছ তং থেরং সঞ্জান, সো ৰা অঞ্ঞো ৰা’’তি। সো গন্ত্ৰা সাণিং উক্খিপিত্ৰা থেরস্স মুখং দিস্ৰা সঞ্জানিত্ৰা দ্ৰীহি হত্থেহি হদযং সন্ধারেন্তো রঞ্ঞো সন্তিকং গন্ত্ৰা, ‘‘দেৰ, ময্হং অয্যো’’তি আহ। অথস্স রাজা মহাপসাধনং দাপেসি। তং পসাধেত্ৰা আগতং ‘‘গচ্ছ ভাতিক মহাতিস্স ময্হং, অয্যাতি ৰত্ৰা কূটাগারং উক্খিপা’’তি আহ। উপাসকো ‘‘সাধু, দেৰা’’তি গন্ত্ৰা থেরস্স পাদে ৰন্দিত্ৰা উভোহি হত্থেহি উক্খিপিত্ৰা অত্তনো মত্থকে অকাসি। তস্মিংযেৰ খণে কূটাগারং আকাসে উপ্পতিত্ৰা চিতকমত্থকে পতিট্ঠাসি। তস্মিং কালে চিতকস্স চতূহিপি কণ্ণেহি সযমেৰ অগ্গিজালা উট্ঠহিংসূতি।

    Kākavaṇṇatissamahārājā ‘‘eko kira thero parinibbuto’’ti sutvā vihāraṃ gantvā sakkārasammānaṃ katvā kūṭāgāraṃ sajjetvā theraṃ tattha āropetvā ‘‘idāni citakaṭṭhānaṃ gamissāmā’’ti ukkhipanto cāletuṃ nāsakkhi. Rājā bhikkhusaṅghaṃ pucchi – ‘‘atthi, bhante, therena kiñci kathita’’nti. Bhikkhū therena kathitavidhānaṃ ācikkhiṃsu. Rājā taṃ upāsakaṃ pakkosāpetvā ‘‘tayā ito sattadivasamatthake kassaci maggapaṭipannassa bhikkhuno puṭakabhattaṃ dinna’’nti pucchi. Āma, devāti. Kena te niyāmena dinnanti? So taṃ kāraṇaṃ sabbaṃ ārocesi. Atha naṃ rājā therassa kūṭāgāraṭṭhānaṃ pesesi – ‘‘gaccha taṃ theraṃ sañjāna, so vā añño vā’’ti. So gantvā sāṇiṃ ukkhipitvā therassa mukhaṃ disvā sañjānitvā dvīhi hatthehi hadayaṃ sandhārento rañño santikaṃ gantvā, ‘‘deva, mayhaṃ ayyo’’ti āha. Athassa rājā mahāpasādhanaṃ dāpesi. Taṃ pasādhetvā āgataṃ ‘‘gaccha bhātika mahātissa mayhaṃ, ayyāti vatvā kūṭāgāraṃ ukkhipā’’ti āha. Upāsako ‘‘sādhu, devā’’ti gantvā therassa pāde vanditvā ubhohi hatthehi ukkhipitvā attano matthake akāsi. Tasmiṃyeva khaṇe kūṭāgāraṃ ākāse uppatitvā citakamatthake patiṭṭhāsi. Tasmiṃ kāle citakassa catūhipi kaṇṇehi sayameva aggijālā uṭṭhahiṃsūti.

    ‘‘মহন্তং খো পনেতং সত্থু দাযজ্জং, যদিদং সত্ত অরিযধনানি নাম, তং ন সক্কা কুসীতেন গহেতুং। যথা হি ৰিপ্পটিপন্নং পুত্তং মাতাপিতরো ‘অযং অম্হাকং অপুত্তো’তি পরিবাহিরং করোন্তি, সো তেসং অচ্চযেন দাযজ্জং ন লভতি, এৰং কুসীতোপি ইদং অরিযধনদাযজ্জং ন লভতি, আরদ্ধৰীরিযোৰ লভতী’’তি দাযজ্জমহত্তং পচ্চৰেক্খতোপি উপ্পজ্জতি।

    ‘‘Mahantaṃ kho panetaṃ satthu dāyajjaṃ, yadidaṃ satta ariyadhanāni nāma, taṃ na sakkā kusītena gahetuṃ. Yathā hi vippaṭipannaṃ puttaṃ mātāpitaro ‘ayaṃ amhākaṃ aputto’ti paribāhiraṃ karonti, so tesaṃ accayena dāyajjaṃ na labhati, evaṃ kusītopi idaṃ ariyadhanadāyajjaṃ na labhati, āraddhavīriyova labhatī’’ti dāyajjamahattaṃ paccavekkhatopi uppajjati.

    ‘‘মহা খো পন তে সত্থা। সত্থুনো হি তে মাতুকুচ্ছিম্হি পটিসন্ধিং গহণকালেপি, অভিনিক্খমনেপি, অভিসম্বোধিযম্পি, ধম্মচক্কপ্পৰত্তনযমকপাটিহারিযদেৰোরোহনআযুসঙ্খারৰোস্সজ্জনেসুপি, পরিনিব্বানকালেপি দসসহস্সিলোকধাতু কম্পিত্থ। যুত্তং নু তে এৰরূপস্স সত্থুনো সাসনে পব্বজিত্ৰা কুসীতেন ভৰিতু’’ন্তি এৰং সত্থুমহত্তং পচ্চৰেক্খতোপি উপ্পজ্জতি।

    ‘‘Mahā kho pana te satthā. Satthuno hi te mātukucchimhi paṭisandhiṃ gahaṇakālepi, abhinikkhamanepi, abhisambodhiyampi, dhammacakkappavattanayamakapāṭihāriyadevorohanaāyusaṅkhāravossajjanesupi, parinibbānakālepi dasasahassilokadhātu kampittha. Yuttaṃ nu te evarūpassa satthuno sāsane pabbajitvā kusītena bhavitu’’nti evaṃ satthumahattaṃ paccavekkhatopi uppajjati.

    ‘‘জাতিযাপি ত্ৰং ইদানি ন লামকজাতিকো, অসম্ভিন্নায মহাসম্মতপৰেণিযা আগতওক্কাকরাজৰংসে জাতোসি, সুদ্ধোদনমহারাজস্স চ মহামাযাদেৰিযা চ নত্তা, রাহুলভদ্দস্স কনিট্ঠো, তযা নাম এৰরূপেন জিনপুত্তেন হুত্ৰা ন যুত্তং কুসীতেন ৰিহরিতু’’ন্তি এৰং জাতিমহত্তং পচ্চৰেক্খতোপি উপ্পজ্জতি।

    ‘‘Jātiyāpi tvaṃ idāni na lāmakajātiko, asambhinnāya mahāsammatapaveṇiyā āgataokkākarājavaṃse jātosi, suddhodanamahārājassa ca mahāmāyādeviyā ca nattā, rāhulabhaddassa kaniṭṭho, tayā nāma evarūpena jinaputtena hutvā na yuttaṃ kusītena viharitu’’nti evaṃ jātimahattaṃ paccavekkhatopi uppajjati.

    ‘‘সারিপুত্তমোগ্গল্লানা চেৰ অসীতি মহাসাৰকা চ ৰীরিযেনেৰ লোকুত্তরধম্মং পটিৰিজ্ঝিংসু, ত্ৰং এতেসং সব্রহ্মচারীনং মগ্গং পটিপজ্জসি, ন পটিপজ্জসী’’তি এৰং সব্রহ্মচারিমহত্তং পচ্চৰেক্খতোপি উপ্পজ্জতি।

    ‘‘Sāriputtamoggallānā ceva asīti mahāsāvakā ca vīriyeneva lokuttaradhammaṃ paṭivijjhiṃsu, tvaṃ etesaṃ sabrahmacārīnaṃ maggaṃ paṭipajjasi, na paṭipajjasī’’ti evaṃ sabrahmacārimahattaṃ paccavekkhatopi uppajjati.

    কুচ্ছিং পূরেত্ৰা ঠিতঅজগরসদিসে ৰিস্সট্ঠকাযিকচেতসিকৰীরিযে কুসীতপুগ্গলে পরিৰজ্জেন্তস্সাপি, আরদ্ধৰীরিযে পহিতত্তে পুগ্গলে সেৰন্তস্সাপি, ঠাননিসজ্জাদীসু ৰিরিযুপ্পাদনত্থং নিন্নপোণপব্ভারচিত্তস্সাপি উপ্পজ্জতি। তস্মা আদিকম্মিকো কুলপুত্তো ইমেহি একাদসহি কারণেহি ৰীরিযসম্বোজ্ঝঙ্গং সমুট্ঠাপেত্ৰা তদেৰ ধুরং কত্ৰা অভিনিৰেসং পট্ঠপেত্ৰা অনুক্কমেন অরহত্তং গণ্হাতি। সো যাৰ অরহত্তমগ্গা ৰীরিযসম্বোজ্ঝঙ্গং ভাৰেতি নাম, ফলে পত্তে ভাৰিতো নাম হোতি।

    Kucchiṃ pūretvā ṭhitaajagarasadise vissaṭṭhakāyikacetasikavīriye kusītapuggale parivajjentassāpi, āraddhavīriye pahitatte puggale sevantassāpi, ṭhānanisajjādīsu viriyuppādanatthaṃ ninnapoṇapabbhāracittassāpi uppajjati. Tasmā ādikammiko kulaputto imehi ekādasahi kāraṇehi vīriyasambojjhaṅgaṃ samuṭṭhāpetvā tadeva dhuraṃ katvā abhinivesaṃ paṭṭhapetvā anukkamena arahattaṃ gaṇhāti. So yāva arahattamaggā vīriyasambojjhaṅgaṃ bhāveti nāma, phale patte bhāvito nāma hoti.

    একাদস ধম্মা পীতিসম্বোজ্ঝঙ্গস্স উপ্পাদায সংৰত্তন্তি – বুদ্ধানুস্সতি, ধম্মসঙ্ঘসীল^ চাগদেৰতানুস্সতি উপসমানুস্সতি, লূখপুগ্গলপরিৰজ্জনতা, সিনিদ্ধপুগ্গলসেৰনতা, পসাদনীযসুত্তন্তপচ্চৰেক্খণতা, তদধিমুত্ততাতি।

    Ekādasa dhammā pītisambojjhaṅgassa uppādāya saṃvattanti – buddhānussati, dhammasaṅghasīla^ cāgadevatānussati upasamānussati, lūkhapuggalaparivajjanatā, siniddhapuggalasevanatā, pasādanīyasuttantapaccavekkhaṇatā, tadadhimuttatāti.

