| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၂. အာပတ္တိဘယသုတ္တံ
2. Āpattibhayasuttaṃ
၂၄၄. ‘‘စတ္တာရိမာနိ, ဘိက္ခဝေ, အာပတ္တိဘယာနိ။ ကတမာနိ စတ္တာရိ? သေယ္ယထာပိ, ဘိက္ခဝေ, စောရံ အာဂုစာရိံ ဂဟေတ္ဝာ ရညော ဒသ္သေယ္ယုံ – ‘အယံ တေ, ဒေဝ, စောရော အာဂုစာရီ။ ဣမသ္သ ဒေဝော ဒဏ္ဍံ ပဏေတူ’တိ။ တမေနံ ရာဇာ ဧဝံ ဝဒေယ္ယ – ‘ဂစ္ဆထ , ဘော, ဣမံ ပုရိသံ ဒဠ္ဟာယ ရဇ္ဇုယာ ပစ္ဆာဗာဟံ ဂာဠ္ဟဗန္ဓနံ ဗန္ဓိတ္ဝာ ခုရမုဏ္ဍံ ကရိတ္ဝာ ခရသ္သရေန ပဏဝေန ရထိကာယ ရထိကံ သိင္ဃာဋကေန သိင္ဃာဋကံ ပရိနေတ္ဝာ ဒက္ခိဏေန ဒ္ဝာရေန နိက္ခာမေတ္ဝာ ဒက္ခိဏတော နဂရသ္သ သီသံ ဆိန္ဒထာ’တိ။ တမေနံ ရညော ပုရိသာ ဒဠ္ဟာယ ရဇ္ဇုယာ ပစ္ဆာဗာဟံ ဂာဠ္ဟဗန္ဓနံ ဗန္ဓိတ္ဝာ ခုရမုဏ္ဍံ ကရိတ္ဝာ ခရသ္သရေန ပဏဝေန ရထိကာယ ရထိကံ သိင္ဃာဋကေန သိင္ဃာဋကံ ပရိနေတ္ဝာ ဒက္ခိဏေန ဒ္ဝာရေန နိက္ခာမေတ္ဝာ ဒက္ခိဏတော နဂရသ္သ သီသံ ဆိန္ဒေယ္ယုံ။ တတ္ရညတရသ္သ ထလဋ္ဌသ္သ ပုရိသသ္သ ဧဝမသ္သ – ‘ပာပကံ ဝတ, ဘော, အယံ ပုရိသော ကမ္မံ အကာသိ ဂာရယ္ဟံ သီသစ္ဆေဇ္ဇံ။ ယတ္ရ ဟိ နာမ ရညော ပုရိသာ ဒဠ္ဟာယ ရဇ္ဇုယာ ပစ္ဆာဗာဟံ ဂာဠ္ဟဗန္ဓနံ ဗန္ဓိတ္ဝာ ခုရမုဏ္ဍံ ကရိတ္ဝာ ခရသ္သရေန ပဏဝေန ရထိကာယ ရထိကံ သိင္ဃာဋကေန သိင္ဃာဋကံ ပရိနေတ္ဝာ ဒက္ခိဏေန ဒ္ဝာရေန နိက္ခာမေတ္ဝာ ဒက္ခိဏတော နဂရသ္သ သီသံ ဆိန္ဒိသ္သန္တိ ! သော ဝတသ္သာဟံ 1 ဧဝရူပံ ပာပကမ္မံ 2 န ကရေယ္ယံ 3 ဂာရယ္ဟံ သီသစ္ဆေဇ္ဇ’န္တိ။ ဧဝမေဝံ ခော, ဘိက္ခဝေ, ယသ္သ ကသ္သစိ ဘိက္ခုသ္သ ဝာ ဘိက္ခုနိယာ ဝာ ဧဝံ တိဗ္ဗာ ဘယသညာ ပစ္စုပဋ္ဌိတာ ဟောတိ ပာရာဇိကေသု ဓမ္မေသု။ တသ္သေတံ ပာဋိကင္ခံ – အနာပန္နော ဝာ ပာရာဇိကံ ဓမ္မံ န အာပဇ္ဇိသ္သတိ, အာပန္နော ဝာ ပာရာဇိကံ ဓမ္မံ ယထာဓမ္မံ ပဋိကရိသ္သတိ။
