| Library / Tipiṭaka / তিপিটক • Tipiṭaka / পঞ্চপকরণ-অনুটীকা • Pañcapakaraṇa-anuṭīkā |
৯. অপরিনিপ্ফন্নকথাৰণ্ণনা
9. Aparinipphannakathāvaṇṇanā
৯১৭-৯১৮. অনিচ্চাদিকো ভাৰোতি অনিচ্চসঙ্খারপটিচ্চসমুপ্পন্নতাদিকো ভাৰো ধম্মো পকতি এতস্সাতি অত্থো। দুক্খঞ্ঞেৰ পরিনিপ্ফন্নন্তি ‘‘দুক্খসচ্চং সন্ধায পুচ্ছা কতা, ন দুক্খতামত্ত’’ন্তি অযমত্থো ৰিঞ্ঞাযতি ‘‘ন কেৰলঞ্হি পঠমসচ্চমেৰ দুক্খ’’ন্তি ৰচনেন। তথা সতি পরৰাদিনা চক্খাযতনাদীনং অঞ্ঞেসঞ্চ তংসরিক্খকানং ধম্মানং পরিনিপ্ফন্নতা নানুজানিতব্বা সিযা। কস্মা? তেসম্পি হি দুক্খসচ্চেন সঙ্গহো, ন ইতরসচ্চেহি। যঞ্হি সমুদযসচ্চতো নিব্বত্তং, তং নিপ্পরিযাযতো দুক্খসচ্চং , ইতরং সঙ্খারদুক্খতায দুক্খন্তি ইমমত্থং দস্সেন্তো ‘‘ন কেৰলঞ্হী’’তিআদিমাহ। তত্থ ন হি অনুপাদিন্নানীতি ইমিনা চক্খাযতনাদীনং সমুদযসচ্চেন সঙ্গহাভাৰমাহ। লোকুত্তরানীতি ইমিনা নিরোধমগ্গসচ্চেহি। যদি এৰমেত্থ যুত্তি ৰত্তব্বা, কিমেত্থ ৰত্তব্বং? সভাৰো হেস পরৰাদিৰাদস্স, যদিদং পুব্বেনাপরমসংসন্দনং। তথা হি সো ৰিঞ্ঞূহি পটিক্খিত্তো। তথা চেৰ তং অম্হেহি তত্থ তত্থ ৰিভাৰিতং। এতন্তি ‘‘রূপং অপরিনিপ্ফন্নং, দুক্খঞ্ঞেৰ পরিনিপ্ফন্ন’’ন্তি যদেতং তযা ৰুত্তং, এতং নো ৰত রে ৰত্তব্বে। কস্মা? রূপস্স চ দুক্খত্তা। রূপঞ্হি অনিচ্চং দুক্খাধিট্ঠানঞ্চ। তেন ৰুত্তং ‘‘যদনিচ্চং তং দুক্খং। সংখিত্তেন পঞ্চুপাদানক্খন্ধা দুক্খা’’তি চ।
917-918. Aniccādikobhāvoti aniccasaṅkhārapaṭiccasamuppannatādiko bhāvo dhammo pakati etassāti attho. Dukkhaññeva parinipphannanti ‘‘dukkhasaccaṃ sandhāya pucchā katā, na dukkhatāmatta’’nti ayamattho viññāyati ‘‘na kevalañhi paṭhamasaccameva dukkha’’nti vacanena. Tathā sati paravādinā cakkhāyatanādīnaṃ aññesañca taṃsarikkhakānaṃ dhammānaṃ parinipphannatā nānujānitabbā siyā. Kasmā? Tesampi hi dukkhasaccena saṅgaho, na itarasaccehi. Yañhi samudayasaccato nibbattaṃ, taṃ nippariyāyato dukkhasaccaṃ , itaraṃ saṅkhāradukkhatāya dukkhanti imamatthaṃ dassento ‘‘na kevalañhī’’tiādimāha. Tattha na hi anupādinnānīti iminā cakkhāyatanādīnaṃ samudayasaccena saṅgahābhāvamāha. Lokuttarānīti iminā nirodhamaggasaccehi. Yadi evamettha yutti vattabbā, kimettha vattabbaṃ? Sabhāvo hesa paravādivādassa, yadidaṃ pubbenāparamasaṃsandanaṃ. Tathā hi so viññūhi paṭikkhitto. Tathā ceva taṃ amhehi tattha tattha vibhāvitaṃ. Etanti ‘‘rūpaṃ aparinipphannaṃ, dukkhaññeva parinipphanna’’nti yadetaṃ tayā vuttaṃ, etaṃ no vata re vattabbe. Kasmā? Rūpassa ca dukkhattā. Rūpañhi aniccaṃ dukkhādhiṭṭhānañca. Tena vuttaṃ ‘‘yadaniccaṃ taṃ dukkhaṃ. Saṃkhittena pañcupādānakkhandhā dukkhā’’ti ca.
অপরিনিপ্ফন্নকথাৰণ্ণনা নিট্ঠিতা।
Aparinipphannakathāvaṇṇanā niṭṭhitā.
তেৰীসতিমৰগ্গৰণ্ণনা নিট্ঠিতা।
Tevīsatimavaggavaṇṇanā niṭṭhitā.
কথাৰত্থুপকরণ-অনুটীকা সমত্তা।
Kathāvatthupakaraṇa-anuṭīkā samattā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (২২৬) ৯. অপরিনিপ্ফন্নকথা • (226) 9. Aparinipphannakathā
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ৯. অপরিনিপ্ফন্নকথাৰণ্ণনা • 9. Aparinipphannakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৯. অপরিনিপ্ফন্নকথাৰণ্ণনা • 9. Aparinipphannakathāvaṇṇanā
