| Library / Tipiṭaka / ติปิฎก • Tipiṭaka / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) |
๒. อาปตฺติภยสุตฺตวณฺณนา
2. Āpattibhayasuttavaṇṇanā
๒๔๔. ทุติเย ขุรมุณฺฑํ กริตฺวาติ ปญฺจ สิขณฺฑเก ฐเปตฺวา ขุเรน มุณฺฑํ กริตฺวาฯ ขรสฺสเรนาติ กกฺขฬสเทฺทนฯ ปณเวนาติ วชฺฌเภริยาฯ ถลฎฺฐสฺสาติ เอกมเนฺต ฐิตสฺสฯ สีสเจฺฉชฺชนฺติ สีสเจฺฉทารหํฯ ยตฺร หิ นามาติ ยํ นามฯ โส วตสฺสาหนฺติ โส วต อหํ อสฺสํ, ยํ เอวรูปํ ปาปํ น กเรยฺยนฺติ อโตฺถฯ ยถาธมฺมํ ปฎิกริสฺสตีติ ธมฺมานุรูปํ ปฎิกริสฺสติ, สามเณรภูมิยํ ฐสฺสตีติ อโตฺถฯ กาฬวตฺถํ ปริธายาติ กาฬปิโลติกํ นิวาเสตฺวาฯ โมสลฺลนฺติ มุสลาภิปาตารหํฯ ยถาธมฺมนฺติ อิธ อาปตฺติโต วุฎฺฐาย สุทฺธเนฺต ปติฎฺฐหโนฺต ยถาธมฺมํ กโรติ นามฯ ภสฺมปุฎนฺติ ฉาริกาภณฺฑิกํฯ คารยฺหํ ภสฺมปุฎนฺติ ครหิตพฺพฉาริกาปุเฎน มตฺถเก อภิฆาตารหํฯ ยถาธมฺมนฺติ อิธ อาปตฺติํ เทเสโนฺต ยถาธมฺมํ ปฎิกโรติ นามฯ อุปวชฺชนฺติ อุปวาทารหํฯ ปาฎิเทสนีเยสูติ ปฎิเทเสตเพฺพสุฯ อิมินา สพฺพาปิ เสสาปตฺติโย สงฺคหิตาฯ อิมานิ โข, ภิกฺขเว, จตฺตาริ อาปตฺติภยานีติ, ภิกฺขเว, อิมานิ จตฺตาริ อาปตฺติํ นิสฺสาย อุปฺปชฺชนกภยานิ นามาติฯ
244. Dutiye khuramuṇḍaṃ karitvāti pañca sikhaṇḍake ṭhapetvā khurena muṇḍaṃ karitvā. Kharassarenāti kakkhaḷasaddena. Paṇavenāti vajjhabheriyā. Thalaṭṭhassāti ekamante ṭhitassa. Sīsacchejjanti sīsacchedārahaṃ. Yatra hi nāmāti yaṃ nāma. So vatassāhanti so vata ahaṃ assaṃ, yaṃ evarūpaṃ pāpaṃ na kareyyanti attho. Yathādhammaṃ paṭikarissatīti dhammānurūpaṃ paṭikarissati, sāmaṇerabhūmiyaṃ ṭhassatīti attho. Kāḷavatthaṃ paridhāyāti kāḷapilotikaṃ nivāsetvā. Mosallanti musalābhipātārahaṃ. Yathādhammanti idha āpattito vuṭṭhāya suddhante patiṭṭhahanto yathādhammaṃ karoti nāma. Bhasmapuṭanti chārikābhaṇḍikaṃ. Gārayhaṃ bhasmapuṭanti garahitabbachārikāpuṭena matthake abhighātārahaṃ. Yathādhammanti idha āpattiṃ desento yathādhammaṃ paṭikaroti nāma. Upavajjanti upavādārahaṃ. Pāṭidesanīyesūti paṭidesetabbesu. Iminā sabbāpi sesāpattiyo saṅgahitā. Imāni kho, bhikkhave, cattāri āpattibhayānīti, bhikkhave, imāni cattāri āpattiṃ nissāya uppajjanakabhayāni nāmāti.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / องฺคุตฺตรนิกาย • Aṅguttaranikāya / ๒. อาปตฺติภยสุตฺตํ • 2. Āpattibhayasuttaṃ
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๒-๓. อาปตฺติภยสุตฺตาทิวณฺณนา • 2-3. Āpattibhayasuttādivaṇṇanā
