| Library / Tipiṭaka / තිපිටක • Tipiṭaka / මහාවග්‌ගපාළි • Mahāvaggapāḷi |
125. ආපත්‌තිපටිකම්‌මවිධි
125. Āpattipaṭikammavidhi
219. තෙන ඛො පන සමයෙන අඤ්‌ඤතරො භික්‌ඛු තදහු පවාරණාය ආපත්‌තිං ආපන්‌නො හොති. අථ ඛො තස්‌ස භික්‌ඛුනො එතදහොසි – ‘‘භගවතා පඤ්‌ඤත්‌තං ‘න සාපත්‌තිකෙන පවාරෙතබ්‌බ’න්‌ති. අහඤ්‌චම්‌හි ආපත්‌තිං ආපන්‌නො. කථං නු ඛො මයා පටිපජ්‌ජිතබ්‌බ’’න්‌ති? භගවතො එතමත්‌ථං ආරොචෙසුං 1.
219. Tena kho pana samayena aññataro bhikkhu tadahu pavāraṇāya āpattiṃ āpanno hoti. Atha kho tassa bhikkhuno etadahosi – ‘‘bhagavatā paññattaṃ ‘na sāpattikena pavāretabba’nti. Ahañcamhi āpattiṃ āpanno. Kathaṃ nu kho mayā paṭipajjitabba’’nti? Bhagavato etamatthaṃ ārocesuṃ 2.
ඉධ පන, භික්‌ඛවෙ, භික්‌ඛු තදහු පවාරණාය ආපත්‌තිං ආපන්‌නො හොති. තෙන, භික්‌ඛවෙ, භික්‌ඛුනා එකං භික්‌ඛුං උපසඞ්‌කමිත්‌වා එකංසං උත්‌තරාසඞ්‌ගං කරිත්‌වා උක්‌කුටිකං නිසීදිත්‌වා අඤ්‌ජලිං පග්‌ගහෙත්‌වා එවමස්‌ස වචනීයො – ‘‘අහං, ආවුසො, ඉත්‌ථන්‌නාමං ආපත්‌තිං ආපන්‌නො, තං පටිදෙසෙමී’’ති. තෙන වත්‌තබ්‌බො – ‘‘පස්‌සසී’’ති. ආම පස්‌සාමීති. ආයතිං සංවරෙය්‍යාසීති.
Idha pana, bhikkhave, bhikkhu tadahu pavāraṇāya āpattiṃ āpanno hoti. Tena, bhikkhave, bhikkhunā ekaṃ bhikkhuṃ upasaṅkamitvā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā evamassa vacanīyo – ‘‘ahaṃ, āvuso, itthannāmaṃ āpattiṃ āpanno, taṃ paṭidesemī’’ti. Tena vattabbo – ‘‘passasī’’ti. Āma passāmīti. Āyatiṃ saṃvareyyāsīti.
ඉධ පන, භික්‌ඛවෙ, භික්‌ඛු තදහු පවාරණාය ආපත්‌තියා වෙමතිකො හොති. තෙන, භික්‌ඛවෙ, භික්‌ඛුනා එකං භික්‌ඛුං උපසඞ්‌කමිත්‌වා එකංසං උත්‌තරාසඞ්‌ගං කරිත්‌වා උක්‌කුටිකං නිසීදිත්‌වා අඤ්‌ජලිං පග්‌ගහෙත්‌වා එවමස්‌ස වචනීයො – ‘‘අහං, ආවුසො, ඉත්‌ථන්‌නාමාය ආපත්‌තියා වෙමතිකො; යදා නිබ්‌බෙමතිකො භවිස්‌සාමි තදා තං ආපත්‌තිං පටිකරිස්‌සාමී’’ති වත්‌වා පවාරෙතබ්‌බං; න ත්‌වෙව තප්‌පච්‌චයා පවාරණාය අන්‌තරායො කාතබ්‌බොති.
Idha pana, bhikkhave, bhikkhu tadahu pavāraṇāya āpattiyā vematiko hoti. Tena, bhikkhave, bhikkhunā ekaṃ bhikkhuṃ upasaṅkamitvā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā evamassa vacanīyo – ‘‘ahaṃ, āvuso, itthannāmāya āpattiyā vematiko; yadā nibbematiko bhavissāmi tadā taṃ āpattiṃ paṭikarissāmī’’ti vatvā pavāretabbaṃ; na tveva tappaccayā pavāraṇāya antarāyo kātabboti.
ආපත්‌තිපටිකම්‌මවිධි නිට්‌ඨිතා.
Āpattipaṭikammavidhi niṭṭhitā.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / පවාරණාදානානුජානනකථා • Pavāraṇādānānujānanakathā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 121. පවාරණාභෙදකථා • 121. Pavāraṇābhedakathā
