| Library / Tipiṭaka / තිපිටක • Tipiṭaka / විමතිවිනොදනී-ටීකා • Vimativinodanī-ṭīkā |
අපත්‌තකාදිවත්‌ථුකථාවණ්‌ණනා
Apattakādivatthukathāvaṇṇanā
118. අපත්‌තචීවරවත්‌ථූසුපි පත්‌තචීවරානං අභාවෙපි ‘‘පරිපුණ්‌ණස්‌ස පත්‌තචීවර’’න්‌ති කම්‌මවාචාය සාවිතත්‌තා කම්‌මකොපං අවත්‌වා දුක්‌කටමෙව වුත්‌තං. ඉතරථා සාවනාය හාපනතො කම්‌මකොපො එව සියා. කෙචි පන ‘‘පඨමං අනුඤ්‌ඤාතකම්‌මවාචාය උපසම්‌පන්‌නා විය ඉදානිපි ‘පරිපුණ්‌ණස්‌ස පත්‌තචීවර’න්‌ති අවත්‌වා කම්‌මවාචාය උපසම්‌පන්‌නාපි සූපසම්‌පන්‌නාඑවා’’ති වදන්‌ති, තං න යුත්‌තං. අනුඤ්‌ඤාතකාලතො පට්‌ඨාය හි අපරාමසනං සාවනාය හාපනවිපත්‌ති එව හොති ‘‘ඉත්‌ථන්‌නාමො සඞ්‌ඝං උපසම්‌පදං යාචතී’’ති පදස්‌ස හාපනෙ විය. තම්‌පි හි පච්‌ඡා අනුඤ්‌ඤාතං, ‘‘සඞ්‌ඝං, භන්‌තෙ, උපසම්‌පදං යාචාමී’’තිආදිවාක්‍යෙන අයාචෙත්‌වා තම්‌පි උපසම්‌පාදෙන්‌තො ‘‘අයං ඉත්‌ථන්‌නාමො සඞ්‌ඝං උපසම්‌පදං යාචතී’’ති වත්‌වාව යදි කම්‌මවාචං කරොති, කම්‌මං සුකතමෙව හොති , නො චෙ විපන්‌නං. සබ්‌බපච්‌ඡා හි අනුඤ්‌ඤාතකම්‌මවාචතො කිඤ්‌චිපි පරිහාපෙතුං න වට්‌ටති, සාවනාය හාපනමෙව හොති. අඤ්‌ඤෙ වා භික්‌ඛූ දාතුකාමා හොන්‌තීති සම්‌බන්‌ධො.
118. Apattacīvaravatthūsupi pattacīvarānaṃ abhāvepi ‘‘paripuṇṇassa pattacīvara’’nti kammavācāya sāvitattā kammakopaṃ avatvā dukkaṭameva vuttaṃ. Itarathā sāvanāya hāpanato kammakopo eva siyā. Keci pana ‘‘paṭhamaṃ anuññātakammavācāya upasampannā viya idānipi ‘paripuṇṇassa pattacīvara’nti avatvā kammavācāya upasampannāpi sūpasampannāevā’’ti vadanti, taṃ na yuttaṃ. Anuññātakālato paṭṭhāya hi aparāmasanaṃ sāvanāya hāpanavipatti eva hoti ‘‘itthannāmo saṅghaṃ upasampadaṃ yācatī’’ti padassa hāpane viya. Tampi hi pacchā anuññātaṃ, ‘‘saṅghaṃ, bhante, upasampadaṃ yācāmī’’tiādivākyena ayācetvā tampi upasampādento ‘‘ayaṃ itthannāmo saṅghaṃ upasampadaṃ yācatī’’ti vatvāva yadi kammavācaṃ karoti, kammaṃ sukatameva hoti , no ce vipannaṃ. Sabbapacchā hi anuññātakammavācato kiñcipi parihāpetuṃ na vaṭṭati, sāvanāya hāpanameva hoti. Aññe vā bhikkhū dātukāmā hontīti sambandho.
අනාමට්‌ඨපිණ්‌ඩපාතන්‌ති භික්‌ඛූහි ලද්‌ධභික්‌ඛතො අග්‌ගහිතග්‌ගං පිණ්‌ඩපාතං. සාමණෙරභාගසමකොති එත්‌ථ කිඤ්‌චාපි සාමණෙරානම්‌පි ආමිසභාගස්‌ස සමකමෙව දිය්‍යමානත්‌තා විසුං සාමණෙරභාගො නාම නත්‌ථි, පත්‌තචීවරපරිකම්‌මමත්‌තපටිබද්‌ධපබ්‌බජ්‌ජතාය පන සාමණෙරසදිසා එතෙ පණ්‌ඩුපලාසාති දස්‌සනත්‌ථං එවං වුත්‌තන්‌ති දට්‌ඨබ්‌බං. නියතාසන්‌නපබ්‌බජ්‌ජස්‌සෙව චායං භාගො දීයති. තෙනෙව ‘‘යාව පත්‌තො පච්‌චතී’’තිආදි වුත්‌තං. ආමිසභාගොති විහාරෙ දින්‌නං සඞ්‌ඝභත්‌තං, තත්‍රුප්‌පාදඤ්‌ච සන්‌ධාය වුත්‌තං, න දායකානං ගෙහෙසු තෙහි දිය්‍යමානං. තෙනෙව සලාකභත්‌තාදි පටික්‌ඛිත්‌තං, දායකා විප්‌පටිසාරිනො හොන්‌තීති. භෙසජ්‌ජන්‌තිආදිනා පන ගිහීනං භෙසජ්‌ජකරණාදිදොසො එත්‌ථ න හොතීති දස්‌සෙති.
Anāmaṭṭhapiṇḍapātanti bhikkhūhi laddhabhikkhato aggahitaggaṃ piṇḍapātaṃ. Sāmaṇerabhāgasamakoti ettha kiñcāpi sāmaṇerānampi āmisabhāgassa samakameva diyyamānattā visuṃ sāmaṇerabhāgo nāma natthi, pattacīvaraparikammamattapaṭibaddhapabbajjatāya pana sāmaṇerasadisā ete paṇḍupalāsāti dassanatthaṃ evaṃ vuttanti daṭṭhabbaṃ. Niyatāsannapabbajjasseva cāyaṃ bhāgo dīyati. Teneva ‘‘yāva patto paccatī’’tiādi vuttaṃ. Āmisabhāgoti vihāre dinnaṃ saṅghabhattaṃ, tatruppādañca sandhāya vuttaṃ, na dāyakānaṃ gehesu tehi diyyamānaṃ. Teneva salākabhattādi paṭikkhittaṃ, dāyakā vippaṭisārino hontīti. Bhesajjantiādinā pana gihīnaṃ bhesajjakaraṇādidoso ettha na hotīti dasseti.
අපත්‌තකාදිවත්‌ථුකථාවණ්‌ණනා නිට්‌ඨිතා.
Apattakādivatthukathāvaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවග්‌ගපාළි • Mahāvaggapāḷi / 56. අපත්‌තකාදිවත්‌ථු • 56. Apattakādivatthu
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / අපත්‌තකාදිවත්‌ථුකථා • Apattakādivatthukathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / අපත්‌තකාදිවත්‌ථුකථාවණ්‌ණනා • Apattakādivatthukathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / අපත්‌තකාදිවත්‌ථුකථාවණ්‌ණනා • Apattakādivatthukathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 56. අපත්‌තකාදිවත්‌ථුකථා • 56. Apattakādivatthukathā
