| Library / Tipiṭaka / තිපිටක • Tipiṭaka / කථාවත්‌ථුපාළි • Kathāvatthupāḷi |
4. චතුත්‌ථවග්‌ගො
4. Catutthavaggo
(41) 9. අපරාපි සමන්‌නාගතකථා
(41) 9. Aparāpi samannāgatakathā
406. අරහත්‌තසච්‌ඡිකිරියාය පටිපන්‌නො පුග්‌ගලො තීහි ඵලෙහි සමන්‌නාගතොති? ආමන්‌තා. අරහත්‌තසච්‌ඡිකිරියාය පටිපන්‌නො පුග්‌ගලො චතූහි ඵස්‌සෙහි චතූහි වෙදනාහි චතූහි සඤ්‌ඤාහි චතූහි චෙතනාහි චතූහි චිත්‌තෙහි චතූහි සද්‌ධාහි චතූහි වීරියෙහි චතූහි සතීහි චතූහි සමාධීහි චතූහි පඤ්‌ඤාහි සමන්‌නාගතොති? න හෙවං වත්‌තබ්‌බෙ…පෙ.….
406. Arahattasacchikiriyāya paṭipanno puggalo tīhi phalehi samannāgatoti? Āmantā. Arahattasacchikiriyāya paṭipanno puggalo catūhi phassehi catūhi vedanāhi catūhi saññāhi catūhi cetanāhi catūhi cittehi catūhi saddhāhi catūhi vīriyehi catūhi satīhi catūhi samādhīhi catūhi paññāhi samannāgatoti? Na hevaṃ vattabbe…pe….
අනාගාමිඵලසච්‌ඡිකිරියාය පටිපන්‌නො පුග්‌ගලො ද්‌වීහි ඵලෙහි සමන්‌නාගතොති? ආමන්‌තා. අනාගාමිඵලසච්‌ඡිකිරියාය පටිපන්‌නො පුග්‌ගලො තීහි ඵස්‌සෙහි තීහි වෙදනාහි…පෙ.… තීහි පඤ්‌ඤාහි සමන්‌නාගතොති? න හෙවං වත්‌තබ්‌බෙ…පෙ.….
Anāgāmiphalasacchikiriyāya paṭipanno puggalo dvīhi phalehi samannāgatoti? Āmantā. Anāgāmiphalasacchikiriyāya paṭipanno puggalo tīhi phassehi tīhi vedanāhi…pe… tīhi paññāhi samannāgatoti? Na hevaṃ vattabbe…pe….
සකදාගාමිඵලසච්‌ඡිකිරියාය පටිපන්‌නො පුග්‌ගලො සොතාපත්‌තිඵලෙන සමන්‌නාගතොති? ආමන්‌තා. සකදාගාමිඵලසච්‌ඡිකිරියාය පටිපන්‌නො පුග්‌ගලො ද්‌වීහි ඵස්‌සෙහි ද්‌වීහි වෙදනාහි…පෙ.… ද්‌වීහි පඤ්‌ඤාහි සමන්‌නාගතොති? න හෙවං වත්‌තබ්‌බෙ…පෙ.….
Sakadāgāmiphalasacchikiriyāya paṭipanno puggalo sotāpattiphalena samannāgatoti? Āmantā. Sakadāgāmiphalasacchikiriyāya paṭipanno puggalo dvīhi phassehi dvīhi vedanāhi…pe… dvīhi paññāhi samannāgatoti? Na hevaṃ vattabbe…pe….
අරහත්‌තසච්‌ඡිකිරියාය පටිපන්‌නො පුග්‌ගලො සොතාපත්‌තිඵලෙන සමන්‌නාගතොති? ආමන්‌තා. අරහත්‌තසච්‌ඡිකිරියාය පටිපන්‌නො පුග්‌ගලො සොතාපන්‌නො සත්‌තක්‌ඛත්‌තුපරමො, කොලඞ්‌කොලො, එකබීජීති? න හෙවං වත්‌තබ්‌බෙ…පෙ.….
Arahattasacchikiriyāya paṭipanno puggalo sotāpattiphalena samannāgatoti? Āmantā. Arahattasacchikiriyāya paṭipanno puggalo sotāpanno sattakkhattuparamo, kolaṅkolo, ekabījīti? Na hevaṃ vattabbe…pe….
අරහත්‌තසච්‌ඡිකිරියාය පටිපන්‌නො පුග්‌ගලො සකදාගාමිඵලෙන සමන්‌නාගතොති? ආමන්‌තා. අරහත්‌තසච්‌ඡිකිරියාය පටිපන්‌නො පුග්‌ගලො සකදාගාමීති? න හෙවං වත්‌තබ්‌බෙ…පෙ.….
Arahattasacchikiriyāya paṭipanno puggalo sakadāgāmiphalena samannāgatoti? Āmantā. Arahattasacchikiriyāya paṭipanno puggalo sakadāgāmīti? Na hevaṃ vattabbe…pe….
