| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
2. ஆபத்திப⁴யஸுத்தவண்ணனா
2. Āpattibhayasuttavaṇṇanā
244. து³தியே கு²ரமுண்ட³ங் கரித்வாதி பஞ்ச ஸிக²ண்ட³கே ட²பெத்வா கு²ரேன முண்ட³ங் கரித்வா. க²ரஸ்ஸரேனாதி கக்க²ளஸத்³தே³ன. பணவேனாதி வஜ்ஜ²பே⁴ரியா. த²லட்ட²ஸ்ஸாதி ஏகமந்தே டி²தஸ்ஸ. ஸீஸச்சே²ஜ்ஜந்தி ஸீஸச்சே²தா³ரஹங். யத்ர ஹி நாமாதி யங் நாம. ஸோ வதஸ்ஸாஹந்தி ஸோ வத அஹங் அஸ்ஸங், யங் ஏவரூபங் பாபங் ந கரெய்யந்தி அத்தோ². யதா²த⁴ம்மங் படிகரிஸ்ஸதீதி த⁴ம்மானுரூபங் படிகரிஸ்ஸதி, ஸாமணேரபூ⁴மியங் ட²ஸ்ஸதீதி அத்தோ². காளவத்த²ங் பரிதா⁴யாதி காளபிலோதிகங் நிவாஸெத்வா. மோஸல்லந்தி முஸலாபி⁴பாதாரஹங். யதா²த⁴ம்மந்தி இத⁴ ஆபத்திதோ வுட்டா²ய ஸுத்³த⁴ந்தே பதிட்ட²ஹந்தோ யதா²த⁴ம்மங் கரோதி நாம. ப⁴ஸ்மபுடந்தி சா²ரிகாப⁴ண்டி³கங். கா³ரய்ஹங் ப⁴ஸ்மபுடந்தி க³ரஹிதப்³ப³சா²ரிகாபுடேன மத்த²கே அபி⁴கா⁴தாரஹங். யதா²த⁴ம்மந்தி இத⁴ ஆபத்திங் தே³ஸெந்தோ யதா²த⁴ம்மங் படிகரோதி நாம. உபவஜ்ஜந்தி உபவாதா³ரஹங். பாடிதே³ஸனீயேஸூதி படிதே³ஸேதப்³பே³ஸு. இமினா ஸப்³பா³பி ஸேஸாபத்தியோ ஸங்க³ஹிதா. இமானி கோ², பி⁴க்க²வே, சத்தாரி ஆபத்திப⁴யானீதி, பி⁴க்க²வே, இமானி சத்தாரி ஆபத்திங் நிஸ்ஸாய உப்பஜ்ஜனகப⁴யானி நாமாதி.
244. Dutiye khuramuṇḍaṃ karitvāti pañca sikhaṇḍake ṭhapetvā khurena muṇḍaṃ karitvā. Kharassarenāti kakkhaḷasaddena. Paṇavenāti vajjhabheriyā. Thalaṭṭhassāti ekamante ṭhitassa. Sīsacchejjanti sīsacchedārahaṃ. Yatra hi nāmāti yaṃ nāma. So vatassāhanti so vata ahaṃ assaṃ, yaṃ evarūpaṃ pāpaṃ na kareyyanti attho. Yathādhammaṃ paṭikarissatīti dhammānurūpaṃ paṭikarissati, sāmaṇerabhūmiyaṃ ṭhassatīti attho. Kāḷavatthaṃ paridhāyāti kāḷapilotikaṃ nivāsetvā. Mosallanti musalābhipātārahaṃ. Yathādhammanti idha āpattito vuṭṭhāya suddhante patiṭṭhahanto yathādhammaṃ karoti nāma. Bhasmapuṭanti chārikābhaṇḍikaṃ. Gārayhaṃ bhasmapuṭanti garahitabbachārikāpuṭena matthake abhighātārahaṃ. Yathādhammanti idha āpattiṃ desento yathādhammaṃ paṭikaroti nāma. Upavajjanti upavādārahaṃ. Pāṭidesanīyesūti paṭidesetabbesu. Iminā sabbāpi sesāpattiyo saṅgahitā. Imāni kho, bhikkhave, cattāri āpattibhayānīti, bhikkhave, imāni cattāri āpattiṃ nissāya uppajjanakabhayāni nāmāti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 2. ஆபத்திப⁴யஸுத்தங் • 2. Āpattibhayasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 2-3. ஆபத்திப⁴யஸுத்தாதி³வண்ணனா • 2-3. Āpattibhayasuttādivaṇṇanā