244. ‘‘Cattārimāni, bhikkhave, āpattibhayāni. Katamāni cattāri? Seyyathāpi, bhikkhave, coraṃ āgucāriṃ gahetvā rañño dasseyyuṃ – ‘ayaṃ te, deva, coro āgucārī. Imassa devo daṇḍaṃ paṇetū’ti. Tamenaṃ rājā evaṃ vadeyya – ‘gacchatha , bho, imaṃ purisaṃ daḷhāya rajjuyā pacchābāhaṃ gāḷhabandhanaṃ bandhitvā khuramuṇḍaṃ karitvā kharassarena paṇavena rathikāya rathikaṃ siṅghāṭakena siṅghāṭakaṃ parinetvā dakkhiṇena dvārena nikkhāmetvā dakkhiṇato nagarassa sīsaṃ chindathā’ti. Tamenaṃ rañño purisā daḷhāya rajjuyā pacchābāhaṃ gāḷhabandhanaṃ bandhitvā khuramuṇḍaṃ karitvā kharassarena paṇavena rathikāya rathikaṃ siṅghāṭakena siṅghāṭakaṃ parinetvā dakkhiṇena dvārena nikkhāmetvā dakkhiṇato nagarassa sīsaṃ chindeyyuṃ. Tatraññatarassa thalaṭṭhassa purisassa evamassa – ‘pāpakaṃ vata, bho, ayaṃ puriso kammaṃ akāsi gārayhaṃ sīsacchejjaṃ. Yatra hi nāma rañño purisā daḷhāya rajjuyā pacchābāhaṃ gāḷhabandhanaṃ bandhitvā khuramuṇḍaṃ karitvā kharassarena paṇavena rathikāya rathikaṃ siṅghāṭakena siṅghāṭakaṃ parinetvā dakkhiṇena dvārena nikkhāmetvā dakkhiṇato nagarassa sīsaṃ chindissanti ! So vatassāhaṃ 4 evarūpaṃ pāpakammaṃ 5 na kareyyaṃ 6 gārayhaṃ sīsacchejja’nti. Evamevaṃ kho, bhikkhave, yassa kassaci bhikkhussa vā bhikkhuniyā vā evaṃ tibbā bhayasaññā paccupaṭṭhitā hoti pārājikesu dhammesu. Tassetaṃ pāṭikaṅkhaṃ – anāpanno vā pārājikaṃ dhammaṃ na āpajjissati, āpanno vā pārājikaṃ dhammaṃ yathādhammaṃ paṭikarissati.