අරහත්‌තසච්‌ඡිකිරියාය පටිපන්‌නො පුග්‌ගලො අනාගාමිඵලෙන සමන්‌නාගතොති? ආමන්‌තා. අරහත්‌තසච්‌ඡිකිරියාය පටිපන්‌නො පුග්‌ගලො අනාගාමී අන්‌තරාපරිනිබ්‌බායී, උපහච්‌චපරිනිබ්‌බායී, අසඞ්‌ඛාරපරිනිබ්‌බායී, සසඞ්‌ඛාරපරිනිබ්‌බායී, උද්‌ධංසොතො අකනිට්‌ඨගාමීති? න හෙවං වත්‌තබ්‌බෙ…පෙ.….
Arahattasacchikiriyāya paṭipanno puggalo anāgāmiphalena samannāgatoti? Āmantā. Arahattasacchikiriyāya paṭipanno puggalo anāgāmī antarāparinibbāyī, upahaccaparinibbāyī, asaṅkhāraparinibbāyī, sasaṅkhāraparinibbāyī, uddhaṃsoto akaniṭṭhagāmīti? Na hevaṃ vattabbe…pe….
අනාගාමිඵලසච්‌ඡිකිරියාය පටිපන්‌නො පුග්‌ගලො සොතාපත්‌තිඵලෙන සමන්‌නාගතොති? ආමන්‌තා . අනාගාමිඵලසච්‌ඡිකිරියාය පටිපන්‌නො පුග්‌ගලො සොතාපන්‌නො සත්‌තක්‌ඛත්‌තුපරමො, කොලඞ්‌කොලො, එකබීජීති? න හෙවං වත්‌තබ්‌බෙ…පෙ.….
Anāgāmiphalasacchikiriyāya paṭipanno puggalo sotāpattiphalena samannāgatoti? Āmantā . Anāgāmiphalasacchikiriyāya paṭipanno puggalo sotāpanno sattakkhattuparamo, kolaṅkolo, ekabījīti? Na hevaṃ vattabbe…pe….
අනාගාමිඵලසච්‌ඡිකිරියාය පටිපන්‌නො පුග්‌ගලො සකදාගාමිඵලෙන සමන්‌නාගතොති? ආමන්‌තා. අනාගාමිඵලසච්‌ඡිකිරියාය පටිපන්‌නො පුග්‌ගලො සකදාගාමීති? න හෙවං වත්‌තබ්‌බෙ…පෙ.….
Anāgāmiphalasacchikiriyāya paṭipanno puggalo sakadāgāmiphalena samannāgatoti? Āmantā. Anāgāmiphalasacchikiriyāya paṭipanno puggalo sakadāgāmīti? Na hevaṃ vattabbe…pe….
සකදාගාමිඵලසච්‌ඡිකිරියාය පටිපන්‌නො පුග්‌ගලො සොතාපත්‌තිඵලෙන සමන්‌නාගතොති? ආමන්‌තා. සකදාගාමිඵලසච්‌ඡිකිරියාය පටිපන්‌නො පුග්‌ගලො සොතාපන්‌නො සත්‌තක්‌ඛත්‌තුපරමො, කොලඞ්‌කොලො, එකබීජීති? න හෙවං වත්‌තබ්‌බෙ…පෙ.….
Sakadāgāmiphalasacchikiriyāya paṭipanno puggalo sotāpattiphalena samannāgatoti? Āmantā. Sakadāgāmiphalasacchikiriyāya paṭipanno puggalo sotāpanno sattakkhattuparamo, kolaṅkolo, ekabījīti? Na hevaṃ vattabbe…pe….
407. සොතාපත්‌තිඵලෙන සමන්‌නාගතො සොතාපන්‌නොති වත්‌තබ්‌බොති? ආමන්‌තා . අරහත්‌තසච්‌ඡිකිරියාය පටිපන්‌නො පුග්‌ගලො සොතාපත්‌තිඵලෙන සමන්‌නාගතොති? ආමන්‌තා. ස්‌වෙව අරහත්‌තසච්‌ඡිකිරියාය පටිපන්‌නො පුග්‌ගලො, සො සොතාපන්‌නොති? න හෙවං වත්‌තබ්‌බෙ…පෙ.….
407. Sotāpattiphalena samannāgato sotāpannoti vattabboti? Āmantā . Arahattasacchikiriyāya paṭipanno puggalo sotāpattiphalena samannāgatoti? Āmantā. Sveva arahattasacchikiriyāya paṭipanno puggalo, so sotāpannoti? Na hevaṃ vattabbe…pe….
සකදාගාමිඵලෙන සමන්‌නාගතො සකදාගාමීති වත්‌තබ්‌බොති? ආමන්‌තා. අරහත්‌තසච්‌ඡිකිරියාය පටිපන්‌නො පුග්‌ගලො සකදාගාමිඵලෙන සමන්‌නාගතොති? ආමන්‌තා. ස්‌වෙව අරහත්‌තසච්‌ඡිකිරියාය පටිපන්‌නො පුග්‌ගලො, සො සකදාගාමීති? න හෙවං වත්‌තබ්‌බෙ…පෙ.….