    বুদ্ধগুণে অনুস্সরন্তস্সাপি হি যাৰ উপচারা সকলসরীরং ফরমানো পীতিসম্বোজ্ঝঙ্গো উপ্পজ্জতি, ধম্মসঙ্ঘগুণে অনুস্সরন্তস্সাপি, দীঘরত্তং অখণ্ডং কত্ৰা রক্খিতং চতুপারিসুদ্ধিসীলং পচ্চৰেক্খন্তস্সাপি, গিহিনো দসসীলং পঞ্চসীলং পচ্চৰেক্খন্তস্সাপি, দুব্ভিক্খভযাদীসু পণীতভোজনং সব্রহ্মচারীনং দত্ৰা ‘‘এৰংনাম অদম্হা’’তি চাগং পচ্চৰেক্খন্তস্সাপি, গিহিনোপি এৰরূপে কালে সীলৰন্তানং দিন্নদানং পচ্চৰেক্খন্তস্সাপি, যেহি গুণেহি সমন্নাগতা দেৰত্তং পত্তা, তথারূপানং গুণানং অত্তনি অত্থিতং পচ্চৰেক্খন্তস্সাপি, সমাপত্তিযা ৰিক্খম্ভিতে কিলেসা সট্ঠিপি সত্ততিপি ৰস্সানি ন সমুদাচরন্তীতি পচ্চৰেক্খন্তস্সাপি, চেতিযদস্সনবোধিদস্সনথেরদস্সনেসু অসক্কচ্চকিরিযায সংসূচিতলূখভাৰে বুদ্ধাদীসু পসাদসিনেহাভাৰেন গদ্রভপিট্ঠে রজসদিসে লূখপুগ্গলে পরিৰজ্জেন্তস্সাপি, বুদ্ধাদীসু পসাদবহুলে মুদুচিত্তে সিনিদ্ধপুগ্গলে সেৰন্তস্সাপি, রতনত্তযগুণপরিদীপকে পসাদনীযসুত্তন্তে পচ্চৰেক্খন্তস্সাপি, ঠাননিসজ্জাদীসু পীতিউপ্পাদনত্থং নিন্নপোণপব্ভারচিত্তস্সাপি উপ্পজ্জতি। তস্মা আদিকম্মিকো কুলপুত্তো ইমেহি একাদসহি কারণেহি পীতিসম্বোজ্ঝঙ্গং সমুট্ঠাপেত্ৰা তদেৰ ধুরং কত্ৰা অভিনিৰেসং পট্ঠপেত্ৰা অনুক্কমেন অরহত্তং গণ্হাতি। সো যাৰ অরহত্তমগ্গা পীতিসম্বোজ্ঝঙ্গং ভাৰেতি নাম, ফলে পত্তে ভাৰিতো নাম হোতি।

    Buddhaguṇe anussarantassāpi hi yāva upacārā sakalasarīraṃ pharamāno pītisambojjhaṅgo uppajjati, dhammasaṅghaguṇe anussarantassāpi, dīgharattaṃ akhaṇḍaṃ katvā rakkhitaṃ catupārisuddhisīlaṃ paccavekkhantassāpi, gihino dasasīlaṃ pañcasīlaṃ paccavekkhantassāpi, dubbhikkhabhayādīsu paṇītabhojanaṃ sabrahmacārīnaṃ datvā ‘‘evaṃnāma adamhā’’ti cāgaṃ paccavekkhantassāpi, gihinopi evarūpe kāle sīlavantānaṃ dinnadānaṃ paccavekkhantassāpi, yehi guṇehi samannāgatā devattaṃ pattā, tathārūpānaṃ guṇānaṃ attani atthitaṃ paccavekkhantassāpi, samāpattiyā vikkhambhite kilesā saṭṭhipi sattatipi vassāni na samudācarantīti paccavekkhantassāpi, cetiyadassanabodhidassanatheradassanesu asakkaccakiriyāya saṃsūcitalūkhabhāve buddhādīsu pasādasinehābhāvena gadrabhapiṭṭhe rajasadise lūkhapuggale parivajjentassāpi, buddhādīsu pasādabahule muducitte siniddhapuggale sevantassāpi, ratanattayaguṇaparidīpake pasādanīyasuttante paccavekkhantassāpi, ṭhānanisajjādīsu pītiuppādanatthaṃ ninnapoṇapabbhāracittassāpi uppajjati. Tasmā ādikammiko kulaputto imehi ekādasahi kāraṇehi pītisambojjhaṅgaṃ samuṭṭhāpetvā tadeva dhuraṃ katvā abhinivesaṃ paṭṭhapetvā anukkamena arahattaṃ gaṇhāti. So yāva arahattamaggā pītisambojjhaṅgaṃ bhāveti nāma, phale patte bhāvito nāma hoti.

    সত্ত ধম্মা পস্সদ্ধিসম্বোজ্ঝঙ্গস্স উপ্পাদায সংৰত্তন্তি – পণীতভোজনসেৰনতা, উতুসুখসেৰনতা, ইরিযাপথসুখসেৰনতা, মজ্ঝত্তপযোগতা, সারদ্ধকাযপুগ্গলপরিৰজ্জনতা, পস্সদ্ধকাযপুগ্গলসেৰনতা, তদধিমুত্ততাতি।

    Satta dhammā passaddhisambojjhaṅgassa uppādāya saṃvattanti – paṇītabhojanasevanatā, utusukhasevanatā, iriyāpathasukhasevanatā, majjhattapayogatā, sāraddhakāyapuggalaparivajjanatā, passaddhakāyapuggalasevanatā, tadadhimuttatāti.

    পণীতঞ্হি সিনিদ্ধং সপ্পাযভোজনং ভুঞ্জন্তস্সাপি, সীতুণ্হেসু চ উতূসু ঠানাদীসু চ ইরিযাপথেসু সপ্পাযউতুঞ্চ ইরিযাপথঞ্চ সেৰন্তস্সাপি পস্সদ্ধি উপ্পজ্জতি। যো পন মহাপুরিসজাতিকো সব্বউতুইরিযাপথক্খমো হোতি, ন তং সন্ধাযেতং ৰুত্তং। যস্স সভাগৰিসভাগতা অত্থি, তস্সেৰ ৰিসভাগে উতুইরিযাপথে ৰজ্জেত্ৰা সভাগে সেৰন্তস্স উপ্পজ্জতি। মজ্ঝত্তপযোগো ৰুচ্চতি অত্তনো চ পরস্স চ কম্মস্সকতপচ্চৰেক্খণা। ইমিনা মজ্ঝত্তপযোগেন উপ্পজ্জতি। যো লেড্ডুদণ্ডাদীহি পরং ৰিহেঠযমানো ৰিচরতি, এৰরূপং সারদ্ধকাযং পুগ্গলং পরিৰজ্জেন্তস্সাপি, সংযতপাদপাণিং পস্সদ্ধকাযং পুগ্গলং সেৰন্তস্সাপি, ঠাননিসজ্জাদীসু পস্সদ্ধিউপ্পাদনত্থায নিন্নপোণপব্ভারচিত্তস্সাপি উপ্পজ্জতি। তস্মা আদিকম্মিকো কুলপুত্তো ইমেহি সত্তহি কারণেহি পস্সদ্ধিসম্বোজ্ঝঙ্গং সমুট্ঠাপেত্ৰা তদেৰ ধুরং কত্ৰা অভিনিৰেসং পট্ঠপেত্ৰা অনুক্কমেন অরহত্তং গণ্হাতি। সো যাৰ অরহত্তমগ্গা পস্সদ্ধিসম্বোজ্ঝঙ্গং ভাৰেতি নাম, ফলে পত্তে ভাৰিতো নাম হোতি।

    Paṇītañhi siniddhaṃ sappāyabhojanaṃ bhuñjantassāpi, sītuṇhesu ca utūsu ṭhānādīsu ca iriyāpathesu sappāyautuñca iriyāpathañca sevantassāpi passaddhi uppajjati. Yo pana mahāpurisajātiko sabbautuiriyāpathakkhamo hoti, na taṃ sandhāyetaṃ vuttaṃ. Yassa sabhāgavisabhāgatā atthi, tasseva visabhāge utuiriyāpathe vajjetvā sabhāge sevantassa uppajjati. Majjhattapayogo vuccati attano ca parassa ca kammassakatapaccavekkhaṇā. Iminā majjhattapayogena uppajjati. Yo leḍḍudaṇḍādīhi paraṃ viheṭhayamāno vicarati, evarūpaṃ sāraddhakāyaṃ puggalaṃ parivajjentassāpi, saṃyatapādapāṇiṃ passaddhakāyaṃ puggalaṃ sevantassāpi, ṭhānanisajjādīsu passaddhiuppādanatthāya ninnapoṇapabbhāracittassāpi uppajjati. Tasmā ādikammiko kulaputto imehi sattahi kāraṇehi passaddhisambojjhaṅgaṃ samuṭṭhāpetvā tadeva dhuraṃ katvā abhinivesaṃ paṭṭhapetvā anukkamena arahattaṃ gaṇhāti. So yāva arahattamaggā passaddhisambojjhaṅgaṃ bhāveti nāma, phale patte bhāvito nāma hoti.

    একাদস ধম্মা সমাধিসম্বোজ্ঝঙ্গস্স উপ্পাদায সংৰত্তন্তি – ৰত্থুৰিসদকিরিযতা, ইন্দ্রিযসমত্তপটিপাদনতা, নিমিত্তকুসলতা, সমযে চিত্তস্স পগ্গণ্হনতা, সমযে চিত্তস্স নিগ্গণ্হনতা, সমযে সম্পহংসনতা, সমযে অজ্ঝুপেক্খনতা, অসমাহিতপুগ্গলপরিৰজ্জনতা, সমাহিতপুগ্গলসেৰনতা, ঝানৰিমোক্খপচ্চৰেক্খণতা, তদধিমুত্ততাতি। তত্থ ৰত্থুৰিসদকিরিযতা চ ইন্দ্রিযসমত্তপটিপাদনতা চ ৰুত্তনযেনেৰ ৰেদিতব্বা।

    Ekādasa dhammā samādhisambojjhaṅgassa uppādāya saṃvattanti – vatthuvisadakiriyatā, indriyasamattapaṭipādanatā, nimittakusalatā, samaye cittassa paggaṇhanatā, samaye cittassa niggaṇhanatā, samaye sampahaṃsanatā, samaye ajjhupekkhanatā, asamāhitapuggalaparivajjanatā, samāhitapuggalasevanatā, jhānavimokkhapaccavekkhaṇatā, tadadhimuttatāti. Tattha vatthuvisadakiriyatā ca indriyasamattapaṭipādanatā ca vuttanayeneva veditabbā.