‘‘သေယ္ယထာပိ, ဘိက္ခဝေ, ပုရိသော ကာဠဝတ္ထံ 7 ပရိဓာယ ကေသေ ပကိရိတ္ဝာ မုသလံ ခန္ဓေ အာရောပေတ္ဝာ မဟာဇနကာယံ ဥပသင္ကမိတ္ဝာ ဧဝံ ဝဒေယ္ယ – ‘အဟံ, ဘန္တေ, ပာပကမ္မံ အကာသိံ ဂာရယ္ဟံ မောသလ္လံ, ယေန မေ အာယသ္မန္တော အတ္တမနာ ဟောန္တိ တံ ကရောမီ’တိ။ တတ္ရညတရသ္သ ထလဋ္ဌသ္သ ပုရိသသ္သ ဧဝမသ္သ – ‘ပာပကံ ဝတ, ဘော, အယံ ပုရိသော ကမ္မံ အကာသိ ဂာရယ္ဟံ မောသလ္လံ။ ယတ္ရ ဟိ နာမ ကာဠဝတ္ထံ ပရိဓာယ ကေသေ ပကိရိတ္ဝာ မုသလံ ခန္ဓေ အာရောပေတ္ဝာ မဟာဇနကာယံ ဥပသင္ကမိတ္ဝာ ဧဝံ ဝက္ခတိ – ‘အဟံ, ဘန္တေ, ပာပကမ္မံ အကာသိံ ဂာရယ္ဟံ မောသလ္လံ, ယေန မေ အာယသ္မန္တော အတ္တမနာ ဟောန္တိ တံ ကရောမီတိ။ သော ဝတသ္သာဟံ ဧဝရူပံ ပာပကမ္မံ န ကရေယ္ယံ ဂာရယ္ဟံ မောသလ္လ’န္တိ။ ဧဝမေဝံ ခော, ဘိက္ခဝေ, ယသ္သ ကသ္သစိ ဘိက္ခုသ္သ ဝာ ဘိက္ခုနိယာ ဝာ ဧဝံ တိဗ္ဗာ ဘယသညာ ပစ္စုပဋ္ဌိတာ ဟောတိ သင္ဃာဒိသေသေသု ဓမ္မေသု, တသ္သေတံ ပာဋိကင္ခံ – အနာပန္နော ဝာ သင္ဃာဒိသေသံ ဓမ္မံ န အာပဇ္ဇိသ္သတိ, အာပန္နော ဝာ သင္ဃာဒိသေသံ ဓမ္မံ ယထာဓမ္မံ ပဋိကရိသ္သတိ။
‘‘Seyyathāpi, bhikkhave, puriso kāḷavatthaṃ 8 paridhāya kese pakiritvā musalaṃ khandhe āropetvā mahājanakāyaṃ upasaṅkamitvā evaṃ vadeyya – ‘ahaṃ, bhante, pāpakammaṃ akāsiṃ gārayhaṃ mosallaṃ, yena me āyasmanto attamanā honti taṃ karomī’ti. Tatraññatarassa thalaṭṭhassa purisassa evamassa – ‘pāpakaṃ vata, bho, ayaṃ puriso kammaṃ akāsi gārayhaṃ mosallaṃ. Yatra hi nāma kāḷavatthaṃ paridhāya kese pakiritvā musalaṃ khandhe āropetvā mahājanakāyaṃ upasaṅkamitvā evaṃ vakkhati – ‘ahaṃ, bhante, pāpakammaṃ akāsiṃ gārayhaṃ mosallaṃ, yena me āyasmanto attamanā honti taṃ karomīti. So vatassāhaṃ evarūpaṃ pāpakammaṃ na kareyyaṃ gārayhaṃ mosalla’nti. Evamevaṃ kho, bhikkhave, yassa kassaci bhikkhussa vā bhikkhuniyā vā evaṃ tibbā bhayasaññā paccupaṭṭhitā hoti saṅghādisesesu dhammesu, tassetaṃ pāṭikaṅkhaṃ – anāpanno vā saṅghādisesaṃ dhammaṃ na āpajjissati, āpanno vā saṅghādisesaṃ dhammaṃ yathādhammaṃ paṭikarissati.