Sakadāgāmiphalena samannāgato sakadāgāmīti vattabboti? Āmantā. Arahattasacchikiriyāya paṭipanno puggalo sakadāgāmiphalena samannāgatoti? Āmantā. Sveva arahattasacchikiriyāya paṭipanno puggalo, so sakadāgāmīti? Na hevaṃ vattabbe…pe….
අනාගාමිඵලෙන සමන්‌නාගතො අනාගාමීති වත්‌තබ්‌බොති? ආමන්‌තා. අරහත්‌තසච්‌ඡිකිරියාය පටිපන්‌නො පුග්‌ගලො අනාගාමිඵලෙන සමන්‌නාගතොති? ආමන්‌තා . ස්‌වෙව අරහත්‌තසච්‌ඡිකිරියාය පටිපන්‌නො පුග්‌ගලො, සො අනාගාමීති? න හෙවං වත්‌තබ්‌බෙ…පෙ.….
Anāgāmiphalena samannāgato anāgāmīti vattabboti? Āmantā. Arahattasacchikiriyāya paṭipanno puggalo anāgāmiphalena samannāgatoti? Āmantā . Sveva arahattasacchikiriyāya paṭipanno puggalo, so anāgāmīti? Na hevaṃ vattabbe…pe….
සොතාපත්‌තිඵලෙන සමන්‌නාගතො සොතාපන්‌නොති වත්‌තබ්‌බොති? ආමන්‌තා. අනාගාමිඵලසච්‌ඡිකිරියාය පටිපන්‌නො පුග්‌ගලො සොතාපත්‌තිඵලෙන සමන්‌නාගතොති? ආමන්‌තා. ස්‌වෙව අනාගාමිඵලසච්‌ඡිකිරියාය පටිපන්‌නො පුග්‌ගලො, සො සොතාපන්‌නොති? න හෙවං වත්‌තබ්‌බෙ…පෙ.….
Sotāpattiphalena samannāgato sotāpannoti vattabboti? Āmantā. Anāgāmiphalasacchikiriyāya paṭipanno puggalo sotāpattiphalena samannāgatoti? Āmantā. Sveva anāgāmiphalasacchikiriyāya paṭipanno puggalo, so sotāpannoti? Na hevaṃ vattabbe…pe….
සකදාගාමිඵලෙන සමන්‌නාගතො සකදාගාමීති වත්‌තබ්‌බොති? ආමන්‌තා. අනාගාමිඵලසච්‌ඡිකිරියාය පටිපන්‌නො පුග්‌ගලො සකදාගාමිඵලෙන සමන්‌නාගතොති? ආමන්‌තා. ස්‌වෙව අනාගාමිඵලසච්‌ඡිකිරියාය පටිපන්‌නො පුග්‌ගලො, සො සකදාගාමීති? න හෙවං වත්‌තබ්‌බෙ…පෙ.….
Sakadāgāmiphalena samannāgato sakadāgāmīti vattabboti? Āmantā. Anāgāmiphalasacchikiriyāya paṭipanno puggalo sakadāgāmiphalena samannāgatoti? Āmantā. Sveva anāgāmiphalasacchikiriyāya paṭipanno puggalo, so sakadāgāmīti? Na hevaṃ vattabbe…pe….
සොතාපත්‌තිඵලෙන සමන්‌නාගතො සොතාපන්‌නොති වත්‌තබ්‌බොති? ආමන්‌තා . සකදාගාමිඵලසච්‌ඡිකිරියාය පටිපන්‌නො පුග්‌ගලො සොතාපත්‌තිඵලෙන සමන්‌නාගතොති? ආමන්‌තා. ස්‌වෙව සකදාගාමිඵලසච්‌ඡිකිරියාය පටිපන්‌නො පුග්‌ගලො, සො සොතාපන්‌නොති? න හෙවං වත්‌තබ්‌බෙ…පෙ.….
Sotāpattiphalena samannāgato sotāpannoti vattabboti? Āmantā . Sakadāgāmiphalasacchikiriyāya paṭipanno puggalo sotāpattiphalena samannāgatoti? Āmantā. Sveva sakadāgāmiphalasacchikiriyāya paṭipanno puggalo, so sotāpannoti? Na hevaṃ vattabbe…pe….
408. අරහත්‌තසච්‌ඡිකිරියාය පටිපන්‌නො පුග්‌ගලො සොතාපත්‌තිඵලෙන සමන්‌නාගතොති? ආමන්‌තා. නනු අරහත්‌තසච්‌ඡිකිරියාය පටිපන්‌නො පුග්‌ගලො සොතාපත්‌තිඵලං වීතිවත්‌තොති? ආමන්‌තා. හඤ්‌චි අරහත්‌තසච්‌ඡිකිරියාය පටිපන්‌නො පුග්‌ගලො සොතාපත්‌තිඵලං වීතිවත්‌තො, නො ච වත රෙ වත්‌තබ්‌බෙ – ‘‘අරහත්‌තසච්‌ඡිකිරියාය පටිපන්‌නො පුග්‌ගලො සොතාපත්‌තිඵලෙන සමන්‌නාගතො’’ති.
