| Library / Tipiṭaka / তিপিটক • Tipiṭaka / থেরীগাথা-অট্ঠকথা • Therīgāthā-aṭṭhakathā |
৩. তিকনিপাতো
3. Tikanipāto
১. অপরাসামাথেরীগাথাৰণ্ণনা
1. Aparāsāmātherīgāthāvaṇṇanā
তিকনিপাতে পণ্ণৰীসতিৰস্সানীতিআদিকা অপরায সামায থেরিযা গাথা। অযম্পি পুরিমবুদ্ধেসু কতাধিকারা তত্থ তত্থ ভৰে ৰিৰট্টূপনিস্সযং কুসলং উপচিনন্তী ৰিপস্সিস্স ভগৰতো কালে চন্দভাগায নদিযা তীরে কিন্নরযোনিযং নিব্বত্তি। সা তত্থ কিন্নরেহি সদ্ধিং কীল়াপসুতা ৰিচরতি। অথেকদিৰসং সত্থা তস্সা কুসলবীজরোপনত্থং তত্থ গন্ত্ৰা নদীতীরে চঙ্কমি। সা ভগৰন্তং দিস্ৰা হট্ঠতুট্ঠা সল়লপুপ্ফানি আদায সত্থু সন্তিকং গন্ত্ৰা ৰন্দিত্ৰা তেহি পুপ্ফেহি ভগৰন্তং পূজেসি। সা তেন পুঞ্ঞকম্মেন দেৰমনুস্সেসু সংসরন্তী ইমস্মিং বুদ্ধুপ্পাদে কোসম্বিযং কুলঘরে নিব্বত্তিত্ৰা ৰযপ্পত্তা সামাৰতিযা সহাযিকা হুত্ৰা তস্সা মতকালে সংৰেগজাতা পব্বজিত্ৰা পঞ্চৰীসতি ৰস্সানি চিত্তসমাধানং অলভিত্ৰা মহল্লিকাকালে সুগতোৰাদং লভিত্ৰা ৰিপস্সনং ৰড্ঢেত্ৰা সহ পটিসম্ভিদাহি অরহত্তং পাপুণি। তেন ৰুত্তং অপদানে (অপ॰ থেরী ২.২.২২-২৯) –
Tikanipāte paṇṇavīsativassānītiādikā aparāya sāmāya theriyā gāthā. Ayampi purimabuddhesu katādhikārā tattha tattha bhave vivaṭṭūpanissayaṃ kusalaṃ upacinantī vipassissa bhagavato kāle candabhāgāya nadiyā tīre kinnarayoniyaṃ nibbatti. Sā tattha kinnarehi saddhiṃ kīḷāpasutā vicarati. Athekadivasaṃ satthā tassā kusalabījaropanatthaṃ tattha gantvā nadītīre caṅkami. Sā bhagavantaṃ disvā haṭṭhatuṭṭhā saḷalapupphāni ādāya satthu santikaṃ gantvā vanditvā tehi pupphehi bhagavantaṃ pūjesi. Sā tena puññakammena devamanussesu saṃsarantī imasmiṃ buddhuppāde kosambiyaṃ kulaghare nibbattitvā vayappattā sāmāvatiyā sahāyikā hutvā tassā matakāle saṃvegajātā pabbajitvā pañcavīsati vassāni cittasamādhānaṃ alabhitvā mahallikākāle sugatovādaṃ labhitvā vipassanaṃ vaḍḍhetvā saha paṭisambhidāhi arahattaṃ pāpuṇi. Tena vuttaṃ apadāne (apa. therī 2.2.22-29) –
‘‘চন্দভাগানদীতীরে, অহোসিং কিন্নরী তদা।
‘‘Candabhāgānadītīre, ahosiṃ kinnarī tadā;
অদ্দসাহং দেৰদেৰং, চঙ্কমন্তং নরাসভং॥
Addasāhaṃ devadevaṃ, caṅkamantaṃ narāsabhaṃ.
‘‘ওচিনিত্ৰান সল়লং, বুদ্ধসেট্ঠস্সদাসহং।
‘‘Ocinitvāna saḷalaṃ, buddhaseṭṭhassadāsahaṃ;
উপসিঙ্ঘি মহাৰীরো, সল়লং দেৰগন্ধিকং॥
Upasiṅghi mahāvīro, saḷalaṃ devagandhikaṃ.
‘‘পটিগ্গহেত্ৰা সম্বুদ্ধো, ৰিপস্সী লোকনাযকো।
‘‘Paṭiggahetvā sambuddho, vipassī lokanāyako;
উপসিঙ্ঘি মহাৰীরো, পেক্খমানায মে তদা॥
Upasiṅghi mahāvīro, pekkhamānāya me tadā.
