| Library / Tipiṭaka / တိပိဋက • Tipiṭaka / သာရတ္ထဒီပနီ-ဋီကာ • Sāratthadīpanī-ṭīkā |
အာပတ္တာနာပတ္တိဝာရဝဏ္ဏနာ
Āpattānāpattivāravaṇṇanā
၆၆. ပဋိညာကရဏံ နတ္ထီတိ ပုစ္ဆိတဗ္ဗာဘာဝတော။ န ဟိ ဒူသကော ‘‘ကေန စိတ္တေန ဝီတိက္ကမံ အကာသိ, ဇာနိတ္ဝာ အကာသိ, ဥဒာဟု အဇာနိတ္ဝာ’’တိ ဧဝံ ပုစ္ဆာယ အရဟတိ။ တတ္ထေဝာတိ ဝေသာလိယံ မဟာဝနေ ဧဝ။ သဗ္ဗင္ဂဂတန္တိ ဌပေတ္ဝာ ကေသလောမဒန္တနခာနံ မံသဝိနိမုတ္တဋ္ဌာနဉ္စေဝ ထဒ္ဓသုက္ခစမ္မဉ္စ ဥဒကမိဝ တေလဗိန္ဒု အဝသေသသဗ္ဗသရီရံ ဗ္ယာပေတ္ဝာ ဌိတံ။ သရီရကမ္ပာဒီနီတိ အာဒိ-သဒ္ဒေန အက္ခီနံ ပီတဝဏ္ဏာဒိံ သင္ဂဏ္ဟာတိ။ ပိတ္တကောသကေ ဌိတန္တိ ဟဒယပပ္ဖာသာနံ အန္တရေ ယကနမံသံ နိသ္သာယ ပတိဋ္ဌိတေ မဟာကောသာတကီကောသသဒိသေ ပိတ္တကောသေ ဌိတံ။ ကုပိတေတိ ပိတ္တကောသတော စလိတ္ဝာ ဗဟိ နိက္ခန္တေ။
66.Paṭiññākaraṇaṃnatthīti pucchitabbābhāvato. Na hi dūsako ‘‘kena cittena vītikkamaṃ akāsi, jānitvā akāsi, udāhu ajānitvā’’ti evaṃ pucchāya arahati. Tatthevāti vesāliyaṃ mahāvane eva. Sabbaṅgagatanti ṭhapetvā kesalomadantanakhānaṃ maṃsavinimuttaṭṭhānañceva thaddhasukkhacammañca udakamiva telabindu avasesasabbasarīraṃ byāpetvā ṭhitaṃ. Sarīrakampādīnīti ādi-saddena akkhīnaṃ pītavaṇṇādiṃ saṅgaṇhāti. Pittakosake ṭhitanti hadayapapphāsānaṃ antare yakanamaṃsaṃ nissāya patiṭṭhite mahākosātakīkosasadise pittakose ṭhitaṃ. Kupiteti pittakosato calitvā bahi nikkhante.
ဝိသ္သဋ္ဌစိတ္တောတိ ဝိသ္သဋ္ဌပကတိစိတ္တော။ ယက္ခုမ္မတ္တကောတိ ယက္ခာ ကိရ ယသ္သ စိတ္တံ ခိပိတုကာမာ ဟောန္တိ, တသ္သ သေတမုခံ နီလောဒရံ သုရတ္တဟတ္ထပာဒံ မဟာသီသံ ပဇ္ဇလိတနေတ္တံ ဘေရဝံ ဝာ အတ္တဘာဝံ နိမ္မိနိတ္ဝာ ဒသ္သေန္တိ, ဘေရဝံ ဝာ သဒ္ဒံ သာဝေန္တိ, ကထေန္တသ္သေဝ ဝာ မုခေန ဟတ္ထံ ပက္ခိပိတ္ဝာ ဟဒယမံသံ မဒ္ဒန္တိ, တေန သော သတ္တော ဥမ္မတ္တကော ဟောတိ ခိတ္တစိတ္တော။ တေနေဝာဟ ‘‘ဘေရဝာနိ ဝာ အာရမ္မဏာနိ ဒသ္သေတ္ဝာ’’တိအာဒိ။ တတ္ထ ဘေရဝာနီတိ ဒသ္သနမတ္တေနေဝ သတ္တာနံ ဘယံ ဆမ္ဘိတတ္တံ လောမဟံသံ ဥပ္ပာဒေတုံ သမတ္ထာနိ။ နိစ္စမေဝ ဥမ္မတ္တကော ဟောတီတိ ယသ္သ ပိတ္တကောသတော ပိတ္တံ စလိတ္ဝာ ဗဟိ နိက္ခန္တံ ဟောတိ, တံ သန္ဓာယ ဝုတ္တံ။ ယသ္သ ပန ပိတ္တံ စလိတ္ဝာ ပိတ္တကောသေယေဝ ဌိတံ ဟောတိ ဗဟိ အနိက္ခန္တံ, သော အန္တရန္တရာ သညံ ပဋိလဘတိ, န နိစ္စမေဝ ဥမ္မတ္တကော ဟောတီတိ ဝေဒိတဗ္ဗံ။ ဉတ္ဝာတိ သညာပဋိလာဘေန ဇာနိတ္ဝာ။ အဓိမတ္တာယာတိ အဓိကပ္ပမာဏာယ။
Vissaṭṭhacittoti vissaṭṭhapakaticitto. Yakkhummattakoti yakkhā kira yassa cittaṃ khipitukāmā honti, tassa setamukhaṃ nīlodaraṃ surattahatthapādaṃ mahāsīsaṃ pajjalitanettaṃ bheravaṃ vā attabhāvaṃ nimminitvā dassenti, bheravaṃ vā saddaṃ sāventi, kathentasseva vā mukhena hatthaṃ pakkhipitvā hadayamaṃsaṃ maddanti, tena so satto ummattako hoti khittacitto. Tenevāha ‘‘bheravāni vā ārammaṇāni dassetvā’’tiādi. Tattha bheravānīti dassanamatteneva sattānaṃ bhayaṃ chambhitattaṃ lomahaṃsaṃ uppādetuṃ samatthāni. Niccameva ummattako hotīti yassa pittakosato pittaṃ calitvā bahi nikkhantaṃ hoti, taṃ sandhāya vuttaṃ. Yassa pana pittaṃ calitvā pittakoseyeva ṭhitaṃ hoti bahi anikkhantaṃ, so antarantarā saññaṃ paṭilabhati, na niccameva ummattako hotīti veditabbaṃ. Ñatvāti saññāpaṭilābhena jānitvā. Adhimattāyāti adhikappamāṇāya.
အာပတ္တာနာပတ္တိဝာရဝဏ္ဏနာ နိဋ္ဌိတာ။
Āpattānāpattivāravaṇṇanā niṭṭhitā.
ပဒဘာဇနီယဝဏ္ဏနာ နိဋ္ဌိတာ။
Padabhājanīyavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၁. ပဌမပာရာဇိကံ • 1. Paṭhamapārājikaṃ
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā / ၁. ပဌမပာရာဇိကံ • 1. Paṭhamapārājikaṃ
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / အာပတ္တာနာပတ္တိဝာရဝဏ္ဏနာ • Āpattānāpattivāravaṇṇanā