    নিমিত্তকুসলতা নাম কসিণনিমিত্তস্স উগ্গহকুসলতা। সমযে চিত্তস্স পগ্গণ্হনতাতি যস্মিং সমযে অতিসিথিলৰীরিযতাদীহি লীনং চিত্তং হোতি, তস্মিং সমযে ধম্মৰিচযৰীরিযপীতিসম্বোজ্ঝঙ্গসমুট্ঠাপনেন তস্স পগ্গণ্হনং। সমযে চিত্তস্স নিগ্গণ্হনতাতি যস্মিং সমযে অচ্চারদ্ধৰীরিযতাদীহি উদ্ধতং চিত্তং হোতি, তস্মিং সমযে পস্সদ্ধিসমাধিউপেক্খাসম্বোজ্ঝঙ্গসমুট্ঠাপনেন তস্স নিগ্গণ্হনং। সমযে সম্পহংসনতাতি যস্মিং সমযে চিত্তং পঞ্ঞাপযোগমন্দতায ৰা উপসমসুখানধিগমেন ৰা নিরস্সাদং হোতি, তস্মিং সমযে অট্ঠসংৰেগৰত্থুপচ্চৰেক্খণেন সংৰেজেতি। অট্ঠ সংৰেগৰত্থূনি নাম – জাতিজরাব্যাধিমরণানি চত্তারি, অপাযদুক্খং পঞ্চমং, অতীতে ৰট্টমূলকং দুক্খং, অনাগতে ৰট্টমূলকং দুক্খং, পচ্চুপ্পন্নে আহারপরিযেট্ঠিমূলকং দুক্খন্তি। রতনত্তযগুণানুস্সরণেন চ পসাদং জনেতি। অযং ৰুচ্চতি ‘‘সমযে সম্পহংসনতা’’তি।

    Nimittakusalatā nāma kasiṇanimittassa uggahakusalatā. Samaye cittassa paggaṇhanatāti yasmiṃ samaye atisithilavīriyatādīhi līnaṃ cittaṃ hoti, tasmiṃ samaye dhammavicayavīriyapītisambojjhaṅgasamuṭṭhāpanena tassa paggaṇhanaṃ. Samaye cittassa niggaṇhanatāti yasmiṃ samaye accāraddhavīriyatādīhi uddhataṃ cittaṃ hoti, tasmiṃ samaye passaddhisamādhiupekkhāsambojjhaṅgasamuṭṭhāpanena tassa niggaṇhanaṃ. Samaye sampahaṃsanatāti yasmiṃ samaye cittaṃ paññāpayogamandatāya vā upasamasukhānadhigamena vā nirassādaṃ hoti, tasmiṃ samaye aṭṭhasaṃvegavatthupaccavekkhaṇena saṃvejeti. Aṭṭha saṃvegavatthūni nāma – jātijarābyādhimaraṇāni cattāri, apāyadukkhaṃ pañcamaṃ, atīte vaṭṭamūlakaṃ dukkhaṃ, anāgate vaṭṭamūlakaṃ dukkhaṃ, paccuppanne āhārapariyeṭṭhimūlakaṃ dukkhanti. Ratanattayaguṇānussaraṇena ca pasādaṃ janeti. Ayaṃ vuccati ‘‘samaye sampahaṃsanatā’’ti.

    সমযে অজ্ঝুপেক্খনতা নাম যস্মিং সমযে সম্মাপটিপত্তিং আগম্ম অলীনং অনুদ্ধতং অনিরস্সাদং আরম্মণে সমপ্পৰত্তং সমথৰীথিপটিপন্নং চিত্তং হোতি, তদাস্স পগ্গহনিগ্গহসম্পহংসনেসু ন ব্যাপারং আপজ্জতি সারথি ৰিয সমপ্পৰত্তেসু অস্সেসু। অযং ৰুচ্চতি ‘‘সমযে অজ্ঝুপেক্খনতা’’তি। অসমাহিতপুগ্গলপরিৰজ্জনতা নাম উপচারং ৰা অপ্পনং ৰা অপ্পত্তানং ৰিক্খিত্তচিত্তানং পুগ্গলানং আরকা পরিৰজ্জনং। সমাহিতপুগ্গলসেৰনতা নাম উপচারেন ৰা অপ্পনায ৰা সমাহিতচিত্তানং সেৰনা ভজনা পযিরুপাসনা। তদধিমুত্ততা নাম ঠাননিসজ্জাদীসু সমাধিউপ্পাদনত্থংযেৰ নিন্নপোণপব্ভারচিত্ততা। এৰঞ্হি পটিপজ্জতো এস উপ্পজ্জতি। তস্মা আদিকম্মিকো কুলপুত্তো ইমেহি একাদসহি কারণেহি সমাধিসম্বোজ্ঝঙ্গং সমুট্ঠাপেত্ৰা তদেৰ ধুরং কত্ৰা অভিনিৰেসং পট্ঠপেত্ৰা অনুক্কমেন অরহত্তং গণ্হাতি। সো যাৰ অরহত্তমগ্গা সমাধিসম্বোজ্ঝঙ্গং ভাৰেতি নাম, ফলে পত্তে ভাৰিতো নাম হোতি।

    Samaye ajjhupekkhanatā nāma yasmiṃ samaye sammāpaṭipattiṃ āgamma alīnaṃ anuddhataṃ anirassādaṃ ārammaṇe samappavattaṃ samathavīthipaṭipannaṃ cittaṃ hoti, tadāssa paggahaniggahasampahaṃsanesu na byāpāraṃ āpajjati sārathi viya samappavattesu assesu. Ayaṃ vuccati ‘‘samaye ajjhupekkhanatā’’ti. Asamāhitapuggalaparivajjanatā nāma upacāraṃ vā appanaṃ vā appattānaṃ vikkhittacittānaṃ puggalānaṃ ārakā parivajjanaṃ. Samāhitapuggalasevanatā nāma upacārena vā appanāya vā samāhitacittānaṃ sevanā bhajanā payirupāsanā. Tadadhimuttatā nāma ṭhānanisajjādīsu samādhiuppādanatthaṃyeva ninnapoṇapabbhāracittatā. Evañhi paṭipajjato esa uppajjati. Tasmā ādikammiko kulaputto imehi ekādasahi kāraṇehi samādhisambojjhaṅgaṃ samuṭṭhāpetvā tadeva dhuraṃ katvā abhinivesaṃ paṭṭhapetvā anukkamena arahattaṃ gaṇhāti. So yāva arahattamaggā samādhisambojjhaṅgaṃ bhāveti nāma, phale patte bhāvito nāma hoti.

    পঞ্চ ধম্মা উপেখাসম্বোজ্ঝঙ্গস্স উপ্পাদায সংৰত্তন্তি – সত্তমজ্ঝত্ততা, সঙ্খারমজ্ঝত্ততা, সত্তসঙ্খারকেলাযনপুগ্গলপরিৰজ্জনতা, সত্তসঙ্খারমজ্ঝত্তপুগ্গলসেৰনতা তদধিমুত্ততাতি। তত্থ দ্ৰীহাকারেহি সত্তমজ্ঝত্ততং সমুট্ঠাপেতি ‘‘ত্ৰং অত্তনো কম্মেন আগন্ত্ৰা অত্তনোৰ কম্মেন গমিস্সসি, এসোপি অত্তনো কম্মেন আগন্ত্ৰা অত্তনোৰ কম্মেন গমিস্সতি, ত্ৰং কং কেলাযসী’’তি এৰং কম্মস্সকতপচ্চৰেক্খণেন চ, ‘‘পরমত্থতো সত্তোযেৰ নত্থি, সো ত্ৰং কং কেলাযসী’’তি এৰং নিস্সত্তপচ্চৰেক্খণেন চাতি। দ্ৰীহেৰাকারেহি সঙ্খারমজ্ঝত্ততং সমুট্ঠাপেতি ‘‘ইদং চীৰরং অনুপুব্বেন ৰণ্ণৰিকারঞ্চেৰ জিণ্ণভাৰঞ্চ উপগন্ত্ৰা পাদপুঞ্ছনচোল়কং হুত্ৰা যট্ঠিকোটিযা ছড্ডনীযং ভৰিস্সতি, সচে পনস্স সামিকো ভৰেয্য, নাস্স এৰং ৰিনস্সিতুং দদেয্যা’’তি এৰং অস্সামিকভাৰপচ্চৰেক্খণেন চ, ‘‘অনদ্ধনিযং ইদং তাৰকালিক’’ন্তি এৰং তাৰকালিকভাৰপচ্চৰেক্খণেন চাতি। যথা চ চীৰরে, এৰং পত্তাদীসুপি যোজনা কাতব্বা।

    Pañca dhammā upekhāsambojjhaṅgassa uppādāya saṃvattanti – sattamajjhattatā, saṅkhāramajjhattatā, sattasaṅkhārakelāyanapuggalaparivajjanatā, sattasaṅkhāramajjhattapuggalasevanatā tadadhimuttatāti. Tattha dvīhākārehi sattamajjhattataṃ samuṭṭhāpeti ‘‘tvaṃ attano kammena āgantvā attanova kammena gamissasi, esopi attano kammena āgantvā attanova kammena gamissati, tvaṃ kaṃ kelāyasī’’ti evaṃ kammassakatapaccavekkhaṇena ca, ‘‘paramatthato sattoyeva natthi, so tvaṃ kaṃ kelāyasī’’ti evaṃ nissattapaccavekkhaṇena cāti. Dvīhevākārehi saṅkhāramajjhattataṃ samuṭṭhāpeti ‘‘idaṃ cīvaraṃ anupubbena vaṇṇavikārañceva jiṇṇabhāvañca upagantvā pādapuñchanacoḷakaṃ hutvā yaṭṭhikoṭiyā chaḍḍanīyaṃ bhavissati, sace panassa sāmiko bhaveyya, nāssa evaṃ vinassituṃ dadeyyā’’ti evaṃ assāmikabhāvapaccavekkhaṇena ca, ‘‘anaddhaniyaṃ idaṃ tāvakālika’’nti evaṃ tāvakālikabhāvapaccavekkhaṇena cāti. Yathā ca cīvare, evaṃ pattādīsupi yojanā kātabbā.