‘‘অঞ্জলিং পগ্গহেত্ৰান, ৰন্দিত্ৰা দ্ৰিপদুত্তমং।
‘‘Añjaliṃ paggahetvāna, vanditvā dvipaduttamaṃ;
সকং চিত্তং পসাদেত্ৰা, ততো পব্বতমারুহিং॥
Sakaṃ cittaṃ pasādetvā, tato pabbatamāruhiṃ.
‘‘একনৰুতিতো কপ্পে, যং পুপ্ফমদদিং তদা।
‘‘Ekanavutito kappe, yaṃ pupphamadadiṃ tadā;
দুগ্গতিং নাভিজানামি, বুদ্ধপূজাযিদং ফলং॥
Duggatiṃ nābhijānāmi, buddhapūjāyidaṃ phalaṃ.
‘‘কিলেসা ঝাপিতা ময্হং…পে॰… কতং বুদ্ধস্স সাসন’’ন্তি॥
‘‘Kilesā jhāpitā mayhaṃ…pe… kataṃ buddhassa sāsana’’nti.
অরহত্তং পন পত্ৰা অত্তনো পটিপত্তিং পচ্চৰেক্খিত্ৰা উদানৰসেন –
Arahattaṃ pana patvā attano paṭipattiṃ paccavekkhitvā udānavasena –
৩৯.
39.
‘‘পণ্ণৰীসতি ৰস্সানি, যতো পব্বজিতায মে।
‘‘Paṇṇavīsati vassāni, yato pabbajitāya me;
নাভিজানামি চিত্তস্স, সমং লদ্ধং কুদাচনং॥
Nābhijānāmi cittassa, samaṃ laddhaṃ kudācanaṃ.
৪০.
40.
‘‘অলদ্ধা চেতসো সন্তিং, চিত্তে অৰসৰত্তিনী।
‘‘Aladdhā cetaso santiṃ, citte avasavattinī;
ততো সংৰেগমাপাদিং, সরিত্ৰা জিনসাসনং॥
Tato saṃvegamāpādiṃ, saritvā jinasāsanaṃ.
৪১.
41.
‘‘বহূহি দুক্খধম্মেহি, অপ্পমাদরতায মে।
‘‘Bahūhi dukkhadhammehi, appamādaratāya me;
তণ্হক্খযো অনুপ্পত্তো, কতং বুদ্ধস্স সাসনং।
Taṇhakkhayo anuppatto, kataṃ buddhassa sāsanaṃ;
অজ্জ মে সত্তমী রত্তি, যতো তণ্হা ৰিসোসিতা’’তি॥ –
Ajja me sattamī ratti, yato taṇhā visositā’’ti. –
ইমা গাথা অভাসি।
Imā gāthā abhāsi.
তত্থ চিত্তস্স সমন্তি চিত্তস্স ৰূপসমং, চেতোসমথমগ্গফলসমাধীতি অত্থো।
Tattha cittassa samanti cittassa vūpasamaṃ, cetosamathamaggaphalasamādhīti attho.
ততোতি তস্মা চিত্তৰসং ৰত্তেতুং অসমত্থভাৰতো। সংৰেগমাপাদিন্তি সত্থরি ধরন্তেপি পব্বজিতকিচ্চং মত্থকং পাপেতুং অসক্কোন্তী পচ্ছা কথং পাপযিস্সামীতি সংৰেগং ঞাণুত্রাসং আপজ্জিং। সরিত্ৰা জিনসাসনন্তি কাণকচ্ছপোপমাদিসত্থুওৰাদং (সং॰ নি॰ ৫.১১১৭; ম॰ নি॰ ৩.২৫২) অনুস্সরিত্ৰা। সেসং ৰুত্তনযমেৰ।
Tatoti tasmā cittavasaṃ vattetuṃ asamatthabhāvato. Saṃvegamāpādinti satthari dharantepi pabbajitakiccaṃ matthakaṃ pāpetuṃ asakkontī pacchā kathaṃ pāpayissāmīti saṃvegaṃ ñāṇutrāsaṃ āpajjiṃ. Saritvā jinasāsananti kāṇakacchapopamādisatthuovādaṃ (saṃ. ni. 5.1117; ma. ni. 3.252) anussaritvā. Sesaṃ vuttanayameva.
অপরাসামাথেরীগাথাৰণ্ণনা নিট্ঠিতা।
Aparāsāmātherīgāthāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / থেরীগাথাপাল়ি • Therīgāthāpāḷi / ১. অপরাসামাথেরীগাথা • 1. Aparāsāmātherīgāthā