‘‘သေယ္ယထာပိ, ဘိက္ခဝေ, ပုရိသော ကာဠဝတ္ထံ ပရိဓာယ ကေသေ ပကိရိတ္ဝာ ဘသ္မပုဋံ 9 ခန္ဓေ အာရောပေတ္ဝာ မဟာဇနကာယံ ဥပသင္ကမိတ္ဝာ ဧဝံ ဝဒေယ္ယ – ‘အဟံ, ဘန္တေ, ပာပကမ္မံ အကာသိံ ဂာရယ္ဟံ ဘသ္မပုဋံ။ ယေန မေ အာယသ္မန္တော အတ္တမနာ ဟောန္တိ တံ ကရောမီ’တိ။ တတ္ရညတရသ္သ ထလဋ္ဌသ္သ ပုရိသသ္သ ဧဝမသ္သ – ‘ပာပကံ ဝတ, ဘော, အယံ ပုရိသော ကမ္မံ အကာသိ ဂာရယ္ဟံ ဘသ္မပုဋံ။ ယတ္ရ ဟိ နာမ ကာဠဝတ္ထံ ပရိဓာယ ကေသေ ပကိရိတ္ဝာ ဘသ္မပုဋံ ခန္ဓေ အာရောပေတ္ဝာ မဟာဇနကာယံ ဥပသင္ကမိတ္ဝာ ဧဝံ ဝက္ခတိ – အဟံ, ဘန္တေ, ပာပကမ္မံ အကာသိံ ဂာရယ္ဟံ ဘသ္မပုဋံ; ယေန မေ အာယသ္မန္တော အတ္တမနာ ဟောန္တိ တံ ကရောမီတိ။ သော ဝတသ္သာဟံ ဧဝရူပံ ပာပကမ္မံ န ကရေယ္ယံ ဂာရယ္ဟံ ဘသ္မပုဋ’န္တိ။ ဧဝမေဝံ ခော, ဘိက္ခဝေ, ယသ္သ ကသ္သစိ ဘိက္ခုသ္သ ဝာ ဘိက္ခုနိယာ ဝာ ဧဝံ တိဗ္ဗာ ဘယသညာ ပစ္စုပဋ္ဌိတာ ဟောတိ ပာစိတ္တိယေသု ဓမ္မေသု , တသ္သေတံ ပာဋိကင္ခံ – အနာပန္နော ဝာ ပာစိတ္တိယံ ဓမ္မံ န အာပဇ္ဇိသ္သတိ, အာပန္နော ဝာ ပာစိတ္တိယံ ဓမ္မံ ယထာဓမ္မံ ပဋိကရိသ္သတိ။
‘‘Seyyathāpi, bhikkhave, puriso kāḷavatthaṃ paridhāya kese pakiritvā bhasmapuṭaṃ 10 khandhe āropetvā mahājanakāyaṃ upasaṅkamitvā evaṃ vadeyya – ‘ahaṃ, bhante, pāpakammaṃ akāsiṃ gārayhaṃ bhasmapuṭaṃ. Yena me āyasmanto attamanā honti taṃ karomī’ti. Tatraññatarassa thalaṭṭhassa purisassa evamassa – ‘pāpakaṃ vata, bho, ayaṃ puriso kammaṃ akāsi gārayhaṃ bhasmapuṭaṃ. Yatra hi nāma kāḷavatthaṃ paridhāya kese pakiritvā bhasmapuṭaṃ khandhe āropetvā mahājanakāyaṃ upasaṅkamitvā evaṃ vakkhati – ahaṃ, bhante, pāpakammaṃ akāsiṃ gārayhaṃ bhasmapuṭaṃ; yena me āyasmanto attamanā honti taṃ karomīti. So vatassāhaṃ evarūpaṃ pāpakammaṃ na kareyyaṃ gārayhaṃ bhasmapuṭa’nti. Evamevaṃ kho, bhikkhave, yassa kassaci bhikkhussa vā bhikkhuniyā vā evaṃ tibbā bhayasaññā paccupaṭṭhitā hoti pācittiyesu dhammesu , tassetaṃ pāṭikaṅkhaṃ – anāpanno vā pācittiyaṃ dhammaṃ na āpajjissati, āpanno vā pācittiyaṃ dhammaṃ yathādhammaṃ paṭikarissati.