    সত্তসঙ্খারকেলাযনপুগ্গলপরিৰজ্জনতাতি এত্থ যো পুগ্গলো গিহী ৰা অত্তনো পুত্তধীতাদিকে, পব্বজিতো ৰা অত্তনো অন্তেৰাসিকসমানুপজ্ঝাযকাদিকে মমাযতি, সহত্থেনেৰ নেসং কেসচ্ছেদনসূচিকম্মচীৰরধোৰনরজনপত্তপচনাদীনি করোতি, মুহুত্তম্পি অপস্সন্তো ‘‘অসুকো সামণেরো কুহিং, অসুকো দহরো কুহি’’ন্তি ভন্তমিগো ৰিয ইতো চিতো চ ওলোকেতি, অঞ্ঞেন কেসচ্ছেদনাদীনং অত্থায ‘‘মুহুত্তং তাৰ অসুকং পেসেথা’’তি যাচিযমানোপি ‘‘অম্হেপি তং অত্তনো কম্মং ন কারেম, তুম্হে নং গহেত্ৰা কিলমিস্সথা’’তি ন দেতি, অযং সত্তকেলাযনো নাম। যো পন চীৰরপত্তথালককত্তরযট্ঠিআদীনি মমাযতি, অঞ্ঞস্স হত্থেন পরামসিতুম্পি ন দেতি, তাৰকালিকং যাচিতো ‘‘মযম্পি ইমং ধনাযন্তা ন পরিভুঞ্জাম, তুম্হাকং কিং দস্সামা’’তি ৰদতি, অযং সঙ্খারকেলাযনো নাম।

    Sattasaṅkhārakelāyanapuggalaparivajjanatāti ettha yo puggalo gihī vā attano puttadhītādike, pabbajito vā attano antevāsikasamānupajjhāyakādike mamāyati, sahattheneva nesaṃ kesacchedanasūcikammacīvaradhovanarajanapattapacanādīni karoti, muhuttampi apassanto ‘‘asuko sāmaṇero kuhiṃ, asuko daharo kuhi’’nti bhantamigo viya ito cito ca oloketi, aññena kesacchedanādīnaṃ atthāya ‘‘muhuttaṃ tāva asukaṃ pesethā’’ti yāciyamānopi ‘‘amhepi taṃ attano kammaṃ na kārema, tumhe naṃ gahetvā kilamissathā’’ti na deti, ayaṃ sattakelāyano nāma. Yo pana cīvarapattathālakakattarayaṭṭhiādīni mamāyati, aññassa hatthena parāmasitumpi na deti, tāvakālikaṃ yācito ‘‘mayampi imaṃ dhanāyantā na paribhuñjāma, tumhākaṃ kiṃ dassāmā’’ti vadati, ayaṃ saṅkhārakelāyano nāma.

    যো পন তেসু দ্ৰীসুপি ৰত্থূসু মজ্ঝত্তো উদাসিনো, অযং সত্তসঙ্খারমজ্ঝত্তো নাম। ইতি অযং উপেক্খাসম্বোজ্ঝঙ্গো এৰরূপং সত্তসঙ্খারকেলাযনপুগ্গলং আরকা পরিৰজ্জেন্তস্সাপি, সত্তসঙ্খারমজ্ঝত্তপুগ্গলং সেৰন্তস্সাপি, ঠাননিসজ্জাদীসু তদুপ্পাদনত্থং নিন্নপোণপব্ভারচিত্তস্সাপি উপ্পজ্জতি। তস্মা আদিকম্মিকো কুলপুত্তো ইমেহি পঞ্চহি কারণেহি উপেক্খাসম্বোজ্ঝঙ্গং সমুট্ঠাপেত্ৰা তদেৰ ধুরং কত্ৰা অভিনিৰেসং পট্ঠপেত্ৰা অনুক্কমেন অরহত্তং গণ্হাতি। সো যাৰ অরহত্তমগ্গা উপেক্খাসম্বোজ্ঝঙ্গং ভাৰেতি নাম, ফলে পত্তে ভাৰিতো নাম হোতি। ইতি ইমেপি সত্ত বোজ্ঝঙ্গা লোকিযলোকুত্তরমিস্সকাৰ কথিতা।

    Yo pana tesu dvīsupi vatthūsu majjhatto udāsino, ayaṃ sattasaṅkhāramajjhatto nāma. Iti ayaṃ upekkhāsambojjhaṅgo evarūpaṃ sattasaṅkhārakelāyanapuggalaṃ ārakā parivajjentassāpi, sattasaṅkhāramajjhattapuggalaṃ sevantassāpi, ṭhānanisajjādīsu taduppādanatthaṃ ninnapoṇapabbhāracittassāpi uppajjati. Tasmā ādikammiko kulaputto imehi pañcahi kāraṇehi upekkhāsambojjhaṅgaṃ samuṭṭhāpetvā tadeva dhuraṃ katvā abhinivesaṃ paṭṭhapetvā anukkamena arahattaṃ gaṇhāti. So yāva arahattamaggā upekkhāsambojjhaṅgaṃ bhāveti nāma, phale patte bhāvito nāma hoti. Iti imepi satta bojjhaṅgā lokiyalokuttaramissakāva kathitā.

    ৪১৯. সম্মাদিট্ঠিং ভাৰেতীতি অট্ঠঙ্গিকস্স মগ্গস্স আদিভূতং সম্মাদিট্ঠিং ব্রূহেতি ৰড্ঢেতি। সেসপদেসুপি এসেৰ নযো। এত্থ পন সম্মাদস্সনলক্খণা সম্মাদিট্ঠি। সম্মাঅভিনিরোপনলক্খণো সম্মাসঙ্কপ্পো। সম্মাপরিগ্গাহলক্খণা সম্মাৰাচা। সম্মাসমুট্ঠাপনলক্খণো সম্মাকম্মন্তো। সম্মাৰোদাপনলক্খণো সম্মাআজীৰো। সম্মাপগ্গহলক্খণো সম্মাৰাযামো। সম্মাউপট্ঠানলক্খণা সম্মাসতি। সম্মাসমাধানলক্খণো সম্মাসমাধি।

    419.Sammādiṭṭhiṃ bhāvetīti aṭṭhaṅgikassa maggassa ādibhūtaṃ sammādiṭṭhiṃ brūheti vaḍḍheti. Sesapadesupi eseva nayo. Ettha pana sammādassanalakkhaṇā sammādiṭṭhi. Sammāabhiniropanalakkhaṇo sammāsaṅkappo. Sammāpariggāhalakkhaṇā sammāvācā. Sammāsamuṭṭhāpanalakkhaṇo sammākammanto. Sammāvodāpanalakkhaṇo sammāājīvo. Sammāpaggahalakkhaṇo sammāvāyāmo. Sammāupaṭṭhānalakkhaṇā sammāsati. Sammāsamādhānalakkhaṇo sammāsamādhi.

    তেসু একেকস্স তীণি তীণি কিচ্চানি হোন্তি। সেয্যথিদং, সম্মাদিট্ঠি তাৰ অঞ্ঞেহিপি অত্তনো পচ্চনীককিলেসেহি সদ্ধিং মিচ্ছাদিট্ঠিং পজহতি, নিরোধং আরম্মণং করোতি, সম্পযুত্তধম্মে চ পস্সতি তপ্পটিচ্ছাদকমোহৰিধমনৰসেন অসম্মোহতো। সম্মাসঙ্কপ্পাদযোপি তথেৰ মিচ্ছাসঙ্কপ্পাদীনি চ পজহন্তি, নিরোধঞ্চ আরম্মণং করোন্তি। ৰিসেসতো পনেত্থ সম্মাসঙ্কপ্পো সহজাতধম্মে সম্মা অভিনিরোপেতি, সম্মাৰাচা সম্মা পরিগ্গণ্হাতি, সম্মাকম্মন্তো সম্মা সমুট্ঠাপেতি, সম্মাআজীৰো সম্মা ৰোদাপেতি, সম্মাৰাযামো সম্মা পগ্গণ্হাতি, সম্মাসতি সম্মা উপট্ঠাতি, সম্মাসমাধি সম্মা পদহতি।

    Tesu ekekassa tīṇi tīṇi kiccāni honti. Seyyathidaṃ, sammādiṭṭhi tāva aññehipi attano paccanīkakilesehi saddhiṃ micchādiṭṭhiṃ pajahati, nirodhaṃ ārammaṇaṃ karoti, sampayuttadhamme ca passati tappaṭicchādakamohavidhamanavasena asammohato. Sammāsaṅkappādayopi tatheva micchāsaṅkappādīni ca pajahanti, nirodhañca ārammaṇaṃ karonti. Visesato panettha sammāsaṅkappo sahajātadhamme sammā abhiniropeti, sammāvācā sammā pariggaṇhāti, sammākammanto sammā samuṭṭhāpeti, sammāājīvo sammā vodāpeti, sammāvāyāmo sammā paggaṇhāti, sammāsati sammā upaṭṭhāti, sammāsamādhi sammā padahati.

    অপি চেসা সম্মাদিট্ঠি নাম পুব্বভাগে নানাক্খণা নানারম্মণা হোতি, মগ্গকালে একক্খণা একারম্মণা। কিচ্চতো পন দুক্খে ঞাণন্তিআদীনি চত্তারি নামানি লভতি। সম্মাসঙ্কপ্পাদযোপি পুব্বভাগে নানক্খণা নানারম্মণা হোন্তি, মগ্গকালে একক্খণা একারম্মণা। তেসু সম্মাসঙ্কপ্পো কিচ্চতো নেক্খম্মসঙ্কপ্পো অৰিহিংসাসঙ্কপ্পো অব্যাপাদসঙ্কপ্পোতি তীণি নামানি লভতি। সম্মাৰাচাদযো তযো পুব্বভাগে ৰিরতিযোপি হোন্তি চেতনাযোপি, মগ্গক্খণে পন ৰিরতিযোৰ। সম্মাৰাযামো সম্মাসতীতি ইদম্পি দ্ৰযং কিচ্চতো সম্মপ্পধানসতিপট্ঠানৰসেন চত্তারি নামানি লভতি। সম্মাসমাধি পন পুব্বভাগেপি মগ্গক্খণেপি সম্মাসমাধিযেৰ।

    Api cesā sammādiṭṭhi nāma pubbabhāge nānākkhaṇā nānārammaṇā hoti, maggakāle ekakkhaṇā ekārammaṇā. Kiccato pana dukkhe ñāṇantiādīni cattāri nāmāni labhati. Sammāsaṅkappādayopi pubbabhāge nānakkhaṇā nānārammaṇā honti, maggakāle ekakkhaṇā ekārammaṇā. Tesu sammāsaṅkappo kiccato nekkhammasaṅkappo avihiṃsāsaṅkappo abyāpādasaṅkappoti tīṇi nāmāni labhati. Sammāvācādayo tayo pubbabhāge viratiyopi honti cetanāyopi, maggakkhaṇe pana viratiyova. Sammāvāyāmo sammāsatīti idampi dvayaṃ kiccato sammappadhānasatipaṭṭhānavasena cattāri nāmāni labhati. Sammāsamādhi pana pubbabhāgepi maggakkhaṇepi sammāsamādhiyeva.

