| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
অপত্তকাদিৰত্থুকথাৰণ্ণনা
Apattakādivatthukathāvaṇṇanā
১১৮. অপত্তচীৰরৰত্থূসুপি পত্তচীৰরানং অভাৰেপি ‘‘পরিপুণ্ণস্স পত্তচীৰর’’ন্তি কম্মৰাচায সাৰিতত্তা কম্মকোপং অৰত্ৰা দুক্কটমেৰ ৰুত্তং। ইতরথা সাৰনায হাপনতো কম্মকোপো এৰ সিযা। কেচি পন ‘‘পঠমং অনুঞ্ঞাতকম্মৰাচায উপসম্পন্না ৰিয ইদানিপি ‘পরিপুণ্ণস্স পত্তচীৰর’ন্তি অৰত্ৰা কম্মৰাচায উপসম্পন্নাপি সূপসম্পন্নাএৰা’’তি ৰদন্তি, তং ন যুত্তং। অনুঞ্ঞাতকালতো পট্ঠায হি অপরামসনং সাৰনায হাপনৰিপত্তি এৰ হোতি ‘‘ইত্থন্নামো সঙ্ঘং উপসম্পদং যাচতী’’তি পদস্স হাপনে ৰিয। তম্পি হি পচ্ছা অনুঞ্ঞাতং, ‘‘সঙ্ঘং, ভন্তে, উপসম্পদং যাচামী’’তিআদিৰাক্যেন অযাচেত্ৰা তম্পি উপসম্পাদেন্তো ‘‘অযং ইত্থন্নামো সঙ্ঘং উপসম্পদং যাচতী’’তি ৰত্ৰাৰ যদি কম্মৰাচং করোতি, কম্মং সুকতমেৰ হোতি , নো চে ৰিপন্নং। সব্বপচ্ছা হি অনুঞ্ঞাতকম্মৰাচতো কিঞ্চিপি পরিহাপেতুং ন ৰট্টতি, সাৰনায হাপনমেৰ হোতি। অঞ্ঞে ৰা ভিক্খূ দাতুকামা হোন্তীতি সম্বন্ধো।
118. Apattacīvaravatthūsupi pattacīvarānaṃ abhāvepi ‘‘paripuṇṇassa pattacīvara’’nti kammavācāya sāvitattā kammakopaṃ avatvā dukkaṭameva vuttaṃ. Itarathā sāvanāya hāpanato kammakopo eva siyā. Keci pana ‘‘paṭhamaṃ anuññātakammavācāya upasampannā viya idānipi ‘paripuṇṇassa pattacīvara’nti avatvā kammavācāya upasampannāpi sūpasampannāevā’’ti vadanti, taṃ na yuttaṃ. Anuññātakālato paṭṭhāya hi aparāmasanaṃ sāvanāya hāpanavipatti eva hoti ‘‘itthannāmo saṅghaṃ upasampadaṃ yācatī’’ti padassa hāpane viya. Tampi hi pacchā anuññātaṃ, ‘‘saṅghaṃ, bhante, upasampadaṃ yācāmī’’tiādivākyena ayācetvā tampi upasampādento ‘‘ayaṃ itthannāmo saṅghaṃ upasampadaṃ yācatī’’ti vatvāva yadi kammavācaṃ karoti, kammaṃ sukatameva hoti , no ce vipannaṃ. Sabbapacchā hi anuññātakammavācato kiñcipi parihāpetuṃ na vaṭṭati, sāvanāya hāpanameva hoti. Aññe vā bhikkhū dātukāmā hontīti sambandho.
অনামট্ঠপিণ্ডপাতন্তি ভিক্খূহি লদ্ধভিক্খতো অগ্গহিতগ্গং পিণ্ডপাতং। সামণেরভাগসমকোতি এত্থ কিঞ্চাপি সামণেরানম্পি আমিসভাগস্স সমকমেৰ দিয্যমানত্তা ৰিসুং সামণেরভাগো নাম নত্থি, পত্তচীৰরপরিকম্মমত্তপটিবদ্ধপব্বজ্জতায পন সামণেরসদিসা এতে পণ্ডুপলাসাতি দস্সনত্থং এৰং ৰুত্তন্তি দট্ঠব্বং। নিযতাসন্নপব্বজ্জস্সেৰ চাযং ভাগো দীযতি। তেনেৰ ‘‘যাৰ পত্তো পচ্চতী’’তিআদি ৰুত্তং। আমিসভাগোতি ৰিহারে দিন্নং সঙ্ঘভত্তং, তত্রুপ্পাদঞ্চ সন্ধায ৰুত্তং, ন দাযকানং গেহেসু তেহি দিয্যমানং। তেনেৰ সলাকভত্তাদি পটিক্খিত্তং, দাযকা ৰিপ্পটিসারিনো হোন্তীতি। ভেসজ্জন্তিআদিনা পন গিহীনং ভেসজ্জকরণাদিদোসো এত্থ ন হোতীতি দস্সেতি।
Anāmaṭṭhapiṇḍapātanti bhikkhūhi laddhabhikkhato aggahitaggaṃ piṇḍapātaṃ. Sāmaṇerabhāgasamakoti ettha kiñcāpi sāmaṇerānampi āmisabhāgassa samakameva diyyamānattā visuṃ sāmaṇerabhāgo nāma natthi, pattacīvaraparikammamattapaṭibaddhapabbajjatāya pana sāmaṇerasadisā ete paṇḍupalāsāti dassanatthaṃ evaṃ vuttanti daṭṭhabbaṃ. Niyatāsannapabbajjasseva cāyaṃ bhāgo dīyati. Teneva ‘‘yāva patto paccatī’’tiādi vuttaṃ. Āmisabhāgoti vihāre dinnaṃ saṅghabhattaṃ, tatruppādañca sandhāya vuttaṃ, na dāyakānaṃ gehesu tehi diyyamānaṃ. Teneva salākabhattādi paṭikkhittaṃ, dāyakā vippaṭisārino hontīti. Bhesajjantiādinā pana gihīnaṃ bhesajjakaraṇādidoso ettha na hotīti dasseti.
অপত্তকাদিৰত্থুকথাৰণ্ণনা নিট্ঠিতা।
Apattakādivatthukathāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ৫৬. অপত্তকাদিৰত্থু • 56. Apattakādivatthu
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / অপত্তকাদিৰত্থুকথা • Apattakādivatthukathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / অপত্তকাদিৰত্থুকথাৰণ্ণনা • Apattakādivatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / অপত্তকাদিৰত্থুকথাৰণ্ণনা • Apattakādivatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৫৬. অপত্তকাদিৰত্থুকথা • 56. Apattakādivatthukathā
