| Library / Tipiṭaka / တိပိဋက • Tipiṭaka / ကထာဝတ္ထုပာဠိ • Kathāvatthupāḷi |
၁၄. စုဒ္ဒသမဝဂ္ဂော
14. Cuddasamavaggo
(၁၄၄) ၉. အပရိယာပန္နကထာ
(144) 9. Apariyāpannakathā
၇၀၉. ဒိဋ္ဌိဂတံ အပရိယာပန္နန္တိ? အာမန္တာ။ မဂ္ဂော ဖလံ နိဗ္ဗာနံ, သောတာပတ္တိမဂ္ဂော သောတာပတ္တိဖလံ, သကဒာဂာမိမဂ္ဂော သကဒာဂာမိဖလံ, အနာဂာမိမဂ္ဂော အနာဂာမိဖလံ, အရဟတ္တမဂ္ဂော အရဟတ္တဖလံ, သတိပဋ္ဌာနံ သမ္မပ္ပဓာနံ ဣဒ္ဓိပာဒော ဣန္ဒ္ရိယံ ဗလံ ဗောဇ္ဈင္ဂောတိ? န ဟေဝံ ဝတ္တဗ္ဗေ။ပေ.။။
709. Diṭṭhigataṃ apariyāpannanti? Āmantā. Maggo phalaṃ nibbānaṃ, sotāpattimaggo sotāpattiphalaṃ, sakadāgāmimaggo sakadāgāmiphalaṃ, anāgāmimaggo anāgāmiphalaṃ, arahattamaggo arahattaphalaṃ, satipaṭṭhānaṃ sammappadhānaṃ iddhipādo indriyaṃ balaṃ bojjhaṅgoti? Na hevaṃ vattabbe…pe….
၇၁၀. န ဝတ္တဗ္ဗံ – ‘‘ဒိဋ္ဌိဂတံ အပရိယာပန္န’’န္တိ? အာမန္တာ။ ပုထုဇ္ဇနော ‘‘ကာမေသု ဝီတရာဂော’’တိ ဝတ္တဗ္ဗောတိ? အာမန္တာ။ ‘‘ဝိဂတဒိဋ္ဌိယော’’တိ ဝတ္တဗ္ဗောတိ? န ဟေဝံ ဝတ္တဗ္ဗေ။ တေန ဟိ ဒိဋ္ဌိဂတံ အပရိယာပန္နန္တိ။
710. Na vattabbaṃ – ‘‘diṭṭhigataṃ apariyāpanna’’nti? Āmantā. Puthujjano ‘‘kāmesu vītarāgo’’ti vattabboti? Āmantā. ‘‘Vigatadiṭṭhiyo’’ti vattabboti? Na hevaṃ vattabbe. Tena hi diṭṭhigataṃ apariyāpannanti.
အပရိယာပန္နကထာ နိဋ္ဌိတာ။
Apariyāpannakathā niṭṭhitā.
စုဒ္ဒသမဝဂ္ဂော။
Cuddasamavaggo.
တသ္သုဒ္ဒာနံ –
Tassuddānaṃ –
အကုသလမူလံ ပဋိသန္ဒဟတိ ကုသလမူလံ, ကုသလမူလံ ပဋိသန္ဒဟတိ အကုသလမူလံ, သဠာယတနံ ဆဝိညာဏကာယာ, အရိယရူပံ မဟာဘူတာနံ ဥပာဒာယ, သ္ဝေဝ အနုသယော တံ ပရိယုဋ္ဌာနံ, ပရိယုဋ္ဌာနံ စိတ္တဝိပ္ပယုတ္တံ, ယထာဓာတု တညေဝ အနုသေတိ, ဒိဋ္ဌိဂတံ အဗ္ယာကတံ, ဒိဋ္ဌိဂတံ အပရိယာပန္နန္တိ။
Akusalamūlaṃ paṭisandahati kusalamūlaṃ, kusalamūlaṃ paṭisandahati akusalamūlaṃ, saḷāyatanaṃ chaviññāṇakāyā, ariyarūpaṃ mahābhūtānaṃ upādāya, sveva anusayo taṃ pariyuṭṭhānaṃ, pariyuṭṭhānaṃ cittavippayuttaṃ, yathādhātu taññeva anuseti, diṭṭhigataṃ abyākataṃ, diṭṭhigataṃ apariyāpannanti.
Related texts:
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၉. အပရိယာပန္နကထာဝဏ္ဏနာ • 9. Apariyāpannakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၉. အပရိယာပန္နကထာဝဏ္ဏနာ • 9. Apariyāpannakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၉. အပရိယာပန္နကထာဝဏ္ဏနာ • 9. Apariyāpannakathāvaṇṇanā