408. Arahattasacchikiriyāya paṭipanno puggalo sotāpattiphalena samannāgatoti? Āmantā. Nanu arahattasacchikiriyāya paṭipanno puggalo sotāpattiphalaṃ vītivattoti? Āmantā. Hañci arahattasacchikiriyāya paṭipanno puggalo sotāpattiphalaṃ vītivatto, no ca vata re vattabbe – ‘‘arahattasacchikiriyāya paṭipanno puggalo sotāpattiphalena samannāgato’’ti.
අරහත්‌තසච්‌ඡිකිරියාය පටිපන්‌නො පුග්‌ගලො සොතාපත්‌තිඵලං වීතිවත්‌තො, තෙන සමන්‌නාගතොති? ආමන්‌තා. අරහත්‌තසච්‌ඡිකිරියාය පටිපන්‌නො පුග්‌ගලො සොතාපත්‌තිමග්‌ගං වීතිවත්‌තො, සක්‌කායදිට්‌ඨිං විචිකිච්‌ඡං සීලබ්‌බතපරාමාසං අපායගමනීයං රාගං අපායගමනීයං දොසං අපායගමනීයං මොහං වීතිවත්‌තො, තෙන සමන්‌නාගතොති? න හෙවං වත්‌තබ්‌බෙ…පෙ.….
Arahattasacchikiriyāya paṭipanno puggalo sotāpattiphalaṃ vītivatto, tena samannāgatoti? Āmantā. Arahattasacchikiriyāya paṭipanno puggalo sotāpattimaggaṃ vītivatto, sakkāyadiṭṭhiṃ vicikicchaṃ sīlabbataparāmāsaṃ apāyagamanīyaṃ rāgaṃ apāyagamanīyaṃ dosaṃ apāyagamanīyaṃ mohaṃ vītivatto, tena samannāgatoti? Na hevaṃ vattabbe…pe….
අරහත්‌තසච්‌ඡිකිරියාය පටිපන්‌නො පුග්‌ගලො සකදාගාමිඵලෙන සමන්‌නාගතොති? ආමන්‌තා. නනු අරහත්‌තසච්‌ඡිකිරියාය පටිපන්‌නො පුග්‌ගලො සකදාගාමිඵලං වීතිවත්‌තොති? ආමන්‌තා. හඤ්‌චි අරහත්‌තසච්‌ඡිකිරියාය පටිපන්‌නො පුග්‌ගලො සකදාගාමිඵලං වීතිවත්‌තො, නො ච වත රෙ වත්‌තබ්‌බෙ – ‘‘අරහත්‌තසච්‌ඡිකිරියාය පටිපන්‌නො පුග්‌ගලො සකදාගාමිඵලෙන සමන්‌නාගතො’’ති.
Arahattasacchikiriyāya paṭipanno puggalo sakadāgāmiphalena samannāgatoti? Āmantā. Nanu arahattasacchikiriyāya paṭipanno puggalo sakadāgāmiphalaṃ vītivattoti? Āmantā. Hañci arahattasacchikiriyāya paṭipanno puggalo sakadāgāmiphalaṃ vītivatto, no ca vata re vattabbe – ‘‘arahattasacchikiriyāya paṭipanno puggalo sakadāgāmiphalena samannāgato’’ti.
අරහත්‌තසච්‌ඡිකිරියාය පටිපන්‌නො පුග්‌ගලො සකදාගාමිඵලං වීතිවත්‌තො, තෙන සමන්‌නාගතොති? ආමන්‌තා. අරහත්‌තසච්‌ඡිකිරියාය පටිපන්‌නො පුග්‌ගලො සකදාගාමිමග්‌ගං වීතිවත්‌තො, ඔළාරිකං කාමරාගං ඔළාරිකං බ්‍යාපාදං වීතිවත්‌තො, තෙන සමන්‌නාගතොති? න හෙවං වත්‌තබ්‌බෙ…පෙ.….
Arahattasacchikiriyāya paṭipanno puggalo sakadāgāmiphalaṃ vītivatto, tena samannāgatoti? Āmantā. Arahattasacchikiriyāya paṭipanno puggalo sakadāgāmimaggaṃ vītivatto, oḷārikaṃ kāmarāgaṃ oḷārikaṃ byāpādaṃ vītivatto, tena samannāgatoti? Na hevaṃ vattabbe…pe….
