| Library / Tipiṭaka / திபிடக • Tipiṭaka / மஹாவக்³க³பாளி • Mahāvaggapāḷi |
93. ஆபத்திஆவிகரணவிதி⁴
93. Āpattiāvikaraṇavidhi
170. தேன கோ² பன ஸமயேன அஞ்ஞதரோ பி⁴க்கு² பாதிமொக்கே² உத்³தி³ஸ்ஸமானே ஆபத்திங் ஸரதி. அத² கோ² தஸ்ஸ பி⁴க்கு²னோ ஏதத³ஹோஸி – ‘‘ப⁴க³வதா பஞ்ஞத்தங் ‘ந ஸாபத்திகேன உபோஸதோ² காதப்³போ³’தி. அஹஞ்சம்ஹி ஆபத்திங் ஆபன்னோ. கத²ங் நு கோ² மயா படிபஜ்ஜிதப்³ப³’’ந்தி? ப⁴க³வதோ ஏதமத்த²ங் ஆரோசேஸுங்.
170. Tena kho pana samayena aññataro bhikkhu pātimokkhe uddissamāne āpattiṃ sarati. Atha kho tassa bhikkhuno etadahosi – ‘‘bhagavatā paññattaṃ ‘na sāpattikena uposatho kātabbo’ti. Ahañcamhi āpattiṃ āpanno. Kathaṃ nu kho mayā paṭipajjitabba’’nti? Bhagavato etamatthaṃ ārocesuṃ.
இத⁴ பன, பி⁴க்க²வே, பி⁴க்கு² பாதிமொக்கே² உத்³தி³ஸ்ஸமானே ஆபத்திங் ஸரதி. தேன, பி⁴க்க²வே, பி⁴க்கு²னா ஸாமந்தோ பி⁴க்கு² ஏவமஸ்ஸ வசனீயோ – ‘‘அஹங், ஆவுஸோ, இத்த²ன்னாமங் ஆபத்திங் ஆபன்னோ. இதோ வுட்ட²ஹித்வா தங் ஆபத்திங் படிகரிஸ்ஸாமீ’’தி வத்வா உபோஸதோ² காதப்³போ³, பாதிமொக்க²ங் ஸோதப்³ப³ங், ந த்வேவ தப்பச்சயா உபோஸத²ஸ்ஸ அந்தராயோ காதப்³போ³.
Idha pana, bhikkhave, bhikkhu pātimokkhe uddissamāne āpattiṃ sarati. Tena, bhikkhave, bhikkhunā sāmanto bhikkhu evamassa vacanīyo – ‘‘ahaṃ, āvuso, itthannāmaṃ āpattiṃ āpanno. Ito vuṭṭhahitvā taṃ āpattiṃ paṭikarissāmī’’ti vatvā uposatho kātabbo, pātimokkhaṃ sotabbaṃ, na tveva tappaccayā uposathassa antarāyo kātabbo.
இத⁴ பன, பி⁴க்க²வே, பி⁴க்கு² பாதிமொக்கே² உத்³தி³ஸ்ஸமானே ஆபத்தியா வேமதிகோ ஹோதி. தேன, பி⁴க்க²வே, பி⁴க்கு²னா ஸாமந்தோ பி⁴க்கு² ஏவமஸ்ஸ வசனீயோ – ‘‘அஹங், ஆவுஸோ, இத்த²ன்னாமாய ஆபத்தியா வேமதிகோ. யதா³ நிப்³பே³மதிகோ ப⁴விஸ்ஸாமி, ததா³ தங் ஆபத்திங் படிகரிஸ்ஸாமீ’’தி வத்வா உபோஸதோ² காதப்³போ³, பாதிமொக்க²ங் ஸோதப்³ப³ங்; ந த்வேவ தப்பச்சயா உபோஸத²ஸ்ஸ அந்தராயோ காதப்³போ³தி.
Idha pana, bhikkhave, bhikkhu pātimokkhe uddissamāne āpattiyā vematiko hoti. Tena, bhikkhave, bhikkhunā sāmanto bhikkhu evamassa vacanīyo – ‘‘ahaṃ, āvuso, itthannāmāya āpattiyā vematiko. Yadā nibbematiko bhavissāmi, tadā taṃ āpattiṃ paṭikarissāmī’’ti vatvā uposatho kātabbo, pātimokkhaṃ sotabbaṃ; na tveva tappaccayā uposathassa antarāyo kātabboti.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / ஆபத்திபடிகம்மவிதி⁴கதா² • Āpattipaṭikammavidhikathā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஆபத்திபடிகம்மவிதி⁴கதா²தி³வண்ணனா • Āpattipaṭikammavidhikathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 92. ஆபத்திபடிகம்மவிதி⁴கதா² • 92. Āpattipaṭikammavidhikathā
