| Library / Tipiṭaka / ਤਿਪਿਟਕ • Tipiṭaka / ਉਦਾਨ-ਅਟ੍ਠਕਥਾ • Udāna-aṭṭhakathā |
੫. ਅਪਰਲਕੁਣ੍ਡਕਭਦ੍ਦਿਯਸੁਤ੍ਤવਣ੍ਣਨਾ
5. Aparalakuṇḍakabhaddiyasuttavaṇṇanā
੬੫. ਪਞ੍ਚਮੇ ਸਮ੍ਬਹੁਲਾਨਂ ਭਿਕ੍ਖੂਨਂ ਪਿਟ੍ਠਿਤੋ ਪਿਟ੍ਠਿਤੋਤਿ ਆਯਸ੍ਮਾ ਲਕੁਣ੍ਡਕਭਦ੍ਦਿਯੋ ਏਕਦਿવਸਂ ਸਮ੍ਬਹੁਲੇਹਿ ਭਿਕ੍ਖੂਹਿ ਸਦ੍ਧਿਂ ਗਾਮਨ੍ਤਰੇਨ ਪਿਣ੍ਡਾਯ ਚਰਿਤ੍વਾ ਕਤਭਤ੍ਤਕਿਚ੍ਚੋ ਪਤ੍ਤਂ વੋਦਕਂ ਕਤ੍વਾ ਥવਿਕਾਯ ਪਕ੍ਖਿਪਿਤ੍વਾ ਅਂਸੇ ਲਗ੍ਗੇਤ੍વਾ ਚੀવਰਂ ਸਙ੍ਘਰਿਤ੍વਾ ਤਮ੍ਪਿ વਾਮਂਸੇ ਠਪੇਤ੍વਾ ਪਾਸਾਦਿਕੇਨ ਅਭਿਕ੍ਕਨ੍ਤੇਨ ਪਟਿਕ੍ਕਨ੍ਤੇਨ ਆਲੋਕਿਤੇਨ વਿਲੋਕਿਤੇਨ ਸਮਿਞ੍ਜਿਤੇਨ ਪਸਾਰਿਤੇਨ ਓਕ੍ਖਿਤ੍ਤਚਕ੍ਖੁ ਇਰਿਯਾਪਥਸਮ੍ਪਨ੍ਨੋ ਅਤ੍ਤਨੋ ਸਤਿਪਞ੍ਞਾવੇਪੁਲ੍ਲਂ ਪਕਾਸੇਨ੍ਤੋ વਿਯ ਸਤਿਸਮ੍ਪਜਞ੍ਞਂ ਸੂਪਟ੍ਠਿਤਂ ਕਤ੍વਾ ਸਮਾਹਿਤੇਨ ਚਿਤ੍ਤੇਨ ਪਦੇ ਪਦਂ ਨਿਕ੍ਖਿਪਨ੍ਤੋ ਗਚ੍ਛਤਿ, ਗਚ੍ਛਨ੍ਤੋ ਚ ਭਿਕ੍ਖੂਨਂ ਪਚ੍ਛਤੋ ਪਚ੍ਛਤੋ ਗਚ੍ਛਤਿ ਤੇਹਿ ਭਿਕ੍ਖੂਹਿ ਅਸਂਮਿਸ੍ਸੋ। ਕਸ੍ਮਾ? ਅਸਂਸਟ੍ਠવਿਹਾਰਿਤਾਯ। ਅਪਿਚ ਤਸ੍ਸਾਯਸ੍ਮਤੋ ਰੂਪਂ ਪਰਿਭੂਤਂ ਪਰਿਭવਟ੍ਠਾਨੀਯਂ ਪੁਥੁਜ੍ਜਨਾ ਓਹੀਲ਼ੇਨ੍ਤਿ। ਥੇਰੋ ਤਂ ਜਾਨਿਤ੍વਾ ਪਿਟ੍ਠਿਤੋ ਪਿਟ੍ਠਿਤੋ ਗਚ੍ਛਤਿ ‘‘ਮਾ ਇਮੇ ਮਂ ਨਿਸ੍ਸਾਯ ਅਪੁਞ੍ਞਂ ਪਸવਿਂਸੂ’’ਤਿ। ਏવਂ ਤੇ ਭਿਕ੍ਖੂ ਚ ਥੇਰੋ ਚ ਸਾવਤ੍ਥਿਂ ਪਤ੍વਾ વਿਹਾਰਂ ਪવਿਸਿਤ੍વਾ ਯੇਨ ਭਗવਾ ਤੇਨੁਪਸਙ੍ਕਮਨ੍ਤਿ। ਤੇਨ વੁਤ੍ਤਂ – ‘‘ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਲਕੁਣ੍ਡਕਭਦ੍ਦਿਯੋ’’ਤਿਆਦਿ।
65. Pañcame sambahulānaṃ bhikkhūnaṃ piṭṭhito piṭṭhitoti āyasmā lakuṇḍakabhaddiyo ekadivasaṃ sambahulehi bhikkhūhi saddhiṃ gāmantarena piṇḍāya caritvā katabhattakicco pattaṃ vodakaṃ katvā thavikāya pakkhipitvā aṃse laggetvā cīvaraṃ saṅgharitvā tampi vāmaṃse ṭhapetvā pāsādikena abhikkantena paṭikkantena ālokitena vilokitena samiñjitena pasāritena okkhittacakkhu iriyāpathasampanno attano satipaññāvepullaṃ pakāsento viya