| Library / Tipiṭaka / ತಿಪಿಟಕ • Tipiṭaka / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā |
ಅಪತ್ತಕಾದಿವತ್ಥುಕಥಾ
Apattakādivatthukathā
೧೧೮. ಹತ್ಥೇಸು ಪಿಣ್ಡಾಯ ಚರನ್ತೀತಿ ಯೋ ಹತ್ಥೇಸು ಪಿಣ್ಡೋ ಲಬ್ಭತಿ, ತದತ್ಥಾಯ ಚರನ್ತಿ। ಸೇಯ್ಯಥಾಪಿ ತಿತ್ಥಿಯಾತಿ ಯಥಾ ಆಜೀವಕನಾಮಕಾ ತಿತ್ಥಿಯಾ; ಸೂಪಬ್ಯಞ್ಜನೇಹಿ ಮಿಸ್ಸೇತ್ವಾ ಹತ್ಥೇಸು ಠಪಿತಪಿಣ್ಡಮೇವ ಹಿ ತೇ ಭುಞ್ಜನ್ತಿ। ಆಪತ್ತಿ ದುಕ್ಕಟಸ್ಸಾತಿ ಏವಂ ಉಪಸಮ್ಪಾದೇನ್ತಸ್ಸೇವ ಆಪತ್ತಿ ಹೋತಿ, ಕಮ್ಮಂ ಪನ ನ ಕುಪ್ಪತಿ। ಅಚೀವರಕಾದಿವತ್ಥೂಸುಪಿ ಏಸೇವ ನಯೋ।
118.Hatthesu piṇḍāya carantīti yo hatthesu piṇḍo labbhati, tadatthāya caranti. Seyyathāpi titthiyāti yathā ājīvakanāmakā titthiyā; sūpabyañjanehi missetvā hatthesu ṭhapitapiṇḍameva hi te bhuñjanti. Āpatti dukkaṭassāti evaṃ upasampādentasseva āpatti hoti, kammaṃ pana na kuppati. Acīvarakādivatthūsupi eseva nayo.
ಯಾಚಿತಕೇನಾತಿ ‘‘ಯಾವ ಉಪಸಮ್ಪದಂ ಕರೋಮ, ತಾವ ದೇಥಾ’’ತಿ ಯಾಚಿತ್ವಾ ಗಹಿತೇನ; ತಾವಕಾಲಿಕೇನಾತಿ ಅತ್ಥೋ। ಈದಿಸೇನ ಹಿ ಪತ್ತೇನ ವಾ ಚೀವರೇನ ವಾ ಪತ್ತಚೀವರೇನ ವಾ ಉಪಸಮ್ಪಾದೇನ್ತಸ್ಸೇವ ಆಪತ್ತಿ ಹೋತಿ, ಕಮ್ಮಂ ಪನ ನ ಕುಪ್ಪತಿ, ತಸ್ಮಾ ಪರಿಪುಣ್ಣಪತ್ತಚೀವರೋವ ಉಪಸಮ್ಪಾದೇತಬ್ಬೋ। ಸಚೇ ತಸ್ಸ ನತ್ಥಿ, ಆಚರಿಯುಪಜ್ಝಾಯಾ ಚಸ್ಸ ದಾತುಕಾಮಾ ಹೋನ್ತಿ, ಅಞ್ಞೇ ವಾ ಭಿಕ್ಖೂ ನಿರಪೇಕ್ಖೇಹಿ ನಿಸ್ಸಜ್ಜಿತ್ವಾ ಅಧಿಟ್ಠಾನುಪಗಂ ಪತ್ತಚೀವರಂ ದಾತಬ್ಬಂ। ಪಬ್ಬಜ್ಜಾಪೇಕ್ಖಂ ಪನ ಪಣ್ಡುಪಲಾಸಂ ಯಾಚಿತಕೇನಾಪಿ ಪತ್ತಚೀವರೇನ ಪಬ್ಬಾಜೇತುಂ ವಟ್ಟತಿ, ಸಭಾಗಟ್ಠಾನೇ ವಿಸ್ಸಾಸೇನ ಗಹೇತ್ವಾಪಿ ಪಬ್ಬಾಜೇತುಂ ವಟ್ಟತಿ।
Yācitakenāti ‘‘yāva upasampadaṃ karoma, tāva dethā’’ti yācitvā gahitena; tāvakālikenāti attho. Īdisena hi pattena vā cīvarena vā pattacīvarena vā upasampādentasseva āpatti hoti, kammaṃ pana na kuppati, tasmā paripuṇṇapattacīvarova upasampādetabbo. Sace tassa natthi, ācariyupajjhāyā cassa dātukāmā honti, aññe vā bhikkhū nirapekkhehi nissajjitvā adhiṭṭhānupagaṃ pattacīvaraṃ dātabbaṃ. Pabbajjāpekkhaṃ pana paṇḍupalāsaṃ yācitakenāpi pattacīvarena pabbājetuṃ vaṭṭati, sabhāgaṭṭhāne vissāsena gahetvāpi pabbājetuṃ vaṭṭati.