    ইতি ইমেসু অট্ঠসু ধম্মেসু ভগৰতা নিব্বানাধিগমায পটিপন্নস্স যোগিনো বহুকারত্তা পঠমং সম্মাদিট্ঠি দেসিতা। অযঞ্হি ‘‘পঞ্ঞাপজ্জোতো পঞ্ঞাসত্থ’’ন্তি (ধ॰ স॰ ১৬, ২০, ২৯, ৩৪) চ ৰুত্তা। তস্মা এতায পুব্বভাগে ৰিপস্সনাঞাণসঙ্খাতায সম্মাদিট্ঠিযা অৰিজ্জন্ধকারং ৰিধমিত্ৰা কিলেসচোরে ঘাতেন্তো খেমেন যোগাৰচরো নিব্বানং পাপুণাতি। তেন ৰুত্তং – ‘‘নিব্বানাধিগমায পটিপন্নস্স যোগিনো বহুকারত্তা পঠমং সম্মাদিট্ঠি দেসিতা’’তি।

    Iti imesu aṭṭhasu dhammesu bhagavatā nibbānādhigamāya paṭipannassa yogino bahukārattā paṭhamaṃ sammādiṭṭhi desitā. Ayañhi ‘‘paññāpajjoto paññāsattha’’nti (dha. sa. 16, 20, 29, 34) ca vuttā. Tasmā etāya pubbabhāge vipassanāñāṇasaṅkhātāya sammādiṭṭhiyā avijjandhakāraṃ vidhamitvā kilesacore ghātento khemena yogāvacaro nibbānaṃ pāpuṇāti. Tena vuttaṃ – ‘‘nibbānādhigamāya paṭipannassa yogino bahukārattā paṭhamaṃ sammādiṭṭhi desitā’’ti.

    সম্মাসঙ্কপ্পো পন তস্সা বহুকারো, তস্মা তদনন্তরং ৰুত্তো। যথা হি হেরঞ্ঞিকো হত্থেন পরিৰত্তেত্ৰা পরিৰত্তেত্ৰা চক্খুনা কহাপণং ওলোকেন্তো ‘অযং কূটো, অযং ছেকো’’তি জানাতি , এৰং যোগাৰচরোপি পুব্বভাগে ৰিতক্কেন ৰিতক্কেত্ৰা ৰিতক্কেত্ৰা ৰিপস্সনাপঞ্ঞায ওলোকযমানো ‘‘ইমে ধম্মা কামাৰচরা, ইমে ধম্মা রূপাৰচরাদযো’’তি জানাতি। যথা ৰা পন পুরিসেন কোটিযং গহেত্ৰা পরিৰত্তেত্ৰা পরিৰত্তেত্ৰা দিন্নং মহারুক্খং তচ্ছকো ৰাসিযা তচ্ছেত্ৰা কম্মে উপনেতি, এৰং ৰিতক্কেন ৰিতক্কেত্ৰা ৰিতক্কেত্ৰা দিন্নধম্মে যোগাৰচরো পঞ্ঞায ‘‘ইমে ধম্মা কামাৰচরা, ইমে ধম্মা রূপাৰচরা’’তিআদিনা নযেন পরিচ্ছিন্দিত্ৰা কম্মে উপনেতি। তেন ৰুত্তং – ‘‘সম্মাসঙ্কপ্পো পন তস্সা বহুকারো, তস্মা তদনন্তরং ৰুত্তো’’তি।

    Sammāsaṅkappo pana tassā bahukāro, tasmā tadanantaraṃ vutto. Yathā hi heraññiko hatthena parivattetvā parivattetvā cakkhunā kahāpaṇaṃ olokento ‘ayaṃ kūṭo, ayaṃ cheko’’ti jānāti , evaṃ yogāvacaropi pubbabhāge vitakkena vitakketvā vitakketvā vipassanāpaññāya olokayamāno ‘‘ime dhammā kāmāvacarā, ime dhammā rūpāvacarādayo’’ti jānāti. Yathā vā pana purisena koṭiyaṃ gahetvā parivattetvā parivattetvā dinnaṃ mahārukkhaṃ tacchako vāsiyā tacchetvā kamme upaneti, evaṃ vitakkena vitakketvā vitakketvā dinnadhamme yogāvacaro paññāya ‘‘ime dhammā kāmāvacarā, ime dhammā rūpāvacarā’’tiādinā nayena paricchinditvā kamme upaneti. Tena vuttaṃ – ‘‘sammāsaṅkappo pana tassā bahukāro, tasmā tadanantaraṃ vutto’’ti.

    স্ৰাযং যথা সম্মাদিট্ঠিযা, এৰং সম্মাৰাচাযপি উপকারকো। যথাহ – ‘‘পুব্বে খো, গহপতি, ৰিতক্কেত্ৰা ৰিচারেত্ৰা পচ্ছা ৰাচং ভিন্দতী’’তি (ম॰ নি॰ ১.৪৬৩)। তস্মা তদনন্তরং সম্মাৰাচা ৰুত্তা।

    Svāyaṃ yathā sammādiṭṭhiyā, evaṃ sammāvācāyapi upakārako. Yathāha – ‘‘pubbe kho, gahapati, vitakketvā vicāretvā pacchā vācaṃ bhindatī’’ti (ma. ni. 1.463). Tasmā tadanantaraṃ sammāvācā vuttā.

    যস্মা পন ইদঞ্চিদঞ্চ করিস্সামাতি পঠমং ৰাচায সংৰিদহিত্ৰা লোকে কম্মন্তে পযোজেন্তি, তস্মা ৰাচা কাযকম্মস্স উপকারিকাতি সম্মাৰাচায অনন্তরং সম্মাকম্মন্তো ৰুত্তো।

    Yasmā pana idañcidañca karissāmāti paṭhamaṃ vācāya saṃvidahitvā loke kammante payojenti, tasmā vācā kāyakammassa upakārikāti sammāvācāya anantaraṃ sammākammanto vutto.

    চতুব্বিধং পন ৰচীদুচ্চরিতং, তিৰিধং কাযদুচ্চরিতং পহায উভযসুচরিতং পূরেন্তস্সেৰ যস্মা আজীৰট্ঠমকসীলং পূরেতি, ন ইতরস্স। তস্মা তদুভযানন্তরং সম্মাআজীৰো ৰুত্তো।

    Catubbidhaṃ pana vacīduccaritaṃ, tividhaṃ kāyaduccaritaṃ pahāya ubhayasucaritaṃ pūrentasseva yasmā ājīvaṭṭhamakasīlaṃ pūreti, na itarassa. Tasmā tadubhayānantaraṃ sammāājīvo vutto.

    এৰং সুদ্ধাজীৰেন ‘‘পরিসুদ্ধো মে আজীৰো’’তি এত্তাৰতা পরিতোসং কত্ৰা সুত্তপ্পমত্তেন ৰিহরিতুং ন যুত্তং, অথ খো সব্বইরিযাপথেসু ইদং ৰীরিযমারভিতব্বন্তি দস্সেতুং তদনন্তরং সম্মাৰাযামো ৰুত্তো।

    Evaṃ suddhājīvena ‘‘parisuddho me ājīvo’’ti ettāvatā paritosaṃ katvā suttappamattena viharituṃ na yuttaṃ, atha kho sabbairiyāpathesu idaṃ vīriyamārabhitabbanti dassetuṃ tadanantaraṃ sammāvāyāmo vutto.

    ততো আরদ্ধৰীরিযেনাপি কাযাদীসু চতূসু ৰত্থূসু সতি সূপট্ঠিতা কাতব্বাতি দস্সনত্থং তদনন্তরং সম্মাসতি দেসিতা।

    Tato āraddhavīriyenāpi kāyādīsu catūsu vatthūsu sati sūpaṭṭhitā kātabbāti dassanatthaṃ tadanantaraṃ sammāsati desitā.

    যস্মা পন এৰং সূপট্ঠিতা সতি সমাধিস্স উপকারানুপকারানং ধম্মানং গতিযো সমন্ৰেসিত্ৰা পহোতি একত্তারম্মণে চিত্তং সমাধেতুং, তস্মা সম্মাসতিযা অনন্তরং সম্মাসমাধি দেসিতোতি ৰেদিতব্বো। ইতি অযম্পি অট্ঠঙ্গিকো মগ্গো লোকিযলোকুত্তরমিস্সকোৰ কথিতো।

    Yasmā pana evaṃ sūpaṭṭhitā sati samādhissa upakārānupakārānaṃ dhammānaṃ gatiyo samanvesitvā pahoti ekattārammaṇe cittaṃ samādhetuṃ, tasmā sammāsatiyā anantaraṃ sammāsamādhi desitoti veditabbo. Iti ayampi aṭṭhaṅgiko maggo lokiyalokuttaramissakova kathito.