satisampajaññaṃ sūpaṭṭhitaṃ katvā samāhitena cittena pade padaṃ nikkhipanto gacchati, gacchanto ca bhikkhūnaṃ pacchato pacchato gacchati tehi bhikkhūhi asaṃmisso. Kasmā? Asaṃsaṭṭhavihāritāya. Apica tassāyasmato rūpaṃ paribhūtaṃ paribhavaṭṭhānīyaṃ puthujjanā ohīḷenti. Thero taṃ jānitvā piṭṭhito piṭṭhito gacchati ‘‘mā ime maṃ nissāya apuññaṃ pasaviṃsū’’ti. Evaṃ te bhikkhū ca thero ca sāvatthiṃ patvā vihāraṃ pavisitvā yena bhagavā tenupasaṅkamanti. Tena vuttaṃ – ‘‘tena kho pana samayena āyasmā lakuṇḍakabhaddiyo’’tiādi.
ਤਤ੍ਥ ਦੁਬ੍ਬਣ੍ਣਨ੍ਤਿ વਿਰੂਪਂ। ਤੇਨਸ੍ਸ વਣ੍ਣਸਮ੍ਪਤ੍ਤਿਯਾ ਸਣ੍ਠਾਨਸਮ੍ਪਤ੍ਤਿਯਾ ਚ ਅਭਾવਂ ਦਸ੍ਸੇਤਿ। ਦੁਦ੍ਦਸਿਕਨ੍ਤਿ ਅਪਾਸਾਦਿਕਦਸ੍ਸਨਂ। ਤੇਨਸ੍ਸ ਅਨੁਬ੍ਯਞ੍ਜਨਸਮ੍ਪਤ੍ਤਿਯਾ ਆਕਾਰਸਮ੍ਪਤ੍ਤਿਯਾ ਚ ਅਭਾવਂ ਦਸ੍ਸੇਤਿ। ਓਕੋਟਿਮਕਨ੍ਤਿ ਰਸ੍ਸਂ। ਇਮਿਨਾ ਆਰੋਹਸਮ੍ਪਤ੍ਤਿਯਾ ਅਭਾવਂ ਦਸ੍ਸੇਤਿ। ਯੇਭੁਯ੍ਯੇਨ ਭਿਕ੍ਖੂਨਂ ਪਰਿਭੂਤਰੂਪਨ੍ਤਿ ਪੁਥੁਜ੍ਜਨਭਿਕ੍ਖੂਹਿ ਓਹੀਲ਼ਿਤਰੂਪਂ। ਪੁਥੁਜ੍ਜਨਾ ਏਕਚ੍ਚੇ ਛਬ੍ਬਗ੍ਗਿਯਾਦਯੋ ਤਸ੍ਸਾਯਸ੍ਮਤੋ ਗੁਣਂ ਅਜਾਨਨ੍ਤਾ ਹਤ੍ਥਕਣ੍ਣਚੂਲ਼ਿਕਾਦੀਸੁ ਗਣ੍ਹਨ੍ਤਾ ਪਰਾਮਸਨ੍ਤਾ ਕੀਲ਼ਨ੍ਤਾ ਪਰਿਭવਨ੍ਤਿ, ਨ ਅਰਿਯਾ, ਕਲ੍ਯਾਣਪੁਥੁਜ੍ਜਨਾ વਾ।
Tattha dubbaṇṇanti virūpaṃ. Tenassa vaṇṇasampattiyā saṇṭhānasampattiyā ca abhāvaṃ dasseti. Duddasikanti apāsādikadassanaṃ. Tenassa anubyañjanasampattiyā ākārasampattiyā ca abhāvaṃ dasseti. Okoṭimakanti rassaṃ. Iminā ārohasampattiyā abhāvaṃ dasseti. Yebhuyyenabhikkhūnaṃ paribhūtarūpanti puthujjanabhikkhūhi ohīḷitarūpaṃ. Puthujjanā ekacce chabbaggiyādayo tassāyasmato guṇaṃ ajānantā hatthakaṇṇacūḷikādīsu gaṇhantā parāmasantā kīḷantā paribhavanti, na ariyā, kalyāṇaputhujjanā vā.
