| Library / Tipiṭaka / তিপিটক • Tipiṭaka / মহাৰগ্গপাল়ি • Mahāvaggapāḷi |
১২৬. আপত্তিআৰিকরণৰিধি
126. Āpattiāvikaraṇavidhi
২২০. তেন খো পন সমযেন অঞ্ঞতরো ভিক্খু পৰারযমানো আপত্তিং সরতি। অথ খো তস্স ভিক্খুনো এতদহোসি – ‘‘ভগৰতা পঞ্ঞত্তং ‘ন সাপত্তিকেন পৰারেতব্ব’ন্তি। অহঞ্চম্হি আপত্তিং আপন্নো। কথং নু খো মযা পটিপজ্জিতব্ব’’ন্তি? ভগৰতো এতমত্থং আরোচেসুং।
220. Tena kho pana samayena aññataro bhikkhu pavārayamāno āpattiṃ sarati. Atha kho tassa bhikkhuno etadahosi – ‘‘bhagavatā paññattaṃ ‘na sāpattikena pavāretabba’nti. Ahañcamhi āpattiṃ āpanno. Kathaṃ nu kho mayā paṭipajjitabba’’nti? Bhagavato etamatthaṃ ārocesuṃ.
ইধ পন, ভিক্খৰে, ভিক্খু পৰারযমানো আপত্তিং সরতি। তেন, ভিক্খৰে, ভিক্খুনা সামন্তো ভিক্খু এৰমস্স ৰচনীযো – ‘‘অহং, আৰুসো, ইত্থন্নামং আপত্তিং আপন্নো। ইতো ৰুট্ঠহিত্ৰা তং আপত্তিং পটিকরিস্সামী’’তি ৰত্ৰা পৰারেতব্বং; ন ত্ৰেৰ তপ্পচ্চযা পৰারণায অন্তরাযো কাতব্বো।
Idha pana, bhikkhave, bhikkhu pavārayamāno āpattiṃ sarati. Tena, bhikkhave, bhikkhunā sāmanto bhikkhu evamassa vacanīyo – ‘‘ahaṃ, āvuso, itthannāmaṃ āpattiṃ āpanno. Ito vuṭṭhahitvā taṃ āpattiṃ paṭikarissāmī’’ti vatvā pavāretabbaṃ; na tveva tappaccayā pavāraṇāya antarāyo kātabbo.
ইধ পন, ভিক্খৰে, ভিক্খু পৰারযমানো আপত্তিযা ৰেমতিকো হোতি। তেন, ভিক্খৰে,
Idha pana, bhikkhave, bhikkhu pavārayamāno āpattiyā vematiko hoti. Tena, bhikkhave,
ভিক্খুনা সামন্তো ভিক্খু এৰমস্স ৰচনীযো – ‘‘অহং, আৰুসো, ইত্থন্নামায আপত্তিযা ৰেমতিকো; যদা নিব্বেমতিকো ভৰিস্সামি তদা তং আপত্তিং পটিকরিস্সামী’’তি ৰত্ৰা পৰারেতব্বং; ন ত্ৰেৰ তপ্পচ্চযা পৰারণায অন্তরাযো কাতব্বোতি।
Bhikkhunā sāmanto bhikkhu evamassa vacanīyo – ‘‘ahaṃ, āvuso, itthannāmāya āpattiyā vematiko; yadā nibbematiko bhavissāmi tadā taṃ āpattiṃ paṭikarissāmī’’ti vatvā pavāretabbaṃ; na tveva tappaccayā pavāraṇāya antarāyo kātabboti.
আপত্তি আৰিকরণৰিধি নিট্ঠিতা।
Āpatti āvikaraṇavidhi niṭṭhitā.