අරහත්‌තසච්‌ඡිකිරියාය පටිපන්‌නො පුග්‌ගලො අනාගාමිඵලෙන සමන්‌නාගතොති? ආමන්‌තා. නනු අරහත්‌තසච්‌ඡිකිරියාය පටිපන්‌නො පුග්‌ගලො අනාගාමිඵලං වීතිවත්‌තොති? ආමන්‌තා. හඤ්‌චි අරහත්‌තසච්‌ඡිකිරියාය පටිපන්‌නො පුග්‌ගලො අනාගාමිඵලං වීතිවත්‌තො, නො ච වත රෙ වත්‌තබ්‌බෙ – ‘‘අරහත්‌තසච්‌ඡිකිරියාය පටිපන්‌නො පුග්‌ගලො අනාගාමිඵලෙන සමන්‌නාගතො’’ති.
Arahattasacchikiriyāya paṭipanno puggalo anāgāmiphalena samannāgatoti? Āmantā. Nanu arahattasacchikiriyāya paṭipanno puggalo anāgāmiphalaṃ vītivattoti? Āmantā. Hañci arahattasacchikiriyāya paṭipanno puggalo anāgāmiphalaṃ vītivatto, no ca vata re vattabbe – ‘‘arahattasacchikiriyāya paṭipanno puggalo anāgāmiphalena samannāgato’’ti.
අරහත්‌තසච්‌ඡිකිරියාය පටිපන්‌නො පුග්‌ගලො අනාගාමිඵලං වීතිවත්‌තො, තෙන සමන්‌නාගතොති? ආමන්‌තා. අරහත්‌තසච්‌ඡිකිරියාය පටිපන්‌නො පුග්‌ගලො අනාගාමිමග්‌ගං වීතිවත්‌තො, අණුසහගතං කාමරාගං අණුසහගතං බ්‍යාපාදං වීතිවත්‌තො, තෙන සමන්‌නාගතොති? න හෙවං වත්‌තබ්‌බෙ…පෙ.….
Arahattasacchikiriyāya paṭipanno puggalo anāgāmiphalaṃ vītivatto, tena samannāgatoti? Āmantā. Arahattasacchikiriyāya paṭipanno puggalo anāgāmimaggaṃ vītivatto, aṇusahagataṃ kāmarāgaṃ aṇusahagataṃ byāpādaṃ vītivatto, tena samannāgatoti? Na hevaṃ vattabbe…pe….
409. අනාගාමිඵලසච්‌ඡිකිරියාය පටිපන්‌නො පුග්‌ගලො සොතාපත්‌තිඵලෙන සමන්‌නාගතොති? ආමන්‌තා. නනු අනාගාමිඵලසච්‌ඡිකිරියාය පටිපන්‌නො පුග්‌ගලො සොතාපත්‌තිඵලං වීතිවත්‌තොති? ආමන්‌තා. හඤ්‌චි අනාගාමිඵලසච්‌ඡිකිරියාය පටිපන්‌නො පුග්‌ගලො සොතාපත්‌තිඵලං වීතිවත්‌තො, නො ච වත රෙ වත්‌තබ්‌බෙ – ‘‘අනාගාමිඵලසච්‌ඡිකිරියාය පටිපන්‌නො පුග්‌ගලො සොතාපත්‌තිඵලෙන සමන්‌නාගතො’’ති.
409. Anāgāmiphalasacchikiriyāya paṭipanno puggalo sotāpattiphalena samannāgatoti? Āmantā. Nanu anāgāmiphalasacchikiriyāya paṭipanno puggalo sotāpattiphalaṃ vītivattoti? Āmantā. Hañci anāgāmiphalasacchikiriyāya paṭipanno puggalo sotāpattiphalaṃ vītivatto, no ca vata re vattabbe – ‘‘anāgāmiphalasacchikiriyāya paṭipanno puggalo sotāpattiphalena samannāgato’’ti.
අනාගාමිඵලසච්‌ඡිකිරියාය පටිපන්‌නො පුග්‌ගලො සොතාපත්‌තිඵලං වීතිවත්‌තො, තෙන සමන්‌නාගතොති? ආමන්‌තා. අනාගාමිඵලසච්‌ඡිකිරියාය පටිපන්‌නො පුග්‌ගලො සොතාපත්‌තිමග්‌ගං වීතිවත්‌තො, සක්‌කායදිට්‌ඨිං…පෙ.… අපායගමනීයං මොහං වීතිවත්‌තො, තෙන සමන්‌නාගතොති? න හෙවං වත්‌තබ්‌බෙ…පෙ.….
Anāgāmiphalasacchikiriyāya paṭipanno puggalo sotāpattiphalaṃ vītivatto, tena samannāgatoti? Āmantā. Anāgāmiphalasacchikiriyāya paṭipanno puggalo sotāpattimaggaṃ vītivatto, sakkāyadiṭṭhiṃ…pe… apāyagamanīyaṃ mohaṃ vītivatto, tena samannāgatoti? Na hevaṃ vattabbe…pe….