    ৪২৭. অজ্ঝত্তং রূপসঞ্ঞীতিআদীসু অজ্ঝত্তরূপে পরিকম্মৰসেন অজ্ঝত্তং রূপসঞ্ঞী নাম হোতি। অজ্ঝত্তঞ্হি নীলপরিকম্মং করোন্তো কেসে ৰা পিত্তে ৰা অক্খিতারকায ৰা করোতি, পীতপরিকম্মং করোন্তো মেদে ৰা ছৰিযা ৰা হত্থপাদতলেসু ৰা অক্খীনং পীতকট্ঠানে ৰা করোতি, লোহিতপরিকম্মং করোন্তো মংসে ৰা লোহিতে ৰা জিৰ্হায ৰা অক্খীনং রত্তট্ঠানে ৰা করোতি, ওদাতপরিকম্মং করোন্তো অট্ঠিম্হি ৰা দন্তে ৰা নখে ৰা অক্খীনং সেতট্ঠানে ৰা করোতি। তং পন সুনীলং সুপীতং সুলোহিতকং সুওদাতকং ন হোতি, অৰিসুদ্ধমেৰ হোতি।

    427.Ajjhattaṃ rūpasaññītiādīsu ajjhattarūpe parikammavasena ajjhattaṃ rūpasaññī nāma hoti. Ajjhattañhi nīlaparikammaṃ karonto kese vā pitte vā akkhitārakāya vā karoti, pītaparikammaṃ karonto mede vā chaviyā vā hatthapādatalesu vā akkhīnaṃ pītakaṭṭhāne vā karoti, lohitaparikammaṃ karonto maṃse vā lohite vā jivhāya vā akkhīnaṃ rattaṭṭhāne vā karoti, odātaparikammaṃ karonto aṭṭhimhi vā dante vā nakhe vā akkhīnaṃ setaṭṭhāne vā karoti. Taṃ pana sunīlaṃ supītaṃ sulohitakaṃ suodātakaṃ na hoti, avisuddhameva hoti.

    একো বহিদ্ধা রূপানি পস্সতীতি যস্সেৰং পরিকম্মং অজ্ঝত্তং উপ্পন্নং হোতি, নিমিত্তং পন বহিদ্ধা। সো এৰং অজ্ঝত্তং পরিকম্মস্স বহিদ্ধা চ অপ্পনায ৰসেন ‘‘অজ্ঝত্তং রূপসঞ্ঞী একো বহিদ্ধা রূপানি পস্সতী’’তি ৰুচ্চতি। পরিত্তানীতি অৰড্ঢিতানি। সুৰণ্ণদুব্বণ্ণানীতি সুৰণ্ণানি ৰা হোন্তি দুব্বণ্ণানি ৰা, পরিত্তৰসেনেৰ ইদং অভিভাযতনং ৰুত্তন্তি ৰেদিতব্বং। তানি অভিভুয্যাতি যথা নাম সম্পন্নগহণিকো কটচ্ছুমত্তং ভত্তং লভিত্ৰা ‘‘কিং এত্থ ভুঞ্জিতব্বং অত্থী’’তি সঙ্কড্ঢিত্ৰা এককবলমেৰ করোতি, এৰমেৰ ঞাণুত্তরিকো পুগ্গলো ৰিসদঞাণো ‘‘কিং এত্থ পরিত্তকে আরম্মণে সমাপজ্জিতব্বং অত্থি, নাযং মম ভারো’’তি তানি রূপানি অভিভৰিত্ৰা সমাপজ্জতি, সহ নিমিত্তুপ্পাদেনেৰেত্থ অপ্পনং পাপেতীতি অত্থো। জানামি পস্সামীতি ইমিনা পনস্স আভোগো কথিতো। সো চ খো সমাপত্তিতো ৰুট্ঠিতস্স, ন অন্তোসমাপত্তিযং। এৰংসঞ্ঞী হোতীতি আভোগসঞ্ঞাযপি ঝানসঞ্ঞাযপি এৰংসঞ্ঞী হোতি। অভিভৰসঞ্ঞা হিস্স অন্তোসমাপত্তিযম্পি অত্থি, আভোগসঞ্ঞা পন সমাপত্তিতো ৰুট্ঠিতস্সেৰ।

    Ekobahiddhā rūpāni passatīti yassevaṃ parikammaṃ ajjhattaṃ uppannaṃ hoti, nimittaṃ pana bahiddhā. So evaṃ ajjhattaṃ parikammassa bahiddhā ca appanāya vasena ‘‘ajjhattaṃ rūpasaññī eko bahiddhā rūpāni passatī’’ti vuccati. Parittānīti avaḍḍhitāni. Suvaṇṇadubbaṇṇānīti suvaṇṇāni vā honti dubbaṇṇāni vā, parittavaseneva idaṃ abhibhāyatanaṃ vuttanti veditabbaṃ. Tāni abhibhuyyāti yathā nāma sampannagahaṇiko kaṭacchumattaṃ bhattaṃ labhitvā ‘‘kiṃ ettha bhuñjitabbaṃ atthī’’ti saṅkaḍḍhitvā ekakabalameva karoti, evameva ñāṇuttariko puggalo visadañāṇo ‘‘kiṃ ettha parittake ārammaṇe samāpajjitabbaṃ atthi, nāyaṃ mama bhāro’’ti tāni rūpāni abhibhavitvā samāpajjati, saha nimittuppādenevettha appanaṃ pāpetīti attho. Jānāmipassāmīti iminā panassa ābhogo kathito. So ca kho samāpattito vuṭṭhitassa, na antosamāpattiyaṃ. Evaṃsaññī hotīti ābhogasaññāyapi jhānasaññāyapi evaṃsaññī hoti. Abhibhavasaññā hissa antosamāpattiyampi atthi, ābhogasaññā pana samāpattito vuṭṭhitasseva.

    অপ্পমাণানীতি ৰড্ঢিতপ্পমাণানি, মহন্তানীতি অত্থো। অভিভুয্যাতি এত্থ পন যথা মহগ্ঘসো পুরিসো একং ভত্তৰড্ঢিতকং লভিত্ৰা ‘‘অঞ্ঞম্পি হোতু, কিং এতং ময্হং করিস্সতী’’তি তং ন মহন্ততো পস্সতি, এৰমেৰ ঞাণুত্তরো পুগ্গলো ৰিসদঞাণো ‘‘কিং এত্থ সমাপজ্জিতব্বং , নযিদং অপ্পমাণং, ন ময্হং চিত্তেকগ্গতাকরণে ভারো অত্থী’’তি তানি অভিভৰিত্ৰা সমাপজ্জতি, সহ নিমিত্তুপ্পাদেনেৰেত্থ অপ্পনং পাপেতীতি অত্থো।

    Appamāṇānīti vaḍḍhitappamāṇāni, mahantānīti attho. Abhibhuyyāti ettha pana yathā mahagghaso puriso ekaṃ bhattavaḍḍhitakaṃ labhitvā ‘‘aññampi hotu, kiṃ etaṃ mayhaṃ karissatī’’ti taṃ na mahantato passati, evameva ñāṇuttaro puggalo visadañāṇo ‘‘kiṃ ettha samāpajjitabbaṃ , nayidaṃ appamāṇaṃ, na mayhaṃ cittekaggatākaraṇe bhāro atthī’’ti tāni abhibhavitvā samāpajjati, saha nimittuppādenevettha appanaṃ pāpetīti attho.

    অজ্ঝত্তং অরূপসঞ্ঞীতি অলাভিতায ৰা অনত্থিকতায ৰা অজ্ঝত্তরূপে পরিকম্মসঞ্ঞাৰিরহিতো।

    Ajjhattaṃ arūpasaññīti alābhitāya vā anatthikatāya vā ajjhattarūpe parikammasaññāvirahito.

    বহিদ্ধা রূপানি পস্সতীতি যস্স পরিকম্মম্পি নিমিত্তম্পি বহিদ্ধাৰ উপ্পন্নং, সো এৰং বহিদ্ধা পরিকম্মস্স চেৰ অপ্পনায চ ৰসেন ‘‘অজ্ঝত্তং অরূপসঞ্ঞী একোৰ বহিদ্ধা রূপানি পস্সতী’’তি ৰুচ্চতি। সেসমেত্থ চতুত্থঅভিভাযতনে ৰুত্তনযমেৰ। ইমেসু পন চতূসু পরিত্তং ৰিতক্কচরিতৰসেন আগতং, অপ্পমাণং মোহচরিতৰসেন, সুৰণ্ণং দোসচরিতৰসেন, দুব্বণ্ণং রাগচরিতৰসেন । এতেসঞ্হি এতানি সপ্পাযানি, সা চ নেসং সপ্পাযতা ৰিত্থারতো ৰিসুদ্ধিমগ্গে চরিযনিদ্দেসে ৰুত্তা।

    Bahiddhā rūpāni passatīti yassa parikammampi nimittampi bahiddhāva uppannaṃ, so evaṃ bahiddhā parikammassa ceva appanāya ca vasena ‘‘ajjhattaṃ arūpasaññī ekova bahiddhā rūpāni passatī’’ti vuccati. Sesamettha catutthaabhibhāyatane vuttanayameva. Imesu pana catūsu parittaṃ vitakkacaritavasena āgataṃ, appamāṇaṃ mohacaritavasena, suvaṇṇaṃ dosacaritavasena, dubbaṇṇaṃ rāgacaritavasena . Etesañhi etāni sappāyāni, sā ca nesaṃ sappāyatā vitthārato visuddhimagge cariyaniddese vuttā.

    পঞ্চমঅভিভাযতনাদীসু নীলানীতি সব্বসঙ্গাহকৰসেন ৰুত্তং। নীলৰণ্ণানীতি ৰণ্ণৰসেন। নীলনিদস্সনানীতি নিদস্সনৰসেন, অপঞ্ঞাযমানৰিৰরানি অসম্ভিন্নৰণ্ণানি একনীলানেৰ হুত্ৰা দিস্সন্তীতি ৰুত্তং হোতি। নীলনিভাসানীতি ইদং পন ওভাসৰসেন ৰুত্তং, নীলোভাসানি নীলপ্পভাযুত্তানীতি অত্থো। এতেন নেসং সুৰিসুদ্ধতং দস্সেতি। ৰিসুদ্ধৰণ্ণৰসেনেৰ হি ইমানি চত্তারি অভিভাযতনানি ৰুত্তানি। ‘‘নীলকসিণং গণ্হন্তো নীলস্মিং নিমিত্তং গণ্হাতি পুপ্ফস্মিং ৰা ৰত্থস্মিং ৰা ৰণ্ণধাতুযা ৰা’’তিআদিকং পনেত্থ কসিণকরণঞ্চ পরিকম্মঞ্চ অপ্পনাৰিধানঞ্চ সব্বং ৰিসুদ্ধিমগ্গে ৰিত্থারতো ৰুত্তমেৰ। ইমানি পন অট্ঠ অভিভাযতনজ্ঝানানি ৰট্টানিপি হোন্তি ৰট্টপাদকানিপি ৰিপস্সনাপাদকানিপি দিট্ঠধম্মসুখৰিহারানিপি অভিঞ্ঞাপাদকানিপি নিরোধপাদকানিপি, লোকিযানেৰ পন ন লোকুত্তরানীতি ৰেদিতব্বানি।

    Pañcamaabhibhāyatanādīsu nīlānīti sabbasaṅgāhakavasena vuttaṃ. Nīlavaṇṇānīti vaṇṇavasena. Nīlanidassanānīti nidassanavasena, apaññāyamānavivarāni asambhinnavaṇṇāni ekanīlāneva hutvā dissantīti vuttaṃ hoti. Nīlanibhāsānīti idaṃ pana obhāsavasena vuttaṃ, nīlobhāsāni nīlappabhāyuttānīti attho. Etena nesaṃ suvisuddhataṃ dasseti. Visuddhavaṇṇavaseneva hi imāni cattāri abhibhāyatanāni vuttāni. ‘‘Nīlakasiṇaṃ gaṇhanto nīlasmiṃ nimittaṃ gaṇhāti pupphasmiṃ vā vatthasmiṃ vā vaṇṇadhātuyā vā’’tiādikaṃ panettha kasiṇakaraṇañca parikammañca appanāvidhānañca sabbaṃ visuddhimagge vitthārato vuttameva. Imāni pana aṭṭha abhibhāyatanajjhānāni vaṭṭānipi honti vaṭṭapādakānipi vipassanāpādakānipi diṭṭhadhammasukhavihārānipi abhiññāpādakānipi nirodhapādakānipi, lokiyāneva pana na lokuttarānīti veditabbāni.