ಸಚೇ ಪನ ಅಪಕ್ಕಂ ಪತ್ತಂ ಚೀವರೂಪಗಾನಿ ಚ ವತ್ಥಾನಿ ಗಹೇತ್ವಾ ಆಗತೋ ಹೋತಿ, ಯಾವ ಪತ್ತೋ ಪಚ್ಚತಿ, ಚೀವರಾನಿ ಚ ಕರಿಯನ್ತಿ, ತಾವ ವಿಹಾರೇ ವಸನ್ತಸ್ಸ ಅನಾಮಟ್ಠಪಿಣ್ಡಪಾತಂ ದಾತುಂ ವಟ್ಟತಿ, ಥಾಲಕೇ ಭುಞ್ಜಿತುಂ ವಟ್ಟತಿ, ಪುರೇಭತ್ತಂ ಸಾಮಣೇರಭಾಗಸಮಕೋ ಆಮಿಸಭಾಗೋ ದಾತುಂ ವಟ್ಟತಿ। ಸೇನಾಸನಗ್ಗಾಹೋ ಪನ ಸಲಾಕಭತ್ತಉದ್ದೇಸಭತ್ತನಿಮನ್ತನಾದೀನಿ ಚ ನ ವಟ್ಟನ್ತಿ। ಪಚ್ಛಾಭತ್ತಮ್ಪಿ ಸಾಮಣೇರಭಾಗಸಮೋ ತೇಲಮಧುಫಾಣಿತಾದಿಭೇಸಜ್ಜಭಾಗೋ ವಟ್ಟತಿ। ಸಚೇ ಗಿಲಾನೋ ಹೋತಿ, ಭೇಸಜ್ಜಮಸ್ಸ ಕಾತುಂ ವಟ್ಟತಿ, ಸಾಮಣೇರಸ್ಸ ವಿಯ ಚ ಸಬ್ಬಂ ಪಟಿಜಗ್ಗನಕಮ್ಮನ್ತಿ।
Sace pana apakkaṃ pattaṃ cīvarūpagāni ca vatthāni gahetvā āgato hoti, yāva patto paccati, cīvarāni ca kariyanti, tāva vihāre vasantassa anāmaṭṭhapiṇḍapātaṃ dātuṃ vaṭṭati, thālake bhuñjituṃ vaṭṭati, purebhattaṃ sāmaṇerabhāgasamako āmisabhāgo dātuṃ vaṭṭati. Senāsanaggāho pana salākabhattauddesabhattanimantanādīni ca na vaṭṭanti. Pacchābhattampi sāmaṇerabhāgasamo telamadhuphāṇitādibhesajjabhāgo vaṭṭati. Sace gilāno hoti, bhesajjamassa kātuṃ vaṭṭati, sāmaṇerassa viya ca sabbaṃ paṭijagganakammanti.
ಅಪತ್ತಕಾದಿವತ್ಥುಕಥಾ ನಿಟ್ಠಿತಾ।
Apattakādivatthukathā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಗ್ಗಪಾಳಿ • Mahāvaggapāḷi / ೫೬. ಅಪತ್ತಕಾದಿವತ್ಥು • 56. Apattakādivatthu
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಅಪತ್ತಕಾದಿವತ್ಥುಕಥಾವಣ್ಣನಾ • Apattakādivatthukathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಅಪತ್ತಕಾದಿವತ್ಥುಕಥಾವಣ್ಣನಾ • Apattakādivatthukathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಅಪತ್ತಕಾದಿವತ್ಥುಕಥಾವಣ್ಣನಾ • Apattakādivatthukathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೫೬. ಅಪತ್ತಕಾದಿವತ್ಥುಕಥಾ • 56. Apattakādivatthukathā
