| Library / Tipiṭaka / তিপিটক • Tipiṭaka / মহাৰগ্গপাল়ি • Mahāvaggapāḷi |
৯২. আপত্তিপটিকম্মৰিধি
92. Āpattipaṭikammavidhi
১৬৯. তেন খো পন সমযেন অঞ্ঞতরো ভিক্খু তদহুপোসথে আপত্তিং আপন্নো হোতি। অথ খো তস্স ভিক্খুনো এতদহোসি – ‘‘ভগৰতা পঞ্ঞত্তং ‘ন সাপত্তিকেন উপোসথো কাতব্বো’তি। অহঞ্চম্হি আপত্তিং আপন্নো। কথং নু খো মযা পটিপজ্জিতব্ব’’ন্তি? ভগৰতো এতমত্থং আরোচেসুং। ইধ পন, ভিক্খৰে, ভিক্খু তদহুপোসথে আপত্তিং আপন্নো হোতি। তেন, ভিক্খৰে, ভিক্খুনা একং ভিক্খুং উপসঙ্কমিত্ৰা একংসং উত্তরাসঙ্গং করিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্স ৰচনীযো – ‘‘অহং, আৰুসো, ইত্থন্নামং আপত্তিং আপন্নো, তং পটিদেসেমী’’তি। তেন ৰত্তব্বো – ‘‘পস্সসী’’তি। ‘‘আম পস্সামী’’তি। ‘‘আযতিং সংৰরেয্যাসী’’তি।
169. Tena kho pana samayena aññataro bhikkhu tadahuposathe āpattiṃ āpanno hoti. Atha kho tassa bhikkhuno etadahosi – ‘‘bhagavatā paññattaṃ ‘na sāpattikena uposatho kātabbo’ti. Ahañcamhi āpattiṃ āpanno. Kathaṃ nu kho mayā paṭipajjitabba’’nti? Bhagavato etamatthaṃ ārocesuṃ. Idha pana, bhikkhave, bhikkhu tadahuposathe āpattiṃ āpanno hoti. Tena, bhikkhave, bhikkhunā ekaṃ bhikkhuṃ upasaṅkamitvā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā evamassa vacanīyo – ‘‘ahaṃ, āvuso, itthannāmaṃ āpattiṃ āpanno, taṃ paṭidesemī’’ti. Tena vattabbo – ‘‘passasī’’ti. ‘‘Āma passāmī’’ti. ‘‘Āyatiṃ saṃvareyyāsī’’ti.
ইধ পন, ভিক্খৰে, ভিক্খু তদহুপোসথে আপত্তিযা ৰেমতিকো হোতি। তেন, ভিক্খৰে, ভিক্খুনা একং ভিক্খুং উপসঙ্কমিত্ৰা একংসং উত্তরাসঙ্গং করিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্স ৰচনীযো – ‘‘অহং, আৰুসো, ইত্থন্নামায আপত্তিযা ৰেমতিকো; যদা নিব্বেমতিকো ভৰিস্সামি, তদা তং আপত্তিং পটিকরিস্সামী’’তি ৰত্ৰা উপোসথো কাতব্বো, পাতিমোক্খং সোতব্বং, ন ত্ৰেৰ তপ্পচ্চযা উপোসথস্স অন্তরাযো কাতব্বোতি।
Idha pana, bhikkhave, bhikkhu tadahuposathe āpattiyā vematiko hoti. Tena, bhikkhave, bhikkhunā ekaṃ bhikkhuṃ upasaṅkamitvā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā evamassa vacanīyo – ‘‘ahaṃ, āvuso, itthannāmāya āpattiyā vematiko; yadā nibbematiko bhavissāmi, tadā taṃ āpattiṃ paṭikarissāmī’’ti vatvā uposatho kātabbo, pātimokkhaṃ sotabbaṃ, na tveva tappaccayā uposathassa antarāyo kātabboti.
তেন খো পন সমযেন ছব্বগ্গিযা ভিক্খূ সভাগং আপত্তিং দেসেন্তি। ভগৰতো এতমত্থং আরোচেসুং। ন, ভিক্খৰে, সভাগা আপত্তি দেসেতব্বা। যো দেসেয্য, আপত্তি দুক্কটস্সাতি।
Tena kho pana samayena chabbaggiyā bhikkhū sabhāgaṃ āpattiṃ desenti. Bhagavato etamatthaṃ ārocesuṃ. Na, bhikkhave, sabhāgā āpatti desetabbā. Yo deseyya, āpatti dukkaṭassāti.
তেন খো পন সমযেন ছব্বগ্গিযা ভিক্খূ সভাগং আপত্তিং পটিগ্গণ্হন্তি। ভগৰতো এতমত্থং আরোচেসুং। ন, ভিক্খৰে, সভাগা আপত্তি পটিগ্গহেতব্বা। যো পটিগ্গণ্হেয্য, আপত্তি দুক্কটস্সাতি।
Tena kho pana samayena chabbaggiyā bhikkhū sabhāgaṃ āpattiṃ paṭiggaṇhanti. Bhagavato etamatthaṃ ārocesuṃ. Na, bhikkhave, sabhāgā āpatti paṭiggahetabbā. Yo paṭiggaṇheyya, āpatti dukkaṭassāti.
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / আপত্তিপটিকম্মৰিধিকথা • Āpattipaṭikammavidhikathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / আপত্তিপটিকম্মৰিধিকথাৰণ্ণনা • Āpattipaṭikammavidhikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / আপত্তিপটিকম্মৰিধিকথাদিৰণ্ণনা • Āpattipaṭikammavidhikathādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ছন্দদানকথাদিৰণ্ণনা • Chandadānakathādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৯২. আপত্তিপটিকম্মৰিধিকথা • 92. Āpattipaṭikammavidhikathā