ਭਿਕ੍ਖੂ ਆਮਨ੍ਤੇਸੀਤਿ ਕਸ੍ਮਾ ਆਮਨ੍ਤੇਸਿ? ਥੇਰਸ੍ਸ ਗੁਣਂ ਪਕਾਸੇਤੁਂ। ਏવਂ ਕਿਰ ਭਗવਤੋ ਅਹੋਸਿ ‘‘ਇਮੇ ਭਿਕ੍ਖੂ ਮਮ ਪੁਤ੍ਤਸ੍ਸ ਮਹਾਨੁਭਾવਤਂ ਨ ਜਾਨਨ੍ਤਿ, ਤੇਨ ਤਂ ਪਰਿਭવਨ੍ਤਿ, ਤਂ ਨੇਸਂ ਦੀਘਰਤ੍ਤਂ ਅਹਿਤਾਯ ਦੁਕ੍ਖਾਯ ਭવਿਸ੍ਸਤਿ, ਹਨ੍ਦਾਹਂ ਇਮਸ੍ਸ ਗੁਣੇ ਭਿਕ੍ਖੂਨਂ ਪਕਾਸੇਤ੍વਾ ਪਰਿਭવਤੋ ਨਂ ਮੋਚੇਸ੍ਸਾਮੀ’’ਤਿ।
Bhikkhū āmantesīti kasmā āmantesi? Therassa guṇaṃ pakāsetuṃ. Evaṃ kira bhagavato ahosi ‘‘ime bhikkhū mama puttassa mahānubhāvataṃ na jānanti, tena taṃ paribhavanti, taṃ nesaṃ dīgharattaṃ ahitāya dukkhāya bhavissati, handāhaṃ imassa guṇe bhikkhūnaṃ pakāsetvā paribhavato naṃ mocessāmī’’ti.