    ৪৩৫. রূপী রূপানি পস্সতীতি এত্থ অজ্ঝত্তং কেসাদীসু নীলকসিণাদীসু নীলকসিণাদিৰসেন উপ্পাদিতং রূপজ্ঝানং রূপং, তং অস্স অত্থীতি রূপী। বহিদ্ধা রূপানি পস্সতীতি বহিদ্ধাপি নীলকসিণাদীনি রূপানি ঝানচক্খুনা পস্সতি। ইমিনা অজ্ঝত্তবহিদ্ধাৰত্থুকেসু কসিণেসু উপ্পাদিতজ্ঝানস্স পুগ্গলস্স চত্তারিপি রূপাৰচরজ্ঝানানি দস্সিতানি । অজ্ঝত্তং অরূপসঞ্ঞীতি অজ্ঝত্তং ন রূপসঞ্ঞী, অত্তনো কেসাদীসু অনুপ্পাদিতরূপাৰচরজ্ঝানোতি অত্থো। ইমিনা বহিদ্ধাপরিকম্মং কত্ৰা বহিদ্ধাৰ উপ্পাদিতজ্ঝানস্স পুগ্গলস্স রূপাৰচরজ্ঝানানি দস্সিতানি।

    435.Rūpī rūpāni passatīti ettha ajjhattaṃ kesādīsu nīlakasiṇādīsu nīlakasiṇādivasena uppāditaṃ rūpajjhānaṃ rūpaṃ, taṃ assa atthīti rūpī. Bahiddhā rūpāni passatīti bahiddhāpi nīlakasiṇādīni rūpāni jhānacakkhunā passati. Iminā ajjhattabahiddhāvatthukesu kasiṇesu uppāditajjhānassa puggalassa cattāripi rūpāvacarajjhānāni dassitāni . Ajjhattaṃ arūpasaññīti ajjhattaṃ na rūpasaññī, attano kesādīsu anuppāditarūpāvacarajjhānoti attho. Iminā bahiddhāparikammaṃ katvā bahiddhāva uppāditajjhānassa puggalassa rūpāvacarajjhānāni dassitāni.

    সুভন্ত্ৰেৰ অধিমুত্তো হোতীতি ইমিনা সুৰিসুদ্ধেসু নীলাদীসু ৰণ্ণকসিণেসু ঝানানি দস্সিতানি। তত্থ কিঞ্চাপি অন্তোঅপ্পনাযং সুভন্তি আভোগো নত্থি, যো পন ৰিসুদ্ধং সুভং কসিণারম্মণং কত্ৰা ৰিহরতি, সো যস্মা ‘‘সুভন্তি অধিমুত্তো হোতী’’তি ৰত্তব্বতং আপজ্জতি, তস্মা এৰং দেসনা কতা। পটিসম্ভিদামগ্গে পন ‘‘কথং সুভন্ত্ৰেৰ অধিমুত্তো হোতীতি ৰিমোক্খো – ইধ ভিক্খু মেত্তাসহগতেন চেতসা একং দিসং ফরিত্ৰা ৰিহরতি…পে॰… মেত্তায ভাৰিতত্তা সত্তা অপ্পটিক্কূলা হোন্তি। করুণাসহগতেন…পে॰… মুদিতাসহগতেন…পে॰… উপেক্খাসহগতেন চেতসা একং দিসং ফরিত্ৰা ৰিহরতি…পে॰… উপেক্খায ভাৰিতত্তা সত্তা অপ্পটিক্কূলা হোন্তি। এৰং সুভন্ত্ৰেৰ অধিমুত্তো হোতীতি ৰিমোক্খো’’তি (পটি॰ ম॰ ১.২১২) ৰুত্তং। সব্বসো রূপসঞ্ঞানন্তিআদীসু যং ৰত্তব্বং, তং সব্বং ৰিসুদ্ধিমগ্গে ৰুত্তমেৰ।

    Subhantvevaadhimutto hotīti iminā suvisuddhesu nīlādīsu vaṇṇakasiṇesu jhānāni dassitāni. Tattha kiñcāpi antoappanāyaṃ subhanti ābhogo natthi, yo pana visuddhaṃ subhaṃ kasiṇārammaṇaṃ katvā viharati, so yasmā ‘‘subhanti adhimutto hotī’’ti vattabbataṃ āpajjati, tasmā evaṃ desanā katā. Paṭisambhidāmagge pana ‘‘kathaṃ subhantveva adhimutto hotīti vimokkho – idha bhikkhu mettāsahagatena cetasā ekaṃ disaṃ pharitvā viharati…pe… mettāya bhāvitattā sattā appaṭikkūlā honti. Karuṇāsahagatena…pe… muditāsahagatena…pe… upekkhāsahagatena cetasā ekaṃ disaṃ pharitvā viharati…pe… upekkhāya bhāvitattā sattā appaṭikkūlā honti. Evaṃ subhantveva adhimutto hotīti vimokkho’’ti (paṭi. ma. 1.212) vuttaṃ. Sabbaso rūpasaññānantiādīsu yaṃ vattabbaṃ, taṃ sabbaṃ visuddhimagge vuttameva.

    ৪৪৩. পথৰিকসিণং ভাৰেতীতি এত্থ পন সকলট্ঠেন কসিণং, পথৰি এৰ কসিণং পথৰিকসিণং। পরিকম্মপথৰিযাপি উগ্গহনিমিত্তস্সাপি পটিভাগনিমিত্তস্সাপি তং নিমিত্তং আরম্মণং কত্ৰা উপ্পন্নজ্ঝানস্সাপি এতং অধিৰচনং। ইধ পন পথৰিকসিণারম্মণং ঝানং অধিপ্পেতং। তং হেস ভাৰেতি। আপোকসিণাদীসুপি এসেৰ নযো।

    443.Pathavikasiṇaṃ bhāvetīti ettha pana sakalaṭṭhena kasiṇaṃ, pathavi eva kasiṇaṃ pathavikasiṇaṃ. Parikammapathaviyāpi uggahanimittassāpi paṭibhāganimittassāpi taṃ nimittaṃ ārammaṇaṃ katvā uppannajjhānassāpi etaṃ adhivacanaṃ. Idha pana pathavikasiṇārammaṇaṃ jhānaṃ adhippetaṃ. Taṃ hesa bhāveti. Āpokasiṇādīsupi eseva nayo.

    ইমানি পন কসিণানি ভাৰেন্তেন সীলানি সোধেত্ৰা পরিসুদ্ধসীলে পতিট্ঠিতেন য্ৰাস্স দসসু পলিবোধেসু পলিবোধো অত্থি, তং উপচ্ছিন্দিত্ৰা কম্মট্ঠানদাযকং কল্যাণমিত্তং উপসঙ্কমিত্ৰা অত্তনো চরিযানুকূলৰসেন যং যস্স সপ্পাযং, তং তেন গহেত্ৰা কসিণভাৰনায অননুরূপং ৰিহারং পহায অনুরূপে ৰিহরন্তেন খুদ্দকপলিবোধুপচ্ছেদং কত্ৰা সব্বং ভাৰনাৰিধানং অপরিহাপেন্তেন ভাৰেতব্বানি। অযমেত্থ সঙ্খেপো, ৰিত্থারো পন ৰিসুদ্ধিমগ্গে (ৰিসুদ্ধি॰ ১.৩৮ আদযো) ৰুত্তো। কেৰলঞ্হি তত্থ ৰিঞ্ঞাণকসিণং নাগতং, তং অত্থতো আকাসকসিণে পৰত্তৰিঞ্ঞাণং। তঞ্চ খো আরম্মণৰসেন ৰুত্তং, ন সমাপত্তিৰসেন। তঞ্হি অনন্তং ৰিঞ্ঞাণন্তি আরম্মণং কত্ৰা এস ৰিঞ্ঞাণঞ্চাযতনসমাপত্তিং ভাৰেন্তো ৰিঞ্ঞাণকসিণং ভাৰেতীতি ৰুচ্চতি। ইমানিপি দস কসিণানি ৰট্টানিপি হোন্তি ৰট্টপাদকানিপি ৰিপস্সনাপাদকানিপি দিট্ঠধম্মসুখৰিহারত্থানিপি অভিঞ্ঞাপাদকানিপি নিরোধপাদকানিপি, লোকিযানেৰ পন ন লোকুত্তরানীতি।

    Imāni pana kasiṇāni bhāventena sīlāni sodhetvā parisuddhasīle patiṭṭhitena yvāssa dasasu palibodhesu palibodho atthi, taṃ upacchinditvā kammaṭṭhānadāyakaṃ kalyāṇamittaṃ upasaṅkamitvā attano cariyānukūlavasena yaṃ yassa sappāyaṃ, taṃ tena gahetvā kasiṇabhāvanāya ananurūpaṃ vihāraṃ pahāya anurūpe viharantena khuddakapalibodhupacchedaṃ katvā sabbaṃ bhāvanāvidhānaṃ aparihāpentena bhāvetabbāni. Ayamettha saṅkhepo, vitthāro pana visuddhimagge (visuddhi. 1.38 ādayo) vutto. Kevalañhi tattha viññāṇakasiṇaṃ nāgataṃ, taṃ atthato ākāsakasiṇe pavattaviññāṇaṃ. Tañca kho ārammaṇavasena vuttaṃ, na samāpattivasena. Tañhi anantaṃ viññāṇanti ārammaṇaṃ katvā esa viññāṇañcāyatanasamāpattiṃ bhāvento viññāṇakasiṇaṃ bhāvetīti vuccati. Imānipi dasa kasiṇāni vaṭṭānipi honti vaṭṭapādakānipi vipassanāpādakānipi diṭṭhadhammasukhavihāratthānipi abhiññāpādakānipi nirodhapādakānipi, lokiyāneva pana na lokuttarānīti.