අනාගාමිඵලසච්‌ඡිකිරියාය පටිපන්‌නො පුග්‌ගලො සකදාගාමිඵලෙන සමන්‌නාගතොති? ආමන්‌තා. නනු අනාගාමිඵලසච්‌ඡිකිරියාය පටිපන්‌නො පුග්‌ගලො සකදාගාමිඵලං වීතිවත්‌තොති? ආමන්‌තා. හඤ්‌චි අනාගාමිඵලසච්‌ඡිකිරියාය පටිපන්‌නො පුග්‌ගලො සකදාගාමිඵලං වීතිවත්‌තො, නො ච වත රෙ වත්‌තබ්‌බෙ – ‘‘අනාගාමිඵලසච්‌ඡිකිරියාය පටිපන්‌නො පුග්‌ගලො සකදාගාමිඵලෙන සමන්‌නාගතො’’ති.
Anāgāmiphalasacchikiriyāya paṭipanno puggalo sakadāgāmiphalena samannāgatoti? Āmantā. Nanu anāgāmiphalasacchikiriyāya paṭipanno puggalo sakadāgāmiphalaṃ vītivattoti? Āmantā. Hañci anāgāmiphalasacchikiriyāya paṭipanno puggalo sakadāgāmiphalaṃ vītivatto, no ca vata re vattabbe – ‘‘anāgāmiphalasacchikiriyāya paṭipanno puggalo sakadāgāmiphalena samannāgato’’ti.
අනාගාමිඵලසච්‌ඡිකිරියාය පටිපන්‌නො පුග්‌ගලො සකදාගාමිඵලං වීතිවත්‌තො, තෙන සමන්‌නාගතොති? ආමන්‌තා . අනාගාමිඵලසච්‌ඡිකිරියාය පටිපන්‌නො පුග්‌ගලො සකදාගාමිමග්‌ගං වීතිවත්‌තො, ඔළාරිකං කාමරාගං ඔළාරිකං බ්‍යාපාදං වීතිවත්‌තො, තෙන සමන්‌නාගතොති? න හෙවං වත්‌තබ්‌බෙ…පෙ.….
Anāgāmiphalasacchikiriyāya paṭipanno puggalo sakadāgāmiphalaṃ vītivatto, tena samannāgatoti? Āmantā . Anāgāmiphalasacchikiriyāya paṭipanno puggalo sakadāgāmimaggaṃ vītivatto, oḷārikaṃ kāmarāgaṃ oḷārikaṃ byāpādaṃ vītivatto, tena samannāgatoti? Na hevaṃ vattabbe…pe….
410. සකදාගාමිඵලසච්‌ඡිකිරියාය පටිපන්‌නො පුග්‌ගලො සොතාපත්‌තිඵලෙන සමන්‌නාගතොති? ආමන්‌තා. නනු සකදාගාමිඵලසච්‌ඡිකිරියාය පටිපන්‌නො පුග්‌ගලො සොතාපත්‌තිඵලං වීතිවත්‌තොති? ආමන්‌තා. හඤ්‌චි සකදාගාමිඵලසච්‌ඡිකිරියාය පටිපන්‌නො පුග්‌ගලො සොතාපත්‌තිඵලං වීතිවත්‌තො, නො ච වත රෙ වත්‌තබ්‌බෙ – ‘‘සකදාගාමිඵලසච්‌ඡිකිරියාය පටිපන්‌නො පුග්‌ගලො සොතාපත්‌තිඵලෙන සමන්‌නාගතො’’ති.
410. Sakadāgāmiphalasacchikiriyāya paṭipanno puggalo sotāpattiphalena samannāgatoti? Āmantā. Nanu sakadāgāmiphalasacchikiriyāya paṭipanno puggalo sotāpattiphalaṃ vītivattoti? Āmantā. Hañci sakadāgāmiphalasacchikiriyāya paṭipanno puggalo sotāpattiphalaṃ vītivatto, no ca vata re vattabbe – ‘‘sakadāgāmiphalasacchikiriyāya paṭipanno puggalo sotāpattiphalena samannāgato’’ti.
සකදාගාමිඵලසච්‌ඡිකිරියාය පටිපන්‌නො පුග්‌ගලො සොතාපත්‌තිඵලං වීතිවත්‌තො, තෙන සමන්‌නාගතොති? ආමන්‌තා. සකදාගාමිඵලසච්‌ඡිකිරියාය පටිපන්‌නො පුග්‌ගලො සොතාපත්‌තිමග්‌ගං වීතිවත්‌තො , සක්‌කායදිට්‌ඨිං…පෙ.… අපායගමනීයං මොහං වීතිවත්‌තො, තෙන සමන්‌නාගතොති? න හෙවං වත්‌තබ්‌බෙ…පෙ.….
Sakadāgāmiphalasacchikiriyāya paṭipanno puggalo sotāpattiphalaṃ vītivatto, tena samannāgatoti? Āmantā. Sakadāgāmiphalasacchikiriyāya paṭipanno puggalo sotāpattimaggaṃ vītivatto , sakkāyadiṭṭhiṃ…pe… apāyagamanīyaṃ mohaṃ vītivatto, tena samannāgatoti? Na hevaṃ vattabbe…pe….