ਪਸ੍ਸਥ ਨੋਤਿ ਪਸ੍ਸਥ ਨੁ। ਨ ਚ ਸਾ ਸਮਾਪਤ੍ਤਿ ਸੁਲਭਰੂਪਾ, ਯਾ ਤੇਨ ਭਿਕ੍ਖੁਨਾ ਅਸਮਾਪਨ੍ਨਪੁਬ੍ਬਾਤਿ ਰੂਪਸਮਾਪਤ੍ਤਿ ਅਰੂਪਸਮਾਪਤ੍ਤਿ ਬ੍ਰਹ੍ਮવਿਹਾਰਸਮਾਪਤ੍ਤਿ ਨਿਰੋਧਸਮਾਪਤ੍ਤਿ ਫਲਸਮਾਪਤ੍ਤੀਤਿ ਏવਂ ਪਭੇਦਾ ਸਾવਕਸਾਧਾਰਣਾ ਯਾ ਕਾਚਿ ਸਮਾਪਤ੍ਤਿਯੋ ਨਾਮ, ਤਾਸੁ ਏਕਾਪਿ ਸਮਾਪਤ੍ਤਿ ਨ ਸੁਲਭਰੂਪਾ, ਦੁਲ੍ਲਭਾ, ਨਤ੍ਥਿਯੇવ ਸਾ ਤੇਨ ਲਕੁਣ੍ਡਕਭਦ੍ਦਿਯੇਨ ਭਿਕ੍ਖੁਨਾ ਅਸਮਾਪਨ੍ਨਪੁਬ੍ਬਾ। ਏਤੇਨਸ੍ਸ ਯਂ વੁਤ੍ਤਂ। ‘‘ਮਹਿਦ੍ਧਿਕੋ ਮਹਾਨੁਭਾવੋ’’ਤਿ, ਤਤ੍ਥ ਮਹਿਦ੍ਧਿਕਤਂ ਪਕਾਸੇਤ੍વਾ ਇਦਾਨਿ ਮਹਾਨੁਭਾવਤਂ ਦਸ੍ਸੇਤੁਂ ‘‘ਯਸ੍ਸ ਚਤ੍ਥਾਯਾ’’ਤਿਆਦਿਮਾਹ। ਤਂ ਹੇਟ੍ਠਾ વੁਤ੍ਤਨਯਮੇવ। ਏਤ੍ਥ ਚ ਭਗવਾ ‘‘ਏਸੋ, ਭਿਕ੍ਖવੇ, ਭਿਕ੍ਖੂ’’ਤਿਆਦਿਨਾ, ‘‘ਭਿਕ੍ਖવੇ, ਅਯਂ ਭਿਕ੍ਖੁ ਨ ਯੋ વਾ ਸੋ વਾ ਦੁਬ੍ਬਣ੍ਣੋ ਦੁਦ੍ਦਸਿਕੋ ਓਕੋਟਿਮਕੋਤਿ ਭਿਕ੍ਖੂਨਂ ਪਿਟ੍ਠਿਤੋ ਪਿਟ੍ਠਿਤੋ ਆਗਚ੍ਛਤੀਤਿ ਚ ਏਤ੍ਤਕੇਨ ਨ ਓਞ੍ਞਾਤਬ੍ਬੋ, ਅਥ ਖੋ ਮਹਿਦ੍ਧਿਕੋ ਮਹਾਨੁਭਾવੋ, ਯਂਕਿਞ੍ਚਿ ਸਾવਕੇਨ ਪਤ੍ਤਬ੍ਬਂ, ਸਬ੍ਬਂ ਤਂ ਤੇਨ ਅਨੁਪ੍ਪਤ੍ਤਂ, ਤਸ੍ਮਾ ਤਂ ਪਾਸਾਣਚ੍ਛਤ੍ਤਂ વਿਯ ਗਰੁਂ ਕਤ੍વਾ ਓਲੋਕੇਥ, ਤਂ વੋ ਦੀਘਰਤ੍ਤਂ ਹਿਤਾਯ ਸੁਖਾਯ ਭવਿਸ੍ਸਤੀ’’ਤਿ ਦਸ੍ਸੇਤਿ।
Passatha noti passatha nu. Na ca sā samāpatti sulabharūpā, yā tena bhikkhunā asamāpannapubbāti rūpasamāpatti arūpasamāpatti brahmavihārasamāpatti nirodhasamāpatti phalasamāpattīti evaṃ pabhedā sāvakasādhāraṇā yā kāci samāpattiyo nāma, tāsu ekāpi samāpatti na sulabharūpā, dullabhā, natthiyeva sā tena lakuṇḍakabhaddiyena bhikkhunā asamāpannapubbā. Etenassa yaṃ vuttaṃ. ‘‘Mahiddhiko mahānubhāvo’’ti, tattha mahiddhikataṃ pakāsetvā idāni mahānubhāvataṃ dassetuṃ ‘‘yassa catthāyā’’tiādimāha. Taṃ heṭṭhā vuttanayameva. Ettha ca bhagavā ‘‘eso, bhikkhave, bhikkhū’’tiādinā, ‘‘bhikkhave, ayaṃ bhikkhu na yo vā so vā dubbaṇṇo duddasiko okoṭimakoti bhikkhūnaṃ piṭṭhito piṭṭhito āgacchatīti ca ettakena na oññātabbo, atha kho mahiddhiko mahānubhāvo, yaṃkiñci sāvakena pattabbaṃ, sabbaṃ taṃ tena anuppattaṃ, tasmā taṃ pāsāṇacchattaṃ viya garuṃ katvā oloketha, taṃ vo dīgharattaṃ hitāya sukhāya bhavissatī’’ti dasseti.