‘‘သေယ္ယထာပိ, ဘိက္ခဝေ, ပုရိသော ကာဠဝတ္ထံ ပရိဓာယ ကေသေ ပကိရိတ္ဝာ မဟာဇနကာယံ ဥပသင္ကမိတ္ဝာ ဧဝံ ဝဒေယ္ယ – ‘အဟံ, ဘန္တေ, ပာပကမ္မံ အကာသိံ ဂာရယ္ဟံ ဥပဝဇ္ဇံ။ ယေန မေ အာယသ္မန္တော အတ္တမနာ ဟောန္တိ တံ ကရောမီ’တိ။ တတ္ရညတရသ္သ ထလဋ္ဌသ္သ ပုရိသသ္သ ဧဝမသ္သ – ‘ပာပကံ ဝတ, ဘော, အယံ ပုရိသော ကမ္မံ အကာသိ ဂာရယ္ဟံ ဥပဝဇ္ဇံ။ ယတ္ရ ဟိ နာမ ကာဠဝတ္ထံ ပရိဓာယ ကေသေ ပကိရိတ္ဝာ မဟာဇနကာယံ ဥပသင္ကမိတ္ဝာ ဧဝံ ဝက္ခတိ – အဟံ, ဘန္တေ, ပာပကမ္မံ အကာသိံ ဂာရယ္ဟံ ဥပဝဇ္ဇံ; ယေန မေ အာယသ္မန္တော အတ္တမနာ ဟောန္တိ တံ ကရောမီတိ။ သော ဝတသ္သာဟံ ဧဝရူပံ ပာပကမ္မံ န ကရေယ္ယံ ဂာရယ္ဟံ ဥပဝဇ္ဇ’န္တိ။ ဧဝမေဝံ ခော, ဘိက္ခဝေ, ယသ္သ ကသ္သစိ ဘိက္ခုသ္သ ဝာ ဘိက္ခုနိယာ ဝာ ဧဝံ တိဗ္ဗာ ဘယသညာ ပစ္စုပဋ္ဌိတာ ဟောတိ ပာဋိဒေသနီယေသု ဓမ္မေသု, တသ္သေတံ ပာဋိကင္ခံ – အနာပန္နော ဝာ ပာဋိဒေသနီယံ ဓမ္မံ န အာပဇ္ဇိသ္သတိ, အာပန္နော ဝာ ပာဋိဒေသနီယံ ဓမ္မံ ယထာဓမ္မံ ပဋိကရိသ္သတိ။ ဣမာနိ ခော, ဘိက္ခဝေ, စတ္တာရိ အာပတ္တိဘယာနီ’’တိ။ ဒုတိယံ။
‘‘Seyyathāpi, bhikkhave, puriso kāḷavatthaṃ paridhāya kese pakiritvā mahājanakāyaṃ upasaṅkamitvā evaṃ vadeyya – ‘ahaṃ, bhante, pāpakammaṃ akāsiṃ gārayhaṃ upavajjaṃ. Yena me āyasmanto attamanā honti taṃ karomī’ti. Tatraññatarassa thalaṭṭhassa purisassa evamassa – ‘pāpakaṃ vata, bho, ayaṃ puriso kammaṃ akāsi gārayhaṃ upavajjaṃ. Yatra hi nāma kāḷavatthaṃ paridhāya kese pakiritvā mahājanakāyaṃ upasaṅkamitvā evaṃ vakkhati – ahaṃ, bhante, pāpakammaṃ akāsiṃ gārayhaṃ upavajjaṃ; yena me āyasmanto attamanā honti taṃ karomīti. So vatassāhaṃ evarūpaṃ pāpakammaṃ na kareyyaṃ gārayhaṃ upavajja’nti. Evamevaṃ kho, bhikkhave, yassa kassaci bhikkhussa vā bhikkhuniyā vā evaṃ tibbā bhayasaññā paccupaṭṭhitā hoti pāṭidesanīyesu dhammesu, tassetaṃ pāṭikaṅkhaṃ – anāpanno vā pāṭidesanīyaṃ dhammaṃ na āpajjissati, āpanno vā pāṭidesanīyaṃ dhammaṃ yathādhammaṃ paṭikarissati. Imāni kho, bhikkhave, cattāri āpattibhayānī’’ti. Dutiyaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၂. အာပတ္တိဘယသုတ္တဝဏ္ဏနာ • 2. Āpattibhayasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၂-၃. အာပတ္တိဘယသုတ္တာဒိဝဏ္ဏနာ • 2-3. Āpattibhayasuttādivaṇṇanā
