| Library / Tipiṭaka / တိပိဋက • Tipiṭaka / သာရတ္ထဒီပနီ-ဋီကာ • Sāratthadīpanī-ṭīkā |
အာပတ္တိဘေဒဝဏ္ဏနာ
Āpattibhedavaṇṇanā
၁၂၂. တတ္ထ တတ္ထာတိ ဘူမဋ္ဌထလဋ္ဌာဒီသု။ အင္ဂဉ္စ ဒသ္သေန္တောတိ ယောဇေတဗ္ဗံ။ ဝတ္ထုဘေဒေနာတိ အဝဟရိတဗ္ဗသ္သ ဝတ္ထုသ္သ ဂရုကလဟုကဘေဒေန။ အာပတ္တိဘေဒန္တိ ပာရာဇိကထုလ္လစ္စယဒုက္ကဋာနံ ဝသေန အာပတ္တိဘေဒံ။ မနုသ္သဘူတေန ပရေန ပရိဂ္ဂဟိတံ ပရပရိဂ္ဂဟိတံ။
122.Tattha tatthāti bhūmaṭṭhathalaṭṭhādīsu. Aṅgañca dassentoti yojetabbaṃ. Vatthubhedenāti avaharitabbassa vatthussa garukalahukabhedena. Āpattibhedanti pārājikathullaccayadukkaṭānaṃ vasena āpattibhedaṃ. Manussabhūtena parena pariggahitaṃ parapariggahitaṃ.
၁၂၅. န စ သကသညီတိ ဣမိနာ ပန ပရပရိဂ္ဂဟိတံ ဝတ္ထု ကထိတံ။ န စ ဝိသ္သာသဂ္ဂာဟီ, န စ တာဝကာလိကန္တိ ဣမိနာ ပန ပရပရိဂ္ဂဟိတသညာ ကထိတာ။ န ဝိသ္သာသဂ္ဂာဟိတာတိ ဝိသ္သာသဂ္ဂာဟေန အဂ္ဂဟိတဘာဝော။ န တာဝကာလိကတာတိ ပစ္ဆာ ဒာတဗ္ဗတံ ကတ္ဝာ အဂ္ဂဟိတဘာဝော။ အနဇ္ဈာဝုတ္ထကန္တိ ‘‘မမေဒ’’န္တိ ပရိဂ္ဂဟဝသေန အနဇ္ဈာဝုတ္ထကံ အရညေ ဒာရုတိဏပဏ္ဏာဒိ။ ဆဍ္ဍိတန္တိ ကဋ္ဌဟာရာဒီဟိ အတိဘာရာဒိတာယ အနတ္ထိကဘာဝေန အရညာဒီသု ဆဍ္ဍိတံ။ ဆိန္နမူလကန္တိ နဋ္ဌံ ပရိယေသိတ္ဝာ အာလယသင္ခာတသ္သ မူလသ္သ ဆိန္နတ္တာ ဆိန္နမူလံ။ အသာမိကန္တိ အနဇ္ဈာဝုတ္ထကာဒီဟိ တီဟိ အာကာရေဟိ ဒသ္သိတံ အသာမိကဝတ္ထု။ ဥဘယမ္ပီတိ ယထာဝုတ္တလက္ခဏံ အသာမိကံ အတ္တနော သန္တကဉ္စ။
125.Naca sakasaññīti iminā pana parapariggahitaṃ vatthu kathitaṃ. Na ca vissāsaggāhī, na ca tāvakālikanti iminā pana parapariggahitasaññā kathitā. Na vissāsaggāhitāti vissāsaggāhena aggahitabhāvo. Na tāvakālikatāti pacchā dātabbataṃ katvā aggahitabhāvo. Anajjhāvutthakanti ‘‘mameda’’nti pariggahavasena anajjhāvutthakaṃ araññe dārutiṇapaṇṇādi. Chaḍḍitanti kaṭṭhahārādīhi atibhārāditāya anatthikabhāvena araññādīsu chaḍḍitaṃ. Chinnamūlakanti naṭṭhaṃ pariyesitvā ālayasaṅkhātassa mūlassa chinnattā chinnamūlaṃ. Asāmikanti anajjhāvutthakādīhi tīhi ākārehi dassitaṃ asāmikavatthu. Ubhayampīti yathāvuttalakkhaṇaṃ asāmikaṃ attano santakañca.
အာပတ္တိဘေဒဝဏ္ဏနာ နိဋ္ဌိတာ။
Āpattibhedavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၂. ဒုတိယပာရာဇိကံ • 2. Dutiyapārājikaṃ
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā / ၂. ဒုတိယပာရာဇိကံ • 2. Dutiyapārājikaṃ
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / အာပတ္တိဘေဒဝဏ္ဏနာ • Āpattibhedavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / အာပတ္တိဘေဒဝဏ္ဏနာ • Āpattibhedavaṇṇanā