    ৪৫৩. অসুভসঞ্ঞং ভাৰেতীতি অসুভসঞ্ঞা ৰুচ্চতি উদ্ধুমাতকাদীসু দসসু আরম্মণেসু উপ্পন্না পঠমজ্ঝানসহগতা সঞ্ঞা, তং ভাৰেতি ব্রূহেতি ৰড্ঢেতি, অনুপ্পন্নং উপ্পাদেতি, উপ্পন্নং অনুরক্খতীতি অত্থো। দসন্নং পন অসুভানং ভাৰনানযো সব্বো ৰিসুদ্ধিমগ্গে (ৰিসুদ্ধি॰ ১.১০২ আদযো) ৰিত্থারিতোযেৰ । মরণসঞ্ঞং ভাৰেতীতি সম্মুতিমরণং, খণিকমরণং, সমুচ্ছেদমরণন্তি তিৰিধম্পি মরণং আরম্মণং কত্ৰা উপ্পজ্জনকসঞ্ঞং ভাৰেতি, অনুপ্পন্নং উপ্পাদেতি, উপ্পন্নং অনুরক্খতীতি অত্থো। হেট্ঠা ৰুত্তলক্খণা ৰা মরণস্সতিযেৰ ইধ মরণসঞ্ঞাতি ৰুত্তা, তং ভাৰেতি উপ্পাদেতি ৰড্ঢেতীতি অত্থো। ভাৰনানযো পনস্সা ৰিসুদ্ধিমগ্গে (ৰিসুদ্ধি॰ ১.১৬৭ আদযো) ৰিত্থারিতোযেৰ। আহারে পটিকূলসঞ্ঞং ভাৰেতীতি অসিতপীতাদিভেদে কবল়ীকারে আহারে গমনপটিকূলাদীনি নৰ পটিকূলানি পচ্চৰেক্খন্তস্স উপ্পজ্জনকসঞ্ঞং ভাৰেতি, উপ্পাদেতি ৰড্ঢেতীতি অত্থো। তস্সাপি ভাৰনানযো ৰিসুদ্ধিমগ্গে ৰিত্থারিতোযেৰ। সব্বলোকে অনভিরতিসঞ্ঞং ভাৰেতীতি সব্বস্মিম্পি তেধাতুকে লোকে অনভিরতিসঞ্ঞং উক্কণ্ঠিতসঞ্ঞং ভাৰেতীতি অত্থো। অনিচ্চসঞ্ঞং ভাৰেতীতি পঞ্চন্নং উপাদানক্খন্ধানং উদযব্বযঞ্ঞথত্তপরিগ্গাহিকং পঞ্চসু খন্ধেসু অনিচ্চন্তি উপ্পজ্জনকসঞ্ঞং ভাৰেতি। অনিচ্চে দুক্খসঞ্ঞং ভাৰেতীতি অনিচ্চে খন্ধপঞ্চকে পটিপীল়নসঙ্খাতদুক্খলক্খণপরিগ্গাহিকং দুক্খন্তি উপ্পজ্জনকসঞ্ঞং ভাৰেতি। দুক্খে অনত্তসঞ্ঞং ভাৰেতীতি পটিপীল়নট্ঠেন দুক্খে খন্ধপঞ্চকে অৰসৰত্তনাকারসঙ্খাতঅনত্তলক্খণপরিগ্গাহিকং অনত্তাতি উপ্পজ্জনকসঞ্ঞং ভাৰেতি। পহানসঞ্ঞং ভাৰেতীতি পঞ্চৰিধং পহানং আরম্মণং কত্ৰা উপ্পজ্জনকসঞ্ঞং ভাৰেতি। ৰিরাগসঞ্ঞং ভাৰেতীতি পঞ্চৰিধমেৰ ৰিরাগং আরম্মণং কত্ৰা উপ্পজ্জনকসঞ্ঞং ভাৰেতি। নিরোধসঞ্ঞং ভাৰেতীতি সঙ্খারনিরোধং আরম্মণং কত্ৰা উপ্পজ্জনকসঞ্ঞং ভাৰেতি। নিব্বানং আরম্মণং কত্ৰা উপ্পজ্জনকসঞ্ঞন্তিপি ৰদন্তি। এত্থ চ সব্বলোকে অনভিরতসঞ্ঞা, অনিচ্চসঞ্ঞা, অনিচ্চে দুক্খসঞ্ঞাতি ইমাহি তীহি সঞ্ঞাহি বলৰৰিপস্সনা কথিতা। পুন অনিচ্চসঞ্ঞং ভাৰেতীতিআদিকাহি দসহি সঞ্ঞাহি ৰিপস্সনাসমারম্ভোৰ কথিতো।

    453.Asubhasaññaṃ bhāvetīti asubhasaññā vuccati uddhumātakādīsu dasasu ārammaṇesu uppannā paṭhamajjhānasahagatā saññā, taṃ bhāveti brūheti vaḍḍheti, anuppannaṃ uppādeti, uppannaṃ anurakkhatīti attho. Dasannaṃ pana asubhānaṃ bhāvanānayo sabbo visuddhimagge (visuddhi. 1.102 ādayo) vitthāritoyeva . Maraṇasaññaṃ bhāvetīti sammutimaraṇaṃ, khaṇikamaraṇaṃ, samucchedamaraṇanti tividhampi maraṇaṃ ārammaṇaṃ katvā uppajjanakasaññaṃ bhāveti, anuppannaṃ uppādeti, uppannaṃ anurakkhatīti attho. Heṭṭhā vuttalakkhaṇā vā maraṇassatiyeva idha maraṇasaññāti vuttā, taṃ bhāveti uppādeti vaḍḍhetīti attho. Bhāvanānayo panassā visuddhimagge (visuddhi. 1.167 ādayo) vitthāritoyeva. Āhāre paṭikūlasaññaṃ bhāvetīti asitapītādibhede kabaḷīkāre āhāre gamanapaṭikūlādīni nava paṭikūlāni paccavekkhantassa uppajjanakasaññaṃ bhāveti, uppādeti vaḍḍhetīti attho. Tassāpi bhāvanānayo visuddhimagge vitthāritoyeva. Sabbaloke anabhiratisaññaṃ bhāvetīti sabbasmimpi tedhātuke loke anabhiratisaññaṃ ukkaṇṭhitasaññaṃ bhāvetīti attho. Aniccasaññaṃbhāvetīti pañcannaṃ upādānakkhandhānaṃ udayabbayaññathattapariggāhikaṃ pañcasu khandhesu aniccanti uppajjanakasaññaṃ bhāveti. Anicce dukkhasaññaṃ bhāvetīti anicce khandhapañcake paṭipīḷanasaṅkhātadukkhalakkhaṇapariggāhikaṃ dukkhanti uppajjanakasaññaṃ bhāveti. Dukkhe anattasaññaṃ bhāvetīti paṭipīḷanaṭṭhena dukkhe khandhapañcake avasavattanākārasaṅkhātaanattalakkhaṇapariggāhikaṃ anattāti uppajjanakasaññaṃ bhāveti. Pahānasaññaṃ bhāvetīti pañcavidhaṃ pahānaṃ ārammaṇaṃ katvā uppajjanakasaññaṃ bhāveti. Virāgasaññaṃ bhāvetīti pañcavidhameva virāgaṃ ārammaṇaṃ katvā uppajjanakasaññaṃ bhāveti. Nirodhasaññaṃ bhāvetīti saṅkhāranirodhaṃ ārammaṇaṃ katvā uppajjanakasaññaṃ bhāveti. Nibbānaṃ ārammaṇaṃ katvā uppajjanakasaññantipi vadanti. Ettha ca sabbaloke anabhiratasaññā, aniccasaññā, anicce dukkhasaññāti imāhi tīhi saññāhi balavavipassanā kathitā. Puna aniccasaññaṃ bhāvetītiādikāhi dasahi saññāhi vipassanāsamārambhova kathito.

    ৪৭৩. বুদ্ধানুস্সতিন্তিআদীনি ৰুত্তত্থানেৰ।

    473.Buddhānussatintiādīni vuttatthāneva.

    ৪৮৩. পঠমজ্ঝানসহগতন্তি পঠমজ্ঝানেন সদ্ধিং গতং পৰত্তং, পঠমজ্ঝানসম্পযুত্তন্তি অত্থো। সদ্ধিন্দ্রিযং ভাৰেতীতি পঠমজ্ঝানসহগতং কত্ৰা সদ্ধিন্দ্রিযং ভাৰেতি ব্রূহেতি ৰড্ঢেতি। এস নযো সব্বত্থ।

    483.Paṭhamajjhānasahagatanti paṭhamajjhānena saddhiṃ gataṃ pavattaṃ, paṭhamajjhānasampayuttanti attho. Saddhindriyaṃ bhāvetīti paṭhamajjhānasahagataṃ katvā saddhindriyaṃ bhāveti brūheti vaḍḍheti. Esa nayo sabbattha.

    অপরঅচ্ছরাসঙ্ঘাতৰগ্গৰণ্ণনা।

    Aparaaccharāsaṅghātavaggavaṇṇanā.




    Next: ১৯. কাযগতাসতিৰগ্গৰণ্ণনা • 19. Kāyagatāsativaggavaṇṇanā




    Related texts:



    তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ১৮. অপরঅচ্ছরাসঙ্ঘাতৰগ্গো • 18. Aparaaccharāsaṅghātavaggo

    টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১৮. অপরঅচ্ছরাসঙ্ঘাতৰগ্গৰণ্ণনা • 18. Aparaaccharāsaṅghātavaggavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact