| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၇. ဣဒ္ဓိပာဒသံယုတ္တံ
7. Iddhipādasaṃyuttaṃ
၁. စာပာလဝဂ္ဂော
1. Cāpālavaggo
၁. အပာရသုတ္တဝဏ္ဏနာ
1. Apārasuttavaṇṇanā
၈၁၃. ဆန္ဒံ နိသ္သာယ ပဝတ္တော သမာဓီတိ ကတ္တုကမ္ယတာဆန္ဒံ အဓိပတိံ ကတ္ဝာ ပဋိလဒ္ဓသမာဓိ ဆန္ဓသမာဓိ။ ပဓာနသင္ခာရာတိ စတုကိစ္စသာဓကသ္သ သမ္မပ္ပဓာနဝီရိယသ္သေတံ အဓိဝစနံ။ တေဟီတိ ဆန္ဒသမာဓိပဓာနသင္ခာရေဟိ။ ဣဒ္ဓိယာ ပာဒန္တိ နိပ္ဖတ္တိပရိယာယေန ဣဇ္ဈနဋ္ဌေန, ဣဇ္ဈန္တိ ဧတာယ သဒ္ဓာ ဣဒ္ဓာ ဝုဒ္ဓာ ဥက္ကံသဂတာ ဟောန္တီတိ ဣမိနာ ဝာ ပရိယာယေန ‘‘ဣဒ္ဓီ’’တိ သင္ခာတာနံ ဥပစာရဇ္ဈာနာဒိကုသလစိတ္တသမ္ပယုတ္တာနံ ဆန္ဒသမာဓိပဓာနသင္ခာရာနံ အဓိဋ္ဌာနဋ္ဌေန ပာဒဘူတံ, သေသစိတ္တစေတသိကရာသိန္တိ အတ္ထော။ သာ ဧဝ စ ယထာဝုတ္တဣဒ္ဓိ ယသ္မာ ဟေဋ္ဌိမာ ဟေဋ္ဌိမာ ဥပရိမာယ ဥပရိမာယ ပာဒဘူတာ, တသ္မာ ဝုတ္တံ ‘‘ဣဒ္ဓိဘူတံ ဝာ ပာဒန္တိ ဣဒ္ဓိပာဒ’’န္တိ။ သေသေသူတိ ဝီရိယသမာဓိအာဒီသု။ တတ္ထ ဟိ ဝီရိယံ စိတ္တံ ဝီမံသံ အဓိပတိံ ကတ္ဝာ ပဋိလဒ္ဓသမာဓိ ဝီမံသာသမာဓီတိ အတ္ထော ဝေဒိတဗ္ဗော။ ဣဓာတိ ဣမသ္မိံ ဣဒ္ဓိပာဒသံယုတ္တေ။ ဧကပရိစ္ဆေဒောဝ အတ္ထနိဒ္ဒေသော။
813.Chandaṃnissāya pavatto samādhīti kattukamyatāchandaṃ adhipatiṃ katvā paṭiladdhasamādhi chandhasamādhi. Padhānasaṅkhārāti catukiccasādhakassa sammappadhānavīriyassetaṃ adhivacanaṃ. Tehīti chandasamādhipadhānasaṅkhārehi. Iddhiyā pādanti nipphattipariyāyena ijjhanaṭṭhena, ijjhanti etāya saddhā iddhā vuddhā ukkaṃsagatā hontīti iminā vā pariyāyena ‘‘iddhī’’ti saṅkhātānaṃ upacārajjhānādikusalacittasampayuttānaṃ chandasamādhipadhānasaṅkhārānaṃ adhiṭṭhānaṭṭhena pādabhūtaṃ, sesacittacetasikarāsinti attho. Sā eva ca yathāvuttaiddhi yasmā heṭṭhimā heṭṭhimā uparimāya uparimāya pādabhūtā, tasmā vuttaṃ ‘‘iddhibhūtaṃ vā pādanti iddhipāda’’nti. Sesesūti vīriyasamādhiādīsu. Tattha hi vīriyaṃ cittaṃ vīmaṃsaṃ adhipatiṃ katvā paṭiladdhasamādhi vīmaṃsāsamādhīti attho veditabbo. Idhāti imasmiṃ iddhipādasaṃyutte. Ekaparicchedova atthaniddeso.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁. အပာရသုတ္တံ • 1. Apārasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁. အပာရသုတ္တဝဏ္ဏနာ • 1. Apārasuttavaṇṇanā
