| Library / Tipiṭaka / ತಿಪಿಟಕ • Tipiṭaka / ಪಟಿಸಮ್ಭಿದಾಮಗ್ಗ-ಅಟ್ಠಕಥಾ • Paṭisambhidāmagga-aṭṭhakathā |
೯. ಅಪರನ್ತಾನುದಿಟ್ಠಿನಿದ್ದೇಸವಣ್ಣನಾ
9. Aparantānudiṭṭhiniddesavaṇṇanā
೧೪೨. ಸಞ್ಞಿಂ ವದನ್ತೀತಿ ಸಞ್ಞೀವಾದಾ। ಅಸಞ್ಞಿಂ ವದನ್ತೀತಿ ಅಸಞ್ಞೀವಾದಾ। ನೇವಸಞ್ಞೀನಾಸಞ್ಞಿಂ ವದನ್ತೀತಿ ನೇವಸಞ್ಞೀನಾಸಞ್ಞೀವಾದಾ। ಅಥ ವಾ ಸಞ್ಞೀತಿ ಪವತ್ತೋ ವಾದೋ ಸಞ್ಞೀವಾದೋ, ಸೋ ಯೇಸಂ ಅತ್ಥೀತಿ ತೇ ಸಞ್ಞೀವಾದಾ, ತಥಾ ಅಸಞ್ಞೀವಾದಾ, ನೇವಸಞ್ಞೀನಾಸಞ್ಞೀವಾದಾ ಚ। ಉಚ್ಛೇದಂ ವದನ್ತೀತಿ ಉಚ್ಛೇದವಾದಾ। ದಿಟ್ಠಧಮ್ಮೋತಿ ಪಚ್ಚಕ್ಖಧಮ್ಮೋ, ತತ್ಥ ತತ್ಥ ಪಟಿಲದ್ಧಅತ್ತಭಾವಸ್ಸೇತಂ ಅಧಿವಚನಂ। ದಿಟ್ಠಧಮ್ಮೇ ನಿಬ್ಬಾನಂ ದಿಟ್ಠಧಮ್ಮನಿಬ್ಬಾನಂ, ಇಮಸ್ಮಿಂಯೇವ ಅತ್ತಭಾವೇ ದುಕ್ಖವೂಪಸಮೋತಿ ಅತ್ಥೋ, ತಂ ವದನ್ತೀತಿ ದಿಟ್ಠಧಮ್ಮನಿಬ್ಬಾನವಾದಾ। ಇಮಸ್ಮಿಂ ಪನತ್ಥೇ ವಿತ್ಥಾರಿಯಮಾನೇ ಸಾಟ್ಠಕಥಂ ಸಕಲಂ ಬ್ರಹ್ಮಜಾಲಸುತ್ತಂ ವತ್ತಬ್ಬಂ ಹೋತಿ। ಏವಞ್ಚ ಸತಿ ಅತಿಪಪಞ್ಚೋ ಹೋತೀತಿ ನ ವಿತ್ಥಾರಿತೋ। ತದತ್ಥಿಕೇಹಿ ತಂ ಅಪೇಕ್ಖಿತ್ವಾ ಗಹೇತಬ್ಬೋ।
142. Saññiṃ vadantīti saññīvādā. Asaññiṃ vadantīti asaññīvādā. Nevasaññīnāsaññiṃ vadantīti nevasaññīnāsaññīvādā. Atha vā saññīti pavatto vādo saññīvādo, so yesaṃ atthīti te saññīvādā, tathā asaññīvādā, nevasaññīnāsaññīvādā ca. Ucchedaṃ vadantīti ucchedavādā. Diṭṭhadhammoti paccakkhadhammo, tattha tattha paṭiladdhaattabhāvassetaṃ adhivacanaṃ. Diṭṭhadhamme nibbānaṃ diṭṭhadhammanibbānaṃ, imasmiṃyeva attabhāve dukkhavūpasamoti attho, taṃ vadantīti diṭṭhadhammanibbānavādā. Imasmiṃ panatthe vitthāriyamāne sāṭṭhakathaṃ sakalaṃ brahmajālasuttaṃ vattabbaṃ hoti. Evañca sati atipapañco hotīti na vitthārito. Tadatthikehi taṃ apekkhitvā gahetabbo.
ಅಪರನ್ತಾನುದಿಟ್ಠಿನಿದ್ದೇಸವಣ್ಣನಾ ನಿಟ್ಠಿತಾ।
Aparantānudiṭṭhiniddesavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಪಟಿಸಮ್ಭಿದಾಮಗ್ಗಪಾಳಿ • Paṭisambhidāmaggapāḷi / ೯. ಅಪರನ್ತಾನುದಿಟ್ಠಿನಿದ್ದೇಸೋ • 9. Aparantānudiṭṭhiniddeso