ਏਤਮਤ੍ਥਂ વਿਦਿਤ੍વਾਤਿ ਏਤਂ ਆਯਸ੍ਮਤੋ ਲਕੁਣ੍ਡਕਭਦ੍ਦਿਯਸ੍ਸ ਮਹਿਦ੍ਧਿਕਤਾਮਹਾਨੁਭਾવਤਾਦਿਭੇਦਂ ਗੁਣਰਾਸਿਂ ਸਬ੍ਬਾਕਾਰਤੋ ਜਾਨਿਤ੍વਾ ਤਦਤ੍ਥਦੀਪਨਂ ਇਮਂ ਉਦਾਨਂ ਉਦਾਨੇਸਿ।
Etamatthaṃ viditvāti etaṃ āyasmato lakuṇḍakabhaddiyassa mahiddhikatāmahānubhāvatādibhedaṃ guṇarāsiṃ sabbākārato jānitvā tadatthadīpanaṃ imaṃ udānaṃ udānesi.
ਤਤ੍ਥ ਨੇਲਙ੍ਗੋਤਿ ਏਲਂ વੁਚ੍ਚਤਿ ਦੋਸੋ, ਨਾਸ੍ਸ ਏਲਨ੍ਤਿ ਨੇਲਂ । ਕਿਂ ਪਨ ਤਂ? ਸੁਪਰਿਸੁਦ੍ਧਸੀਲਂ। ਤਞ੍ਹਿ ਨਿਦ੍ਦੋਸਟ੍ਠੇਨ ਇਧ ‘‘ਨੇਲ’’ਨ੍ਤਿ ਅਧਿਪ੍ਪੇਤਂ। ਤਂ ਨੇਲਂ ਪਧਾਨਭੂਤਂ ਅਙ੍ਗਂ ਏਤਸ੍ਸਾਤਿ ਨੇਲਙ੍ਗੋ। ਸੋ ਯਂ ‘‘ਰਥੋ’’ਤਿ વਕ੍ਖਤਿ, ਤੇਨ ਸਮ੍ਬਨ੍ਧੋ, ਤਸ੍ਮਾ ਸੁਪਰਿਸੁਦ੍ਧਸੀਲਙ੍ਗੋਤਿ ਅਤ੍ਥੋ। ਅਰਹਤ੍ਤਫਲਸੀਲਞ੍ਹਿ ਇਧਾਧਿਪ੍ਪੇਤਂ। ਸੇਤੋ ਪਚ੍ਛਾਦੋ ਏਤਸ੍ਸਾਤਿ ਸੇਤਪਚ੍ਛਾਦੋ। ਪਚ੍ਛਾਦੋਤਿ ਰਥਸ੍ਸ ਉਪਰਿ ਅਤ੍ਥਰਿਤਬ੍ਬਕਮ੍ਬਲਾਦਿ। ਸੋ ਪਨ ਸੁਪਰਿਸੁਦ੍ਧਧવਲਭਾવੇਨ ਸੇਤੋ વਾ ਹੋਤਿ ਰਤ੍ਤਨੀਲਾਦੀਸੁ વਾ ਅਞ੍ਞਤਰੋ। ਇਧ ਪਨ ਅਰਹਤ੍ਤਫਲવਿਮੁਤ੍ਤਿਯਾ ਅਧਿਪ੍ਪੇਤਤ੍ਤਾ ਸੁਪਰਿਸੁਦ੍ਧਭਾવਂ ਉਪਾਦਾਯ ‘‘ਸੇਤਪਚ੍ਛਾਦੋ’’ਤਿ વੁਤ੍ਤਂ ਯਥਾ ਅਞ੍ਞਤ੍ਰਾਪਿ ‘‘ਰਥੋ ਸੀਲਪਰਿਕ੍ਖਾਰੋ’’ਤਿ। ਏਕੋ ਸਤਿਸਙ੍ਖਾਤੋ ਅਰੋ ਏਤਸ੍ਸਾਤਿ ਏਕਾਰੋ। વਤ੍ਤਤੀਤਿ ਪવਤ੍ਤਤਿ। ਰਥੋਤਿ ਥੇਰਸ੍ਸ ਅਤ੍ਤਭਾવਂ ਸਨ੍ਧਾਯ વਦਤਿ।
Tattha nelaṅgoti elaṃ vuccati doso, nāssa elanti nelaṃ . Kiṃ pana taṃ? Suparisuddhasīlaṃ. Tañhi niddosaṭṭhena idha ‘‘nela’’nti adhippetaṃ. Taṃ nelaṃ padhānabhūtaṃ aṅgaṃ etassāti nelaṅgo. So yaṃ ‘‘ratho’’ti vakkhati, tena sambandho, tasmā suparisuddhasīlaṅgoti attho. Arahattaphalasīlañhi idhādhippetaṃ. Seto pacchādo etassāti