411. න වත්‌තබ්‌බං – ‘‘අරහත්‌තසච්‌ඡිකිරියාය පටිපන්‌නො පුග්‌ගලො තීහි ඵලෙහි සමන්‌නාගතො’’ති? ආමන්‌තා. නනු අරහත්‌තසච්‌ඡිකිරියාය පටිපන්‌නෙන පුග්‌ගලෙන තීණි ඵලානි පටිලද්‌ධානි, තෙහි ච අපරිහීනොති? ආමන්‌තා. හඤ්‌චි අරහත්‌තසච්‌ඡිකිරියාය පටිපන්‌නෙන පුග්‌ගලෙන තීණි ඵලානි පටිලද්‌ධානි තෙහි ච අපරිහීනො, තෙන වත රෙ වත්‌තබ්‌බෙ – ‘‘අරහත්‌තසච්‌ඡිකිරියාය පටිපන්‌නො පුග්‌ගලො තීහි ඵලෙහි සමන්‌නාගතො’’ති.
411. Na vattabbaṃ – ‘‘arahattasacchikiriyāya paṭipanno puggalo tīhi phalehi samannāgato’’ti? Āmantā. Nanu arahattasacchikiriyāya paṭipannena puggalena tīṇi phalāni paṭiladdhāni, tehi ca aparihīnoti? Āmantā. Hañci arahattasacchikiriyāya paṭipannena puggalena tīṇi phalāni paṭiladdhāni tehi ca aparihīno, tena vata re vattabbe – ‘‘arahattasacchikiriyāya paṭipanno puggalo tīhi phalehi samannāgato’’ti.
න වත්‌තබ්‌බං – ‘‘අනාගාමිඵලසච්‌ඡිකිරියාය පටිපන්‌නො පුග්‌ගලො ද්‌වීහි ඵලෙහි සමන්‌නාගතො’’ති? ආමන්‌තා. නනු අනාගාමිඵලසච්‌ඡිකිරියාය පටිපන්‌නෙන පුග්‌ගලෙන ද්‌වෙ ඵලානි පටිලද්‌ධානි, තෙහි ච අපරිහීනොති? ආමන්‌තා. හඤ්‌චි අනාගාමිඵලසච්‌ඡිකිරියාය පටිපන්‌නෙන පුග්‌ගලෙන ද්‌වෙ ඵලානි පටිලද්‌ධානි තෙහි ච අපරිහීනො, තෙන වත රෙ වත්‌තබ්‌බෙ – ‘‘අනාගාමිඵලසච්‌ඡිකිරියාය පටිපන්‌නො පුග්‌ගලො ද්‌වීහි ඵලෙහි සමන්‌නාගතො’’ති.
Na vattabbaṃ – ‘‘anāgāmiphalasacchikiriyāya paṭipanno puggalo dvīhi phalehi samannāgato’’ti? Āmantā. Nanu anāgāmiphalasacchikiriyāya paṭipannena puggalena dve phalāni paṭiladdhāni, tehi ca aparihīnoti? Āmantā. Hañci anāgāmiphalasacchikiriyāya paṭipannena puggalena dve phalāni paṭiladdhāni tehi ca aparihīno, tena vata re vattabbe – ‘‘anāgāmiphalasacchikiriyāya paṭipanno puggalo dvīhi phalehi samannāgato’’ti.
න වත්‌තබ්‌බං – ‘‘සකදාගාමිඵලසච්‌ඡිකිරියාය පටිපන්‌නො පුග්‌ගලො සොතාපත්‌තිඵලෙන සමන්‌නාගතො’’ති? ආමන්‌තා. නනු සකදාගාමිඵලසච්‌ඡිකිරියාය පටිපන්‌නෙන පුග්‌ගලෙන සොතාපත්‌තිඵලං පටිලද්‌ධං, තෙන ච අපරිහීනොති? ආමන්‌තා. හඤ්‌චි සකදාගාමිඵලසච්‌ඡිකිරියාය පටිපන්‌නෙන පුග්‌ගලෙන සොතාපත්‌තිඵලං පටිලද්‌ධං තෙන ච අපරිහීනො, තෙන වත රෙ වත්‌තබ්‌බෙ – ‘‘සකදාගාමිඵලසච්‌ඡිකිරියාය පටිපන්‌නො පුග්‌ගලො සොතාපත්‌තිඵලෙන සමන්‌නාගතො’’ති.
Na vattabbaṃ – ‘‘sakadāgāmiphalasacchikiriyāya paṭipanno puggalo sotāpattiphalena samannāgato’’ti? Āmantā. Nanu sakadāgāmiphalasacchikiriyāya paṭipannena puggalena sotāpattiphalaṃ paṭiladdhaṃ, tena ca aparihīnoti? Āmantā. Hañci sakadāgāmiphalasacchikiriyāya paṭipannena puggalena sotāpattiphalaṃ paṭiladdhaṃ tena ca aparihīno, tena vata re vattabbe – ‘‘sakadāgāmiphalasacchikiriyāya paṭipanno puggalo sotāpattiphalena samannāgato’’ti.
