| Library / Tipiṭaka / තිපිටක • Tipiṭaka / මහාවග්‌ගපාළි • Mahāvaggapāḷi |
93. ආපත්‌තිආවිකරණවිධි
93. Āpattiāvikaraṇavidhi
170. තෙන ඛො පන සමයෙන අඤ්‌ඤතරො භික්‌ඛු පාතිමොක්‌ඛෙ උද්‌දිස්‌සමානෙ ආපත්‌තිං සරති. අථ ඛො තස්‌ස භික්‌ඛුනො එතදහොසි – ‘‘භගවතා පඤ්‌ඤත්‌තං ‘න සාපත්‌තිකෙන උපොසථො කාතබ්‌බො’ති. අහඤ්‌චම්‌හි ආපත්‌තිං ආපන්‌නො. කථං නු ඛො මයා පටිපජ්‌ජිතබ්‌බ’’න්‌ති? භගවතො එතමත්‌ථං ආරොචෙසුං.
170. Tena kho pana samayena aññataro bhikkhu pātimokkhe uddissamāne āpattiṃ sarati. Atha kho tassa bhikkhuno etadahosi – ‘‘bhagavatā paññattaṃ ‘na sāpattikena uposatho kātabbo’ti. Ahañcamhi āpattiṃ āpanno. Kathaṃ nu kho mayā paṭipajjitabba’’nti? Bhagavato etamatthaṃ ārocesuṃ.
ඉධ පන, භික්‌ඛවෙ, භික්‌ඛු පාතිමොක්‌ඛෙ උද්‌දිස්‌සමානෙ ආපත්‌තිං සරති. තෙන, භික්‌ඛවෙ, භික්‌ඛුනා සාමන්‌තො භික්‌ඛු එවමස්‌ස වචනීයො – ‘‘අහං, ආවුසො, ඉත්‌ථන්‌නාමං ආපත්‌තිං ආපන්‌නො. ඉතො වුට්‌ඨහිත්‌වා තං ආපත්‌තිං පටිකරිස්‌සාමී’’ති වත්‌වා උපොසථො කාතබ්‌බො, පාතිමොක්‌ඛං සොතබ්‌බං, න ත්‌වෙව තප්‌පච්‌චයා උපොසථස්‌ස අන්‌තරායො කාතබ්‌බො.
Idha pana, bhikkhave, bhikkhu pātimokkhe uddissamāne āpattiṃ sarati. Tena, bhikkhave, bhikkhunā sāmanto bhikkhu evamassa vacanīyo – ‘‘ahaṃ, āvuso, itthannāmaṃ āpattiṃ āpanno. Ito vuṭṭhahitvā taṃ āpattiṃ paṭikarissāmī’’ti vatvā uposatho kātabbo, pātimokkhaṃ sotabbaṃ, na tveva tappaccayā uposathassa antarāyo kātabbo.
ඉධ පන, භික්‌ඛවෙ, භික්‌ඛු පාතිමොක්‌ඛෙ උද්‌දිස්‌සමානෙ ආපත්‌තියා වෙමතිකො හොති. තෙන, භික්‌ඛවෙ, භික්‌ඛුනා සාමන්‌තො භික්‌ඛු එවමස්‌ස වචනීයො – ‘‘අහං, ආවුසො, ඉත්‌ථන්‌නාමාය ආපත්‌තියා වෙමතිකො. යදා නිබ්‌බෙමතිකො භවිස්‌සාමි, තදා තං ආපත්‌තිං පටිකරිස්‌සාමී’’ති වත්‌වා උපොසථො කාතබ්‌බො, පාතිමොක්‌ඛං සොතබ්‌බං; න ත්‌වෙව තප්‌පච්‌චයා උපොසථස්‌ස අන්‌තරායො කාතබ්‌බොති.
Idha pana, bhikkhave, bhikkhu pātimokkhe uddissamāne āpattiyā vematiko hoti. Tena, bhikkhave, bhikkhunā sāmanto bhikkhu evamassa vacanīyo – ‘‘ahaṃ, āvuso, itthannāmāya āpattiyā vematiko. Yadā nibbematiko bhavissāmi, tadā taṃ āpattiṃ paṭikarissāmī’’ti vatvā uposatho kātabbo, pātimokkhaṃ sotabbaṃ; na tveva tappaccayā uposathassa antarāyo kātabboti.
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / ආපත්‌තිපටිකම්‌මවිධිකථා • Āpattipaṭikammavidhikathā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / ආපත්‌තිපටිකම්‌මවිධිකථාදිවණ්‌ණනා • Āpattipaṭikammavidhikathādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 92. ආපත්‌තිපටිකම්‌මවිධිකථා • 92. Āpattipaṭikammavidhikathā