setapacchādo. Pacchādoti rathassa upari attharitabbakambalādi. So pana suparisuddhadhavalabhāvena seto vā hoti rattanīlādīsu vā aññataro. Idha pana arahattaphalavimuttiyā adhippetattā suparisuddhabhāvaṃ upādāya ‘‘setapacchādo’’ti vuttaṃ yathā aññatrāpi ‘‘ratho sīlaparikkhāro’’ti. Eko satisaṅkhāto aro etassāti ekāro. Vattatīti pavattati. Rathoti therassa attabhāvaṃ sandhāya vadati.
ਅਨੀਘਨ੍ਤਿ ਨਿਦ੍ਦੁਕ੍ਖਂ, ਖੋਭવਿਰਹਿਤਂ ਯਾਨਂ વਿਯ ਕਿਲੇਸਪਰਿਖੋਭવਿਰਹਿਤਨ੍ਤਿ ਅਤ੍ਥੋ। ਆਯਨ੍ਤਨ੍ਤਿ ਸਮ੍ਬਹੁਲਾਨਂ ਭਿਕ੍ਖੂਨਂ ਪਿਟ੍ਠਿਤੋ ਪਿਟ੍ਠਿਤੋ ਆਗਚ੍ਛਨ੍ਤਂ। ਛਿਨ੍ਨਸੋਤਨ੍ਤਿ ਪਚ੍ਛਿਨ੍ਨਸੋਤਂ। ਪਕਤਿਰਥਸ੍ਸ ਹਿ ਸੁਖਪવਤ੍ਤਨਤ੍ਥਂ ਅਕ੍ਖਸੀਸੇਸੁ ਨਾਭਿਯਞ੍ਚ ਉਪਲਿਤ੍ਤਾਨਂ ਸਪ੍ਪਿਤੇਲਾਦੀਨਂ ਸੋਤੋ ਸવਨਂ ਸਨ੍ਦਨਂ ਹੋਤਿ, ਤੇਨ ਸੋ ਅਚ੍ਛਿਨ੍ਨਸੋਤੋ ਨਾਮ ਹੋਤਿ। ਅਯਂ ਪਨ ਛਤ੍ਤਿਂਸਤਿਯਾ ਸੋਤਾਨਂ ਅਨવਸੇਸਤੋ ਪਹੀਨਤ੍ਤਾ ਛਿਨ੍ਨਸੋਤੋ ਨਾਮ ਹੋਤਿ, ਤਂ ਛਿਨ੍ਨਸੋਤਂ। ਨਤ੍ਥਿ ਏਤਸ੍ਸ ਬਨ੍ਧਨਨ੍ਤਿ ਅਬਨ੍ਧਨੋ। ਰਥੂਪਤ੍ਥਰਸ੍ਸ ਹਿ ਅਕ੍ਖੇਨ ਸਦ੍ਧਿਂ ਨਿਚ੍ਚਲਭਾવਕਰਣਤ੍ਥਂ ਬਹੂਨਿ ਬਨ੍ਧਨਾਨਿ ਹੋਨ੍ਤਿ, ਤੇਨ ਸੋ ਸਬਨ੍ਧਨੋ। ਅਯਂ ਪਨ ਸਬ੍ਬਸਂਯੋਜਨਬਨ੍ਧਨਾਨਂ ਅਨવਸੇਸਤੋ ਪਰਿਕ੍ਖੀਣਤ੍ਤਾ ਅਬਨ੍ਧਨੋ, ਤਂ ਅਬਨ੍ਧਨਂ। ਪਸ੍ਸਾਤਿ ਭਗવਾ ਥੇਰਸ੍ਸ ਗੁਣੇਹਿ ਸੋਮਨਸ੍ਸਪ੍ਪਤ੍ਤੋ ਹੁਤ੍વਾ ਅਤ੍ਤਾਨਂ વਦਤਿ।
Anīghanti niddukkhaṃ, khobhavirahitaṃ yānaṃ viya kilesaparikhobhavirahitanti attho. Āyantanti sambahulānaṃ bhikkhūnaṃ piṭṭhito piṭṭhito āgacchantaṃ. Chinnasotanti pacchinnasotaṃ. Pakatirathassa hi sukhapavattanatthaṃ akkhasīsesu nābhiyañca