| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
அபத்தகாதி³வத்து²கதா²
Apattakādivatthukathā
118. ஹத்தே²ஸு பிண்டா³ய சரந்தீதி யோ ஹத்தே²ஸு பிண்டோ³ லப்³ப⁴தி, தத³த்தா²ய சரந்தி. ஸெய்யதா²பி தித்தி²யாதி யதா² ஆஜீவகனாமகா தித்தி²யா; ஸூபப்³யஞ்ஜனேஹி மிஸ்ஸெத்வா ஹத்தே²ஸு ட²பிதபிண்ட³மேவ ஹி தே பு⁴ஞ்ஜந்தி. ஆபத்தி து³க்கடஸ்ஸாதி ஏவங் உபஸம்பாதெ³ந்தஸ்ஸேவ ஆபத்தி ஹோதி, கம்மங் பன ந குப்பதி. அசீவரகாதி³வத்தூ²ஸுபி ஏஸேவ நயோ.
118.Hatthesu piṇḍāya carantīti yo hatthesu piṇḍo labbhati, tadatthāya caranti. Seyyathāpi titthiyāti yathā ājīvakanāmakā titthiyā; sūpabyañjanehi missetvā hatthesu ṭhapitapiṇḍameva hi te bhuñjanti. Āpatti dukkaṭassāti evaṃ upasampādentasseva āpatti hoti, kammaṃ pana na kuppati. Acīvarakādivatthūsupi eseva nayo.
யாசிதகேனாதி ‘‘யாவ உபஸம்பத³ங் கரோம, தாவ தே³தா²’’தி யாசித்வா க³ஹிதேன; தாவகாலிகேனாதி அத்தோ². ஈதி³ஸேன ஹி பத்தேன வா சீவரேன வா பத்தசீவரேன வா உபஸம்பாதெ³ந்தஸ்ஸேவ ஆபத்தி ஹோதி, கம்மங் பன ந குப்பதி, தஸ்மா பரிபுண்ணபத்தசீவரோவ உபஸம்பாதே³தப்³போ³. ஸசே தஸ்ஸ நத்தி², ஆசரியுபஜ்ஜா²யா சஸ்ஸ தா³துகாமா ஹொந்தி, அஞ்ஞே வா பி⁴க்கூ² நிரபெக்கே²ஹி நிஸ்ஸஜ்ஜித்வா அதி⁴ட்டா²னுபக³ங் பத்தசீவரங் தா³தப்³ப³ங். பப்³ப³ஜ்ஜாபெக்க²ங் பன பண்டு³பலாஸங் யாசிதகேனாபி பத்தசீவரேன பப்³பா³ஜேதுங் வட்டதி, ஸபா⁴க³ட்டா²னே விஸ்ஸாஸேன க³ஹெத்வாபி பப்³பா³ஜேதுங் வட்டதி.
Yācitakenāti ‘‘yāva upasampadaṃ karoma, tāva dethā’’ti yācitvā gahitena; tāvakālikenāti attho. Īdisena hi pattena vā cīvarena vā pattacīvarena vā upasampādentasseva āpatti hoti, kammaṃ pana na kuppati, tasmā paripuṇṇapattacīvarova upasampādetabbo. Sace tassa natthi, ācariyupajjhāyā cassa dātukāmā honti, aññe vā bhikkhū nirapekkhehi nissajjitvā adhiṭṭhānupagaṃ pattacīvaraṃ dātabbaṃ. Pabbajjāpekkhaṃ pana paṇḍupalāsaṃ yācitakenāpi pattacīvarena pabbājetuṃ vaṭṭati, sabhāgaṭṭhāne vissāsena gahetvāpi pabbājetuṃ vaṭṭati.
ஸசே பன அபக்கங் பத்தங் சீவரூபகா³னி ச வத்தா²னி க³ஹெத்வா ஆக³தோ ஹோதி, யாவ பத்தோ பச்சதி, சீவரானி ச கரியந்தி, தாவ விஹாரே வஸந்தஸ்ஸ அனாமட்ட²பிண்ட³பாதங் தா³துங் வட்டதி, தா²லகே பு⁴ஞ்ஜிதுங் வட்டதி, புரேப⁴த்தங் ஸாமணேரபா⁴க³ஸமகோ ஆமிஸபா⁴கோ³ தா³துங் வட்டதி. ஸேனாஸனக்³கா³ஹோ பன ஸலாகப⁴த்தஉத்³தே³ஸப⁴த்தனிமந்தனாதீ³னி ச ந வட்டந்தி. பச்சா²ப⁴த்தம்பி ஸாமணேரபா⁴க³ஸமோ தேலமது⁴பா²ணிதாதி³பே⁴ஸஜ்ஜபா⁴கோ³ வட்டதி. ஸசே கி³லானோ ஹோதி, பே⁴ஸஜ்ஜமஸ்ஸ காதுங் வட்டதி, ஸாமணேரஸ்ஸ விய ச ஸப்³ப³ங் படிஜக்³க³னகம்மந்தி.
Sace pana apakkaṃ pattaṃ cīvarūpagāni ca vatthāni gahetvā āgato hoti, yāva patto paccati, cīvarāni ca kariyanti, tāva vihāre vasantassa anāmaṭṭhapiṇḍapātaṃ dātuṃ vaṭṭati, thālake bhuñjituṃ vaṭṭati, purebhattaṃ sāmaṇerabhāgasamako āmisabhāgo dātuṃ vaṭṭati. Senāsanaggāho pana salākabhattauddesabhattanimantanādīni ca na vaṭṭanti. Pacchābhattampi sāmaṇerabhāgasamo telamadhuphāṇitādibhesajjabhāgo vaṭṭati. Sace gilāno hoti, bhesajjamassa kātuṃ vaṭṭati, sāmaṇerassa viya ca sabbaṃ paṭijagganakammanti.
அபத்தகாதி³வத்து²கதா² நிட்டி²தா.
Apattakādivatthukathā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 56. அபத்தகாதி³வத்து² • 56. Apattakādivatthu
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / அபத்தகாதி³வத்து²கதா²வண்ணனா • Apattakādivatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / அபத்தகாதி³வத்து²கதா²வண்ணனா • Apattakādivatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / அபத்தகாதி³வத்து²கதா²வண்ணனா • Apattakādivatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 56. அபத்தகாதி³வத்து²கதா² • 56. Apattakādivatthukathā
