| Library / Tipiṭaka / திபிடக • Tipiṭaka / மஹாவக்³க³பாளி • Mahāvaggapāḷi |
126. ஆபத்திஆவிகரணவிதி⁴
126. Āpattiāvikaraṇavidhi
220. தேன கோ² பன ஸமயேன அஞ்ஞதரோ பி⁴க்கு² பவாரயமானோ ஆபத்திங் ஸரதி. அத² கோ² தஸ்ஸ பி⁴க்கு²னோ ஏதத³ஹோஸி – ‘‘ப⁴க³வதா பஞ்ஞத்தங் ‘ந ஸாபத்திகேன பவாரேதப்³ப³’ந்தி. அஹஞ்சம்ஹி ஆபத்திங் ஆபன்னோ. கத²ங் நு கோ² மயா படிபஜ்ஜிதப்³ப³’’ந்தி? ப⁴க³வதோ ஏதமத்த²ங் ஆரோசேஸுங்.
220. Tena kho pana samayena aññataro bhikkhu pavārayamāno āpattiṃ sarati. Atha kho tassa bhikkhuno etadahosi – ‘‘bhagavatā paññattaṃ ‘na sāpattikena pavāretabba’nti. Ahañcamhi āpattiṃ āpanno. Kathaṃ nu kho mayā paṭipajjitabba’’nti? Bhagavato etamatthaṃ ārocesuṃ.
இத⁴ பன, பி⁴க்க²வே, பி⁴க்கு² பவாரயமானோ ஆபத்திங் ஸரதி. தேன, பி⁴க்க²வே, பி⁴க்கு²னா ஸாமந்தோ பி⁴க்கு² ஏவமஸ்ஸ வசனீயோ – ‘‘அஹங், ஆவுஸோ, இத்த²ன்னாமங் ஆபத்திங் ஆபன்னோ. இதோ வுட்ட²ஹித்வா தங் ஆபத்திங் படிகரிஸ்ஸாமீ’’தி வத்வா பவாரேதப்³ப³ங்; ந த்வேவ தப்பச்சயா பவாரணாய அந்தராயோ காதப்³போ³.
Idha pana, bhikkhave, bhikkhu pavārayamāno āpattiṃ sarati. Tena, bhikkhave, bhikkhunā sāmanto bhikkhu evamassa vacanīyo – ‘‘ahaṃ, āvuso, itthannāmaṃ āpattiṃ āpanno. Ito vuṭṭhahitvā taṃ āpattiṃ paṭikarissāmī’’ti vatvā pavāretabbaṃ; na tveva tappaccayā pavāraṇāya antarāyo kātabbo.
இத⁴ பன, பி⁴க்க²வே, பி⁴க்கு² பவாரயமானோ ஆபத்தியா வேமதிகோ ஹோதி. தேன, பி⁴க்க²வே,
Idha pana, bhikkhave, bhikkhu pavārayamāno āpattiyā vematiko hoti. Tena, bhikkhave,
பி⁴க்கு²னா ஸாமந்தோ பி⁴க்கு² ஏவமஸ்ஸ வசனீயோ – ‘‘அஹங், ஆவுஸோ, இத்த²ன்னாமாய ஆபத்தியா வேமதிகோ; யதா³ நிப்³பே³மதிகோ ப⁴விஸ்ஸாமி ததா³ தங் ஆபத்திங் படிகரிஸ்ஸாமீ’’தி வத்வா பவாரேதப்³ப³ங்; ந த்வேவ தப்பச்சயா பவாரணாய அந்தராயோ காதப்³போ³தி.
Bhikkhunā sāmanto bhikkhu evamassa vacanīyo – ‘‘ahaṃ, āvuso, itthannāmāya āpattiyā vematiko; yadā nibbematiko bhavissāmi tadā taṃ āpattiṃ paṭikarissāmī’’ti vatvā pavāretabbaṃ; na tveva tappaccayā pavāraṇāya antarāyo kātabboti.
ஆபத்தி ஆவிகரணவிதி⁴ நிட்டி²தா.
Āpatti āvikaraṇavidhi niṭṭhitā.