412. අරහත්‌තසච්‌ඡිකිරියාය පටිපන්‌නෙන පුග්‌ගලෙන තීණි ඵලානි පටිලද්‌ධානි තෙහි ච අපරිහීනොති, අරහත්‌තසච්‌ඡිකිරියාය පටිපන්‌නො පුග්‌ගලො තීහි ඵලෙහි සමන්‌නාගතොති? ආමන්‌තා. අරහත්‌තසච්‌ඡිකිරියාය පටිපන්‌නෙන පුග්‌ගලෙන චත්‌තාරො මග්‌ගා පටිලද්‌ධා තෙහි ච අපරිහීනොති, අරහත්‌තසච්‌ඡිකිරියාය පටිපන්‌නො පුග්‌ගලො චතූහි මග්‌ගෙහි සමන්‌නාගතොති? න හෙවං වත්‌තබ්‌බෙ…පෙ.….
412. Arahattasacchikiriyāya paṭipannena puggalena tīṇi phalāni paṭiladdhāni tehi ca aparihīnoti, arahattasacchikiriyāya paṭipanno puggalo tīhi phalehi samannāgatoti? Āmantā. Arahattasacchikiriyāya paṭipannena puggalena cattāro maggā paṭiladdhā tehi ca aparihīnoti, arahattasacchikiriyāya paṭipanno puggalo catūhi maggehi samannāgatoti? Na hevaṃ vattabbe…pe….
අනාගාමිඵලසච්‌ඡිකිරියාය පටිපන්‌නෙන පුග්‌ගලෙන ද්‌වෙ ඵලානි පටිලද්‌ධානි තෙහි ච අපරිහීනොති , අනාගාමිඵලසච්‌ඡිකිරියාය පටිපන්‌නො පුග්‌ගලො ද්‌වීහි ඵලෙහි සමන්‌නාගතොති? ආමන්‌තා. අනාගාමිඵලසච්‌ඡිකිරියාය පටිපන්‌නෙන පුග්‌ගලෙන තයො මග්‌ගා පටිලද්‌ධා තෙහි ච අපරිහීනොති, අනාගාමිඵලසච්‌ඡිකිරියාය පටිපන්‌නො පුග්‌ගලො තීහි මග්‌ගෙහි සමන්‌නාගතොති? න හෙවං වත්‌තබ්‌බෙ…පෙ.….
Anāgāmiphalasacchikiriyāya paṭipannena puggalena dve phalāni paṭiladdhāni tehi ca aparihīnoti , anāgāmiphalasacchikiriyāya paṭipanno puggalo dvīhi phalehi samannāgatoti? Āmantā. Anāgāmiphalasacchikiriyāya paṭipannena puggalena tayo maggā paṭiladdhā tehi ca aparihīnoti, anāgāmiphalasacchikiriyāya paṭipanno puggalo tīhi maggehi samannāgatoti? Na hevaṃ vattabbe…pe….
සකදාගාමිඵලසච්‌ඡිකිරියාය පටිපන්‌නෙන පුග්‌ගලෙන සොතාපත්‌තිඵලං පටිලද්‌ධං තෙන ච අපරිහීනොති, සකදාගාමිඵලසච්‌ඡිකිරියාය පටිපන්‌නො පුග්‌ගලො සොතාපත්‌තිඵලෙන සමන්‌නාගතොති? ආමන්‌තා. සකදාගාමිඵලසච්‌ඡිකිරියාය පටිපන්‌නෙන පුග්‌ගලෙන ද්‌වෙ මග්‌ගා පටිලද්‌ධා තෙහි ච අපරිහීනොති, සකදාගාමිඵලසච්‌ඡිකිරියාය පටිපන්‌නො පුග්‌ගලො ද්‌වීහි මග්‌ගෙහි සමන්‌නාගතොති? න හෙවං වත්‌තබ්‌බෙ…පෙ.….
Sakadāgāmiphalasacchikiriyāya paṭipannena puggalena sotāpattiphalaṃ paṭiladdhaṃ tena ca aparihīnoti, sakadāgāmiphalasacchikiriyāya paṭipanno puggalo sotāpattiphalena samannāgatoti? Āmantā. Sakadāgāmiphalasacchikiriyāya paṭipannena puggalena dve maggā paṭiladdhā tehi ca aparihīnoti, sakadāgāmiphalasacchikiriyāya paṭipanno puggalo dvīhi maggehi samannāgatoti? Na hevaṃ vattabbe…pe….
අපරාපි සමන්‌නාගතකථා නිට්‌ඨිතා.
Aparāpi samannāgatakathā niṭṭhitā.
Related texts:
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 9. අපරාපි සමන්‌නාගතකථාවණ්‌ණනා • 9. Aparāpi samannāgatakathāvaṇṇanā
