| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
ஆபத்திபே⁴த³வண்ணனா
Āpattibhedavaṇṇanā
122. தத்த² தத்தா²தி பூ⁴மட்ட²த²லட்டா²தீ³ஸு. பாளியங் மனுஸ்ஸபரிக்³க³ஹிதங் ஸந்தா⁴ய ‘‘பரபரிக்³க³ஹித’’ந்தி வுத்தங். ஆமஸதி ப²ந்தா³பேதி டா²னா சாவேதீதி இமேஹி தீஹி பதே³ஹி புப்³ப³பயோக³ஸஹிதங் பஞ்சமங் அவஹாரங்க³ங் வுத்தங், டா²னா சாவேதீதி ச இத³ங் உபலக்க²ணமத்தங். ஆணத்திகாத³யோ ஸப்³பே³பி பயோகா³ து⁴ரனிக்கே²போ ச இத⁴ ஸங்க³ஹேதப்³பா³வாதி த³ட்ட²ப்³ப³ங்.
122.Tattha tatthāti bhūmaṭṭhathalaṭṭhādīsu. Pāḷiyaṃ manussapariggahitaṃ sandhāya ‘‘parapariggahita’’nti vuttaṃ. Āmasati phandāpeti ṭhānā cāvetīti imehi tīhi padehi pubbapayogasahitaṃ pañcamaṃ avahāraṅgaṃ vuttaṃ, ṭhānā cāvetīti ca idaṃ upalakkhaṇamattaṃ. Āṇattikādayo sabbepi payogā dhuranikkhepo ca idha saṅgahetabbāvāti daṭṭhabbaṃ.
125. டா²னாசாவனந்தி இத³ங் பாளிஅனுஸாரதோ வுத்தங் து⁴ரனிக்கே²பஸ்ஸாபி ஸங்க³ஹேதப்³ப³தோ. ஏஸ நயோ உபரிபி ஸப்³ப³த்த². தத்த² ஹி ந ச ஸகஸஞ்ஞீதி இமினா பரபரிக்³க³ஹிததா வுத்தா, ந ச விஸ்ஸாஸக்³கா³ஹீ ந ச தாவகாலிகந்தி இமேஹி பரபரிக்³க³ஹிதஸஞ்ஞிதா, தீஹி வா ஏதேஹி பரபரிக்³க³ஹிததா பரபரிக்³க³ஹிதஸஞ்ஞிதா ச வுத்தாதி வேதி³தப்³பா³. அனஜ்ஜா²வுத்த²கந்தி ‘‘மமேத³’’ந்தி பரிக்³க³ஹவஸேன அனஜ்ஜா²வுத்த²கங் அரஞ்ஞே தா³ருதிணபண்ணாதி³. ச²ட்³டி³தந்தி பட²மங் பரிக்³க³ஹெத்வா பச்சா² அனத்தி²கதாய ச²ட்³டி³தங் யங் கிஞ்சி. சி²ன்னமூலகந்தி நட்ட²ங் பரியேஸித்வா ஆலயஸங்கா²தஸ்ஸ மூலஸ்ஸ சி²ன்னத்தா சி²ன்னமூலகங். அஸ்ஸாமிகந்தி அனஜ்ஜா²வுத்த²காதீ³ஹி தீஹி ஆகாரேஹி த³ஸ்ஸிதங் அஸ்ஸாமிகவத்து². உப⁴யம்பீதி அஸ்ஸாமிகங் அத்தனோ ஸந்தகஞ்ச.
125.Ṭhānācāvananti idaṃ pāḷianusārato vuttaṃ dhuranikkhepassāpi saṅgahetabbato. Esa nayo uparipi sabbattha. Tattha hi na ca sakasaññīti iminā parapariggahitatā vuttā, na ca vissāsaggāhī na ca tāvakālikanti imehi parapariggahitasaññitā, tīhi vā etehi parapariggahitatā parapariggahitasaññitā ca vuttāti veditabbā. Anajjhāvutthakanti ‘‘mameda’’nti pariggahavasena anajjhāvutthakaṃ araññe dārutiṇapaṇṇādi. Chaḍḍitanti paṭhamaṃ pariggahetvā pacchā anatthikatāya chaḍḍitaṃ yaṃ kiñci. Chinnamūlakanti naṭṭhaṃ pariyesitvā ālayasaṅkhātassa mūlassa chinnattā chinnamūlakaṃ. Assāmikanti anajjhāvutthakādīhi tīhi ākārehi dassitaṃ assāmikavatthu. Ubhayampīti assāmikaṃ attano santakañca.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. து³தியபாராஜிகங் • 2. Dutiyapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. து³தியபாராஜிகங் • 2. Dutiyapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஆபத்திபே⁴த³வண்ணனா • Āpattibhedavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஆபத்திபே⁴த³வண்ணனா • Āpattibhedavaṇṇanā