upalittānaṃ sappitelādīnaṃ soto savanaṃ sandanaṃ hoti, tena so acchinnasoto nāma hoti. Ayaṃ pana chattiṃsatiyā sotānaṃ anavasesato pahīnattā chinnasoto nāma hoti, taṃ chinnasotaṃ. Natthi etassa bandhananti abandhano. Rathūpattharassa hi akkhena saddhiṃ niccalabhāvakaraṇatthaṃ bahūni bandhanāni honti, tena so sabandhano. Ayaṃ pana sabbasaṃyojanabandhanānaṃ anavasesato parikkhīṇattā abandhano, taṃ abandhanaṃ. Passāti bhagavā therassa guṇehi somanassappatto hutvā attānaṃ vadati.
ਇਤਿ ਸਤ੍ਥਾ ਆਯਸ੍ਮਨ੍ਤਂ ਲਕੁਣ੍ਡਕਭਦ੍ਦਿਯਂ ਅਰਹਤ੍ਤਫਲਸੀਸੇਨ ਸੁਚਕ੍ਕਂ, ਅਰਹਤ੍ਤਫਲવਿਮੁਤ੍ਤਿਯਾ ਸੁਉਤ੍ਤਰਚ੍ਛਦਂ, ਸੂਪਟ੍ਠਿਤਾਯ ਸਤਿਯਾ ਸ੍વਾਰਂ, ਕਿਲੇਸਪਰਿਖੋਭਾਭਾવੇਨ ਅਪਰਿਖੋਭਂ, ਤਣ੍ਹੂਪਲੇਪਾਭਾવੇਨ ਅਨੁਪਲੇਪਂ, ਸਂਯੋਜਨਾਦੀਨਂ ਅਭਾવੇਨ ਅਬਨ੍ਧਨਂ ਸੁਪਰਿਕ੍ਖਿਤ੍ਤਂ ਸੁਯੁਤ੍ਤਂ ਆਜਞ੍ਞਰਥਂ ਕਤ੍વਾ ਦਸ੍ਸੇਤਿ।
Iti satthā āyasmantaṃ lakuṇḍakabhaddiyaṃ arahattaphalasīsena sucakkaṃ, arahattaphalavimuttiyā suuttaracchadaṃ, sūpaṭṭhitāya satiyā svāraṃ, kilesaparikhobhābhāvena aparikhobhaṃ, taṇhūpalepābhāvena anupalepaṃ, saṃyojanādīnaṃ abhāvena abandhanaṃ suparikkhittaṃ suyuttaṃ ājaññarathaṃ katvā dasseti.
ਪਞ੍ਚਮਸੁਤ੍ਤવਣ੍ਣਨਾ ਨਿਟ੍ਠਿਤਾ।
Pañcamasuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਖੁਦ੍ਦਕਨਿਕਾਯ • Khuddakanikāya / ਉਦਾਨਪਾਲ਼ਿ • Udānapāḷi / ੫. ਅਪਰਲਕੁਣ੍ਡਕਭਦ੍ਦਿਯਸੁਤ੍ਤਂ • 5. Aparalakuṇḍakabhaddiyasuttaṃ
